| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
4. ஸக்கச்சவக்³க³வண்ணனா
4. Sakkaccavaggavaṇṇanā
608. சதுத்த²வக்³கே³ ஸபதா³னந்தி எத்த² தா³னங் வுச்சதி அவக²ண்ட³னங், அபேதங் தா³னதோ அபதா³னங், அனவக²ண்ட³னந்தி அத்தோ². ஸஹ அபதா³னேன ஸபதா³னங், அவக²ண்ட³னவிரஹிதங் , அனுபடிபாடியாதி வுத்தங் ஹோதி. தேனாஹ ‘‘தத்த² தத்த² ஓதி⁴ங் அகத்வா அனுபடிபாடியா’’தி.
608. Catutthavagge sapadānanti ettha dānaṃ vuccati avakhaṇḍanaṃ, apetaṃ dānato apadānaṃ, anavakhaṇḍananti attho. Saha apadānena sapadānaṃ, avakhaṇḍanavirahitaṃ , anupaṭipāṭiyāti vuttaṃ hoti. Tenāha ‘‘tattha tattha odhiṃ akatvā anupaṭipāṭiyā’’ti.
611. யஸ்மிங் ஸமயே ‘‘பாணோ ந ஹந்தப்³போ³’’தி ராஜானோ பே⁴ரிங் சராபெந்தி, அயங் மாகா⁴தஸமயோ நாம. இத⁴ அனாபத்தியங் கி³லானோ ந ஆக³தோ, தஸ்மா கி³லானஸ்ஸபி ஆபத்தி. ஸூபோத³னவிஞ்ஞத்திஸிக்கா²பதே³ அஸஞ்சிச்ச அஸ்ஸதியாதி எத்த² ‘‘முகே² பக்கி²பித்வா புன விப்படிஸாரீ ஹுத்வா ச²ட்³டெ³ந்தஸ்ஸ அருசியா பவிஸந்தே ‘அஸஞ்சிச்சா’தி வுச்சதி, விஞ்ஞத்திம்பி அவிஞ்ஞத்திம்பி ஏதஸ்மிங் டா²னே டி²தங் ஸஹஸா க³ஹெத்வா பு⁴ஞ்ஜந்தே ‘அஸ்ஸதியா’தி வுச்சதீ’’தி தீஸுபி க³ண்டி²பதே³ஸு வுத்தங்.
611. Yasmiṃ samaye ‘‘pāṇo na hantabbo’’ti rājāno bheriṃ carāpenti, ayaṃ māghātasamayo nāma. Idha anāpattiyaṃ gilāno na āgato, tasmā gilānassapi āpatti. Sūpodanaviññattisikkhāpade asañcicca assatiyāti ettha ‘‘mukhe pakkhipitvā puna vippaṭisārī hutvā chaḍḍentassa aruciyā pavisante ‘asañciccā’ti vuccati, viññattimpi aviññattimpi etasmiṃ ṭhāne ṭhitaṃ sahasā gahetvā bhuñjante ‘assatiyā’ti vuccatī’’ti tīsupi gaṇṭhipadesu vuttaṃ.
614-615. உஜ்ஜா²னே ஸஞ்ஞா உஜ்ஜா²னஸஞ்ஞா, ஸா அஸ்ஸ அத்தீ²தி உஜ்ஜா²னஸஞ்ஞீ. ‘‘மயூரண்ட³ங் அதிமஹந்த’’ந்தி வசனதோ மயூரண்ட³ப்பமாணோ கப³ளோ ந வட்டதி. கேசி பன ‘‘மயூரண்ட³தோ மஹந்தோ ந வட்டதீ’’தி வத³ந்தி, தங் ந க³ஹேதப்³ப³ங், ‘‘நாதிமஹந்த’’ந்தி ச அதிமஹந்தஸ்ஸேவ படிக்கி²த்தத்தா கு²த்³த³கே ஆபத்தி ந தி³ஸ்ஸதி. ‘‘மயூரண்ட³ங் அதிமஹந்தங், குக்குடண்ட³ங் அதிகு²த்³த³கங், தேஸங் வேமஜ்ஜ²ப்பமாணோ’’தி இமினா பன ஸாருப்பவஸேன கு²த்³த³கம்பி படிக்கி²பித்வா பரிச்சே²தோ³ ந த³ஸ்ஸிதோதி வேதி³தப்³ப³ங்.
614-615. Ujjhāne saññā ujjhānasaññā, sā assa atthīti ujjhānasaññī. ‘‘Mayūraṇḍaṃ atimahanta’’nti vacanato mayūraṇḍappamāṇo kabaḷo na vaṭṭati. Keci pana ‘‘mayūraṇḍato mahanto na vaṭṭatī’’ti vadanti, taṃ na gahetabbaṃ, ‘‘nātimahanta’’nti ca atimahantasseva paṭikkhittattā khuddake āpatti na dissati. ‘‘Mayūraṇḍaṃ atimahantaṃ, kukkuṭaṇḍaṃ atikhuddakaṃ, tesaṃ vemajjhappamāṇo’’ti iminā pana sāruppavasena khuddakampi paṭikkhipitvā paricchedo na dassitoti veditabbaṃ.
ஸக்கச்சவக்³க³வண்ணனா நிட்டி²தா.
Sakkaccavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. ஸக்கச்சவக்³கோ³ • 4. Sakkaccavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. ஸக்கச்சவக்³க³வண்ணனா • 4. Sakkaccavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 4. ஸக்கச்சவக்³க³வண்ணனா • 4. Sakkaccavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. ஸக்கச்சவக்³க³-அத்த²யோஜனா • 4. Sakkaccavagga-atthayojanā
