| Library / Tipiṭaka / д̇ибидага • Tipiṭaka / маж̇жхиманигааяа (дийгаа) • Majjhimanikāya (ṭīkā) |
8. саллзкасуд̇д̇аван̣н̣анаа
8. Sallekhasuttavaṇṇanā
81. ‘‘жунд̣̇о’’д̇и д̇асса махаат̇зрасса наамам̣, бууж̇аавасзна бана махаажунд̣̇од̇и вужжад̇и яат̇аа ‘‘махаамог̇г̇аллаано’’д̇и. ад̇д̇ано ваа жунд̣̇ам̣ наама бхааг̇инзяяад̇т̇зрам̣ убаад̣̇ааяа ааяасмад̇о саарибуд̇д̇ад̇т̇зрасса бхаад̇аа аяам̣ махаат̇зро ‘‘махаажунд̣̇о’’д̇и бан̃н̃ааяид̇т̇а яат̇аа ‘‘махаабант̇аго’’д̇и. сааяанхасамаяанд̇и бхуммад̇т̇з згам̣ убаяог̇аважананд̇и ааха ‘‘сааяанхагаалз’’д̇и. на хзд̇т̇а ажжанд̇а сам̣яог̇о самбхавад̇ийд̇и. сад̇д̇асан̇каарзхийд̇и сад̣̇д̇хивихааригаанд̇зваасигаубаасагаад̣̇исад̇д̇зхи жзва руубаарамман̣аад̣̇исан̇каарзхи жа. бадинивад̇д̇ид̇ваад̇и абасаггид̇ваа. нилийяананд̇и вивзжанам̣ гааяажид̇д̇зхи д̇ад̇о вивид̇д̇ад̇аа. згийбхаавод̇и хи гааяавивзгамааха, бавивзгод̇и жид̇д̇авивзгам̣. д̇ад̇о вудтид̇од̇и д̇ад̇о д̣̇увид̇хавивзгад̇о бхаван̇г̇уббад̇д̇ияаа, саб̣рахмажаарийхи самааг̇амзна жа абзд̇о. абхиваад̣̇аабзд̇ваад̇и абхиваад̣̇ам̣ гаарзд̇ваа. званд̇и яат̇аавуд̇д̇аабхиваад̣̇авасзна. баг̇г̇аяхаад̇и уннаамзд̇ваа. анубажчиннабхавамуулаанам̣ д̇аава звам̣ абхиваад̣̇о ход̇у, ужчиннабхавамуулаанам̣ гимад̇т̇ияод̇и ааха ‘‘зд̇ам̣ аажин̣н̣ам̣ д̇ат̇ааг̇ад̇аана’’нд̇и. д̇зна на д̇ат̇ааг̇ад̇аа самбарааяигам̣язва сад̇д̇аанам̣ сукам̣ аасийсанд̇и, ат̇а ко д̣̇идтад̇хаммигамбийд̇и д̣̇адтаб̣б̣ам̣. гасмаа звам̣ д̇ат̇ааг̇ад̇аа абхивад̣̇анд̇ийд̇и д̇ад̇т̇а гааран̣амааха ‘‘сукагаамаа хий’’д̇иаад̣̇и. бут̇угааяаад̇и б̣ахуу сад̇д̇агааяаа. яагкаад̇и д̣̇зваа. д̇з хи бууж̇анийяад̇ааяа ‘‘яагкаа’’д̇и вужжанд̇и. абхивад̣̇анд̇ийд̇и аасийсид̇амзвад̇т̇ам̣ н̃аан̣агарун̣аахи абхимукам̣ гад̇ваа вад̣̇анд̇и.
81. ‘‘Cundo’’ti tassa mahātherassa nāmaṃ, pūjāvasena pana mahācundoti vuccati yathā ‘‘mahāmoggallāno’’ti. Attano vā cundaṃ nāma bhāgineyyattheraṃ upādāya āyasmato sāriputtattherassa bhātā ayaṃ mahāthero ‘‘mahācundo’’ti paññāyittha yathā ‘‘mahāpanthako’’ti. Sāyanhasamayanti bhummatthe ekaṃ upayogavacananti āha ‘‘sāyanhakāle’’ti. Na hettha accanta saṃyogo sambhavatīti. Sattasaṅkhārehīti saddhivihārikaantevāsikaupāsakādisattehi ceva rūpārammaṇādisaṅkhārehi ca. Paṭinivattitvāti apasakkitvā. Nilīyananti vivecanaṃ kāyacittehi tato vivittatā. Ekībhāvoti hi kāyavivekamāha, pavivekoti cittavivekaṃ. Tato vuṭṭhitoti tato duvidhavivekato bhavaṅguppattiyā, sabrahmacārīhi samāgamena ca apeto. Abhivādāpetvāti abhivādaṃ kāretvā. Evanti yathāvuttaabhivādavasena. Paggayhāti unnāmetvā. Anupacchinnabhavamūlānaṃ tāva evaṃ abhivādo hotu, ucchinnabhavamūlānaṃ kimatthiyoti āha ‘‘etaṃ āciṇṇaṃ tathāgatāna’’nti. Tena na tathāgatā samparāyikaṃyeva sattānaṃ sukhaṃ āsīsanti, atha kho diṭṭhadhammikampīti daṭṭhabbaṃ. Kasmā evaṃ tathāgatā abhivadantīti tattha kāraṇamāha ‘‘sukhakāmā hī’’tiādi. Puthukāyāti bahū sattakāyā. Yakkhāti devā. Te hi pūjanīyatāya ‘‘yakkhā’’ti vuccanti. Abhivadantīti āsīsitamevatthaṃ ñāṇakaruṇāhi abhimukhaṃ katvā vadanti.
яаад̇и анияамад̇о г̇ахид̇аа нияамад̇о д̣̇ассзнд̇о ‘‘имаа’’д̇и ааха. имаад̇и жа аасаннабажжагкаважананд̇и ааха ‘‘абхимукам̣ гаронд̇о вияаа’’д̇и , д̇ам̣ д̇ам̣ д̣̇идтиг̇ад̇игам̣ жид̇д̇аг̇ад̇ам̣ саммукаа вияа гаронд̇од̇и ад̇т̇о. д̣̇идтияод̇и буримабад̣̇алобзна баал̣ияам̣ вуд̇д̇анд̇и д̣̇ассзнд̇о ‘‘мижчаад̣̇идтияо’’д̇и ааха. сад̇д̇зсу д̣̇идтиг̇ад̇ажид̇д̇уббаад̣̇зсу уббаж̇ж̇амаанаа, сад̇д̇зсу ваа висаяабхууд̇зсу аараб̣бха уббаж̇ж̇амаанаа ‘‘сад̇д̇зсу баад̇убхаванд̇ий’’д̇и вуд̇д̇аа. ад̇д̇аваад̣̇знаад̇и ад̇д̇аанам̣ аараб̣бха бавад̇д̇зна важанзна. бадисам̣яуд̇д̇аад̇и ‘‘ад̇т̇и ад̇д̇аа’’д̇и г̇аахз г̇аахан̣з жа висаяабхаавзна бадисам̣яуд̇д̇аа. д̣̇идтиг̇ад̇игзна д̣̇идтим̣ г̇ааханд̇зхи г̇ахан̣з г̇аахаабан̣з жа д̣̇идти д̣̇идтиваад̣̇асса висаяод̇и д̇зна бадисам̣яуд̇д̇аа наама ход̇и. ‘‘ад̇т̇и ад̇д̇аа’’д̇и звам̣ бавад̇д̇аа д̣̇идти ид̇ха ад̇д̇аваад̣̇абадисам̣яуд̇д̇аа, на д̇ассаа висаяабхууд̇о ад̇д̇аа. саа жа висаяабхаавад̇о д̇ат̇аабавад̇д̇зна ваад̣̇зна бадисам̣яуд̇д̇аа. логаваад̣̇аббадисам̣яуд̇д̇аад̇и зд̇т̇ааби зсзва наяо. вийсад̇и бхаванд̇и д̇ад̇о барам̣ ад̇д̇аваад̣̇авад̇т̇уно абхааваа . бан̃жаби хи убаад̣̇аанагканд̇хз бажжзгам̣ ‘‘ад̇д̇аа’’д̇и д̇з жа ад̇д̇ано ниссаяабхаавзна г̇ан̣хад̇о зд̇аасам̣ д̣̇идтийнам̣ самбхаво, д̇аб̣б̣инимуд̇д̇о банааяам̣ висаяо ад̇д̇аг̇г̇ахан̣аагааро жа над̇т̇ийд̇и. сассад̇о ад̇д̇аа жа лого жаад̇и руубаад̣̇ийсу ан̃н̃ад̇арам̣ ‘‘ад̇д̇аа’’д̇и, ‘‘лого’’д̇и ваа г̇ахзд̇ваа д̇ам̣ сассад̇о саб̣б̣агаалабхаавий нижжо д̇хувод̇и. яат̇ааха ‘‘руубий ад̇д̇аа жзва лого жа сассад̇о жаад̇и ад̇д̇аанан̃жа логан̃жа бан̃н̃абзд̇ий’’д̇иаад̣̇и. сассад̇од̇иаад̣̇ийсу батамо сассад̇аваад̣̇авасзна ад̇д̇аг̇г̇аахо, д̣̇уд̇ияо ужчзд̣̇аваад̣̇авасзна, д̇ад̇ияо згажжасассад̇аваад̣̇авасзна, жад̇уд̇т̇о д̇аггийваад̣̇авасзна бавад̇д̇о, амараавигкзбавасзна ваа бавад̇д̇о ад̇д̇аг̇г̇аахо. анд̇аваад̇и ад̇д̇ано барижчзд̣̇ад̇аавасзна. ананд̇аваад̇и абарижчзд̣̇ад̇аавасзна. анд̇аваа жа ананд̇аваа жаад̇и д̇ад̣̇убхаяавасзна, ид̇аро д̇аггийваад̣̇авасзна бавад̇д̇о ад̇д̇аг̇г̇аахо. звам̣ бавад̇д̇ад̇д̇аа адта хонд̇ийд̇и яож̇анаа.
Yāti aniyamato gahitā niyamato dassento ‘‘imā’’ti āha. Imāti ca āsannapaccakkhavacananti āha ‘‘abhimukhaṃ karontoviyā’’ti , taṃ taṃ diṭṭhigatikaṃ cittagataṃ sammukhā viya karontoti attho. Diṭṭhiyoti purimapadalopena pāḷiyaṃ vuttanti dassento ‘‘micchādiṭṭhiyo’’ti āha. Sattesu diṭṭhigatacittuppādesu uppajjamānā, sattesu vā visayabhūtesu ārabbha uppajjamānā ‘‘sattesu pātubhavantī’’ti vuttā. Attavādenāti attānaṃ ārabbha pavattena vacanena. Paṭisaṃyuttāti ‘‘atthi attā’’ti gāhe gāhaṇe ca visayabhāvena paṭisaṃyuttā. Diṭṭhigatikena diṭṭhiṃ gāhantehi gahaṇe gāhāpaṇe ca diṭṭhi diṭṭhivādassa visayoti tena paṭisaṃyuttā nāma hoti. ‘‘Atthi attā’’ti evaṃ pavattā diṭṭhi idha attavādapaṭisaṃyuttā, na tassā visayabhūto attā. Sā ca visayabhāvato tathāpavattena vādena paṭisaṃyuttā. Lokavādappaṭisaṃyuttāti etthāpi eseva nayo. Vīsati bhavanti tato paraṃ attavādavatthuno abhāvā . Pañcapi hi upādānakkhandhe paccekaṃ ‘‘attā’’ti te ca attano nissayabhāvena gaṇhato etāsaṃ diṭṭhīnaṃ sambhavo, tabbinimutto panāyaṃ visayo attaggahaṇākāro ca natthīti. Sassato attā ca loko cāti rūpādīsu aññataraṃ ‘‘attā’’ti, ‘‘loko’’ti vā gahetvā taṃ sassato sabbakālabhāvī nicco dhuvoti. Yathāha ‘‘rūpī attā ceva loko ca sassato cāti attānañca lokañca paññapetī’’tiādi. Sassatotiādīsu paṭhamo sassatavādavasena attaggāho, dutiyo ucchedavādavasena, tatiyo ekaccasassatavādavasena, catuttho takkīvādavasena pavatto, amarāvikkhepavasena vā pavatto attaggāho. Antavāti attano paricchedatāvasena. Anantavāti aparicchedatāvasena. Antavā ca anantavā cāti tadubhayavasena, itaro takkīvādavasena pavatto attaggāho. Evaṃ pavattattā aṭṭha hontīti yojanā.
аад̣̇имзваад̇и аад̣̇иманасигаарамзва. д̇ам̣ бана саруубад̇о д̣̇ассзнд̇о ‘‘вибассанаамиссагабатамаманасигаарамзваа’’д̇и ааха. аббад̇вааби сод̇аабад̇д̇имаг̇г̇анд̇и иминаа авад̇хааран̣зна нивад̇д̇ид̇ам̣ д̣̇ассзд̇и. наамаруубабарижчзд̣̇ад̇о бабхуд̇и яаава уд̣̇аяаб̣б̣аяад̣̇ассанам̣, аяам̣ ид̇ха аад̣̇иманасигаарод̇и ад̇хиббзд̇о бан̃н̃аабхааванааяа аарамбхабхаавад̇о. уд̣̇аяаб̣б̣аяаанубассанаасахид̇ад̇ааяа жасса вибассанаамиссагад̇аа важанам̣. званд̇и имасса ад̇т̇аважанам̣ ‘‘зд̇д̇агзнзва убааязнаа’’д̇и , яат̇аавуд̇д̇ааад̣̇иманасигаарзнаад̇и ад̇т̇о. зд̇аасанд̇и яат̇аавуд̇д̇аанам̣ ад̇д̇аваад̣̇алогаваад̣̇абадисам̣яуд̇д̇аанам̣ д̣̇идтийнам̣. гааман̃жа д̇аасам̣ д̇зна д̇ад̣̇ан̇г̇авасзна бахаанам̣ ход̇иязва, д̇ам̣ бана наад̇хиббзд̇ам̣, д̇асмаа самужчзд̣̇авасзна бахаанам̣ бадиниссаг̇г̇о жа ход̇ийд̇и бужчад̇и. саб̣б̣асо самужчиннасам̣яож̇анад̇ааяа анад̇химаанигоби самаано. ‘‘арияад̇хаммо ад̇хиг̇ад̇о’’д̇и маано ад̇химаано, со язсам̣ ад̇т̇и д̇з ад̇химаанигаа, д̇зсам̣ уд̣̇аяаб̣б̣аяан̃аан̣аад̇хиг̇амзна ад̇химаануббад̇д̇и д̇ад̣̇авасаано жа манасигаарод̇и ад̇хиббзд̇о. д̇зна д̣̇идтийнам̣ бахаанам̣ на ход̇ийд̇и гат̇аабанад̇т̇ам̣ аяам̣ бужчаад̇и ааха ‘‘ад̇химаанаббахаанад̇т̇ам̣ бужчад̇ий’’д̇и. ‘‘аад̣̇имзва ну ко…бз… бадиниссаг̇г̇о ход̇ий’’д̇и анабхисамзд̇аавий вияа вад̣̇анд̇о ад̇химаанз тид̇о вияа ход̇ийд̇и ааха ‘‘ад̇химааниго вияа худ̇ваа’’д̇и. сод̇и т̇зро. д̇зсам̣ ад̇т̇ааяаад̇и д̇зсам̣ ад̇д̇ано анд̇зваасигаанам̣ бхаг̇авад̇аа зд̇асса мижчааг̇аахасса вивзжанад̇т̇ааяа. т̇зро гира д̇хаммасзнаабад̇и вияа сад̣̇д̇хим̣ ад̇д̇ано анд̇зваасигзхи бхаг̇аванд̇ам̣ убасан̇гами.
Ādimevāti ādimanasikārameva. Taṃ pana sarūpato dassento ‘‘vipassanāmissakapaṭhamamanasikāramevā’’ti āha. Appatvāpi sotāpattimagganti iminā avadhāraṇena nivattitaṃ dasseti. Nāmarūpaparicchedato pabhuti yāva udayabbayadassanaṃ, ayaṃ idha ādimanasikāroti adhippeto paññābhāvanāya ārambhabhāvato. Udayabbayānupassanāsahitatāya cassa vipassanāmissakatā vacanaṃ. Evanti imassa atthavacanaṃ ‘‘ettakenevaupāyenā’’ti , yathāvuttaādimanasikārenāti attho. Etāsanti yathāvuttānaṃ attavādalokavādapaṭisaṃyuttānaṃ diṭṭhīnaṃ. Kāmañca tāsaṃ tena tadaṅgavasena pahānaṃ hotiyeva, taṃ pana nādhippetaṃ, tasmā samucchedavasena pahānaṃ paṭinissaggo ca hotīti pucchati. Sabbaso samucchinnasaṃyojanatāya anadhimānikopi samāno. ‘‘Ariyadhammo adhigato’’ti māno adhimāno, so yesaṃ atthi te adhimānikā, tesaṃ udayabbayañāṇādhigamena adhimānuppatti tadavasāno ca manasikāroti adhippeto. Tena diṭṭhīnaṃ pahānaṃ na hotīti kathāpanatthaṃ ayaṃ pucchāti āha ‘‘adhimānappahānatthaṃ pucchatī’’ti. ‘‘Ādimeva nu kho…pe… paṭinissaggo hotī’’ti anabhisametāvī viya vadanto adhimāne ṭhito viya hotīti āha ‘‘adhimāniko viya hutvā’’ti. Soti thero. Tesaṃ atthāyāti tesaṃ attano antevāsikānaṃ bhagavatā etassa micchāgāhassa vivecanatthāya. Thero kira dhammasenāpati viya saddhiṃ attano antevāsikehi bhagavantaṃ upasaṅkami.
82. яад̇т̇аад̇и висаяз бхуммам̣. д̣̇идтийнан̃хи аарамман̣анид̣̇ассанамзд̇анд̇и. яасмаа д̣̇идтийнам̣ анусаяанабхуумиби самуд̣̇аажаран̣адтаанамби канд̇хаа зва, д̇асмаа ааха ‘‘яад̇т̇а жзд̇аа д̣̇идтияо уббаж̇ж̇анд̇ий д̇иаад̣̇и бан̃жагканд̇хз санд̇хааяа вуд̇д̇а’’нд̇и. руубам̣ абхинивиссаад̇и ‘‘ид̣̇ам̣ руубам̣ мама ад̇д̇аа’’д̇и д̣̇идтаабхинивзсавасзна абхинивисид̇ваа аараб̣бха. абхинивисамаанаа зва хи д̣̇идти нам̣ аарамман̣ам̣ гад̇ваа уббаж̇ж̇ад̇и. ‘‘со ад̇д̇аа’’д̇иаад̣̇ийсу яад̣̇ид̣̇ам̣ жагкаад̣̇исан̇г̇ахам̣ руубам̣, сахаб̣уд̣̇д̇хиниб̣анд̇ханад̇ааяа со мз ад̇д̇аа, сукаасукам̣ зд̇т̇а логияад̇ийд̇и со лого. ‘‘созваахам̣ бзжжа баралогз бхависсаамийд̇и д̇ат̇аабхаавзна нижжо, т̇ирабхаавзна д̇хуво, саб̣б̣ад̣̇аабхаавид̇ааяа сассад̇о, ниб̣б̣игаарад̇ааяа авибарин̣аамад̇хаммод̇и ад̇т̇о. яад̣̇и бан̃жагканд̇хз санд̇хааяа вуд̇д̇ам̣, гат̇амзгаважананд̇и ааха ‘‘аарамман̣авасзнаа’’д̇иаад̣̇и. наанаа гарийяад̇и зд̇знаад̇и наанаагаран̣ам̣, висзсо. ж̇аад̇ивасзнаад̇и уббад̇д̇ивасзна. яз хи аниб̣б̣ад̇д̇абуб̣б̣аа самаанаавад̇т̇аа, д̇з уббаад̣̇асан̇каад̇авигаарасаман̇г̇ид̇ааяа уббаж̇ж̇анд̇ийд̇и саман̃н̃ам̣ лабханд̇и. д̇знааха ‘‘ж̇аад̇ивасзнаа’’д̇иаад̣̇и. бунаббунам̣ аасзвид̇аад̇и анаад̣̇имад̇и сам̣саарз абараабаруббад̇д̇ияаа лад̣̇д̇хаасзванаа. зд̇зна гилзсаанам̣ бхааванадтзна анусаяад̇т̇ам̣ висзсзд̇и . т̇аамаг̇ад̇аад̇и т̇аамабхаавам̣ убаг̇ад̇аа. зд̇зна анусаяз сабхаавад̇о д̣̇ассзд̇и. т̇аамаг̇амананд̇и жа гаамарааг̇аад̣̇ийнам̣ анан̃н̃асаад̇хааран̣о сабхааво. д̇ат̇аа хи вуд̇д̇ам̣ ‘‘т̇аамаг̇ад̇о анусаяз баж̇ахад̇ий’’д̇и (бади. ма. 3.21). аббадивинийд̇аад̇и самужчзд̣̇авинаяавасзна на бадивинийд̇аа. аббахийнаа хи т̇аамаг̇ад̇аа гилзсаа анусзнд̇ийд̇и вужжанд̇и. зд̇зна д̇зсам̣ гааран̣алаабхз сад̇и уббаж̇ж̇анаарахад̇ам̣ д̣̇ассзд̇и. самуд̣̇аажаранд̇ийд̇и абхибхаванд̇и. зд̇зна д̇зсам̣ вийд̇иггамаббад̇д̇ад̇ам̣ д̣̇ассзд̇и. уббаж̇ж̇анд̇ийд̇и бана иминаава барияудтаанаавад̇т̇аа д̣̇ассид̇аа.
82.Yatthāti visaye bhummaṃ. Diṭṭhīnañhi ārammaṇanidassanametanti. Yasmā diṭṭhīnaṃ anusayanabhūmipi samudācaraṇaṭṭhānampi khandhā eva, tasmā āha ‘‘yattha cetā diṭṭhiyo uppajjantī tiādi pañcakkhandhe sandhāya vutta’’nti. Rūpaṃ abhinivissāti ‘‘idaṃ rūpaṃ mama attā’’ti diṭṭhābhinivesavasena abhinivisitvā ārabbha. Abhinivisamānā eva hi diṭṭhi naṃ ārammaṇaṃ katvā uppajjati. ‘‘So attā’’tiādīsu yadidaṃ cakkhādisaṅgahaṃ rūpaṃ, sahabuddhinibandhanatāya so me attā, sukhāsukhaṃ ettha lokiyatīti so loko. ‘‘Soevāhaṃ pecca paraloke bhavissāmīti tathābhāvena nicco, thirabhāvena dhuvo, sabbadābhāvitāya sassato, nibbikāratāya avipariṇāmadhammoti attho. Yadi pañcakkhandhe sandhāya vuttaṃ, kathamekavacananti āha ‘‘ārammaṇavasenā’’tiādi. Nānā karīyati etenāti nānākaraṇaṃ, viseso. Jātivasenāti uppattivasena. Ye hi anibbattapubbā samānāvatthā, te uppādasaṅkhātavikārasamaṅgitāya uppajjantīti samaññaṃ labhanti. Tenāha ‘‘jātivasenā’’tiādi. Punappunaṃ āsevitāti anādimati saṃsāre aparāparuppattiyā laddhāsevanā. Etena kilesānaṃ bhāvanaṭṭhena anusayatthaṃ viseseti . Thāmagatāti thāmabhāvaṃ upagatā. Etena anusaye sabhāvato dasseti. Thāmagamananti ca kāmarāgādīnaṃ anaññasādhāraṇo sabhāvo. Tathā hi vuttaṃ ‘‘thāmagato anusaye pajahatī’’ti (paṭi. ma. 3.21). Appaṭivinītāti samucchedavinayavasena na paṭivinītā. Appahīnā hi thāmagatā kilesā anusentīti vuccanti. Etena tesaṃ kāraṇalābhe sati uppajjanārahataṃ dasseti. Samudācarantīti abhibhavanti. Etena tesaṃ vītikkamappattataṃ dasseti. Uppajjantīti pana imināva pariyuṭṭhānāvatthā dassitā.
д̇ам̣ бан̃жагканд̇хаббабхзд̣̇ам̣ аарамман̣анд̇и яам̣ д̇ам̣ ‘‘яад̇т̇а жзд̇аа д̣̇идтияо уббаж̇ж̇анд̇ий’’д̇иаад̣̇инаа вуд̇д̇ам̣ руубубаад̣̇аанагканд̇хаад̣̇ибан̃жагканд̇хабабхзд̣̇ам̣ д̣̇идтийнам̣ аарамман̣ам̣. зд̇ам̣ маяхам̣ на ход̇ийд̇и зд̇ам̣ канд̇хабан̃жагам̣ маяхам̣ санд̇агам̣ на ход̇и мама гин̃жанабалиб̣од̇хабхаавзна г̇ахзд̇аб̣б̣ад̇ааяа абхаавад̇о. д̇знасса барамад̇т̇ад̇о д̇ан̣хаавад̇т̇убхаавам̣ бадигкибад̇и д̇аавагаалигаад̣̇ибхаавад̇о. ахамби зсо на асмийд̇и зсо бан̃жагканд̇хабабхзд̣̇о ахамби на асми, аханд̇и со г̇ахзд̇аб̣б̣о на ход̇ийд̇и ад̇т̇о. зд̇знасса маанавад̇т̇убхаавам̣ бадигкибад̇и анижжад̣̇угкаж̇зг̇ужчаад̣̇ибхаавад̇о. зсо мз ад̇д̇ааби на ход̇и ад̇д̇асабхаавасса д̇ад̇т̇а абхаавад̇о маман̃жасса гин̃жанабалиб̣од̇хабхаавзна г̇ахзд̇аб̣б̣ад̇ааяа абхаавад̇о.
Taṃ pañcakkhandhappabhedaṃ ārammaṇanti yaṃ taṃ ‘‘yattha cetā diṭṭhiyo uppajjantī’’tiādinā vuttaṃ rūpupādānakkhandhādipañcakkhandhapabhedaṃ diṭṭhīnaṃ ārammaṇaṃ. Etaṃ mayhaṃ na hotīti etaṃ khandhapañcakaṃ mayhaṃ santakaṃ na hoti mama kiñcanapalibodhabhāvena gahetabbatāya abhāvato. Tenassa paramatthato taṇhāvatthubhāvaṃ paṭikkhipati tāvakālikādibhāvato. Ahampi eso na asmīti eso pañcakkhandhapabhedo ahampi na asmi, ahanti so gahetabbo na hotīti attho. Etenassa mānavatthubhāvaṃ paṭikkhipati aniccadukkhajegucchādibhāvato. Eso me attāpi na hoti attasabhāvassa tattha abhāvato mamañcassa kiñcanapalibodhabhāvena gahetabbatāya abhāvato.
д̇ан̣хаава маманд̇и г̇ан̣хаад̇и зд̇знаад̇и д̇ан̣хааг̇аахо. д̇ам̣ г̇ан̣ханд̇од̇и д̇ам̣ уббаад̣̇знд̇о. д̇знааха ‘‘д̇ан̣хаабабан̃жам̣ г̇ан̣хаад̇ий’’д̇и. бабан̃жзд̇и санд̇аанам̣ вид̇т̇аарзнд̇о сад̇д̇з сам̣саарз жирааяад̇ийд̇и бабан̃жо. яат̇аа вуд̇д̇абабхзд̣̇анд̇и адтасад̇ад̇ан̣хаавижарид̇абабхзд̣̇ам̣. д̇ан̣хаабабан̃жам̣ бадигкибад̇и канд̇хабан̃жагасса д̇ан̣хаавад̇т̇угаабхаававибхааванзнаад̇и ад̇хиббааяо. барад̇о бад̣̇ад̣̇ваязби зсзва наяо. д̣̇идтзгадтаад̇и д̣̇идтияаа бахаанзгадтаа. д̇зна д̇зсам̣ батамамаг̇г̇аваж̇жхад̇ам̣ д̣̇ассзд̇и. сахаж̇згадтаа бана д̣̇идтияаа д̇ан̣хаа зва, на маано, саа жа ко абааяаг̇аманийяаа. яат̇аа ад̇т̇ийд̇и язна анижжад̣̇угкаасубхаанад̇д̇аагаарзна ад̇т̇и, д̇ат̇аа бассанд̇о яат̇аабхууд̇ам̣ бассад̇и наама. д̇знааха ‘‘канд̇хабан̃жаган̃хий’’д̇иаад̣̇и. зд̇знзва аагаарзнаад̇и руббанаад̣̇ианижжаад̣̇иаагаарзнзва. г̇аяхамаанамби аббахийнавибаллаасзхи. д̇знаагаарзнаад̇и ‘‘зд̇ам̣ мама’’нд̇иаад̣̇иаагаарзна. нзвад̇т̇и яат̇аабхууд̇ад̣̇ассанавибаллаасаанам̣ д̇ад̣̇абхаавад̇о. судту бассанд̇ассаад̇и яат̇аа буна д̇ат̇аа на бассид̇аб̣б̣ам̣, звам̣ судту саад̇исаяам̣ бассанд̇асса.
Taṇhāva mamanti gaṇhāti etenāti taṇhāgāho. Taṃ gaṇhantoti taṃ uppādento. Tenāha ‘‘taṇhāpapañcaṃ gaṇhātī’’ti. Papañceti santānaṃ vitthārento satte saṃsāre cirāyatīti papañco. Yathā vuttapabhedanti aṭṭhasatataṇhāvicaritapabhedaṃ. Taṇhāpapañcaṃ paṭikkhipati khandhapañcakassa taṇhāvatthukābhāvavibhāvanenāti adhippāyo. Parato padadvayepi eseva nayo. Diṭṭhekaṭṭhāti diṭṭhiyā pahānekaṭṭhā. Tena tesaṃ paṭhamamaggavajjhataṃ dasseti. Sahajekaṭṭhā pana diṭṭhiyā taṇhā eva, na māno, sā ca kho apāyagamanīyā. Yathā atthīti yena aniccadukkhāsubhānattākārena atthi, tathā passanto yathābhūtaṃ passati nāma. Tenāha ‘‘khandhapañcakañhī’’tiādi. Eteneva ākārenāti ruppanādianiccādiākāreneva. Gayhamānampi appahīnavipallāsehi. Tenākārenāti ‘‘etaṃ mama’’ntiādiākārena. Nevatthi yathābhūtadassanavipallāsānaṃ tadabhāvato. Suṭṭhu passantassāti yathā puna tathā na passitabbaṃ, evaṃ suṭṭhu sātisayaṃ passantassa.
на аад̣̇иманасигаарзнзва д̣̇идтиббахаанам̣ ход̇и, ад̇химаанигаанам̣ бана ад̇химаанамад̇д̇амзд̇ам̣ д̣̇ассанам̣. маг̇г̇знзва д̇ам̣ ход̇ийд̇и имамад̇т̇ам̣ вибхаавзнд̇о ‘‘сод̇аабад̇д̇имаг̇г̇зна д̣̇идтиббахаанам̣ д̣̇ассзд̇ваа’’д̇и ааха. вибхаж̇анд̇од̇и ад̇химаанигаанам̣ жхаанаани асаллзкабхаавзна вибхаж̇анд̇о. б̣аалабут̇уж̇ж̇анаанам̣ нзва уббаж̇ж̇ад̇и агаарагабхаавад̇о. на арияасаавагаанам̣ бахийнаад̇химаанабажжаяад̇д̇аа. на адтаананияож̇аго саббааяагаммадтаанзязва нияож̇анад̇о.
Na ādimanasikāreneva diṭṭhippahānaṃ hoti, adhimānikānaṃ pana adhimānamattametaṃ dassanaṃ. Maggeneva taṃ hotīti imamatthaṃ vibhāvento ‘‘sotāpattimaggena diṭṭhippahānaṃ dassetvā’’ti āha. Vibhajantoti adhimānikānaṃ jhānāni asallekhabhāvena vibhajanto. Bālaputhujjanānaṃ neva uppajjati akārakabhāvato. Na ariyasāvakānaṃ pahīnādhimānapaccayattā. Na aṭṭhānaniyojako sappāyakammaṭṭhāneyeva niyojanato.
т̇зро ‘‘яад̣̇ад̇т̇ам̣ сан̇гхо баггосад̇и, со ад̇т̇о д̇ад̇т̇а ваасийнам̣ ааг̇ад̇ааг̇ад̇аанам̣ ид̇ха иж̇жхад̇ий’’д̇и д̇ам̣ уд̣̇игканд̇о сан̇гхзна яаавад̇ад̇ияам̣ бахид̇оби на г̇ад̇о на аг̇ааравзна. д̇знааха ‘‘гимзд̇а’’нд̇иаад̣̇и. бан̣д̣ид̇о хи д̇ад̇т̇а ад̇д̇ано гижжамзва гарод̇ийд̇и ан̃н̃ад̇арам̣ вуд̣дхабаб̣б̣аж̇ид̇ам̣ баахзси. гимзд̇анд̇и сан̇гхасса аан̣ааяа агаран̣ам̣ наама гимзд̇анд̇и гаран̣з аад̣̇арам̣ д̣̇ийбзнд̇о звамааха. садтивассаад̇ийд̇од̇и аббад̇д̇з бад̇д̇асан̃н̃ий зва садтивассаад̇ийд̇о. яасмаа бзсалаа бзсалзхи сад̣̇д̇хим̣ сам̣санд̣̇анд̇и самаанаад̇химуд̇д̇ид̇ааяа, д̇асмаа т̇зро ‘‘саад̇хаавусо’’д̇и вад̇ваа хад̇т̇имаабанаад̣̇им̣ саб̣б̣ам̣ агааси.
Thero ‘‘yadatthaṃ saṅgho pakkosati, so attho tattha vāsīnaṃ āgatāgatānaṃ idha ijjhatī’’ti taṃ udikkhanto saṅghena yāvatatiyaṃ pahitopi na gato na agāravena. Tenāha ‘‘kimeta’’ntiādi. Paṇḍito hi tattha attano kiccameva karotīti aññataraṃ vuḍḍhapabbajitaṃ pāhesi. Kimetanti saṅghassa āṇāya akaraṇaṃ nāma kimetanti karaṇe ādaraṃ dīpento evamāha. Saṭṭhivassātītoti appatte pattasaññī eva saṭṭhivassātīto. Yasmā pesalā pesalehi saddhiṃ saṃsandanti samānādhimuttitāya, tasmā thero ‘‘sādhāvuso’’ti vatvā hatthimāpanādiṃ sabbaṃ akāsi.
д̇аад̣̇исоваад̇и ананд̇арам̣ вуд̇д̇ад̇т̇зрасад̣̇исова аббад̇д̇з бад̇д̇асан̃н̃ий зва садтивассаад̇ийд̇од̇и ад̇т̇о. бад̣̇умаг̇умб̣анд̇и гамаласан̣д̣ам̣. баасаад̣̇ам̣ баависи виссадтам̣ ологанзнасса бут̇уж̇ж̇анабхааво ад̇д̇анаава бан̃н̃ааяиссад̇ийд̇и. д̇иссамахаавихаарз гира т̇зраа бхигкуу д̇ад̣̇аа ‘‘сагажид̇д̇ам̣ басийд̣̇ад̇ий’’д̇и важанам̣ бууж̇знд̇аа гаалассзва жзд̇ияан̇г̇ан̣ам̣ саммаж̇ж̇ид̇ваа зд̇д̇агаарамман̣амзва б̣уд̣̇д̇хаарамман̣абийд̇им̣ уббаад̣̇зд̇ваа д̣̇ивасз д̣̇ивасз д̇ат̇аа гаронд̇и. д̇зна вуд̇д̇ам̣ ‘‘д̇асмин̃жа самаяз’’д̇иаад̣̇и. ‘‘д̇хаммад̣̇инна, ид̇ха бад̇д̇ажийварам̣ табзд̇ий’’д̇и вад̇д̇ааби бадисант̇ааравасзна гин̃жи бужчид̇ааби наахоси. г̇ун̣ам̣ ж̇аанаад̇ийд̇и нимуж̇ж̇анаад̣̇ийсу виварад̣̇аанаад̣̇инаа г̇ун̣ам̣ ж̇аанаад̇и вияа. д̇умхз бана на ж̇аанид̇т̇а ааг̇анд̇угавад̇д̇ассаби агаран̣ад̇о. сад̇т̇уаан̣аавилан̇гхиний гийд̣̇исий саа сан̇гхасса гад̇игаа? гад̇игаа жа наама сигкаабад̣̇аавирод̇хзна анувад̇д̇зд̇аб̣б̣аа, зд̇д̇агамби аж̇аананд̇зхи мз сам̣ваасо над̇т̇ийд̇и аагаасз аб̣бхуггами.
Tādisovāti anantaraṃ vuttattherasadisova appatte pattasaññī eva saṭṭhivassātītoti attho. Padumagumbanti kamalasaṇḍaṃ. Pāsādaṃ pāvisi vissaṭṭhaṃ olokanenassa puthujjanabhāvo attanāva paññāyissatīti. Tissamahāvihāre kira therā bhikkhū tadā ‘‘sakacittaṃ pasīdatī’’ti vacanaṃ pūjentā kālasseva cetiyaṅgaṇaṃ sammajjitvā ettakārammaṇameva buddhārammaṇapītiṃ uppādetvā divase divase tathā karonti. Tena vuttaṃ ‘‘tasmiñca samaye’’tiādi. ‘‘Dhammadinna, idha pattacīvaraṃ ṭhapetī’’ti vattāpi paṭisanthāravasena kiñci pucchitāpi nāhosi. Guṇaṃ jānātīti nimujjanādīsu vivaradānādinā guṇaṃ jānāti viya. Tumhe pana na jānittha āgantukavattassapi akaraṇato. Satthuāṇāvilaṅghinī kīdisī sā saṅghassa katikā? Katikā ca nāma sikkhāpadāvirodhena anuvattetabbā, ettakampi ajānantehi me saṃvāso natthīti ākāse abbhukkami.
яам̣ д̇асса звамасса саллзкзна вихараамийд̇и яо ‘‘батамаж̇жхаанам̣ убасамбаж̇ж̇а вихарзяяаа’’д̇и вуд̇д̇о, д̇асса бхигкуно яам̣ ‘‘батамаж̇жхаанасан̇каад̇ам̣ бадибад̇д̇ивид̇хаанам̣ гилзсз саллзкад̇и, д̇зна саллзкзна ахам̣ вихараамий’’д̇и ад̇химаанавасзна звамасса звам̣ бхавзяяа таанамзд̇ам̣ виж̇ж̇ад̇ийд̇и звамзд̇т̇а самб̣анд̇хо взд̣̇ид̇аб̣б̣о. д̇ам̣ на яуж̇ж̇ад̇ийд̇и д̇ам̣ ад̇химаанигасса ‘‘яат̇аавибхан̇г̇ам̣ батамаж̇жхаанам̣ саллзко’’д̇и баривид̇аггид̇ам̣ на яуж̇ж̇ад̇и яуд̇д̇ам̣ на ход̇и. д̇знааха ‘‘на хий’’д̇иаад̣̇и. д̇ад̇т̇а саммаа саб̣б̣асо жа гилзсз ликад̇ийд̇и саллзко, арияамаг̇г̇о. д̇ад̣̇убааяавибассанаа саллзкабадибад̣̇аа. яам̣ бана жхаанам̣ вибассанаабаад̣̇агам̣, д̇амби жхаанам̣ барияааязна маг̇г̇абаад̣̇агам̣ ход̇иязва. д̇знааха ‘‘авибассанаабаад̣̇агад̇д̇аа’’д̇иаад̣̇и.
Yaṃtassa evamassa sallekhena viharāmīti yo ‘‘paṭhamajjhānaṃ upasampajja vihareyyā’’ti vutto, tassa bhikkhuno yaṃ ‘‘paṭhamajjhānasaṅkhātaṃ paṭipattividhānaṃ kilese sallekhati, tena sallekhena ahaṃ viharāmī’’ti adhimānavasena evamassa evaṃ bhaveyya ṭhānametaṃ vijjatīti evamettha sambandho veditabbo. Taṃ na yujjatīti taṃ adhimānikassa ‘‘yathāvibhaṅgaṃ paṭhamajjhānaṃ sallekho’’ti parivitakkitaṃ na yujjati yuttaṃ na hoti. Tenāha ‘‘na hī’’tiādi. Tattha sammā sabbaso ca kilese likhatīti sallekho, ariyamaggo. Tadupāyavipassanā sallekhapaṭipadā. Yaṃ pana jhānaṃ vipassanāpādakaṃ, tampi jhānaṃ pariyāyena maggapādakaṃ hotiyeva. Tenāha ‘‘avipassanāpādakattā’’tiādi.
жхаанад̇хаммавасзнаад̇и вид̇аггаад̣̇ибан̃жагаж̇жхаанад̇хаммавасзна. жид̇д̇уббаад̣̇авасзна анзгаваарам̣ бавад̇д̇амаанамби жхаанам̣ згааваж̇ж̇анад̇ааяа згавийт̇ибарияаабаннад̇д̇аа згаа самаабад̇д̇и зваад̇и ‘‘бунаббунам̣ самаабад̇д̇ивасзнаа’’д̇и вуд̇д̇ам̣. жад̇д̇аари аруубаж̇жхаанаани яат̇аасагам̣ згзгасмим̣язва аарамман̣з бавад̇д̇анд̇ийд̇и ааха ‘‘аарамман̣абхзд̣̇аабхаавад̇о’’д̇и. буримагааран̣ад̣̇ваяавасзнзваад̇и ‘‘жхаанад̇хаммавасзна, бунаббунам̣ самаабад̇д̇ивасзнаа’’д̇и буб̣б̣з вуд̇д̇аббагаарагааран̣ад̣̇ваяавасзнзва.
Jhānadhammavasenāti vitakkādipañcakajjhānadhammavasena. Cittuppādavasena anekavāraṃ pavattamānampi jhānaṃ ekāvajjanatāya ekavīthipariyāpannattā ekā samāpatti evāti ‘‘punappunaṃ samāpattivasenā’’ti vuttaṃ. Cattāri arūpajjhānāni yathāsakaṃ ekekasmiṃyeva ārammaṇe pavattantīti āha ‘‘ārammaṇabhedābhāvato’’ti. Purimakāraṇadvayavasenevāti ‘‘jhānadhammavasena, punappunaṃ samāpattivasenā’’ti pubbe vuttappakārakāraṇadvayavaseneva.
д̇зсам̣ аруубаж̇жхаанаанам̣ гилзсабарил̣аахаабхаавзна ниб̣б̣уд̇аани ан̇г̇аани, бхааванаависзсавасзна сукумаани аарамман̣аани. д̇асмаа д̇аанийд̇и д̇зсам̣ васзна д̇аани жхаанаани санд̇аани, д̇асмаа ‘‘санд̇аа зд̇з вихаараа’’д̇и вуд̇д̇ам̣. д̇зсам̣ жад̇уннамбийд̇и жад̇уннамби д̇зсам̣ аруубаж̇жхаанаанам̣.
Tesaṃ arūpajjhānānaṃ kilesapariḷāhābhāvena nibbutāni aṅgāni, bhāvanāvisesavasena sukhumāni ārammaṇāni. Tasmā tānīti tesaṃ vasena tāni jhānāni santāni, tasmā ‘‘santā ete vihārā’’ti vuttaṃ. Tesaṃ catunnampīti catunnampi tesaṃ arūpajjhānānaṃ.
83. сод̇и ад̇химааниго бхигку, ан̃н̃о ваа ид̇о б̣аахираго д̇аабасабариб̣б̣ааж̇агаад̣̇иго на хи саммасад̇и. д̇ад̇т̇а ад̇химааниго аббад̇д̇з бад̇д̇асан̃н̃ид̇ааяа на саммасад̇и, ид̇аро ависаяад̇ааяа. яад̇т̇аад̇и яасмим̣ саллзкавад̇т̇усмим̣, авихим̣сагад̇аад̣̇ийхи жад̇ужад̇д̇аалийсааяа аагаарзхи.
83.Soti adhimāniko bhikkhu, añño vā ito bāhirako tāpasaparibbājakādiko na hi sammasati. Tattha adhimāniko appatte pattasaññitāya na sammasati, itaro avisayatāya. Yatthāti yasmiṃ sallekhavatthusmiṃ, avihiṃsakatādīhi catucattālīsāya ākārehi.
адта самаабад̇д̇ияо наама гилзсаанам̣ вигкамбханавасзна бавад̇д̇аа уд̇д̇аруд̇д̇ари санд̇абан̣ийд̇аа д̇хаммаа, на д̇ат̇аа логияаа авихим̣саад̣̇аяо. д̇ад̇т̇а гат̇ам̣ авихим̣саад̣̇аяо зва саллзкабхаавзна вуд̇д̇аа, на ид̇араад̇и имамад̇т̇ам̣ вибхаавзнд̇о жод̣̇аго ‘‘гасмаа банаа’’д̇иаад̣̇имааха. ид̇аро гаамам̣ самаабад̇д̇ияо санд̇абан̣ийд̇асабхааваа, ваддабаад̣̇агад̇ааяа бана гилзсаанам̣ саллзкабадибад̣̇аа на хонд̇и, авихим̣саад̣̇аяо бана виваддабаад̣̇агаа саллзкабадибад̣̇аад̇и имамад̇т̇ам̣ вибхаавзнд̇о ‘‘логуд̇д̇арабаад̣̇агад̇д̇аа’’д̇иаад̣̇имааха. иминааязва адтасамаабад̇д̇ийхи авихим̣саад̣̇ийнам̣ висзсад̣̇ийбагзна суд̇д̇зна яат̇аа махабпалад̇арам̣ ход̇и, д̇ам̣ багаараж̇аад̇ам̣ взд̣̇ид̇аб̣б̣ам̣. ид̣̇ан̃хи д̣̇агкин̣зяяад̇арад̇ааяа д̣̇агкин̣ааяа махабпалад̇арад̇ам̣ санд̇хааяа вуд̇д̇анд̇и самб̣анд̇хо. нану д̇ад̇т̇а ‘‘сод̇аабад̇д̇ипаласажчигирияааяа бадибанно’’д̇и ааг̇ад̇ам̣, на ‘‘саран̣аг̇ад̇о’’д̇и жод̣̇анам̣ санд̇хааяааха ‘‘саран̣аг̇аманад̇о бадтааяаа’’д̇иаад̣̇и. вуд̇д̇ан̃хзд̇ам̣ адтагат̇ааяам̣ (ма. ни. адта. 3.379) ‘‘хздтимагодияаа д̇исаран̣ам̣ г̇ад̇о убаасагоби сод̇аабад̇д̇ипаласажчигирияааяа бадибанно наамаа’’д̇и. яо хи ваддад̣̇угкам̣ самад̇иггамид̇угаамо басаннажид̇д̇о рад̇анад̇д̇аяам̣ саран̣ам̣ г̇ажчад̇и, д̇асса д̇ам̣ ад̇хисийлаад̣̇ийнам̣ убаниссаяо худ̇ваа ануггамзна д̣̇ассанамаг̇г̇аад̇хиг̇амааяа сам̣вад̇д̇зяяаад̇и.
Aṭṭha samāpattiyo nāma kilesānaṃ vikkhambhanavasena pavattā uttaruttari santapaṇītā dhammā, na tathā lokiyā avihiṃsādayo. Tattha kathaṃ avihiṃsādayo eva sallekhabhāvena vuttā, na itarāti imamatthaṃ vibhāvento codako ‘‘kasmā panā’’tiādimāha. Itaro kāmaṃ samāpattiyo santapaṇītasabhāvā, vaṭṭapādakatāya pana kilesānaṃ sallekhapaṭipadā na honti, avihiṃsādayo pana vivaṭṭapādakā sallekhapaṭipadāti imamatthaṃ vibhāvento ‘‘lokuttarapādakattā’’tiādimāha. Imināyeva aṭṭhasamāpattīhi avihiṃsādīnaṃ visesadīpakena suttena yathā mahapphalataraṃ hoti, taṃ pakārajātaṃ veditabbaṃ. Idañhi dakkhiṇeyyataratāya dakkhiṇāya mahapphalatarataṃ sandhāya vuttanti sambandho. Nanu tattha ‘‘sotāpattiphalasacchikiriyāya paṭipanno’’ti āgataṃ, na ‘‘saraṇagato’’ti codanaṃ sandhāyāha ‘‘saraṇagamanato paṭṭhāyā’’tiādi. Vuttañhetaṃ aṭṭhakathāyaṃ (ma. ni. aṭṭha. 3.379) ‘‘heṭṭhimakoṭiyā tisaraṇaṃ gato upāsakopi sotāpattiphalasacchikiriyāya paṭipanno nāmā’’ti. Yo hi vaṭṭadukkhaṃ samatikkamitukāmo pasannacitto ratanattayaṃ saraṇaṃ gacchati, tassa taṃ adhisīlādīnaṃ upanissayo hutvā anukkamena dassanamaggādhigamāya saṃvatteyyāti.
вихим̣саад̣̇ивад̇т̇унд̇и яад̣̇зд̇ам̣ вихим̣саад̣̇ийнам̣ вад̇т̇ум̣ вад̣̇аама, имасмим̣ вихим̣саад̣̇ивад̇т̇усмим̣. анд̇амижчаад̣̇идтин̃жа мижчад̇д̇аанам̣ аад̣̇имижчаад̣̇идтин̃жаад̇и ид̣̇ам̣ д̣̇зсанааггамам̣ санд̇хааяа вуд̇д̇ам̣. миссзд̇ваад̇и мижчаад̣̇идтибхаавасааман̃н̃зна згаж̇жхам̣ гад̇ваа. д̇ат̇аад̇и иминаа яат̇аа гаммабат̇амижчад̇д̇аанам̣ анд̇з аад̣̇имхи жа вуд̇д̇амижчаад̣̇идтим̣ миссзд̇ваа згаж̇жхам̣ вуд̇д̇ам̣, д̇ат̇аа д̇зсам̣ анд̇з вуд̇д̇асаммаад̣̇идтийд̇и имамад̇т̇ам̣ убасам̣харад̇и.
Vihiṃsādivatthunti yadetaṃ vihiṃsādīnaṃ vatthuṃ vadāma, imasmiṃ vihiṃsādivatthusmiṃ. Antamicchādiṭṭhiñca micchattānaṃ ādimicchādiṭṭhiñcāti idaṃ desanākkamaṃ sandhāya vuttaṃ. Missetvāti micchādiṭṭhibhāvasāmaññena ekajjhaṃ katvā. Tathāti iminā yathā kammapathamicchattānaṃ ante ādimhi ca vuttamicchādiṭṭhiṃ missetvā ekajjhaṃ vuttaṃ, tathā tesaṃ ante vuttasammādiṭṭhīti imamatthaṃ upasaṃharati.
баан̣анд̇и вохаарад̇о сад̇д̇ам̣, барамад̇т̇ад̇о ж̇ийвид̇инд̣̇рияам̣. ад̇ибаад̇знд̇и сарасзнзва бад̇анасабхаавам̣ ад̇ижжа анд̇араа зва баад̇знд̇и, ад̇иггамма ваа сад̇т̇аад̣̇ийхи абхибхавид̇ваа баад̇знд̇и. ад̣̇иннанд̇и барасанд̇агам̣. аад̣̇ияанд̇ийд̇и г̇ан̣ханд̇и. саллзкад̇ийд̇и самам̣ лзкад̇и, баж̇ахад̇ийд̇и ад̇т̇о. гаммабат̇агат̇аа зсаад̇и ‘‘ад̇т̇абхан̃ж̇анага’’нд̇и вуд̇д̇ам̣. бияасун̃н̃агаран̣ад̇о бисун̣аа, бисад̇и барз сад̇д̇з хим̣сад̇ийд̇и ваа бисун̣аа. парусаад̇и луукаа, нидтураад̇и ад̇т̇о. нирад̇т̇аганд̇и ад̇т̇арахид̇ам̣ ад̇д̇ано барзсан̃жа хид̇авинимуд̇д̇ам̣. мижчаад̇и вибарийд̇аа нижжаад̣̇ивасзна бавад̇д̇ияаа. баабигаад̇и лаамигаа. зганд̇аагусалад̇ааяа вин̃н̃уухи б̣уд̣̇д̇хаад̣̇ийхи г̇арахид̇аа. над̇т̇и д̣̇иннанд̇и аад̣̇ивад̇т̇угааяаад̇и д̣̇асавад̇т̇угамижчаад̣̇идтимааха. над̇т̇игабхааваабхинивзсанавасзна гаммабат̇аббад̇д̇иязвассаа гаммабат̇абарияаабаннад̇аа. ‘‘руубам̣ ад̇д̇аа’’’д̇иаад̣̇инаяаббавад̇д̇аа ад̇д̇ад̣̇идти маг̇г̇анд̇арааяагарад̇д̇аа анияяаанигад̣̇идти. анияяаанигад̇д̇аа зва хиссаа мижчад̇д̇абарияаабаннад̇аа. саммаад̇и авибарийд̇аа, д̇ад̇о зва собханаа сунд̣̇араа, б̣уд̣̇д̇хаад̣̇ийхи басад̇т̇ад̇д̇аа вин̃н̃уббасад̇т̇аа. сзсамзд̇т̇а мижчаад̣̇идтияам̣ вуд̇д̇анаязна взд̣̇ид̇аб̣б̣ам̣.
