| Library / Tipiṭaka / д̇ибидага • Tipiṭaka / бан̃жабагаран̣а-анудийгаа • Pañcapakaraṇa-anuṭīkā |
5. сажжаяамагам̣
5. Saccayamakaṃ
1. бан̣н̣ад̇д̇иваараван̣н̣анаа
1. Paṇṇattivāravaṇṇanā
10-26. сод̇и д̣̇угкасад̣̇д̣̇о. ан̃н̃ад̇т̇аад̇и сан̇каарад̣̇угкавибарин̣аамад̣̇угкад̣̇угкаад̇хидтаанзсу. ан̃н̃анирабзгкод̇и сан̇каараад̣̇ибад̣̇анд̇араанабзгко. д̇знаад̇и ан̃н̃анирабзгкад̣̇угкабад̣̇аг̇г̇ахан̣ад̇о. д̇асмим̣ д̣̇угкад̣̇угкз висаяабхууд̇з. зса д̣̇угкасад̣̇д̣̇о ‘‘д̣̇угкам̣ д̣̇угкасажжа’’нд̇и зд̇т̇а батамо д̣̇угкасад̣̇д̣̇о. д̇ан̃жа д̣̇угкад̣̇угкам̣. ‘‘д̣̇угкам̣ д̣̇угкасажжа’’нд̇и зд̇т̇а д̣̇угкамзва д̣̇угкасажжанд̇и наяид̣̇ам̣ авад̇хааран̣ам̣ ижчид̇аб̣б̣ам̣, д̣̇угкам̣ д̣̇угкасажжамзваад̇и бана ижчид̇аб̣б̣анд̇и ааха ‘‘зганд̇зна д̣̇угкасажжамзваа’’д̇и. сажжавибхан̇г̇з вуд̇д̇зсу самуд̣̇аязсу гожи палад̇хаммзсу над̇т̇ийд̇и сажжавибхан̇г̇з бан̃жад̇хаа вуд̇д̇зсу самуд̣̇аязсу згоби паласабхаавзсу над̇т̇и, паласабхааво над̇т̇ийд̇и ад̇т̇о. ‘‘палад̇хаммо над̇т̇ий’’д̇и жа баато. маг̇г̇асад̣̇д̣̇о жа палан̇г̇зсууд̇и сааман̃н̃апалан̇г̇зсу саммаад̣̇идтиаад̣̇ийсу ‘‘маг̇г̇ан̇г̇ам̣ маг̇г̇абарияаабанна’’нд̇иаад̣̇инаа (вибха. 492, 495) ааг̇ад̇о маг̇г̇асад̣̇д̣̇о маг̇г̇апалад̇д̇аа бавад̇д̇ад̇и гааран̣уубажаарзнаад̇и ад̇хиббааяо. д̇знааха ‘‘на маг̇г̇агижжасаб̣бхааваа’’д̇иаад̣̇и. д̇асмаад̇и яасмаа сажжад̣̇зсанааяа бабхаваад̣̇исабхааваа зва д̇хаммаа самуд̣̇аяаад̣̇ибарияааязна вуд̇д̇аа, на аббабхаваад̣̇исабхааваа, д̇асмаа . зд̇т̇а жа д̇збхуумагад̇хаммаанам̣ яат̇аарахам̣ д̣̇угкасамуд̣̇аяасажжанд̇ог̇ад̇хад̇д̇аа асажжасабхаавз сабхаавад̇хаммз жа уд̣̇д̇харанд̇о палад̇хаммз зва уд̣̇д̇хари. нану жа маг̇г̇асамбаяуд̇д̇ааби д̇хаммаа асажжасабхааваад̇и д̇зби уд̣̇д̇харид̇аб̣б̣аад̇и? на, д̇зсам̣ маг̇г̇аг̇ад̇игад̇д̇аа. ‘‘палад̇хаммзсуу’’д̇и зд̇т̇а д̇хаммаг̇г̇ахан̣зна ваа паласамбаяуд̇д̇ад̇хаммаанам̣ вияа д̇зсамби г̇ахан̣ам̣ д̣̇адтаб̣б̣ам̣.
10-26. Soti dukkhasaddo. Aññatthāti saṅkhāradukkhavipariṇāmadukkhadukkhādhiṭṭhānesu. Aññanirapekkhoti saṅkhārādipadantarānapekkho. Tenāti aññanirapekkhadukkhapadaggahaṇato. Tasmiṃ dukkhadukkhe visayabhūte. Esa dukkhasaddo ‘‘dukkhaṃ dukkhasacca’’nti ettha paṭhamo dukkhasaddo. Tañca dukkhadukkhaṃ. ‘‘Dukkhaṃ dukkhasacca’’nti ettha dukkhameva dukkhasaccanti nayidaṃ avadhāraṇaṃ icchitabbaṃ, dukkhaṃ dukkhasaccamevāti pana icchitabbanti āha ‘‘ekantena dukkhasaccamevā’’ti. Saccavibhaṅge vuttesu samudayesu koci phaladhammesu natthīti saccavibhaṅge pañcadhā vuttesu samudayesu ekopi phalasabhāvesu natthi, phalasabhāvo natthīti attho. ‘‘Phaladhammo natthī’’ti ca pāṭho. Maggasaddo ca phalaṅgesūti sāmaññaphalaṅgesu sammādiṭṭhiādīsu ‘‘maggaṅgaṃ maggapariyāpanna’’ntiādinā (vibha. 492, 495) āgato maggasaddo maggaphalattā pavattati kāraṇūpacārenāti adhippāyo. Tenāha ‘‘na maggakiccasabbhāvā’’tiādi. Tasmāti yasmā saccadesanāya pabhavādisabhāvā eva dhammā samudayādipariyāyena vuttā, na appabhavādisabhāvā, tasmā . Ettha ca tebhūmakadhammānaṃ yathārahaṃ dukkhasamudayasaccantogadhattā asaccasabhāve sabhāvadhamme ca uddharanto phaladhamme eva uddhari. Nanu ca maggasampayuttāpi dhammā asaccasabhāvāti tepi uddharitabbāti? Na, tesaṃ maggagatikattā. ‘‘Phaladhammesū’’ti ettha dhammaggahaṇena vā phalasampayuttadhammānaṃ viya tesampi gahaṇaṃ daṭṭhabbaṃ.
