(д̣̇уд̇ияо бхааг̇о)

(Dutiyo bhāgo)

2. д̣̇уганибаад̇о

2. Dukanipāto

1. д̣̇ал̣хаваг̇г̇о

1. Daḷhavaggo

[151] 1. рааж̇оваад̣̇аж̇аад̇агаван̣н̣анаа

[151] 1. Rājovādajātakavaṇṇanā

д̣̇ал̣хам̣ д̣̇ал̣хасса кибад̇ийд̇и ид̣̇ам̣ сад̇т̇аа ж̇зд̇аванз вихаранд̇о рааж̇оваад̣̇ам̣ аараб̣бха гат̇зси. со д̇зсагун̣аж̇аад̇агз (ж̇аа. 2.17.1 аад̣̇аяо) аави бхависсад̇и. згасмим̣ бана д̣̇ивасз госаларааж̇аа згам̣ аг̇ад̇иг̇ад̇ам̣ д̣̇уб̣б̣инижчаяам̣ ад̣д̣ам̣ винижчинид̇ваа бхуд̇д̇абаад̇араасо аллахад̇т̇ова алан̇гад̇арат̇ам̣ абхируяха сад̇т̇у санд̇игам̣ г̇анд̇ваа пуллабад̣̇умасассиригзсу баад̣̇зсу нибад̇ид̇ваа сад̇т̇аарам̣ ванд̣̇ид̇ваа згаманд̇ам̣ нисийд̣̇и. ат̇а нам̣ сад̇т̇аа зд̇ад̣̇авожа – ‘‘ханд̣̇а гуд̇о ну д̇вам̣, махаарааж̇а, ааг̇ажчаси д̣̇иваа д̣̇ивассаа’’д̇и. ‘‘бханд̇з, аж̇ж̇а згам̣ аг̇ад̇иг̇ад̇ам̣ д̣̇уб̣б̣инижчаяам̣ ад̣д̣ам̣ винижчинанд̇о огаасам̣ алабхид̇ваа ид̣̇аани д̇ам̣ д̇ийрзд̇ваа бхун̃ж̇ид̇ваа аллахад̇т̇ова д̇умхаагам̣ убадтаанам̣ ааг̇ад̇омхий’’д̇и. сад̇т̇аа ‘‘махаарааж̇а, д̇хаммзна самзна ад̣д̣авинижчаяам̣ наама гусалам̣, саг̇г̇амаг̇г̇о зса. анажчарияам̣ ко банзд̇ам̣, яам̣ д̇умхз маад̣̇исасса саб̣б̣ан̃н̃уб̣уд̣̇д̇хасса санд̇игаа оваад̣̇ам̣ лабхамаанаа д̇хаммзна самзна ад̣д̣ам̣ винижчинзяяаат̇а. зд̇ад̣̇зва ажчарияам̣, яам̣ буб̣б̣з рааж̇аано асаб̣б̣ан̃н̃уунамби бан̣д̣ид̇аанам̣ важанам̣ суд̇ваа д̇хаммзна самзна ад̣д̣ам̣ винижчинанд̇аа жад̇д̇аари аг̇ад̇иг̇аманаани важ̇ж̇зд̇ваа д̣̇аса рааж̇ад̇хаммз агобзд̇ваа д̇хаммзна раж̇ж̇ам̣ гаарзд̇ваа саг̇г̇абурам̣ буураяамаанаа аг̇амим̣суу’’д̇и вад̇ваа д̇зна яаажид̇о ад̇ийд̇ам̣ аахари.

