| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
8. сагалигасуд̇д̇аван̣н̣анаа
8. Sakalikasuttavaṇṇanā
38. адтамз мад̣̇д̣̇агужчисминд̇и звам̣наамагз уяяаанз. д̇ан̃хи аж̇аад̇асад̇д̇умхи гужчиг̇ад̇з д̇асса маад̇араа – ‘‘аяам̣ маяхам̣ гужчиг̇ад̇о г̇аб̣бхо ран̃н̃о сад̇д̇у бхависсад̇и. гим̣ мз иминаа’’д̇и? г̇аб̣бхабаад̇анад̇т̇ам̣ гужчи мад̣̇д̣̇аабид̇аа. д̇асмаа ‘‘мад̣̇д̣̇агужчий’’д̇и сан̇кам̣ г̇ад̇ам̣. миг̇аанам̣ бана абхаяаваасад̇т̇ааяа д̣̇иннад̇д̇аа миг̇ад̣̇ааяод̇и вужжад̇и.
38. Aṭṭhame maddakucchisminti evaṃnāmake uyyāne. Tañhi ajātasattumhi kucchigate tassa mātarā – ‘‘ayaṃ mayhaṃ kucchigato gabbho rañño sattu bhavissati. Kiṃ me iminā’’ti? Gabbhapātanatthaṃ kucchi maddāpitā. Tasmā ‘‘maddakucchī’’ti saṅkhaṃ gataṃ. Migānaṃ pana abhayavāsatthāya dinnattā migadāyoti vuccati.
д̇зна ко бана самаязнаад̇и зд̇т̇а аяам̣ анубуб̣б̣игат̇аа – д̣̇звад̣̇ад̇д̇о хи аж̇аад̇асад̇д̇ум̣ ниссааяа д̇хануг̇г̇ахз жа д̇ханабаалаган̃жа баяож̇зд̇вааби д̇ат̇ааг̇ад̇асса ж̇ийвид̇анд̇арааяам̣ гаад̇ум̣ асаггонд̇о ‘‘сахад̇т̇знзва маарзссаамий’’д̇и г̇иж̇жхагуудабаб̣б̣ад̇ам̣ абхирухид̇ваа маханд̇ам̣ гуудааг̇аараббамаан̣ам̣ силам̣ угкибид̇ваа, ‘‘саман̣о г̇од̇амо жун̣н̣авижун̣н̣о ход̇уу’’д̇и бавиж̇жхи. махаат̇аамаваа гирзса бан̃жаннам̣ хад̇т̇ийнам̣ б̣алам̣ д̇хаарзд̇и. адтаанам̣ ко банзд̇ам̣, яам̣ б̣уд̣̇д̇хаанам̣ баруубаггамзна ж̇ийвид̇анд̇арааяо бхавзяяаад̇и д̇ам̣ д̇ат̇ааг̇ад̇асса сарийраабхимукам̣ ааг̇ажчанд̇ам̣ аагаасз ан̃н̃аа силаа удтахид̇ваа самбадижчи. д̣̇виннам̣ силаанам̣ самбахаарзна маханд̇о баасаан̣асса сагалигаа удтахид̇ваа бхаг̇авад̇о бидтибаад̣̇абарияанд̇ам̣ абхихани, баад̣̇о махаапарасунаа бахад̇о вияа самуг̇г̇ад̇алохид̇зна лаакаарасамагкид̇о вияа ахоси. бхаг̇аваа уд̣̇д̇хам̣ уллогзд̇ваа д̣̇звад̣̇ад̇д̇ам̣ зд̇ад̣̇авожа – ‘‘б̣аху д̇аяаа могхабуриса, абун̃н̃ам̣ басуд̇ам̣, яо д̇вам̣ бад̣̇удтажид̇д̇о вад̇хагажид̇д̇о д̇ат̇ааг̇ад̇асса лохид̇ам̣ уббаад̣̇зсий’’д̇и. д̇ад̇о бадтааяа бхаг̇авад̇о апаасу ж̇аад̇ам̣. бхигкуу жинд̇аяим̣су – ‘‘аяам̣ вихааро уж̇ж̇ан̇г̇ало висамо, б̣ахуунам̣ кад̇д̇ияаад̣̇ийнан̃жзва баб̣б̣аж̇ид̇аанан̃жа аногаасо’’д̇и. д̇з д̇ат̇ааг̇ад̇ам̣ ман̃жасивигааяа аад̣̇ааяа мад̣̇д̣̇агужчим̣ наяим̣су. д̇зна вуд̇д̇ам̣ – ‘‘д̇зна ко бана самаязна бхаг̇авад̇о баад̣̇о сагалигааяа кад̇о ход̇ий’’д̇и.