бад̣̇асод̇ханзна…бз… ид̇ха г̇ахид̇аад̇и зд̇зна асажжасабхааваанам̣ д̇хаммаанам̣ багаран̣зна нивад̇д̇ид̇ад̇ам̣ ааха. д̇зсанд̇и д̣̇угкаад̣̇ийнам̣. д̇аб̣б̣исзсанаяог̇ависзсанд̇и д̇зна д̣̇угкаад̣̇ивисзсанаяог̇зна висидтад̇ам̣. сажжависзсанабхаавзнзва д̣̇угкаад̣̇ийнам̣ барин̃н̃зяяад̇аад̣̇ибхааво сид̣̇д̇ход̇и ааха ‘‘зганд̇асажжад̇д̇аа’’д̇и. яат̇аа жзд̇т̇аад̇и яат̇аа зд̇асмим̣ сажжаяамагз суд̣̇д̇хасажжаваарз сажжависзсанабхууд̇аа зва д̣̇угкаад̣̇аяо г̇ахид̇аа. звам̣ канд̇хаяамагаад̣̇ийсубийд̇и на суд̣̇д̇хасажжаваарз зва аяам̣ наяо д̣̇ассид̇од̇и ад̇т̇о. бад̣̇асод̇ханаваарз д̇ам̣муулажаггаваарз жа ‘‘руубам̣ руубагканд̇хо’’д̇иаад̣̇инаа самуд̣̇ааяабад̣̇аанам̣язва вуд̇д̇ад̇д̇аа вад̇д̇аб̣б̣амзва над̇т̇ийд̇и ‘‘суд̣̇д̇хагканд̇хаад̣̇иваарзсуу’’д̇и вуд̇д̇ам̣. д̇ат̇аа жзд̇т̇ааби суд̣̇д̇хаваарз зва аяам̣ наяо д̣̇ассид̇о. яад̣̇и суд̣̇д̇хагканд̇хаад̣̇иваарзсу канд̇хаад̣̇ивисзсанабхууд̇аанамзва руубаад̣̇ийнам̣ г̇ахан̣зна бхавид̇аб̣б̣ам̣, ат̇а гасмаа канд̇хаад̣̇ивисзсанад̇о ан̃н̃зсамби руубаад̣̇ийнам̣ васзна ад̇т̇о д̣̇ассид̇од̇и жод̣̇анам̣ санд̇хааяааха ‘‘адтагат̇ааяам̣ банаа’’д̇иаад̣̇и. буримо зва ад̇т̇о яуд̇д̇о, яуд̇д̇ид̇о баатова б̣алаваад̇и.
Padasodhanena…pe… idha gahitāti etena asaccasabhāvānaṃ dhammānaṃ pakaraṇena nivattitataṃ āha. Tesanti dukkhādīnaṃ. Tabbisesanayogavisesanti tena dukkhādivisesanayogena visiṭṭhataṃ. Saccavisesanabhāveneva dukkhādīnaṃ pariññeyyatādibhāvo siddhoti āha ‘‘ekantasaccattā’’ti. Yathā cetthāti yathā etasmiṃ saccayamake suddhasaccavāre saccavisesanabhūtā eva dukkhādayo gahitā. Evaṃ khandhayamakādīsupīti na suddhasaccavāre eva ayaṃ nayo dassitoti attho. Padasodhanavāre taṃmūlacakkavāre ca ‘‘rūpaṃ rūpakkhandho’’tiādinā samudāyapadānaṃyeva vuttattā vattabbameva natthīti ‘‘suddhakkhandhādivāresū’’ti vuttaṃ. Tathā cetthāpi suddhavāre eva ayaṃ nayo dassito. Yadi suddhakkhandhādivāresu khandhādivisesanabhūtānameva rūpādīnaṃ gahaṇena bhavitabbaṃ, atha kasmā khandhādivisesanato aññesampi rūpādīnaṃ vasena attho dassitoti codanaṃ sandhāyāha ‘‘aṭṭhakathāyaṃ panā’’tiādi. Purimo eva attho yutto, yuttito pāṭhova balavāti.
бан̣н̣ад̇д̇иваараван̣н̣анаа нидтид̇аа.
Paṇṇattivāravaṇṇanā niṭṭhitā.
2. бавад̇д̇иваараван̣н̣анаа
2. Pavattivāravaṇṇanā
27-164. д̣̇угкабарин̃н̃аа яаава д̣̇угкасамад̇иггаманад̇т̇аад̇и саббад̣̇зсам̣ бавад̇д̇ааби саа д̇ад̣̇ад̇т̇аавахаа бхавзяяаад̇и гассажи аасан̇гаа сияаад̇и д̣̇ассзнд̇о ааха ‘‘арияад̇д̇аа…бз… гад̇ваа вуд̇д̇а’’нд̇и. гзжи банзд̇т̇а ‘‘анд̇имабхавз тид̇ад̇д̇аа’’д̇и гааран̣ам̣ вад̣̇анд̇и, д̇ам̣ на яуж̇ж̇ад̇и убабад̇д̇ияаа д̣̇угкавижаарад̇д̇аа, на жа саб̣б̣з суд̣̇д̇хааваасаа анд̇имабхавигаа уд̣̇д̇хам̣сод̇аважанад̇о. ‘‘яасса д̣̇угкасажжам̣ уббаж̇ж̇ад̇ий’’д̇и уббаад̣̇аавад̇т̇аа. ависзсзна д̣̇угкасажжабарияаабаннаа д̇хаммаа самб̣анд̇хийбхаавзнзва д̇ам̣саман̇г̇ий жа буг̇г̇ало вуд̇д̇од̇и д̣̇ассзнд̇о ‘‘саб̣б̣з убабаж̇ж̇анд̇аа’’д̇иаад̣̇им̣ вад̇ваа свааяамад̇т̇о яасмаа нижчаяаруубзна г̇ахид̇о, нижчид̇ассзва жа ад̇т̇асса вибхааг̇ад̣̇ассанзна бхавид̇аб̣б̣ам̣, д̇асмаа ‘‘д̇зсвзва…бз… убабаннамзваа’’д̇и ааха. д̇ад̇т̇а д̇зсвзва гзжи д̣̇ассийяанд̇ийд̇и самб̣анд̇хо. згагодтаасуббад̇д̇исаман̇г̇инод̇и д̣̇угкагодтаасуббад̇д̇исаман̇г̇ино. д̇зсууд̇и саннидтаанзна г̇ахид̇зсу. маг̇г̇апалуббаад̣̇асаман̇г̇ийсууд̇и маг̇г̇апалуббаад̣̇асаман̇г̇ийнам̣, аяамзва ваа баато.
