| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5-6. ஸமஜீவீஸுத்தத்³வயவண்ணனா
5-6. Samajīvīsuttadvayavaṇṇanā
55-56. பஞ்சமே தேனுபஸங்கமீதி கிமத்த²ங் உபஸங்கமி? அனுக்³க³ண்ஹனத்த²ங். ததா²க³தோ ஹி தங் ரட்ட²ங் பாபுணந்தோ இமேஸங்யேவ த்³வின்னங் ஸங்க³ண்ஹனத்தா²ய பாபுணாதி. நகுலபிதா கிர பஞ்ச ஜாதிஸதானி ததா²க³தஸ்ஸ பிதா அஹோஸி, பஞ்ச ஜாதிஸதானி மஹாபிதா, பஞ்ச ஜாதிஸதானி சூளபிதா. நகுலமாதாபி பஞ்ச ஜாதிஸதானி ததா²க³தஸ்ஸ மாதா அஹோஸி, பஞ்ச ஜாதிஸதானி மஹாமாதா, பஞ்ச ஜாதிஸதானி சூளமாதா. தே ஸத்து² தி³ட்ட²காலதோ பட்டா²ய புத்தஸினேஹங் படிலபி⁴த்வா ‘‘ஹந்தாத, ஹந்தாதா’’தி வச்ச²கங் தி³ஸ்வா வச்ச²கி³த்³தி⁴னீ கா³வீ விய விரவமானா உபஸங்கமித்வா பட²மத³ஸ்ஸனேனேவ ஸோதாபன்னா ஜாதா. நிவேஸனே பஞ்சஸதானங் பி⁴க்கூ²னங் ஆஸனானி ஸதா³ பஞ்ஞத்தானேவ ஹொந்தி. இதி ப⁴க³வா தேஸங் அனுக்³க³ண்ஹனத்தா²ய உபஸங்கமி. அதிசரிதாதி அதிக்கமிதா. அபி⁴ஸம்பராயஞ்சாதி பரலோகே ச. ஸமஸத்³தா⁴தி ஸத்³தா⁴ய ஸமா ஏகஸதி³ஸா. ஸீலாதீ³ஸுபி ஏஸேவ நயோ. ச²ட்ட²ங் கேவலங் பி⁴க்கூ²னங் தே³ஸிதங். ஸேஸமெத்த² தாதி³ஸமேவ.
55-56. Pañcame tenupasaṅkamīti kimatthaṃ upasaṅkami? Anuggaṇhanatthaṃ. Tathāgato hi taṃ raṭṭhaṃ pāpuṇanto imesaṃyeva dvinnaṃ saṅgaṇhanatthāya pāpuṇāti. Nakulapitā kira pañca jātisatāni tathāgatassa pitā ahosi, pañca jātisatāni mahāpitā, pañca jātisatāni cūḷapitā. Nakulamātāpi pañca jātisatāni tathāgatassa mātā ahosi, pañca jātisatāni mahāmātā, pañca jātisatāni cūḷamātā. Te satthu diṭṭhakālato paṭṭhāya puttasinehaṃ paṭilabhitvā ‘‘hantāta, hantātā’’ti vacchakaṃ disvā vacchagiddhinī gāvī viya viravamānā upasaṅkamitvā paṭhamadassaneneva sotāpannā jātā. Nivesane pañcasatānaṃ bhikkhūnaṃ āsanāni sadā paññattāneva honti. Iti bhagavā tesaṃ anuggaṇhanatthāya upasaṅkami. Aticaritāti atikkamitā. Abhisamparāyañcāti paraloke ca. Samasaddhāti saddhāya samā ekasadisā. Sīlādīsupi eseva nayo. Chaṭṭhaṃ kevalaṃ bhikkhūnaṃ desitaṃ. Sesamettha tādisameva.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
5. பட²மஸமஜீவீஸுத்தங் • 5. Paṭhamasamajīvīsuttaṃ
6. து³தியஸமஜீவீஸுத்தங் • 6. Dutiyasamajīvīsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5-6. ஸமஜீவீஸுத்தாதி³வண்ணனா • 5-6. Samajīvīsuttādivaṇṇanā
