| Library / Tipiṭaka / तिपिटक • Tipiṭaka / पटिसम्भिदामग्गपाळि • Paṭisambhidāmaggapāḷi |
३७. सल्लेखट्ठञाणनिद्देसो
37. Sallekhaṭṭhañāṇaniddeso
८८. कथं पुथुनानत्तेकत्ततेजपरियादाने पञ्ञा सल्लेखट्ठे 1 ञाणं? पुथूति – रागो पुथु, दोसो पुथु, मोहो पुथु, कोधो…पे॰… उपनाहो… मक्खो… पळासो… इस्सा… मच्छरियं… माया… साठेय्यं… थम्भो… सारम्भो… मानो… अतिमानो… मदो… पमादो… सब्बे किलेसा… सब्बे दुच्चरिता… सब्बे अभिसङ्खारा… सब्बे भवगामिकम्मा।
88. Kathaṃ puthunānattekattatejapariyādāne paññā sallekhaṭṭhe 2 ñāṇaṃ? Puthūti – rāgo puthu, doso puthu, moho puthu, kodho…pe… upanāho… makkho… paḷāso… issā… macchariyaṃ… māyā… sāṭheyyaṃ… thambho… sārambho… māno… atimāno… mado… pamādo… sabbe kilesā… sabbe duccaritā… sabbe abhisaṅkhārā… sabbe bhavagāmikammā.
नानत्तेकत्तन्ति कामच्छन्दो नानत्तं, नेक्खम्मं एकत्तं। ब्यापादो नानत्तं, अब्यापादो एकत्तं। थिनमिद्धं नानत्तं, आलोकसञ्ञा एकत्तं। उद्धच्चं नानत्तं, अविक्खेपो एकत्तं। विचिकिच्छा नानत्तं, धम्मववत्थानं एकत्तं। अविज्जा नानत्तं, ञाणं एकत्तं। अरति नानत्तं, पामोज्जं एकत्तं। नीवरणा नानत्तं, पठमं झानं एकत्तं…पे॰… सब्बे किलेसा नानत्तं, अरहत्तमग्गो एकत्तं।
Nānattekattanti kāmacchando nānattaṃ, nekkhammaṃ ekattaṃ. Byāpādo nānattaṃ, abyāpādo ekattaṃ. Thinamiddhaṃ nānattaṃ, ālokasaññā ekattaṃ. Uddhaccaṃ nānattaṃ, avikkhepo ekattaṃ. Vicikicchā nānattaṃ, dhammavavatthānaṃ ekattaṃ. Avijjā nānattaṃ, ñāṇaṃ ekattaṃ. Arati nānattaṃ, pāmojjaṃ ekattaṃ. Nīvaraṇā nānattaṃ, paṭhamaṃ jhānaṃ ekattaṃ…pe… sabbe kilesā nānattaṃ, arahattamaggo ekattaṃ.
तेजोति पञ्च तेजा – चरणतेजो, गुणतेजो, पञ्ञातेजो, पुञ्ञतेजो, धम्मतेजो। चरणतेजेन तेजितत्ता दुस्सील्यतेजं परियादियति। गुणतेजेन तेजितत्ता अगुणतेजं परियादियति। पञ्ञातेजेन तेजितत्ता दुप्पञ्ञतेजं परियादियति। पुञ्ञतेजेन तेजितत्ता अपुञ्ञतेजं परियादियति। धम्मतेजेन तेजितत्ता अधम्मतेजं परियादियति।
Tejoti pañca tejā – caraṇatejo, guṇatejo, paññātejo, puññatejo, dhammatejo. Caraṇatejena tejitattā dussīlyatejaṃ pariyādiyati. Guṇatejena tejitattā aguṇatejaṃ pariyādiyati. Paññātejena tejitattā duppaññatejaṃ pariyādiyati. Puññatejena tejitattā apuññatejaṃ pariyādiyati. Dhammatejena tejitattā adhammatejaṃ pariyādiyati.
सल्लेखोति कामच्छन्दो असल्लेखो, नेक्खम्मं सल्लेखो । ब्यापादो असल्लेखो, अब्यापादो सल्लेखो। थिनमिद्धं असल्लेखो, आलोकसञ्ञा सल्लेखो। उद्धच्चं असल्लेखो, अविक्खेपो सल्लेखो। विचिकिच्छा असल्लेखो, धम्मववत्थानं सल्लेखो। अविज्जा असल्लेखो, ञाणं सल्लेखो। अरति असल्लेखो, पामोज्जं सल्लेखो। नीवरणा असल्लेखो, पठमं झानं सल्लेखो…पे॰… सब्बकिलेसा असल्लेखो, अरहत्तमग्गो सल्लेखो। तं ञातट्ठेन ञाणं, पजाननट्ठेन पञ्ञा। तेन वुच्चति – ‘‘पुथुनानत्ततेजपरियादाने पञ्ञा सल्लेखट्ठे ञाणं’’।
Sallekhoti kāmacchando asallekho, nekkhammaṃ sallekho . Byāpādo asallekho, abyāpādo sallekho. Thinamiddhaṃ asallekho, ālokasaññā sallekho. Uddhaccaṃ asallekho, avikkhepo sallekho. Vicikicchā asallekho, dhammavavatthānaṃ sallekho. Avijjā asallekho, ñāṇaṃ sallekho. Arati asallekho, pāmojjaṃ sallekho. Nīvaraṇā asallekho, paṭhamaṃ jhānaṃ sallekho…pe… sabbakilesā asallekho, arahattamaggo sallekho. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘puthunānattatejapariyādāne paññā sallekhaṭṭhe ñāṇaṃ’’.
सल्लेखट्ठञाणनिद्देसो सत्ततिंसतिमो।
Sallekhaṭṭhañāṇaniddeso sattatiṃsatimo.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / पटिसम्भिदामग्ग-अट्ठकथा • Paṭisambhidāmagga-aṭṭhakathā / ३७. सल्लेखट्ठञाणनिद्देसवण्णना • 37. Sallekhaṭṭhañāṇaniddesavaṇṇanā
