| Library / Tipiṭaka / తిపిటక • Tipiṭaka / మిలిన్దపఞ్హపాళి • Milindapañhapāḷi |
౫. రుక్ఖఙ్గపఞ్హో
5. Rukkhaṅgapañho
౫. ‘‘భన్తే నాగసేన, ‘రుక్ఖస్స తీణి అఙ్గాని గహేతబ్బానీ’తి యం వదేసి, కతమాని తాని తీణి అఙ్గాని గహేతబ్బానీ’’తి? ‘‘యథా, మహారాజ, రుక్ఖో నామ పుప్ఫఫలధరో, ఏవమేవ ఖో, మహారాజ, యోగినా యోగావచరేన విముత్తిపుప్ఫసామఞ్ఞఫలధారినా భవితబ్బం. ఇదం, మహారాజ, రుక్ఖస్స పఠమం అఙ్గం గహేతబ్బం.
5. ‘‘Bhante nāgasena, ‘rukkhassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, rukkho nāma pupphaphaladharo, evameva kho, mahārāja, yoginā yogāvacarena vimuttipupphasāmaññaphaladhārinā bhavitabbaṃ. Idaṃ, mahārāja, rukkhassa paṭhamaṃ aṅgaṃ gahetabbaṃ.
‘‘పున చపరం, మహారాజ, రుక్ఖో ఉపగతానమనుప్పవిట్ఠానం జనానం ఛాయం దేతి, ఏవమేవ ఖో , మహారాజ, యోగినా యోగావచరేన ఉపగతానమనుప్పవిట్ఠానం పుగ్గలానం ఆమిసప్పటిసన్ధారేన వా ధమ్మప్పటిసన్థారేన వా పటిసన్థరితబ్బం. ఇదం, మహారాజ, రుక్ఖస్స దుతియం అఙ్గం గహేతబ్బం.
‘‘Puna caparaṃ, mahārāja, rukkho upagatānamanuppaviṭṭhānaṃ janānaṃ chāyaṃ deti, evameva kho , mahārāja, yoginā yogāvacarena upagatānamanuppaviṭṭhānaṃ puggalānaṃ āmisappaṭisandhārena vā dhammappaṭisanthārena vā paṭisantharitabbaṃ. Idaṃ, mahārāja, rukkhassa dutiyaṃ aṅgaṃ gahetabbaṃ.
‘‘పున చపరం, మహారాజ, రుక్ఖో ఛాయావేమత్తం న కరోతి, ఏవమేవ ఖో, మహారాజ, యోగినా యోగావచరేన సబ్బసత్తేసు వేమత్తతా న కాతబ్బా, చోరవధకపచ్చత్థికేసుపి అత్తనిపి సమసమా మేత్తాభావనా కాతబ్బా, ‘కిన్తి ఇమే సత్తా అవేరా అబ్యాపజ్జా 1 అనీఘా సుఖీ అత్తానం పరిహరేయ్యు’న్తి. ఇదం, మహారాజ, రుక్ఖస్స తతియం అఙ్గం గహేతబ్బం. భాసితమ్పేతం, మహారాజ, థేరేన సారిపుత్తేన ధమ్మసేనాపతినా –
‘‘Puna caparaṃ, mahārāja, rukkho chāyāvemattaṃ na karoti, evameva kho, mahārāja, yoginā yogāvacarena sabbasattesu vemattatā na kātabbā, coravadhakapaccatthikesupi attanipi samasamā mettābhāvanā kātabbā, ‘kinti ime sattā averā abyāpajjā 2 anīghā sukhī attānaṃ parihareyyu’nti. Idaṃ, mahārāja, rukkhassa tatiyaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘వధకే దేవదత్తమ్హి, చోరే అఙ్గులిమాలకే;
‘‘‘Vadhake devadattamhi, core aṅgulimālake;
ధనపాలే రాహులే చ, సబ్బత్థ సమకో మునీ’’’తి.
Dhanapāle rāhule ca, sabbattha samako munī’’’ti.
రుక్ఖఙ్గపఞ్హో పఞ్చమో.
Rukkhaṅgapañho pañcamo.
Footnotes:
