| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၆. သာဠ္ဟသုတ္တဝဏ္ဏနာ
6. Sāḷhasuttavaṇṇanā
၁၉၆. ဆဋ္ဌေ ဒ္ဝယေနာတိ ဒ္ဝီဟိ ကောဋ္ဌာသေဟိ။ ဩဃသ္သ နိတ္ထရဏန္တိ စတုရောဃနိတ္ထရဏံ။ တပောဇိဂုစ္ဆာဟေတူတိ ဒုက္ကရကာရိကသင္ခာတေန တပေန ပာပဇိဂုစ္ဆနဟေတု ။ အညတရံ သာမညင္ဂန္တိ ဧကံ သမဏဓမ္မကောဋ္ဌာသံ။ အပရိသုဒ္ဓကာယသမာစာရာတိအာဒီသု ပုရိမေဟိ တီဟိ ပဒေဟိ ကာယိကဝာစသိကစေတသိကသီလာနံ အပရိသုဒ္ဓတံ ဒသ္သေတ္ဝာ ပစ္ဆိမေန ပဒေန အပရိသုဒ္ဓာဇီဝတံ ဒသ္သေတိ။ ဉာဏဒသ္သနာယာတိ မဂ္ဂဉာဏသင္ခာတာယ ဒသ္သနာယ။ အနုတ္တရာယ သမ္ဗောဓာယာတိ အရဟတ္တာယ, အရဟတ္တဉာဏဖသ္သေန ဖုသိတုံ အဘဗ္ဗာတိ ဝုတ္တံ ဟောတိ။ သာလလဋ္ဌိန္တိ သာလရုက္ခံ။ နဝန္တိ တရုဏံ။ အကုက္ကုစ္စကဇာတန္တိ ‘‘ဘဝေယ္ယ နု ခော, န ဘဝေယ္ယာ’’တိ အဇနေတဗ္ဗကုက္ကုစ္စံ။ လေခဏိယာ လိခေယ္ယာတိ အဝလေခနမတ္တကေန အဝလိခေယ္ယ။ ဓောဝေယ္ယာတိ ဃံသေယ္ယ။ အန္တော အဝိသုဒ္ဓာတိ အဗ္ဘန္တရေ အသုဒ္ဓာ အပနီတသာရာ။
196. Chaṭṭhe dvayenāti dvīhi koṭṭhāsehi. Oghassanittharaṇanti caturoghanittharaṇaṃ. Tapojigucchāhetūti dukkarakārikasaṅkhātena tapena pāpajigucchanahetu . Aññataraṃ sāmaññaṅganti ekaṃ samaṇadhammakoṭṭhāsaṃ. Aparisuddhakāyasamācārātiādīsu purimehi tīhi padehi kāyikavācasikacetasikasīlānaṃ aparisuddhataṃ dassetvā pacchimena padena aparisuddhājīvataṃ dasseti. Ñāṇadassanāyāti maggañāṇasaṅkhātāya dassanāya. Anuttarāya sambodhāyāti arahattāya, arahattañāṇaphassena phusituṃ abhabbāti vuttaṃ hoti. Sālalaṭṭhinti sālarukkhaṃ. Navanti taruṇaṃ. Akukkuccakajātanti ‘‘bhaveyya nu kho, na bhaveyyā’’ti ajanetabbakukkuccaṃ. Lekhaṇiyā likheyyāti avalekhanamattakena avalikheyya. Dhoveyyāti ghaṃseyya. Anto avisuddhāti abbhantare asuddhā apanītasārā.
ဧဝမေဝ ခောတိ ဧတ္ထ ဣဒံ ဩပမ္မသံသန္ဒနံ – သာလလဋ္ဌိ ဝိယ ဟိ အတ္တဘာဝော ဒဋ္ဌဗ္ဗော, နဒီသောတံ ဝိယ သံသာရသောတံ, ပာရံ ဂန္တုကာမပုရိသော ဝိယ ဒ္ဝာသဋ္ဌိ ဒိဋ္ဌိယော ဂဟေတ္ဝာ ဌိတပုရိသော, သာလလဋ္ဌိယာ ဗဟိဒ္ဓာ သုပရိကမ္မကတကာလော ဝိယ ဗဟိဒ္ဓာ တပစရဏံ ဂာဠ္ဟံ ကတ္ဝာ ဂဟိတကာလော, အန္တော အသုဒ္ဓကာလော ဝိယ အဗ္ဘန္တရေ သီလာနံ အပရိသုဒ္ဓကာလော, သာလလဋ္ဌိယာ သံသီဒိတ္ဝာ အဓောဂမနံ ဝိယ ဒိဋ္ဌိဂတိကသ္သ သံသာရသောတေ သံသီဒနံ ဝေဒိတဗ္ဗံ။
Evameva khoti ettha idaṃ opammasaṃsandanaṃ – sālalaṭṭhi viya hi attabhāvo daṭṭhabbo, nadīsotaṃ viya saṃsārasotaṃ, pāraṃ gantukāmapuriso viya dvāsaṭṭhi diṭṭhiyo gahetvā ṭhitapuriso, sālalaṭṭhiyā bahiddhā suparikammakatakālo viya bahiddhā tapacaraṇaṃ gāḷhaṃ katvā gahitakālo, anto asuddhakālo viya abbhantare sīlānaṃ aparisuddhakālo, sālalaṭṭhiyā saṃsīditvā adhogamanaṃ viya diṭṭhigatikassa saṃsārasote saṃsīdanaṃ veditabbaṃ.
ဖိယာရိတ္တံ ဗန္ဓေယ္ယာတိ ဖိယဉ္စ အရိတ္တဉ္စ ယောဇေယ္ယ။ ဧဝမေဝာတိ ဧတ္ထာပိ ဣဒံ ဩပမ္မသံသန္ဒနံ – သာလလဋ္ဌိ ဝိယ အတ္တဘာဝော, နဒီသောတံ ဝိယ သံသာရသောတံ, ပာရံ ဂန္တုကာမပုရိသော ဝိယ ယောဂာဝစရော, ဗဟိဒ္ဓာ သုပရိကမ္မကတကာလော ဝိယ ဆသု ဒ္ဝာရေသု သံဝရသ္သ ပစ္စုပဋ္ဌိတကာလော, အန္တော သုဝိသောဓိတဘာဝော ဝိယ အဗ္ဘန္တရေ ပရိသုဒ္ဓသီလဘာဝော, ဖိယာရိတ္တဗန္ဓနံ ဝိယ ကာယိကစေတသိကဝီရိယကရဏံ, သောတ္ထိနာ ပာရိမတီရဂမနံ ဝိယ အနုပုဗ္ဗေန သီလံ ပူရေတ္ဝာ သမာဓိံ ပူရေတ္ဝာ ပညံ ပူရေတ္ဝာ နိဗ္ဗာနဂမနံ ဒဋ္ဌဗ္ဗံ။
Phiyārittaṃ bandheyyāti phiyañca arittañca yojeyya. Evamevāti etthāpi idaṃ opammasaṃsandanaṃ – sālalaṭṭhi viya attabhāvo, nadīsotaṃ viya saṃsārasotaṃ, pāraṃ gantukāmapuriso viya yogāvacaro, bahiddhā suparikammakatakālo viya chasu dvāresu saṃvarassa paccupaṭṭhitakālo, anto suvisodhitabhāvo viya abbhantare parisuddhasīlabhāvo, phiyārittabandhanaṃ viya kāyikacetasikavīriyakaraṇaṃ, sotthinā pārimatīragamanaṃ viya anupubbena sīlaṃ pūretvā samādhiṃ pūretvā paññaṃ pūretvā nibbānagamanaṃ daṭṭhabbaṃ.
ကဏ္ဍစိတ္ရကာနီတိ သရလဋ္ဌိသရရဇ္ဇုသရပာသာဒသရသာဏိသရပောက္ခရဏိသရပဒုမာနီတိ အနေကာနိ ကဏ္ဍေဟိ ကတ္တဗ္ဗစိတ္ရာနိ။ အထ ခော သော တီဟိ ဌာနေဟီတိ သော ဧဝံ ဗဟူနိ ကဏ္ဍစိတ္ရကာနိ ဇာနန္တောပိ န ရာဇာရဟော ဟောတိ, တီဟိယေဝ ပန ဌာနေဟိ ဟောတီတိ အတ္ထော။ သမ္မာသမာဓိ ဟောတီတိ မဂ္ဂသမာဓိနာ စ ဖလသမာဓိနာ စ သမာဟိတော ဟောတီတိ အယမေတ္ထ အတ္ထော။ သမ္မာဒိဋ္ဌီတိ မဂ္ဂသမ္မာဒိဋ္ဌိယာ သမန္နာဂတော။ ဣဒံ ဒုက္ခန္တိအာဒီဟိ စတူဟိ သစ္စေဟိ စတ္တာရော မဂ္ဂာ တီဏိ စ ဖလာနိ ကထိတာနိ။ အယံ ပန မဂ္ဂေနေဝ အဝိရာဓိတံ ဝိဇ္ဈတိ နာမာတိ ဝေဒိတဗ္ဗော။ သမ္မာဝိမုတ္တီတိ အရဟတ္တဖလဝိမုတ္တိယာ သမန္နာဂတော။ အဝိဇ္ဇာက္ခန္ဓံ ပဒာလေတီတိ အရဟတ္တမဂ္ဂေန ပဒာလေတိ နာမာတိ ဝုစ္စတိ။ ဣမိနာ ဟိ ဟေဋ္ဌာ အရဟတ္တမဂ္ဂေန အဝိဇ္ဇာက္ခန္ဓော ပဒာလိတော , ဣဓ ပန ပဒာလိတံ ဥပာဒာယ ပဒာလေတီတိ ဝတ္တုံ ဝဋ္ဋတီတိ။
Kaṇḍacitrakānīti saralaṭṭhisararajjusarapāsādasarasāṇisarapokkharaṇisarapadumānīti anekāni kaṇḍehi kattabbacitrāni. Atha kho so tīhi ṭhānehīti so evaṃ bahūni kaṇḍacitrakāni jānantopi na rājāraho hoti, tīhiyeva pana ṭhānehi hotīti attho. Sammāsamādhihotīti maggasamādhinā ca phalasamādhinā ca samāhito hotīti ayamettha attho. Sammādiṭṭhīti maggasammādiṭṭhiyā samannāgato. Idaṃ dukkhantiādīhi catūhi saccehi cattāro maggā tīṇi ca phalāni kathitāni. Ayaṃ pana maggeneva avirādhitaṃ vijjhati nāmāti veditabbo. Sammāvimuttīti arahattaphalavimuttiyā samannāgato. Avijjākkhandhaṃ padāletīti arahattamaggena padāleti nāmāti vuccati. Iminā hi heṭṭhā arahattamaggena avijjākkhandho padālito , idha pana padālitaṃ upādāya padāletīti vattuṃ vaṭṭatīti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၆. သာဠ္ဟသုတ္တံ • 6. Sāḷhasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၆. သာဠ္ဟသုတ္တဝဏ္ဏနာ • 6. Sāḷhasuttavaṇṇanā
