| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೬. ಸಕ್ಕಸುತ್ತಂ
6. Sakkasuttaṃ
೪೬. ಏಕಂ ಸಮಯಂ ಭಗವಾ ಸಕ್ಕೇಸು ವಿಹರತಿ ಕಪಿಲವತ್ಥುಸ್ಮಿಂ ನಿಗ್ರೋಧಾರಾಮೇ। ಅಥ ಖೋ ಸಮ್ಬಹುಲಾ ಸಕ್ಕಾ ಉಪಾಸಕಾ ತದಹುಪೋಸಥೇ ಯೇನ ಭಗವಾ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿಂಸು। ಏಕಮನ್ತಂ ನಿಸಿನ್ನೇ ಖೋ ಸಕ್ಕೇ ಉಪಾಸಕೇ ಭಗವಾ ಏತದವೋಚ – ‘‘ಅಪಿ ನು ತುಮ್ಹೇ, ಸಕ್ಕಾ, ಅಟ್ಠಙ್ಗಸಮನ್ನಾಗತಂ ಉಪೋಸಥಂ ಉಪವಸಥಾ’’ತಿ? ‘‘ಅಪ್ಪೇಕದಾ ಮಯಂ, ಭನ್ತೇ, ಅಟ್ಠಙ್ಗಸಮನ್ನಾಗತಂ ಉಪೋಸಥಂ ಉಪವಸಾಮ, ಅಪ್ಪೇಕದಾ ನ ಉಪವಸಾಮಾ’’ತಿ। ‘‘ತೇಸಂ ವೋ, ಸಕ್ಕಾ, ಅಲಾಭಾ ತೇಸಂ ದುಲ್ಲದ್ಧಂ, ಯೇ ತುಮ್ಹೇ ಏವಂ ಸೋಕಸಭಯೇ ಜೀವಿತೇ ಮರಣಸಭಯೇ ಜೀವಿತೇ ಅಪ್ಪೇಕದಾ ಅಟ್ಠಙ್ಗಸಮನ್ನಾಗತಂ ಉಪೋಸಥಂ ಉಪವಸಥ, ಅಪ್ಪೇಕದಾ ನ ಉಪವಸಥ।
46. Ekaṃ samayaṃ bhagavā sakkesu viharati kapilavatthusmiṃ nigrodhārāme. Atha kho sambahulā sakkā upāsakā tadahuposathe yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinne kho sakke upāsake bhagavā etadavoca – ‘‘api nu tumhe, sakkā, aṭṭhaṅgasamannāgataṃ uposathaṃ upavasathā’’ti? ‘‘Appekadā mayaṃ, bhante, aṭṭhaṅgasamannāgataṃ uposathaṃ upavasāma, appekadā na upavasāmā’’ti. ‘‘Tesaṃ vo, sakkā, alābhā tesaṃ dulladdhaṃ, ye tumhe evaṃ sokasabhaye jīvite maraṇasabhaye jīvite appekadā aṭṭhaṅgasamannāgataṃ uposathaṃ upavasatha, appekadā na upavasatha.
‘‘ತಂ ಕಿಂ ಮಞ್ಞಥ, ಸಕ್ಕಾ, ಇಧ ಪುರಿಸೋ ಯೇನ ಕೇನಚಿ ಕಮ್ಮಟ್ಠಾನೇನ ಅನಾಪಜ್ಜ ಅಕುಸಲಂ ದಿವಸಂ ಅಡ್ಢಕಹಾಪಣಂ ನಿಬ್ಬಿಸೇಯ್ಯ। ದಕ್ಖೋ ಪುರಿಸೋ ಉಟ್ಠಾನಸಮ್ಪನ್ನೋತಿ ಅಲಂ ವಚನಾಯಾ’’ತಿ? ‘‘ಏವಂ, ಭನ್ತೇ’’।
‘‘Taṃ kiṃ maññatha, sakkā, idha puriso yena kenaci kammaṭṭhānena anāpajja akusalaṃ divasaṃ aḍḍhakahāpaṇaṃ nibbiseyya. Dakkho puriso uṭṭhānasampannoti alaṃ vacanāyā’’ti? ‘‘Evaṃ, bhante’’.
‘‘ತಂ ಕಿಂ ಮಞ್ಞಥ, ಸಕ್ಕಾ, ಇಧ ಪುರಿಸೋ ಯೇನ ಕೇನಚಿ ಕಮ್ಮಟ್ಠಾನೇನ ಅನಾಪಜ್ಜ ಅಕುಸಲಂ ದಿವಸಂ ಕಹಾಪಣಂ ನಿಬ್ಬಿಸೇಯ್ಯ। ದಕ್ಖೋ ಪುರಿಸೋ ಉಟ್ಠಾನಸಮ್ಪನ್ನೋತಿ ಅಲಂ ವಚನಾಯಾ’’ತಿ? ‘‘ಏವಂ, ಭನ್ತೇ’’।
‘‘Taṃ kiṃ maññatha, sakkā, idha puriso yena kenaci kammaṭṭhānena anāpajja akusalaṃ divasaṃ kahāpaṇaṃ nibbiseyya. Dakkho puriso uṭṭhānasampannoti alaṃ vacanāyā’’ti? ‘‘Evaṃ, bhante’’.
‘‘ತಂ ಕಿಂ, ಮಞ್ಞಥ, ಸಕ್ಕಾ, ಇಧ ಪುರಿಸೋ ಯೇನ ಕೇನಚಿ ಕಮ್ಮಟ್ಠಾನೇನ ಅನಾಪಜ್ಜ ಅಕುಸಲಂ ದಿವಸಂ ದ್ವೇ ಕಹಾಪಣೇ ನಿಬ್ಬಿಸೇಯ್ಯ … ತಯೋ ಕಹಾಪಣೇ ನಿಬ್ಬಿಸೇಯ್ಯ… ಚತ್ತಾರೋ ಕಹಾಪಣೇ ನಿಬ್ಬಿಸೇಯ್ಯ… ಪಞ್ಚ ಕಹಾಪಣೇ ನಿಬ್ಬಿಸೇಯ್ಯ… ಛ ಕಹಾಪಣೇ ನಿಬ್ಬಿಸೇಯ್ಯ… ಸತ್ತ ಕಹಾಪಣೇ ನಿಬ್ಬಿಸೇಯ್ಯ… ಅಟ್ಠ ಕಹಾಪಣೇ ನಿಬ್ಬಿಸೇಯ್ಯ… ನವ ಕಹಾಪಣೇ ನಿಬ್ಬಿಸೇಯ್ಯ… ದಸ ಕಹಾಪಣೇ ನಿಬ್ಬಿಸೇಯ್ಯ… ವೀಸ ಕಹಾಪಣೇ ನಿಬ್ಬಿಸೇಯ್ಯ… ತಿಂಸ ಕಹಾಪಣೇ ನಿಬ್ಬಿಸೇಯ್ಯ… ಚತ್ತಾರೀಸಂ ಕಹಾಪಣೇ ನಿಬ್ಬಿಸೇಯ್ಯ… ಪಞ್ಞಾಸಂ ಕಹಾಪಣೇ ನಿಬ್ಬಿಸೇಯ್ಯ… ಕಹಾಪಣಸತಂ ನಿಬ್ಬಿಸೇಯ್ಯ। ದಕ್ಖೋ ಪುರಿಸೋ ಉಟ್ಠಾನಸಮ್ಪನ್ನೋತಿ ಅಲಂ ವಚನಾಯಾ’’ತಿ? ‘‘ಏವಂ, ಭನ್ತೇ’’।
‘‘Taṃ kiṃ, maññatha, sakkā, idha puriso yena kenaci kammaṭṭhānena anāpajja akusalaṃ divasaṃ dve kahāpaṇe nibbiseyya … tayo kahāpaṇe nibbiseyya… cattāro kahāpaṇe nibbiseyya… pañca kahāpaṇe nibbiseyya… cha kahāpaṇe nibbiseyya… satta kahāpaṇe nibbiseyya… aṭṭha kahāpaṇe nibbiseyya… nava kahāpaṇe nibbiseyya… dasa kahāpaṇe nibbiseyya… vīsa kahāpaṇe nibbiseyya… tiṃsa kahāpaṇe nibbiseyya… cattārīsaṃ kahāpaṇe nibbiseyya… paññāsaṃ kahāpaṇe nibbiseyya… kahāpaṇasataṃ nibbiseyya. Dakkho puriso uṭṭhānasampannoti alaṃ vacanāyā’’ti? ‘‘Evaṃ, bhante’’.
