Library / Tipiṭaka / तिपिटक • Tipiṭaka / उदानपाळि • Udānapāḷi

७. सक्‍कुदानसुत्तं

7. Sakkudānasuttaṃ

२७. एवं मे सुतं – एकं समयं भगवा राजगहे विहरति वेळुवने कलन्दकनिवापे। तेन खो पन समयेन आयस्मा महाकस्सपो पिप्पलिगुहायं विहरति, सत्ताहं एकपल्‍लङ्केन निसिन्‍नो होति अञ्‍ञतरं ¹ समाधिं समापज्‍जित्वा। अथ खो आयस्मा महाकस्सपो तस्स सत्ताहस्स अच्‍चयेन तम्हा समाधिम्हा वुट्ठासि। अथ खो आयस्मतो महाकस्सपस्स तम्हा समाधिम्हा वुट्ठितस्स एतदहोसि – ‘‘यंनूनाहं राजगहं पिण्डाय पविसेय्य’’न्ति।

27. Evaṃ me sutaṃ – ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena āyasmā mahākassapo pippaliguhāyaṃ viharati, sattāhaṃ ekapallaṅkena nisinno hoti aññataraṃ ² samādhiṃ samāpajjitvā. Atha kho āyasmā mahākassapo tassa sattāhassa accayena tamhā samādhimhā vuṭṭhāsi. Atha kho āyasmato mahākassapassa tamhā samādhimhā vuṭṭhitassa etadahosi – ‘‘yaṃnūnāhaṃ rājagahaṃ piṇḍāya paviseyya’’nti.

तेन खो पन समयेन पञ्‍चमत्तानि देवतासतानि उस्सुक्‍कं आपन्‍नानि होन्ति आयस्मतो महाकस्सपस्स पिण्डपातपटिलाभाय। अथ खो आयस्मा महाकस्सपो तानि पञ्‍चमत्तानि देवतासतानि पटिक्खिपित्वा पुब्बण्हसमयं निवासेत्वा पत्तचीवरमादाय राजगहं पिण्डाय पाविसि।

Tena kho pana samayena pañcamattāni devatāsatāni ussukkaṃ āpannāni honti āyasmato mahākassapassa piṇḍapātapaṭilābhāya. Atha kho āyasmā mahākassapo tāni pañcamattāni devatāsatāni paṭikkhipitvā pubbaṇhasamayaṃ nivāsetvā pattacīvaramādāya rājagahaṃ piṇḍāya pāvisi.

तेन खो पन समयेन सक्‍को देवानमिन्दो आयस्मतो महाकस्सपस्स पिण्डपातं दातुकामो होति। पेसकारवण्णं अभिनिम्मिनित्वा तन्तं विनाति। सुजा ³ असुरकञ्‍ञा तसरं पूरेति। अथ खो आयस्मा महाकस्सपो राजगहे सपदानं पिण्डाय चरमानो येन सक्‍कस्स देवानमिन्दस्स निवेसनं तेनुपसङ्कमि। अद्दसा खो सक्‍को देवानमिन्दो आयस्मन्तं महाकस्सपं दूरतोव आगच्छन्तं। दिस्वान घरा निक्खमित्वा पच्‍चुगन्त्वा हत्थतो पत्तं गहेत्वा घरं पविसित्वा ⁴ घटिया ओदनं उद्धरित्वा पत्तं पूरेत्वा आयस्मतो महाकस्सपस्स अदासि। सो अहोसि पिण्डपातो अनेकसूपो अनेकब्यञ्‍जनो अनेकरसब्यञ्‍जनो ⁵। अथ खो आयस्मतो महाकस्सपस्स एतदहोसि – ‘‘को नु खो अयं सत्तो यस्सायं एवरूपो इद्धानुभावो’’ति ? अथ खो आयस्मतो महाकस्सपस्स एतदहोसि – ‘‘सक्‍को खो अयं देवानमिन्दो’’ति। इति विदित्वा सक्‍कं देवानमिन्दं एतदवोच – ‘‘कतं खो ते इदं, कोसिय; मा ⁶ पुनपि एवरूपमकासी’’ति। ‘‘अम्हाकम्पि, भन्ते कस्सप, पुञ्‍ञेन अत्थो; अम्हाकम्पि पुञ्‍ञेन करणीय’’न्ति।