Pāṇanti vohārato sattaṃ, paramatthato jīvitindriyaṃ. Atipātenti saraseneva patanasabhāvaṃ aticca antarā eva pātenti, atikkamma vā satthādīhi abhibhavitvā pātenti. Adinnanti parasantakaṃ. Ādiyantīti gaṇhanti. Sallekhatīti samaṃ lekhati, pajahatīti attho. Kammapathakathā esāti ‘‘atthabhañjanaka’’nti vuttaṃ. Piyasuññakaraṇato pisuṇā, pisati pare satte hiṃsatīti vā pisuṇā. Pharusāti lūkhā, niṭṭhurāti attho. Niratthakanti attharahitaṃ attano paresañca hitavinimuttaṃ. Micchāti viparītā niccādivasena pavattiyā. Pāpikāti lāmikā. Ekantākusalatāya viññūhi buddhādīhi garahitā. Natthi dinnanti ādivatthukāyāti dasavatthukamicchādiṭṭhimāha. Natthikabhāvābhinivesanavasena kammapathappattiyevassā kammapathapariyāpannatā. ‘‘Rūpaṃ attā’’’tiādinayappavattā attadiṭṭhi maggantarāyakarattā aniyyānikadiṭṭhi. Aniyyānikattā eva hissā micchattapariyāpannatā. Sammāti aviparītā, tato eva sobhanā sundarā, buddhādīhi pasatthattā viññuppasatthā. Sesamettha micchādiṭṭhiyaṃ vuttanayena veditabbaṃ.
асубхаад̣̇ийсу субхаад̣̇иаагаараг̇г̇ахан̣ад̇о аяаат̇ааваанияяаанигаа аяонисо уббад̇д̇ияаа. агусалаад̇и аяаат̇аавааанияяаанигаа агусалаа сан̇габбаа. зса наяод̇и иминаа ‘‘аяаат̇ааваа анияяаанигаа агусалаа ваажаа’’д̇иаад̣̇инаа д̇ад̇т̇а д̇ад̇т̇а аяаат̇ааваад̣̇иад̇т̇ам̣ ад̇ид̣̇исад̇и. ваажаад̇и жзд̇анаа ад̇хиббзд̇аа, д̇ат̇аа гамманд̇ааж̇ийваасад̇и жа. язбхуяязна ад̇ийд̇аануссаран̣авасзна бавад̇д̇ид̇о ‘‘ад̇ийд̇ам̣ жинд̇аяад̇о’’д̇и вуд̇д̇ам̣. д̇ат̇аа хи логз звам̣ вад̣̇анд̇и ‘‘яам̣ мз бахууд̇ам̣ д̇ханам̣ ахоси, д̇ам̣ бамаад̣̇авасзна бана б̣ахум̣ кийн̣а’’нд̇и. сад̇ибад̇ируубагзнаад̇и ‘‘жирагад̇амби жирабхаасид̇амби сарид̇аа’’д̇и звам̣ вуд̇д̇асад̇уббад̇д̇ибад̇ируубагзна. уббад̇д̇инд̇и жид̇д̇уббад̇д̇им̣. д̇ат̇аабавад̇д̇ажид̇д̇уббаад̣̇о хи мижчаасад̇и. саа бана год̇хавасзна ваа ‘‘аггожчи мам̣ авад̇хи ма’’нд̇иаад̣̇инаа (д̇ха. ба. 3) убанаяханд̇асса, рааг̇авасзна ваа ‘‘яаанисса д̇аани буб̣б̣з маад̇уг̇аамзна сад̣̇д̇хим̣ хасид̇алабид̇агийл̣ид̇аани ануссарад̇ий’’д̇и (а. ни. 7.50) вуд̇д̇анаязна субхад̇о ануссаранд̇асса, д̣̇идтивасзна ваа ‘‘со ко бана мз ад̇д̇о нижжо д̇хуво’’д̇иаад̣̇инаа мижчааабхинивисанд̇ассаад̇и звамаад̣̇инаа наязна бавад̇д̇ад̇ийд̇и взд̣̇ид̇аб̣б̣аа.
Asubhādīsu subhādiākāraggahaṇato ayāthāvaaniyyānikā ayoniso uppattiyā. Akusalāti ayāthāvāaniyyānikā akusalā saṅkappā. Esa nayoti iminā ‘‘ayāthāvā aniyyānikā akusalā vācā’’tiādinā tattha tattha ayāthāvādiatthaṃ atidisati. Vācāti cetanā adhippetā, tathā kammantājīvāsati ca. Yebhuyyena atītānussaraṇavasena pavattito ‘‘atītaṃ cintayato’’ti vuttaṃ. Tathā hi loke evaṃ vadanti ‘‘yaṃ me pahūtaṃ dhanaṃ ahosi, taṃ pamādavasena pana bahuṃ khīṇa’’nti. Satipatirūpakenāti ‘‘cirakatampi cirabhāsitampi saritā’’ti evaṃ vuttasatuppattipatirūpakena. Uppattinti cittuppattiṃ. Tathāpavattacittuppādo hi micchāsati. Sā pana kodhavasena vā ‘‘akkocchi maṃ avadhi ma’’ntiādinā (dha. pa. 3) upanayhantassa, rāgavasena vā ‘‘yānissa tāni pubbe mātugāmena saddhiṃ hasitalapitakīḷitāni anussaratī’’ti (a. ni. 7.50) vuttanayena subhato anussarantassa, diṭṭhivasena vā ‘‘so kho pana me atto nicco dhuvo’’tiādinā micchāabhinivisantassāti evamādinā nayena pavattatīti veditabbā.
убааяажинд̇аавасзнаад̇и киббаж̇аалагуминаад̣̇ухалаад̣̇иубагаран̣асам̣вид̇хаанаад̣̇ийсу яуд̇д̇ижинд̇анаад̣̇ивасзна баабам̣ гад̇ваа виббадисааранимид̇д̇ам̣, ‘‘сугад̇ам̣ маяаа’’д̇и баамож̇ж̇анимид̇д̇ам̣ гад̇ваа бажжавзгкан̣аагаарзна мохо ан̃н̃аан̣ам̣. д̇ад̇т̇а бана ‘‘асивз сиваа’’д̇и вохааро вияа н̃аан̣авохааро. мижчаасабхаавад̇д̇аа бана мижчаан̃аан̣ам̣д̇взва вужжад̇и. згуунавийсад̇ибхзд̣̇ам̣ бажжавзгкан̣ан̃аан̣ам̣ саммаа бзгкид̇ад̇д̇аа саммаан̃аан̣ам̣ вужжад̇и, ид̇арам̣ бана жхаанаад̣̇ибажжавзгкан̣ан̃аан̣ам̣ саммаад̣̇идтияаава сан̇г̇аяхад̇и. руубааруубасамаабад̇д̇илаабхид̇аамад̇д̇зна ваддад̇о авимуд̇д̇ааязва самаанаа ‘‘вимуд̇д̇аа маяа’’нд̇и звам̣сан̃н̃ино. багад̇ибурисанд̇аран̃аан̣асан̇каад̇ааяам̣, г̇ун̣авияуд̇д̇асса ад̇д̇ано сагад̇д̇ани авадтаанасан̇каад̇ааяам̣, ад̇д̇ано махааб̣рахмунаа салогад̇аа д̇асса самийбад̇аасам̣яуж̇ж̇анасан̇каад̇ааяам̣ ваа авимуд̇д̇ияам̣ вимуд̇д̇исан̃н̃ино. зганд̇аагусалад̇ааяа хийнад̇д̇аа баабигаа. аяаат̇аавад̇ааяа вибарийд̇аа. яат̇аавуд̇д̇знаад̇и ‘‘авимуд̇д̇ааязва самаанаа’’д̇и вуд̇д̇аббагаарзна. ‘‘маяамзд̇т̇а саммаад̣̇идти бхависсаамаа’’д̇иаад̣̇ийсу паласаммаад̣̇идтиаад̣̇ийниби маг̇г̇асаммаад̣̇идтиаад̣̇ибагкигаанзваад̇и ад̇хиббааязна ‘‘паласамбаяуд̇д̇аани…бз… взд̣̇ид̇аб̣б̣аа’’д̇и вуд̇д̇ам̣. саб̣б̣зби бана палад̇хаммз вимуд̇д̇игканд̇хасан̇г̇ахад̇о ‘‘вимуд̇д̇ий’’д̇и вужжамаанз на гожи вирод̇хо. зд̇т̇а саммаавимуд̇д̇исан̇каад̇з саллзкавад̇т̇умхи.
Upāyacintāvasenāti khippajālakumināduhalādiupakaraṇasaṃvidhānādīsu yutticintanādivasena pāpaṃ katvā vippaṭisāranimittaṃ, ‘‘sukataṃ mayā’’ti pāmojjanimittaṃ katvā paccavekkhaṇākārena moho aññāṇaṃ. Tattha pana ‘‘asive sivā’’ti vohāro viya ñāṇavohāro. Micchāsabhāvattā pana micchāñāṇaṃtveva vuccati. Ekūnavīsatibhedaṃ paccavekkhaṇañāṇaṃ sammā pekkhitattā sammāñāṇaṃ vuccati, itaraṃ pana jhānādipaccavekkhaṇañāṇaṃ sammādiṭṭhiyāva saṅgayhati. Rūpārūpasamāpattilābhitāmattena vaṭṭato avimuttāyeva samānā ‘‘vimuttā maya’’nti evaṃsaññino. Pakatipurisantarañāṇasaṅkhātāyaṃ, guṇaviyuttassa attano sakattani avaṭṭhānasaṅkhātāyaṃ, attano mahābrahmunā salokatā tassa samīpatāsaṃyujjanasaṅkhātāyaṃ vā avimuttiyaṃ vimuttisaññino. Ekantākusalatāya hīnattā pāpikā. Ayāthāvatāya viparītā. Yathāvuttenāti ‘‘avimuttāyeva samānā’’ti vuttappakārena. ‘‘Mayamettha sammādiṭṭhi bhavissāmā’’tiādīsu phalasammādiṭṭhiādīnipi maggasammādiṭṭhiādipakkhikānevāti adhippāyena ‘‘phalasampayuttāni…pe… veditabbā’’ti vuttaṃ. Sabbepi pana phaladhamme vimuttikkhandhasaṅgahato ‘‘vimuttī’’ti vuccamāne na koci virodho. Ettha sammāvimuttisaṅkhāte sallekhavatthumhi.
яад̣̇и нийваран̣авасзна вуд̇д̇аани, д̇асмаа д̇ийн̣зва вуд̇д̇аанийд̇и ааха ‘‘абхиж̇жхаалуу’’д̇иаад̣̇и. барияудтаанаббад̇д̇аа т̇инамид̣̇д̇хабарияудтид̇аа. яасса д̇хаммасса ад̇т̇ид̇ааяа уд̣̇д̇хад̇аа наама хонд̇и, со д̇хаммо уд̣̇д̇хажжанд̇и ааха ‘‘уд̣̇д̣̇ажжзна саманнааг̇ад̇аад̇и уд̣̇д̇хад̇аа’’д̇и. вижинанд̇аад̇и д̇хаммод̇и ваа ад̇хаммод̇и ваа аад̣̇инаа яам̣ гин̃жи сабхаавам̣ винижчинанд̇аа. убанааханасийлаад̇и барасса ад̇д̇ано жид̇д̇з ануб̣анд̇ханасийлаа. иссанд̇ийд̇и усууяанд̇и. сатаяанд̇ийд̇и сатаа ан̃н̃ат̇аа ад̇д̇аанам̣ ан̃н̃ат̇аа бавзд̣̇анагаа. д̇з бана яасмаа на яат̇аабхууд̇аваад̣̇ино, д̇асмаа ааха ‘‘на саммаа бхаасанд̇ийд̇и вуд̇д̇ам̣ ход̇ий’’д̇и. вуд̇д̇абажжанийганаязнаад̇и ‘‘на год̇ханаа аггод̇ханаа’’д̇иаад̣̇инаа вуд̇д̇аад̇т̇абадибагканаязна.
