| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༣. སམཎབྲཱཧྨཎསུཏྟཝཎྞནཱ
3. Samaṇabrāhmaṇasuttavaṇṇanā
༡༣. ཡེ པཙྩཡསམཝཱཡེ ཏེནཏྟབྷཱཝེན སཙྩཱནི པཊིཝིཛ྄ཛྷིཏུཾ སམཏྠཱ, ཏེ བཱཧིརཀལིངྒེ ཋིཏཱཔི ཏེནེཝ ཏཏྠ སམཏྠཏཱཡོགེན བྷཱཝིནