| Library / Tipiṭaka / д̇ибидага • Tipiṭaka / бан̃жабагаран̣а-адтагат̇аа • Pañcapakaraṇa-aṭṭhakathā |
5. сажжаяамагам̣
5. Saccayamakaṃ
1. бан̣н̣ад̇д̇иваараван̣н̣анаа
1. Paṇṇattivāravaṇṇanā
1-9. ид̣̇аани д̇зязва муулаяамагз д̣̇зсид̇з гусалаад̣̇ид̇хаммз сажжавасзна сан̇г̇ан̣хид̇ваа д̇хаад̇уяамагаананд̇арам̣ д̣̇зсид̇асса сажжаяамагасса ван̣н̣анаа ход̇и. д̇ад̇т̇ааби хздтаа вуд̇д̇анаязнзва бан̣н̣ад̇д̇иваараад̣̇аяо д̇аяо махааваараа анд̇араваараад̣̇аяо жа авасзсаббабхзд̣̇аа взд̣̇ид̇аб̣б̣аа. бан̣н̣ад̇д̇иваарз банзд̇т̇а жад̇уннам̣ сажжаанам̣ васзна бад̣̇асод̇ханавааро, бад̣̇асод̇ханамуулажаггавааро, суд̣̇д̇хасажжавааро, суд̣̇д̇хасажжамуулажаггаваарод̇и имзсу жад̇уусу ваарзсу яамагаг̇ан̣анаа взд̣̇ид̇аб̣б̣аа.
1-9. Idāni teyeva mūlayamake desite kusalādidhamme saccavasena saṅgaṇhitvā dhātuyamakānantaraṃ desitassa saccayamakassa vaṇṇanā hoti. Tatthāpi heṭṭhā vuttanayeneva paṇṇattivārādayo tayo mahāvārā antaravārādayo ca avasesappabhedā veditabbā. Paṇṇattivāre panettha catunnaṃ saccānaṃ vasena padasodhanavāro, padasodhanamūlacakkavāro, suddhasaccavāro, suddhasaccamūlacakkavāroti imesu catūsu vāresu yamakagaṇanā veditabbā.
10-26. бан̣н̣ад̇д̇ивааранид̣̇д̣̇зсз бана авасзсам̣ д̣̇угкасажжанд̇и д̣̇угкавзд̣̇анааяа жзва д̇ан̣хааяа жа винимуд̇д̇аа д̇збхуумагад̇хаммаа взд̣̇ид̇аб̣б̣аа. авасзсо самуд̣̇аяод̇и сажжавибхан̇г̇з нид̣̇д̣̇идтагаамааважарагусалаад̣̇ибхзд̣̇о д̣̇угкасажжасса бажжаяо. авасзсо нирод̇ход̇и д̇ад̣̇ан̇г̇авигкамбханасамужчзд̣̇абадибассад̣̇д̇хинирод̇хо жзва кан̣абхан̇г̇анирод̇хо жа. авасзсо маг̇г̇од̇и ‘‘д̇асмим̣ ко бана самаяз бан̃жан̇г̇иго маг̇г̇о ход̇и, адтан̇г̇иго маг̇г̇о, мижчаамаг̇г̇о, ж̇ан̇гхамаг̇г̇о, сагадамаг̇г̇о’’д̇и звамаад̣̇иго.
10-26. Paṇṇattivāraniddese pana avasesaṃ dukkhasaccanti dukkhavedanāya ceva taṇhāya ca vinimuttā tebhūmakadhammā veditabbā. Avaseso samudayoti saccavibhaṅge niddiṭṭhakāmāvacarakusalādibhedo dukkhasaccassa paccayo. Avaseso nirodhoti tadaṅgavikkhambhanasamucchedapaṭipassaddhinirodho ceva khaṇabhaṅganirodho ca. Avaseso maggoti ‘‘tasmiṃ kho pana samaye pañcaṅgiko maggo hoti, aṭṭhaṅgiko maggo, micchāmaggo, jaṅghamaggo, sakaṭamaggo’’ti evamādiko.
