| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
3. ஸச்சகதா²வண்ணனா
3. Saccakathāvaṇṇanā
452-454. இதா³னி ஸச்சகதா² நாம ஹோதி. தத்த² யேஸங் ‘‘சத்தாரிமானி, பி⁴க்க²வே, ததா²னி அவிததா²னீ’’தி (ஸங்॰ நி॰ 5.1090) ஸுத்தங் நிஸ்ஸாய ‘‘சத்தாரி ஸச்சானி நிச்சானி அஸங்க²தானீ’’தி லத்³தி⁴, ஸெய்யதா²பி புப்³ப³ஸேலியானங்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அயஞ்ஹிஸ்ஸ அதி⁴ப்பாயோ – து³க்க²ஸமுத³யமக்³கே³ஸு வத்து²ஸச்சங் ஸங்க²தங், லக்க²ணஸச்சங் அஸங்க²தங். நிரோதே⁴ வத்து²ஸச்சங் நாம நத்தி² அஸங்க²தமேவ தந்தி. தஸ்மா ஆமந்தாதி ஆஹ. தங் பனஸ்ஸ லத்³தி⁴மத்தமேவ. ஸோ ஹி து³க்க²ங் வத்து²ஸச்சங் இச்ச²தி, ததா² ஸமுத³யங் மக்³க³ஞ்ச. யானி பன நேஸங் பா³த⁴னபப⁴வனிய்யானிகலக்க²ணானி, தானி லக்க²ணஸச்சங் நாமாதி, ந ச பா³த⁴னலக்க²ணாதீ³ஹி அஞ்ஞானி து³க்கா²தீ³னி நாம அத்தீ²தி. தாணானீதிஆதீ³ஸு அதி⁴ப்பாயோ வுத்தனயேனேவ வேதி³தப்³போ³.
452-454. Idāni saccakathā nāma hoti. Tattha yesaṃ ‘‘cattārimāni, bhikkhave, tathāni avitathānī’’ti (saṃ. ni. 5.1090) suttaṃ nissāya ‘‘cattāri saccāni niccāni asaṅkhatānī’’ti laddhi, seyyathāpi pubbaseliyānaṃ; te sandhāya pucchā sakavādissa, paṭiññā itarassa. Ayañhissa adhippāyo – dukkhasamudayamaggesu vatthusaccaṃ saṅkhataṃ, lakkhaṇasaccaṃ asaṅkhataṃ. Nirodhe vatthusaccaṃ nāma natthi asaṅkhatameva tanti. Tasmā āmantāti āha. Taṃ panassa laddhimattameva. So hi dukkhaṃ vatthusaccaṃ icchati, tathā samudayaṃ maggañca. Yāni pana nesaṃ bādhanapabhavaniyyānikalakkhaṇāni, tāni lakkhaṇasaccaṃ nāmāti, na ca bādhanalakkhaṇādīhi aññāni dukkhādīni nāma atthīti. Tāṇānītiādīsu adhippāyo vuttanayeneva veditabbo.
து³க்க²ஸச்சந்தி பஞ்ஹே லத்³தி⁴வஸேன லக்க²ணங் ஸந்தா⁴ய படிஜானாதி. து³க்க²ந்தி பஞ்ஹே வத்து²ங் ஸந்தா⁴ய படிக்கி²பதி. இதோ பரங் ஸுத்³தி⁴கபஞ்ஹா ச ஸங்ஸந்த³னபஞ்ஹா ச ஸப்³பே³ பாளிஅனுஸாரேனேவ வேதி³தப்³பா³. அவஸானே லத்³தி⁴பதிட்டா²பனத்த²ங் ஆஹடஸுத்தங் அத்த²ஸ்ஸ மிச்சா² க³ஹிதத்தா அனாஹடஸதி³ஸமேவாதி.
Dukkhasaccanti pañhe laddhivasena lakkhaṇaṃ sandhāya paṭijānāti. Dukkhanti pañhe vatthuṃ sandhāya paṭikkhipati. Ito paraṃ suddhikapañhā ca saṃsandanapañhā ca sabbe pāḷianusāreneva veditabbā. Avasāne laddhipatiṭṭhāpanatthaṃ āhaṭasuttaṃ atthassa micchā gahitattā anāhaṭasadisamevāti.
ஸச்சகதா²வண்ணனா.
Saccakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (55) 3. ஸச்சகதா² • (55) 3. Saccakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 3. ஸச்சகதா²வண்ணனா • 3. Saccakathāvaṇṇanā