‘‘ತಂ ಕಿಂ ಮಞ್ಞಥ, ಸಕ್ಕಾ, ಅಪಿ ನು ಸೋ ಪುರಿಸೋ ದಿವಸೇ ದಿವಸೇ ಕಹಾಪಣಸತಂ ಕಹಾಪಣಸಹಸ್ಸಂ ನಿಬ್ಬಿಸಮಾನೋ ಲದ್ಧಂ ಲದ್ಧಂ ನಿಕ್ಖಿಪನ್ತೋ ವಸ್ಸಸತಾಯುಕೋ ವಸ್ಸಸತಜೀವೀ ಮಹನ್ತಂ ಭೋಗಕ್ಖನ್ಧಂ ಅಧಿಗಚ್ಛೇಯ್ಯಾ’’ತಿ? ‘‘ಏವಂ, ಭನ್ತೇ’’।
‘‘Taṃ kiṃ maññatha, sakkā, api nu so puriso divase divase kahāpaṇasataṃ kahāpaṇasahassaṃ nibbisamāno laddhaṃ laddhaṃ nikkhipanto vassasatāyuko vassasatajīvī mahantaṃ bhogakkhandhaṃ adhigaccheyyā’’ti? ‘‘Evaṃ, bhante’’.
‘‘ತಂ ಕಿಂ ಮಞ್ಞಥ, ಸಕ್ಕಾ, ಅಪಿ ನು ಸೋ ಪುರಿಸೋ ಭೋಗಹೇತು ಭೋಗನಿದಾನಂ ಭೋಗಾಧಿಕರಣಂ ಏಕಂ ವಾ ರತ್ತಿಂ ಏಕಂ ವಾ ದಿವಸಂ ಉಪಡ್ಢಂ ವಾ ರತ್ತಿಂ ಉಪಡ್ಢಂ ವಾ ದಿವಸಂ ಏಕನ್ತಸುಖಪ್ಪಟಿಸಂವೇದೀ ವಿಹರೇಯ್ಯಾ’’ತಿ? ‘‘ನೋ ಹೇತಂ, ಭನ್ತೇ’’। ‘‘ತಂ ಕಿಸ್ಸ ಹೇತು’’? ‘‘ಕಾಮಾ ಹಿ, ಭನ್ತೇ, ಅನಿಚ್ಚಾ ತುಚ್ಛಾ ಮುಸಾ ಮೋಸಧಮ್ಮಾ’’ತಿ।
‘‘Taṃ kiṃ maññatha, sakkā, api nu so puriso bhogahetu bhoganidānaṃ bhogādhikaraṇaṃ ekaṃ vā rattiṃ ekaṃ vā divasaṃ upaḍḍhaṃ vā rattiṃ upaḍḍhaṃ vā divasaṃ ekantasukhappaṭisaṃvedī vihareyyā’’ti? ‘‘No hetaṃ, bhante’’. ‘‘Taṃ kissa hetu’’? ‘‘Kāmā hi, bhante, aniccā tucchā musā mosadhammā’’ti.
