| Library / Tipiṭaka / तिपिटक • Tipiṭaka / अपदानपाळि • Apadānapāḷi |
१०. रेणुपूजकत्थेरअपदानं
10. Reṇupūjakattheraapadānaṃ
६२.
62.
‘‘सुवण्णवण्णं सम्बुद्धं, सतरंसिंव भाणुमं।
‘‘Suvaṇṇavaṇṇaṃ sambuddhaṃ, sataraṃsiṃva bhāṇumaṃ;
ओभासेन्तं दिसा सब्बा, उळुराजंव पूरितं॥
Obhāsentaṃ disā sabbā, uḷurājaṃva pūritaṃ.
६३.
63.
‘‘पुरक्खतं सावकेहि, सागरेहेव मेदनिं।
‘‘Purakkhataṃ sāvakehi, sāgareheva medaniṃ;
नागं पग्गय्ह रेणूहि, विपस्सिस्साभिरोपयिं॥
Nāgaṃ paggayha reṇūhi, vipassissābhiropayiṃ.
६४.
64.
‘‘एकनवुतितो कप्पे, यं रेणुमभिरोपयिं।
‘‘Ekanavutito kappe, yaṃ reṇumabhiropayiṃ;
दुग्गतिं नाभिजानामि, बुद्धपूजायिदं फलं॥
Duggatiṃ nābhijānāmi, buddhapūjāyidaṃ phalaṃ.
६५.
65.
‘‘पण्णतालीसितो कप्पे, रेणु नामासि खत्तियो।
‘‘Paṇṇatālīsito kappe, reṇu nāmāsi khattiyo;
सत्तरतनसम्पन्नो, चक्कवत्ती महब्बलो॥
Sattaratanasampanno, cakkavattī mahabbalo.
६६.
66.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा रेणुपूजको थेरो इमा गाथायो अभासित्थाति।
Itthaṃ sudaṃ āyasmā reṇupūjako thero imā gāthāyo abhāsitthāti.
रेणुपूजकत्थेरस्सापदानं दसमं।
Reṇupūjakattherassāpadānaṃ dasamaṃ.
भिक्खदायिवग्गो एकादसमो।
Bhikkhadāyivaggo ekādasamo.
तस्सुद्दानं –
Tassuddānaṃ –
भिक्खदायी ञाणसञ्ञी, हत्थियो पदपूजको।
Bhikkhadāyī ñāṇasaññī, hatthiyo padapūjako;
मुट्ठिपुप्फी उदकदो, नळमालि उपट्ठको।
Muṭṭhipupphī udakado, naḷamāli upaṭṭhako;
बिळालिदायी रेणु च, गाथायो छ च सट्ठि च॥
Biḷālidāyī reṇu ca, gāthāyo cha ca saṭṭhi ca.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / १०. रेणुपूजकत्थेरअपदानवण्णना • 10. Reṇupūjakattheraapadānavaṇṇanā
