| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၄. သက္ကာယဒိဋ္ဌိနိဒ္ဒေသော
4. Sakkāyadiṭṭhiniddeso
၁၃၇. သက္ကာယဒိဋ္ဌိယာ ကတမေဟိ ဝီသတိယာ အာကာရေဟိ အဘိနိဝေသော ဟောတိ? ဣဓ အသ္သုတဝာ ပုထုဇ္ဇနော အရိယာနံ အဒသ္သာဝီ အရိယဓမ္မသ္သ အကောဝိဒော အရိယဓမ္မေ အဝိနီတော, သပ္ပုရိသာနံ အဒသ္သာဝီ သပ္ပုရိသဓမ္မသ္သ အကောဝိဒော သပ္ပုရိသဓမ္မေ အဝိနီတော ရူပံ အတ္တတော သမနုပသ္သတိ ရူပဝန္တံ ဝာ အတ္တာနံ အတ္တနိ ဝာ ရူပံ ရူပသ္မိံ ဝာ အတ္တာနံ။ ဝေဒနံ။ သညံ။ သင္ခာရေ။ ဝိညာဏံ အတ္တတော သမနုပသ္သတိ ဝိညာဏဝန္တံ ဝာ အတ္တာနံ အတ္တနိ ဝာ ဝိညာဏံ ဝိညာဏသ္မိံ ဝာ အတ္တာနံ။
137. Sakkāyadiṭṭhiyā katamehi vīsatiyā ākārehi abhiniveso hoti? Idha assutavā puthujjano ariyānaṃ adassāvī ariyadhammassa akovido ariyadhamme avinīto, sappurisānaṃ adassāvī sappurisadhammassa akovido sappurisadhamme avinīto rūpaṃ attato samanupassati rūpavantaṃ vā attānaṃ attani vā rūpaṃ rūpasmiṃ vā attānaṃ. Vedanaṃ… saññaṃ… saṅkhāre… viññāṇaṃ attato samanupassati viññāṇavantaṃ vā attānaṃ attani vā viññāṇaṃ viññāṇasmiṃ vā attānaṃ.
ကထံ ရူပံ အတ္တတော သမနုပသ္သတိ? ဣဓေကစ္စော ပထဝီကသိဏံ။ပေ.။ ဩဒာတကသိဏံ အတ္တတော သမနုပသ္သတိ။ ‘‘ယံ ဩဒာတကသိဏံ, သော အဟံ; ယော အဟံ, တံ ဩဒာတကသိဏ’’န္တိ – ဩဒာတကသိဏဉ္စ အတ္တဉ္စ အဒ္ဝယံ သမနုပသ္သတိ ။ သေယ္ယထာပိ တေလပ္ပဒီပသ္သ ဈာယတော။ပေ.။ ဧဝမေဝံ ဣဓေကစ္စော ဩဒာတကသိဏံ အတ္တတော သမနုပသ္သတိ။ အဘိနိဝေသပရာမာသော ဒိဋ္ဌိ။ပေ.။ အယံ ပဌမာ ရူပဝတ္ထုကာ သက္ကာယဒိဋ္ဌိ။ သက္ကာယဒိဋ္ဌိ မိစ္ဆာဒိဋ္ဌိ။ပေ.။ ဣမာနိ သညောဇနာနိ, န စ ဒိဋ္ဌိယော။ ဧဝံ ရူပံ အတ္တတော သမနုပသ္သတိ။ပေ.။ သက္ကာယဒိဋ္ဌိယာ ဣမေဟိ ဝီသတိယာ အာကာရေဟိ အဘိနိဝေသော ဟောတိ။
Kathaṃ rūpaṃ attato samanupassati? Idhekacco pathavīkasiṇaṃ…pe… odātakasiṇaṃ attato samanupassati. ‘‘Yaṃ odātakasiṇaṃ, so ahaṃ; yo ahaṃ, taṃ odātakasiṇa’’nti – odātakasiṇañca attañca advayaṃ samanupassati . Seyyathāpi telappadīpassa jhāyato…pe… evamevaṃ idhekacco odātakasiṇaṃ attato samanupassati. Abhinivesaparāmāso diṭṭhi…pe… ayaṃ paṭhamā rūpavatthukā sakkāyadiṭṭhi. Sakkāyadiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ rūpaṃ attato samanupassati…pe… sakkāyadiṭṭhiyā imehi vīsatiyā ākārehi abhiniveso hoti.
သက္ကာယဒိဋ္ဌိနိဒ္ဒေသော စတုတ္ထော။
Sakkāyadiṭṭhiniddeso catuttho.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၄. သက္ကာယဒိဋ္ဌိနိဒ္ဒေသဝဏ္ဏနာ • 4. Sakkāyadiṭṭhiniddesavaṇṇanā