27-164. Dukkhapariññā yāva dukkhasamatikkamanatthāti sappadesaṃ pavattāpi sā tadatthāvahā bhaveyyāti kassaci āsaṅkā siyāti dassento āha ‘‘ariyattā…pe… katvā vutta’’nti. Keci panettha ‘‘antimabhave ṭhitattā’’ti kāraṇaṃ vadanti, taṃ na yujjati upapattiyā dukkhavicārattā, na ca sabbe suddhāvāsā antimabhavikā uddhaṃsotavacanato. ‘‘Yassa dukkhasaccaṃ uppajjatī’’ti uppādāvatthā. Avisesena dukkhasaccapariyāpannā dhammā sambandhībhāveneva taṃsamaṅgī ca puggalo vuttoti dassento ‘‘sabbe upapajjantā’’tiādiṃ vatvā svāyamattho yasmā nicchayarūpena gahito, nicchitasseva ca atthassa vibhāgadassanena bhavitabbaṃ, tasmā ‘‘tesveva…pe… upapannamevā’’ti āha. Tattha tesveva keci dassīyantīti sambandho. Ekakoṭṭhāsuppattisamaṅginoti dukkhakoṭṭhāsuppattisamaṅgino. Tesūti sanniṭṭhānena gahitesu. Maggaphaluppādasamaṅgīsūti maggaphaluppādasamaṅgīnaṃ, ayameva vā pāṭho.
зд̇т̇а жаад̇иаад̣̇инаа ‘‘саб̣б̣зса’’нд̇иаад̣̇ибаал̣ияаа бин̣д̣ад̇т̇ам̣ д̣̇ассзд̇и. д̇ад̇т̇а самуд̣̇аяасажжуббаад̣̇авомиссасса д̣̇угкасажжуббаад̣̇ассаад̇и ид̣̇ам̣ анаад̣̇арз саамиважанам̣. гад̇т̇ажи самуд̣̇аяасажжуббаад̣̇авомиссзби д̣̇угкасажжз д̇ам̣рахид̇асса самуд̣̇аяасажжуббаад̣̇арахид̇асса д̣̇угкасажжуббаад̣̇асса д̣̇ассанавасзна вуд̇д̇анд̇и яож̇анаа. гзжи бана ‘‘самуд̣̇аяасажжаавомиссассаа’’д̇и батанд̇и, д̇зсам̣ ‘‘д̇ам̣рахид̇ассаа’’д̇и ид̣̇ам̣ буримабад̣̇асса ад̇т̇авиваран̣ам̣ взд̣̇ид̇аб̣б̣ам̣. д̇ам̣сахид̇ассаад̇и самуд̣̇аяасажжуббаад̣̇асахид̇асса д̣̇угкасажжуббаад̣̇асса д̣̇ассанавасзна вуд̇д̇анд̇и яож̇анаа. д̇зсанд̇и асан̃н̃асад̇д̇аанам̣, бавад̇д̇ияам̣ д̣̇угкасажжасса уббаад̣̇о ‘‘бавад̇д̇з’’д̇иаад̣̇инаа вуд̇д̇зсу д̣̇вийсуби годтаасзсу на г̇ахид̇од̇и ад̇т̇о. бадисанд̇хияам̣ бана д̇зсам̣ уббаад̣̇асса батамагодтаасзна г̇ахид̇ад̇аа д̣̇ассид̇аа зва. д̇ат̇аа нирод̇хо жаад̇и яат̇аа асан̃н̃асад̇д̇аанам̣ бадисанд̇хияам̣ д̣̇угкасажжасса уббаад̣̇о батамагодтаасзна г̇ахид̇о, бавад̇д̇ияам̣ бана со д̣̇вийхи годтаасзхи на г̇ахид̇о, д̇ат̇аа д̇зсам̣ д̣̇угкасажжасса нирод̇хобийд̇и ад̇т̇о. д̇ат̇аа хи ‘‘саб̣б̣зсам̣ жаванд̇аанам̣ бавад̇д̇з д̇ан̣хаавиббаяуд̇д̇ажид̇д̇асса бхан̇г̇агкан̣з’’д̇иаад̣̇инаа (яама. 1.сажжаяамага.88) нирод̇хаваарз баал̣и бавад̇д̇аа. зсзва наяод̇и явааяам̣ ‘‘зд̇т̇а жаа’’д̇иаад̣̇инаа самуд̣̇аяасажжаяамагз баал̣ияаа ад̇т̇анаяо вуд̇д̇о, маг̇г̇асажжаяамагзби зсзва наяо, звамзва д̇ад̇т̇ааби ад̇т̇о нзд̇аб̣б̣од̇и ад̇т̇о. д̇ат̇аа хи ‘‘саб̣б̣зсам̣ убабаж̇ж̇анд̇аана’’нд̇иаад̣̇инаа д̇ад̇т̇а баал̣и бавад̇д̇аа.
Ettha cātiādinā ‘‘sabbesa’’ntiādipāḷiyā piṇḍatthaṃ dasseti. Tattha samudayasaccuppādavomissassa dukkhasaccuppādassāti idaṃ anādare sāmivacanaṃ. Katthaci samudayasaccuppādavomissepi dukkhasacce taṃrahitassa samudayasaccuppādarahitassa dukkhasaccuppādassa dassanavasena vuttanti yojanā. Keci pana ‘‘samudayasaccāvomissassā’’ti paṭhanti, tesaṃ ‘‘taṃrahitassā’’ti idaṃ purimapadassa atthavivaraṇaṃ veditabbaṃ. Taṃsahitassāti samudayasaccuppādasahitassa dukkhasaccuppādassa dassanavasena vuttanti yojanā. Tesanti asaññasattānaṃ, pavattiyaṃ dukkhasaccassa uppādo ‘‘pavatte’’tiādinā vuttesu dvīsupi koṭṭhāsesu na gahitoti attho. Paṭisandhiyaṃ pana tesaṃ uppādassa paṭhamakoṭṭhāsena gahitatā dassitā eva. Tathā nirodho cāti yathā asaññasattānaṃ paṭisandhiyaṃ dukkhasaccassa uppādo paṭhamakoṭṭhāsena gahito, pavattiyaṃ pana so dvīhi koṭṭhāsehi na gahito, tathā tesaṃ dukkhasaccassa nirodhopīti attho. Tathā hi ‘‘sabbesaṃ cavantānaṃ pavatte taṇhāvippayuttacittassa bhaṅgakkhaṇe’’tiādinā (yama. 1.saccayamaka.88) nirodhavāre pāḷi pavattā. Eseva nayoti yvāyaṃ ‘‘ettha cā’’tiādinā samudayasaccayamake pāḷiyā atthanayo vutto, maggasaccayamakepi eseva nayo, evameva tatthāpi attho netabboti attho. Tathā hi ‘‘sabbesaṃ upapajjantāna’’ntiādinā tattha pāḷi pavattā.
зван̃жа сад̇ийд̇и звам̣ кан̣авасзна огаасаг̇г̇ахан̣з сад̇ийд̇и яат̇аавуд̇д̇амад̇т̇ам̣ анануж̇аананавасзна бажжаамасад̇и. зд̇асса виссаж̇ж̇анзд̇и зд̇асса яамагабад̣̇асса виссаж̇ж̇анз. ‘‘аг̇г̇амаг̇г̇асса уббаад̣̇агкан̣з, араханд̇аанам̣ жид̇д̇асса уббаад̣̇агкан̣з, яасса жид̇д̇асса ананд̇араа аг̇г̇амаг̇г̇ам̣ бадилабхиссанд̇и, д̇асса жид̇д̇асса уббаад̣̇агкан̣з, асан̃н̃асад̇д̇ам̣ убабаж̇ж̇анд̇аанам̣ д̇зсам̣ д̇ад̇т̇а д̣̇угкасажжам̣ уббаж̇ж̇ад̇и, но жа д̇зсам̣ д̇ад̇т̇а самуд̣̇аяасажжам̣ уббаж̇ж̇иссад̇ий’’д̇и (яама. 1.сажжаяамага.71) буримагодтаасасса ааг̇ад̇ад̇д̇аа вирод̇хо над̇т̇ийд̇и ‘‘бажчимагодтаасз’’д̇иаад̣̇и вуд̇д̇ам̣ . д̇ад̇т̇а д̇асмаад̇и яасмаа на убабад̇д̇ижид̇д̇уббаад̣̇агкан̣о бхаавино самуд̣̇аяабажжуббаад̣̇асса аад̇хааро, ат̇а ко гаамааважараад̣̇иогаасо, д̇асмаа. буг̇г̇алогаасавааро хзсаад̇и яасмаа буг̇г̇алогаасавааро зса, д̇асмаа ‘‘д̇зсам̣ д̇ад̇т̇аа’’д̇и зд̇т̇а огаасавасзна д̇ад̇т̇а-сад̣̇д̣̇асса ад̇т̇о взд̣̇ид̇аб̣б̣о. яад̣̇и буг̇г̇алогаасаваарз гаамааважараад̣̇иогаасавасзнзва ад̇т̇о г̇ахзд̇аб̣б̣о, на кан̣авасзна, ат̇а гасмаа ‘‘саб̣б̣зсам̣ убабаж̇ж̇анд̇аана’’нд̇иаад̣̇инаа огаасам̣ анаамасид̇ваа д̇ад̇т̇а виссаж̇ж̇анам̣ бавад̇д̇анд̇и жод̣̇анам̣ санд̇хааяааха ‘‘д̇ад̇т̇а…бз… со зваа’’д̇и. д̇ад̇т̇а д̇ад̇т̇аад̇и огаасаваарз. буг̇г̇алависзсад̣̇ассанад̇т̇анд̇и буг̇г̇аласан̇каад̇ависзсад̣̇ассанад̇т̇ам̣. яад̇т̇а д̇зд̇и яасмим̣ гаамааважараад̣̇иогаасз д̇з буг̇г̇алаа.
Evañca satīti evaṃ khaṇavasena okāsaggahaṇe satīti yathāvuttamatthaṃ ananujānanavasena paccāmasati. Etassa vissajjaneti etassa yamakapadassa vissajjane. ‘‘Aggamaggassa uppādakkhaṇe, arahantānaṃ cittassa uppādakkhaṇe, yassa cittassa anantarā aggamaggaṃ paṭilabhissanti, tassa cittassa uppādakkhaṇe, asaññasattaṃ upapajjantānaṃ tesaṃ tattha dukkhasaccaṃ uppajjati, no ca tesaṃ tattha samudayasaccaṃ uppajjissatī’’ti (yama. 1.saccayamaka.71) purimakoṭṭhāsassa āgatattā virodho natthīti ‘‘pacchimakoṭṭhāse’’tiādi vuttaṃ . Tattha tasmāti yasmā na upapatticittuppādakkhaṇo bhāvino samudayapaccuppādassa ādhāro, atha kho kāmāvacarādiokāso, tasmā. Puggalokāsavāro hesāti yasmā puggalokāsavāro esa, tasmā ‘‘tesaṃ tatthā’’ti ettha okāsavasena tattha-saddassa attho veditabbo. Yadi puggalokāsavāre kāmāvacarādiokāsavaseneva attho gahetabbo, na khaṇavasena, atha kasmā ‘‘sabbesaṃ upapajjantāna’’ntiādinā okāsaṃ anāmasitvā tattha vissajjanaṃ pavattanti codanaṃ sandhāyāha ‘‘tattha…pe… so evā’’ti. Tattha tatthāti okāsavāre. Puggalavisesadassanatthanti puggalasaṅkhātavisesadassanatthaṃ. Yattha teti yasmiṃ kāmāvacarādiokāse te puggalā.