‘‘ಇಧ ಪನ ವೋ, ಸಕ್ಕಾ, ಮಮ ಸಾವಕೋ ದಸ ವಸ್ಸಾನಿ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರನ್ತೋ ಯಥಾ ಮಯಾನುಸಿಟ್ಠಂ ತಥಾ ಪಟಿಪಜ್ಜಮಾನೋ ಸತಮ್ಪಿ ವಸ್ಸಾನಿ ಸತಮ್ಪಿ ವಸ್ಸಸತಾನಿ ಸತಮ್ಪಿ ವಸ್ಸಸಹಸ್ಸಾನಿ ಏಕನ್ತಸುಖಪ್ಪಟಿಸಂವೇದೀ ವಿಹರೇಯ್ಯ। ಸೋ ಚ ಖ್ವಸ್ಸ ಸಕದಾಗಾಮೀ ವಾ ಅನಾಗಾಮೀ ವಾ ಅಪಣ್ಣಕಂ ವಾ ಸೋತಾಪನ್ನೋ। ತಿಟ್ಠನ್ತು, ಸಕ್ಕಾ, ದಸ ವಸ್ಸಾನಿ।
‘‘Idha pana vo, sakkā, mama sāvako dasa vassāni appamatto ātāpī pahitatto viharanto yathā mayānusiṭṭhaṃ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṃvedī vihareyya. So ca khvassa sakadāgāmī vā anāgāmī vā apaṇṇakaṃ vā sotāpanno. Tiṭṭhantu, sakkā, dasa vassāni.
ಇಧ ಮಮ ಸಾವಕೋ ನವ ವಸ್ಸಾನಿ… ಅಟ್ಠ ವಸ್ಸಾನಿ… ಸತ್ತ ವಸ್ಸಾನಿ… ಛ ವಸ್ಸಾನಿ… ಪಞ್ಚ ವಸ್ಸಾನಿ ಚತ್ತಾರಿ ವಸ್ಸಾನಿ… ತೀಣಿ ವಸ್ಸಾನಿ… ದ್ವೇ ವಸ್ಸಾನಿ… ಏಕಂ ವಸ್ಸಂ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರನ್ತೋ ಯಥಾ ಮಯಾನುಸಿಟ್ಠಂ ತಥಾ ಪಟಿಪಜ್ಜಮಾನೋ ಸತಮ್ಪಿ ವಸ್ಸಾನಿ ಸತಮ್ಪಿ ವಸ್ಸಸತಾನಿ ಸತಮ್ಪಿ ವಸ್ಸಸಹಸ್ಸಾನಿ ಏಕನ್ತಸುಖಪ್ಪಟಿಸಂವೇದೀ ವಿಹರೇಯ್ಯ, ಸೋ ಚ ಖ್ವಸ್ಸ ಸಕದಾಗಾಮೀ ವಾ ಅನಾಗಾಮೀ ವಾ ಅಪಣ್ಣಕಂ ವಾ ಸೋತಾಪನ್ನೋ। ತಿಟ್ಠತು, ಸಕ್ಕಾ, ಏಕಂ ವಸ್ಸಂ।
Idha mama sāvako nava vassāni… aṭṭha vassāni… satta vassāni… cha vassāni… pañca vassāni cattāri vassāni… tīṇi vassāni… dve vassāni… ekaṃ vassaṃ appamatto ātāpī pahitatto viharanto yathā mayānusiṭṭhaṃ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṃvedī vihareyya, so ca khvassa sakadāgāmī vā anāgāmī vā apaṇṇakaṃ vā sotāpanno. Tiṭṭhatu, sakkā, ekaṃ vassaṃ.
ಇಧ ಮಮ ಸಾವಕೋ ದಸ ಮಾಸೇ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರನ್ತೋ ಯಥಾ ಮಯಾನುಸಿಟ್ಠಂ ತಥಾ ಪಟಿಪಜ್ಜಮಾನೋ ಸತಮ್ಪಿ ವಸ್ಸಾನಿ ಸತಮ್ಪಿ ವಸ್ಸಸತಾನಿ ಸತಮ್ಪಿ ವಸ್ಸಸಹಸ್ಸಾನಿ ಏಕನ್ತಸುಖಪ್ಪಟಿಸಂವೇದೀ ವಿಹರೇಯ್ಯ, ಸೋ ಚ ಖ್ವಸ್ಸ ಸಕದಾಗಾಮೀ ವಾ ಅನಾಗಾಮೀ ವಾ ಅಪಣ್ಣಕಂ ವಾ ಸೋತಾಪನ್ನೋ। ತಿಟ್ಠನ್ತು, ಸಕ್ಕಾ, ದಸ ಮಾಸಾ।
Idha mama sāvako dasa māse appamatto ātāpī pahitatto viharanto yathā mayānusiṭṭhaṃ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṃvedī vihareyya, so ca khvassa sakadāgāmī vā anāgāmī vā apaṇṇakaṃ vā sotāpanno. Tiṭṭhantu, sakkā, dasa māsā.
ಇಧ ಮಮ ಸಾವಕೋ ನವ ಮಾಸೇ… ಅಟ್ಠ ಮಾಸೇ… ಸತ್ತ ಮಾಸೇ… ಛ ಮಾಸೇ… ಪಞ್ಚ ಮಾಸೇ… ಚತ್ತಾರೋ ಮಾಸೇ… ತಯೋ ಮಾಸೇ… ದ್ವೇ ಮಾಸೇ… ಏಕಂ ಮಾಸಂ… ಅಡ್ಢಮಾಸಂ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರನ್ತೋ ಯಥಾ ಮಯಾನುಸಿಟ್ಠಂ ತಥಾ ಪಟಿಪಜ್ಜಮಾನೋ ಸತಮ್ಪಿ ವಸ್ಸಾನಿ ಸತಮ್ಪಿ ವಸ್ಸಸತಾನಿ ಸತಮ್ಪಿ ವಸ್ಸಸಹಸ್ಸಾನಿ ಏಕನ್ತಸುಖಪ್ಪಟಿಸಂವೇದೀ ವಿಹರೇಯ್ಯ, ಸೋ ಚ ಖ್ವಸ್ಸ ಸಕದಾಗಾಮೀ ವಾ ಅನಾಗಾಮೀ ವಾ ಅಪಣ್ಣಕಂ ವಾ ಸೋತಾಪನ್ನೋ। ತಿಟ್ಠತು, ಸಕ್ಕಾ, ಅಡ್ಢಮಾಸೋ।
Idha mama sāvako nava māse… aṭṭha māse… satta māse… cha māse… pañca māse… cattāro māse… tayo māse… dve māse… ekaṃ māsaṃ… aḍḍhamāsaṃ appamatto ātāpī pahitatto viharanto yathā mayānusiṭṭhaṃ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṃvedī vihareyya, so ca khvassa sakadāgāmī vā anāgāmī vā apaṇṇakaṃ vā sotāpanno. Tiṭṭhatu, sakkā, aḍḍhamāso.
ಇಧ ಮಮ ಸಾವಕೋ ದಸ ರತ್ತಿನ್ದಿವೇ 1 ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರನ್ತೋ ಯಥಾ ಮಯಾನುಸಿಟ್ಠಂ ತಥಾ ಪಟಿಪಜ್ಜಮಾನೋ ಸತಮ್ಪಿ ವಸ್ಸಾನಿ ಸತಮ್ಪಿ ವಸ್ಸಸತಾನಿ ಸತಮ್ಪಿ ವಸ್ಸಸಹಸ್ಸಾನಿ ಏಕನ್ತಸುಖಪ್ಪಟಿಸಂವೇದೀ ವಿಹರೇಯ್ಯ, ಸೋ ಚ ಖ್ವಸ್ಸ ಸಕದಾಗಾಮೀ ವಾ ಅನಾಗಾಮೀ ವಾ ಅಪಣ್ಣಕಂ ವಾ ಸೋತಾಪನ್ನೋ। ತಿಟ್ಠನ್ತು, ಸಕ್ಕಾ, ದಸ ರತ್ತಿನ್ದಿವಾ।
Idha mama sāvako dasa rattindive 2 appamatto ātāpī pahitatto viharanto yathā mayānusiṭṭhaṃ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṃvedī vihareyya, so ca khvassa sakadāgāmī vā anāgāmī vā apaṇṇakaṃ vā sotāpanno. Tiṭṭhantu, sakkā, dasa rattindivā.
