| Library / Tipiṭaka / તિપિટક • Tipiṭaka / પટિસમ્ભિદામગ્ગપાળિ • Paṭisambhidāmaggapāḷi |
૩૭. સલ્લેખટ્ઠઞાણનિદ્દેસો
37. Sallekhaṭṭhañāṇaniddeso
૮૮. કથં પુથુનાનત્તેકત્તતેજપરિયાદાને પઞ્ઞા સલ્લેખટ્ઠે 1 ઞાણં? પુથૂતિ – રાગો પુથુ, દોસો પુથુ, મોહો પુથુ, કોધો…પે॰… ઉપનાહો… મક્ખો… પળાસો… ઇસ્સા… મચ્છરિયં… માયા… સાઠેય્યં… થમ્ભો… સારમ્ભો… માનો… અતિમાનો… મદો… પમાદો… સબ્બે કિલેસા… સબ્બે દુચ્ચરિતા… સબ્બે અભિસઙ્ખારા… સબ્બે ભવગામિકમ્મા.
88. Kathaṃ puthunānattekattatejapariyādāne paññā sallekhaṭṭhe 2 ñāṇaṃ? Puthūti – rāgo puthu, doso puthu, moho puthu, kodho…pe… upanāho… makkho… paḷāso… issā… macchariyaṃ… māyā… sāṭheyyaṃ… thambho… sārambho… māno… atimāno… mado… pamādo… sabbe kilesā… sabbe duccaritā… sabbe abhisaṅkhārā… sabbe bhavagāmikammā.
નાનત્તેકત્તન્તિ કામચ્છન્દો નાનત્તં, નેક્ખમ્મં એકત્તં. બ્યાપાદો નાનત્તં, અબ્યાપાદો એકત્તં. થિનમિદ્ધં નાનત્તં, આલોકસઞ્ઞા એકત્તં. ઉદ્ધચ્ચં નાનત્તં, અવિક્ખેપો એકત્તં. વિચિકિચ્છા નાનત્તં, ધમ્મવવત્થાનં એકત્તં. અવિજ્જા નાનત્તં, ઞાણં એકત્તં. અરતિ નાનત્તં, પામોજ્જં એકત્તં. નીવરણા નાનત્તં, પઠમં ઝાનં એકત્તં…પે॰… સબ્બે કિલેસા નાનત્તં, અરહત્તમગ્ગો એકત્તં.
Nānattekattanti kāmacchando nānattaṃ, nekkhammaṃ ekattaṃ. Byāpādo nānattaṃ, abyāpādo ekattaṃ. Thinamiddhaṃ nānattaṃ, ālokasaññā ekattaṃ. Uddhaccaṃ nānattaṃ, avikkhepo ekattaṃ. Vicikicchā nānattaṃ, dhammavavatthānaṃ ekattaṃ. Avijjā nānattaṃ, ñāṇaṃ ekattaṃ. Arati nānattaṃ, pāmojjaṃ ekattaṃ. Nīvaraṇā nānattaṃ, paṭhamaṃ jhānaṃ ekattaṃ…pe… sabbe kilesā nānattaṃ, arahattamaggo ekattaṃ.
તેજોતિ પઞ્ચ તેજા – ચરણતેજો, ગુણતેજો, પઞ્ઞાતેજો, પુઞ્ઞતેજો, ધમ્મતેજો. ચરણતેજેન તેજિતત્તા દુસ્સીલ્યતેજં પરિયાદિયતિ. ગુણતેજેન તેજિતત્તા અગુણતેજં પરિયાદિયતિ. પઞ્ઞાતેજેન તેજિતત્તા દુપ્પઞ્ઞતેજં પરિયાદિયતિ. પુઞ્ઞતેજેન તેજિતત્તા અપુઞ્ઞતેજં પરિયાદિયતિ. ધમ્મતેજેન તેજિતત્તા અધમ્મતેજં પરિયાદિયતિ.
Tejoti pañca tejā – caraṇatejo, guṇatejo, paññātejo, puññatejo, dhammatejo. Caraṇatejena tejitattā dussīlyatejaṃ pariyādiyati. Guṇatejena tejitattā aguṇatejaṃ pariyādiyati. Paññātejena tejitattā duppaññatejaṃ pariyādiyati. Puññatejena tejitattā apuññatejaṃ pariyādiyati. Dhammatejena tejitattā adhammatejaṃ pariyādiyati.
સલ્લેખોતિ કામચ્છન્દો અસલ્લેખો, નેક્ખમ્મં સલ્લેખો . બ્યાપાદો અસલ્લેખો, અબ્યાપાદો સલ્લેખો. થિનમિદ્ધં અસલ્લેખો, આલોકસઞ્ઞા સલ્લેખો. ઉદ્ધચ્ચં અસલ્લેખો, અવિક્ખેપો સલ્લેખો. વિચિકિચ્છા અસલ્લેખો, ધમ્મવવત્થાનં સલ્લેખો. અવિજ્જા અસલ્લેખો, ઞાણં સલ્લેખો. અરતિ અસલ્લેખો, પામોજ્જં સલ્લેખો. નીવરણા અસલ્લેખો, પઠમં ઝાનં સલ્લેખો…પે॰… સબ્બકિલેસા અસલ્લેખો, અરહત્તમગ્ગો સલ્લેખો. તં ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘પુથુનાનત્તતેજપરિયાદાને પઞ્ઞા સલ્લેખટ્ઠે ઞાણં’’.
Sallekhoti kāmacchando asallekho, nekkhammaṃ sallekho . Byāpādo asallekho, abyāpādo sallekho. Thinamiddhaṃ asallekho, ālokasaññā sallekho. Uddhaccaṃ asallekho, avikkhepo sallekho. Vicikicchā asallekho, dhammavavatthānaṃ sallekho. Avijjā asallekho, ñāṇaṃ sallekho. Arati asallekho, pāmojjaṃ sallekho. Nīvaraṇā asallekho, paṭhamaṃ jhānaṃ sallekho…pe… sabbakilesā asallekho, arahattamaggo sallekho. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘puthunānattatejapariyādāne paññā sallekhaṭṭhe ñāṇaṃ’’.
સલ્લેખટ્ઠઞાણનિદ્દેસો સત્તતિંસતિમો.
Sallekhaṭṭhañāṇaniddeso sattatiṃsatimo.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / ખુદ્દકનિકાય (અટ્ઠકથા) • Khuddakanikāya (aṭṭhakathā) / પટિસમ્ભિદામગ્ગ-અટ્ઠકથા • Paṭisambhidāmagga-aṭṭhakathā / ૩૭. સલ્લેખટ્ઠઞાણનિદ્દેસવણ્ણના • 37. Sallekhaṭṭhañāṇaniddesavaṇṇanā
