| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೬. ಸಲ್ಲಸುತ್ತವಣ್ಣನಾ
6. Sallasuttavaṇṇanā
೨೫೪. ದ್ವೀಸು ಜನೇಸೂತಿ ಸುತವನ್ತಅಸ್ಸುತವನ್ತೇಸು ದ್ವೀಸು ಜನೇಸು। ಅನುಗತವೇಧನ್ತಿ ಪುಬ್ಬೇ ಪವತ್ತವೇಧಸ್ಸ ಅನುಗತವೇಧಂ। ಬಲವತರಾ ದಿಗುಣಾ ವಿಯ ಹುತ್ವಾ ದಳ್ಹತರಪವತ್ತಿಯಾ। ಏವಮೇವಾತಿ ಯಥಾ ವಿದ್ಧಸ್ಸ ಪುರಿಸಸ್ಸ ಅನುವೇಧನಾ ಬಲವತರಾ, ಏವಮೇವ। ಸಮಾಧಿಮಗ್ಗಫಲಾನಿ ನಿಸ್ಸರಣಂ ವಿಕ್ಖಮ್ಭನಸಮುಚ್ಛೇದಪಟಿಪ್ಪಸ್ಸದ್ಧಿವಸೇನ। ಸಮಾಧಿಸೀಸೇನ ಹೇತ್ಥ ಝಾನಞ್ಚ ಗಹಿತಂ। ಸೋ ನ ಜಾನಾತಿ ಅನಧಿಗತತ್ತಾ। ನಿಸ್ಸರಣನ್ತಿ ಜಾನಾತಿ ಅನಿಸ್ಸರಣಮೇವ। ತಾಸಂ ಸಮಧಿಗತಾನಂ ಸುಖದುಕ್ಖವೇದನಾನಂ। ನ ವಿಪ್ಪಯುತ್ತೋ ಅಪ್ಪಹೀನಕಿಲೇಸತ್ತಾ। ಸಙ್ಖಾತಧಮ್ಮಸ್ಸಾತಿ ಸಙ್ಖಾಯ ಪಞ್ಞಾಯ ಪರಿಞ್ಞಾತಚತುಕ್ಖನ್ಧಸ್ಸ। ತೇನಾಹ ‘‘ತುಲಿತಧಮ್ಮಸ್ಸಾ’’ತಿ। ಇಮಸ್ಮಿಮ್ಪಿ ಸುತ್ತೇ ಪುರಿಮಸುತ್ತೇ ವಿಯ ಆರಮ್ಮಣಾನುಸಯೋವ ಕಥಿತೋ, ಸೋ ಪನ ತತ್ಥ ವುತ್ತನಯೇನೇವ ವೇದಿತಬ್ಬೋ। ಅನುರೋಧವಿರೋಧಪಹಾನಸ್ಸ ವುತ್ತತ್ತಾ ಖೀಣಾಸವೋ ಧುರಂ। ಅನಾಗಾಮೀಪಿ ವಟ್ಟತಿ, ತಸ್ಸ ವಿರೋಧಪ್ಪಹಾನಂ ಲಬ್ಭತಿ।
254.Dvīsu janesūti sutavantaassutavantesu dvīsu janesu. Anugatavedhanti pubbe pavattavedhassa anugatavedhaṃ. Balavatarā diguṇā viya hutvā daḷhatarapavattiyā. Evamevāti yathā viddhassa purisassa anuvedhanā balavatarā, evameva. Samādhimaggaphalāni nissaraṇaṃ vikkhambhanasamucchedapaṭippassaddhivasena. Samādhisīsena hettha jhānañca gahitaṃ. So na jānāti anadhigatattā. Nissaraṇanti jānāti anissaraṇameva. Tāsaṃ samadhigatānaṃ sukhadukkhavedanānaṃ. Na vippayutto appahīnakilesattā. Saṅkhātadhammassāti saṅkhāya paññāya pariññātacatukkhandhassa. Tenāha ‘‘tulitadhammassā’’ti. Imasmimpi sutte purimasutte viya ārammaṇānusayova kathito, so pana tattha vuttanayeneva veditabbo. Anurodhavirodhapahānassa vuttattā khīṇāsavo dhuraṃ. Anāgāmīpi vaṭṭati, tassa virodhappahānaṃ labbhati.
ಸಲ್ಲಸುತ್ತವಣ್ಣನಾ ನಿಟ್ಠಿತಾ।
Sallasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೬. ಸಲ್ಲಸುತ್ತಂ • 6. Sallasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೬. ಸಲ್ಲಸುತ್ತವಣ್ಣನಾ • 6. Sallasuttavaṇṇanā
