| Library / Tipiṭaka / д̇ибидага • Tipiṭaka / махаавибхан̇г̇а-адтагат̇аа • Mahāvibhaṅga-aṭṭhakathā |
10. рааж̇асигкаабад̣̇аван̣н̣анаа
10. Rājasikkhāpadavaṇṇanā
537. д̇зна самаязнаад̇и рааж̇асигкаабад̣̇ам̣. д̇ад̇т̇а убаасагам̣ сан̃н̃аабзд̇ваад̇и ж̇аанаабзд̇ваа, ‘‘иминаа муулзна жийварам̣ гин̣ид̇ваа т̇зрасса д̣̇зхий’’д̇и звам̣ вад̇ваад̇и ад̇хиббааяо. бан̃н̃аасаб̣анд̇ход̇и бан̃н̃аасагахаабан̣ад̣̇ан̣д̣од̇и вуд̇д̇ам̣ ход̇и. бан̃н̃аасам̣ б̣ад̣̇д̇ход̇иби баато, бан̃н̃аасам̣ ж̇ид̇о бан̃н̃аасам̣ д̣̇аабзд̇аб̣б̣од̇и ад̇хиббааяо. аж̇ж̇ан̣хо, бханд̇з, ааг̇амзхийд̇и бханд̇з, аж̇ж̇а згад̣̇ивасам̣ амхаагам̣ д̇идта, ад̇хиваасзхийд̇и ад̇т̇о. бараамасийд̇и г̇ан̣хи. ж̇ийносийд̇и ж̇ид̇оси.
537.Tena samayenāti rājasikkhāpadaṃ. Tattha upāsakaṃ saññāpetvāti jānāpetvā, ‘‘iminā mūlena cīvaraṃ kiṇitvā therassa dehī’’ti evaṃ vatvāti adhippāyo. Paññāsabandhoti paññāsakahāpaṇadaṇḍoti vuttaṃ hoti. Paññāsaṃ baddhotipi pāṭho, paññāsaṃ jito paññāsaṃ dāpetabboti adhippāyo. Ajjaṇho, bhante, āgamehīti bhante, ajja ekadivasaṃ amhākaṃ tiṭṭha, adhivāsehīti attho. Parāmasīti gaṇhi. Jīnosīti jitosi.
538-9. рааж̇абхог̇г̇од̇и рааж̇ад̇о бхог̇г̇ам̣ бхун̃ж̇ид̇аб̣б̣ам̣ ассад̇т̇ийд̇и рааж̇абхог̇г̇о, рааж̇абхог̇од̇иби баато, рааж̇ад̇о бхог̇о асса ад̇т̇ийд̇и ад̇т̇о.
538-9.Rājabhoggoti rājato bhoggaṃ bhuñjitabbaṃ assatthīti rājabhoggo, rājabhogotipi pāṭho, rājato bhogo assa atthīti attho.
бахин̣зяяаад̇и бзсзяяа, уд̇д̇аанад̇т̇ад̇д̇аа банасса бад̣̇абхааж̇анам̣ на вуд̇д̇ам̣. яат̇аа жа зд̇асса, звам̣ ‘‘жийварам̣ ид̇т̇аннаамам̣ бхигку’’нд̇иаад̣̇ийнамби бад̣̇аанам̣ уд̇д̇аанад̇т̇ад̇д̇ааязва бад̣̇абхааж̇анам̣ на вуд̇д̇анд̇и взд̣̇ид̇аб̣б̣ам̣ . аабхад̇анд̇и аанийд̇ам̣. гаалзна габбияанд̇и яуд̇д̇абад̇д̇агаалзна, яад̣̇аа но ад̇т̇о ход̇и, д̇ад̣̇аа габбияам̣ жийварам̣ г̇ан̣хаамаад̇и ад̇т̇о.
Pahiṇeyyāti peseyya, uttānatthattā panassa padabhājanaṃ na vuttaṃ. Yathā ca etassa, evaṃ ‘‘cīvaraṃ itthannāmaṃ bhikkhu’’ntiādīnampi padānaṃ uttānatthattāyeva padabhājanaṃ na vuttanti veditabbaṃ . Ābhatanti ānītaṃ. Kālenakappiyanti yuttapattakālena, yadā no attho hoti, tadā kappiyaṃ cīvaraṃ gaṇhāmāti attho.
взяяааважжагарод̇и гижжагаро, габбияагаарагод̇и ад̇т̇о. сан̃н̃ад̇д̇о со маяаад̇и аан̣ад̇д̇о со маяаа, яат̇аа д̇умхаагам̣ жийварзна ад̇т̇з сад̇и жийварам̣ д̣̇ассад̇и, звам̣ вуд̇д̇од̇и ад̇т̇о. ад̇т̇о мз аавусо жийварзнаад̇и жод̣̇анаалагкан̣анид̣̇ассанамзд̇ам̣, ид̣̇ан̃хи важанам̣ вад̇д̇аб̣б̣ам̣, асса ваа ад̇т̇о яааяа гааяажи бхаасааяа; ид̣̇ам̣ жод̣̇анаалагкан̣ам̣. ‘‘д̣̇зхи мз жийвара’’нд̇иаад̣̇ийни бана навад̇д̇аб̣б̣аагаарад̣̇ассанад̇т̇ам̣ вуд̇д̇аани, зд̇аани хи важанаани зд̇зсам̣ ваа ад̇т̇о яааяа гааяажи бхаасааяа на вад̇д̇аб̣б̣о.
Veyyāvaccakaroti kiccakaro, kappiyakārakoti attho. Saññatto so mayāti āṇatto so mayā, yathā tumhākaṃ cīvarena atthe sati cīvaraṃ dassati, evaṃ vuttoti attho. Attho me āvuso cīvarenāti codanālakkhaṇanidassanametaṃ, idañhi vacanaṃ vattabbaṃ, assa vā attho yāya kāyaci bhāsāya; idaṃ codanālakkhaṇaṃ. ‘‘Dehi me cīvara’’ntiādīni pana navattabbākāradassanatthaṃ vuttāni, etāni hi vacanāni etesaṃ vā attho yāya kāyaci bhāsāya na vattabbo.
д̣̇уд̇ияамби вад̇д̇аб̣б̣о д̇ад̇ияамби вад̇д̇аб̣б̣од̇и ‘‘ад̇т̇о мз аавусо жийварзнаа’’д̇и ид̣̇амзва яаавад̇ад̇ияам̣ вад̇д̇аб̣б̣од̇и. звам̣ ‘‘д̣̇вад̇д̇игкад̇д̇ум̣ жод̣̇зд̇аб̣б̣о саарзд̇аб̣б̣о’’д̇и зд̇т̇а уд̣̇д̣̇идтажод̣̇анаабарижчзд̣̇ам̣ д̣̇ассзд̇ваа ид̣̇аани ‘‘д̣̇вад̇д̇игкад̇д̇ум̣ жод̣̇аяамаано саараяамаано д̇ам̣ жийварам̣ абхинибпаад̣̇зяяа, ижжзд̇ам̣ гусала’’нд̇и имзсам̣ бад̣̇аанам̣ сан̇кзбад̇о ад̇т̇ам̣ д̣̇ассзнд̇о ‘‘сажз абхинибпаад̣̇зд̇и, ижжзд̇ам̣ гусала’’нд̇и ааха. звам̣ яаавад̇ад̇ияам̣ жод̣̇знд̇о д̇ам̣ жийварам̣ яад̣̇и нибпаад̣̇зд̇и, саггод̇и ад̇д̇ано бадилаабхавасзна нибпаад̣̇зд̇ум̣, ижжзд̇ам̣ гусалам̣ саад̇ху судту сунд̣̇арам̣.
Dutiyampi vattabbo tatiyampi vattabboti ‘‘attho me āvuso cīvarenā’’ti idameva yāvatatiyaṃ vattabboti. Evaṃ ‘‘dvattikkhattuṃ codetabbo sāretabbo’’ti ettha uddiṭṭhacodanāparicchedaṃ dassetvā idāni ‘‘dvattikkhattuṃ codayamāno sārayamāno taṃ cīvaraṃ abhinipphādeyya, iccetaṃ kusala’’nti imesaṃ padānaṃ saṅkhepato atthaṃ dassento ‘‘sace abhinipphādeti, iccetaṃ kusala’’nti āha. Evaṃ yāvatatiyaṃ codento taṃ cīvaraṃ yadi nipphādeti, sakkoti attano paṭilābhavasena nipphādetuṃ, iccetaṃ kusalaṃ sādhu suṭṭhu sundaraṃ.
жад̇угкад̇д̇ум̣ бан̃жагкад̇д̇ум̣ чагкад̇д̇убарамам̣ д̇ун̣хийбхууд̇зна уд̣̇д̣̇исса таад̇аб̣б̣анд̇и тааналагкан̣анид̣̇ассанамзд̇ам̣. чагкад̇д̇убараманд̇и жа бхааванабум̣сагаважанамзд̇ам̣, чагкад̇д̇убараман̃хи зд̇зна жийварам̣ уд̣̇д̣̇исса д̇ун̣хийбхууд̇зна таад̇аб̣б̣ам̣, на ан̃н̃ам̣ гин̃жи гаад̇аб̣б̣ам̣, ид̣̇ам̣ тааналагкан̣ам̣. д̇ад̇т̇а яо саб̣б̣адтаанаанам̣ саад̇хааран̣о д̇ун̣хийбхааво, д̇ам̣ д̇аава д̣̇ассзд̇ум̣ бад̣̇абхааж̇анз ‘‘д̇ад̇т̇а г̇анд̇ваа д̇ун̣хийбхууд̇знаа’’д̇иаад̣̇и вуд̇д̇ам̣. д̇ад̇т̇а на аасанз нисийд̣̇ид̇аб̣б̣анд̇и ‘‘ид̇ха, бханд̇з, нисийд̣̇ат̇аа’’д̇и вуд̇д̇знааби на нисийд̣̇ид̇аб̣б̣ам̣. на аамисам̣ бадиг̇г̇ахзд̇аб̣б̣анд̇и яааг̇укаж̇ж̇агаад̣̇ибхзд̣̇ам̣ гин̃жи аамисам̣ ‘‘г̇ан̣хат̇а, бханд̇з’’д̇и яаажияамаанзнааби на г̇ан̣хид̇аб̣б̣ам̣. на д̇хаммо бхаасид̇аб̣б̣од̇и ман̇г̇алам̣ ваа анумод̣̇анам̣ ваа бхаасат̇аад̇и яаажияамаанзнааби гин̃жи на бхаасид̇аб̣б̣ам̣, гзвалам̣ ‘‘гим̣ гааран̣аа ааг̇ад̇осий’’д̇и бужчияамаанзна ‘‘ж̇аанааси, аавусо’’д̇и вад̇д̇аб̣б̣о. бужчияамаанод̇и ид̣̇ан̃хи гаран̣ад̇т̇з бажжад̇д̇аважанам̣. ат̇а ваа бужчам̣ гурумаано бужчияамаанод̇и звамбзд̇т̇а ад̇т̇о д̣̇адтаб̣б̣о. яо хи бужчам̣ гарод̇и, со зд̇д̇агам̣ вад̇д̇аб̣б̣од̇и таанам̣ бхан̃ж̇ад̇ийд̇и ааг̇ад̇агааран̣ам̣ бхан̃ж̇ад̇и.
Catukkhattuṃ pañcakkhattuṃ chakkhattuparamaṃ tuṇhībhūtena uddissa ṭhātabbanti ṭhānalakkhaṇanidassanametaṃ. Chakkhattuparamanti ca bhāvanapuṃsakavacanametaṃ, chakkhattuparamañhi etena cīvaraṃ uddissa tuṇhībhūtena ṭhātabbaṃ, na aññaṃ kiñci kātabbaṃ, idaṃ ṭhānalakkhaṇaṃ. Tattha yo sabbaṭṭhānānaṃ sādhāraṇo tuṇhībhāvo, taṃ tāva dassetuṃ padabhājane ‘‘tattha gantvā tuṇhībhūtenā’’tiādi vuttaṃ. Tattha na āsane nisīditabbanti ‘‘idha, bhante, nisīdathā’’ti vuttenāpi na nisīditabbaṃ. Na āmisaṃ paṭiggahetabbanti yāgukhajjakādibhedaṃ kiñci āmisaṃ ‘‘gaṇhatha, bhante’’ti yāciyamānenāpi na gaṇhitabbaṃ. Na dhammo bhāsitabboti maṅgalaṃ vā anumodanaṃ vā bhāsathāti yāciyamānenāpi kiñci na bhāsitabbaṃ, kevalaṃ ‘‘kiṃ kāraṇā āgatosī’’ti pucchiyamānena ‘‘jānāsi, āvuso’’ti vattabbo. Pucchiyamānoti idañhi karaṇatthe paccattavacanaṃ. Atha vā pucchaṃ kurumāno pucchiyamānoti evampettha attho daṭṭhabbo. Yo hi pucchaṃ karoti, so ettakaṃ vattabboti ṭhānaṃ bhañjatīti āgatakāraṇaṃ bhañjati.
ид̣̇аани яаа д̇иссо жод̣̇анаа, ча жа таанаани вуд̇д̇аани. д̇ад̇т̇а вуд̣дхин̃жа хаанин̃жа д̣̇ассзнд̇о ‘‘жад̇угкад̇д̇ум̣ жод̣̇зд̇ваа’’д̇иаад̣̇имааха. яасмаа жа зд̇т̇а згажод̣̇анаавуд̣дхияаа д̣̇виннам̣ таанаанам̣ хаани вуд̇д̇аа, д̇асмаа ‘‘згаа жод̣̇анаа д̣̇иг̇ун̣ам̣ таана’’нд̇и лагкан̣ам̣ д̣̇ассид̇ам̣ ход̇и. ид̇и иминаа лагкан̣зна д̇игкад̇д̇ум̣ жод̣̇зд̇ваа чагкад̇д̇ум̣ таад̇аб̣б̣ам̣, д̣̇вигкад̇д̇ум̣ жод̣̇зд̇ваа адтагкад̇д̇ум̣ таад̇аб̣б̣ам̣, сагим̣ жод̣̇зд̇ваа д̣̇асагкад̇д̇ум̣ таад̇аб̣б̣анд̇и. яат̇аа жа ‘‘чагкад̇д̇ум̣ жод̣̇зд̇ваа на таад̇аб̣б̣а’’нд̇и вуд̇д̇ам̣, звам̣ ‘‘д̣̇ваад̣̇асагкад̇д̇ум̣ тад̇ваа на жод̣̇зд̇аб̣б̣а’’нд̇иби вуд̇д̇амзва ход̇и. д̇асмаа сажз жод̣̇зд̇иязва на д̇идтад̇и, ча жод̣̇анаа лаб̣бханд̇и. сажз д̇идтад̇иязва на жод̣̇зд̇и, д̣̇ваад̣̇аса таанаани лаб̣бханд̇и. сажз жод̣̇зд̇иби д̇идтад̇иби, згааяа жод̣̇анааяа д̣̇вз таанаани хаабзд̇аб̣б̣аани. д̇ад̇т̇а яо згад̣̇ивасамзва бунаббунам̣ г̇анд̇ваа чагкад̇д̇ум̣ жод̣̇зд̇и, сагим̣язва ваа г̇анд̇ваа ‘‘ад̇т̇о мз, аавусо, жийварзнаа’’д̇и чагкад̇д̇ум̣ вад̣̇ад̇и. д̇ат̇аа згад̣̇ивасамзва бунаббунам̣ г̇анд̇ваа д̣̇ваад̣̇асагкад̇д̇ум̣ д̇идтад̇и, сагим̣язва ваа г̇анд̇ваа д̇ад̇ра д̇ад̇ра таанз д̇идтад̇и, соби саб̣б̣ажод̣̇анааяо саб̣б̣адтаанаани жа бхан̃ж̇ад̇и. го бана ваад̣̇о наанаад̣̇ивасзсу звам̣ гаронд̇ассаад̇и звамзд̇т̇а винижчаяо взд̣̇ид̇аб̣б̣о.
Idāni yā tisso codanā, cha ca ṭhānāni vuttāni. Tattha vuḍḍhiñca hāniñca dassento ‘‘catukkhattuṃ codetvā’’tiādimāha. Yasmā ca ettha ekacodanāvuḍḍhiyā dvinnaṃ ṭhānānaṃ hāni vuttā, tasmā ‘‘ekā codanā diguṇaṃ ṭhāna’’nti lakkhaṇaṃ dassitaṃ hoti. Iti iminā lakkhaṇena tikkhattuṃ codetvā chakkhattuṃ ṭhātabbaṃ, dvikkhattuṃ codetvā aṭṭhakkhattuṃ ṭhātabbaṃ, sakiṃ codetvā dasakkhattuṃ ṭhātabbanti. Yathā ca ‘‘chakkhattuṃ codetvā na ṭhātabba’’nti vuttaṃ, evaṃ ‘‘dvādasakkhattuṃ ṭhatvā na codetabba’’ntipi vuttameva hoti. Tasmā sace codetiyeva na tiṭṭhati, cha codanā labbhanti. Sace tiṭṭhatiyeva na codeti, dvādasa ṭhānāni labbhanti. Sace codetipi tiṭṭhatipi, ekāya codanāya dve ṭhānāni hāpetabbāni. Tattha yo ekadivasameva punappunaṃ gantvā chakkhattuṃ codeti, sakiṃyeva vā gantvā ‘‘attho me, āvuso, cīvarenā’’ti chakkhattuṃ vadati. Tathā ekadivasameva punappunaṃ gantvā dvādasakkhattuṃ tiṭṭhati, sakiṃyeva vā gantvā tatra tatra ṭhāne tiṭṭhati, sopi sabbacodanāyo sabbaṭṭhānāni ca bhañjati. Ko pana vādo nānādivasesu evaṃ karontassāti evamettha vinicchayo veditabbo.
яад̇асса жийваражзд̇аабаннам̣ аабхад̇анд̇и яад̇о рааж̇ад̇о ваа рааж̇абхог̇г̇ад̇о ваа асса бхигкуно жийваражзд̇аабаннам̣ аанийд̇ам̣. яад̇вассаад̇иби баато. аяамзвад̇т̇о. ‘‘яад̇т̇ассаа’’д̇иби батанд̇и, яасмим̣ таанз асса жийваражзд̇аабаннам̣ бзсид̇анд̇и жа ад̇т̇ам̣ гат̇знд̇и, б̣яан̃ж̇анам̣ бана на самзд̇и. д̇ад̇т̇аад̇и д̇асса ран̃н̃о ваа рааж̇абхог̇г̇асса ваа санд̇игз; самийбад̇т̇з хи ид̣̇ам̣ бхуммаважанам̣. на д̇ам̣ д̇асса бхигкуно гин̃жи ад̇т̇ам̣ анубход̇ийд̇и д̇ам̣ жийваражзд̇аабаннам̣ д̇асса бхигкуно гин̃жи аббамад̇д̇агамби гаммам̣ на нибпаад̣̇зд̇и. яун̃ж̇анд̇ааяасманд̇о саганд̇и ааяасманд̇о ад̇д̇ано санд̇агам̣ д̇ханам̣ баабун̣анд̇у. маа во сагам̣ винассаад̇и д̇умхаагам̣ санд̇агам̣ маа винассад̇у. яо бана нзва саамам̣ г̇ажчад̇и, на д̣̇ууд̇ам̣ баахзд̇и, вад̇д̇абхзд̣̇з д̣̇уггадам̣ аабаж̇ж̇ад̇и.
Yatassa cīvaracetāpannaṃ ābhatanti yato rājato vā rājabhoggato vā assa bhikkhuno cīvaracetāpannaṃ ānītaṃ. Yatvassātipi pāṭho. Ayamevattho. ‘‘Yatthassā’’tipi paṭhanti, yasmiṃ ṭhāne assa cīvaracetāpannaṃ pesitanti ca atthaṃ kathenti, byañjanaṃ pana na sameti. Tatthāti tassa rañño vā rājabhoggassa vā santike; samīpatthe hi idaṃ bhummavacanaṃ. Na taṃ tassa bhikkhuno kiñci atthaṃ anubhotīti taṃ cīvaracetāpannaṃ tassa bhikkhuno kiñci appamattakampi kammaṃ na nipphādeti. Yuñjantāyasmanto sakanti āyasmanto attano santakaṃ dhanaṃ pāpuṇantu. Mā vo sakaṃ vinassāti tumhākaṃ santakaṃ mā vinassatu. Yo pana neva sāmaṃ gacchati, na dūtaṃ pāheti, vattabhede dukkaṭaṃ āpajjati.
гим̣ бана саб̣б̣агаббияагаарагзсу звам̣ бадибаж̇ж̇ид̇аб̣б̣анд̇и? на бадибаж̇ж̇ид̇аб̣б̣ам̣. аяан̃хи габбияагаараго наама сан̇кзбад̇о д̣̇увид̇хо нид̣̇д̣̇идто жа анид̣̇д̣̇идто жа. д̇ад̇т̇а нид̣̇д̣̇идто д̣̇увид̇хо – бхигкунаа нид̣̇д̣̇идто, д̣̇ууд̇зна нид̣̇д̣̇идтод̇и. анид̣̇д̣̇идтоби д̣̇увид̇хо – мукавзвадига габбияагаараго, бараммукагаббияагаарагод̇и. д̇зсу бхигкунаа нид̣̇д̣̇идто саммукаасаммукавасзна жад̇уб̣б̣ид̇хо ход̇и. д̇ат̇аа д̣̇ууд̇зна нид̣̇д̣̇идтоби.
Kiṃ pana sabbakappiyakārakesu evaṃ paṭipajjitabbanti? Na paṭipajjitabbaṃ. Ayañhi kappiyakārako nāma saṅkhepato duvidho niddiṭṭho ca aniddiṭṭho ca. Tattha niddiṭṭho duvidho – bhikkhunā niddiṭṭho, dūtena niddiṭṭhoti. Aniddiṭṭhopi duvidho – mukhavevaṭika kappiyakārako, parammukhakappiyakārakoti. Tesu bhikkhunā niddiṭṭho sammukhāsammukhavasena catubbidho hoti. Tathā dūtena niddiṭṭhopi.