ಇಧ ಮಮ ಸಾವಕೋ ನವ ರತ್ತಿನ್ದಿವೇ… ಅಟ್ಠ ರತ್ತಿನ್ದಿವೇ… ಸತ್ತ ರತ್ತಿನ್ದಿವೇ… ಛ ರತ್ತಿನ್ದಿವೇ… ಪಞ್ಚ ರತ್ತಿನ್ದಿವೇ… ಚತ್ತಾರೋ ರತ್ತಿನ್ದಿವೇ… ತಯೋ ರತ್ತಿನ್ದಿವೇ… ದ್ವೇ ರತ್ತಿನ್ದಿವೇ… ಏಕಂ ರತ್ತಿನ್ದಿವಂ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರನ್ತೋ ಯಥಾ ಮಯಾನುಸಿಟ್ಠಂ ತಥಾ ಪಟಿಪಜ್ಜಮಾನೋ ಸತಮ್ಪಿ ವಸ್ಸಾನಿ ಸತಮ್ಪಿ ವಸ್ಸಸತಾನಿ ಸತಮ್ಪಿ ವಸ್ಸಸಹಸ್ಸಾನಿ ಏಕನ್ತಸುಖಪ್ಪಟಿಸಂವೇದೀ ವಿಹರೇಯ್ಯ, ಸೋ ಚ ಖ್ವಸ್ಸ ಸಕದಾಗಾಮೀ ವಾ ಅನಾಗಾಮೀ ವಾ ಅಪಣ್ಣಕಂ ವಾ ಸೋತಾಪನ್ನೋ। ತೇಸಂ ವೋ, ಸಕ್ಕಾ, ಅಲಾಭಾ ತೇಸಂ ದುಲ್ಲದ್ಧಂ, ಯೇ ತುಮ್ಹೇ ಏವಂ ಸೋಕಸಭಯೇ ಜೀವಿತೇ ಮರಣಸಭಯೇ ಜೀವಿತೇ ಅಪ್ಪೇಕದಾ ಅಟ್ಠಙ್ಗಸಮನ್ನಾಗತಂ ಉಪೋಸಥಂ ಉಪವಸಥ, ಅಪ್ಪೇಕದಾ ನ ಉಪವಸಥಾ’’ತಿ। ‘‘ಏತೇ ಮಯಂ, ಭನ್ತೇ, ಅಜ್ಜತಗ್ಗೇ ಅಟ್ಠಙ್ಗಸಮನ್ನಾಗತಂ ಉಪೋಸಥಂ ಉಪವಸಿಸ್ಸಾಮಾ’’ತಿ। ಛಟ್ಠಂ।
Idha mama sāvako nava rattindive… aṭṭha rattindive… satta rattindive… cha rattindive… pañca rattindive… cattāro rattindive… tayo rattindive… dve rattindive… ekaṃ rattindivaṃ appamatto ātāpī pahitatto viharanto yathā mayānusiṭṭhaṃ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṃvedī vihareyya, so ca khvassa sakadāgāmī vā anāgāmī vā apaṇṇakaṃ vā sotāpanno. Tesaṃ vo, sakkā, alābhā tesaṃ dulladdhaṃ, ye tumhe evaṃ sokasabhaye jīvite maraṇasabhaye jīvite appekadā aṭṭhaṅgasamannāgataṃ uposathaṃ upavasatha, appekadā na upavasathā’’ti. ‘‘Ete mayaṃ, bhante, ajjatagge aṭṭhaṅgasamannāgataṃ uposathaṃ upavasissāmā’’ti. Chaṭṭhaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೬. ಸಕ್ಕಸುತ್ತವಣ್ಣನಾ • 6. Sakkasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೮. ವಿವಾದಸುತ್ತಾದಿವಣ್ಣನಾ • 1-8. Vivādasuttādivaṇṇanā