Daḷhaṃdaḷhassa khipatīti idaṃ satthā jetavane viharanto rājovādaṃ ārabbha kathesi. So tesakuṇajātake (jā. 2.17.1 ādayo) āvi bhavissati. Ekasmiṃ pana divase kosalarājā ekaṃ agatigataṃ dubbinicchayaṃ aḍḍaṃ vinicchinitvā bhuttapātarāso allahatthova alaṅkatarathaṃ abhiruyha satthu santikaṃ gantvā phullapadumasassirikesu pādesu nipatitvā satthāraṃ vanditvā ekamantaṃ nisīdi. Atha naṃ satthā etadavoca – ‘‘handa kuto nu tvaṃ, mahārāja, āgacchasi divā divassā’’ti. ‘‘Bhante, ajja ekaṃ agatigataṃ dubbinicchayaṃ aḍḍaṃ vinicchinanto okāsaṃ alabhitvā idāni taṃ tīretvā bhuñjitvā allahatthova tumhākaṃ upaṭṭhānaṃ āgatomhī’’ti. Satthā ‘‘mahārāja, dhammena samena aḍḍavinicchayaṃ nāma kusalaṃ, saggamaggo esa. Anacchariyaṃ kho panetaṃ, yaṃ tumhe mādisassa sabbaññubuddhassa santikā ovādaṃ labhamānā dhammena samena aḍḍaṃ vinicchineyyātha. Etadeva acchariyaṃ, yaṃ pubbe rājāno asabbaññūnampi paṇḍitānaṃ vacanaṃ sutvā dhammena samena aḍḍaṃ vinicchinantā cattāri agatigamanāni vajjetvā dasa rājadhamme akopetvā dhammena rajjaṃ kāretvā saggapuraṃ pūrayamānā agamiṃsū’’ti vatvā tena yācito atītaṃ āhari.

ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о д̇асса аг̇г̇амахзсияаа гужчисмим̣ бадисанд̇хим̣ г̇ахзд̇ваа лад̣̇д̇хаг̇аб̣бхабарихааро сод̇т̇инаа маад̇угужчимхаа нигками. наамаг̇г̇ахан̣ад̣̇ивасз банасса ‘‘б̣рахмад̣̇ад̇д̇агумааро’’д̇взва наамам̣ агам̣су. со анубуб̣б̣зна ваяаббад̇д̇о сол̣асавассагаалз д̇аггасилам̣ г̇анд̇ваа саб̣б̣асиббзсу нибпад̇д̇им̣ бад̇ваа бид̇у ажжаязна раж̇ж̇з бад̇идтааяа д̇хаммзна самзна раж̇ж̇ам̣ гаарзси, чанд̣̇аад̣̇ивасзна аг̇анд̇ваа винижчаяам̣ анусааси. д̇асмим̣ звам̣ д̇хаммзна раж̇ж̇ам̣ гаарзнд̇з амажжааби д̇хаммзнзва вохаарам̣ винижчиним̣су. вохаарзсу д̇хаммзна винижчаяамаанзсу гуудад̣д̣агаарагаа наама наахзсум̣, д̇зсам̣ абхааваа ад̣д̣ад̇т̇ааяа рааж̇ан̇г̇ан̣з убараво бажчиж̇ж̇и. амажжаа д̣̇ивасамби винижчаяадтаанз нисийд̣̇ид̇ваа ган̃жи винижчаяад̇т̇ааяа ааг̇ажчанд̇ам̣ ад̣̇исваа удтааяа баггаманд̇и, винижчаяадтаанам̣ чад̣д̣зд̇аб̣б̣абхаавам̣ баабун̣и.

Atīte bārāṇasiyaṃ brahmadatte rajjaṃ kārente bodhisatto tassa aggamahesiyā kucchismiṃ paṭisandhiṃ gahetvā laddhagabbhaparihāro sotthinā mātukucchimhā nikkhami. Nāmaggahaṇadivase panassa ‘‘brahmadattakumāro’’tveva nāmaṃ akaṃsu. So anupubbena vayappatto soḷasavassakāle takkasilaṃ gantvā sabbasippesu nipphattiṃ patvā pitu accayena rajje patiṭṭhāya dhammena samena rajjaṃ kāresi, chandādivasena agantvā vinicchayaṃ anusāsi. Tasmiṃ evaṃ dhammena rajjaṃ kārente amaccāpi dhammeneva vohāraṃ vinicchiniṃsu. Vohāresu dhammena vinicchayamānesu kūṭaḍḍakārakā nāma nāhesuṃ, tesaṃ abhāvā aḍḍatthāya rājaṅgaṇe uparavo pacchijji. Amaccā divasampi vinicchayaṭṭhāne nisīditvā kañci vinicchayatthāya āgacchantaṃ adisvā uṭṭhāya pakkamanti, vinicchayaṭṭhānaṃ chaḍḍetabbabhāvaṃ pāpuṇi.

