೧-೬೦. ಸಕಿಂಸಮ್ಮಜ್ಜಕತ್ಥೇರಅಪದಾನಾದಿವಣ್ಣನಾ

1-60. Sakiṃsammajjakattheraapadānādivaṇṇanā

ತೇಚತ್ತಾಲೀಸಮವಗ್ಗೇ ಸಬ್ಬಥೇರಾಪದಾನಾನಿ ಉತ್ತಾನಾನೇವ। ಕೇವಲಂ ಥೇರಾನಂ ನಾಮನಾನತ್ತಂ ಪುಞ್ಞನಾನತ್ತಞ್ಚ ವಿಸೇಸೋ।

Tecattālīsamavagge sabbatherāpadānāni uttānāneva. Kevalaṃ therānaṃ nāmanānattaṃ puññanānattañca viseso.

ಚತುಚತ್ತಾಲೀಸಮೇ ವಗ್ಗೇಪಿ ಸಬ್ಬಾನಿ ಅಪದಾನಾನಿ ಪಾಕಟಾನೇವ। ಕೇವಲಂ ಪುಞ್ಞನಾನತ್ತಂ ಫಲನಾನತ್ತಞ್ಚ ವಿಸೇಸೋ।

Catucattālīsame vaggepi sabbāni apadānāni pākaṭāneva. Kevalaṃ puññanānattaṃ phalanānattañca viseso.

೧. ಪಞ್ಚಚತ್ತಾಲೀಸಮವಗ್ಗೇ ಪಠಮಾಪದಾನೇ ಕಕುಸನ್ಧೋ ಮಹಾವೀರೋತಿಆದಿಕಂ ಆಯಸ್ಮತೋ ವಿಭೀಟಕಮಿಞ್ಜಿಯತ್ಥೇರಸ್ಸ ಅಪದಾನಂ।

1. Pañcacattālīsamavagge paṭhamāpadāne kakusandho mahāvīrotiādikaṃ āyasmato vibhīṭakamiñjiyattherassa apadānaṃ.

೨. ತತ್ಥ ಬೀಜಮಿಞ್ಜಮದಾಸಹನ್ತಿ ವಿಭೀಟಕಫಲಾನಿ ಫಾಲೇತ್ವಾ ಬೀಜಾನಿ ಮಿಞ್ಜಾನಿ ಗಹೇತ್ವಾ ಮಧುಸಕ್ಕರಾಹಿ ಯೋಜೇತ್ವಾ ಕಕುಸನ್ಧಸ್ಸ ಭಗವತೋ ಅದಾಸಿನ್ತಿ ಅತ್ಥೋ। ದುತಿಯಾಪದಾನಾದೀನಿ ಸಬ್ಬಾನಿ ಸುವಿಞ್ಞೇಯ್ಯಾನೇವ, ಥೇರಾನಂ ನಾಮನಾನತ್ತಾದೀನಿಪಿ ಪಾಠಾನುಸಾರೇನ ವೇದಿತಬ್ಬಾನಿ।

2. Tattha bījamiñjamadāsahanti vibhīṭakaphalāni phāletvā bījāni miñjāni gahetvā madhusakkarāhi yojetvā kakusandhassa bhagavato adāsinti attho. Dutiyāpadānādīni sabbāni suviññeyyāneva, therānaṃ nāmanānattādīnipi pāṭhānusārena veditabbāni.

೧. ಛಚತ್ತಾಲೀಸಮೇ ವಗ್ಗೇ ಪಠಮಾಪದಾನೇ ಜಗತಿಂ ಕಾರಯಿಂ ಅಹನ್ತಿ ಉತ್ತಮಬೋಧಿರುಕ್ಖಸ್ಸ ಸಮನ್ತತೋ ಆಳಿನ್ದಂ ಅಹಂ ಕಾರಯಿನ್ತಿ ಅತ್ಥೋ। ಸೇಸಾನಿ ದುತಿಯಾಪದಾನಾದೀನಿ ಸಬ್ಬಾನಿಪಿ ಉತ್ತಾನಾನೇವ।

1. Chacattālīsame vagge paṭhamāpadāne jagatiṃ kārayiṃ ahanti uttamabodhirukkhassa samantato āḷindaṃ ahaṃ kārayinti attho. Sesāni dutiyāpadānādīni sabbānipi uttānāneva.

ಸತ್ತಚತ್ತಾಲೀಸಮೇ ವಗ್ಗೇ ಪಠಮಾಪದಾನಾದೀನಿ ಪಾಳಿಅನುಸಾರೇನ ಸುವಿಞ್ಞೇಯ್ಯಾನೇವ।

Sattacattālīsame vagge paṭhamāpadānādīni pāḷianusārena suviññeyyāneva.

ಅಟ್ಠಚತ್ತಾಲೀಸಮೇ ವಗ್ಗೇ ಪಠಮದುತಿಯಾಪದಾನಾನಿ ಉತ್ತಾನಾನೇವ।

Aṭṭhacattālīsame vagge paṭhamadutiyāpadānāni uttānāneva.

೩೦. ತತಿಯಾಪದಾನೇ ಕೋಸಿಯೋ ನಾಮ ಭಗವಾತಿ ಕೋಸಿಯಗೋತ್ತೇ ಜಾತತ್ತಾ ಕೋಸಿಯೋ ನಾಮ ಪಚ್ಚೇಕಬುದ್ಧೋತಿ ಅತ್ಥೋ। ಚಿತ್ತಕೂಟೇತಿ ಚಿತ್ತಕೂಟಕೇಲಾಸಕೂಟಸಾನುಕೂಟಾದೀಸು ಅನೋತತ್ತದಹಂ ಪಟಿಚ್ಛಾದೇತ್ವಾ ಠಿತಪಬ್ಬತಕೂಟೇಸು ನಾನಾರತನಓಸಧಾದೀಹಿ ವಿಚಿತ್ತೇ ಚಿತ್ತಕೂಟಪಬ್ಬತೇ ಸೋ ಪಚ್ಚೇಕಬುದ್ಧೋ ವಸೀತಿ ಅತ್ಥೋ।

30. Tatiyāpadāne kosiyo nāma bhagavāti kosiyagotte jātattā kosiyo nāma paccekabuddhoti attho. Cittakūṭeti cittakūṭakelāsakūṭasānukūṭādīsu anotattadahaṃ paṭicchādetvā ṭhitapabbatakūṭesu nānāratanaosadhādīhi vicitte cittakūṭapabbate so paccekabuddho vasīti attho.

ಚತುತ್ಥಪಞ್ಚಮಾಪದಾನಾನಿ ಉತ್ತಾನಾನೇವ।

Catutthapañcamāpadānāni uttānāneva.

೫೬. ಛಟ್ಠಾಪದಾನೇ ಕುಸಟ್ಠಕಮದಾಸಹನ್ತಿ ಪಕ್ಖಿಕಭತ್ತಉಪೋಸಥಿಕಭತ್ತಧುರಭತ್ತಸಲಾಕಭತ್ತಾದೀಸು ಕುಸಪಣ್ಣವಸೇನ ದಾತಬ್ಬಂ ಅಟ್ಠಸಲಾಕಭತ್ತಂ ಅಹಂ ಅದಾಸಿನ್ತಿ ಅತ್ಥೋ।

56. Chaṭṭhāpadāne kusaṭṭhakamadāsahanti pakkhikabhattauposathikabhattadhurabhattasalākabhattādīsu kusapaṇṇavasena dātabbaṃ aṭṭhasalākabhattaṃ ahaṃ adāsinti attho.

೬೧. ಸತ್ತಮಾಪದಾನೇ ಸೋಭಿತೋ ನಾಮ ಸಮ್ಬುದ್ಧೋತಿ ಆರೋಹಪರಿಣಾಹದ್ವತ್ತಿಂಸಮಹಾಪುರಿಸಲಕ್ಖಣಬ್ಯಾಮಪ್ಪಭಾದೀಹಿ ಸೋಭಮಾನಸರೀರತ್ತಾ ಸೋಭಿತೋ ನಾಮ ಸಮ್ಮಾಸಮ್ಬುದ್ಧೋತಿ ಅತ್ಥೋ।

61. Sattamāpadāne sobhito nāma sambuddhoti ārohapariṇāhadvattiṃsamahāpurisalakkhaṇabyāmappabhādīhi sobhamānasarīrattā sobhito nāma sammāsambuddhoti attho.

೬೬. ಅಟ್ಠಮಾಪದಾನೇ ತಕ್ಕರಾಯಂ ವಸೀ ತದಾತಿ ತಂ ದಸಪುಞ್ಞಕಿರಿಯವತ್ಥುಂ ಕರೋನ್ತಾ ಜನಾ ಪಟಿವಸನ್ತಿ ಏತ್ಥಾತಿ ತಕ್ಕರಾ, ರಾಜಧಾನೀ। ತಿಸ್ಸಂ ತಕ್ಕರಾಯಂ, ತದಾ ವಸೀತಿ ಅತ್ಥೋ।

66. Aṭṭhamāpadāne takkarāyaṃ vasī tadāti taṃ dasapuññakiriyavatthuṃ karontā janā paṭivasanti etthāti takkarā, rājadhānī. Tissaṃ takkarāyaṃ, tadā vasīti attho.

೭೨. ನವಮಾಪದಾನೇ ಪಾನಧಿಂ ಸುಕತಂ ಗಯ್ಹಾತಿ ಉಪಾಹನಯುಗಂ ಸುನ್ದರಾಕಾರೇನ ನಿಪ್ಫಾದಿತಂ ಗಹೇತ್ವಾತಿ ಅತ್ಥೋ। ದಸಮಾಪದಾನಂ ಸುವಿಞ್ಞೇಯ್ಯಮೇವಾತಿ।

72. Navamāpadāne pānadhiṃ sukataṃ gayhāti upāhanayugaṃ sundarākārena nipphāditaṃ gahetvāti attho. Dasamāpadānaṃ suviññeyyamevāti.

ಅಟ್ಠಚತ್ತಾಲೀಸಮವಗ್ಗವಣ್ಣನಾ ನಿಟ್ಠಿತಾ।

Aṭṭhacattālīsamavaggavaṇṇanā niṭṭhitā.

Next: ೪೯. ಪಂಸುಕೂಲವಗ್ಗೋ • 49. Paṃsukūlavaggo

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact