| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
8. ஸமாதி⁴கதா²வண்ணனா
8. Samādhikathāvaṇṇanā
625-626. இதா³னி ஸமாதி⁴கதா² நாம ஹோதி. தத்த² யேஸங் ஏகசித்தக்க²ணே உப்பன்னாபி ஏகக்³க³தா ஸமாதா⁴னட்டே²ன ஸமாதீ⁴தி அக்³க³ஹெத்வா ‘‘ஸத்த ரத்திந்தி³வானி ஏகந்தஸுக²படிஸங்வேதீ³ விஹரிது’’ந்திஆதி³வசனங் (ம॰ நி॰ 1.180) நிஸ்ஸாய ‘‘சித்தஸந்ததி ஸமாதீ⁴’’தி லத்³தி⁴, ஸெய்யதா²பி ஸப்³ப³த்தி²வாதா³னஞ்சேவ உத்தராபத²கானஞ்ச; தே ஸந்தா⁴ய சித்தஸந்ததீதி புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நங் ‘‘யதி³ சித்தஸந்ததி ஸமாதி⁴, சித்தஸந்ததி நாம அதீதாபி அத்தி², அனாக³தாபி அத்தி². ந ஹி ஏகங் பச்சுப்பன்னசித்தமேவ சித்தஸந்ததி நாம ஹோதி, கிங் தே ஸப்³பா³பி ஸா ஸமாதீ⁴’’தி சோதே³துங் அதீதாதிஆதி³மாஹ, இதரோ ததா² அனிச்ச²ந்தோ படிக்கி²பதி.
625-626. Idāni samādhikathā nāma hoti. Tattha yesaṃ ekacittakkhaṇe uppannāpi ekaggatā samādhānaṭṭhena samādhīti aggahetvā ‘‘satta rattindivāni ekantasukhapaṭisaṃvedī viharitu’’ntiādivacanaṃ (ma. ni. 1.180) nissāya ‘‘cittasantati samādhī’’ti laddhi, seyyathāpi sabbatthivādānañceva uttarāpathakānañca; te sandhāya cittasantatīti pucchā sakavādissa, paṭiññā itarassa. Atha naṃ ‘‘yadi cittasantati samādhi, cittasantati nāma atītāpi atthi, anāgatāpi atthi. Na hi ekaṃ paccuppannacittameva cittasantati nāma hoti, kiṃ te sabbāpi sā samādhī’’ti codetuṃ atītātiādimāha, itaro tathā anicchanto paṭikkhipati.
நனு அதீதங் நிருத்³த⁴ந்திஆதி³ ‘‘சித்தஸந்ததியங் பச்சுப்பன்னமேவ சித்தங் கிச்சகரங், அதீதானாக³தங் நிருத்³த⁴த்தா அனுப்பன்னத்தா ச நத்தி², கத²ங் தங் ஸமாதி⁴ நாம ஹோதீ’’தி த³ஸ்ஸேதுங் வுத்தங். ஏகசித்தக்க²ணிகோதி புச்சா² பரவாதி³ஸ்ஸ. ததோ யா ஸகஸமயே ‘‘ஸமாதி⁴ங், பி⁴க்க²வே, பா⁴வேதா²’’திஆதீ³ஸு பச்சுப்பன்னகுஸலசித்தஸம்பயுத்தா ஏகக்³க³தா ஸமாதீ⁴தி வுத்தா, தங் ஸந்தா⁴ய படிஞ்ஞா ஸகவாதி³ஸ்ஸ. சக்கு²விஞ்ஞாணஸமங்கீ³திஆதி³ ‘‘ஏகசித்தக்க²ணிகோ’’தி வசனமத்தங் க³ஹெத்வா ச²லேன வுத்தங், தேனேவ ஸகவாதி³னா படிக்கி²த்தங். நனு வுத்தங் ப⁴க³வதாதி ஸுத்தங் புரிமபச்சி²மவஸேன பவத்தமானஸ்ஸ ஸமாதி⁴ஸ்ஸ அப்³போ³கிண்ணதங் ஸாதே⁴தி, ந ஸந்ததியா ஸமாதி⁴பா⁴வங், தஸ்மா அஸாத⁴கந்தி.
Nanuatītaṃ niruddhantiādi ‘‘cittasantatiyaṃ paccuppannameva cittaṃ kiccakaraṃ, atītānāgataṃ niruddhattā anuppannattā ca natthi, kathaṃ taṃ samādhi nāma hotī’’ti dassetuṃ vuttaṃ. Ekacittakkhaṇikoti pucchā paravādissa. Tato yā sakasamaye ‘‘samādhiṃ, bhikkhave, bhāvethā’’tiādīsu paccuppannakusalacittasampayuttā ekaggatā samādhīti vuttā, taṃ sandhāya paṭiññā sakavādissa. Cakkhuviññāṇasamaṅgītiādi ‘‘ekacittakkhaṇiko’’ti vacanamattaṃ gahetvā chalena vuttaṃ, teneva sakavādinā paṭikkhittaṃ. Nanu vuttaṃ bhagavatāti suttaṃ purimapacchimavasena pavattamānassa samādhissa abbokiṇṇataṃ sādheti, na santatiyā samādhibhāvaṃ, tasmā asādhakanti.
ஸமாதி⁴கதா²வண்ணனா.
Samādhikathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (113) 8. ஸமாதி⁴கதா² • (113) 8. Samādhikathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 8. ஸமாதி⁴கதா²வண்ணனா • 8. Samādhikathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 8. ஸமாதி⁴கதா²வண்ணனா • 8. Samādhikathāvaṇṇanā
