Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၃. အနုတ္တရိယဝဂ္ဂော
3. Anuttariyavaggo
၁-၂. သာမကသုတ္တာဒိဝဏ္ဏနာ
1-2. Sāmakasuttādivaṇṇanā
၂၁-၂၂. တတိယသ္သ ပဌမေ ကေဝလကပ္ပန္တိ ဧတ္ထ ကေဝလ-သဒ္ဒော အနဝသေသတ္ထော, ကပ္ပ-သဒ္ဒော သမန္တဘာဝတ္ထော။ တသ္မာ ကေဝလကပ္ပံ ပောက္ခရဏိယန္တိ ဧဝမတ္ထော ဒဋ္ဌဗ္ဗော။ အနဝသေသံ ဖရိတုံ သမတ္ထသ္သပိ ဩဘာသသ္သ ကေနစိ ကာရဏေန ဧကဒေသဖရဏမ္ပိ သိယာ, အယံ ပန သဗ္ဗသောဝ ဖရတီတိ ဒသ္သေတုံ သမန္တတ္ထော ကပ္ပ-သဒ္ဒော ဂဟိတော။ အတ္တနော ဩဘာသေန ဖရိတ္ဝာတိ ဝတ္ထာလင္ကာရသရီရသမုဋ္ဌိတေန ဩဘာသေန ဖရိတ္ဝာ, စန္ဒိမာ ဝိယ ဧကောဘာသံ ဧကပဇ္ဇောတံ ကရိတ္ဝာတိ အတ္ထော။ သမနုညောတိ သမ္မဒေဝ ကတမနုညော။ တေနာဟ ‘‘သမာနစိတ္တော’’တိ, သမာနဇ္ဈာသယောတိ အတ္ထော။ ဒုက္ခံ ဝစော ဧတသ္မိန္တိ ဒုဗ္ဗစော, တသ္သ ကမ္မံ ဒောဝစသ္သံ, တသ္သ ပုဂ္ဂလသ္သ အနာဒရိယဝသေန ပဝတ္တာ စေတနာ, တသ္သ ဘာဝော အတ္ထိတာ ဒောဝစသ္သတာ။ အထ ဝာ ဒောဝစသ္သမေဝ ဒောဝစသ္သတာ။ သာ အတ္ထတော သင္ခာရက္ခန္ဓော ဟောတိ။ စေတနာပဓာနော ဟိ သင္ခာရက္ခန္ဓော။ စတုန္နံ ဝာ ခန္ဓာနံ အပဒက္ခိဏဂ္ဂာဟိတာကာရေန ပဝတ္တာနံ ဧတံ အဓိဝစနန္တိ ဝဒန္တိ။ ပာပာ အသ္သဒ္ဓာဒယော ပုဂ္ဂလာ ဧတသ္သ မိတ္တာတိ ပာပမိတ္တော, တသ္သ ဘာဝော ပာပမိတ္တတာ။ သာပိ အတ္ထတော ဒောဝစသ္သတာ ဝိယ ဒဋ္ဌဗ္ဗာ။ ယာယ ဟိ စေတနာယ ပုဂ္ဂလော ပာပမိတ္တော ပာပသမ္ပဝင္ကော နာမ ဟောတိ, သာ စေတနာ ပာပမိတ္တတာ။ စတ္တာရောပိ ဝာ အရူပိနော ခန္ဓာ တဒာကာရပ္ပဝတ္တာ ပာပမိတ္တတာ။ ဒုတိယံ ဥတ္တာနမေဝ။
21-22. Tatiyassa paṭhame kevalakappanti ettha kevala-saddo anavasesattho, kappa-saddo samantabhāvattho. Tasmā kevalakappaṃ pokkharaṇiyanti evamattho daṭṭhabbo. Anavasesaṃ pharituṃ samatthassapi obhāsassa kenaci kāraṇena ekadesapharaṇampi siyā, ayaṃ pana sabbasova pharatīti dassetuṃ samantattho kappa-saddo gahito. Attano obhāsena pharitvāti vatthālaṅkārasarīrasamuṭṭhitena obhāsena pharitvā, candimā viya ekobhāsaṃ ekapajjotaṃ karitvāti attho. Samanuññoti sammadeva katamanuñño. Tenāha ‘‘samānacitto’’ti, samānajjhāsayoti attho. Dukkhaṃ vaco etasminti dubbaco, tassa kammaṃ dovacassaṃ, tassa puggalassa anādariyavasena pavattā cetanā, tassa bhāvo atthitā dovacassatā. Atha vā dovacassameva dovacassatā. Sā atthato saṅkhārakkhandho hoti. Cetanāpadhāno hi saṅkhārakkhandho. Catunnaṃ vā khandhānaṃ apadakkhiṇaggāhitākārena pavattānaṃ etaṃ adhivacananti vadanti. Pāpā assaddhādayo puggalā etassa mittāti pāpamitto, tassa bhāvo pāpamittatā. Sāpi atthato dovacassatā viya daṭṭhabbā. Yāya hi cetanāya puggalo pāpamitto pāpasampavaṅko nāma hoti, sā cetanā pāpamittatā. Cattāropi vā arūpino khandhā tadākārappavattā pāpamittatā. Dutiyaṃ uttānameva.
သာမကသုတ္တာဒိဝဏ္ဏနာ နိဋ္ဌိတာ။
Sāmakasuttādivaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya
၁. သာမကသုတ္တံ • 1. Sāmakasuttaṃ
၂. အပရိဟာနိယသုတ္တံ • 2. Aparihāniyasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁-၂. သာမကသုတ္တာဒိဝဏ္ဏနာ • 1-2. Sāmakasuttādivaṇṇanā