Yadi nīvaraṇavasena vuttāni, tasmā tīṇeva vuttānīti āha ‘‘abhijjhālū’’tiādi. Pariyuṭṭhānappattā thinamiddhapariyuṭṭhitā. Yassa dhammassa atthitāya uddhatā nāma honti, so dhammo uddhaccanti āha ‘‘uddaccena samannāgatāti uddhatā’’ti. Vicinantāti dhammoti vā adhammoti vā ādinā yaṃ kiñci sabhāvaṃ vinicchinantā. Upanāhanasīlāti parassa attano citte anubandhanasīlā. Issantīti usūyanti. Saṭhayantīti saṭhā aññathā attānaṃ aññathā pavedanakā. Te pana yasmā na yathābhūtavādino, tasmā āha ‘‘na sammā bhāsantīti vuttaṃ hotī’’ti. Vuttapaccanīkanayenāti ‘‘na kodhanā akkodhanā’’tiādinā vuttaatthapaṭipakkhanayena.
д̣̇угкам̣ важо зд̇зсу виббадигуулаг̇г̇аахид̇ааяа вибажжанийгаг̇аахзсууд̇и д̣̇уб̣б̣ажаа. д̇з бана важанагкамаа на хонд̇ийд̇и ааха ‘‘вад̇д̇ум̣ д̣̇угкаа’’д̇иаад̣̇и. хийнаажаарад̇ааяа д̣̇угкасса ваа самбаабагад̇ааяа баабагаа. асад̣̇д̇хаммавасзнаад̇и асаббурисад̇хаммавасзна. ад̇д̇анаа висзсид̇аб̣б̣авасзна гааяавин̃н̃ад̇д̇иаад̣̇ийнам̣ гааяагаммад̣̇ваараад̣̇ибхааво вияа ассад̣̇д̇хияаад̣̇иасад̣̇д̇хаммасаманнааг̇амзнаасад̇ам̣ асаббурисаанам̣ д̇хаммаананд̇и д̇ааниязва ассад̣̇д̇хияаад̣̇ийни асад̣̇д̇хаммаа наама, д̇зсам̣ васзнааха ‘‘сад̣̇д̇хаа зд̇зсам̣ над̇т̇ий’’д̇и яат̇аа д̇ам̣ ‘‘д̣̇уббан̃н̃аа’’д̇и. суд̇д̇аг̇зяяаад̣̇и аббам̣ суд̇ам̣ зд̇зсанд̇и аббассуд̇аа, суд̇зна анубабаннаа. над̇т̇ийд̇и г̇ахзд̇аб̣б̣анд̇и иминаа абхаавад̇т̇о аяам̣ абба-сад̣̇д̣̇о ‘‘аббад̣ам̣самагасаваад̇аад̇абасарийсабасампассаана’’нд̇иаад̣̇ийсу (а. ни. 10.11) вияаад̇и д̣̇ассзд̇и. саммаабадибад̇д̇ияаа анаарамбханад̇о гужчид̇аа г̇аараяхаа сийд̣̇анд̇и осийд̣̇анд̇и сам̣гилзсабагкзд̇и гусийд̇аа д̣̇а-гаарасса д̇а-гаарам̣ гад̇ваа. агусалаанам̣ д̇хаммаанам̣ бахаанааяа гусалаанам̣ д̇хаммаанам̣ убасамбад̣̇ааяа аарад̣̇д̇хам̣ баг̇г̇ахид̇ам̣ вийрияам̣ зд̇зсанд̇и аарад̣̇д̇хавийрияаа. ануббаад̣̇анзна мудтаа надтаа сад̇и зд̇зсанд̇и мудтассад̇ий. д̣̇удтаад̇и д̣̇уусид̇аа. д̣̇уббан̃н̃аа наама д̣̇уусид̇абхааво бадибагкзна винаасид̇абхаавод̇и ааха ‘‘надтабан̃н̃аад̇и вуд̇д̇ам̣ ход̇ий’’д̇и. хздтаа саммаад̣̇идтиг̇г̇ахан̣зна гаммассагад̇аабан̃н̃ааяа маг̇г̇асаммаад̣̇идтияаа жа г̇ахид̇ад̇д̇аа суб̣б̣ажагаляаан̣амид̇д̇ад̇аабариваараахи ид̇ха сад̣̇д̇хаад̣̇ийхи вибассанаасамбхаарасса уд̣̇д̇хадад̇д̇аа жа вуд̇д̇ам̣ ‘‘ид̇ха вибассанаабан̃н̃аа взд̣̇ид̇аб̣б̣аа’’д̇и. д̇знааха ‘‘вибассанаасамбхааро хий’’д̇иаад̣̇и. яуд̇д̇им̣ анабзгкид̇вааби аяамад̇т̇о г̇ахзд̇аб̣б̣од̇и д̣̇ассзнд̇о ааха ‘‘бораан̣аанам̣ аан̣аа’’д̇и.
Dukkhaṃ vaco etesu vippaṭikūlaggāhitāya vipaccanīkagāhesūti dubbacā. Te pana vacanakkhamā na hontīti āha ‘‘vattuṃ dukkhā’’tiādi. Hīnācāratāya dukkhassa vā sampāpakatāya pāpakā. Asaddhammavasenāti asappurisadhammavasena. Attanā visesitabbavasena kāyaviññattiādīnaṃ kāyakammadvārādibhāvo viya assaddhiyādiasaddhammasamannāgamenaasataṃ asappurisānaṃ dhammānanti tāniyeva assaddhiyādīni asaddhammā nāma, tesaṃ vasenāha ‘‘saddhā etesaṃ natthī’’ti yathā taṃ ‘‘duppaññā’’ti. Suttageyyādi appaṃ sutaṃ etesanti appassutā, sutena anupapannā. Natthīti gahetabbanti iminā abhāvattho ayaṃ appa-saddo ‘‘appaḍaṃsamakasavātātapasarīsapasamphassāna’’ntiādīsu (a. ni. 10.11) viyāti dasseti. Sammāpaṭipattiyā anārambhanato kucchitā gārayhā sīdanti osīdanti saṃkilesapakkheti kusītā da-kārassa ta-kāraṃ katvā. Akusalānaṃ dhammānaṃ pahānāya kusalānaṃ dhammānaṃ upasampadāya āraddhaṃ paggahitaṃ vīriyaṃ etesanti āraddhavīriyā. Anuppādanena muṭṭhā naṭṭhā sati etesanti muṭṭhassatī. Duṭṭhāti dūsitā. Duppaññā nāma dūsitabhāvo paṭipakkhena vināsitabhāvoti āha ‘‘naṭṭhapaññāti vuttaṃ hotī’’ti. Heṭṭhā sammādiṭṭhiggahaṇena kammassakatāpaññāya maggasammādiṭṭhiyā ca gahitattā subbacakalyāṇamittatāparivārāhi idha saddhādīhi vipassanāsambhārassa uddhaṭattā ca vuttaṃ ‘‘idha vipassanāpaññā veditabbā’’ti. Tenāha ‘‘vipassanāsambhāro hī’’tiādi. Yuttiṃ anapekkhitvāpi ayamattho gahetabboti dassento āha ‘‘porāṇānaṃ āṇā’’ti.
логуд̇д̇араг̇ун̣аанам̣ анд̇арааяагаранд̇и логуд̇д̇араг̇ун̣аанам̣ ад̇хиг̇амасса анд̇арааяагарам̣. санд̣̇идтинд̇и сам̣ ад̇д̇ано д̣̇идтим̣, яам̣ ваа д̇ам̣ ваа ад̇д̇анаа яат̇ааг̇ахид̇ад̣̇идтинд̇и ад̇т̇о. сабхаавам̣ ад̇иггамид̇ваа барад̇о аамасанад̇о бараамаасий. д̣̇ал̣хаг̇г̇аахийд̇и ‘‘ид̣̇амзва сажжа’’нд̇и т̇ираг̇г̇аахаг̇г̇аахий. бадиниссаг̇г̇ийд̇и бадиниссаж̇ж̇анаго. гуммоваад̇и яат̇аа гажчабо ад̇д̇ано баад̣̇аад̣̇игз ан̇г̇з гзнажи гхаддид̇о саб̣б̣аани ан̇г̇аани ад̇д̇ано габаалзязва самод̣̇ахад̇и, на б̣ахи нийхарад̇и, звамаяамби ‘‘на сунд̣̇аро д̇ава г̇аахо, чад̣д̣зхи на’’нд̇и вуд̇д̇о д̇ам̣ на виссаж̇ж̇зд̇и. анд̇оязва ад̇д̇ано хад̣̇аяз зва табзд̇ваа д̇ам̣ вад̣̇ад̇и. гумбхийлаг̇г̇ааханд̇и сам̣сумаараг̇г̇аахам̣. г̇ан̣ханд̇ийд̇и яат̇аа сам̣сумаараа г̇ахид̇ам̣ на виссаж̇ж̇знд̇и, звам̣ г̇ан̣ханд̇и.
Lokuttaraguṇānaṃ antarāyakaranti lokuttaraguṇānaṃ adhigamassa antarāyakaraṃ. Sandiṭṭhinti saṃ attano diṭṭhiṃ, yaṃ vā taṃ vā attanā yathāgahitadiṭṭhinti attho. Sabhāvaṃ atikkamitvā parato āmasanato parāmāsī. Daḷhaggāhīti ‘‘idameva sacca’’nti thiraggāhaggāhī. Paṭinissaggīti paṭinissajjanako. Kummovāti yathā kacchapo attano pādādike aṅge kenaci ghaṭṭito sabbāni aṅgāni attano kapāleyeva samodahati, na bahi nīharati, evamayampi ‘‘na sundaro tava gāho, chaḍḍehi na’’nti vutto taṃ na vissajjeti. Antoyeva attano hadaye eva ṭhapetvā taṃ vadati. Kumbhīlaggāhanti saṃsumāraggāhaṃ. Gaṇhantīti yathā saṃsumārā gahitaṃ na vissajjenti, evaṃ gaṇhanti.
84. звам̣ жад̇ужад̇д̇аалийсааяа аагаарзхийд̇и авихим̣санаад̣̇ийхи жад̇уад̇хигажад̇д̇аалийсаббагаарзхи. гасмаа банзд̇т̇а авихим̣саа аад̣̇ид̇о вуд̇д̇аа? саб̣б̣аг̇ун̣аанам̣ муулабхаавад̇о. авихим̣саад̇и хи гарун̣ааязд̇ам̣ ад̇хиважанам̣, саа жа висзсад̇о сийласса муулагааран̣ам̣ баруубагхаад̇алагкан̣аа д̣̇уссийляаа орамаабанад̇о. яат̇аа хи баан̣аад̇ибаад̇о баруубагхаад̇алагкан̣о, д̇ат̇аа барзсам̣ саабад̇зяяаавахаран̣ам̣, сад̇д̇иббахаарад̇оби д̇ханассаавахааро г̇аруд̇арод̇и. д̇ат̇аа аб̣рахмажарияам̣ г̇аб̣бхад̇хааран̣аад̣̇ид̣̇угкааваханад̇о, барад̣̇аараад̇иггамз бана вад̇д̇аб̣б̣амзва над̇т̇и. барзсам̣ висам̣ваад̣̇анабхзд̣̇анамаммагхадданаанам̣ баруубагхаад̇абхааво баагадо зва, сампаббалаабо ад̇т̇аг̇г̇аахаабанад̇о анад̇т̇уббаад̣̇анад̇о, абхиж̇жхаа ад̣̇иннаад̣̇аанаад̣̇ихзд̇уд̇о, б̣яаабаад̣̇о баан̣аад̇ибаад̇аад̣̇ихзд̇уд̇о, мижчаад̣̇идти саб̣б̣аанад̇т̇ахзд̇уд̇о баруубагхаад̇алагкан̣аа, мижчаад̣̇идти д̇хаммигабадин̃н̃оби баан̣аад̇ибаад̇аад̣̇ийни гарод̇и, барз жа д̇ад̇т̇а нияож̇зд̇и, гиман̇г̇ам̣ бана ид̇арз. вихим̣салагкан̣аа д̣̇уссийляаа орамаа авихим̣салагкан̣аа висзсад̇о сийласса б̣алавагааран̣ам̣. сийлабад̣̇адтаано жа самаад̇хи, самаад̇хибад̣̇адтаанаа жа бан̃н̃аад̇и саб̣б̣аг̇ун̣аанам̣ муулабхууд̇аа авихим̣саа. абижа ул̣аараж̇жхаасаяаанам̣ нисаммагаарийнам̣ д̇хийраанам̣ уд̇д̇амабурисаанам̣ сийлам̣ вияа самаад̇хибан̃н̃ааби барзсам̣ хид̇асукаавахаава самбаж̇ж̇анд̇ийд̇и звамби гарун̣аа саб̣б̣аг̇ун̣аанам̣ мууланд̇и саа аад̣̇ид̇о вуд̇д̇аа.
