| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၆. ဆဋ္ဌဝဂ္ဂော
6. Chaṭṭhavaggo
(၅၅) ၃. သစ္စကထာ
(55) 3. Saccakathā
၄၅၂. စတ္တာရိ သစ္စာနိ အသင္ခတာနီတိ? အာမန္တာ။ စတ္တာရိ တာဏာနိ စတ္တာရိ လေဏာနိ စတ္တာရိ သရဏာနိ စတ္တာရိ ပရာယနာနိ စတ္တာရိ အစ္စုတာနိ စတ္တာရိ အမတာနိ စတ္တာရိ နိဗ္ဗာနာနီတိ? န ဟေဝံ ဝတ္တဗ္ဗေ။ပေ.။ စတ္တာရိ နိဗ္ဗာနာနီတိ? အာမန္တာ။ အတ္ထိ စတုန္နံ နိဗ္ဗာနာနံ ဥစ္စနီစတာ ဟီနပဏီတတာ ဥက္ကံသာဝကံသော သီမာ ဝာ ဘေဒော ဝာ ရာဇိ ဝာ အန္တရိကာ ဝာတိ? န ဟေဝံ ဝတ္တဗ္ဗေ။ပေ.။။
452. Cattāri saccāni asaṅkhatānīti? Āmantā. Cattāri tāṇāni cattāri leṇāni cattāri saraṇāni cattāri parāyanāni cattāri accutāni cattāri amatāni cattāri nibbānānīti? Na hevaṃ vattabbe…pe… cattāri nibbānānīti? Āmantā. Atthi catunnaṃ nibbānānaṃ uccanīcatā hīnapaṇītatā ukkaṃsāvakaṃso sīmā vā bhedo vā rāji vā antarikā vāti? Na hevaṃ vattabbe…pe….
ဒုက္ခသစ္စံ အသင္ခတန္တိ? အာမန္တာ ။ ဒုက္ခံ အသင္ခတန္တိ? န ဟေဝံ ဝတ္တဗ္ဗေ။ပေ.။ ဒုက္ခသစ္စံ အသင္ခတန္တိ? အာမန္တာ။ ကာယိကံ ဒုက္ခံ စေတသိကံ ဒုက္ခံ သောကပရိဒေဝဒုက္ခဒောမနသ္သဥပာယာသာ အသင္ခတာတိ? န ဟေဝံ ဝတ္တဗ္ဗေ။ပေ.။ သမုဒယသစ္စံ အသင္ခတန္တိ? အာမန္တာ။ သမုဒယော အသင္ခတောတိ? န ဟေဝံ ဝတ္တဗ္ဗေ။ပေ.။ သမုဒယသစ္စံ အသင္ခတန္တိ? အာမန္တာ။ ကာမတဏ္ဟာ ဘဝတဏ္ဟာ ဝိဘဝတဏ္ဟာ အသင္ခတာတိ? န ဟေဝံ ဝတ္တဗ္ဗေ။ပေ.။ မဂ္ဂသစ္စံ အသင္ခတန္တိ? အာမန္တာ။ မဂ္ဂော အသင္ခတောတိ? န ဟေဝံ ဝတ္တဗ္ဗေ။ပေ.။ မဂ္ဂသစ္စံ အသင္ခတန္တိ? အာမန္တာ။ သမ္မာဒိဋ္ဌိ။ပေ.။ သမ္မာသမာဓိ အသင္ခတောတိ? န ဟေဝံ ဝတ္တဗ္ဗေ။ပေ.။။
Dukkhasaccaṃ asaṅkhatanti? Āmantā . Dukkhaṃ asaṅkhatanti? Na hevaṃ vattabbe…pe… dukkhasaccaṃ asaṅkhatanti? Āmantā. Kāyikaṃ dukkhaṃ cetasikaṃ dukkhaṃ sokaparidevadukkhadomanassaupāyāsā asaṅkhatāti? Na hevaṃ vattabbe…pe… samudayasaccaṃ asaṅkhatanti? Āmantā. Samudayo asaṅkhatoti? Na hevaṃ vattabbe…pe… samudayasaccaṃ asaṅkhatanti? Āmantā. Kāmataṇhā bhavataṇhā vibhavataṇhā asaṅkhatāti? Na hevaṃ vattabbe…pe… maggasaccaṃ asaṅkhatanti? Āmantā. Maggo asaṅkhatoti? Na hevaṃ vattabbe…pe… maggasaccaṃ asaṅkhatanti? Āmantā. Sammādiṭṭhi…pe… sammāsamādhi asaṅkhatoti? Na hevaṃ vattabbe…pe….
ဒုက္ခံ သင္ခတန္တိ? အာမန္တာ။ ဒုက္ခသစ္စံ သင္ခတန္တိ? န ဟေဝံ ဝတ္တဗ္ဗေ။ပေ.။ ကာယိကံ ဒုက္ခံ စေတသိကံ ဒုက္ခံ သောကပရိဒေဝဒုက္ခဒောမနသ္သဥပာယာသာ သင္ခတာတိ? အာမန္တာ။ ဒုက္ခသစ္စံ သင္ခတန္တိ? န ဟေဝံ ဝတ္တဗ္ဗေ။ပေ.။ သမုဒယော သင္ခတောတိ? အာမန္တာ။ သမုဒယသစ္စံ သင္ခတန္တိ? န ဟေဝံ ဝတ္တဗ္ဗေ။ပေ.။ ကာမတဏ္ဟာ ဘဝတဏ္ဟာ ဝိဘဝတဏ္ဟာ သင္ခတာတိ? အာမန္တာ ။ သမုဒယသစ္စံ သင္ခတန္တိ? န ဟေဝံ ဝတ္တဗ္ဗေ။ပေ.။ မဂ္ဂော သင္ခတောတိ? အာမန္တာ။ မဂ္ဂသစ္စံ သင္ခတန္တိ? န ဟေဝံ ဝတ္တဗ္ဗေ။ပေ.။ သမ္မာဒိဋ္ဌိ။ပေ.။ သမ္မာသမာဓိ သင္ခတောတိ? အာမန္တာ။ မဂ္ဂသစ္စံ သင္ခတန္တိ? န ဟေဝံ ဝတ္တဗ္ဗေ။ပေ.။။
Dukkhaṃ saṅkhatanti? Āmantā. Dukkhasaccaṃ saṅkhatanti? Na hevaṃ vattabbe…pe… kāyikaṃ dukkhaṃ cetasikaṃ dukkhaṃ sokaparidevadukkhadomanassaupāyāsā saṅkhatāti? Āmantā. Dukkhasaccaṃ saṅkhatanti? Na hevaṃ vattabbe…pe… samudayo saṅkhatoti? Āmantā. Samudayasaccaṃ saṅkhatanti? Na hevaṃ vattabbe…pe… kāmataṇhā bhavataṇhā vibhavataṇhā saṅkhatāti? Āmantā . Samudayasaccaṃ saṅkhatanti? Na hevaṃ vattabbe…pe… maggo saṅkhatoti? Āmantā. Maggasaccaṃ saṅkhatanti? Na hevaṃ vattabbe…pe… sammādiṭṭhi…pe… sammāsamādhi saṅkhatoti? Āmantā. Maggasaccaṃ saṅkhatanti? Na hevaṃ vattabbe…pe….
၄၅၃. နိရောဓသစ္စံ အသင္ခတံ, နိရောဓော အသင္ခတောတိ? အာမန္တာ။ ဒုက္ခသစ္စံ အသင္ခတံ, ဒုက္ခံ အသင္ခတန္တိ? န ဟေဝံ ဝတ္တဗ္ဗေ။ပေ.။ နိရောဓသစ္စံ အသင္ခတံ, နိရောဓော အသင္ခတောတိ? အာမန္တာ။ သမုဒယသစ္စံ အသင္ခတံ, သမုဒယော အသင္ခတောတိ? န ဟေဝံ ဝတ္တဗ္ဗေ။ပေ.။ နိရောဓသစ္စံ အသင္ခတံ, နိရောဓော အသင္ခတောတိ? အာမန္တာ။ မဂ္ဂသစ္စံ အသင္ခတံ, မဂ္ဂော အသင္ခတောတိ? န ဟေဝံ ဝတ္တဗ္ဗေ။ပေ.။။
453. Nirodhasaccaṃ asaṅkhataṃ, nirodho asaṅkhatoti? Āmantā. Dukkhasaccaṃ asaṅkhataṃ, dukkhaṃ asaṅkhatanti? Na hevaṃ vattabbe…pe… nirodhasaccaṃ asaṅkhataṃ, nirodho asaṅkhatoti? Āmantā. Samudayasaccaṃ asaṅkhataṃ, samudayo asaṅkhatoti? Na hevaṃ vattabbe…pe… nirodhasaccaṃ asaṅkhataṃ, nirodho asaṅkhatoti? Āmantā. Maggasaccaṃ asaṅkhataṃ, maggo asaṅkhatoti? Na hevaṃ vattabbe…pe….
ဒုက္ခသစ္စံ အသင္ခတံ, ဒုက္ခံ သင္ခတန္တိ? အာမန္တာ။ နိရောဓသစ္စံ အသင္ခတံ, နိရောဓော သင္ခတောတိ? န ဟေဝံ ဝတ္တဗ္ဗေ။ပေ.။ သမုဒယသစ္စံ အသင္ခတံ, သမုဒယော သင္ခတောတိ? အာမန္တာ။ နိရောဓသစ္စံ အသင္ခတံ, နိရောဓော သင္ခတောတိ? န ဟေဝံ ဝတ္တဗ္ဗေ။ပေ.။ မဂ္ဂသစ္စံ အသင္ခတံ, မဂ္ဂော သင္ခတောတိ? အာမန္တာ။ နိရောဓသစ္စံ အသင္ခတံ, နိရောဓော သင္ခတောတိ? န ဟေဝံ ဝတ္တဗ္ဗေ။ပေ.။။
Dukkhasaccaṃ asaṅkhataṃ, dukkhaṃ saṅkhatanti? Āmantā. Nirodhasaccaṃ asaṅkhataṃ, nirodho saṅkhatoti? Na hevaṃ vattabbe…pe… samudayasaccaṃ asaṅkhataṃ, samudayo saṅkhatoti? Āmantā. Nirodhasaccaṃ asaṅkhataṃ, nirodho saṅkhatoti? Na hevaṃ vattabbe…pe… maggasaccaṃ asaṅkhataṃ, maggo saṅkhatoti? Āmantā. Nirodhasaccaṃ asaṅkhataṃ, nirodho saṅkhatoti? Na hevaṃ vattabbe…pe….
၄၅၄. န ဝတ္တဗ္ဗံ – ‘‘စတ္တာရိ သစ္စာနိ အသင္ခတာနီ’’တိ? အာမန္တာ ။ နနု ဝုတ္တံ ဘဂဝတာ – ‘‘စတ္တာရိမာနိ, ဘိက္ခဝေ, တထာနိ အဝိတထာနိ အနညထာနိ! ကတမာနိ စတ္တာရိ? ‘ဣဒံ ဒုက္ခ’န္တိ, ဘိက္ခဝေ, တထမေတံ အဝိတထမေတံ အနညထမေတံ။ပေ.။ ‘အယံ ဒုက္ခသမုဒယော’တိ။ပေ.။ ‘အယံ ဒုက္ခနိရောဓော’တိ။ပေ.။ ‘အယံ ဒုက္ခနိရောဓဂာမိနီ ပဋိပဒာ’တိ တထမေတံ အဝိတထမေတံ အနညထမေတံ။ ဣမာနိ ခော, ဘိက္ခဝေ, စတ္တာရိ တထာနိ အဝိတထာနိ အနညထာနီ’’တိ 1။ အတ္ထေဝ သုတ္တန္တောတိ? အာမန္တာ။ တေန ဟိ စတ္တာရိ သစ္စာနိ အသင္ခတာနီတိ။
454. Na vattabbaṃ – ‘‘cattāri saccāni asaṅkhatānī’’ti? Āmantā . Nanu vuttaṃ bhagavatā – ‘‘cattārimāni, bhikkhave, tathāni avitathāni anaññathāni! Katamāni cattāri? ‘Idaṃ dukkha’nti, bhikkhave, tathametaṃ avitathametaṃ anaññathametaṃ…pe… ‘ayaṃ dukkhasamudayo’ti…pe… ‘ayaṃ dukkhanirodho’ti…pe… ‘ayaṃ dukkhanirodhagāminī paṭipadā’ti tathametaṃ avitathametaṃ anaññathametaṃ. Imāni kho, bhikkhave, cattāri tathāni avitathāni anaññathānī’’ti 2. Attheva suttantoti? Āmantā. Tena hi cattāri saccāni asaṅkhatānīti.
သစ္စကထာ နိဋ္ဌိတာ။
Saccakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၃. သစ္စကထာဝဏ္ဏနာ • 3. Saccakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၃. သစ္စကထာဝဏ္ဏနာ • 3. Saccakathāvaṇṇanā