б̣од̇хисад̇д̇о жинд̇зси – ‘‘маяи д̇хаммзна раж̇ж̇ам̣ гаарзнд̇з винижчаяадтаанам̣ ааг̇ажчанд̇аа наама над̇т̇и, убараво бажчиж̇ж̇и, винижчаяадтаанам̣ чад̣д̣зд̇аб̣б̣абхаавам̣ бад̇д̇ам̣, ид̣̇аани маяаа ад̇д̇ано аг̇ун̣ам̣ бариязсид̇ум̣ ваддад̇и ‘аяам̣ наама мз аг̇ун̣о’д̇и суд̇ваа д̇ам̣ бахааяа г̇ун̣зсуязва вад̇д̇иссаамий’’д̇и. д̇ад̇о бадтааяа ‘‘ад̇т̇и ну ко мз гожи аг̇ун̣аваад̣̇ий’’д̇и бариг̇г̇ан̣ханд̇о анд̇овал̣ан̃ж̇агаанам̣ анд̇арз ган̃жи аг̇ун̣аваад̣̇им̣ ад̣̇исваа ад̇д̇ано г̇ун̣агат̇амзва суд̇ваа ‘‘зд̇з маяхам̣ бхаязнааби аг̇ун̣ам̣ авад̇ваа г̇ун̣амзва вад̣̇зяяу’’нд̇и б̣ахивал̣ан̃ж̇анагз бариг̇г̇ан̣ханд̇о д̇ад̇т̇ааби ад̣̇исваа анд̇онаг̇арз бариг̇г̇ан̣хи. б̣ахинаг̇арз жад̇уусу д̣̇ваарзсу жад̇уг̇аамагз бариг̇г̇ан̣хи. д̇ад̇т̇ааби ган̃жи аг̇ун̣аваад̣̇им̣ ад̣̇исваа ад̇д̇ано г̇ун̣агат̇амзва суд̇ваа ‘‘ж̇анабад̣̇ам̣ бариг̇г̇ан̣хиссаамий’’д̇и амажжз раж̇ж̇ам̣ бадижчаабзд̇ваа рат̇ам̣ ааруяха саарат̇имзва г̇ахзд̇ваа ан̃н̃аад̇агавзсзна наг̇араа нигкамид̇ваа ж̇анабад̣̇ам̣ бариг̇г̇ан̣хамаано яаава бажжанд̇абхуумим̣ г̇анд̇ваа ган̃жи аг̇ун̣аваад̣̇им̣ ад̣̇исваа ад̇д̇ано г̇ун̣агат̇амзва суд̇ваа бажжанд̇асиймад̇о махаамаг̇г̇зна наг̇араабхимукоязва нивад̇д̇и.

Bodhisatto cintesi – ‘‘mayi dhammena rajjaṃ kārente vinicchayaṭṭhānaṃ āgacchantā nāma natthi, uparavo pacchijji, vinicchayaṭṭhānaṃ chaḍḍetabbabhāvaṃ pattaṃ, idāni mayā attano aguṇaṃ pariyesituṃ vaṭṭati ‘ayaṃ nāma me aguṇo’ti sutvā taṃ pahāya guṇesuyeva vattissāmī’’ti. Tato paṭṭhāya ‘‘atthi nu kho me koci aguṇavādī’’ti pariggaṇhanto antovaḷañjakānaṃ antare kañci aguṇavādiṃ adisvā attano guṇakathameva sutvā ‘‘ete mayhaṃ bhayenāpi aguṇaṃ avatvā guṇameva vadeyyu’’nti bahivaḷañjanake pariggaṇhanto tatthāpi adisvā antonagare pariggaṇhi. Bahinagare catūsu dvāresu catugāmake pariggaṇhi. Tatthāpi kañci aguṇavādiṃ adisvā attano guṇakathameva sutvā ‘‘janapadaṃ pariggaṇhissāmī’’ti amacce rajjaṃ paṭicchāpetvā rathaṃ āruyha sārathimeva gahetvā aññātakavesena nagarā nikkhamitvā janapadaṃ pariggaṇhamāno yāva paccantabhūmiṃ gantvā kañci aguṇavādiṃ adisvā attano guṇakathameva sutvā paccantasīmato mahāmaggena nagarābhimukhoyeva nivatti.

д̇асмим̣ бана гаалз б̣аллиго наама госаларааж̇ааби д̇хаммзна раж̇ж̇ам̣ гаарзнд̇о аг̇ун̣агат̇ам̣ г̇авзсанд̇о худ̇ваа анд̇овал̣ан̃ж̇агаад̣̇ийсу аг̇ун̣аваад̣̇им̣ ад̣̇исваа ад̇д̇ано г̇ун̣агат̇амзва суд̇ваа ж̇анабад̣̇ам̣ бариг̇г̇ан̣ханд̇о д̇ам̣ бад̣̇зсам̣ аг̇амааси. д̇з убхоби згасмим̣ ниннадтаанз сагадамаг̇г̇з абхимукаа ахзсум̣, рат̇асса уггаманадтаанам̣ над̇т̇и. ат̇а б̣аллигаран̃н̃о саарат̇и б̣аараан̣асиран̃н̃о саарат̇им̣ ‘‘д̇ава рат̇ам̣ уггамаабзхий’’д̇и ааха. соби ‘‘амбхо саарат̇и, д̇ава рат̇ам̣ уггамаабзхи, имасмим̣ рат̇з б̣аараан̣асираж̇ж̇асаамиго б̣рахмад̣̇ад̇д̇амахаарааж̇аа нисинно’’д̇и ааха. ид̇ароби нам̣ ‘‘амбхо саарат̇и, имасмим̣ рат̇з госалараж̇ж̇асаамиго б̣аллигамахаарааж̇аа нисинно, д̇ава рат̇ам̣ уггамаабзд̇ваа амхаагам̣ ран̃н̃о рат̇асса огаасам̣ д̣̇зхий’’д̇и ааха. б̣аараан̣асиран̃н̃о саарат̇и ‘‘аяамби гира рааж̇ааязва, гим̣ ну ко гаад̇аб̣б̣а’’нд̇и жинд̇знд̇о ‘‘ад̇т̇зсо убааяо’’д̇и ваяам̣ бужчид̇ваа ‘‘д̣̇ахарасса рат̇ам̣ уггамаабзд̇ваа махаллагасса огаасам̣ д̣̇аабзссаамий’’д̇и саннидтаанам̣ гад̇ваа д̇ам̣ саарат̇им̣ госаларан̃н̃о ваяам̣ бужчид̇ваа бариг̇г̇ан̣ханд̇о убхиннамби самаанаваяабхаавам̣ н̃ад̇ваа раж̇ж̇абаримаан̣ам̣ б̣алам̣ д̇ханам̣ яасам̣ ж̇аад̇им̣ г̇од̇д̇ам̣ гулабад̣̇зсанд̇и саб̣б̣ам̣ бужчид̇ваа ‘‘убхоби д̇ияож̇анасад̇игасса раж̇ж̇асса саамино самаанаб̣алад̇ханаяасаж̇аад̇иг̇од̇д̇агулабад̣̇зсаа’’д̇и н̃ад̇ваа ‘‘сийлаванд̇асса огаасам̣ д̣̇ассаамий’’д̇и жинд̇зд̇ваа ‘‘бхо саарат̇и, д̇умхаагам̣ ран̃н̃о сийлаажааро гийд̣̇исо’’д̇и бужчи. со ‘‘аяан̃жа аяан̃жа амхаагам̣ ран̃н̃о сийлаажааро’’д̇и ад̇д̇ано ран̃н̃о аг̇ун̣амзва г̇ун̣ад̇о багаасзнд̇о батамам̣ г̇аат̇амааха –

