| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၆. သူကရခတဝဂ္ဂော
6. Sūkarakhatavaggo
၁. သာလသုတ္တံ
1. Sālasuttaṃ
၅၂၁. ဧဝံ မေ သုတံ – ဧကံ သမယံ ဘဂဝာ ကောသလေသု ဝိဟရတိ သာလာယ ဗ္ရာဟ္မဏဂာမေ။ တတ္ရ ခော ဘဂဝာ ဘိက္ခူ အာမန္တေသိ – ‘‘သေယ္ယထာပိ, ဘိက္ခဝေ, ယေ ကေစိ တိရစ္ဆာနဂတာ ပာဏာ, သီဟော မိဂရာဇာ တေသံ အဂ္ဂမက္ခာယတိ, ယဒိဒံ – ထာမေန ဇဝေန သူရေန 1; ဧဝမေဝ ခော, ဘိက္ခဝေ, ယေ ကေစိ ဗောဓိပက္ခိယာ ဓမ္မာ, ပညိန္ဒ္ရိယံ တေသံ အဂ္ဂမက္ခာယတိ, ယဒိဒံ – ဗောဓာယ’’။
521. Evaṃ me sutaṃ – ekaṃ samayaṃ bhagavā kosalesu viharati sālāya brāhmaṇagāme. Tatra kho bhagavā bhikkhū āmantesi – ‘‘seyyathāpi, bhikkhave, ye keci tiracchānagatā pāṇā, sīho migarājā tesaṃ aggamakkhāyati, yadidaṃ – thāmena javena sūrena 2; evameva kho, bhikkhave, ye keci bodhipakkhiyā dhammā, paññindriyaṃ tesaṃ aggamakkhāyati, yadidaṃ – bodhāya’’.
‘‘ကတမေ စ, ဘိက္ခဝေ, ဗောဓိပက္ခိယာ ဓမ္မာ? သဒ္ဓိန္ဒ္ရိယံ, ဘိက္ခဝေ, ဗောဓိပက္ခိယော ဓမ္မော, တံ ဗောဓာယ သံဝတ္တတိ; ဝီရိယိန္ဒ္ရိယံ ဗောဓိပက္ခိယော ဓမ္မော, တံ ဗောဓာယ သံဝတ္တတိ; သတိန္ဒ္ရိယံ ဗောဓိပက္ခိယော ဓမ္မော, တံ ဗောဓာယ သံဝတ္တတိ; သမာဓိန္ဒ္ရိယံ ဗောဓိပက္ခိယော ဓမ္မော, တံ ဗောဓာယ သံဝတ္တတိ; ပညိန္ဒ္ရိယံ ဗောဓိပက္ခိယော ဓမ္မော, တံ ဗောဓာယ သံဝတ္တတိ။ သေယ္ယထာပိ , ဘိက္ခဝေ, ယေ ကေစိ တိရစ္ဆာနဂတာ ပာဏာ, သီဟော မိဂရာဇာ တေသံ အဂ္ဂမက္ခာယတိ, ယဒိဒံ – ထာမေန ဇဝေန သူရေန; ဧဝမေဝ ခော, ဘိက္ခဝေ, ယေ ကေစိ ဗောဓိပက္ခိယာ ဓမ္မာ, ပညိန္ဒ္ရိယံ တေသံ အဂ္ဂမက္ခာယတိ, ယဒိဒံ – ဗောဓာယာ’’တိ။ ပဌမံ။
‘‘Katame ca, bhikkhave, bodhipakkhiyā dhammā? Saddhindriyaṃ, bhikkhave, bodhipakkhiyo dhammo, taṃ bodhāya saṃvattati; vīriyindriyaṃ bodhipakkhiyo dhammo, taṃ bodhāya saṃvattati; satindriyaṃ bodhipakkhiyo dhammo, taṃ bodhāya saṃvattati; samādhindriyaṃ bodhipakkhiyo dhammo, taṃ bodhāya saṃvattati; paññindriyaṃ bodhipakkhiyo dhammo, taṃ bodhāya saṃvattati. Seyyathāpi , bhikkhave, ye keci tiracchānagatā pāṇā, sīho migarājā tesaṃ aggamakkhāyati, yadidaṃ – thāmena javena sūrena; evameva kho, bhikkhave, ye keci bodhipakkhiyā dhammā, paññindriyaṃ tesaṃ aggamakkhāyati, yadidaṃ – bodhāyā’’ti. Paṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. သာလသုတ္တဝဏ္ဏနာ • 1. Sālasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. သာလသုတ္တဝဏ္ဏနာ • 1. Sālasuttavaṇṇanā