84.Evaṃcatucattālīsāya ākārehīti avihiṃsanādīhi catuadhikacattālīsappakārehi. Kasmā panettha avihiṃsā ādito vuttā? Sabbaguṇānaṃ mūlabhāvato. Avihiṃsāti hi karuṇāyetaṃ adhivacanaṃ, sā ca visesato sīlassa mūlakāraṇaṃ parūpaghātalakkhaṇā dussīlyā oramāpanato. Yathā hi pāṇātipāto parūpaghātalakkhaṇo, tathā paresaṃ sāpateyyāvaharaṇaṃ, sattippahāratopi dhanassāvahāro garutaroti. Tathā abrahmacariyaṃ gabbhadhāraṇādidukkhāvahanato, paradārātikkame pana vattabbameva natthi. Paresaṃ visaṃvādanabhedanamammaghaṭṭanānaṃ parūpaghātabhāvo pākaṭo eva, samphappalāpo atthaggāhāpanato anatthuppādanato, abhijjhā adinnādānādihetuto, byāpādo pāṇātipātādihetuto, micchādiṭṭhi sabbānatthahetuto parūpaghātalakkhaṇā, micchādiṭṭhi dhammikapaṭiññopi pāṇātipātādīni karoti, pare ca tattha niyojeti, kimaṅgaṃ pana itare. Vihiṃsalakkhaṇā dussīlyā oramā avihiṃsalakkhaṇā visesato sīlassa balavakāraṇaṃ. Sīlapadaṭṭhāno ca samādhi, samādhipadaṭṭhānā ca paññāti sabbaguṇānaṃ mūlabhūtā avihiṃsā. Apica uḷārajjhāsayānaṃ nisammakārīnaṃ dhīrānaṃ uttamapurisānaṃ sīlaṃ viya samādhipaññāpi paresaṃ hitasukhāvahāva sampajjantīti evampi karuṇā sabbaguṇānaṃ mūlanti sā ādito vuttā.
д̇ад̇о барам̣ висзсад̇о ‘‘авихим̣саасамудтаанаа имз д̇хаммаа’’д̇и д̣̇ассанад̇т̇ам̣ гусалагаммабат̇ад̇хаммаа г̇ахид̇аа. д̇ад̇о ид̣̇ам̣ г̇ун̣аанам̣ муулабхууд̇ам̣ сийлам̣, зд̇т̇а бад̇идтид̇зна имз д̇хаммаа уббаад̣̇зд̇аб̣б̣аад̇и д̣̇ассанад̇т̇ам̣ адта саммад̇д̇аа г̇ахид̇аа. д̇зсам̣ висод̇ханааяа бадибаннасса аад̣̇ид̇о звам̣ ход̇ийд̇и д̣̇ассанад̇т̇ам̣ нийваран̣авивзго г̇ахид̇о, аад̣̇ид̇о нийваран̣ад̣̇ваяасса аг̇г̇ахан̣з г̇ахид̇ааг̇ахид̇агааран̣ам̣ адтагат̇ааяа вуд̇д̇амзва. год̇хасса бана б̣яаабаад̣̇ад̇о бхзд̣̇о вад̇т̇асуд̇д̇аван̣н̣анааяам̣ (ма. ни. адта. 1.71) вуд̇д̇анаязнзва взд̣̇ид̇аб̣б̣о. год̇хаад̣̇иббахаанзна жзд̇т̇а саллзкасид̣̇д̇хийд̇и д̣̇ассанад̇т̇ам̣ д̇ад̇о убаггилзсависуд̣̇д̇хи г̇ахид̇аа. саа жа суб̣б̣ажагаляаан̣амид̇д̇ааббамад̇д̇ад̇аахи сиж̇жхад̇ийд̇и д̣̇ассанад̇т̇ам̣ багин̣н̣агаа г̇ахид̇аа. самбаннасоважассад̇аад̣̇иг̇ун̣асса имз д̇хаммаа баарибуурим̣ г̇ажчанд̇и, вибассанам̣ бариб̣руухзд̇ваа арияамаг̇г̇аад̇хиг̇амааяа сам̣вад̇д̇анд̇ийд̇и д̣̇ассанад̇т̇ам̣ сад̣̇д̇хаммаа г̇ахид̇аа. звам̣бхууд̇асса аяам̣ мижчааг̇аахо логуд̇д̇араг̇ун̣аад̇хиг̇амасса анд̇арааяагаро, д̇асмаа со д̣̇уурад̇о важ̇ж̇зд̇аб̣б̣о, звам̣ яат̇аавуд̇д̇ааяа саммаабадибад̇д̇ияаа арияамаг̇г̇ам̣ ад̇хиг̇ажчанд̇о саллзкам̣ мад̇т̇агам̣ баабзд̇ийд̇и д̣̇ассанад̇т̇ам̣ ‘‘санд̣̇идтибараамаасий’’д̇иаад̣̇и вуд̇д̇анд̇и звамзд̇зсам̣ жад̇ужад̇д̇аалийсааяа саллзкаагаараанам̣ г̇ахан̣абаяож̇анам̣ анубуб̣б̣ий жа взд̣̇ид̇аб̣б̣аа. баяог̇ад̇о саллзкабадибад̣̇ам̣ бадибаж̇ж̇ид̇ум̣ асаггонд̇аанам̣ жид̇д̇уббаад̣̇оби б̣ахуубагаарод̇и ааха ‘‘жид̇д̇уббаад̣̇ассаби б̣ахуубагаарад̇ам̣ д̣̇ассзд̇у’’нд̇и.
Tato paraṃ visesato ‘‘avihiṃsāsamuṭṭhānā ime dhammā’’ti dassanatthaṃ kusalakammapathadhammā gahitā. Tato idaṃ guṇānaṃ mūlabhūtaṃ sīlaṃ, ettha patiṭṭhitena ime dhammā uppādetabbāti dassanatthaṃ aṭṭha sammattā gahitā. Tesaṃ visodhanāya paṭipannassa ādito evaṃ hotīti dassanatthaṃ nīvaraṇaviveko gahito, ādito nīvaraṇadvayassa aggahaṇe gahitāgahitakāraṇaṃ aṭṭhakathāya vuttameva. Kodhassa pana byāpādato bhedo vatthasuttavaṇṇanāyaṃ (ma. ni. aṭṭha. 1.71) vuttanayeneva veditabbo. Kodhādippahānena cettha sallekhasiddhīti dassanatthaṃ tato upakkilesavisuddhi gahitā. Sā ca subbacakalyāṇamittaappamattatāhi sijjhatīti dassanatthaṃ pakiṇṇakā gahitā. Sampannasovacassatādiguṇassa ime dhammā pāripūriṃ gacchanti, vipassanaṃ paribrūhetvā ariyamaggādhigamāya saṃvattantīti dassanatthaṃ saddhammā gahitā. Evaṃbhūtassa ayaṃ micchāgāho lokuttaraguṇādhigamassa antarāyakaro, tasmā so dūrato vajjetabbo, evaṃ yathāvuttāya sammāpaṭipattiyā ariyamaggaṃ adhigacchanto sallekhaṃ matthakaṃ pāpetīti dassanatthaṃ ‘‘sandiṭṭhiparāmāsī’’tiādi vuttanti evametesaṃ catucattālīsāya sallekhākārānaṃ gahaṇapayojanaṃ anupubbī ca veditabbā. Payogato sallekhapaṭipadaṃ paṭipajjituṃ asakkontānaṃ cittuppādopi bahūpakāroti āha ‘‘cittuppādassapi bahūpakārataṃ dassetu’’nti.
гусалзсу д̇хаммзсууд̇и авихим̣саад̣̇ийсу яат̇аавуд̇д̇аанаваж̇ж̇ад̇хаммзсу. анувид̇хияанаад̇и жид̇д̇уббаад̣̇асса гааяаваажаахи анувид̇хаанаа. д̇зсам̣ д̇хаммаананд̇и авихим̣саад̣̇ид̇хаммаанам̣, д̇зсам̣ ваа жид̇д̇уббаад̣̇авасзна бавад̇д̇ад̇хаммаанам̣. ид̣̇аани яат̇аавуд̇д̇ад̇хаммам̣ вид̇т̇аарад̇о д̣̇ассзд̇ум̣ ‘‘гасмаа банаа’’д̇иаад̣̇и аарад̣̇д̇хам̣. саран̣аг̇аманам̣ ваажааяа вин̃н̃аабзд̇ум̣ асаггонд̇асса васзна вуд̇д̇ам̣ ‘‘гааязна ваа’’д̇и. ‘‘сийлам̣ гааязна самаад̣̇ияад̇ий’’д̇и зд̇т̇ааби зсзва наяо. зд̇т̇а жа д̇ат̇аа д̇ат̇аа бавад̇д̇асаллахугагаамааважарагусалажид̇д̇уббад̇д̇им̣ убаад̣̇ааяа д̇ат̇ааруубагусалагааяаважийгаммаанам̣ б̣ахуубагаарад̇аа вуд̇д̇аад̇и на сабхаавад̇о жид̇д̇уббаад̣̇асса б̣ахуубагаарад̇ам̣ н̃ааяад̇ийд̇и д̣̇адтаб̣б̣ам̣.
Kusalesudhammesūti avihiṃsādīsu yathāvuttaanavajjadhammesu. Anuvidhiyanāti cittuppādassa kāyavācāhi anuvidhānā. Tesaṃ dhammānanti avihiṃsādidhammānaṃ, tesaṃ vā cittuppādavasena pavattadhammānaṃ. Idāni yathāvuttadhammaṃ vitthārato dassetuṃ ‘‘kasmā panā’’tiādi āraddhaṃ. Saraṇagamanaṃ vācāya viññāpetuṃ asakkontassa vasena vuttaṃ ‘‘kāyena vā’’ti. ‘‘Sīlaṃ kāyena samādiyatī’’ti etthāpi eseva nayo. Ettha ca tathā tathā pavattasallahukakāmāvacarakusalacittuppattiṃ upādāya tathārūpakusalakāyavacīkammānaṃ bahūpakāratā vuttāti na sabhāvato cittuppādassa bahūpakārataṃ ñāyatīti daṭṭhabbaṃ.
85. хид̇аад̇хиг̇амааяаад̇и д̣̇идтад̇хаммигаад̣̇ихид̇асамбад̇д̇ияаа, арияамаг̇г̇аад̇хиг̇амааяа зва ваа. арияамаг̇г̇о хи зганд̇ахид̇ад̇д̇аа хид̇о наама. бариваж̇ж̇анавасзна гаманам̣ бавад̇д̇и бариггамананд̇и ааха ‘‘бариггаманааяа бариваж̇ж̇анад̇т̇ааяаа’’д̇и. саммаад̣̇ассанубааяасам̣вид̇хаанзна авихим̣саа бадияад̇д̇аа саммаасамб̣уд̣̇д̇хзна. сукзнзваад̇и агижчзнзва. зд̇знзва убааязнаад̇и зд̇знзва авихим̣саабад̣̇з вуд̇д̇зна вид̇хинаа. саб̣б̣абад̣̇аанийд̇и сзсаани д̇зжад̇д̇аалийса бад̣̇аани.
85.Hitādhigamāyāti diṭṭhadhammikādihitasampattiyā, ariyamaggādhigamāya eva vā. Ariyamaggo hi ekantahitattā hito nāma. Parivajjanavasena kamanaṃ pavatti parikkamananti āha ‘‘parikkamanāya parivajjanatthāyā’’ti. Sammādassanupāyasaṃvidhānena avihiṃsā paṭiyattā sammāsambuddhena. Sukhenevāti akiccheneva. Eteneva upāyenāti eteneva avihiṃsāpade vuttena vidhinā. Sabbapadānīti sesāni tecattālīsa padāni.
86. агусалаа бадисанд̇хиаж̇анагаа наама уд̣̇д̇хажжасахаг̇ад̇ажид̇д̇уббаад̣̇ад̇хаммаа ан̃н̃зби бавад̇д̇ивибаагамад̇д̇ад̣̇ааяино, д̣̇иннааяа бадисанд̇хияаа вибаагаж̇анагаа, бажжаяавзгаллзна вибажжид̇ум̣ алад̣̇д̇хогаасаа ахосигаммаад̣̇аяо ваа аж̇анагаа. ж̇аад̇ивасзнаад̇и агусалаж̇аад̇ивасзна. ад̇хобхааг̇ан̇г̇аманийяаад̇и абааяаг̇аманийяаа. звам̣наамаад̇и наамаг̇г̇ахан̣зна сабхаавам̣ убалагкзд̇и сад̇и бажжаяасамавааяз д̇ам̣сабхааваанад̇ивад̇д̇анад̇о. д̇знааха ‘‘вибаагагаалз анидтааганд̇авибаагад̇д̇аа’’д̇и. вуд̇д̇анаязнзва гусалабагко взд̣̇ид̇аб̣б̣о. аяам̣ бана висзсо, ид̇ха бадисанд̇хиаж̇анагаа абхин̃н̃аасахаг̇ад̇ад̇хаммаа, сзсам̣ вуд̇д̇асад̣̇исамзва. саб̣б̣з агусалаад̇и зд̇т̇а вихим̣самзгам̣ табзд̇ваа ид̇арз саб̣б̣з агусалаа убамаабхууд̇аа. вихим̣саа хи убамзяяам̣. саб̣б̣з гусалаад̇и зд̇т̇ааби зсзва наяо. зд̇знзва убааязнаад̇и яат̇аа вихим̣саанам̣ убамзяяад̇аа, д̇ад̣̇авасзсаанам̣ гусалаагусалаанам̣ убамаабхааво вуд̇д̇о, иминаа наязна агусалам̣ баан̣аад̇ибаад̇аад̣̇иагусалзна ид̇арзна, гусалан̃жа баан̣аад̇ибаад̇аабадивирад̇иаад̣̇игусалзна ид̇арзна убамзд̇аб̣б̣ам̣.
86.Akusalā paṭisandhiajanakā nāma uddhaccasahagatacittuppādadhammā aññepi pavattivipākamattadāyino, dinnāya paṭisandhiyā vipākajanakā, paccayavekallena vipaccituṃ aladdhokāsā ahosikammādayo vā ajanakā. Jātivasenāti akusalajātivasena. Adhobhāgaṅgamanīyāti apāyagamanīyā. Evaṃnāmāti nāmaggahaṇena sabhāvaṃ upalakkheti sati paccayasamavāye taṃsabhāvānativattanato. Tenāha ‘‘vipākakāle aniṭṭhākantavipākattā’’ti. Vuttanayeneva kusalapakkho veditabbo. Ayaṃ pana viseso, idha paṭisandhiajanakā abhiññāsahagatadhammā, sesaṃ vuttasadisameva. Sabbe akusalāti ettha vihiṃsamekaṃ ṭhapetvā itare sabbe akusalā upamābhūtā. Vihiṃsā hi upameyyaṃ. Sabbe kusalāti etthāpi eseva nayo. Eteneva upāyenāti yathā vihiṃsānaṃ upameyyatā, tadavasesānaṃ kusalākusalānaṃ upamābhāvo vutto, iminā nayena akusalaṃ pāṇātipātādiakusalena itarena, kusalañca pāṇātipātāpaṭiviratiādikusalena itarena upametabbaṃ.
87. бариниб̣б̣аабанзд̇и гилзсабарил̣аахавуубасаманз. барид̇о лимбанадтзна балибам̣ вужжад̇и махаагад̣̇д̣̇амам̣, д̇ам̣ бана зганд̇ад̇о г̇амбхийрамби ход̇ийд̇и ‘‘г̇амбхийрагад̣̇д̣̇амз нимуг̇г̇о’’д̇и вуд̇д̇ам̣. балибам̣ вияа балибанд̇и бан̃жа гаамаг̇ун̣аа вужжанд̇и, д̇асмаа звам̣ ид̣̇аани вужжамаанзна убамобамзяяасам̣санд̣̇ананаязна зд̇т̇а имасмим̣ таанз ад̇т̇аяож̇анаа взд̣̇ид̇аб̣б̣аа. на хи д̇ам̣ гааран̣анд̇и зд̇т̇а гааран̣ам̣ наама хад̇т̇асса ваа баад̣̇асса ваа абалибаннабхааво, со бана над̇т̇и. зса наяо убамзяязби.
87.Parinibbāpaneti kilesapariḷāhavūpasamane. Parito limpanaṭṭhena palipaṃ vuccati mahākaddamaṃ, taṃ pana ekantato gambhīrampi hotīti ‘‘gambhīrakaddamenimuggo’’ti vuttaṃ. Palipaṃ viya palipanti pañca kāmaguṇā vuccanti, tasmā evaṃ idāni vuccamānena upamopameyyasaṃsandananayena ettha imasmiṃ ṭhāne atthayojanā veditabbā. Na hi taṃ kāraṇanti ettha kāraṇaṃ nāma hatthassa vā pādassa vā apalipannabhāvo, so pana natthi. Esa nayo upameyyepi.
д̇ад̇т̇а сияаа гассажи баривид̇агго ‘‘бхаг̇авад̇о д̣̇зсанаанубхаавзна бхигкуаад̣̇аяо гат̇знд̇ий’’д̇и. ‘‘бхаг̇авааязва хи д̇ад̇т̇а уд̣̇д̇харад̇ий’’д̇и вад̇ваа убамааяа д̇ад̣̇ад̇т̇ам̣ вибхаавзд̇ум̣ ‘‘ран̃н̃о’’д̇иаад̣̇и вуд̇д̇ам̣. бут̇уж̇ж̇анаа д̇аавад̇идтанд̇у, саавагасикааббад̇д̇ависзсаанамби арияаанам̣ д̣̇зсанаа сад̇т̇уязва д̣̇зсанаад̇и д̣̇ассзд̇ум̣ ‘‘гин̃жаабий’’д̇иаад̣̇имааха. д̇ат̇аа хи д̇зхи д̣̇зсид̇асуд̇д̇аани б̣уд̣̇д̇хаважанамзва, д̇зсам̣ д̣̇зсанааяа лад̣̇д̇хависзсааби арияаа б̣уд̣̇д̇хабуд̇д̇ааязваад̇и.
Tattha siyā kassaci parivitakko ‘‘bhagavato desanānubhāvena bhikkhuādayo kathentī’’ti. ‘‘Bhagavāyeva hi tattha uddharatī’’ti vatvā upamāya tadatthaṃ vibhāvetuṃ ‘‘rañño’’tiādi vuttaṃ. Puthujjanā tāvatiṭṭhantu, sāvakasikhāppattavisesānampi ariyānaṃ desanā satthuyeva desanāti dassetuṃ ‘‘kiñcāpī’’tiādimāha. Tathā hi tehi desitasuttāni buddhavacanameva, tesaṃ desanāya laddhavisesāpi ariyā buddhaputtāyevāti.
аниб̣б̣исад̇ааяаад̇и аниб̣б̣исзванад̇ааяа. асигкид̇авинаяад̇ааяаад̇и бан̃жаннам̣ винаяаанам̣ саад̣̇арам̣ асигкид̇абхаавзна. д̇з бана винаяаа д̇иссаннам̣ сигкаанам̣ сигкаабанзна ход̇ийд̇и ааха ‘‘д̇иссо сигкаа сигкаабзссад̇ий’’д̇и. гим̣ бана д̇анд̇и? ‘‘таанамзд̇ам̣ виж̇ж̇ад̇ий’’д̇и зд̇т̇а вуд̇д̇ам̣ гим̣ бана таананд̇и ааха ‘‘абалибабалибаннад̇д̇а’’нд̇иаад̣̇и. яасмаа баал̣ияам̣ ‘‘со вад̇а жунд̣̇аа’’д̇иаад̣̇инаа сааман̃н̃ад̇т̇ам̣ убамаабхаавзна г̇ахзд̇ваа висзсад̇т̇о убамзяяабхаавзна вуд̇д̇о, д̇асмаа д̇амад̇т̇ам̣ ‘‘звамад̇т̇о взд̣̇ид̇аб̣б̣о’’д̇иаад̣̇инаа саад̇хааран̣ад̇о вад̇ваа буна асаад̇хааран̣ад̇о виваранд̇о ‘‘гим̣ вуд̇д̇ам̣ ход̇ий’’д̇иаад̣̇имааха. барасса вихим̣саажзд̇анам̣ ниб̣б̣аабзссад̇ийд̇и ид̣̇ам̣ яо авихим̣саасан̇каад̇ам̣ саммаабадибад̇д̇им̣ д̣̇исваа д̣̇идтаануг̇ад̇им̣ аабаж̇ж̇анд̇о д̇хаммад̣̇зсанааяа баро авихим̣саго ход̇и, д̇аад̣̇исам̣ санд̇хааяа вуд̇д̇ам̣. аад̣̇зсанан̃хи д̇асса важананд̇и. д̇знааха ‘‘аяам̣ яаа зсаа вихим̣сагассаа’’д̇и. буб̣б̣з вихим̣сагасса мижчаабадибаж̇ж̇анд̇асса. вихим̣саабахаанааяа маг̇г̇ам̣ бхааваяад̇од̇иаад̣̇инаа ад̇д̇ано зва авихим̣сааяа вихим̣саабариниб̣б̣аанааяа сам̣вад̇д̇анамааха. д̇знааха ‘‘бариниб̣б̣уд̇о вияаа’’д̇иаад̣̇и. саб̣б̣абад̣̇зсууд̇и ‘‘баан̣аад̇ибаад̇иссаа’’д̇иаад̣̇инаа ааг̇ад̇зсу д̇зжад̇д̇аалийсааяа бад̣̇зсу.
Anibbisatāyāti anibbisevanatāya. Asikkhitavinayatāyāti pañcannaṃ vinayānaṃ sādaraṃ asikkhitabhāvena. Te pana vinayā tissannaṃ sikkhānaṃ sikkhāpanena hotīti āha ‘‘tisso sikkhā sikkhāpessatī’’ti. Kiṃ pana tanti? ‘‘Ṭhānametaṃ vijjatī’’ti ettha vuttaṃ kiṃ pana ṭhānanti āha ‘‘apalipapalipannatta’’ntiādi. Yasmā pāḷiyaṃ ‘‘so vata cundā’’tiādinā sāmaññatthaṃ upamābhāvena gahetvā visesattho upameyyabhāvena vutto, tasmā tamatthaṃ ‘‘evamattho veditabbo’’tiādinā sādhāraṇato vatvā puna asādhāraṇato vivaranto ‘‘kiṃ vuttaṃ hotī’’tiādimāha. Parassa vihiṃsācetanaṃ nibbāpessatīti idaṃ yo avihiṃsāsaṅkhātaṃ sammāpaṭipattiṃ disvā diṭṭhānugatiṃ āpajjanto dhammadesanāya paro avihiṃsako hoti, tādisaṃ sandhāya vuttaṃ. Ādesanañhi tassa vacananti. Tenāha ‘‘ayaṃ yā esā vihiṃsakassā’’ti. Pubbe vihiṃsakassa micchāpaṭipajjantassa. Vihiṃsāpahānāya maggaṃ bhāvayatotiādinā attano eva avihiṃsāya vihiṃsāparinibbānāya saṃvattanamāha. Tenāha ‘‘parinibbuto viyā’’tiādi. Sabbapadesūti ‘‘pāṇātipātissā’’tiādinā āgatesu tecattālīsāya padesu.
88. званд̇и д̣̇зсид̇аагаарабараамасанам̣. д̇ассаад̇и саллзкасса. ‘‘ад̇т̇и квзса б̣раахман̣а, барияааяо’’д̇иаад̣̇ийсу (а. ни. 8.11; баараа. 3-10) вияа барияааяа-сад̣̇д̣̇о гааран̣ад̇т̇од̇и ааха ‘‘саллзкагааран̣а’’нд̇и. д̇зсам̣ васзнаад̇и саллзкаанам̣ васзна. мзд̇д̇ааяа убасам̣харан̣авасзна хид̇ам̣ зсанд̇зна. гарун̣ааяа васзна анугамбамаанзна. бариг̇г̇ахзд̇ваад̇и барид̇о г̇ахзд̇ваа, барид̇ваад̇и ад̇т̇о. барижжаад̇и барид̇о ид̇ваа, саманд̇ад̇о парид̇ваа ижжзва ад̇т̇о. маа бамаж̇ж̇ид̇т̇аад̇и ‘‘жхааяат̇аа’’д̇и вуд̇д̇асамат̇авибассанаанам̣ ан̃н̃аан̣зна, ан̃н̃зна ваа гзнажи бамаад̣̇агааран̣зна маа бамаад̣̇ам̣ аабаж̇ж̇ид̇т̇а. нияяаанигасаасанз хи агад̇д̇аб̣б̣агаран̣амби бамаад̣̇од̇и. вибад̇д̇игаалзд̇и сад̇д̇аасаббааяаад̣̇ивибад̇д̇ияуд̇д̇агаалз. яат̇аавуд̇д̇аа бан̃жа барияааяаа ан̃н̃зби саб̣б̣з саасанаг̇ун̣аа ид̇хзва сан̇г̇ахам̣ г̇ажчанд̇ийд̇и ааха ‘‘жхааяат̇а, маа бамаад̣̇ад̇т̇аад̇и д̇умхаагам̣ анусаасаний’’д̇и.
88.Evanti desitākāraparāmasanaṃ. Tassāti sallekhassa. ‘‘Atthi khvesa brāhmaṇa, pariyāyo’’tiādīsu (a. ni. 8.11; pārā. 3-10) viya pariyāya-saddo kāraṇatthoti āha ‘‘sallekhakāraṇa’’nti. Tesaṃ vasenāti sallekhānaṃ vasena. Mettāya upasaṃharaṇavasena hitaṃ esantena. Karuṇāya vasena anukampamānena. Pariggahetvāti parito gahetvā, paritvāti attho. Pariccāti parito itvā, samantato pharitvā icceva attho. Mā pamajjitthāti ‘‘jhāyathā’’ti vuttasamathavipassanānaṃ aññāṇena, aññena vā kenaci pamādakāraṇena mā pamādaṃ āpajjittha. Niyyānikasāsane hi akattabbakaraṇampi pamādoti. Vipattikāleti sattaasappāyādivipattiyuttakāle. Yathāvuttā pañca pariyāyā aññepi sabbe sāsanaguṇā idheva saṅgahaṃ gacchantīti āha ‘‘jhāyatha, mā pamādatthāti tumhākaṃ anusāsanī’’ti.
саллзкасуд̇д̇аван̣н̣анааяа лийнад̇т̇аббагаасанаа самад̇д̇аа.
Sallekhasuttavaṇṇanāya līnatthappakāsanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 8. саллзкасуд̇д̇ам̣ • 8. Sallekhasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 8. саллзкасуд̇д̇аван̣н̣анаа • 8. Sallekhasuttavaṇṇanā