бан̣н̣ад̇д̇иваараван̣н̣анаа.
Paṇṇattivāravaṇṇanā.
2. бавад̇д̇иваараван̣н̣анаа
2. Pavattivāravaṇṇanā
27-164. бавад̇д̇иваарз банзд̇т̇а бажжуббаннагаалз буг̇г̇алаваарасса ануломанаяз ‘‘яасса д̣̇угкасажжам̣ уббаж̇ж̇ад̇и, д̇асса самуд̣̇аяасажжам̣ уббаж̇ж̇ад̇и; яасса ваа бана самуд̣̇аяасажжам̣ уббаж̇ж̇ад̇и, д̇асса д̣̇угкасажжам̣ уббаж̇ж̇ад̇ий’’д̇и д̣̇угкасажжамуулагзхи д̇ийхи, самуд̣̇аяасажжамуулагзхи д̣̇вийхи, нирод̇хасажжамуулагзна згзнаад̇и лаб̣бхамаанан̃жа алаб̣бхамаанан̃жа г̇ахзд̇ваа баал̣ивасзна чахи яамагзхи бхавид̇аб̣б̣ам̣. д̇зсу яасмаа нирод̇хасса нзва уббаад̣̇о, на нирод̇хо яуж̇ж̇ад̇и, д̇асмаа д̣̇угкасажжамуулагаани самуд̣̇аяасажжамаг̇г̇асажжзхи сад̣̇д̇хим̣ д̣̇вз, самуд̣̇аяасажжамуулагам̣ маг̇г̇асажжзна сад̣̇д̇хим̣ зганд̇и д̇ийн̣и яамагаани ааг̇ад̇аани. д̇асса бадиломанаязби огаасаваараад̣̇ийсуби зсзва наяо. звамзд̇т̇а саб̣б̣аваарзсу д̇ин̣н̣ам̣ д̇ин̣н̣ам̣ яамагаанам̣ васзна яамагаг̇ан̣анаа взд̣̇ид̇аб̣б̣аа. ад̇т̇авинижчаяз банзд̇т̇а ид̣̇ам̣ лагкан̣ам̣ – имасса хи сажжаяамагасса бавад̇д̇иваарз нирод̇хасажжам̣ д̇аава на лаб̣бхад̇зва. сзсзсу бана д̇ийсу самуд̣̇аяасажжамаг̇г̇асажжаани зганд̇зна бавад̇д̇ияам̣язва лаб̣бханд̇и. д̣̇угкасажжам̣ жуд̇ибадисанд̇хийсуби бавад̇д̇зби лаб̣бхад̇и. бажжуббаннаад̣̇аяо бана д̇аяо гаалаа жуд̇ибадисанд̇хийнамби бавад̇д̇ияааби васзна лаб̣бханд̇и. звамзд̇т̇а яам̣ яам̣ лаб̣бхад̇и, д̇асса д̇асса васзна ад̇т̇авинижчаяо взд̣̇ид̇аб̣б̣о.
27-164. Pavattivāre panettha paccuppannakāle puggalavārassa anulomanaye ‘‘yassa dukkhasaccaṃ uppajjati, tassa samudayasaccaṃ uppajjati; yassa vā pana samudayasaccaṃ uppajjati, tassa dukkhasaccaṃ uppajjatī’’ti dukkhasaccamūlakehi tīhi, samudayasaccamūlakehi dvīhi, nirodhasaccamūlakena ekenāti labbhamānañca alabbhamānañca gahetvā pāḷivasena chahi yamakehi bhavitabbaṃ. Tesu yasmā nirodhassa neva uppādo, na nirodho yujjati, tasmā dukkhasaccamūlakāni samudayasaccamaggasaccehi saddhiṃ dve, samudayasaccamūlakaṃ maggasaccena saddhiṃ ekanti tīṇi yamakāni āgatāni. Tassa paṭilomanayepi okāsavārādīsupi eseva nayo. Evamettha sabbavāresu tiṇṇaṃ tiṇṇaṃ yamakānaṃ vasena yamakagaṇanā veditabbā. Atthavinicchaye panettha idaṃ lakkhaṇaṃ – imassa hi saccayamakassa pavattivāre nirodhasaccaṃ tāva na labbhateva. Sesesu pana tīsu samudayasaccamaggasaccāni ekantena pavattiyaṃyeva labbhanti. Dukkhasaccaṃ cutipaṭisandhīsupi pavattepi labbhati. Paccuppannādayo pana tayo kālā cutipaṭisandhīnampi pavattiyāpi vasena labbhanti. Evamettha yaṃ yaṃ labbhati, tassa tassa vasena atthavinicchayo veditabbo.