гзжийд̇и д̇хаммасирид̇т̇зрам̣ санд̇хааяааха. со хи ‘‘бавад̇д̇з жид̇д̇асса бхан̇г̇агкан̣з д̣̇угкасажжам̣ нуббаж̇ж̇ад̇ий’’д̇и зд̇т̇а жид̇д̇аж̇аруубамзва ад̇хиббзд̇ам̣ жид̇д̇абадиб̣ад̣̇д̇хавуд̇д̇ид̇д̇аад̇и гааран̣ам̣ вад̣̇ад̇и. абарз ‘‘аруубзд̇и имам̣ буримаабзгкамби ход̇ийд̇и д̇зна бавад̇д̇ам̣ висзсзд̇ваа аруубабхававасзна аяамад̇т̇о вуд̇д̇о , д̇асмаа ‘яасса ваа бана самуд̣̇аяасажжам̣ нируж̇жхад̇и, д̇асса д̣̇угкасажжам̣ уббаж̇ж̇ад̇ийд̇и? но’д̇иаад̣̇ийсуби звамад̇т̇о взд̣̇ид̇аб̣б̣о’’д̇и вад̣̇анд̇и. буг̇г̇ало на жид̇д̇ам̣ абзгкид̇ваава г̇ахид̇од̇и ид̣̇ам̣ жид̇д̇асса анад̇хигад̇ад̇д̇аа вуд̇д̇ам̣. яад̇т̇а бана самуд̣̇аяасажжасса уббаад̣̇анижчаяо, д̇ад̇т̇зва д̇асса ануббаад̣̇анижчаязнаби бхавид̇аб̣б̣ам̣ жид̇д̇зна жа винаа буг̇г̇алассзва анубалаб̣бханад̇од̇и ‘‘яасса самуд̣̇аяасажжам̣ нуббаж̇ж̇ад̇ий’’д̇и зд̇т̇а самуд̣̇аяасажжаад̇хаарам̣ жид̇д̇ам̣ ад̇т̇ад̇о г̇ахид̇амзваад̇и саггаа вин̃н̃аад̇ум̣. абижа инд̣̇рияаб̣ад̣̇д̇хзби на саб̣б̣о руубуббаад̣̇о зганд̇зна жид̇д̇уббаад̣̇аад̇хийнод̇и саггаа вад̇д̇ум̣ жид̇д̇уббад̇д̇ияаа винааби д̇ад̇т̇а руубуббад̇д̇ид̣̇ассанад̇о, д̇асмаа жид̇д̇аж̇аруубамзва жид̇д̇асса уббаад̣̇агкан̣з уббаж̇ж̇ад̇и, на ид̇арам̣, ид̇арам̣ бана д̇асса д̇ийсуби кан̣зсу уббаж̇ж̇ад̇ийд̇и нидтамзд̇т̇а г̇анд̇аб̣б̣ам̣. вибхаж̇ид̇аб̣б̣аа авибхад̇д̇аа наама над̇т̇ийд̇и сияааяам̣ басан̇г̇о батамаваарз, д̣̇уд̇ияаваарз бана вибхаж̇анаа зва саад̇и нааяам̣ басан̇г̇о лаб̣бхад̇и, батамаваарзби ваа нааяам̣ басан̇г̇о. гасмаа? зсаа хи яамагасса багад̇и, яад̣̇ид̣̇ам̣ яат̇аалаабхавасзна яож̇анаа.
Kecīti dhammasirittheraṃ sandhāyāha. So hi ‘‘pavatte cittassa bhaṅgakkhaṇe dukkhasaccaṃ nuppajjatī’’ti ettha cittajarūpameva adhippetaṃ cittapaṭibaddhavuttittāti kāraṇaṃ vadati. Apare ‘‘arūpeti imaṃ purimāpekkhampi hotīti tena pavattaṃ visesetvā arūpabhavavasena ayamattho vutto , tasmā ‘yassa vā pana samudayasaccaṃ nirujjhati, tassa dukkhasaccaṃ uppajjatīti? No’tiādīsupi evamattho veditabbo’’ti vadanti. Puggalo na cittaṃ apekkhitvāva gahitoti idaṃ cittassa anadhikatattā vuttaṃ. Yattha pana samudayasaccassa uppādanicchayo, tattheva tassa anuppādanicchayenapi bhavitabbaṃ cittena ca vinā puggalasseva anupalabbhanatoti ‘‘yassa samudayasaccaṃ nuppajjatī’’ti ettha samudayasaccādhāraṃ cittaṃ atthato gahitamevāti sakkā viññātuṃ. Apica indriyabaddhepi na sabbo rūpuppādo ekantena cittuppādādhīnoti sakkā vattuṃ cittuppattiyā vināpi tattha rūpuppattidassanato, tasmā cittajarūpameva cittassa uppādakkhaṇe uppajjati, na itaraṃ, itaraṃ pana tassa tīsupi khaṇesu uppajjatīti niṭṭhamettha gantabbaṃ. Vibhajitabbā avibhattā nāma natthīti siyāyaṃ pasaṅgo paṭhamavāre, dutiyavāre pana vibhajanā eva sāti nāyaṃ pasaṅgo labbhati, paṭhamavārepi vā nāyaṃ pasaṅgo. Kasmā? Esā hi yamakassa pakati, yadidaṃ yathālābhavasena yojanā.
д̣̇уд̇ияз жид̇д̇з вад̇д̇амаанзд̇и зд̇т̇а ‘‘батамам̣ бхаван̇г̇ам̣, д̣̇уд̇ияам̣ жид̇д̇а’’нд̇и вад̣̇анд̇и. бхаваниганд̇ияаа ааваж̇ж̇анамби вибаагаббавад̇д̇ид̇о висад̣̇исад̇д̇аа ‘‘д̣̇уд̇ияа’’нд̇и вад̇д̇ум̣ саггаа, д̇ад̇о бадтааяа буб̣б̣з д̇асса д̇ад̇т̇а самуд̣̇аяасажжам̣ нуббаж̇ж̇ид̇т̇аад̇и вад̇д̇аб̣б̣аад̇и абарз. бхаваниганд̇ияаа бана сахаж̇аад̇ам̣ батамам̣ жид̇д̇ам̣ ид̇ха д̣̇уд̇ияам̣ жид̇д̇анд̇и ад̇хиббзд̇ам̣. д̇ад̇о буб̣б̣з бавад̇д̇ам̣ саб̣б̣ам̣ аб̣яаагад̇абхаавзна самаанаж̇аад̇игад̇д̇аа зганд̇и гад̇ваа д̇ад̇о бадтааяа хздтаа д̇асса д̇ад̇т̇а самуд̣̇аяасажжам̣ нуббаж̇ж̇ид̇т̇зваад̇и . д̇знааха ‘‘саб̣б̣анд̇имзна барижчзд̣̇знаа’’д̇иаад̣̇и. д̇асминд̇и д̣̇уд̇ияз жид̇д̇з. д̇зна самаанаг̇ад̇игад̇д̇аад̇и д̇зна яат̇аавуд̇д̇ад̣̇уд̇ияажид̇д̇зна жа д̇ам̣саман̇г̇ино ваа д̣̇угкасажжам̣ уббаж̇ж̇ид̇т̇а, но жа самуд̣̇аяасажжанд̇и вад̇д̇аб̣б̣абхаавзна самаанаг̇ад̇игад̇д̇аа. зван̃жа гад̇ваад̇и д̇зна самаанаг̇ад̇игад̇ааяа д̣̇ассид̇ад̇д̇аа зва. яат̇аавуд̇д̇аад̇и д̣̇уд̇ияаагусалажид̇д̇ад̇о буримасаб̣б̣ажид̇д̇асаман̇г̇ино аг̇г̇ахид̇аа хонд̇и ид̇арабхааваабхаавад̇о. вуд̇д̇амзвад̇т̇ам̣ баатанд̇арзна самад̇т̇зд̇ум̣ ‘‘яат̇аа’’д̇иаад̣̇и вуд̇д̇ам̣. д̇зд̇и жад̇увогаараа. важ̇ж̇зд̇аб̣б̣аад̇и ‘‘ид̇арзса’’нд̇и висзсанзна нивад̇д̇зд̇аб̣б̣аа. бан̃жавогаараа вияа яат̇аавуд̇д̇аа суд̣̇д̇хааваасаад̇и д̣̇уд̇ияажид̇д̇агкан̣асаман̇г̇ибхаавзна вуд̇д̇аббагаараа яат̇аа суд̣̇д̇хааваасасан̇каад̇аа бан̃жавогаараа буб̣б̣з вуд̇д̇аа санд̇и, звам̣ жад̇увогаараа буб̣б̣з вуд̇д̇аа на хи санд̇ийд̇и яож̇анаа.