Tena kho pana samayena sakko devānamindo āyasmato mahākassapassa piṇḍapātaṃ dātukāmo hoti. Pesakāravaṇṇaṃ abhinimminitvā tantaṃ vināti. Sujā ⁷ asurakaññā tasaraṃ pūreti. Atha kho āyasmā mahākassapo rājagahe sapadānaṃ piṇḍāya caramāno yena sakkassa devānamindassa nivesanaṃ tenupasaṅkami. Addasā kho sakko devānamindo āyasmantaṃ mahākassapaṃ dūratova āgacchantaṃ. Disvāna gharā nikkhamitvā paccugantvā hatthato pattaṃ gahetvā gharaṃ pavisitvā ⁸ ghaṭiyā odanaṃ uddharitvā pattaṃ pūretvā āyasmato mahākassapassa adāsi. So ahosi piṇḍapāto anekasūpo anekabyañjano anekarasabyañjano ⁹. Atha kho āyasmato mahākassapassa etadahosi – ‘‘ko nu kho ayaṃ satto yassāyaṃ evarūpo iddhānubhāvo’’ti ? Atha kho āyasmato mahākassapassa etadahosi – ‘‘sakko kho ayaṃ devānamindo’’ti. Iti viditvā sakkaṃ devānamindaṃ etadavoca – ‘‘kataṃ kho te idaṃ, kosiya; mā ¹⁰ punapi evarūpamakāsī’’ti. ‘‘Amhākampi, bhante kassapa, puññena attho; amhākampi puññena karaṇīya’’nti.

अथ खो सक्‍को देवानमिन्दो आयस्मन्तं महाकस्सपं अभिवादेत्वा पदक्खिणं कत्वा वेहासं अब्भुग्गन्त्वा आकासे अन्तलिक्खे तिक्खत्तुं उदानं उदानेसि – ‘‘अहो दानं परमदानं ¹¹ कस्सपे सुप्पतिट्ठितं! अहो दानं परमदानं कस्सपे सुप्पतिट्ठितं!! अहो दानं परमदानं कस्सपे सुप्पतिट्ठित’’न्ति!!! अस्सोसि खो भगवा दिब्बाय सोतधातुया विसुद्धाय अतिक्‍कन्तमानुसिकाय सक्‍कस्स देवानमिन्दस्स वेहासं अब्भुग्गन्त्वा आकासे अन्तलिक्खे तिक्खत्तुं उदानं उदानेन्तस्स – ‘‘अहो दानं परमदानं कस्सपे सुप्पतिट्ठितं! अहो दानं परमदानं कस्सपे सुप्पतिट्ठितं!! अहो दानं परमदानं कस्सपे सुप्पतिट्ठित’’न्ति!!!

Atha kho sakko devānamindo āyasmantaṃ mahākassapaṃ abhivādetvā padakkhiṇaṃ katvā vehāsaṃ abbhuggantvā ākāse antalikkhe tikkhattuṃ udānaṃ udānesi – ‘‘aho dānaṃ paramadānaṃ ¹² kassape suppatiṭṭhitaṃ! Aho dānaṃ paramadānaṃ kassape suppatiṭṭhitaṃ!! Aho dānaṃ paramadānaṃ kassape suppatiṭṭhita’’nti!!! Assosi kho bhagavā dibbāya sotadhātuyā visuddhāya atikkantamānusikāya sakkassa devānamindassa vehāsaṃ abbhuggantvā ākāse antalikkhe tikkhattuṃ udānaṃ udānentassa – ‘‘aho dānaṃ paramadānaṃ kassape suppatiṭṭhitaṃ! Aho dānaṃ paramadānaṃ kassape suppatiṭṭhitaṃ!! Aho dānaṃ paramadānaṃ kassape suppatiṭṭhita’’nti!!!

अथ खो भगवा एतमत्थं विदित्वा तायं वेलायं इमं उदानं उदानेसि –

Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –

‘‘पिण्डपातिकस्स भिक्खुनो,

‘‘Piṇḍapātikassa bhikkhuno,

अत्तभरस्स अनञ्‍ञपोसिनो।

Attabharassa anaññaposino;

देवा पिहयन्ति तादिनो,

Devā pihayanti tādino,

उपसन्तस्स सदा सतीमतो’’ति॥ सत्तमं।

Upasantassa sadā satīmato’’ti. sattamaṃ;

Next: ८. पिण्डपातिकसुत्तं • 8. Piṇḍapātikasuttaṃ

Footnotes:

1. निसिन्‍नो अञ्‍ञतरं (स्या॰ क॰)

2. nisinno aññataraṃ (syā. ka.)

3. सुजाता (स्या॰ पी॰ क॰)

4. पविसेत्वा (क॰)

5. अनेकसूपरसब्यञ्‍जनो (सी॰ पी॰)

6. मास्सु (सी॰ स्या॰)

7. sujātā (syā. pī. ka.)

8. pavisetvā (ka.)

9. anekasūparasabyañjano (sī. pī.)

10. māssu (sī. syā.)

11. परमं दानं (पी॰ क॰)

12. paramaṃ dānaṃ (pī. ka.)

Related texts:

अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / उदान-अट्ठकथा • Udāna-aṭṭhakathā / ७. सक्‍कुदानसुत्तवण्णना • 7. Sakkudānasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact