| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
10. ராஜஸிக்கா²பத³வண்ணனா
10. Rājasikkhāpadavaṇṇanā
‘‘டா²னங் ப⁴ஞ்ஜதி, ஆக³தகாரணங் வினாஸேதீ’’தி வுத்தத்தா புன சோத³னங் ந லப⁴தீதி ஏகே. ஆக³மனஸ்ஸ ஸாத்த²கங் ந ஹோதி, சீவரங் ந லபி⁴ஸ்ஸதி படிஸந்தா²ரஸ்ஸ கதத்தாதி ஏகே. சோத³னாலக்க²ணங் ந ஹோதீதி கத்வா வுத்தந்தி ஏகே. ‘‘த⁴ம்மதே³ஸனாதி⁴ப்பாயாதி³னா ந படிஸந்தா²ரோ காதப்³போ³’’தி உபதிஸ்ஸத்தே²ரோ ‘‘‘ஆக³தகாரணங் வினாஸேதீ’தி சோத³னாடா²னானி ப⁴ஞ்ஜதி, சோதே³துகாமோ அகத்தப்³ப³மகாஸி, தப்பச்சயா வத்தபே⁴தே³ து³க்கட’’ந்தி ச வத³தி. த⁴ம்மஸிரித்தே²ரோ பன ‘‘ஆஸனே சே நிஸீத³தி, ஏகாய நிஸஜ்ஜாய த்³வே டா²னானி ப⁴ஞ்ஜதி. ஆமிஸங் சே படிக்³க³ண்ஹாதி, ஏகேன படிக்³க³ஹணேன த்³வே டா²னானி ப⁴ஞ்ஜதி. த⁴ம்மங் சே பா⁴ஸதி, த⁴ம்மதே³ஸனாஸிக்கா²பதே³ வுத்தபரிச்சே²தா³ய ஏகாய வாசாய த்³வே டா²னானி ப⁴ஞ்ஜதி. தங் ஸந்தா⁴ய ‘ஆக³தகாரணங் வினாஸேதீ’தி வுத்த’’ந்தி வத³தி. ‘‘ஏஸோ கோ²’’தி வுத்தேன ஸஞ்ஞத்தோ ஏகோ, ‘‘அயங் வெய்யாவச்சகரோதி…பே॰… அவுத்தேபி சோதே³துங் வட்டதீ’’தி வுத்தோ து³தியோ, ஸசே பன தூ³தோ க³ச்ச²ந்தோவ ‘‘அஹங் தஸ்ஸ ஹத்தே² த³ஸ்ஸாமீ’’திஆதி³னா வுத்தோ ததியோ, ‘‘அஞ்ஞங் வா பேஸெத்வா ஆரோசாபேதீ’’தி வுத்தோ சதுத்தோ²தி யதா² பி⁴க்கு²னா நித்³தி³ட்டா² சத்தாரோ, ததே²வ தூ³தேன நித்³தி³ட்டா² சத்தாரோ. முக²வேவடிககப்பியகாரகோ, பரம்முக²கப்பியகாரகோ சேதி ஏதேஸு அஞ்ஞாதகஅப்பவாரிதேஸு விய படிபஜ்ஜிதப்³ப³ந்தி லிகி²தங்.
‘‘Ṭhānaṃ bhañjati, āgatakāraṇaṃ vināsetī’’ti vuttattā puna codanaṃ na labhatīti eke. Āgamanassa sātthakaṃ na hoti, cīvaraṃ na labhissati paṭisanthārassa katattāti eke. Codanālakkhaṇaṃ na hotīti katvā vuttanti eke. ‘‘Dhammadesanādhippāyādinā na paṭisanthāro kātabbo’’ti upatissatthero ‘‘‘āgatakāraṇaṃ vināsetī’ti codanāṭhānāni bhañjati, codetukāmo akattabbamakāsi, tappaccayā vattabhede dukkaṭa’’nti ca vadati. Dhammasiritthero pana ‘‘āsane ce nisīdati, ekāya nisajjāya dve ṭhānāni bhañjati. Āmisaṃ ce paṭiggaṇhāti, ekena paṭiggahaṇena dve ṭhānāni bhañjati. Dhammaṃ ce bhāsati, dhammadesanāsikkhāpade vuttaparicchedāya ekāya vācāya dve ṭhānāni bhañjati. Taṃ sandhāya ‘āgatakāraṇaṃ vināsetī’ti vutta’’nti vadati. ‘‘Eso kho’’ti vuttena saññatto eko, ‘‘ayaṃ veyyāvaccakaroti…pe… avuttepi codetuṃ vaṭṭatī’’ti vutto dutiyo, sace pana dūto gacchantova ‘‘ahaṃ tassa hatthe dassāmī’’tiādinā vutto tatiyo, ‘‘aññaṃ vā pesetvā ārocāpetī’’ti vutto catutthoti yathā bhikkhunā niddiṭṭhā cattāro, tatheva dūtena niddiṭṭhā cattāro. Mukhavevaṭikakappiyakārako, parammukhakappiyakārako ceti etesu aññātakaappavāritesu viya paṭipajjitabbanti likhitaṃ.
ராஜஸிக்கா²பத³வண்ணனா நிட்டி²தா.
Rājasikkhāpadavaṇṇanā niṭṭhitā.
சீவரவக்³கோ³ பட²மோ.
Cīvaravaggo paṭhamo.