Dutiye citte vattamāneti ettha ‘‘paṭhamaṃ bhavaṅgaṃ, dutiyaṃ citta’’nti vadanti. Bhavanikantiyā āvajjanampi vipākappavattito visadisattā ‘‘dutiya’’nti vattuṃ sakkā, tato paṭṭhāya pubbe tassa tattha samudayasaccaṃ nuppajjitthāti vattabbāti apare. Bhavanikantiyā pana sahajātaṃ paṭhamaṃ cittaṃ idha dutiyaṃ cittanti adhippetaṃ. Tato pubbe pavattaṃ sabbaṃ abyākatabhāvena samānajātikattā ekanti katvā tato paṭṭhāya heṭṭhā tassa tattha samudayasaccaṃ nuppajjitthevāti . Tenāha ‘‘sabbantimena paricchedenā’’tiādi. Tasminti dutiye citte. Tena samānagatikattāti tena yathāvuttadutiyacittena ca taṃsamaṅgino vā dukkhasaccaṃ uppajjittha, no ca samudayasaccanti vattabbabhāvena samānagatikattā. Evañca katvāti tena samānagatikatāya dassitattā eva. Yathāvuttāti dutiyākusalacittato purimasabbacittasamaṅgino aggahitā honti itarabhāvābhāvato. Vuttamevatthaṃ pāṭhantarena samatthetuṃ ‘‘yathā’’tiādi vuttaṃ. Teti catuvokārā. Vajjetabbāti ‘‘itaresa’’nti visesanena nivattetabbā. Pañcavokārā viya yathāvuttā suddhāvāsāti dutiyacittakkhaṇasamaṅgibhāvena vuttappakārā yathā suddhāvāsasaṅkhātā pañcavokārā pubbe vuttā santi, evaṃ catuvokārā pubbe vuttā na hi santīti yojanā.
‘‘яасса яад̇т̇аа’’д̇и буг̇г̇алогаасаа аад̇хзяяаад̇хаарабхаавзна абзгкид̇аад̇и ааха ‘‘буг̇г̇алогаасаа ан̃н̃аман̃н̃абарижчиннаа г̇ахид̇аа’’д̇и. гаамааважарз…бз… убабаннаад̇и зд̇т̇а гаамааважарз абхисамзд̇аавино руубааважарам̣ убабаннаа, руубааважарз абхисамзд̇аавино аруубааважарам̣ убабаннаа, ваа-сад̣̇д̣̇зна гаамааважарз абхисамзд̇аавино аруубааважарам̣ убабаннаад̇и жа яож̇зд̇аб̣б̣ам̣. д̇ад̇т̇аад̇и убабанногаасз. абхисамаяод̇и убаримаг̇г̇аабхисамаяо яаава убабанно на бхависсад̇и, д̇аава д̇з д̇ад̇т̇а убабаннабуг̇г̇алаа зд̇т̇а зд̇асмим̣ ‘‘абхисамзд̇аавийна’’нд̇иаад̣̇инаа вуд̇д̇з д̣̇уд̇ияагодтаасз на г̇аяханд̇и буг̇г̇алогаасаанам̣ ан̃н̃аман̃н̃ам̣ барижчиннад̇д̇аа. яад̣̇и звам̣ гим̣ д̇з имасмим̣ яамагз асан̇г̇ахид̇аад̇и ааха ‘‘д̇з банаа’’д̇иаад̣̇и. д̇ад̇т̇а яам̣ вуд̇д̇ам̣ ‘‘самаанаг̇ад̇игаад̇и висум̣ на д̣̇ассид̇аа’’д̇и, д̇ам̣ баагадад̇арам̣ гаад̇ум̣ ‘‘анабхисамзд̇аавийна’’нд̇иаад̣̇и вуд̇д̇ам̣. д̇ассад̇т̇о – ‘‘анабхисамзд̇аавийна’’нд̇и иминаа батамабад̣̇зна г̇ахид̇аа саб̣б̣ад̇т̇а маг̇г̇уббад̇д̇ирахз самбад̇д̇ибхавз д̇ад̇т̇а суд̣̇д̇хааваасз яз анабхисамзд̇аавино, д̇зсу д̣̇виббагаарзсу суд̣̇д̇хааваасаа яасмим̣ гаалз д̇ад̇т̇а анабхисамзд̇аавинод̇и г̇ахзд̇аб̣б̣аа, д̇ад̇т̇а нзсам̣ д̇ат̇аа г̇ахзд̇аб̣б̣агааласса висзсанад̇т̇ам̣ ‘‘суд̣̇д̇хааваасаанам̣ д̣̇уд̇ияз жид̇д̇з вад̇д̇амаанз’’д̇и вуд̇д̇анд̇и.
‘‘Yassa yatthā’’ti puggalokāsā ādheyyādhārabhāvena apekkhitāti āha ‘‘puggalokāsā aññamaññaparicchinnā gahitā’’ti. Kāmāvacare…pe… upapannāti ettha kāmāvacare abhisametāvino rūpāvacaraṃ upapannā, rūpāvacare abhisametāvino arūpāvacaraṃ upapannā, vā-saddena kāmāvacare abhisametāvino arūpāvacaraṃ upapannāti ca yojetabbaṃ. Tatthāti upapannokāse. Abhisamayoti uparimaggābhisamayo yāva upapanno na bhavissati, tāva te tattha upapannapuggalā ettha etasmiṃ ‘‘abhisametāvīna’’ntiādinā vutte dutiyakoṭṭhāse na gayhanti puggalokāsānaṃ aññamaññaṃ paricchinnattā. Yadi evaṃ kiṃ te imasmiṃ yamake asaṅgahitāti āha ‘‘te panā’’tiādi. Tattha yaṃ vuttaṃ ‘‘samānagatikāti visuṃ na dassitā’’ti, taṃ pākaṭataraṃ kātuṃ ‘‘anabhisametāvīna’’ntiādi vuttaṃ. Tassattho – ‘‘anabhisametāvīna’’nti iminā paṭhamapadena gahitā sabbattha magguppattirahe sampattibhave tattha suddhāvāse ye anabhisametāvino, tesu dvippakāresu suddhāvāsā yasmiṃ kāle tattha anabhisametāvinoti gahetabbā, tattha nesaṃ tathā gahetabbakālassa visesanatthaṃ ‘‘suddhāvāsānaṃ dutiye citte vattamāne’’ti vuttanti.
зд̇знаад̇и зд̇зна важанзна. вод̣̇аанажид̇д̇ам̣ наама маг̇г̇ажид̇д̇аанам̣ ананд̇арабажжаяабхууд̇ам̣ жид̇д̇ам̣, ид̇ха бана аг̇г̇амаг̇г̇ажид̇д̇асса. д̇ад̇од̇и яат̇аавуд̇д̇авод̣̇аанажид̇д̇ад̇о буримад̇аражид̇д̇асаман̇г̇ино, ануломан̃аан̣асамбаяуд̇д̇ажид̇д̇асаман̇г̇ино, авасидтавудтаанаг̇ааминивибассанаажид̇д̇аад̣̇исаман̇г̇иноби. д̇знааха ‘‘яаава саб̣б̣анд̇имад̇ан̣хаасамбаяуд̇д̇ажид̇д̇асаман̇г̇ий, д̇аава д̣̇ассид̇аа’’д̇и.
Etenāti etena vacanena. Vodānacittaṃ nāma maggacittānaṃ anantarapaccayabhūtaṃ cittaṃ, idha pana aggamaggacittassa. Tatoti yathāvuttavodānacittato purimataracittasamaṅgino, anulomañāṇasampayuttacittasamaṅgino, avasiṭṭhavuṭṭhānagāminivipassanācittādisamaṅginopi. Tenāha ‘‘yāva sabbantimataṇhāsampayuttacittasamaṅgī, tāva dassitā’’ti.
бадисанд̇хижуд̇ижид̇д̇аанам̣ бхан̇г̇уббаад̣̇агкан̣аа бавад̇д̇з жид̇д̇асса бхан̇г̇уббаад̣̇агкан̣зхи д̣̇угкасажжаад̣̇ийнам̣ нуббаад̣̇аад̣̇ийсу самаанаг̇ад̇игаад̇и гад̇ваа вуд̇д̇ам̣ ‘‘бавад̇д̇з жид̇д̇ассаа’’д̇иаад̣̇и. д̇ад̇т̇а жуд̇ижид̇д̇ассаби уббаад̣̇агкан̣асса г̇ахан̣ам̣ д̣̇адтаб̣б̣анд̇и яож̇анаа. д̣̇вийсуби годтаасзсууд̇и самуд̣̇аяасажжасса бхаавино нирод̇хасса аббадигкзбабадигкзбавасзна бавад̇д̇зсу буримабажчимагодтаасзсу. на висзсид̇анд̇и яат̇аавуд̇д̇з аббадигкзбз жа сад̇иби висзсзд̇ваа на вуд̇д̇анд̇и ад̇т̇о. згассаби буг̇г̇аласса д̇аад̣̇исасса маг̇г̇асса жа паласса жа бхан̇г̇агкан̣асаман̇г̇ино буримагодтаасассзва абхаж̇анад̇о годтаасад̣̇ваяасамбхаваабхаавад̇од̇и ад̇т̇о. ид̣̇аани д̇амзвад̇т̇ам̣ виварид̇ум̣ ‘‘яасса д̣̇угкасажжа’’нд̇иаад̣̇и вуд̇д̇ам̣. гзсан̃жи буг̇г̇алаанам̣. нид̣̇д̇хааран̣з жзд̇ам̣ саамиважанам̣. ‘‘маг̇г̇асса жа паласса жаа’’д̇и вуд̇д̇амаг̇г̇апалаани д̣̇ассзнд̇о ‘‘д̇ин̣н̣ам̣ палаанам̣ д̣̇виннан̃жа маг̇г̇аана’’нд̇и ааха. д̇аани бана хздтимаани д̇ийн̣и палаани маж̇жхз жа д̣̇вз маг̇г̇аа взд̣̇ид̇аб̣б̣аа. ниранд̇арам̣ ануббаад̣̇зд̇ваад̇и бадибагкад̇хаммзхи авогин̣н̣ам̣ гад̇ваа саха вибассанааяа маг̇г̇ам̣ уббаад̣̇знд̇зна яаа саад̇ажжагирияаа гаад̇аб̣б̣аа, д̇ам̣ агад̇ваад̇и ад̇т̇о. д̇знааха ‘‘анд̇аранд̇араа…бз… уббаад̣̇зд̇ваа’’д̇и. ‘‘аруубз маг̇г̇асса жа паласса жа бхан̇г̇агкан̣з’’д̇и ависзсад̇о вуд̇д̇з гат̇амаяам̣ висзсо лаб̣бхад̇ийд̇и ааха ‘‘сааман̃н̃аважанзнабий’’д̇иаад̣̇и. д̇зна абаваад̣̇ависаяабарияааязна убасаг̇г̇аа абхинивисанд̇ийд̇и логасид̣̇д̇хояам̣ н̃ааяод̇и д̣̇ассзд̇и.
Paṭisandhicuticittānaṃ bhaṅguppādakkhaṇā pavatte cittassa bhaṅguppādakkhaṇehi dukkhasaccādīnaṃ nuppādādīsu samānagatikāti katvā vuttaṃ ‘‘pavatte cittassā’’tiādi. Tattha cuticittassapi uppādakkhaṇassa gahaṇaṃ daṭṭhabbanti yojanā. Dvīsupi koṭṭhāsesūti samudayasaccassa bhāvino nirodhassa appaṭikkhepapaṭikkhepavasena pavattesu purimapacchimakoṭṭhāsesu. Na visesitanti yathāvutte appaṭikkhepe ca satipi visesetvā na vuttanti attho. Ekassapi puggalassa tādisassa maggassa ca phalassa ca bhaṅgakkhaṇasamaṅgino purimakoṭṭhāsasseva abhajanato koṭṭhāsadvayasambhavābhāvatoti attho. Idāni tamevatthaṃ vivarituṃ ‘‘yassa dukkhasacca’’ntiādi vuttaṃ. Kesañci puggalānaṃ. Niddhāraṇe cetaṃ sāmivacanaṃ. ‘‘Maggassa ca phalassa cā’’ti vuttamaggaphalāni dassento ‘‘tiṇṇaṃ phalānaṃ dvinnañca maggāna’’nti āha. Tāni pana heṭṭhimāni tīṇi phalāni majjhe ca dve maggā veditabbā. Nirantaraṃ anuppādetvāti paṭipakkhadhammehi avokiṇṇaṃ katvā saha vipassanāya maggaṃ uppādentena yā sātaccakiriyā kātabbā, taṃ akatvāti attho. Tenāha ‘‘antarantarā…pe… uppādetvā’’ti. ‘‘Arūpe maggassa ca phalassa ca bhaṅgakkhaṇe’’ti avisesato vutte kathamayaṃ viseso labbhatīti āha ‘‘sāmaññavacanenapī’’tiādi. Tena apavādavisayapariyāyena upasaggā abhinivisantīti lokasiddhoyaṃ ñāyoti dasseti.
бавад̇д̇иваараван̣н̣анаа нидтид̇аа.
Pavattivāravaṇṇanā niṭṭhitā.
3. барин̃н̃ааваараван̣н̣анаа
3. Pariññāvāravaṇṇanā
165-170. зд̇т̇зваад̇и имасмим̣ сажжаяамагз зва. абарин̃н̃зяяад̇аад̣̇ассанад̇т̇анд̇и зд̇т̇а а-гааро на барин̃н̃зяяаабхаававажано, нааби барин̃н̃зяяабадибагкаважано, ат̇а ко д̇ад̣̇ан̃н̃аважанод̇и яат̇аарахам̣ сажжзсу лаб̣бхамаанаанам̣ бахаад̇аб̣б̣ад̇аад̣̇ийнамби д̣̇ассанз аабаннзязва самаяавааро д̣̇ассанабаро, язсан̃жа на д̣̇ассанабаро, д̇зсу гзсужи сажжзсу лаб̣бхамаанаанамби гзсан̃жи висзсаанам̣ аяам̣ вааро на д̣̇ассанабарод̇и д̣̇ассзнд̇о ‘‘сажчигаран̣а…бз… д̣̇ассанад̇т̇ан̃жаа’’д̇и ааха. самуд̣̇аяз бахаанабарин̃н̃аава вуд̇д̇аа, на д̇ийран̣абарин̃н̃аад̇и яуд̇д̇ам̣ д̇аавзд̇ам̣ самуд̣̇аяассаби д̇ийрзд̇аб̣б̣асабхаавад̇д̇аа, ‘‘д̣̇угкз д̇ийран̣абарин̃н̃аава вуд̇д̇аа, на бахаанабарин̃н̃аа’’д̇и ид̣̇ам̣ бана гасмаа вуд̇д̇ам̣, нану д̣̇угкам̣ аббахаад̇аб̣б̣амзваад̇и? самуд̣̇аяасажжавибхан̇г̇з вуд̇д̇аанам̣ гзсан̃жи самуд̣̇аяагодтаасаанам̣ д̣̇угкасажжз сан̇г̇ахан̣ад̇о д̣̇угкасамуд̣̇аяз ваа асан̇гарад̇ова г̇ахзд̇ваа бхууд̇агат̇анамзд̇ам̣ д̣̇адтаб̣б̣ам̣. убхаяад̇т̇аад̇и д̣̇угкз самуд̣̇аяз жа вуд̇д̇аа. гасмаа? д̇зсам̣ саад̇хааран̣аад̇и. звам̣ саад̇хааран̣аасаад̇хааран̣абхзд̣̇абхиннам̣ яат̇аавуд̇д̇ам̣ барин̃н̃аагижжам̣ буб̣б̣абхааг̇з наанагкан̣з лаб̣бхамаанамби маг̇г̇агаалз згагкан̣з зва лаб̣бхад̇и зган̃аан̣агижжад̇д̇аад̇и д̣̇ассзд̇ум̣ ‘‘маг̇г̇ан̃аан̣ан̃хий’’д̇иаад̣̇и вуд̇д̇ам̣.
165-170. Etthevāti imasmiṃ saccayamake eva. Apariññeyyatādassanatthanti ettha a-kāro na pariññeyyābhāvavacano, nāpi pariññeyyapaṭipakkhavacano, atha kho tadaññavacanoti yathārahaṃ saccesu labbhamānānaṃ pahātabbatādīnampi dassane āpanneyeva samayavāro dassanaparo, yesañca na dassanaparo, tesu kesuci saccesu labbhamānānampi kesañci visesānaṃ ayaṃ vāro na dassanaparoti dassento ‘‘sacchikaraṇa…pe… dassanatthañcā’’ti āha. Samudaye pahānapariññāva vuttā, na tīraṇapariññāti yuttaṃ tāvetaṃ samudayassapi tīretabbasabhāvattā, ‘‘dukkhe tīraṇapariññāvavuttā, na pahānapariññā’’ti idaṃ pana kasmā vuttaṃ, nanu dukkhaṃ appahātabbamevāti? Samudayasaccavibhaṅge vuttānaṃ kesañci samudayakoṭṭhāsānaṃ dukkhasacce saṅgahaṇato dukkhasamudaye vā asaṅkaratova gahetvā bhūtakathanametaṃ daṭṭhabbaṃ. Ubhayatthāti dukkhe samudaye ca vuttā. Kasmā? Tesaṃ sādhāraṇāti. Evaṃ sādhāraṇāsādhāraṇabhedabhinnaṃ yathāvuttaṃ pariññākiccaṃ pubbabhāge nānakkhaṇe labbhamānampi maggakāle ekakkhaṇe eva labbhati ekañāṇakiccattāti dassetuṃ ‘‘maggañāṇañhī’’tiādi vuttaṃ.
барин̃н̃ааваараван̣н̣анаа нидтид̇аа.
Pariññāvāravaṇṇanā niṭṭhitā.
сажжаяамагаван̣н̣анаа нидтид̇аа.
Saccayamakavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / яамагабаал̣и • Yamakapāḷi / 5. сажжаяамагам̣ • 5. Saccayamakaṃ
адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / бан̃жабагаран̣а-адтагат̇аа • Pañcapakaraṇa-aṭṭhakathā / 5. сажжаяамагам̣ • 5. Saccayamakaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-мууладийгаа • Pañcapakaraṇa-mūlaṭīkā / 5. сажжаяамагам̣ • 5. Saccayamakaṃ