Tena kho pana samayenāti ettha ayaṃ anupubbikathā – devadatto hi ajātasattuṃ nissāya dhanuggahe ca dhanapālakañca payojetvāpi tathāgatassa jīvitantarāyaṃ kātuṃ asakkonto ‘‘sahattheneva māressāmī’’ti gijjhakūṭapabbataṃ abhiruhitvā mahantaṃ kūṭāgārappamāṇaṃ silaṃ ukkhipitvā, ‘‘samaṇo gotamo cuṇṇavicuṇṇo hotū’’ti pavijjhi. Mahāthāmavā kiresa pañcannaṃ hatthīnaṃ balaṃ dhāreti. Aṭṭhānaṃ kho panetaṃ, yaṃ buddhānaṃ parūpakkamena jīvitantarāyo bhaveyyāti taṃ tathāgatassa sarīrābhimukhaṃ āgacchantaṃ ākāse aññā silā uṭṭhahitvā sampaṭicchi. Dvinnaṃ silānaṃ sampahārena mahanto pāsāṇassa sakalikā uṭṭhahitvā bhagavato piṭṭhipādapariyantaṃ abhihani, pādo mahāpharasunā pahato viya samuggatalohitena lākhārasamakkhito viya ahosi. Bhagavā uddhaṃ ulloketvā devadattaṃ etadavoca – ‘‘bahu tayā moghapurisa, apuññaṃ pasutaṃ, yo tvaṃ paduṭṭhacitto vadhakacitto tathāgatassa lohitaṃ uppādesī’’ti. Tato paṭṭhāya bhagavato aphāsu jātaṃ. Bhikkhū cintayiṃsu – ‘‘ayaṃ vihāro ujjaṅgalo visamo, bahūnaṃ khattiyādīnañceva pabbajitānañca anokāso’’ti. Te tathāgataṃ mañcasivikāya ādāya maddakucchiṃ nayiṃsu. Tena vuttaṃ – ‘‘tena kho pana samayena bhagavato pādo sakalikāya khato hotī’’ti.
бхусаад̇и б̣алавад̇ияо. суд̣̇анд̇и нибаад̇амад̇д̇ам̣. д̣̇угканд̇и сукабадигкзбо. д̇иб̣б̣аад̇и б̣ахалаа. караад̇и парусаа. гадугаад̇и д̇икин̣аа. асаад̇аад̇и амад̇хураа. на д̇аасу мано аббзд̇и, на д̇аа манам̣ аббааяанд̇и вад̣дхзнд̇ийд̇и аманаабаа. сад̇о самбаж̇аанод̇и взд̣̇анаад̇хиваасанасад̇исамбаж̇ан̃н̃зна саманнааг̇ад̇о худ̇ваа. авихан̃н̃амаанод̇и абийл̣ияамаано, самбаривад̇д̇асааяид̇ааяа взд̣̇анаанам̣ васам̣ аг̇ажчанд̇о.
Bhusāti balavatiyo. Sudanti nipātamattaṃ. Dukkhanti sukhapaṭikkhepo. Tibbāti bahalā. Kharāti pharusā. Kaṭukāti tikhiṇā. Asātāti amadhurā. Na tāsu mano appeti, na tā manaṃ appāyanti vaḍḍhentīti amanāpā. Sato sampajānoti vedanādhivāsanasatisampajaññena samannāgato hutvā. Avihaññamānoti apīḷiyamāno, samparivattasāyitāya vedanānaṃ vasaṃ agacchanto.
сийхасзяяанд̇и зд̇т̇а гаамабхог̇исзяяаа, бзд̇асзяяаа, сийхасзяяаа, д̇ат̇ааг̇ад̇асзяяаад̇и жад̇ассо сзяяаа. д̇ад̇т̇а ‘‘язбхуяязна, бхигкавз, гаамабхог̇ий сад̇д̇аа ваамзна бассзна сзнд̇ий’’д̇и аяам̣ гаамабхог̇исзяяаа. д̇зсу хи язбхуяязна д̣̇агкин̣абассзна саяаано наама над̇т̇и. ‘‘язбхуяязна, бхигкавз, бзд̇аа уд̇д̇аанаа сзнд̇ий’’д̇и аяам̣ бзд̇асзяяаа. аббамам̣салохид̇ад̇д̇аа хи адтисан̇гхаадаж̇адид̇аа згзна бассзна саяид̇ум̣ на саггонд̇и, уд̇д̇аанаава сзнд̇и. ‘‘язбхуяязна, бхигкавз, сийхо миг̇арааж̇аа нан̇г̇удтам̣ анд̇арасад̇т̇имхи анубагкибид̇ваа д̣̇агкин̣зна бассзна сзд̇ий’’д̇и аяам̣ сийхасзяяаа. д̇зж̇уссад̣̇ад̇д̇аа хи сийхо миг̇арааж̇аа д̣̇вз буримабаад̣̇з згасмим̣, ‘бажчимабаад̣̇з згасмим̣ таанз табзд̇ваа нан̇г̇удтам̣ анд̇арасад̇т̇имхи багкибид̇ваа буримабаад̣̇абажчимабаад̣̇анан̇г̇удтаанам̣ тид̇огаасам̣ саллагкзд̇ваа д̣̇виннам̣ буримабаад̣̇аанам̣ мад̇т̇агз сийсам̣ табзд̇ваа саяад̇и, д̣̇ивасамби саяид̇ваа баб̣уж̇жхамаано на уд̇расанд̇о баб̣уж̇жхад̇и, сийсам̣ бана угкибид̇ваа буримабаад̣̇аад̣̇ийнам̣ тид̇огаасам̣ саллагкзд̇и’. сажз гин̃жи таанам̣ виж̇ахид̇ваа тид̇ам̣ ход̇и, ‘‘наяид̣̇ам̣ д̇уяхам̣ ж̇аад̇ияаа, на суурабхаавасса анурууба’’нд̇и анад̇д̇амано худ̇ваа д̇ад̇т̇зва саяад̇и, на г̇ожарааяа баггамад̇и. авиж̇ахид̇ваа тид̇з бана ‘‘д̇уяхам̣ ж̇аад̇ияаа жа суурабхаавасса жа ануруубамид̣̇а’’нд̇и хадтад̇удто удтааяа сийхавиж̇амбхид̇ам̣ виж̇амбхид̇ваа гзсарабхаарам̣ вид̇хунид̇ваа д̇игкад̇д̇ум̣ сийханаад̣̇ам̣ над̣̇ид̇ваа г̇ожарааяа баггамад̇и. жад̇уд̇т̇аж̇жхаанасзяяаа бана ‘‘д̇ат̇ааг̇ад̇асзяяаа’’д̇и вужжад̇и. д̇аасу ид̇ха сийхасзяяаа ааг̇ад̇аа. аяан̃хи д̇зж̇уссад̣̇аирияаабат̇ад̇д̇аа уд̇д̇амасзяяаа наама.
Sīhaseyyanti ettha kāmabhogiseyyā, petaseyyā, sīhaseyyā, tathāgataseyyāti catasso seyyā. Tattha ‘‘yebhuyyena, bhikkhave, kāmabhogī sattā vāmena passena sentī’’ti ayaṃ kāmabhogiseyyā. Tesu hi yebhuyyena dakkhiṇapassena sayāno nāma natthi. ‘‘Yebhuyyena, bhikkhave, petā uttānā sentī’’ti ayaṃ petaseyyā. Appamaṃsalohitattā hi aṭṭhisaṅghāṭajaṭitā ekena passena sayituṃ na sakkonti, uttānāva senti. ‘‘Yebhuyyena, bhikkhave, sīho migarājā naṅguṭṭhaṃ antarasatthimhi anupakkhipitvā dakkhiṇena passena setī’’ti ayaṃ sīhaseyyā. Tejussadattā hi sīho migarājā dve purimapāde ekasmiṃ, ‘pacchimapāde ekasmiṃ ṭhāne ṭhapetvā naṅguṭṭhaṃ antarasatthimhi pakkhipitvā purimapādapacchimapādanaṅguṭṭhānaṃ ṭhitokāsaṃ sallakkhetvā dvinnaṃ purimapādānaṃ matthake sīsaṃ ṭhapetvā sayati, divasampi sayitvā pabujjhamāno na utrasanto pabujjhati, sīsaṃ pana ukkhipitvā purimapādādīnaṃ ṭhitokāsaṃ sallakkheti’. Sace kiñci ṭhānaṃ vijahitvā ṭhitaṃ hoti, ‘‘nayidaṃ tuyhaṃ jātiyā, na sūrabhāvassa anurūpa’’nti anattamano hutvā tattheva sayati, na gocarāya pakkamati. Avijahitvā ṭhite pana ‘‘tuyhaṃ jātiyā ca sūrabhāvassa ca anurūpamida’’nti haṭṭhatuṭṭho uṭṭhāya sīhavijambhitaṃ vijambhitvā kesarabhāraṃ vidhunitvā tikkhattuṃ sīhanādaṃ naditvā gocarāya pakkamati. Catutthajjhānaseyyā pana ‘‘tathāgataseyyā’’ti vuccati. Tāsu idha sīhaseyyā āgatā. Ayañhi tejussadairiyāpathattā uttamaseyyā nāma.