Tasmiṃ pana kāle balliko nāma kosalarājāpi dhammena rajjaṃ kārento aguṇakathaṃ gavesanto hutvā antovaḷañjakādīsu aguṇavādiṃ adisvā attano guṇakathameva sutvā janapadaṃ pariggaṇhanto taṃ padesaṃ agamāsi. Te ubhopi ekasmiṃ ninnaṭṭhāne sakaṭamagge abhimukhā ahesuṃ, rathassa ukkamanaṭṭhānaṃ natthi. Atha ballikarañño sārathi bārāṇasirañño sārathiṃ ‘‘tava rathaṃ ukkamāpehī’’ti āha. Sopi ‘‘ambho sārathi, tava rathaṃ ukkamāpehi, imasmiṃ rathe bārāṇasirajjasāmiko brahmadattamahārājā nisinno’’ti āha. Itaropi naṃ ‘‘ambho sārathi, imasmiṃ rathe kosalarajjasāmiko ballikamahārājā nisinno, tava rathaṃ ukkamāpetvā amhākaṃ rañño rathassa okāsaṃ dehī’’ti āha. Bārāṇasirañño sārathi ‘‘ayampi kira rājāyeva, kiṃ nu kho kātabba’’nti cintento ‘‘attheso upāyo’’ti vayaṃ pucchitvā ‘‘daharassa rathaṃ ukkamāpetvā mahallakassa okāsaṃ dāpessāmī’’ti sanniṭṭhānaṃ katvā taṃ sārathiṃ kosalarañño vayaṃ pucchitvā pariggaṇhanto ubhinnampi samānavayabhāvaṃ ñatvā rajjaparimāṇaṃ balaṃ dhanaṃ yasaṃ jātiṃ gottaṃ kulapadesanti sabbaṃ pucchitvā ‘‘ubhopi tiyojanasatikassa rajjassa sāmino samānabaladhanayasajātigottakulapadesā’’ti ñatvā ‘‘sīlavantassa okāsaṃ dassāmī’’ti cintetvā ‘‘bho sārathi, tumhākaṃ rañño sīlācāro kīdiso’’ti pucchi. So ‘‘ayañca ayañca amhākaṃ rañño sīlācāro’’ti attano rañño aguṇameva guṇato pakāsento paṭhamaṃ gāthamāha –

‘‘д̣̇ал̣хам̣ д̣̇ал̣хасса кибад̇и, б̣аллиго муд̣̇унаа муд̣̇ум̣;

‘‘Daḷhaṃ daḷhassa khipati, balliko mudunā muduṃ;

саад̇хумби саад̇хунаа ж̇зд̇и, асаад̇хумби асаад̇хунаа;

Sādhumpi sādhunā jeti, asādhumpi asādhunā;

зд̇аад̣̇исо аяам̣ рааж̇аа, маг̇г̇аа уяяаахи саарат̇ий’’д̇и.

Etādiso ayaṃ rājā, maggā uyyāhi sārathī’’ti.

д̇ад̇т̇а д̣̇ал̣хам̣ д̣̇ал̣хасса кибад̇ийд̇и яо д̣̇ал̣хо ход̇и б̣алавад̣̇ал̣хзна бахаарзна ваа важанзна ваа ж̇инид̇аб̣б̣о, д̇асса д̣̇ал̣хамзва бахаарам̣ ваа важанам̣ ваа кибад̇и. звам̣ д̣̇ал̣хова худ̇ваа д̇ам̣ ж̇инаад̇ийд̇и д̣̇ассзд̇и. б̣аллигод̇и д̇асса ран̃н̃о наамам̣. муд̣̇унаа муд̣̇унд̇и муд̣̇убуг̇г̇алам̣ саяамби муд̣̇у худ̇ваа муд̣̇унаава убааязна ж̇инаад̇и. саад̇хумби саад̇хунаа ж̇зд̇ийд̇и яз саад̇хуу саббурисаа, д̇з саяамби саад̇ху худ̇ваа саад̇хунаава убааязна ж̇инаад̇и. асаад̇хумби асаад̇хунаад̇и яз бана асаад̇хуу, д̇з саяамби асаад̇ху худ̇ваа асаад̇хунаава убааязна ж̇инаад̇ийд̇и д̣̇ассзд̇и. зд̇аад̣̇исо аяам̣ рааж̇аад̇и аяам̣ амхаагам̣ госаларааж̇аа сийлаажаарзна зваруубо. маг̇г̇аа уяяаахи саарат̇ийд̇и ад̇д̇ано рат̇ам̣ маг̇г̇аа уггамаабзд̇ваа уяяаахи, уббат̇зна яаахи, амхаагам̣ ран̃н̃о маг̇г̇ам̣ д̣̇зхийд̇и вад̣̇ад̇и.

