| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૭. સક્ખિભબ્બસુત્તં
7. Sakkhibhabbasuttaṃ
૭૧. ‘‘છહિ, ભિક્ખવે, ધમ્મેહિ સમન્નાગતો ભિક્ખુ અભબ્બો તત્ર તત્રેવ સક્ખિભબ્બતં પાપુણિતું સતિ સતિ આયતને. કતમેહિ છહિ? ઇધ , ભિક્ખવે, ભિક્ખુ ‘ઇમે હાનભાગિયા ધમ્મા’તિ યથાભૂતં નપ્પજાનાતિ, ‘ઇમે ઠિતિભાગિયા ધમ્મા’તિ યથાભૂતં નપ્પજાનાતિ, ‘ઇમે વિસેસભાગિયા ધમ્મા’તિ યથાભૂતં નપ્પજાનાતિ, ‘ઇમે નિબ્બેધભાગિયા ધમ્મા’તિ યથાભૂતં નપ્પજાનાતિ, અસક્કચ્ચકારી ચ હોતિ, અસપ્પાયકારી ચ. ઇમેહિ ખો, ભિક્ખવે, છહિ ધમ્મેહિ સમન્નાગતો ભિક્ખુ અભબ્બો તત્ર તત્રેવ સક્ખિભબ્બતં પાપુણિતું સતિ સતિ આયતને.
71. ‘‘Chahi, bhikkhave, dhammehi samannāgato bhikkhu abhabbo tatra tatreva sakkhibhabbataṃ pāpuṇituṃ sati sati āyatane. Katamehi chahi? Idha , bhikkhave, bhikkhu ‘ime hānabhāgiyā dhammā’ti yathābhūtaṃ nappajānāti, ‘ime ṭhitibhāgiyā dhammā’ti yathābhūtaṃ nappajānāti, ‘ime visesabhāgiyā dhammā’ti yathābhūtaṃ nappajānāti, ‘ime nibbedhabhāgiyā dhammā’ti yathābhūtaṃ nappajānāti, asakkaccakārī ca hoti, asappāyakārī ca. Imehi kho, bhikkhave, chahi dhammehi samannāgato bhikkhu abhabbo tatra tatreva sakkhibhabbataṃ pāpuṇituṃ sati sati āyatane.
‘‘છહિ, ભિક્ખવે, ધમ્મેહિ સમન્નાગતો ભિક્ખુ ભબ્બો તત્ર તત્રેવ સક્ખિભબ્બતં પાપુણિતું સતિ સતિ આયતને. કતમેહિ છહિ? ઇધ, ભિક્ખવે, ભિક્ખુ ‘ઇમે હાનભાગિયા ધમ્મા’તિ યથાભૂતં પજાનાતિ, ‘ઇમે ઠિતિભાગિયા ધમ્મા’તિ યથાભૂતં પજાનાતિ, ‘ઇમે વિસેસભાગિયા ધમ્મા’તિ યથાભૂતં પજાનાતિ, ‘ઇમે નિબ્બેધભાગિયા ધમ્મા’તિ યથાભૂતં પજાનાતિ, સક્કચ્ચકારી ચ હોતિ, સપ્પાયકારી ચ. ઇમેહિ ખો, ભિક્ખવે, છહિ ધમ્મેહિ સમન્નાગતો ભિક્ખુ ભબ્બો તત્ર તત્રેવ સક્ખિભબ્બતં પાપુણિતું સતિ સતિ આયતને’’તિ. સત્તમં.
‘‘Chahi, bhikkhave, dhammehi samannāgato bhikkhu bhabbo tatra tatreva sakkhibhabbataṃ pāpuṇituṃ sati sati āyatane. Katamehi chahi? Idha, bhikkhave, bhikkhu ‘ime hānabhāgiyā dhammā’ti yathābhūtaṃ pajānāti, ‘ime ṭhitibhāgiyā dhammā’ti yathābhūtaṃ pajānāti, ‘ime visesabhāgiyā dhammā’ti yathābhūtaṃ pajānāti, ‘ime nibbedhabhāgiyā dhammā’ti yathābhūtaṃ pajānāti, sakkaccakārī ca hoti, sappāyakārī ca. Imehi kho, bhikkhave, chahi dhammehi samannāgato bhikkhu bhabbo tatra tatreva sakkhibhabbataṃ pāpuṇituṃ sati sati āyatane’’ti. Sattamaṃ.
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૭. સક્ખિભબ્બસુત્તવણ્ણના • 7. Sakkhibhabbasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૭-૧૦. સક્ખિભબ્બસુત્તાદિવણ્ણના • 7-10. Sakkhibhabbasuttādivaṇṇanā
