| Library / Tipiṭaka / ತಿಪಿಟಕ • Tipiṭaka / ಅಪದಾನಪಾಳಿ • Apadānapāḷi |
೯. ರಾಧತ್ಥೇರಅಪದಾನಂ
9. Rādhattheraapadānaṃ
೨೯೬.
296.
‘‘ಪದುಮುತ್ತರೋ ನಾಮ ಜಿನೋ, ಸಬ್ಬಲೋಕವಿದೂ ಮುನಿ।
‘‘Padumuttaro nāma jino, sabbalokavidū muni;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ಚಕ್ಖುಮಾ॥
Ito satasahassamhi, kappe uppajji cakkhumā.
೨೯೭.
297.
‘‘ಓವಾದಕೋ ವಿಞ್ಞಾಪಕೋ, ತಾರಕೋ ಸಬ್ಬಪಾಣಿನಂ।
‘‘Ovādako viññāpako, tārako sabbapāṇinaṃ;
ದೇಸನಾಕುಸಲೋ ಬುದ್ಧೋ, ತಾರೇಸಿ ಜನತಂ ಬಹುಂ॥
Desanākusalo buddho, tāresi janataṃ bahuṃ.
೨೯೮.
298.
‘‘ಅನುಕಮ್ಪಕೋ ಕಾರುಣಿಕೋ, ಹಿತೇಸೀ ಸಬ್ಬಪಾಣಿನಂ।
‘‘Anukampako kāruṇiko, hitesī sabbapāṇinaṃ;
ಸಮ್ಪತ್ತೇ ತಿತ್ಥಿಯೇ ಸಬ್ಬೇ, ಪಞ್ಚಸೀಲೇ ಪತಿಟ್ಠಪಿ॥
Sampatte titthiye sabbe, pañcasīle patiṭṭhapi.
೨೯೯.
299.
‘‘ಏವಂ ನಿರಾಕುಲಂ ಆಸಿ, ಸುಞ್ಞತಂ ತಿತ್ಥಿಯೇಹಿ ಚ।
‘‘Evaṃ nirākulaṃ āsi, suññataṃ titthiyehi ca;
ವಿಚಿತ್ತಂ ಅರಹನ್ತೇಹಿ, ವಸೀಭೂತೇಹಿ ತಾದಿಭಿ॥
Vicittaṃ arahantehi, vasībhūtehi tādibhi.
೩೦೦.
300.
‘‘ರತನಾನಟ್ಠಪಞ್ಞಾಸಂ, ಉಗ್ಗತೋ ಸೋ ಮಹಾಮುನಿ।
‘‘Ratanānaṭṭhapaññāsaṃ, uggato so mahāmuni;
ಕಞ್ಚನಗ್ಘಿಯಸಙ್ಕಾಸೋ, ಬಾತ್ತಿಂಸವರಲಕ್ಖಣೋ॥
Kañcanagghiyasaṅkāso, bāttiṃsavaralakkhaṇo.
೩೦೧.
301.
‘‘ವಸ್ಸಸತಸಹಸ್ಸಾನಿ, ಆಯು ವಿಜ್ಜತಿ ತಾವದೇ।
‘‘Vassasatasahassāni, āyu vijjati tāvade;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ॥
Tāvatā tiṭṭhamāno so, tāresi janataṃ bahuṃ.
೩೦೨.
302.
‘‘ತದಾಹಂ ಹಂಸವತಿಯಂ, ಬ್ರಾಹ್ಮಣೋ ಮನ್ತಪಾರಗೂ।
‘‘Tadāhaṃ haṃsavatiyaṃ, brāhmaṇo mantapāragū;
ಉಪೇಚ್ಚ ತಂ ನರವರಂ, ಅಸ್ಸೋಸಿಂ ಧಮ್ಮದೇಸನಂ॥
Upecca taṃ naravaraṃ, assosiṃ dhammadesanaṃ.
೩೦೩.
303.
‘‘ಪಞ್ಞಪೇನ್ತಂ ಮಹಾವೀರಂ, ಪರಿಸಾಸು ವಿಸಾರದಂ।
‘‘Paññapentaṃ mahāvīraṃ, parisāsu visāradaṃ;
ಪಟಿಭಾನೇಯ್ಯಕಂ ಭಿಕ್ಖುಂ, ಏತದಗ್ಗೇ ವಿನಾಯಕಂ॥
Paṭibhāneyyakaṃ bhikkhuṃ, etadagge vināyakaṃ.
೩೦೪.
304.
‘‘ತದಾಹಂ ಕಾರಂ ಕತ್ವಾನ, ಸಸಙ್ಘೇ ಲೋಕನಾಯಕೇ।
‘‘Tadāhaṃ kāraṃ katvāna, sasaṅghe lokanāyake;
ನಿಪಚ್ಚ ಸಿರಸಾ ಪಾದೇ, ತಂ ಠಾನಂ ಅಭಿಪತ್ಥಯಿಂ॥
Nipacca sirasā pāde, taṃ ṭhānaṃ abhipatthayiṃ.
೩೦೫.
305.