Tattha daḷhaṃ daḷhassa khipatīti yo daḷho hoti balavadaḷhena pahārena vā vacanena vā jinitabbo, tassa daḷhameva pahāraṃ vā vacanaṃ vā khipati. Evaṃ daḷhova hutvā taṃ jinātīti dasseti. Ballikoti tassa rañño nāmaṃ. Mudunā mudunti mudupuggalaṃ sayampi mudu hutvā mudunāva upāyena jināti. Sādhumpi sādhunā jetīti ye sādhū sappurisā, te sayampi sādhu hutvā sādhunāva upāyena jināti. Asādhumpi asādhunāti ye pana asādhū, te sayampi asādhu hutvā asādhunāva upāyena jinātīti dasseti. Etādiso ayaṃ rājāti ayaṃ amhākaṃ kosalarājā sīlācārena evarūpo. Maggā uyyāhi sārathīti attano rathaṃ maggā ukkamāpetvā uyyāhi, uppathena yāhi, amhākaṃ rañño maggaṃ dehīti vadati.

ат̇а нам̣ б̣аараан̣асиран̃н̃о саарат̇и ‘‘амбхо, гим̣ бана д̇аяаа ад̇д̇ано ран̃н̃о г̇ун̣агат̇аа гат̇ид̇аа’’д̇и вад̇ваа ‘‘аамаа’’д̇и вуд̇д̇з ‘‘яад̣̇и бана зд̇з г̇ун̣аад̇и вад̣̇аси, аг̇ун̣аа бана гийд̣̇исий’’д̇и вад̇ваа ‘‘зд̇з д̇аава аг̇ун̣аа хонд̇у, д̇умхаагам̣ бана ран̃н̃о гийд̣̇исо г̇ун̣о’’д̇и вуд̇д̇з ‘‘д̇зна хи сун̣аахий’’д̇и д̣̇уд̇ияам̣ г̇аат̇амааха –

Atha naṃ bārāṇasirañño sārathi ‘‘ambho, kiṃ pana tayā attano rañño guṇakathā kathitā’’ti vatvā ‘‘āmā’’ti vutte ‘‘yadi pana ete guṇāti vadasi, aguṇā pana kīdisī’’ti vatvā ‘‘ete tāva aguṇā hontu, tumhākaṃ pana rañño kīdiso guṇo’’ti vutte ‘‘tena hi suṇāhī’’ti dutiyaṃ gāthamāha –

‘‘аггод̇хзна ж̇инз год̇хам̣, асаад̇хум̣ саад̇хунаа ж̇инз;

‘‘Akkodhena jine kodhaṃ, asādhuṃ sādhunā jine;

ж̇инз гад̣̇арияам̣ д̣̇аанзна, сажжзнаалигаваад̣̇инам̣;

Jine kadariyaṃ dānena, saccenālikavādinaṃ;

зд̇аад̣̇исо аяам̣ рааж̇аа, маг̇г̇аа уяяаахи саарат̇ий’’д̇и.

Etādiso ayaṃ rājā, maggā uyyāhi sārathī’’ti.

д̇ад̇т̇а зд̇аад̣̇исод̇и зд̇зхи ‘‘аггод̇хзна ж̇инз год̇ха’’нд̇иаад̣̇ивасзна вуд̇д̇зхи г̇ун̣зхи саманнааг̇ад̇о. аяан̃хи гуд̣̇д̇хам̣ буг̇г̇алам̣ саяам̣ аггод̇хо худ̇ваа аггод̇хзна ж̇инаад̇и, асаад̇хум̣ бана саяам̣ саад̇ху худ̇ваа саад̇хунаава убааязна ж̇инаад̇и, гад̣̇арияам̣ т̇ад̣̇д̇хамажчарим̣ саяам̣ д̣̇ааяаго худ̇ваа д̣̇аанзна ж̇инаад̇и. сажжзнаалигаваад̣̇инанд̇и мусааваад̣̇им̣ саяам̣ сажжаваад̣̇ий худ̇ваа сажжзна ж̇инаад̇и. маг̇г̇аа уяяаахи саарат̇ийд̇и, самма саарат̇и, маг̇г̇ад̇о абаг̇ажча. звам̣вид̇хасийлаажаараг̇ун̣аяуд̇д̇асса амхаагам̣ ран̃н̃о маг̇г̇ам̣ д̣̇зхи, амхаагам̣ рааж̇аа маг̇г̇асса анужчавигод̇и.

