| Library / Tipiṭaka / തിപിടക • Tipiṭaka / വിമതിവിനോദനീ-ടീകാ • Vimativinodanī-ṭīkā |
൪. സക്കച്ചവഗ്ഗവണ്ണനാ
4. Sakkaccavaggavaṇṇanā
൬൦൮. ചതുത്ഥവഗ്ഗാദീസു സപദാനന്തി ഏത്ഥ ദാനം വുച്ചതി അവഖണ്ഡനം, അപേതം ദാനതോ അപദാനം, സഹ അപദാനേന സപദാനം, അവഖണ്ഡനവിരഹിതം അനുപടിപാടിയാതി വുത്തം ഹോതി. തേനാഹ ‘‘തത്ഥ തത്ഥ ഓധിം അകത്വാ’’തിആദി.
608. Catutthavaggādīsu sapadānanti ettha dānaṃ vuccati avakhaṇḍanaṃ, apetaṃ dānato apadānaṃ, saha apadānena sapadānaṃ, avakhaṇḍanavirahitaṃ anupaṭipāṭiyāti vuttaṃ hoti. Tenāha ‘‘tattha tattha odhiṃ akatvā’’tiādi.
൬൧൧. വിഞ്ഞത്തിയന്തി സൂപോദനവിഞ്ഞത്തിസിക്ഖാപദം സന്ധായ വദതി. ‘‘വത്തബ്ബം നത്ഥീ’’തി ഇമിനാ പാളിയാവ സബ്ബം വിഞ്ഞായതീതി ദസ്സേതി. തത്ഥ പാളിയം അസഞ്ചിച്ചാതിആദീസു വത്ഥുമത്തം ഞത്വാ ഭുഞ്ജനേന ആപത്തിം ആപജ്ജന്തസ്സേവ പുന പണ്ണത്തിം ഞത്വാ മുഖഗതം ഛഡ്ഡേതുകാമസ്സ യം അരുചിയാ പവിട്ഠം, തം അസഞ്ചിച്ച പവിട്ഠം നാമ, തത്ഥ അനാപത്തി. തദേവ പുന അഞ്ഞവിഹിതതായ വാ അവിഞ്ഞത്തമിദന്തിസഞ്ഞായ വാ ഭുഞ്ജനേ ‘‘അസതിയാ’’തി വുച്ചതി.
611.Viññattiyanti sūpodanaviññattisikkhāpadaṃ sandhāya vadati. ‘‘Vattabbaṃ natthī’’ti iminā pāḷiyāva sabbaṃ viññāyatīti dasseti. Tattha pāḷiyaṃ asañciccātiādīsu vatthumattaṃ ñatvā bhuñjanena āpattiṃ āpajjantasseva puna paṇṇattiṃ ñatvā mukhagataṃ chaḍḍetukāmassa yaṃ aruciyā paviṭṭhaṃ, taṃ asañcicca paviṭṭhaṃ nāma, tattha anāpatti. Tadeva puna aññavihitatāya vā aviññattamidantisaññāya vā bhuñjane ‘‘asatiyā’’ti vuccati.
൬൧൩. ‘‘അഞ്ഞസ്സത്ഥായാ’’തി ഇദമസ്സ സിക്ഖാപദസ്സ അത്തനോ അത്ഥായ വിഞ്ഞാപേത്വാ സയം ഭുഞ്ജനേ ഏവ പഞ്ഞത്തത്താ ഇമിനാ സിക്ഖാപദേന അനാപത്തിം സന്ധായ വുത്തം. പഞ്ചസഹധമ്മികാനം പന അത്ഥായ അഞ്ഞാതകഅപ്പവാരിതട്ഠാനേ വിഞ്ഞാപേന്തോ വിഞ്ഞത്തിക്ഖണേ അട്ഠകഥാസു സുത്താനുലോമതോ വുത്തഅകതവിഞ്ഞത്തിദുക്കടതോ ന മുച്ചതി. സഞ്ചിച്ച ഭുഞ്ജനക്ഖണേ സയഞ്ച അഞ്ഞേ ച മിച്ഛാജീവതോ ന മുച്ചന്തീതി ഗഹേതബ്ബം.
613.‘‘Aññassatthāyā’’ti idamassa sikkhāpadassa attano atthāya viññāpetvā sayaṃ bhuñjane eva paññattattā iminā sikkhāpadena anāpattiṃ sandhāya vuttaṃ. Pañcasahadhammikānaṃ pana atthāya aññātakaappavāritaṭṭhāne viññāpento viññattikkhaṇe aṭṭhakathāsu suttānulomato vuttaakataviññattidukkaṭato na muccati. Sañcicca bhuñjanakkhaṇe sayañca aññe ca micchājīvato na muccantīti gahetabbaṃ.
൬൧൫. ‘‘കുക്കുടണ്ഡം അതിഖുദ്ദക’’ന്തി ഇദം അസാരുപ്പവസേന വുത്തം, അതിമഹന്തേ ഏവ ആപത്തീതി ദട്ഠബ്ബം. ഭുഞ്ജന്തേന പന ചോരാദിഭയം പടിച്ച മഹന്തമ്പി അപരിമണ്ഡലമ്പി കത്വാ സീഘം ഭുഞ്ജനവസേനേത്ഥ ആപദാ. ഏവമഞ്ഞേസുപി യഥാനുരൂപം ദട്ഠബ്ബം.
615.‘‘Kukkuṭaṇḍaṃ atikhuddaka’’nti idaṃ asāruppavasena vuttaṃ, atimahante eva āpattīti daṭṭhabbaṃ. Bhuñjantena pana corādibhayaṃ paṭicca mahantampi aparimaṇḍalampi katvā sīghaṃ bhuñjanavasenettha āpadā. Evamaññesupi yathānurūpaṃ daṭṭhabbaṃ.
സക്കച്ചവഗ്ഗവണ്ണനാ നിട്ഠിതാ.
Sakkaccavaggavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / വിനയപിടക • Vinayapiṭaka / മഹാവിഭങ്ഗ • Mahāvibhaṅga / ൪. സക്കച്ചവഗ്ഗോ • 4. Sakkaccavaggo
അട്ഠകഥാ • Aṭṭhakathā / വിനയപിടക (അട്ഠകഥാ) • Vinayapiṭaka (aṭṭhakathā) / മഹാവിഭങ്ഗ-അട്ഠകഥാ • Mahāvibhaṅga-aṭṭhakathā / ൪. സക്കച്ചവഗ്ഗവണ്ണനാ • 4. Sakkaccavaggavaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / സാരത്ഥദീപനീ-ടീകാ • Sāratthadīpanī-ṭīkā / ൪. സക്കച്ചവഗ്ഗവണ്ണനാ • 4. Sakkaccavaggavaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / പാചിത്യാദിയോജനാപാളി • Pācityādiyojanāpāḷi / ൪. സക്കച്ചവഗ്ഗ-അത്ഥയോജനാ • 4. Sakkaccavagga-atthayojanā
