| Library / Tipiṭaka / तिपिटक • Tipiṭaka / अपदानपाळि • Apadānapāḷi |
२. सागतत्थेरअपदानं
2. Sāgatattheraapadānaṃ
१७.
17.
‘‘सोभितो नाम नामेन, अहोसिं ब्राह्मणो तदा।
‘‘Sobhito nāma nāmena, ahosiṃ brāhmaṇo tadā;
पुरक्खतो ससिस्सेहि, आरामं अगमासहं॥
Purakkhato sasissehi, ārāmaṃ agamāsahaṃ.
१८.
18.
‘‘भगवा तम्हि समये, भिक्खुसङ्घपुरक्खतो।
‘‘Bhagavā tamhi samaye, bhikkhusaṅghapurakkhato;
आरामद्वारा निक्खम्म, अट्ठासि पुरिसुत्तमो॥
Ārāmadvārā nikkhamma, aṭṭhāsi purisuttamo.
१९.
19.
‘‘तमद्दसासिं सम्बुद्धं, दन्तं दन्तपुरक्खतं।
‘‘Tamaddasāsiṃ sambuddhaṃ, dantaṃ dantapurakkhataṃ;
सकं चित्तं पसादेत्वा, सन्थविं लोकनायकं॥
Sakaṃ cittaṃ pasādetvā, santhaviṃ lokanāyakaṃ.
२०.
20.
‘‘ये केचि पादपा सब्बे, महिया ते विरूहरे।
‘‘Ye keci pādapā sabbe, mahiyā te virūhare;
बुद्धिमन्तो तथा सत्ता, रुहन्ति जिनसासने॥
Buddhimanto tathā sattā, ruhanti jinasāsane.
२१.
21.
‘‘सत्थवाहोसि सप्पञ्ञो, महेसि बहुके जने।
‘‘Satthavāhosi sappañño, mahesi bahuke jane;
विपथा उद्धरित्वान, पथं आचिक्खसे तुवं॥
Vipathā uddharitvāna, pathaṃ ācikkhase tuvaṃ.
२२.
22.
आतापी पहितत्तेहि, उपसन्तेहि तादिभि॥
Ātāpī pahitattehi, upasantehi tādibhi.
२३.
23.
‘‘अलङ्कतो परिसाहि, पुञ्ञञाणेहि सोभति।
‘‘Alaṅkato parisāhi, puññañāṇehi sobhati;
पभा निद्धावते तुय्हं, सूरियोदयने यथा॥
Pabhā niddhāvate tuyhaṃ, sūriyodayane yathā.
२४.
24.
‘‘पसन्नचित्तं दिस्वान, महेसी पदुमुत्तरो।
‘‘Pasannacittaṃ disvāna, mahesī padumuttaro;
भिक्खुसङ्घे ठितो सत्था, इमा गाथा अभासथ॥
Bhikkhusaṅghe ṭhito satthā, imā gāthā abhāsatha.
२५.
25.
‘‘‘यो सो हासं जनेत्वान, ममं कित्तेसि ब्राह्मणो।
‘‘‘Yo so hāsaṃ janetvāna, mamaṃ kittesi brāhmaṇo;
कप्पानं सतसहस्सं, देवलोके रमिस्सति॥
Kappānaṃ satasahassaṃ, devaloke ramissati.
२६.
26.
‘‘‘तुसिता हि चवित्वान, सुक्कमूलेन चोदितो।
‘‘‘Tusitā hi cavitvāna, sukkamūlena codito;
गोतमस्स भगवतो, सासने पब्बजिस्सति॥
Gotamassa bhagavato, sāsane pabbajissati.
२७.
27.
सागतो नाम नामेन, हेस्सति सत्थु सावको’॥
Sāgato nāma nāmena, hessati satthu sāvako’.
२८.
28.
‘‘पब्बजित्वान कायेन, पापकम्मं विवज्जयिं।
‘‘Pabbajitvāna kāyena, pāpakammaṃ vivajjayiṃ;
वचीदुच्चरितं हित्वा, आजीवं परिसोधयिं॥
Vacīduccaritaṃ hitvā, ājīvaṃ parisodhayiṃ.
२९.
29.
‘‘एवं विहरमानोहं, तेजोधातूसु कोविदो।
‘‘Evaṃ viharamānohaṃ, tejodhātūsu kovido;
सब्बासवे परिञ्ञाय, विहरामि अनासवो॥
Sabbāsave pariññāya, viharāmi anāsavo.
३०.
30.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा सागतो थेरो इमा गाथायो अभासित्थाति।
Itthaṃ sudaṃ āyasmā sāgato thero imā gāthāyo abhāsitthāti.
सागतत्थेरस्सापदानं दुतियं।
Sāgatattherassāpadānaṃ dutiyaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / २. सागतत्थेरअपदानवण्णना • 2. Sāgatattheraapadānavaṇṇanā