Tattha etādisoti etehi ‘‘akkodhena jine kodha’’ntiādivasena vuttehi guṇehi samannāgato. Ayañhi kuddhaṃ puggalaṃ sayaṃ akkodho hutvā akkodhena jināti, asādhuṃ pana sayaṃ sādhu hutvā sādhunāva upāyena jināti, kadariyaṃ thaddhamacchariṃ sayaṃ dāyako hutvā dānena jināti. Saccenālikavādinanti musāvādiṃ sayaṃ saccavādī hutvā saccena jināti. Maggā uyyāhi sārathīti, samma sārathi, maggato apagaccha. Evaṃvidhasīlācāraguṇayuttassa amhākaṃ rañño maggaṃ dehi, amhākaṃ rājā maggassa anucchavikoti.

звам̣ вуд̇д̇з б̣аллигарааж̇аа жа саарат̇и жа убхоби рат̇аа од̇арид̇ваа ассз можзд̇ваа рат̇ам̣ абанзд̇ваа б̣аараан̣асиран̃н̃о маг̇г̇ам̣ ад̣̇ам̣су. б̣аараан̣асирааж̇аа б̣аллигаран̃н̃о ‘‘ран̃н̃аа наама ид̣̇ан̃жид̣̇ан̃жа гаад̇ум̣ ваддад̇ий’’д̇и оваад̣̇ам̣ д̣̇ад̇ваа б̣аараан̣асим̣ г̇анд̇ваа д̣̇аанаад̣̇ийни бун̃н̃аани гад̇ваа ж̇ийвид̇абарияосаанз саг̇г̇абурам̣ буурзси. б̣аллигарааж̇ааби д̇асса оваад̣̇ам̣ г̇ахзд̇ваа ж̇анабад̣̇ам̣ бариг̇г̇ахзд̇ваа ад̇д̇ано аг̇ун̣аваад̣̇им̣ ад̣̇исваава саганаг̇арам̣ г̇анд̇ваа д̣̇аанаад̣̇ийни бун̃н̃аани гад̇ваа ж̇ийвид̇абарияосаанз саг̇г̇абурамзва буурзси.

Evaṃ vutte ballikarājā ca sārathi ca ubhopi rathā otaritvā asse mocetvā rathaṃ apanetvā bārāṇasirañño maggaṃ adaṃsu. Bārāṇasirājā ballikarañño ‘‘raññā nāma idañcidañca kātuṃ vaṭṭatī’’ti ovādaṃ datvā bārāṇasiṃ gantvā dānādīni puññāni katvā jīvitapariyosāne saggapuraṃ pūresi. Ballikarājāpi tassa ovādaṃ gahetvā janapadaṃ pariggahetvā attano aguṇavādiṃ adisvāva sakanagaraṃ gantvā dānādīni puññāni katvā jīvitapariyosāne saggapurameva pūresi.

сад̇т̇аа госаларааж̇асса оваад̣̇ад̇т̇ааяа имам̣ д̇хаммад̣̇зсанам̣ аахарид̇ваа ж̇аад̇агам̣ самод̇хаанзси – ‘‘д̇ад̣̇аа б̣аллигаран̃н̃о саарат̇и мог̇г̇аллаано ахоси, б̣аллигарааж̇аа аананд̣̇о, б̣аараан̣асиран̃н̃о саарат̇и саарибуд̇д̇о, б̣аараан̣асирааж̇аа бана ахамзва ахоси’’нд̇и.

Satthā kosalarājassa ovādatthāya imaṃ dhammadesanaṃ āharitvā jātakaṃ samodhānesi – ‘‘tadā ballikarañño sārathi moggallāno ahosi, ballikarājā ānando, bārāṇasirañño sārathi sāriputto, bārāṇasirājā pana ahameva ahosi’’nti.

рааж̇оваад̣̇аж̇аад̇агаван̣н̣анаа батамаа.

Rājovādajātakavaṇṇanā paṭhamā.

Next: [152] 2. син̇г̇аалаж̇аад̇агаван̣н̣анаа • [152] 2. Siṅgālajātakavaṇṇanā

Related texts:

д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 151. рааж̇оваад̣̇аж̇аад̇агам̣ • 151. Rājovādajātakaṃ

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact