| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
7. ராஹுலஸுத்தவண்ணனா
7. Rāhulasuttavaṇṇanā
177. ஸத்தமே அஜ்ஜ²த்திகாதி கேஸாதீ³ஸு வீஸதியா கொட்டா²ஸேஸு த²த்³தா⁴காரலக்க²ணா பத²வீதா⁴து. பா³ஹிராதி ப³ஹித்³தா⁴ அனிந்த்³ரியப³த்³தே⁴ஸு பாஸாணபப்³ப³தாதீ³ஸு த²த்³தா⁴காரலக்க²ணா பத²வீதா⁴து . இமினாவ நயேன ஸேஸாபி தா⁴துயோ வேதி³தப்³பா³. நேதங் மம, நேஸோஹமஸ்மி, ந மேஸோ அத்தாதி இத³ங் தயங் தண்ஹாமானதி³ட்டி²க்³கா³ஹபடிக்கே²பவஸேன வுத்தங். ஸம்மப்பஞ்ஞாய த³ட்ட²ப்³ப³ந்தி ஹேதுனா காரணேன மக்³க³பஞ்ஞாய பஸ்ஸிதப்³ப³ங். தி³ஸ்வாதி ஸஹவிபஸ்ஸனாய மக்³க³பஞ்ஞாய பஸ்ஸித்வா. அச்செ²ச்சி² தண்ஹந்தி மக்³க³வஜ்ஜ²தண்ஹங் ஸமூலகங் சி²ந்தி³. விவத்தயி ஸங்யோஜனந்தி த³ஸவித⁴ம்பி ஸங்யோஜனங் விவத்தயி உப்³ப³த்தெத்வா பஜஹி. ஸம்மா மானாபி⁴ஸமயாதி ஹேதுனா காரணேன நவவித⁴ஸ்ஸ மானஸ்ஸ பஹானாபி⁴ஸமயா. அந்தமகாஸி து³க்க²ஸ்ஸாதி வட்டது³க்க²ங் பரிச்சி²ன்னங் பரிவடுமங் அகாஸி, கத்வா டி²தோதி அத்தோ². இதி ஸத்தா²ரா ஸங்யுத்தமஹானிகாயே ராஹுலோவாதே³ (ஸங்॰ நி॰ 3.91 ஆத³யோ) விபஸ்ஸனா கதி²தா, சூளராஹுலோவாதே³பி (ம॰ நி॰ 3.416 ஆத³யோ) விபஸ்ஸனா கதி²தா, அம்ப³லட்டி²கராஹுலோவாதே³ (ம॰ நி॰ 2.107 ஆத³யோ) த³ஹரஸ்ஸேவ ஸதோ முஸாவாதா³ வேரமணீ கதி²தா, மஹாராஹுலோவாதே³ (ம॰ நி॰ 2.113 ஆத³யோ) விபஸ்ஸனா கதி²தா. இமஸ்மிங் அங்கு³த்தரமஹானிகாயே அயங் சதுகோடிகஸுஞ்ஞதா நாம கதி²தாதி.
177. Sattame ajjhattikāti kesādīsu vīsatiyā koṭṭhāsesu thaddhākāralakkhaṇā pathavīdhātu. Bāhirāti bahiddhā anindriyabaddhesu pāsāṇapabbatādīsu thaddhākāralakkhaṇā pathavīdhātu . Imināva nayena sesāpi dhātuyo veditabbā. Netaṃ mama, nesohamasmi, na meso attāti idaṃ tayaṃ taṇhāmānadiṭṭhiggāhapaṭikkhepavasena vuttaṃ. Sammappaññāya daṭṭhabbanti hetunā kāraṇena maggapaññāya passitabbaṃ. Disvāti sahavipassanāya maggapaññāya passitvā. Acchecchi taṇhanti maggavajjhataṇhaṃ samūlakaṃ chindi. Vivattayi saṃyojananti dasavidhampi saṃyojanaṃ vivattayi ubbattetvā pajahi. Sammā mānābhisamayāti hetunā kāraṇena navavidhassa mānassa pahānābhisamayā. Antamakāsi dukkhassāti vaṭṭadukkhaṃ paricchinnaṃ parivaṭumaṃ akāsi, katvā ṭhitoti attho. Iti satthārā saṃyuttamahānikāye rāhulovāde (saṃ. ni. 3.91 ādayo) vipassanā kathitā, cūḷarāhulovādepi (ma. ni. 3.416 ādayo) vipassanā kathitā, ambalaṭṭhikarāhulovāde (ma. ni. 2.107 ādayo) daharasseva sato musāvādā veramaṇī kathitā, mahārāhulovāde (ma. ni. 2.113 ādayo) vipassanā kathitā. Imasmiṃ aṅguttaramahānikāye ayaṃ catukoṭikasuññatā nāma kathitāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. ராஹுலஸுத்தங் • 7. Rāhulasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7. ராஹுலஸுத்தவண்ணனா • 7. Rāhulasuttavaṇṇanā