гат̇ам̣? ид̇хзгажжо бхигкусса жийварад̇т̇ааяа д̣̇ууд̇зна агаббияавад̇т̇ум̣ бахин̣ад̇и, д̣̇ууд̇о д̇ам̣ бхигкум̣ убасан̇гамид̇ваа ‘‘ид̣̇ам̣, бханд̇з, ид̇т̇аннаамзна д̇умхаагам̣ жийварад̇т̇ааяа бахид̇ам̣, г̇ан̣хат̇а на’’нд̇и вад̣̇ад̇и, бхигку ‘‘наяид̣̇ам̣ габбад̇ий’’д̇и бадигкибад̇и, д̣̇ууд̇о ‘‘ад̇т̇и бана д̇з, бханд̇з, взяяааважжагаро’’д̇и бужчад̇и, бун̃н̃ад̇т̇игзхи жа убаасагзхи ‘‘бхигкуунам̣ взяяааважжам̣ гарот̇аа’’д̇и аан̣ад̇д̇аа ваа, бхигкуунам̣ ваа санд̣̇идтаа самбхад̇д̇аа гзжи взяяааважжагараа хонд̇и, д̇зсам̣ ан̃н̃ад̇аро д̇асмим̣ кан̣з бхигкусса санд̇игз нисинно ход̇и, бхигку д̇ам̣ нид̣̇д̣̇исад̇и ‘‘аяам̣ бхигкуунам̣ взяяааважжагаро’’д̇и. д̣̇ууд̇о д̇асса хад̇т̇з агаббияавад̇т̇ум̣ д̣̇ад̇ваа ‘‘т̇зрасса жийварам̣ гин̣ид̇ваа д̣̇зхий’’д̇и г̇ажчад̇и, аяам̣ бхигкунаа саммукаанид̣̇д̣̇идто.
Kathaṃ? Idhekacco bhikkhussa cīvaratthāya dūtena akappiyavatthuṃ pahiṇati, dūto taṃ bhikkhuṃ upasaṅkamitvā ‘‘idaṃ, bhante, itthannāmena tumhākaṃ cīvaratthāya pahitaṃ, gaṇhatha na’’nti vadati, bhikkhu ‘‘nayidaṃ kappatī’’ti paṭikkhipati, dūto ‘‘atthi pana te, bhante, veyyāvaccakaro’’ti pucchati, puññatthikehi ca upāsakehi ‘‘bhikkhūnaṃ veyyāvaccaṃ karothā’’ti āṇattā vā, bhikkhūnaṃ vā sandiṭṭhā sambhattā keci veyyāvaccakarā honti, tesaṃ aññataro tasmiṃ khaṇe bhikkhussa santike nisinno hoti, bhikkhu taṃ niddisati ‘‘ayaṃ bhikkhūnaṃ veyyāvaccakaro’’ti. Dūto tassa hatthe akappiyavatthuṃ datvā ‘‘therassa cīvaraṃ kiṇitvā dehī’’ti gacchati, ayaṃ bhikkhunā sammukhāniddiṭṭho.
но жз бхигкусса санд̇игз нисинно ход̇и, абижа ко бхигку нид̣̇д̣̇исад̇и – ‘‘асугасмим̣ наама г̇аамз ид̇т̇аннаамо бхигкуунам̣ взяяааважжагаро’’д̇и, со г̇анд̇ваа д̇асса хад̇т̇з агаббияавад̇т̇ум̣ д̣̇ад̇ваа ‘‘т̇зрасса жийварам̣ гин̣ид̇ваа д̣̇ад̣̇зяяаасий’’д̇и ааг̇анд̇ваа бхигкусса аарожзд̇ваа г̇ажчад̇и, аяамзго бхигкунаа асаммукаанид̣̇д̣̇идто.
No ce bhikkhussa santike nisinno hoti, apica kho bhikkhu niddisati – ‘‘asukasmiṃ nāma gāme itthannāmo bhikkhūnaṃ veyyāvaccakaro’’ti, so gantvā tassa hatthe akappiyavatthuṃ datvā ‘‘therassa cīvaraṃ kiṇitvā dadeyyāsī’’ti āgantvā bhikkhussa ārocetvā gacchati, ayameko bhikkhunā asammukhāniddiṭṭho.
на хзва ко со д̣̇ууд̇о ад̇д̇анаа ааг̇анд̇ваа аарожзд̇и, абижа ко ан̃н̃ам̣ бахин̣ад̇и ‘‘д̣̇иннам̣ маяаа, бханд̇з, д̇асса хад̇т̇з жийваражзд̇аабаннам̣, жийварам̣ г̇ан̣хзяяаат̇аа’’д̇и, аяам̣ д̣̇уд̇ияо бхигкунаа асаммукаанид̣̇д̣̇идто.
Na heva kho so dūto attanā āgantvā āroceti, apica kho aññaṃ pahiṇati ‘‘dinnaṃ mayā, bhante, tassa hatthe cīvaracetāpannaṃ, cīvaraṃ gaṇheyyāthā’’ti, ayaṃ dutiyo bhikkhunā asammukhāniddiṭṭho.
на хзва ко ан̃н̃ам̣ бахин̣ад̇и, абижа ко г̇ажчанд̇ова бхигкум̣ вад̣̇ад̇и ‘‘ахам̣ д̇асса хад̇т̇з жийваражзд̇аабаннам̣ д̣̇ассаами, д̇умхз жийварам̣ г̇ан̣хзяяаат̇аа’’д̇и, аяам̣ д̇ад̇ияо бхигкунаа асаммукаанид̣̇д̣̇идтод̇и звам̣ зго саммукаанид̣̇д̣̇идто д̇аяо асаммукаанид̣̇д̣̇идтаад̇и имз жад̇д̇ааро бхигкунаа нид̣̇д̣̇идтавзяяааважжагараа наама. зд̇зсу имасмим̣ рааж̇асигкаабад̣̇з вуд̇д̇анаязнзва бадибаж̇ж̇ид̇аб̣б̣ам̣.
Na heva kho aññaṃ pahiṇati, apica kho gacchantova bhikkhuṃ vadati ‘‘ahaṃ tassa hatthe cīvaracetāpannaṃ dassāmi, tumhe cīvaraṃ gaṇheyyāthā’’ti, ayaṃ tatiyo bhikkhunā asammukhāniddiṭṭhoti evaṃ eko sammukhāniddiṭṭho tayo asammukhāniddiṭṭhāti ime cattāro bhikkhunā niddiṭṭhaveyyāvaccakarā nāma. Etesu imasmiṃ rājasikkhāpade vuttanayeneva paṭipajjitabbaṃ.
абаро бхигку буриманаязнзва д̣̇ууд̇зна бужчид̇о над̇т̇ид̇ааяа ваа, авижаарзд̇угаамад̇ааяа ваа ‘‘над̇т̇амхаагам̣ габбияагаараго’’д̇и вад̣̇ад̇и, д̇асмин̃жа кан̣з гожи мануссо ааг̇ажчад̇и, д̣̇ууд̇о д̇асса хад̇т̇з агаббияавад̇т̇ум̣ д̣̇ад̇ваа ‘‘имасса хад̇т̇ад̇о жийварам̣ г̇ан̣хзяяаат̇аа’’д̇и вад̇ваа г̇ажчад̇и, аяам̣ д̣̇ууд̇зна саммукаанид̣̇д̣̇идто.
Aparo bhikkhu purimanayeneva dūtena pucchito natthitāya vā, avicāretukāmatāya vā ‘‘natthamhākaṃ kappiyakārako’’ti vadati, tasmiñca khaṇe koci manusso āgacchati, dūto tassa hatthe akappiyavatthuṃ datvā ‘‘imassa hatthato cīvaraṃ gaṇheyyāthā’’ti vatvā gacchati, ayaṃ dūtena sammukhāniddiṭṭho.
абаро д̣̇ууд̇о г̇аамам̣ бависид̇ваа ад̇д̇анаа абхиружид̇асса гассажи хад̇т̇з агаббияавад̇т̇ум̣ д̣̇ад̇ваа буриманаязнзва ааг̇анд̇ваа аарожзд̇и, ан̃н̃ам̣ ваа бахин̣ад̇и, ‘‘ахам̣ асугасса наама хад̇т̇з жийваражзд̇аабаннам̣ д̣̇ассаами, д̇умхз жийварам̣ г̇ан̣хзяяаат̇аа’’д̇и вад̇ваа ваа г̇ажчад̇и, аяам̣ д̇ад̇ияо д̣̇ууд̇зна асаммукаанид̣̇д̣̇идтод̇и звам̣ зго саммукаанид̣̇д̣̇идто, д̇аяо асаммукаанид̣̇д̣̇идтаад̇и имз жад̇д̇ааро д̣̇ууд̇зна нид̣̇д̣̇идтавзяяааважжагараа наама. зд̇зсу мзн̣д̣агасигкаабад̣̇з вуд̇д̇анаязна бадибаж̇ж̇ид̇аб̣б̣ам̣. вуд̇д̇ан̃хзд̇ам̣ – ‘‘санд̇и, бхигкавз, мануссаа сад̣̇д̇хаа басаннаа, д̇з габбияагаарагаанам̣ хад̇т̇з хиран̃н̃ам̣ убанигкибанд̇и – ‘иминаа аяяасса яам̣ габбияам̣ д̇ам̣ д̣̇зт̇аа’д̇и. ануж̇аанаами, бхигкавз, яам̣ д̇ад̇о габбияам̣ д̇ам̣ саад̣̇ид̇ум̣, на д̇взваахам̣, бхигкавз, гзнажи барияааязна ж̇аад̇аруубараж̇ад̇ам̣ саад̣̇ид̇аб̣б̣ам̣ бариязсид̇аб̣б̣анд̇и вад̣̇аамий’’д̇и (махаава. 299). зд̇т̇а жа жод̣̇анааяа бамаан̣ам̣ над̇т̇и, муулам̣ асаад̣̇ияанд̇зна сахассагкад̇д̇умби жод̣̇анааяа ваа таанзна ваа габбияабхан̣д̣ам̣ саад̣̇ид̇ум̣ ваддад̇и. но жз д̣̇зд̇и, ан̃н̃ам̣ габбияагаарагам̣ табзд̇вааби аахараабзд̇аб̣б̣ам̣. сажз ижчад̇и мууласаамигаанамби гат̇зд̇аб̣б̣ам̣; но жз ижчад̇и на гат̇зд̇аб̣б̣ам̣.
Aparo dūto gāmaṃ pavisitvā attanā abhirucitassa kassaci hatthe akappiyavatthuṃ datvā purimanayeneva āgantvā āroceti, aññaṃ vā pahiṇati, ‘‘ahaṃ asukassa nāma hatthe cīvaracetāpannaṃ dassāmi, tumhe cīvaraṃ gaṇheyyāthā’’ti vatvā vā gacchati, ayaṃ tatiyo dūtena asammukhāniddiṭṭhoti evaṃ eko sammukhāniddiṭṭho, tayo asammukhāniddiṭṭhāti ime cattāro dūtena niddiṭṭhaveyyāvaccakarā nāma. Etesu meṇḍakasikkhāpade vuttanayena paṭipajjitabbaṃ. Vuttañhetaṃ – ‘‘santi, bhikkhave, manussā saddhā pasannā, te kappiyakārakānaṃ hatthe hiraññaṃ upanikkhipanti – ‘iminā ayyassa yaṃ kappiyaṃ taṃ dethā’ti. Anujānāmi, bhikkhave, yaṃ tato kappiyaṃ taṃ sādituṃ, na tvevāhaṃ, bhikkhave, kenaci pariyāyena jātarūparajataṃ sāditabbaṃ pariyesitabbanti vadāmī’’ti (mahāva. 299). Ettha ca codanāya pamāṇaṃ natthi, mūlaṃ asādiyantena sahassakkhattumpi codanāya vā ṭhānena vā kappiyabhaṇḍaṃ sādituṃ vaṭṭati. No ce deti, aññaṃ kappiyakārakaṃ ṭhapetvāpi āharāpetabbaṃ. Sace icchati mūlasāmikānampi kathetabbaṃ; no ce icchati na kathetabbaṃ.
абаро бхигку буриманаязнзва д̣̇ууд̇зна бужчид̇о ‘‘над̇т̇амхаагам̣ габбияагаараго’’д̇и вад̣̇ад̇и, д̇ад̣̇ан̃н̃о самийбз тид̇о суд̇ваа ‘‘аахара бхо ахам̣ аяяасса жийварам̣ жзд̇аабзд̇ваа д̣̇ассаамий’’д̇и вад̣̇ад̇и. д̣̇ууд̇о ‘‘ханд̣̇а бхо д̣̇ад̣̇зяяаасий’’д̇и д̇асса хад̇т̇з д̣̇ад̇ваа бхигкусса анаарожзд̇ваава г̇ажчад̇и, аяам̣ мукавзвадигагаббияагаараго. абаро бхигкуно убадтаагасса ваа ан̃н̃асса ваа хад̇т̇з агаббияавад̇т̇ум̣ д̣̇ад̇ваа ‘‘т̇зрасса жийварам̣ д̣̇ад̣̇зяяаасий’’д̇и зд̇д̇ова баггамад̇и, аяам̣ бараммукагаббияагаарагод̇и имз д̣̇вз анид̣̇д̣̇идтагаббияагаарагаа наама. зд̇зсу ан̃н̃аад̇агааббаваарид̇зсу вияа бадибаж̇ж̇ид̇аб̣б̣ам̣. сажз саяамзва жийварам̣ аанзд̇ваа д̣̇ад̣̇анд̇и, г̇ахзд̇аб̣б̣ам̣. но жз, гин̃жи на вад̇д̇аб̣б̣аа. д̣̇зсанаамад̇д̇амзва жзд̇ам̣ ‘‘д̣̇ууд̇зна жийваражзд̇аабаннам̣ бахин̣зяяаа’’д̇и саяам̣ аахарид̇вааби бин̣д̣абаад̇аад̣̇ийнам̣ ад̇т̇ааяа д̣̇ад̣̇анд̇зсуби зсзва наяо. на гзвалан̃жа ад̇д̇аноязва ад̇т̇ааяа самбадижчид̇ум̣ на ваддад̇и, сажзби гожи ж̇аад̇аруубараж̇ад̇ам̣ аанзд̇ваа ‘‘ид̣̇ам̣ сан̇гхасса д̣̇амми, аараамам̣ ваа гарот̇а жзд̇ияам̣ ваа бхож̇анасаалаад̣̇ийнам̣ ваа ан̃н̃ад̇ара’’нд̇и вад̣̇ад̇и, ид̣̇амби самбадижчид̇ум̣ на ваддад̇и. яасса гассажи хи ан̃н̃ассад̇т̇ааяа самбадижчанд̇асса д̣̇уггадам̣ ход̇ийд̇и махаабажжарияам̣ вуд̇д̇ам̣.
Aparo bhikkhu purimanayeneva dūtena pucchito ‘‘natthamhākaṃ kappiyakārako’’ti vadati, tadañño samīpe ṭhito sutvā ‘‘āhara bho ahaṃ ayyassa cīvaraṃ cetāpetvā dassāmī’’ti vadati. Dūto ‘‘handa bho dadeyyāsī’’ti tassa hatthe datvā bhikkhussa anārocetvāva gacchati, ayaṃ mukhavevaṭikakappiyakārako. Aparo bhikkhuno upaṭṭhākassa vā aññassa vā hatthe akappiyavatthuṃ datvā ‘‘therassa cīvaraṃ dadeyyāsī’’ti ettova pakkamati, ayaṃ parammukhakappiyakārakoti ime dve aniddiṭṭhakappiyakārakā nāma. Etesu aññātakaappavāritesu viya paṭipajjitabbaṃ. Sace sayameva cīvaraṃ ānetvā dadanti, gahetabbaṃ. No ce, kiñci na vattabbā. Desanāmattameva cetaṃ ‘‘dūtena cīvaracetāpannaṃ pahiṇeyyā’’ti sayaṃ āharitvāpi piṇḍapātādīnaṃ atthāya dadantesupi eseva nayo. Na kevalañca attanoyeva atthāya sampaṭicchituṃ na vaṭṭati, sacepi koci jātarūparajataṃ ānetvā ‘‘idaṃ saṅghassa dammi, ārāmaṃ vā karotha cetiyaṃ vā bhojanasālādīnaṃ vā aññatara’’nti vadati, idampi sampaṭicchituṃ na vaṭṭati. Yassa kassaci hi aññassatthāya sampaṭicchantassa dukkaṭaṃ hotīti mahāpaccariyaṃ vuttaṃ.
сажз бана ‘‘наяид̣̇ам̣ бхигкуунам̣ самбадижчид̇ум̣ ваддад̇ий’’д̇и бадигкид̇д̇з ‘‘вад̣дхагийнам̣ ваа гаммагараанам̣ ваа хад̇т̇з бхависсад̇и, гзвалам̣ д̇умхз сугад̇ад̣̇уггадам̣ ж̇аанаат̇аа’’д̇и вад̇ваа д̇зсам̣ хад̇т̇з д̣̇ад̇ваа баггамад̇и, ваддад̇и. ат̇ааби ‘‘мама мануссаанам̣ хад̇т̇з бхависсад̇и маяхамзва ваа хад̇т̇з бхависсад̇и, гзвалам̣ д̇умхз яам̣ яасса д̣̇аад̇аб̣б̣ам̣, д̇ад̣̇ад̇т̇ааяа бзсзяяаат̇аа’’д̇и вад̣̇ад̇и, звамби ваддад̇и.
Sace pana ‘‘nayidaṃ bhikkhūnaṃ sampaṭicchituṃ vaṭṭatī’’ti paṭikkhitte ‘‘vaḍḍhakīnaṃ vā kammakarānaṃ vā hatthe bhavissati, kevalaṃ tumhe sukatadukkaṭaṃ jānāthā’’ti vatvā tesaṃ hatthe datvā pakkamati, vaṭṭati. Athāpi ‘‘mama manussānaṃ hatthe bhavissati mayhameva vā hatthe bhavissati, kevalaṃ tumhe yaṃ yassa dātabbaṃ, tadatthāya peseyyāthā’’ti vadati, evampi vaṭṭati.
сажз бана сан̇гхам̣ ваа г̇ан̣ам̣ ваа буг̇г̇алам̣ ваа анаамасид̇ваа ‘‘ид̣̇ам̣ хиран̃н̃асуван̣н̣ам̣ жзд̇ияасса д̣̇зма, вихаарасса д̣̇зма, навагаммасса д̣̇змаа’’д̇и вад̣̇анд̇и, бадигкибид̇ум̣ на ваддад̇и. ‘‘имз ид̣̇ам̣ бхан̣анд̇ий’’д̇и габбияагаарагаанам̣ аажигкид̇аб̣б̣ам̣. ‘‘жзд̇ияаад̣̇ийнам̣ ад̇т̇ааяа д̇умхз г̇ахзд̇ваа табзт̇аа’’д̇и вуд̇д̇зна бана ‘‘амхаагам̣ г̇ахзд̇ум̣ на ваддад̇ий’’д̇и бадигкибид̇аб̣б̣ам̣.
Sace pana saṅghaṃ vā gaṇaṃ vā puggalaṃ vā anāmasitvā ‘‘idaṃ hiraññasuvaṇṇaṃ cetiyassa dema, vihārassa dema, navakammassa demā’’ti vadanti, paṭikkhipituṃ na vaṭṭati. ‘‘Ime idaṃ bhaṇantī’’ti kappiyakārakānaṃ ācikkhitabbaṃ. ‘‘Cetiyādīnaṃ atthāya tumhe gahetvā ṭhapethā’’ti vuttena pana ‘‘amhākaṃ gahetuṃ na vaṭṭatī’’ti paṭikkhipitabbaṃ.
сажз бана гожи б̣ахум̣ хиран̃н̃асуван̣н̣ам̣ аанзд̇ваа ‘‘ид̣̇ам̣ сан̇гхасса д̣̇амми, жад̇д̇ааро бажжаяз барибхун̃ж̇ат̇аа’’д̇и вад̣̇ад̇и, д̇ам̣ жз сан̇гхо самбадижчад̇и, бадиг̇г̇ахан̣зби барибхог̇зби аабад̇д̇и. д̇ад̇ра жз зго бхигку ‘‘наяид̣̇ам̣ габбад̇ий’’д̇и бадигкибад̇и, убаасаго жа ‘‘яад̣̇и на габбад̇и, маяхамзва бхависсад̇ий’’д̇и г̇ажчад̇и. со бхигку ‘‘д̇аяаа сан̇гхасса лаабханд̇арааяо гад̇о’’д̇и на гзнажи гин̃жи вад̇д̇аб̣б̣о. яо хи д̇ам̣ жод̣̇зд̇и, свзва саабад̇д̇иго ход̇и, д̇зна бана згзна б̣ахуу анаабад̇д̇игаа гад̇аа. сажз бана бхигкуухи ‘‘на ваддад̇ий’’д̇и бадигкид̇д̇з ‘‘габбияагаарагаанам̣ ваа хад̇т̇з бхависсад̇и, мама бурисаанам̣ ваа маяхам̣ ваа хад̇т̇з бхависсад̇и, гзвалам̣ д̇умхз бажжаяз барибхун̃ж̇ат̇аа’’д̇и вад̣̇ад̇и, ваддад̇и.
Sace pana koci bahuṃ hiraññasuvaṇṇaṃ ānetvā ‘‘idaṃ saṅghassa dammi, cattāro paccaye paribhuñjathā’’ti vadati, taṃ ce saṅgho sampaṭicchati, paṭiggahaṇepi paribhogepi āpatti. Tatra ce eko bhikkhu ‘‘nayidaṃ kappatī’’ti paṭikkhipati, upāsako ca ‘‘yadi na kappati, mayhameva bhavissatī’’ti gacchati. So bhikkhu ‘‘tayā saṅghassa lābhantarāyo kato’’ti na kenaci kiñci vattabbo. Yo hi taṃ codeti, sveva sāpattiko hoti, tena pana ekena bahū anāpattikā katā. Sace pana bhikkhūhi ‘‘na vaṭṭatī’’ti paṭikkhitte ‘‘kappiyakārakānaṃ vā hatthe bhavissati, mama purisānaṃ vā mayhaṃ vā hatthe bhavissati, kevalaṃ tumhe paccaye paribhuñjathā’’ti vadati, vaṭṭati.
