| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
ஸப்³ப³சிரப்படிச்ச²ன்னஅக்³க⁴ஸமோதா⁴னங்
Sabbacirappaṭicchannaagghasamodhānaṃ
136. தேன கோ² பன ஸமயேன அஞ்ஞதரோ பி⁴க்கு² ஸம்ப³ஹுலா ஸங்கா⁴தி³ஸேஸா ஆபத்தியோ ஆபன்னோ ஹோதி – ஏகா ஆபத்தி ஏகாஹப்படிச்ச²ன்னா , த்³வே ஆபத்தியோ த்³வீஹப்படிச்ச²ன்னாயோ 1, திஸ்ஸோ ஆபத்தியோ தீஹப்படிச்ச²ன்னாயோ, சதஸ்ஸோ ஆபத்தியோ சதூஹப்படிச்ச²ன்னாயோ, பஞ்ச ஆபத்தியோ பஞ்சாஹப்படிச்ச²ன்னாயோ, ச² ஆபத்தியோ சா²ஹப்படிச்ச²ன்னாயோ, ஸத்த ஆபத்தியோ ஸத்தாஹப்படிச்ச²ன்னாயோ, அட்ட² ஆபத்தியோ அட்டா²ஹப்படிச்ச²ன்னாயோ, நவ ஆபத்தியோ நவாஹப்படிச்ச²ன்னாயோ, த³ஸ ஆபத்தியோ த³ஸாஹப்படிச்ச²ன்னாயோ. ஸோ பி⁴க்கூ²னங் ஆரோசேஸி – ‘‘அஹங், ஆவுஸோ, ஸம்ப³ஹுலா ஸங்கா⁴தி³ஸேஸா ஆபத்தியோ ஆபஜ்ஜிங், ஏகா ஆபத்தி ஏகாஹப்படிச்ச²ன்னா…பே॰… த³ஸ ஆபத்தியோ த³ஸாஹப்படிச்ச²ன்னாயோ . கத²ங் நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். ‘‘தேன ஹி, பி⁴க்க²வே, ஸங்கோ⁴ தஸ்ஸ பி⁴க்கு²னோ தாஸங் ஆபத்தீனங் யா ஆபத்தியோ ஸப்³ப³சிரப்படிச்ச²ன்னாயோ தாஸங் அக்³கே⁴ன ஸமோதா⁴னபரிவாஸங் தே³து. ஏவஞ்ச பன, பி⁴க்க²வே, தா³தப்³போ³ –
136. Tena kho pana samayena aññataro bhikkhu sambahulā saṅghādisesā āpattiyo āpanno hoti – ekā āpatti ekāhappaṭicchannā , dve āpattiyo dvīhappaṭicchannāyo 2, tisso āpattiyo tīhappaṭicchannāyo, catasso āpattiyo catūhappaṭicchannāyo, pañca āpattiyo pañcāhappaṭicchannāyo, cha āpattiyo chāhappaṭicchannāyo, satta āpattiyo sattāhappaṭicchannāyo, aṭṭha āpattiyo aṭṭhāhappaṭicchannāyo, nava āpattiyo navāhappaṭicchannāyo, dasa āpattiyo dasāhappaṭicchannāyo. So bhikkhūnaṃ ārocesi – ‘‘ahaṃ, āvuso, sambahulā saṅghādisesā āpattiyo āpajjiṃ, ekā āpatti ekāhappaṭicchannā…pe… dasa āpattiyo dasāhappaṭicchannāyo . Kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. ‘‘Tena hi, bhikkhave, saṅgho tassa bhikkhuno tāsaṃ āpattīnaṃ yā āpattiyo sabbacirappaṭicchannāyo tāsaṃ agghena samodhānaparivāsaṃ detu. Evañca pana, bhikkhave, dātabbo –
‘‘தேன, பி⁴க்க²வே, பி⁴க்கு²னா ஸங்க⁴ங் உபஸங்கமித்வா…பே॰… ஏவமஸ்ஸ வசனீயோ – ‘அஹங், ப⁴ந்தே, ஸம்ப³ஹுலா ஸங்கா⁴தி³ஸேஸா ஆபத்தியோ ஆபஜ்ஜிங், ஏகா ஆபத்தி ஏகாஹப்படிச்ச²ன்னா…பே॰… த³ஸ ஆபத்தியோ த³ஸாஹப்படிச்ச²ன்னாயோ. ஸோஹங், ப⁴ந்தே, ஸங்க⁴ங் தாஸங் ஆபத்தீனங் யா ஆபத்தியோ ஸப்³ப³சிரப்படிச்ச²ன்னாயோ தாஸங் அக்³கே⁴ன ஸமோதா⁴னபரிவாஸங் யாசாமீ’தி. து³தியம்பி யாசிதப்³போ³. ததியம்பி யாசிதப்³போ³. ‘‘ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
‘‘Tena, bhikkhave, bhikkhunā saṅghaṃ upasaṅkamitvā…pe… evamassa vacanīyo – ‘ahaṃ, bhante, sambahulā saṅghādisesā āpattiyo āpajjiṃ, ekā āpatti ekāhappaṭicchannā…pe… dasa āpattiyo dasāhappaṭicchannāyo. Sohaṃ, bhante, saṅghaṃ tāsaṃ āpattīnaṃ yā āpattiyo sabbacirappaṭicchannāyo tāsaṃ agghena samodhānaparivāsaṃ yācāmī’ti. Dutiyampi yācitabbo. Tatiyampi yācitabbo. ‘‘Byattena bhikkhunā paṭibalena saṅgho ñāpetabbo –
137. ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² ஸம்ப³ஹுலா ஸங்கா⁴தி³ஸேஸா ஆபத்தியோ ஆபஜ்ஜி, ஏகா ஆபத்தி ஏகாஹப்படிச்ச²ன்னா…பே॰… த³ஸ ஆபத்தியோ த³ஸாஹப்படிச்ச²ன்னாயோ. ஸோ ஸங்க⁴ங் தாஸங் ஆபத்தீனங் யா ஆபத்தியோ ஸப்³ப³சிரப்படிச்ச²ன்னாயோ தாஸங் அக்³கே⁴ன ஸமோதா⁴னபரிவாஸங் யாசதி. யதி³ ஸங்க⁴ஸ்ஸ பத்தகல்லங் ஸங்கோ⁴ இத்த²ன்னாமஸ்ஸ பி⁴க்கு²னோ தாஸங் ஆபத்தீனங் யா ஆபத்தியோ ஸப்³ப³சிரப்படிச்ச²ன்னாயோ தாஸங் அக்³கே⁴ன ஸமோதா⁴னபரிவாஸங் த³தெ³ய்ய. ஏஸா ஞத்தி.
137. Suṇātu me, bhante, saṅgho. Ayaṃ itthannāmo bhikkhu sambahulā saṅghādisesā āpattiyo āpajji, ekā āpatti ekāhappaṭicchannā…pe… dasa āpattiyo dasāhappaṭicchannāyo. So saṅghaṃ tāsaṃ āpattīnaṃ yā āpattiyo sabbacirappaṭicchannāyo tāsaṃ agghena samodhānaparivāsaṃ yācati. Yadi saṅghassa pattakallaṃ saṅgho itthannāmassa bhikkhuno tāsaṃ āpattīnaṃ yā āpattiyo sabbacirappaṭicchannāyo tāsaṃ agghena samodhānaparivāsaṃ dadeyya. Esā ñatti.
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² ஸம்ப³ஹுலா ஸங்கா⁴தி³ஸேஸா ஆபத்தியோ ஆபஜ்ஜி – ஏகா ஆபத்தி ஏகாஹப்படிச்ச²ன்னா…பே॰… த³ஸ ஆபத்தியோ த³ஸாஹப்படிச்ச²ன்னாயோ. ஸோ ஸங்க⁴ங் தாஸங் ஆபத்தீனங் யா ஆபத்தியோ ஸப்³ப³சிரப்படிச்ச²ன்னாயோ தாஸங் அக்³கே⁴ன ஸமோதா⁴னபரிவாஸங் யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ தாஸங் ஆபத்தீனங் யா ஆபத்தியோ ஸப்³ப³சிரப்படிச்ச²ன்னாயோ தாஸங் அக்³கே⁴ன ஸமோதா⁴னபரிவாஸங் தே³தி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ தாஸங் ஆபத்தீனங் யா ஆபத்தியோ ஸப்³ப³சிரப்படிச்ச²ன்னாயோ தாஸங் அக்³கே⁴ன ஸமோதா⁴னபரிவாஸஸ்ஸ தா³னங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Ayaṃ itthannāmo bhikkhu sambahulā saṅghādisesā āpattiyo āpajji – ekā āpatti ekāhappaṭicchannā…pe… dasa āpattiyo dasāhappaṭicchannāyo. So saṅghaṃ tāsaṃ āpattīnaṃ yā āpattiyo sabbacirappaṭicchannāyo tāsaṃ agghena samodhānaparivāsaṃ yācati. Saṅgho itthannāmassa bhikkhuno tāsaṃ āpattīnaṃ yā āpattiyo sabbacirappaṭicchannāyo tāsaṃ agghena samodhānaparivāsaṃ deti. Yassāyasmato khamati itthannāmassa bhikkhuno tāsaṃ āpattīnaṃ yā āpattiyo sabbacirappaṭicchannāyo tāsaṃ agghena samodhānaparivāsassa dānaṃ, so tuṇhassa; yassa nakkhamati, so bhāseyya.
‘‘து³தியம்பி ஏதமத்த²ங் வதா³மி…பே॰… ததியம்பி ஏதமத்த²ங் வதா³மி…பே॰….
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘தி³ன்னோ ஸங்கே⁴ன இத்த²ன்னாமஸ்ஸ பி⁴க்கு²னோ தாஸங் ஆபத்தீனங் யா ஆபத்தியோ ஸப்³ப³சிரப்படிச்ச²ன்னாயோ தாஸங் அக்³கே⁴ன ஸமோதா⁴னபரிவாஸோ. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Dinno saṅghena itthannāmassa bhikkhuno tāsaṃ āpattīnaṃ yā āpattiyo sabbacirappaṭicchannāyo tāsaṃ agghena samodhānaparivāso. Khamati saṅghassa, tasmā tuṇhī, evametaṃ dhārayāmī’’ti.
Footnotes:
