| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၁၂. ရာသိယသုတ္တဝဏ္ဏနာ
12. Rāsiyasuttavaṇṇanā
၃၆၄. ဒ္ဝာဒသမေ ရာသိယောတိ ရာသိံ ကတ္ဝာ ပဉ္ဟသ္သ ပုစ္ဆိတတ္တာ ရာသိယောတိ ဧဝံ ဓမ္မသင္ဂာဟကတ္ထေရေဟိ ဂဟိတနာမော။ တပသ္သိန္တိ တပနိသ္သိတကံ။ လူခဇီဝိန္တိ လူခဇီဝိကံ။ အန္တာတိ ကောဋ္ဌာသာ။ ဂာမောတိ ဂာမ္မော။ ဂမ္မောတိပိ ပာဌော, ဂာမဝာသီနံ ဓမ္မောတိ အတ္ထော။ အတ္တကိလမထာနုယောဂောတိ အတ္တနော ကိလမထာနုယောဂော, သရီရဒုက္ခကရဏန္တိ အတ္ထော။
364. Dvādasame rāsiyoti rāsiṃ katvā pañhassa pucchitattā rāsiyoti evaṃ dhammasaṅgāhakattherehi gahitanāmo. Tapassinti tapanissitakaṃ. Lūkhajīvinti lūkhajīvikaṃ. Antāti koṭṭhāsā. Gāmoti gāmmo. Gammotipi pāṭho, gāmavāsīnaṃ dhammoti attho. Attakilamathānuyogoti attano kilamathānuyogo, sarīradukkhakaraṇanti attho.
ကသ္မာ ပနေတ္ထ ကာမသုခလ္လိကာနုယောဂော ဂဟိတော, ကသ္မာ အတ္တကိလမထာနုယောဂော, ကသ္မာ မဇ္ဈိမာ ပဋိပဒာတိ? ကာမသုခလ္လိကာနုယောဂော တာဝ ကာမဘောဂီနံ ဒသ္သနတ္ထံ ဂဟိတော, အတ္တကိလမထာနုယောဂော တပနိသ္သိတကာနံ, မဇ္ဈိမာ ပဋိပဒာ တိဏ္ဏံ နိဇ္ဇရဝတ္ထူနံ ဒသ္သနတ္ထံ ဂဟိတာ။ ကိံ ဧတေသံ ဒသ္သနေ ပယောဇနန္တိ? ဣမေ ဒ္ဝေ အန္တေ ပဟာယ တထာဂတော မဇ္ဈိမာယ ပဋိပဒာယ သမ္မာသမ္ဗောဓိံ ပတ္တော။ သော ကာမဘောဂိနောပိ န သဗ္ဗေ ဂရဟတိ န ပသံသတိ, တပနိသ္သိတကေပိ န သဗ္ဗေ ဂရဟတိ န ပသံသတိ, ဂရဟိတဗ္ဗယုတ္တကေယေဝ ဂရဟတိ, ပသံသိတဗ္ဗယုတ္တကေ ပသံသတီတိ ဣမသ္သတ္ထသ္သ ပကာသနံ ဧတေသံ ဒသ္သနေ ပယောဇနန္တိ ဝေဒိတဗ္ဗံ။
Kasmā panettha kāmasukhallikānuyogo gahito, kasmā attakilamathānuyogo, kasmā majjhimā paṭipadāti? Kāmasukhallikānuyogo tāva kāmabhogīnaṃ dassanatthaṃ gahito, attakilamathānuyogo tapanissitakānaṃ, majjhimā paṭipadā tiṇṇaṃ nijjaravatthūnaṃ dassanatthaṃ gahitā. Kiṃ etesaṃ dassane payojananti? Ime dve ante pahāya tathāgato majjhimāya paṭipadāya sammāsambodhiṃ patto. So kāmabhoginopi na sabbe garahati na pasaṃsati, tapanissitakepi na sabbe garahati na pasaṃsati, garahitabbayuttakeyeva garahati, pasaṃsitabbayuttake pasaṃsatīti imassatthassa pakāsanaṃ etesaṃ dassane payojananti veditabbaṃ.
ဣဒာနိ တမတ္ထံ ပကာသေန္တော တယော ခောမေ, ဂာမဏိ, ကာမဘောဂိနောတိအာဒိမာဟ။ တတ္ထ သာဟသေနာတိ သာဟသိကကမ္မေန။ န သံဝိဘဇတီတိ မိတ္တသဟာယသန္ဒိဋ္ဌသမ္ဘတ္တာနံ သံဝိဘာဂံ န ကရောတိ။ န ပုညာနိ ကရောတီတိ အနာဂတဘဝသ္သ ပစ္စယဘူတာနိ ပုညာနိ န ကရောတိ။ ဓမ္မာဓမ္မေနာတိ ဓမ္မေန စ အဓမ္မေန စ။ ဌာနေဟီတိ ကာရဏေဟိ။ သစ္ဆိကရောတီတိ ကထံ အတ္တာနံ အာတာပေန္တော ပရိတာပေန္တော သစ္ဆိကရောတိ? စတုရင္ဂဝီရိယဝသေန စ ဓုတင္ဂဝသေန စ။ တိသ္သော သန္ဒိဋ္ဌိကာ နိဇ္ဇရာတိ ဧတ္ထ ဧကောပိ မဂ္ဂော တိဏ္ဏံ ကိလေသာနံ နိဇ္ဇရဏတာယ တိသ္သော နိဇ္ဇရာတိ ဝုတ္တောတိ။
Idāni tamatthaṃ pakāsento tayo khome, gāmaṇi, kāmabhoginotiādimāha. Tattha sāhasenāti sāhasikakammena. Na saṃvibhajatīti mittasahāyasandiṭṭhasambhattānaṃ saṃvibhāgaṃ na karoti. Na puññāni karotīti anāgatabhavassa paccayabhūtāni puññāni na karoti. Dhammādhammenāti dhammena ca adhammena ca. Ṭhānehīti kāraṇehi. Sacchikarotīti kathaṃ attānaṃ ātāpento paritāpento sacchikaroti? Caturaṅgavīriyavasena ca dhutaṅgavasena ca. Tisso sandiṭṭhikā nijjarāti ettha ekopi maggo tiṇṇaṃ kilesānaṃ nijjaraṇatāya tisso nijjarāti vuttoti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၂. ရာသိယသုတ္တံ • 12. Rāsiyasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၂. ရာသိယသုတ္တဝဏ္ဏနာ • 12. Rāsiyasuttavaṇṇanā