жад̇убажжаяад̇т̇ааяа жа д̣̇иннам̣ язна язна бажжаязна ад̇т̇о ход̇и, д̇ад̣̇ад̇т̇ам̣ убанзд̇аб̣б̣ам̣, жийварад̇т̇ааяа д̣̇иннам̣ жийварзязва убанзд̇аб̣б̣ам̣. сажз жийварзна д̇аад̣̇исо ад̇т̇о над̇т̇и, бин̣д̣абаад̇аад̣̇ийхи сан̇гхо гиламад̇и, сан̇гхасудтуд̇ааяа абалогзд̇ваа д̇ад̣̇ад̇т̇ааяаби убанзд̇аб̣б̣ам̣. зса наяо бин̣д̣абаад̇аг̇илаанабажжаяад̇т̇ааяа д̣̇иннзби, сзнаасанад̇т̇ааяа д̣̇иннам̣ бана сзнаасанасса г̇арубхан̣д̣ад̇д̇аа сзнаасанзязва убанзд̇аб̣б̣ам̣. сажз бана бхигкуусу сзнаасанам̣ чад̣д̣зд̇ваа г̇ад̇зсу сзнаасанам̣ винассад̇и, ийд̣̇исз гаалз сзнаасанам̣ виссаж̇ж̇зд̇вааби бхигкуунам̣ барибхог̇о анун̃н̃аад̇о, д̇асмаа сзнаасанаж̇аг̇г̇анад̇т̇ам̣ муулажчзж̇ж̇ам̣ агад̇ваа яаабанамад̇д̇ам̣ барибхун̃ж̇ид̇аб̣б̣ам̣.
Catupaccayatthāya ca dinnaṃ yena yena paccayena attho hoti, tadatthaṃ upanetabbaṃ, cīvaratthāya dinnaṃ cīvareyeva upanetabbaṃ. Sace cīvarena tādiso attho natthi, piṇḍapātādīhi saṅgho kilamati, saṅghasuṭṭhutāya apaloketvā tadatthāyapi upanetabbaṃ. Esa nayo piṇḍapātagilānapaccayatthāya dinnepi, senāsanatthāya dinnaṃ pana senāsanassa garubhaṇḍattā senāsaneyeva upanetabbaṃ. Sace pana bhikkhūsu senāsanaṃ chaḍḍetvā gatesu senāsanaṃ vinassati, īdise kāle senāsanaṃ vissajjetvāpi bhikkhūnaṃ paribhogo anuññāto, tasmā senāsanajagganatthaṃ mūlacchejjaṃ akatvā yāpanamattaṃ paribhuñjitabbaṃ.
на гзвалан̃жа хиран̃н̃асуван̣н̣амзва, ан̃н̃амби кзд̇д̇авад̇т̇аад̣̇и агаббияам̣ на самбадижчид̇аб̣б̣ам̣. сажз хи гожи ‘‘маяхам̣ д̇исассасамбаад̣̇анагам̣ махаад̇ал̣аагам̣ ад̇т̇и, д̇ам̣ сан̇гхасса д̣̇аммий’’д̇и вад̣̇ад̇и, д̇ам̣ жз сан̇гхо самбадижчад̇и, бадиг̇г̇ахан̣зби барибхог̇зби аабад̇д̇иязва. яо бана д̇ам̣ бадигкибад̇и, со буриманаязнзва на гзнажи гин̃жи вад̇д̇аб̣б̣о. яо хи д̇ам̣ жод̣̇зд̇и, свзва саабад̇д̇иго ход̇и, д̇зна бана згзна б̣ахуу анаабад̇д̇игаа гад̇аа.
Na kevalañca hiraññasuvaṇṇameva, aññampi khettavatthādi akappiyaṃ na sampaṭicchitabbaṃ. Sace hi koci ‘‘mayhaṃ tisassasampādanakaṃ mahātaḷākaṃ atthi, taṃ saṅghassa dammī’’ti vadati, taṃ ce saṅgho sampaṭicchati, paṭiggahaṇepi paribhogepi āpattiyeva. Yo pana taṃ paṭikkhipati, so purimanayeneva na kenaci kiñci vattabbo. Yo hi taṃ codeti, sveva sāpattiko hoti, tena pana ekena bahū anāpattikā katā.
яо бана ‘‘д̇аад̣̇исам̣язва д̇ал̣аагам̣ д̣̇аммий’’д̇и вад̇ваа бхигкуухи ‘‘на ваддад̇ий’’д̇и бадигкид̇д̇о вад̣̇ад̇и ‘‘асуган̃жа асуган̃жа сан̇гхасса д̇ал̣аагам̣ ад̇т̇и, д̇ам̣ гат̇ам̣ ваддад̇ий’’д̇и. со вад̇д̇аб̣б̣о – ‘‘габбияам̣ гад̇ваа д̣̇иннам̣ бхависсад̇ий’’д̇и. гат̇ам̣ д̣̇иннам̣ габбияам̣ ход̇ийд̇и? ‘‘жад̇д̇ааро бажжаяз барибхун̃ж̇ат̇аа’’д̇и вад̇ваа д̣̇иннанд̇и. со сажз ‘‘саад̇ху, бханд̇з, жад̇д̇ааро бажжаяз сан̇гхо барибхун̃ж̇ад̇уу’’д̇и д̣̇зд̇и, ваддад̇и. ат̇ааби ‘‘д̇ал̣аагам̣ г̇ан̣хат̇аа’’д̇и вад̇ваа ‘‘на ваддад̇ий’’д̇и бадигкид̇д̇о ‘‘габбияагаараго ад̇т̇ий’’д̇и бужчид̇ваа ‘‘над̇т̇ий’’д̇и вуд̇д̇з ‘‘ид̣̇ам̣ асуго наама вижаарзссад̇и, асугасса ваа хад̇т̇з, маяхам̣ ваа хад̇т̇з бхависсад̇и, сан̇гхо габбияабхан̣д̣ам̣ барибхун̃ж̇ад̇уу’’д̇и вад̣̇ад̇и, ваддад̇и. сажзби ‘‘на ваддад̇ий’’д̇и бадигкид̇д̇о ‘‘уд̣̇агам̣ барибхун̃ж̇иссад̇и, бхан̣д̣агам̣ д̇ховиссад̇и, миг̇абагкино бивиссанд̇ий’’д̇и вад̣̇ад̇и, звамби ваддад̇и. ат̇ааби ‘‘на ваддад̇ий’’д̇и бадигкид̇д̇о вад̣̇ад̇и ‘‘габбияасийсзна г̇ан̣хат̇аа’’д̇и. ‘‘саад̇ху, убаасага, сан̇гхо баанийяам̣ бивиссад̇и, бхан̣д̣агам̣ д̇ховиссад̇и, миг̇абагкино бивиссанд̇ий’’д̇и вад̇ваа барибхун̃ж̇ид̇ум̣ ваддад̇и.
Yo pana ‘‘tādisaṃyeva taḷākaṃ dammī’’ti vatvā bhikkhūhi ‘‘na vaṭṭatī’’ti paṭikkhitto vadati ‘‘asukañca asukañca saṅghassa taḷākaṃ atthi, taṃ kathaṃ vaṭṭatī’’ti. So vattabbo – ‘‘kappiyaṃ katvā dinnaṃ bhavissatī’’ti. Kathaṃ dinnaṃ kappiyaṃ hotīti? ‘‘Cattāro paccaye paribhuñjathā’’ti vatvā dinnanti. So sace ‘‘sādhu, bhante, cattāro paccaye saṅgho paribhuñjatū’’ti deti, vaṭṭati. Athāpi ‘‘taḷākaṃ gaṇhathā’’ti vatvā ‘‘na vaṭṭatī’’ti paṭikkhitto ‘‘kappiyakārako atthī’’ti pucchitvā ‘‘natthī’’ti vutte ‘‘idaṃ asuko nāma vicāressati, asukassa vā hatthe, mayhaṃ vā hatthe bhavissati, saṅgho kappiyabhaṇḍaṃ paribhuñjatū’’ti vadati, vaṭṭati. Sacepi ‘‘na vaṭṭatī’’ti paṭikkhitto ‘‘udakaṃ paribhuñjissati, bhaṇḍakaṃ dhovissati, migapakkhino pivissantī’’ti vadati, evampi vaṭṭati. Athāpi ‘‘na vaṭṭatī’’ti paṭikkhitto vadati ‘‘kappiyasīsena gaṇhathā’’ti. ‘‘Sādhu, upāsaka, saṅgho pānīyaṃ pivissati, bhaṇḍakaṃ dhovissati, migapakkhino pivissantī’’ti vatvā paribhuñjituṃ vaṭṭati.
ат̇ааби ‘‘мама д̇ал̣аагам̣ ваа богкаран̣им̣ ваа сан̇гхасса д̣̇аммий’’д̇и ‘‘вуд̇д̇з, саад̇ху, убаасага, сан̇гхо баанийяам̣ бивиссад̇ий’’д̇иаад̣̇ийни вад̇ваа барибхун̃ж̇ид̇ум̣ ваддад̇иязва. яад̣̇и бана бхигкуухи хад̇т̇агаммам̣ яаажид̇ваа сахад̇т̇зна жа габбияабат̇авим̣ канид̇ваа уд̣̇агабарибхог̇ад̇т̇ааяа д̇ал̣аагам̣ гаарид̇ам̣ ход̇и, д̇ам̣ жз ниссааяа сассам̣ нибпаад̣̇зд̇ваа мануссаа вихаарз габбияабхан̣д̣ам̣ д̣̇знд̇и, ваддад̇и. ат̇а мануссаа зва сан̇гхасса убагаарад̇т̇ааяа сан̇гхигабхуумим̣ канид̇ваа д̇ам̣ ниссааяа нибпаннасассад̇о габбияабхан̣д̣ам̣ д̣̇знд̇и, звамби ваддад̇и. ‘‘амхаагам̣ згам̣ габбияагаарагам̣ табзт̇аа’’д̇и вуд̇д̇з жа табзд̇умби лаб̣бхад̇и. ат̇а бана д̇з мануссаа рааж̇аб̣алинаа убад̣̇д̣̇уд̇аа баггаманд̇и, ан̃н̃з бадибаж̇ж̇анд̇и, на жа бхигкуунам̣ гин̃жи д̣̇знд̇и, уд̣̇агам̣ ваарзд̇ум̣ лаб̣бхад̇и. д̇ан̃жа ко гасигаммагаалзязва, на сассагаалз. сажз д̇з вад̣̇анд̇и ‘‘нану, бханд̇з, буб̣б̣зби мануссаа имам̣ ниссааяа сассам̣ агам̣суу’’д̇и . д̇ад̇о вад̇д̇аб̣б̣аа – ‘‘д̇з сан̇гхасса иман̃жа иман̃жа убагаарам̣ агам̣су, ид̣̇ан̃жид̣̇ан̃жа габбияабхан̣д̣ам̣ ад̣̇ам̣суу’’д̇и. сажз вад̣̇анд̇и – ‘‘маяамби д̣̇ассаамаа’’д̇и, звамби ваддад̇и.
Athāpi ‘‘mama taḷākaṃ vā pokkharaṇiṃ vā saṅghassa dammī’’ti ‘‘vutte, sādhu, upāsaka, saṅgho pānīyaṃ pivissatī’’tiādīni vatvā paribhuñjituṃ vaṭṭatiyeva. Yadi pana bhikkhūhi hatthakammaṃ yācitvā sahatthena ca kappiyapathaviṃ khanitvā udakaparibhogatthāya taḷākaṃ kāritaṃ hoti, taṃ ce nissāya sassaṃ nipphādetvā manussā vihāre kappiyabhaṇḍaṃ denti, vaṭṭati. Atha manussā eva saṅghassa upakāratthāya saṅghikabhūmiṃ khanitvā taṃ nissāya nipphannasassato kappiyabhaṇḍaṃ denti, evampi vaṭṭati. ‘‘Amhākaṃ ekaṃ kappiyakārakaṃ ṭhapethā’’ti vutte ca ṭhapetumpi labbhati. Atha pana te manussā rājabalinā upaddutā pakkamanti, aññe paṭipajjanti, na ca bhikkhūnaṃ kiñci denti, udakaṃ vāretuṃ labbhati. Tañca kho kasikammakāleyeva, na sassakāle. Sace te vadanti ‘‘nanu, bhante, pubbepi manussā imaṃ nissāya sassaṃ akaṃsū’’ti . Tato vattabbā – ‘‘te saṅghassa imañca imañca upakāraṃ akaṃsu, idañcidañca kappiyabhaṇḍaṃ adaṃsū’’ti. Sace vadanti – ‘‘mayampi dassāmā’’ti, evampi vaṭṭati.
сажз бана гожи аб̣яад̇д̇о агаббияавохаарзна д̇ал̣аагам̣ бадиг̇г̇ан̣хаад̇и ваа гаарзд̇и ваа, д̇ам̣ бхигкуухи на барибхун̃ж̇ид̇аб̣б̣ам̣, д̇ам̣ ниссааяа лад̣̇д̇хам̣ габбияабхан̣д̣амби агаббияамзва. сажз бхигкуухи барижжад̇д̇абхаавам̣ н̃ад̇ваа саамиго ваа д̇асса буд̇д̇ад̇хийд̇аро ваа ан̃н̃о ваа гожи вам̣сз уббанно буна габбияавохаарзна д̣̇зд̇и, ваддад̇и. бажчиннз гулавам̣сз яо д̇асса ж̇анабад̣̇асса саамиго, со ажчинд̣̇ид̇ваа буна д̣̇зд̇и, жид̇д̇алабаб̣б̣ад̇з бхигкунаа нийхадауд̣̇агаваахагам̣ ал̣анааг̇арааж̇амахзсий вияа, звамби ваддад̇и.
Sace pana koci abyatto akappiyavohārena taḷākaṃ paṭiggaṇhāti vā kāreti vā, taṃ bhikkhūhi na paribhuñjitabbaṃ, taṃ nissāya laddhaṃ kappiyabhaṇḍampi akappiyameva. Sace bhikkhūhi pariccattabhāvaṃ ñatvā sāmiko vā tassa puttadhītaro vā añño vā koci vaṃse uppanno puna kappiyavohārena deti, vaṭṭati. Pacchinne kulavaṃse yo tassa janapadassa sāmiko, so acchinditvā puna deti, cittalapabbate bhikkhunā nīhaṭaudakavāhakaṃ aḷanāgarājamahesī viya, evampi vaṭṭati.
габбияавохаарзби уд̣̇агавасзна бадиг̇г̇ахид̇ад̇ал̣аагз суд̣̇д̇хажид̇д̇аанам̣ мад̇д̇игуд̣̇д̇харан̣абаал̣иб̣анд̇ханаад̣̇ийни жа гаад̇ум̣ ваддад̇и. д̇ам̣ ниссааяа бана сассам̣ гаронд̇з д̣̇исваа габбияагаарагам̣ табзд̇ум̣ на ваддад̇и. яад̣̇и д̇з саяамзва габбияабхан̣д̣ам̣ д̣̇знд̇и, г̇ахзд̇аб̣б̣ам̣. но жз д̣̇знд̇и, на жод̣̇зд̇аб̣б̣ам̣, на саарзд̇аб̣б̣ам̣. бажжаяавасзна бадиг̇г̇ахид̇ад̇ал̣аагз габбияагаарагам̣ табзд̇ум̣ ваддад̇и. мад̇д̇игуд̣̇д̇харан̣абаал̣иб̣анд̇ханаад̣̇ийни бана гаад̇ум̣ на ваддад̇и. сажз габбияагаарагаа саяамзва гаронд̇и, ваддад̇и. аб̣яад̇д̇зна бана лаж̇ж̇ибхигкунаа гаараабид̇зсу гин̃жааби бадиг̇г̇ахан̣з габбияам̣, бхигкусса баяог̇абажжаяаа уббаннзна миссагад̇д̇аа висаг̇ад̇абин̣д̣абаад̇о вияа агаббияамам̣сарасамиссагабхож̇анам̣ вияа жа д̣̇уб̣б̣иниб̣бхог̇ам̣ ход̇и, саб̣б̣зсам̣ агаббияамзва.
Kappiyavohārepi udakavasena paṭiggahitataḷāke suddhacittānaṃ mattikuddharaṇapāḷibandhanādīni ca kātuṃ vaṭṭati. Taṃ nissāya pana sassaṃ karonte disvā kappiyakārakaṃ ṭhapetuṃ na vaṭṭati. Yadi te sayameva kappiyabhaṇḍaṃ denti, gahetabbaṃ. No ce denti, na codetabbaṃ, na sāretabbaṃ. Paccayavasena paṭiggahitataḷāke kappiyakārakaṃ ṭhapetuṃ vaṭṭati. Mattikuddharaṇapāḷibandhanādīni pana kātuṃ na vaṭṭati. Sace kappiyakārakā sayameva karonti, vaṭṭati. Abyattena pana lajjibhikkhunā kārāpitesu kiñcāpi paṭiggahaṇe kappiyaṃ, bhikkhussa payogapaccayā uppannena missakattā visagatapiṇḍapāto viya akappiyamaṃsarasamissakabhojanaṃ viya ca dubbinibbhogaṃ hoti, sabbesaṃ akappiyameva.
сажз бана ‘‘уд̣̇агасса огаасо ад̇т̇и, д̇ал̣аагасса баал̣и т̇ираа, яат̇аа б̣ахум̣ уд̣̇агам̣ г̇ан̣хаад̇и, звам̣ гарохи, д̇ийрасамийбз уд̣̇агам̣ гарохий’’д̇и звам̣ уд̣̇агамзва вижаарзд̇и, ваддад̇и. уд̣̇д̇ханз аг̇г̇им̣ на баад̇знд̇и, ‘‘уд̣̇агагаммам̣ лаб̣бхад̇у убаасагаа’’д̇и вад̇д̇ум̣ ваддад̇и. ‘‘сассам̣ гад̇ваа аахарат̇аа’’д̇и вад̇д̇ум̣ бана на ваддад̇и. сажз бана д̇ал̣аагз ад̇иб̣ахум̣ уд̣̇агам̣ д̣̇исваа бассад̇о ваа бидтид̇о ваа маад̇игам̣ нийхараабзд̇и, ванам̣ чинд̣̇аабзд̇ваа гзд̣̇аарз гаараабзд̇и, бораан̣агзд̣̇аарзсу ваа багад̇ибхааг̇ам̣ аг̇г̇ахзд̇ваа ад̇ирзгам̣ г̇ан̣хаад̇и, навасассз ваа агааласассз ваа абарижчиннабхааг̇з ‘‘зд̇д̇агз гахаабан̣з д̣̇зт̇аа’’д̇и гахаабан̣з удтаабзд̇и, саб̣б̣зсам̣ агаббияам̣.
Sace pana ‘‘udakassa okāso atthi, taḷākassa pāḷi thirā, yathā bahuṃ udakaṃ gaṇhāti, evaṃ karohi, tīrasamīpe udakaṃ karohī’’ti evaṃ udakameva vicāreti, vaṭṭati. Uddhane aggiṃ na pātenti, ‘‘udakakammaṃ labbhatu upāsakā’’ti vattuṃ vaṭṭati. ‘‘Sassaṃ katvā āharathā’’ti vattuṃ pana na vaṭṭati. Sace pana taḷāke atibahuṃ udakaṃ disvā passato vā piṭṭhito vā mātikaṃ nīharāpeti, vanaṃ chindāpetvā kedāre kārāpeti, porāṇakedāresu vā pakatibhāgaṃ aggahetvā atirekaṃ gaṇhāti, navasasse vā akālasasse vā aparicchinnabhāge ‘‘ettake kahāpaṇe dethā’’ti kahāpaṇe uṭṭhāpeti, sabbesaṃ akappiyaṃ.
яо бана ‘‘гассат̇а вабат̇аа’’д̇и авад̇ваа ‘‘зд̇д̇агааяа бхуумияаа, зд̇д̇аго наама бхааг̇о’’д̇и звам̣ бхуумим̣ ваа бад̇идтабзд̇и, ‘‘зд̇д̇агз бхуумибхааг̇з амхзхи сассам̣ гад̇ам̣, зд̇д̇агам̣ наама бхааг̇ам̣ г̇ан̣хат̇аа’’д̇и вад̣̇анд̇зсу гассагзсу бхуумиббамаан̣аг̇г̇ахан̣ад̇т̇ам̣ раж̇ж̇уяаа ваа д̣̇ан̣д̣зна ваа минаад̇и, калз ваа тад̇ваа рагкад̇и, калад̇о ваа нийхараабзд̇и, годтааг̇аарз ваа бадисаамзд̇и, д̇ассзва д̇ам̣ агаббияам̣.
Yo pana ‘‘kassatha vapathā’’ti avatvā ‘‘ettakāya bhūmiyā, ettako nāma bhāgo’’ti evaṃ bhūmiṃ vā patiṭṭhapeti, ‘‘ettake bhūmibhāge amhehi sassaṃ kataṃ, ettakaṃ nāma bhāgaṃ gaṇhathā’’ti vadantesu kassakesu bhūmippamāṇaggahaṇatthaṃ rajjuyā vā daṇḍena vā mināti, khale vā ṭhatvā rakkhati, khalato vā nīharāpeti, koṭṭhāgāre vā paṭisāmeti, tasseva taṃ akappiyaṃ.
сажз гассагаа гахаабан̣з аахарид̇ваа ‘‘имз сан̇гхасса аахадаа’’д̇и вад̣̇анд̇и, ан̃н̃ад̇аро жа бхигку ‘‘на сан̇гхо гахаабан̣з каад̣̇ад̇ий’’д̇и сан̃н̃ааяа ‘‘зд̇д̇агзхи гахаабан̣зхи саадагз аахара, зд̇д̇агзхи яааг̇уаад̣̇ийни самбаад̣̇зхий’’д̇и вад̣̇ад̇и. яам̣ д̇з аахаранд̇и, саб̣б̣зсам̣ агаббияам̣. гасмаа? гахаабан̣аанам̣ вижаарид̇ад̇д̇аа.
Sace kassakā kahāpaṇe āharitvā ‘‘ime saṅghassa āhaṭā’’ti vadanti, aññataro ca bhikkhu ‘‘na saṅgho kahāpaṇe khādatī’’ti saññāya ‘‘ettakehi kahāpaṇehi sāṭake āhara, ettakehi yāguādīni sampādehī’’ti vadati. Yaṃ te āharanti, sabbesaṃ akappiyaṃ. Kasmā? Kahāpaṇānaṃ vicāritattā.
сажз д̇хан̃н̃ам̣ аахарид̇ваа ид̣̇ам̣ сан̇гхасса аахаданд̇и вад̣̇анд̇и, ан̃н̃ад̇аро жа бхигку буриманаязнзва ‘‘зд̇д̇агзхи вийхийхи ид̣̇ан̃жид̣̇ан̃жа аахарат̇аа’’д̇и вад̣̇ад̇и. яам̣ д̇з аахаранд̇и, д̇ассзва агаббияам̣. гасмаа? д̇хан̃н̃асса вижаарид̇ад̇д̇аа.
Sace dhaññaṃ āharitvā idaṃ saṅghassa āhaṭanti vadanti, aññataro ca bhikkhu purimanayeneva ‘‘ettakehi vīhīhi idañcidañca āharathā’’ti vadati. Yaṃ te āharanti, tasseva akappiyaṃ. Kasmā? Dhaññassa vicāritattā.
сажз д̇ан̣д̣улам̣ ваа абаран̣н̣ам̣ ваа аахарид̇ваа ‘‘ид̣̇ам̣ сан̇гхасса аахада’’нд̇и вад̣̇анд̇и, ан̃н̃ад̇аро жа бхигку буриманаязнзва ‘‘зд̇д̇агзхи д̇ан̣д̣улзхи ид̣̇ан̃жид̣̇ан̃жа аахарат̇аа’’д̇и вад̣̇ад̇и. яам̣ д̇з аахаранд̇и, саб̣б̣зсам̣ габбияам̣. гасмаа? габбияаанам̣ д̇ан̣д̣улаад̣̇ийнам̣ вижаарид̇ад̇д̇аа. гаяавиггаязби анаабад̇д̇и, габбияагаарагасса аажигкид̇ад̇д̇аа.
Sace taṇḍulaṃ vā aparaṇṇaṃ vā āharitvā ‘‘idaṃ saṅghassa āhaṭa’’nti vadanti, aññataro ca bhikkhu purimanayeneva ‘‘ettakehi taṇḍulehi idañcidañca āharathā’’ti vadati. Yaṃ te āharanti, sabbesaṃ kappiyaṃ. Kasmā? Kappiyānaṃ taṇḍulādīnaṃ vicāritattā. Kayavikkayepi anāpatti, kappiyakārakassa ācikkhitattā.
буб̣б̣з бана жид̇д̇алабаб̣б̣ад̇з зго бхигку жад̇усаалад̣̇ваарз ‘‘ахо вад̇а свз сан̇гхасса зд̇д̇агаббамаан̣з буувз бажзяяу’’нд̇и аараамигаанам̣ сан̃н̃ааж̇ананад̇т̇ам̣ бхуумияам̣ ман̣д̣алам̣ агааси, д̇ам̣ д̣̇исваа чзго аараамиго д̇ат̇зва гад̇ваа д̣̇уд̇ияад̣̇ивасз бхзрияаа аагодид̇ааяа саннибад̇ид̇з сан̇гхз буувам̣ г̇ахзд̇ваа сан̇гхад̇т̇зрам̣ ааха – ‘‘бханд̇з, амхзхи ид̇о буб̣б̣з нзва бид̇уунам̣ на бид̇аамахаанам̣ зваруубам̣ суд̇абуб̣б̣ам̣, згзна аяязна жад̇уссаалад̣̇ваарз буувад̇т̇ааяа сан̃н̃аа гад̇аа, ид̇о д̣̇аани бабхуд̇и аяяаа ад̇д̇ано ад̇д̇ано жид̇д̇аануруубам̣ вад̣̇анд̇у, амхаагамби паасувихааро бхависсад̇ий’’д̇и. махаат̇зро д̇ад̇ова нивад̇д̇и, згабхигкунааби бууво на г̇ахид̇о. звам̣ буб̣б̣з д̇ад̇руббаад̣̇амби на барибхун̃ж̇им̣су. д̇асмаа –
Pubbe pana cittalapabbate eko bhikkhu catusāladvāre ‘‘aho vata sve saṅghassa ettakappamāṇe pūve paceyyu’’nti ārāmikānaṃ saññājananatthaṃ bhūmiyaṃ maṇḍalaṃ akāsi, taṃ disvā cheko ārāmiko tatheva katvā dutiyadivase bheriyā ākoṭitāya sannipatite saṅghe pūvaṃ gahetvā saṅghattheraṃ āha – ‘‘bhante, amhehi ito pubbe neva pitūnaṃ na pitāmahānaṃ evarūpaṃ sutapubbaṃ, ekena ayyena catussāladvāre pūvatthāya saññā katā, ito dāni pabhuti ayyā attano attano cittānurūpaṃ vadantu, amhākampi phāsuvihāro bhavissatī’’ti. Mahāthero tatova nivatti, ekabhikkhunāpi pūvo na gahito. Evaṃ pubbe tatruppādampi na paribhuñjiṃsu. Tasmā –
саллзкам̣ ажжаж̇анд̇зна, аббамад̇д̇зна бхигкунаа;
Sallekhaṃ accajantena, appamattena bhikkhunā;
габбиязби на гаад̇аб̣б̣аа, аамисад̇т̇ааяа лолад̇аад̇и.
Kappiyepi na kātabbā, āmisatthāya lolatāti.
яо жааяам̣ д̇ал̣аагз вуд̇д̇о, богкаран̣ий-уд̣̇агаваахагамаад̇игаад̣̇ийсуби зсзва наяо.
Yo cāyaṃ taḷāke vutto, pokkharaṇī-udakavāhakamātikādīsupi eseva nayo.
буб̣б̣ан̣н̣аабаран̣н̣аужчупалаапалаад̣̇ийнам̣ вируханадтаанам̣ яам̣ гин̃жи кзд̇д̇ам̣ ваа вад̇т̇ум̣ ваа д̣̇аммийд̇и вуд̇д̇зби ‘‘на ваддад̇ий’’д̇и бадигкибид̇ваа д̇ал̣аагз вуд̇д̇анаязнзва яад̣̇аа габбияавохаарзна ‘‘жад̇убажжаяабарибхог̇ад̇т̇ааяа д̣̇аммий’’д̇и вад̣̇ад̇и, д̇ад̣̇аа самбадижчид̇аб̣б̣ам̣, ‘‘ванам̣ д̣̇амми, аран̃н̃ам̣ д̣̇аммий’’д̇и вуд̇д̇з бана ваддад̇и. сажз мануссаа бхигкуухи анаан̣ад̇д̇ааязва д̇ад̇т̇а ругкз чинд̣̇ид̇ваа абаран̣н̣аад̣̇ийни самбаад̣̇зд̇ваа бхигкуунам̣ бхааг̇ам̣ д̣̇знд̇и, ваддад̇и; ад̣̇знд̇аа на жод̣̇зд̇аб̣б̣аа. сажз гзнажид̣̇зва анд̇арааязна д̇зсу багганд̇зсу ан̃н̃з гаронд̇и, на жа бхигкуунам̣ гин̃жи д̣̇знд̇и, д̇з ваарзд̇аб̣б̣аа. сажз вад̣̇анд̇и – ‘‘нану, бханд̇з, буб̣б̣зби мануссаа ид̇ха сассаани агам̣суу’’д̇и, д̇ад̇о д̇з вад̇д̇аб̣б̣аа – ‘‘д̇з сан̇гхасса ид̣̇ан̃жид̣̇ан̃жа габбияабхан̣д̣ам̣ ад̣̇ам̣суу’’д̇и. сажз вад̣̇анд̇и – ‘‘маяамби д̣̇ассаамаа’’д̇и звам̣ ваддад̇и.
Pubbaṇṇāparaṇṇaucchuphalāphalādīnaṃ viruhanaṭṭhānaṃ yaṃ kiñci khettaṃ vā vatthuṃ vā dammīti vuttepi ‘‘na vaṭṭatī’’ti paṭikkhipitvā taḷāke vuttanayeneva yadā kappiyavohārena ‘‘catupaccayaparibhogatthāya dammī’’ti vadati, tadā sampaṭicchitabbaṃ, ‘‘vanaṃ dammi, araññaṃ dammī’’ti vutte pana vaṭṭati. Sace manussā bhikkhūhi anāṇattāyeva tattha rukkhe chinditvā aparaṇṇādīni sampādetvā bhikkhūnaṃ bhāgaṃ denti, vaṭṭati; adentā na codetabbā. Sace kenacideva antarāyena tesu pakkantesu aññe karonti, na ca bhikkhūnaṃ kiñci denti, te vāretabbā. Sace vadanti – ‘‘nanu, bhante, pubbepi manussā idha sassāni akaṃsū’’ti, tato te vattabbā – ‘‘te saṅghassa idañcidañca kappiyabhaṇḍaṃ adaṃsū’’ti. Sace vadanti – ‘‘mayampi dassāmā’’ti evaṃ vaṭṭati.
ган̃жи сассудтаанагам̣ бхуумиббад̣̇зсам̣ санд̇хааяа ‘‘сиймам̣ д̣̇змаа’’д̇и вад̣̇анд̇и, ваддад̇и. сиймаа барижчзд̣̇анад̇т̇ам̣ бана т̇амбхаа ваа баасаан̣аа ваа саяам̣ на табзд̇аб̣б̣аа. гасмаа? бхууми наама анаг̇гхаа аббагзнааби баарааж̇иго бхавзяяа, аараамигаанам̣ бана вад̇д̇аб̣б̣ам̣ – ‘‘иминаа таанзна амхаагам̣ сиймаа г̇ад̇аа’’д̇и. сажзби хи д̇з ад̇хигам̣ г̇ан̣ханд̇и, барияааязна гат̇ид̇ад̇д̇аа анаабад̇д̇и. яад̣̇и бана рааж̇арааж̇амахаамад̇д̇аад̣̇аяо саяамзва т̇амбхз табаабзд̇ваа ‘‘жад̇д̇ааро бажжаяз барибхун̃ж̇ат̇аа’’д̇и д̣̇знд̇и, ваддад̇иязва.
Kañci sassuṭṭhānakaṃ bhūmippadesaṃ sandhāya ‘‘sīmaṃ demā’’ti vadanti, vaṭṭati. Sīmā paricchedanatthaṃ pana thambhā vā pāsāṇā vā sayaṃ na ṭhapetabbā. Kasmā? Bhūmi nāma anagghā appakenāpi pārājiko bhaveyya, ārāmikānaṃ pana vattabbaṃ – ‘‘iminā ṭhānena amhākaṃ sīmā gatā’’ti. Sacepi hi te adhikaṃ gaṇhanti, pariyāyena kathitattā anāpatti. Yadi pana rājarājamahāmattādayo sayameva thambhe ṭhapāpetvā ‘‘cattāro paccaye paribhuñjathā’’ti denti, vaṭṭatiyeva.
сажз гожи анд̇осиймааяа д̇ал̣аагам̣ канад̇и, вихаарамаж̇жхзна ваа маад̇игам̣ нзд̇и, жзд̇ияан̇г̇ан̣аб̣од̇хияан̇г̇ан̣аад̣̇ийни д̣̇уссанд̇и, ваарзд̇аб̣б̣о. сажз сан̇гхо гин̃жи лабхид̇ваа аамисаг̇аругад̇ааяа на ваарзд̇и, зго бхигку ваарзд̇и, сова бхигку иссаро. сажз зго бхигку на ваарзд̇и, ‘‘нзт̇а д̇умхз’’д̇и д̇зсам̣язва багко ход̇и, сан̇гхо ваарзд̇и, сан̇гхова иссаро. сан̇гхигзсу хи гаммзсу яо д̇хаммагаммам̣ гарод̇и, сова иссаро. сажз ваарияамааноби гарод̇и, хздтаа г̇ахид̇ам̣ бам̣сум̣ хздтаа багкибид̇ваа, убари г̇ахид̇ам̣ бам̣сум̣ убари багкибид̇ваа буурзд̇аб̣б̣аа.
Sace koci antosīmāya taḷākaṃ khanati, vihāramajjhena vā mātikaṃ neti, cetiyaṅgaṇabodhiyaṅgaṇādīni dussanti, vāretabbo. Sace saṅgho kiñci labhitvā āmisagarukatāya na vāreti, eko bhikkhu vāreti, sova bhikkhu issaro. Sace eko bhikkhu na vāreti, ‘‘netha tumhe’’ti tesaṃyeva pakkho hoti, saṅgho vāreti, saṅghova issaro. Saṅghikesu hi kammesu yo dhammakammaṃ karoti, sova issaro. Sace vāriyamānopi karoti, heṭṭhā gahitaṃ paṃsuṃ heṭṭhā pakkhipitvā, upari gahitaṃ paṃsuṃ upari pakkhipitvā pūretabbā.
сажз гожи яат̇ааж̇аад̇амзва ужчум̣ ваа абаран̣н̣ам̣ ваа алааб̣угумбхан̣д̣аад̣̇игам̣ ваа валлипалам̣ д̣̇аад̇угаамо ‘‘зд̇ам̣ саб̣б̣ам̣ ужчукзд̇д̇ам̣ абаран̣н̣авад̇т̇ум̣ валлипалааваадам̣ д̣̇аммий’’д̇и вад̣̇ад̇и, саха вад̇т̇унаа бараамадтад̇д̇аа ‘‘на ваддад̇ий’’д̇и махаасумад̇т̇зро ааха. махаабад̣̇умад̇т̇зро бана ‘‘абхилаабамад̇д̇амзд̇ам̣ саамигаанам̣язва хи со бхуумибхааг̇о д̇асмаа ваддад̇ий’’д̇и ааха.
Sace koci yathājātameva ucchuṃ vā aparaṇṇaṃ vā alābukumbhaṇḍādikaṃ vā valliphalaṃ dātukāmo ‘‘etaṃ sabbaṃ ucchukhettaṃ aparaṇṇavatthuṃ valliphalāvāṭaṃ dammī’’ti vadati, saha vatthunā parāmaṭṭhattā ‘‘na vaṭṭatī’’ti mahāsumatthero āha. Mahāpadumatthero pana ‘‘abhilāpamattametaṃ sāmikānaṃyeva hi so bhūmibhāgo tasmā vaṭṭatī’’ti āha.
‘‘д̣̇аасам̣ д̣̇аммий’’д̇и вад̣̇ад̇и, на ваддад̇и. ‘‘аараамигам̣ д̣̇амми, взяяааважжагарам̣ д̣̇амми, габбияагаарагам̣ д̣̇аммий’’д̇и вуд̇д̇з ваддад̇и. сажз со аараамиго бурзбхад̇д̇амби бажчаабхад̇д̇амби сан̇гхассзва гаммам̣ гарод̇и, сааман̣зрасса вияа саб̣б̣ам̣ бхзсаж̇ж̇абадиж̇аг̇г̇анамби д̇асса гаад̇аб̣б̣ам̣. сажз бурзбхад̇д̇амзва сан̇гхасса гаммам̣ гарод̇и, бажчаабхад̇д̇ам̣ ад̇д̇ано гаммам̣ гарод̇и, сааяам̣ ниваабо на д̣̇аад̇аб̣б̣о. язби бан̃жад̣̇ивасаваарзна ваа багкаваарзна ваа сан̇гхасса гаммам̣ гад̇ваа сзсагаалз ад̇д̇ано гаммам̣ гаронд̇и, д̇зсамби гаран̣агаалзязва бхад̇д̇ан̃жа ниваабо жа д̣̇аад̇аб̣б̣о. сажз сан̇гхасса гаммам̣ над̇т̇и, ад̇д̇аноязва гаммам̣ гад̇ваа ж̇ийванд̇и, д̇з жз хад̇т̇агаммамуулам̣ аанзд̇ваа д̣̇знд̇и, г̇ахзд̇аб̣б̣ам̣. но жз д̣̇знд̇и, на гин̃жи вад̇д̇аб̣б̣аа. яам̣ гин̃жи раж̇агад̣̇аасамби бзсагаарад̣̇аасамби аараамиганаамзна самбадижчид̇ум̣ ваддад̇и.
‘‘Dāsaṃ dammī’’ti vadati, na vaṭṭati. ‘‘Ārāmikaṃ dammi, veyyāvaccakaraṃ dammi, kappiyakārakaṃ dammī’’ti vutte vaṭṭati. Sace so ārāmiko purebhattampi pacchābhattampi saṅghasseva kammaṃ karoti, sāmaṇerassa viya sabbaṃ bhesajjapaṭijagganampi tassa kātabbaṃ. Sace purebhattameva saṅghassa kammaṃ karoti, pacchābhattaṃ attano kammaṃ karoti, sāyaṃ nivāpo na dātabbo. Yepi pañcadivasavārena vā pakkhavārena vā saṅghassa kammaṃ katvā sesakāle attano kammaṃ karonti, tesampi karaṇakāleyeva bhattañca nivāpo ca dātabbo. Sace saṅghassa kammaṃ natthi, attanoyeva kammaṃ katvā jīvanti, te ce hatthakammamūlaṃ ānetvā denti, gahetabbaṃ. No ce denti, na kiñci vattabbā. Yaṃ kiñci rajakadāsampi pesakāradāsampi ārāmikanāmena sampaṭicchituṃ vaṭṭati.
сажз ‘‘г̇ааво д̣̇змаа’’д̇и вад̣̇анд̇и, ‘‘на ваддад̇ий’’д̇и бадигкибид̇аб̣б̣аа. имаа г̇ааво гуд̇од̇и бан̣д̣ид̇зхи бан̃жа г̇орасабарибхог̇ад̇т̇ааяа д̣̇иннаад̇и, ‘‘маяамби бан̃жаг̇орасабарибхог̇ад̇т̇ааяа д̣̇змаа’’д̇и вуд̇д̇з ваддад̇и. аж̇игаад̣̇ийсуби зсзва наяо. ‘‘хад̇т̇им̣ д̣̇зма, ассам̣ махисам̣ гуггудам̣ суугарам̣ д̣̇змаа’’д̇и вад̣̇анд̇и, самбадижчид̇ум̣ на ваддад̇и. сажз гзжи мануссаа ‘‘аббоссуггаа, бханд̇з, д̇умхз хот̇а, маяам̣ имз г̇ахзд̇ваа д̇умхаагам̣ габбияабхан̣д̣ам̣ д̣̇ассаамаа’’д̇и г̇ан̣ханд̇и, ваддад̇и. ‘‘гуггудасуугараа сукам̣ ж̇ийванд̇уу’’д̇и аран̃н̃з виссаж̇ж̇зд̇ум̣ ваддад̇и. ‘‘имам̣ д̇ал̣аагам̣, имам̣ кзд̇д̇ам̣, имам̣ вад̇т̇ум̣, вихаарасса д̣̇змаа’’д̇и вуд̇д̇з бадигкибид̇ум̣ на лаб̣бхад̇ийд̇и. сзсамзд̇т̇а уд̇д̇аанад̇т̇амзва.
Sace ‘‘gāvo demā’’ti vadanti, ‘‘na vaṭṭatī’’ti paṭikkhipitabbā. Imā gāvo kutoti paṇḍitehi pañca gorasaparibhogatthāya dinnāti, ‘‘mayampi pañcagorasaparibhogatthāya demā’’ti vutte vaṭṭati. Ajikādīsupi eseva nayo. ‘‘Hatthiṃ dema, assaṃ mahisaṃ kukkuṭaṃ sūkaraṃ demā’’ti vadanti, sampaṭicchituṃ na vaṭṭati. Sace keci manussā ‘‘appossukkā, bhante, tumhe hotha, mayaṃ ime gahetvā tumhākaṃ kappiyabhaṇḍaṃ dassāmā’’ti gaṇhanti, vaṭṭati. ‘‘Kukkuṭasūkarā sukhaṃ jīvantū’’ti araññe vissajjetuṃ vaṭṭati. ‘‘Imaṃ taḷākaṃ, imaṃ khettaṃ, imaṃ vatthuṃ, vihārassa demā’’ti vutte paṭikkhipituṃ na labbhatīti. Sesamettha uttānatthameva.
самудтаанаад̣̇ийсу ид̣̇амби часамудтаанам̣ гирияам̣, носан̃н̃аавимогкам̣, ажид̇д̇агам̣, бан̣н̣ад̇д̇иваж̇ж̇ам̣, гааяагаммаважийгаммам̣ , д̇ижид̇д̇ам̣, д̇ивзд̣̇ананд̇и.
Samuṭṭhānādīsu idampi chasamuṭṭhānaṃ kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ , ticittaṃ, tivedananti.
рааж̇асигкаабад̣̇аван̣н̣анаа нидтид̇аа.
Rājasikkhāpadavaṇṇanā niṭṭhitā.
нидтид̇о жийвараваг̇г̇о батамо.
Niṭṭhito cīvaravaggo paṭhamo.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 10. рааж̇асигкаабад̣̇ам̣ • 10. Rājasikkhāpadaṃ
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 10. рааж̇асигкаабад̣̇аван̣н̣анаа • 10. Rājasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 10. рааж̇асигкаабад̣̇аван̣н̣анаа • 10. Rājasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 10. рааж̇асигкаабад̣̇аван̣н̣анаа • 10. Rājasikkhāpadavaṇṇanā