д̇ад̇рид̣̇ам̣ наяамукам̣ – саб̣б̣зсам̣ убабаж̇ж̇анд̇аананд̇и анд̇амасо суд̣̇д̇хааваасаанамби. д̇зби хи д̣̇угкасажжзнзва убабаж̇ж̇анд̇и. д̇ан̣хаавиббаяуд̇д̇ажид̇д̇ассаад̇и ид̣̇ам̣ д̣̇угкасажжасамуд̣̇аяасажжзсу згагодтаасасса уббад̇д̇ид̣̇ассанад̇т̇ам̣ вуд̇д̇ам̣. д̇асмаа бан̃жавогааравасзнзва г̇ахзд̇аб̣б̣ам̣. жад̇увогаарз бана д̇ан̣хаавиббаяуд̇д̇асса паласамаабад̇д̇ижид̇д̇асса уббаад̣̇агкан̣з згамби сажжам̣ нуббаж̇ж̇ад̇и. ид̣̇ам̣ ид̇ха на г̇ахзд̇аб̣б̣ам̣. д̇зсам̣ д̣̇угкасажжан̃жаад̇и д̇асмин̃хи кан̣з д̇ан̣хам̣ табзд̇ваа сзсам̣ д̣̇угкасажжам̣ наама ход̇ийд̇и санд̇хааязд̇ам̣ вуд̇д̇ам̣. маг̇г̇асса уббаад̣̇агкан̣зби зсзва наяо. д̇ад̇т̇а бана руубамзва д̣̇угкасажжам̣ наама. сзсаа маг̇г̇асамбаяуд̇д̇агаа д̇хаммаа сажжавинимуд̇д̇аа. д̇знзва гааран̣зна ‘‘аруубз маг̇г̇асса уббаад̣̇агкан̣з д̇зсам̣ маг̇г̇асажжам̣ уббаж̇ж̇ад̇и, но жа д̇зсам̣ д̣̇угкасажжам̣ уббаж̇ж̇ад̇ий’’д̇и вуд̇д̇ам̣. саб̣б̣зсам̣ убабаж̇ж̇анд̇аанам̣ бавад̇д̇з д̇ан̣хаавиббаяуд̇д̇ажид̇д̇асса уббаад̣̇агкан̣з д̇зсам̣ д̇ад̇т̇аад̇и д̇зсам̣ д̇асмим̣ убабад̇д̇игкан̣з д̇ан̣хаавиббаяуд̇д̇ажид̇д̇уббад̇д̇игкан̣з жаад̇и звамзд̇т̇а кан̣авасзна огаасо взд̣̇ид̇аб̣б̣о. ан̃н̃зсуби зваруубзсу зсзва наяо. анабхисамзд̇аавийнанд̇и жад̇усажжабадивзд̇хасан̇каад̇ам̣ абхисамаяам̣ аббад̇д̇асад̇д̇аанам̣. абхисамзд̇аавийнанд̇и абхисамид̇асажжаананд̇и. иминаа наяамукзна саб̣б̣ад̇т̇а ад̇т̇авинижчаяо взд̣̇ид̇аб̣б̣о.
Tatridaṃ nayamukhaṃ – sabbesaṃ upapajjantānanti antamaso suddhāvāsānampi. Tepi hi dukkhasacceneva upapajjanti. Taṇhāvippayuttacittassāti idaṃ dukkhasaccasamudayasaccesu ekakoṭṭhāsassa uppattidassanatthaṃ vuttaṃ. Tasmā pañcavokāravaseneva gahetabbaṃ. Catuvokāre pana taṇhāvippayuttassa phalasamāpatticittassa uppādakkhaṇe ekampi saccaṃ nuppajjati. Idaṃ idha na gahetabbaṃ. Tesaṃ dukkhasaccañcāti tasmiñhi khaṇe taṇhaṃ ṭhapetvā sesaṃ dukkhasaccaṃ nāma hotīti sandhāyetaṃ vuttaṃ. Maggassa uppādakkhaṇepi eseva nayo. Tattha pana rūpameva dukkhasaccaṃ nāma. Sesā maggasampayuttakā dhammā saccavinimuttā. Teneva kāraṇena ‘‘arūpe maggassa uppādakkhaṇe tesaṃ maggasaccaṃ uppajjati, no ca tesaṃ dukkhasaccaṃ uppajjatī’’ti vuttaṃ. Sabbesaṃ upapajjantānaṃ pavatte taṇhāvippayuttacittassa uppādakkhaṇe tesaṃ tatthāti tesaṃ tasmiṃ upapattikkhaṇe taṇhāvippayuttacittuppattikkhaṇe cāti evamettha khaṇavasena okāso veditabbo. Aññesupi evarūpesu eseva nayo. Anabhisametāvīnanti catusaccapaṭivedhasaṅkhātaṃ abhisamayaṃ appattasattānaṃ. Abhisametāvīnanti abhisamitasaccānanti. Iminā nayamukhena sabbattha atthavinicchayo veditabbo.
бавад̇д̇иваараван̣н̣анаа.
Pavattivāravaṇṇanā.
3. барин̃н̃ааваараван̣н̣анаа
3. Pariññāvāravaṇṇanā
165-170. барин̃н̃ааваарз бана н̃аад̇абарин̃н̃аа, д̇ийран̣абарин̃н̃аа, бахаанабарин̃н̃аад̇и д̇иссобзд̇т̇а барин̃н̃ааяо лаб̣бханд̇и. яасмаа жа логуд̇д̇арад̇хаммзсу барин̃н̃аа наама над̇т̇и; д̇асмаа ид̇ха д̣̇вз сажжаани г̇ахид̇аани. д̇ад̇т̇а д̣̇угкасажжам̣ бариж̇аанаад̇ийд̇и н̃аад̇ад̇ийран̣абарин̃н̃аавасзнзва вуд̇д̇ам̣. самуд̣̇аяасажжам̣ баж̇ахад̇ийд̇и н̃аад̇абахаанабарин̃н̃аавасзна. ид̇и имаасам̣ барин̃н̃аанам̣ васзна саб̣б̣абад̣̇зсу ад̇т̇о взд̣̇ид̇аб̣б̣од̇и.
165-170. Pariññāvāre pana ñātapariññā, tīraṇapariññā, pahānapariññāti tissopettha pariññāyo labbhanti. Yasmā ca lokuttaradhammesu pariññā nāma natthi; tasmā idha dve saccāni gahitāni. Tattha dukkhasaccaṃ parijānātīti ñātatīraṇapariññāvaseneva vuttaṃ. Samudayasaccaṃ pajahatīti ñātapahānapariññāvasena. Iti imāsaṃ pariññānaṃ vasena sabbapadesu attho veditabboti.
барин̃н̃ааваараван̣н̣анаа.
Pariññāvāravaṇṇanā.
сажжаяамагаван̣н̣анаа нидтид̇аа.
Saccayamakavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / яамагабаал̣и • Yamakapāḷi / 5. сажжаяамагам̣ • 5. Saccayamakaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-мууладийгаа • Pañcapakaraṇa-mūlaṭīkā / 5. сажжаяамагам̣ • 5. Saccayamakaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-анудийгаа • Pañcapakaraṇa-anuṭīkā / 5. сажжаяамагам̣ • 5. Saccayamakaṃ
