| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
७. सब्रह्मकसुत्तं
7. Sabrahmakasuttaṃ
१०६. वुत्तञ्हेतं भगवता, वुत्तमरहताति मे सुतं –
106. Vuttañhetaṃ bhagavatā, vuttamarahatāti me sutaṃ –
‘‘सब्रह्मकानि, भिक्खवे, तानि कुलानि येसं पुत्तानं मातापितरो अज्झागारे पूजिता होन्ति। सपुब्बदेवतानि , भिक्खवे, तानि कुलानि येसं पुत्तानं मातापितरो अज्झागारे पूजिता होन्ति। सपुब्बाचरियकानि, भिक्खवे, तानि कुलानि येसं पुत्तानं मातापितरो अज्झागारे पूजिता होन्ति। साहुनेय्यकानि, भिक्खवे, तानि कुलानि येसं पुत्तानं मातापितरो अज्झागारे पूजिता होन्ति।
‘‘Sabrahmakāni, bhikkhave, tāni kulāni yesaṃ puttānaṃ mātāpitaro ajjhāgāre pūjitā honti. Sapubbadevatāni , bhikkhave, tāni kulāni yesaṃ puttānaṃ mātāpitaro ajjhāgāre pūjitā honti. Sapubbācariyakāni, bhikkhave, tāni kulāni yesaṃ puttānaṃ mātāpitaro ajjhāgāre pūjitā honti. Sāhuneyyakāni, bhikkhave, tāni kulāni yesaṃ puttānaṃ mātāpitaro ajjhāgāre pūjitā honti.
‘‘‘ब्रह्मा’ति, भिक्खवे, मातापितूनं एतं अधिवचनं। ‘पुब्बदेवता’ति, भिक्खवे, मातापितूनं एतं अधिवचनं। ‘पुब्बाचरिया’ति, भिक्खवे, मातापितूनं एतं अधिवचनं। ‘आहुनेय्या’ति, भिक्खवे, मातापितूनं एतं अधिवचनं। तं किस्स हेतु? बहुकारा, भिक्खवे, मातापितरो पुत्तानं आपादका पोसका इमस्स लोकस्स दस्सेतारो’’ति। एतमत्थं भगवा अवोच। तत्थेतं इति वुच्चति –
‘‘‘Brahmā’ti, bhikkhave, mātāpitūnaṃ etaṃ adhivacanaṃ. ‘Pubbadevatā’ti, bhikkhave, mātāpitūnaṃ etaṃ adhivacanaṃ. ‘Pubbācariyā’ti, bhikkhave, mātāpitūnaṃ etaṃ adhivacanaṃ. ‘Āhuneyyā’ti, bhikkhave, mātāpitūnaṃ etaṃ adhivacanaṃ. Taṃ kissa hetu? Bahukārā, bhikkhave, mātāpitaro puttānaṃ āpādakā posakā imassa lokassa dassetāro’’ti. Etamatthaṃ bhagavā avoca. Tatthetaṃ iti vuccati –
‘‘ब्रह्माति मातापितरो, पुब्बाचरियाति वुच्चरे।
‘‘Brahmāti mātāpitaro, pubbācariyāti vuccare;
आहुनेय्या च पुत्तानं, पजाय अनुकम्पका॥
Āhuneyyā ca puttānaṃ, pajāya anukampakā.
‘‘तस्मा हि ने नमस्सेय्य, सक्करेय्य च पण्डितो।
‘‘Tasmā hi ne namasseyya, sakkareyya ca paṇḍito;
अन्नेन अथ पानेन, वत्थेन सयनेन च।
Annena atha pānena, vatthena sayanena ca;
‘‘ताय नं पारिचरियाय, मातापितूसु पण्डिता।
‘‘Tāya naṃ pāricariyāya, mātāpitūsu paṇḍitā;
इधेव नं पसंसन्ति, पेच्च सग्गे पमोदती’’ति॥
Idheva naṃ pasaṃsanti, pecca sagge pamodatī’’ti.
अयम्पि अत्थो वुत्तो भगवता, इति मे सुतन्ति। सत्तमं।
Ayampi attho vutto bhagavatā, iti me sutanti. Sattamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ७. सब्रह्मकसुत्तवण्णना • 7. Sabrahmakasuttavaṇṇanā
