Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya

    ౪. సాలసుత్తం

    4. Sālasuttaṃ

    ౩౭౦. ఏకం సమయం భగవా కోసలేసు విహరతి సాలాయ బ్రాహ్మణగామే. తత్ర ఖో భగవా భిక్ఖూ ఆమన్తేసి…పే॰… ఏతదవోచ –

    370. Ekaṃ samayaṃ bhagavā kosalesu viharati sālāya brāhmaṇagāme. Tatra kho bhagavā bhikkhū āmantesi…pe… etadavoca –

    ‘‘యే తే, భిక్ఖవే, భిక్ఖూ నవా అచిరపబ్బజితా అధునాగతా ఇమం ధమ్మవినయం, తే వో, భిక్ఖవే, భిక్ఖూ చతున్నం సతిపట్ఠానానం భావనాయ సమాదపేతబ్బా నివేసేతబ్బా పతిట్ఠాపేతబ్బా. కతమేసం చతున్నం? ఏథ తుమ్హే, ఆవుసో, కాయే కాయానుపస్సినో విహరథ ఆతాపినో సమ్పజానా ఏకోదిభూతా విప్పసన్నచిత్తా సమాహితా ఏకగ్గచిత్తా, కాయస్స యథాభూతం ఞాణాయ; వేదనాసు వేదనానుపస్సినో విహరథ ఆతాపినో సమ్పజానా ఏకోదిభూతా విప్పసన్నచిత్తా సమాహితా ఏకగ్గచిత్తా, వేదనానం యథాభూతం ఞాణాయ; చిత్తే చిత్తానుపస్సినో విహరథ ఆతాపినో సమ్పజానా ఏకోదిభూతా విప్పసన్నచిత్తా సమాహితా ఏకగ్గచిత్తా, చిత్తస్స యథాభూతం ఞాణాయ; ధమ్మేసు ధమ్మానుపస్సినో విహరథ ఆతాపినో సమ్పజానా ఏకోదిభూతా విప్పసన్నచిత్తా సమాహితా ఏకగ్గచిత్తా, ధమ్మానం యథాభూతం ఞాణాయ. యేపి తే, భిక్ఖవే, భిక్ఖూ సేఖా అప్పత్తమానసా అనుత్తరం యోగక్ఖేమం పత్థయమానా విహరన్తి, తేపి కాయే కాయానుపస్సినో విహరన్తి ఆతాపినో సమ్పజానా ఏకోదిభూతా విప్పసన్నచిత్తా సమాహితా ఏకగ్గచిత్తా , కాయస్స పరిఞ్ఞాయ; వేదనాసు వేదనానుపస్సినో విహరన్తి ఆతాపినో సమ్పజానా ఏకోదిభూతా విప్పసన్నచిత్తా సమాహితా ఏకగ్గచిత్తా, వేదనానం పరిఞ్ఞాయ; చిత్తే చిత్తానుపస్సినో విహరన్తి ఆతాపినో సమ్పజానా ఏకోదిభూతా విప్పసన్నచిత్తా సమాహితా ఏకగ్గచిత్తా, చిత్తస్స పరిఞ్ఞాయ; ధమ్మేసు ధమ్మానుపస్సినో విహరన్తి ఆతాపినో సమ్పజానా ఏకోదిభూతా విప్పసన్నచిత్తా సమాహితా ఏకగ్గచిత్తా, ధమ్మానం పరిఞ్ఞాయ.