баад̣̇з баад̣̇анд̇и д̣̇агкин̣абаад̣̇з ваамабаад̣̇ам̣. ажжаад̇хааяаад̇и ад̇иаад̇хааяа, ийсагам̣ ад̇иггамма табзд̇ваа . г̇обпагзна хи г̇обпагз ж̇аан̣унаа ваа ж̇аан̣умхи сан̇гхаддияамаанз абхин̣хам̣ взд̣̇анаа уббаж̇ж̇ад̇и, жид̇д̇ам̣ згаг̇г̇ам̣ на ход̇и, сзяяаа апаасугаа ход̇и. яат̇аа на сан̇гхаддзд̇и, звам̣ ад̇иггамма табид̇з взд̣̇анаа нуббаж̇ж̇ад̇и, жид̇д̇ам̣ згаг̇г̇ам̣ ход̇и, сзяяаа паасу ход̇и. д̇асмаа звам̣ нибаж̇ж̇и. сад̇о самбаж̇аанод̇и саяанабариг̇г̇аахагасад̇исамбаж̇ан̃н̃зна саманнааг̇ад̇о. ‘‘удтаанасан̃н̃а’’нд̇и банзд̇т̇а на вуд̇д̇ам̣, г̇илаанасзяяаа хзсаа д̇ат̇ааг̇ад̇асса.
Pāde pādanti dakkhiṇapāde vāmapādaṃ. Accādhāyāti atiādhāya, īsakaṃ atikkamma ṭhapetvā . Gopphakena hi gopphake jāṇunā vā jāṇumhi saṅghaṭṭiyamāne abhiṇhaṃ vedanā uppajjati, cittaṃ ekaggaṃ na hoti, seyyā aphāsukā hoti. Yathā na saṅghaṭṭeti, evaṃ atikkamma ṭhapite vedanā nuppajjati, cittaṃ ekaggaṃ hoti, seyyā phāsu hoti. Tasmā evaṃ nipajji. Sato sampajānoti sayanapariggāhakasatisampajaññena samannāgato. ‘‘Uṭṭhānasañña’’nti panettha na vuttaṃ, gilānaseyyā hesā tathāgatassa.
сад̇д̇асад̇аад̇и имасмим̣ суд̇д̇з саб̣б̣ааби д̇аа д̣̇звад̇аа г̇илаанасзяяадтаанам̣ ааг̇ад̇аа. уд̣̇аанам̣ уд̣̇аанзсийд̇и г̇илаанасзяяам̣ ааг̇ад̇аанам̣ д̣̇оманассзна бхавид̇аб̣б̣ам̣ сияаа. имаасам̣ бана д̇ат̇ааг̇ад̇асса взд̣̇анаад̇хиваасанам̣ д̣̇исваа, ‘‘ахо б̣уд̣̇д̇хаанам̣ махаанубхаавад̇аа! зваруубаасу наама взд̣̇анаасу вад̇д̇амаанаасу вигаарамад̇д̇амби над̇т̇и, сирийсаяанз алан̇гарид̇ваа табид̇асуван̣н̣аруубагам̣ вияа анин̃ж̇амаанзна гааязна нибанно, ид̣̇аанисса ад̇хигад̇арам̣ мукаван̣н̣о вирожад̇и, аабхаасамбанно бун̣н̣ажанд̣̇о вияа самбад̇и вигасид̇ам̣ вияа жа аравинд̣̇ам̣ асса мукам̣ собхад̇и, гааязби ван̣н̣ааяад̇анам̣ ид̣̇аани сусаммадтаган̃жанам̣ вияа виббасийд̣̇ад̇ий’’д̇и уд̣̇аанам̣ уд̣̇абаад̣̇и.
Sattasatāti imasmiṃ sutte sabbāpi tā devatā gilānaseyyaṭṭhānaṃ āgatā. Udānaṃ udānesīti gilānaseyyaṃ āgatānaṃ domanassena bhavitabbaṃ siyā. Imāsaṃ pana tathāgatassa vedanādhivāsanaṃ disvā, ‘‘aho buddhānaṃ mahānubhāvatā! Evarūpāsu nāma vedanāsu vattamānāsu vikāramattampi natthi, sirīsayane alaṅkaritvā ṭhapitasuvaṇṇarūpakaṃ viya aniñjamānena kāyena nipanno, idānissa adhikataraṃ mukhavaṇṇo virocati, ābhāsampanno puṇṇacando viya sampati vikasitaṃ viya ca aravindaṃ assa mukhaṃ sobhati, kāyepi vaṇṇāyatanaṃ idāni susammaṭṭhakañcanaṃ viya vippasīdatī’’ti udānaṃ udapādi.
нааг̇о вад̇а бход̇и, зд̇т̇а бход̇и д̇хаммаалабанам̣. б̣алаванд̇адтзна нааг̇о. нааг̇авад̇аад̇и нааг̇абхаавзна. сийхо вад̇аад̇иаад̣̇ийсу асанд̇аасанадтзна сийхо. б̣яад̇д̇абарижаяадтзна гааран̣аагааран̣аж̇аананзна ваа ааж̇аанийяо. аббадисамадтзна нисабхо. г̇авасад̇аж̇здтаго хи усабхо, г̇авасахассаж̇здтаго васабхо, г̇авасад̇асахассаж̇здтаго нисабход̇и вужжад̇и. бхаг̇аваа бана аббадисамадтзна аасабхам̣ таанам̣ бадиж̇аанаад̇и. д̇знзвад̇т̇зна ид̇ха ‘‘нисабхо’’д̇и вуд̇д̇о. д̇хураваахадтзна д̇хораяхо. ниб̣б̣исзванадтзна д̣̇анд̇о.
Nāgovata bhoti, ettha bhoti dhammālapanaṃ. Balavantaṭṭhena nāgo. Nāgavatāti nāgabhāvena. Sīho vatātiādīsu asantāsanaṭṭhena sīho. Byattaparicayaṭṭhena kāraṇākāraṇajānanena vā ājānīyo. Appaṭisamaṭṭhena nisabho. Gavasatajeṭṭhako hi usabho, gavasahassajeṭṭhako vasabho, gavasatasahassajeṭṭhako nisabhoti vuccati. Bhagavā pana appaṭisamaṭṭhena āsabhaṃ ṭhānaṃ paṭijānāti. Tenevatthena idha ‘‘nisabho’’ti vutto. Dhuravāhaṭṭhena dhorayho. Nibbisevanaṭṭhena danto.
бассаад̇и анияамид̇аан̣ад̇д̇и. самаад̇хинд̇и арахад̇д̇апаласамаад̇хим̣. сувимуд̇д̇анд̇и палавимуд̇д̇ияаа сувимуд̇д̇ам̣. рааг̇аануг̇ад̇ам̣ бана жид̇д̇ам̣ абхинад̇ам̣ наама ход̇и, д̣̇осаануг̇ад̇ам̣ абанад̇ам̣. д̇ад̣̇убхаяабадигкзбзна на жаабхинад̇ам̣ на жаабанад̇анд̇и ааха. на жа сасан̇каараниг̇г̇аяхаваарид̇аг̇ад̇анд̇и на сасан̇каарзна саббаяог̇зна гилзсз ниг̇г̇ахзд̇ваа ваарид̇авад̇ам̣, гилзсаанам̣ бана чиннад̇д̇аа вад̇ам̣ паласамаад̇хинаа самаахид̇анд̇и ад̇т̇о. ад̇иггамид̇аб̣б̣анд̇и вихзтзд̇аб̣б̣ам̣ гхаддзд̇аб̣б̣ам̣. ад̣̇ассанаад̇и ан̃н̃аан̣аа. ан̃н̃аан̣ий хи анд̇хаб̣аалова зваруубз сад̇т̇ари абараж̇жхзяяаад̇и д̣̇звад̣̇ад̇д̇ам̣ гхаддаяамаанаа вад̣̇анд̇и.
Passāti aniyamitāṇatti. Samādhinti arahattaphalasamādhiṃ. Suvimuttanti phalavimuttiyā suvimuttaṃ. Rāgānugataṃ pana cittaṃ abhinataṃ nāma hoti, dosānugataṃ apanataṃ. Tadubhayapaṭikkhepena na cābhinataṃ na cāpanatanti āha. Na ca sasaṅkhāraniggayhavāritagatanti na sasaṅkhārena sappayogena kilese niggahetvā vāritavataṃ, kilesānaṃ pana chinnattā vataṃ phalasamādhinā samāhitanti attho. Atikkamitabbanti viheṭhetabbaṃ ghaṭṭetabbaṃ. Adassanāti aññāṇā. Aññāṇī hi andhabālova evarūpe satthari aparajjheyyāti devadattaṃ ghaṭṭayamānā vadanti.
бан̃жавзд̣̇аад̇и ид̇ихаасабан̃жамаанам̣ взд̣̇аанам̣ д̇хаарагаа. сад̇ам̣ саманд̇и вассасад̇ам̣. д̇абассийд̇и д̇абаниссид̇агаа худ̇ваа. жаранд̇и жаранд̇аа. на саммаавимуд̇д̇анд̇и сажзби зваруубаа б̣раахман̣аа вассасад̇ам̣ жаранд̇и, жид̇д̇ан̃жа нзсам̣ саммаа вимуд̇д̇ам̣ на ход̇и. хийнад̇д̇аруубаа на баарам̣ г̇амаа д̇зд̇и хийнад̇д̇асабхааваа д̇з ниб̣б̣аанан̇г̇амаа на хонд̇и. ‘‘хийнад̇т̇аруубаа’’д̇иби баато, хийнад̇т̇аж̇аад̇игаа барихийнад̇т̇аад̇и ад̇т̇о. д̇ан̣хаад̇хибаннаад̇и д̇ан̣хааяа аж̇жход̇т̇адаа. вад̇асийлаб̣ад̣̇д̇хаад̇и аж̇авад̇агуггуравад̇аад̣̇ийхи жа вад̇зхи д̇аад̣̇исзхзва жа сийлзхи б̣ад̣̇д̇хаа. луукам̣ д̇абанд̇и бан̃жаад̇абад̇аабанам̣ ган̣дагасзяяаад̣̇игам̣ д̇абам̣. ид̣̇аани саа д̣̇звад̇аа саасанасса нияяаанигабхаавам̣ гат̇знд̇ий на маанагаамассаад̇иаад̣̇имааха. д̇ам̣ вуд̇д̇ад̇т̇амзваад̇и. адтамам̣.
Pañcavedāti itihāsapañcamānaṃ vedānaṃ dhārakā. Sataṃ samanti vassasataṃ. Tapassīti tapanissitakā hutvā. Caranti carantā. Na sammāvimuttanti sacepi evarūpā brāhmaṇā vassasataṃ caranti, cittañca nesaṃ sammā vimuttaṃ na hoti. Hīnattarūpā na pāraṃ gamā teti hīnattasabhāvā te nibbānaṅgamā na honti. ‘‘Hīnattharūpā’’tipi pāṭho, hīnatthajātikā parihīnatthāti attho. Taṇhādhipannāti taṇhāya ajjhotthaṭā. Vatasīlabaddhāti ajavatakukkuravatādīhi ca vatehi tādiseheva ca sīlehi baddhā. Lūkhaṃ tapanti pañcātapatāpanaṃ kaṇṭakaseyyādikaṃ tapaṃ. Idāni sā devatā sāsanassa niyyānikabhāvaṃ kathentī na mānakāmassātiādimāha. Taṃ vuttatthamevāti. Aṭṭhamaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 8. сагалигасуд̇д̇ам̣ • 8. Sakalikasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 8. сагалигасуд̇д̇аван̣н̣анаа • 8. Sakalikasuttavaṇṇanā
