| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
37. ஸல்லேக²ட்ட²ஞாணனித்³தே³ஸோ
37. Sallekhaṭṭhañāṇaniddeso
88. கத²ங் புது²னானத்தேகத்ததேஜபரியாதா³னே பஞ்ஞா ஸல்லேக²ட்டே² 1 ஞாணங்? புதூ²தி – ராகோ³ புது², தோ³ஸோ புது², மோஹோ புது², கோதோ⁴…பே॰… உபனாஹோ… மக்கோ²… பளாஸோ… இஸ்ஸா… மச்ச²ரியங்… மாயா… ஸாடெ²ய்யங்… த²ம்போ⁴… ஸாரம்போ⁴… மானோ… அதிமானோ… மதோ³… பமாதோ³… ஸப்³பே³ கிலேஸா… ஸப்³பே³ து³ச்சரிதா… ஸப்³பே³ அபி⁴ஸங்கா²ரா… ஸப்³பே³ ப⁴வகா³மிகம்மா.
88. Kathaṃ puthunānattekattatejapariyādāne paññā sallekhaṭṭhe 2 ñāṇaṃ? Puthūti – rāgo puthu, doso puthu, moho puthu, kodho…pe… upanāho… makkho… paḷāso… issā… macchariyaṃ… māyā… sāṭheyyaṃ… thambho… sārambho… māno… atimāno… mado… pamādo… sabbe kilesā… sabbe duccaritā… sabbe abhisaṅkhārā… sabbe bhavagāmikammā.
நானத்தேகத்தந்தி காமச்ச²ந்தோ³ நானத்தங், நெக்க²ம்மங் ஏகத்தங். ப்³யாபாதோ³ நானத்தங், அப்³யாபாதோ³ ஏகத்தங். தி²னமித்³த⁴ங் நானத்தங், ஆலோகஸஞ்ஞா ஏகத்தங். உத்³த⁴ச்சங் நானத்தங், அவிக்கே²போ ஏகத்தங். விசிகிச்சா² நானத்தங், த⁴ம்மவவத்தா²னங் ஏகத்தங். அவிஜ்ஜா நானத்தங், ஞாணங் ஏகத்தங். அரதி நானத்தங், பாமோஜ்ஜங் ஏகத்தங். நீவரணா நானத்தங், பட²மங் ஜா²னங் ஏகத்தங்…பே॰… ஸப்³பே³ கிலேஸா நானத்தங், அரஹத்தமக்³கோ³ ஏகத்தங்.
Nānattekattanti kāmacchando nānattaṃ, nekkhammaṃ ekattaṃ. Byāpādo nānattaṃ, abyāpādo ekattaṃ. Thinamiddhaṃ nānattaṃ, ālokasaññā ekattaṃ. Uddhaccaṃ nānattaṃ, avikkhepo ekattaṃ. Vicikicchā nānattaṃ, dhammavavatthānaṃ ekattaṃ. Avijjā nānattaṃ, ñāṇaṃ ekattaṃ. Arati nānattaṃ, pāmojjaṃ ekattaṃ. Nīvaraṇā nānattaṃ, paṭhamaṃ jhānaṃ ekattaṃ…pe… sabbe kilesā nānattaṃ, arahattamaggo ekattaṃ.
தேஜோதி பஞ்ச தேஜா – சரணதேஜோ, கு³ணதேஜோ, பஞ்ஞாதேஜோ, புஞ்ஞதேஜோ, த⁴ம்மதேஜோ. சரணதேஜேன தேஜிதத்தா து³ஸ்ஸீல்யதேஜங் பரியாதி³யதி. கு³ணதேஜேன தேஜிதத்தா அகு³ணதேஜங் பரியாதி³யதி. பஞ்ஞாதேஜேன தேஜிதத்தா து³ப்பஞ்ஞதேஜங் பரியாதி³யதி. புஞ்ஞதேஜேன தேஜிதத்தா அபுஞ்ஞதேஜங் பரியாதி³யதி. த⁴ம்மதேஜேன தேஜிதத்தா அத⁴ம்மதேஜங் பரியாதி³யதி.
Tejoti pañca tejā – caraṇatejo, guṇatejo, paññātejo, puññatejo, dhammatejo. Caraṇatejena tejitattā dussīlyatejaṃ pariyādiyati. Guṇatejena tejitattā aguṇatejaṃ pariyādiyati. Paññātejena tejitattā duppaññatejaṃ pariyādiyati. Puññatejena tejitattā apuññatejaṃ pariyādiyati. Dhammatejena tejitattā adhammatejaṃ pariyādiyati.
ஸல்லேகோ²தி காமச்ச²ந்தோ³ அஸல்லேகோ², நெக்க²ம்மங் ஸல்லேகோ² . ப்³யாபாதோ³ அஸல்லேகோ², அப்³யாபாதோ³ ஸல்லேகோ². தி²னமித்³த⁴ங் அஸல்லேகோ², ஆலோகஸஞ்ஞா ஸல்லேகோ². உத்³த⁴ச்சங் அஸல்லேகோ², அவிக்கே²போ ஸல்லேகோ². விசிகிச்சா² அஸல்லேகோ², த⁴ம்மவவத்தா²னங் ஸல்லேகோ². அவிஜ்ஜா அஸல்லேகோ², ஞாணங் ஸல்லேகோ². அரதி அஸல்லேகோ², பாமோஜ்ஜங் ஸல்லேகோ². நீவரணா அஸல்லேகோ², பட²மங் ஜா²னங் ஸல்லேகோ²…பே॰… ஸப்³ப³கிலேஸா அஸல்லேகோ², அரஹத்தமக்³கோ³ ஸல்லேகோ². தங் ஞாதட்டே²ன ஞாணங், பஜானநட்டே²ன பஞ்ஞா. தேன வுச்சதி – ‘‘புது²னானத்ததேஜபரியாதா³னே பஞ்ஞா ஸல்லேக²ட்டே² ஞாணங்’’.
Sallekhoti kāmacchando asallekho, nekkhammaṃ sallekho . Byāpādo asallekho, abyāpādo sallekho. Thinamiddhaṃ asallekho, ālokasaññā sallekho. Uddhaccaṃ asallekho, avikkhepo sallekho. Vicikicchā asallekho, dhammavavatthānaṃ sallekho. Avijjā asallekho, ñāṇaṃ sallekho. Arati asallekho, pāmojjaṃ sallekho. Nīvaraṇā asallekho, paṭhamaṃ jhānaṃ sallekho…pe… sabbakilesā asallekho, arahattamaggo sallekho. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘puthunānattatejapariyādāne paññā sallekhaṭṭhe ñāṇaṃ’’.
ஸல்லேக²ட்ட²ஞாணனித்³தே³ஸோ ஸத்ததிங்ஸதிமோ.
Sallekhaṭṭhañāṇaniddeso sattatiṃsatimo.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 37. ஸல்லேக²ட்ட²ஞாணனித்³தே³ஸவண்ணனா • 37. Sallekhaṭṭhañāṇaniddesavaṇṇanā