    ‘‘Ye te, bhikkhave, bhikkhū navā acirapabbajitā adhunāgatā imaṃ dhammavinayaṃ, te vo, bhikkhave, bhikkhū catunnaṃ satipaṭṭhānānaṃ bhāvanāya samādapetabbā nivesetabbā patiṭṭhāpetabbā. Katamesaṃ catunnaṃ? Etha tumhe, āvuso, kāye kāyānupassino viharatha ātāpino sampajānā ekodibhūtā vippasannacittā samāhitā ekaggacittā, kāyassa yathābhūtaṃ ñāṇāya; vedanāsu vedanānupassino viharatha ātāpino sampajānā ekodibhūtā vippasannacittā samāhitā ekaggacittā, vedanānaṃ yathābhūtaṃ ñāṇāya; citte cittānupassino viharatha ātāpino sampajānā ekodibhūtā vippasannacittā samāhitā ekaggacittā, cittassa yathābhūtaṃ ñāṇāya; dhammesu dhammānupassino viharatha ātāpino sampajānā ekodibhūtā vippasannacittā samāhitā ekaggacittā, dhammānaṃ yathābhūtaṃ ñāṇāya. Yepi te, bhikkhave, bhikkhū sekhā appattamānasā anuttaraṃ yogakkhemaṃ patthayamānā viharanti, tepi kāye kāyānupassino viharanti ātāpino sampajānā ekodibhūtā vippasannacittā samāhitā ekaggacittā , kāyassa pariññāya; vedanāsu vedanānupassino viharanti ātāpino sampajānā ekodibhūtā vippasannacittā samāhitā ekaggacittā, vedanānaṃ pariññāya; citte cittānupassino viharanti ātāpino sampajānā ekodibhūtā vippasannacittā samāhitā ekaggacittā, cittassa pariññāya; dhammesu dhammānupassino viharanti ātāpino sampajānā ekodibhūtā vippasannacittā samāhitā ekaggacittā, dhammānaṃ pariññāya.

    ‘‘యేపి తే, భిక్ఖవే, భిక్ఖూ అరహన్తో ఖీణాసవా వుసితవన్తో కతకరణీయా ఓహితభారా అనుప్పత్తసదత్థా పరిక్ఖీణభవసంయోజనా సమ్మదఞ్ఞా విముత్తా, తేపి కాయే కాయానుపస్సినో విహరన్తి ఆతాపినో సమ్పజానా ఏకోదిభూతా విప్పసన్నచిత్తా సమాహితా ఏకగ్గచిత్తా, కాయేన విసంయుత్తా; వేదనాసు వేదనానుపస్సినో విహరన్తి ఆతాపినో సమ్పజానా ఏకోదిభూతా విప్పసన్నచిత్తా సమాహితా ఏకగ్గచిత్తా, వేదనాహి విసంయుత్తా; చిత్తే చిత్తానుపస్సినో విహరన్తి ఆతాపినో సమ్పజానా ఏకోదిభూతా విప్పసన్నచిత్తా సమాహితా ఏకగ్గచిత్తా, చిత్తేన విసంయుత్తా; ధమ్మేసు ధమ్మానుపస్సినో విహరన్తి ఆతాపినో సమ్పజానా ఏకోదిభూతా విప్పసన్నచిత్తా సమాహితా ఏకగ్గచిత్తా, ధమ్మేహి విసంయుత్తా.

    ‘‘Yepi te, bhikkhave, bhikkhū arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaṃyojanā sammadaññā vimuttā, tepi kāye kāyānupassino viharanti ātāpino sampajānā ekodibhūtā vippasannacittā samāhitā ekaggacittā, kāyena visaṃyuttā; vedanāsu vedanānupassino viharanti ātāpino sampajānā ekodibhūtā vippasannacittā samāhitā ekaggacittā, vedanāhi visaṃyuttā; citte cittānupassino viharanti ātāpino sampajānā ekodibhūtā vippasannacittā samāhitā ekaggacittā, cittena visaṃyuttā; dhammesu dhammānupassino viharanti ātāpino sampajānā ekodibhūtā vippasannacittā samāhitā ekaggacittā, dhammehi visaṃyuttā.

    ‘‘యేపి తే, భిక్ఖవే, భిక్ఖూ నవా అచిరపబ్బజితా అధునాగతా ఇమం ధమ్మవినయం, తే వో, భిక్ఖవే, భిక్ఖూ ఇమేసం చతున్నం సతిపట్ఠానానం భావనాయ సమాదపేతబ్బా నివేసేతబ్బా పతిట్ఠాపేతబ్బా’’తి. చతుత్థం.

    ‘‘Yepi te, bhikkhave, bhikkhū navā acirapabbajitā adhunāgatā imaṃ dhammavinayaṃ, te vo, bhikkhave, bhikkhū imesaṃ catunnaṃ satipaṭṭhānānaṃ bhāvanāya samādapetabbā nivesetabbā patiṭṭhāpetabbā’’ti. Catutthaṃ.







    Related texts:



    అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౪. సాలసుత్తవణ్ణనా • 4. Sālasuttavaṇṇanā

    టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౪. సాలసుత్తవణ్ణనా • 4. Sālasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact