| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
9. ஸாலபுப்ப²தா³யகத்தே²ரஅபதா³னவண்ணனா
9. Sālapupphadāyakattheraapadānavaṇṇanā
மிக³ராஜா ததா³ ஆஸிந்திஆதி³கங் ஆயஸ்மதோ ஸாலபுப்ப²தா³யகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே கதகுஸலஸஞ்சயோ கேனசி கம்மச்சி²த்³தே³ன ஹிமவந்தே ஸீஹயோனியங் நிப்³ப³த்தோ அனேகஸீஹபரிவாரோ விஹாஸி. ததா³ ஸிகீ² ப⁴க³வா தஸ்ஸானுகம்பாய ஹிமவந்தங் அக³மாஸி. ஸீஹோ தங் உபக³தங் தி³ஸ்வா பஸன்னமானஸோ ஸாகா²ப⁴ங்கே³ன ஸகண்ணிகஸாலபுப்ப²ங் க³ஹெத்வா பூஜேஸி. ப⁴க³வா தஸ்ஸ அனுமோத³னங் அகாஸி.
Migarājātadā āsintiādikaṃ āyasmato sālapupphadāyakattherassa apadānaṃ. Ayampi purimabuddhesu katādhikāro tattha tattha bhave katakusalasañcayo kenaci kammacchiddena himavante sīhayoniyaṃ nibbatto anekasīhaparivāro vihāsi. Tadā sikhī bhagavā tassānukampāya himavantaṃ agamāsi. Sīho taṃ upagataṃ disvā pasannamānaso sākhābhaṅgena sakaṇṇikasālapupphaṃ gahetvā pūjesi. Bhagavā tassa anumodanaṃ akāsi.
60. ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ உப⁴யஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ விஞ்ஞுதங் பத்வா ஸத்த²ரி பஸன்னோ பப்³ப³ஜித்வா அரஹத்தங் பத்தோ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ மிக³ராஜா ததா³ ஆஸிந்திஆதி³மாஹ. தத்த² மரணங் க³ச்ச²ந்தீதி மிகா³, அத² வா கா⁴ஸங் மக்³க³ந்தி க³வேஸந்தீதி மிகா³, மிகா³னங் ராஜா மிக³ராஜா. ஸகலசதுப்பதா³னங் ராஜபா⁴வே ஸதிபி கா³தா²ப³ந்த⁴ஸுக²த்த²ங் மிகே³ ஆதி³ங் கத்வா மிக³ராஜாதி வுத்தங். யதா³ ப⁴க³வந்தங் தி³ஸ்வா ஸபுப்ப²ங் ஸாலஸாக²ங் ப⁴ஞ்ஜித்வா பூஜேஸிங், ததா³ அஹங் மிக³ராஜா அஹோஸிந்தி அத்தோ².
60. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde ekasmiṃ kulagehe nibbatto viññutaṃ patvā satthari pasanno pabbajitvā arahattaṃ patto attano pubbakammaṃ saritvā somanassajāto pubbacaritāpadānaṃ pakāsento migarājā tadā āsintiādimāha. Tattha maraṇaṃ gacchantīti migā, atha vā ghāsaṃ magganti gavesantīti migā, migānaṃ rājā migarājā. Sakalacatuppadānaṃ rājabhāve satipi gāthābandhasukhatthaṃ mige ādiṃ katvā migarājāti vuttaṃ. Yadā bhagavantaṃ disvā sapupphaṃ sālasākhaṃ bhañjitvā pūjesiṃ, tadā ahaṃ migarājā ahosinti attho.
62. ஸகோஸங் புப்ப²மாஹரிந்தி ஸகண்ணிகங் ஸாலபுப்ப²ங் ஆஹரிங் பூஜேஸிந்தி அத்தோ². ஸேஸங் உத்தானத்த²மேவாதி.
62.Sakosaṃ pupphamāharinti sakaṇṇikaṃ sālapupphaṃ āhariṃ pūjesinti attho. Sesaṃ uttānatthamevāti.
ஸாலபுப்ப²தா³யகத்தே²ரஅபதா³னவண்ணனா ஸமத்தா.
Sālapupphadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 9. ஸாலபுப்ப²தா³யகத்தே²ரஅபதா³னங் • 9. Sālapupphadāyakattheraapadānaṃ