‘‘ತತೋ ಮಂ ಭಗವಾ ಆಹ, ಸಿಙ್ಗೀನಿಕ್ಖಸಮಪ್ಪಭೋ।
‘‘Tato maṃ bhagavā āha, siṅgīnikkhasamappabho;
ಸರೇನ ರಜನೀಯೇನ, ಕಿಲೇಸಮಲಹಾರಿನಾ॥
Sarena rajanīyena, kilesamalahārinā.
೩೦೬.
306.
‘‘‘ಸುಖೀ ಭವಸ್ಸು ದೀಘಾಯು, ಸಿಜ್ಝತು ಪಣಿಧೀ ತವ।
‘‘‘Sukhī bhavassu dīghāyu, sijjhatu paṇidhī tava;
ಸಸಙ್ಘೇ ಮೇ ಕತಂ ಕಾರಂ, ಅತೀವ ವಿಪುಲಂ ತಯಾ॥
Sasaṅghe me kataṃ kāraṃ, atīva vipulaṃ tayā.
೩೦೭.
307.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ।
‘‘‘Satasahassito kappe, okkākakulasambhavo;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ॥
Gotamo nāma gottena, satthā loke bhavissati.
೩೦೮.
308.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ।
‘‘‘Tassa dhammesu dāyādo, oraso dhammanimmito;
ರಾಧೋತಿ ನಾಮಧೇಯ್ಯೇನ, ಹೇಸ್ಸತಿ ಸತ್ಥು ಸಾವಕೋ॥
Rādhoti nāmadheyyena, hessati satthu sāvako.
೩೦೯.
309.
ಪಟಿಭಾನೇಯ್ಯಕಾನಗ್ಗಂ, ಪಞ್ಞಪೇಸ್ಸತಿ ನಾಯಕೋ’॥
Paṭibhāneyyakānaggaṃ, paññapessati nāyako’.
೩೧೦.
310.
‘‘ತಂ ಸುತ್ವಾ ಮುದಿತೋ ಹುತ್ವಾ, ಯಾವಜೀವಂ ತದಾ ಜಿನಂ।
‘‘Taṃ sutvā mudito hutvā, yāvajīvaṃ tadā jinaṃ;
ಮೇತ್ತಚಿತ್ತೋ ಪರಿಚರಿಂ, ಸತೋ ಪಞ್ಞಾಸಮಾಹಿತೋ॥
Mettacitto paricariṃ, sato paññāsamāhito.
೩೧೧.
311.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ।
‘‘Tena kammena sukatena, cetanāpaṇidhīhi ca;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ॥
Jahitvā mānusaṃ dehaṃ, tāvatiṃsamagacchahaṃ.
೩೧೨.
312.
‘‘ಸತಾನಂ ತೀಣಿಕ್ಖತ್ತುಞ್ಚ, ದೇವರಜ್ಜಮಕಾರಯಿಂ।
‘‘Satānaṃ tīṇikkhattuñca, devarajjamakārayiṃ;
ಸತಾನಂ ಪಞ್ಚಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ॥
Satānaṃ pañcakkhattuñca, cakkavattī ahosahaṃ.
೩೧೩.
313.
‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ।
‘‘Padesarajjaṃ vipulaṃ, gaṇanāto asaṅkhiyaṃ;
ಸಬ್ಬತ್ಥ ಸುಖಿತೋ ಆಸಿಂ, ತಸ್ಸ ಕಮ್ಮಸ್ಸ ವಾಹಸಾ॥
Sabbattha sukhito āsiṃ, tassa kammassa vāhasā.
೩೧೪.
314.
‘‘ಪಚ್ಛಿಮೇ ಭವೇ ಸಮ್ಪತ್ತೇ, ಗಿರಿಬ್ಬಜಪುರುತ್ತಮೇ।
‘‘Pacchime bhave sampatte, giribbajapuruttame;
ಜಾತೋ ವಿಪ್ಪಕುಲೇ ನಿದ್ಧೇ, ವಿಕಲಚ್ಛಾದನಾಸನೇ॥
Jāto vippakule niddhe, vikalacchādanāsane.
೩೧೫.
315.
‘‘ಕಟಚ್ಛುಭಿಕ್ಖಂ ಪಾದಾಸಿಂ, ಸಾರಿಪುತ್ತಸ್ಸ ತಾದಿನೋ।
‘‘Kaṭacchubhikkhaṃ pādāsiṃ, sāriputtassa tādino;
ಯದಾ ಜಿಣ್ಣೋ ಚ ವುದ್ಧೋ ಚ, ತದಾರಾಮಮುಪಾಗಮಿಂ॥
Yadā jiṇṇo ca vuddho ca, tadārāmamupāgamiṃ.
೩೧೬.
316.
೩೧೭.
317.
‘ಕಿಮತ್ಥಂ ಪುತ್ತಸೋಕಟ್ಟೋ, ಬ್ರೂಹಿ ತೇ ಚಿತ್ತಜಂ ರುಜಂ’॥
‘Kimatthaṃ puttasokaṭṭo, brūhi te cittajaṃ rujaṃ’.
೩೧೮.
318.
‘‘‘ಪಬ್ಬಜ್ಜಂ ನ ಲಭೇ ವೀರ, ಸ್ವಾಕ್ಖಾತೇ ತವ ಸಾಸನೇ।
‘‘‘Pabbajjaṃ na labhe vīra, svākkhāte tava sāsane;
ತೇನ ಸೋಕೇನ ದೀನೋಸ್ಮಿ, ಸರಣಂ ಹೋಹಿ ನಾಯಕ’॥
Tena sokena dīnosmi, saraṇaṃ hohi nāyaka’.
೩೧೯.
319.
‘‘ತದಾ ಭಿಕ್ಖೂ ಸಮಾನೇತ್ವಾ, ಅಪುಚ್ಛಿ ಮುನಿಸತ್ತಮೋ।
‘‘Tadā bhikkhū samānetvā, apucchi munisattamo;
‘ಇಮಸ್ಸ ಅಧಿಕಾರಂ ಯೇ, ಸರನ್ತಿ ಬ್ಯಾಹರನ್ತು ತೇ’॥
‘Imassa adhikāraṃ ye, saranti byāharantu te’.
೩೨೦.
320.
‘‘ಸಾರಿಪುತ್ತೋ ತದಾವೋಚ, ‘ಕಾರಮಸ್ಸ ಸರಾಮಹಂ।
‘‘Sāriputto tadāvoca, ‘kāramassa sarāmahaṃ;
ಕಟಚ್ಛುಭಿಕ್ಖಂ ದಾಪೇಸಿ, ಪಿಣ್ಡಾಯ ಚರತೋ ಮಮ’॥
Kaṭacchubhikkhaṃ dāpesi, piṇḍāya carato mama’.
೩೨೧.
321.
‘‘‘ಸಾಧು ಸಾಧು ಕತಞ್ಞೂಸಿ, ಸಾರಿಪುತ್ತ ಇಮಂ ತುವಂ।
‘‘‘Sādhu sādhu kataññūsi, sāriputta imaṃ tuvaṃ;
ಪಬ್ಬಾಜೇಹಿ ದಿಜಂ ವುಡ್ಢಂ, ಹೇಸ್ಸತಾಜಾನಿಯೋ ಅಯಂ’॥
Pabbājehi dijaṃ vuḍḍhaṃ, hessatājāniyo ayaṃ’.
೩೨೨.
322.
‘‘ತತೋ ಅಲತ್ಥಂ ಪಬ್ಬಜ್ಜಂ, ಕಮ್ಮವಾಚೋಪಸಮ್ಪದಂ।
‘‘Tato alatthaṃ pabbajjaṃ, kammavācopasampadaṃ;
ನ ಚಿರೇನೇವ ಕಾಲೇನ, ಪಾಪುಣಿಂ ಆಸವಕ್ಖಯಂ॥
Na cireneva kālena, pāpuṇiṃ āsavakkhayaṃ.
೩೨೩.
323.
‘‘ಸಕ್ಕಚ್ಚಂ ಮುನಿನೋ ವಾಕ್ಯಂ, ಸುಣಾಮಿ ಮುದಿತೋ ಯತೋ।
‘‘Sakkaccaṃ munino vākyaṃ, suṇāmi mudito yato;
ಪಟಿಭಾನೇಯ್ಯಕಾನಗ್ಗಂ, ತತೋ ಮಂ ಠಪಯೀ ಜಿನೋ॥
Paṭibhāneyyakānaggaṃ, tato maṃ ṭhapayī jino.
೩೨೪.
324.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ॰… ವಿಹರಾಮಿ ಅನಾಸವೋ॥
‘‘Kilesā jhāpitā mayhaṃ…pe… viharāmi anāsavo.
೩೨೫.
325.
‘‘ಸ್ವಾಗತಂ ವತ ಮೇ ಆಸಿ…ಪೇ॰… ಕತಂ ಬುದ್ಧಸ್ಸ ಸಾಸನಂ॥
‘‘Svāgataṃ vata me āsi…pe… kataṃ buddhassa sāsanaṃ.
೩೨೬.
326.
‘‘ಪಟಿಸಮ್ಭಿದಾ ಚತಸ್ಸೋ…ಪೇ॰… ಕತಂ ಬುದ್ಧಸ್ಸ ಸಾಸನಂ’’॥
‘‘Paṭisambhidā catasso…pe… kataṃ buddhassa sāsanaṃ’’.
ಇತ್ಥಂ ಸುದಂ ಆಯಸ್ಮಾ ರಾಧೋ ಥೇರೋ ಇಮಾ ಗಾಥಾಯೋ
Itthaṃ sudaṃ āyasmā rādho thero imā gāthāyo
ಅಭಾಸಿತ್ಥಾತಿ।
Abhāsitthāti.
ರಾಧತ್ಥೇರಸ್ಸಾಪದಾನಂ ನವಮಂ।
Rādhattherassāpadānaṃ navamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಅಪದಾನ-ಅಟ್ಠಕಥಾ • Apadāna-aṭṭhakathā / ೯. ರಾಧತ್ಥೇರಅಪದಾನವಣ್ಣನಾ • 9. Rādhattheraapadānavaṇṇanā
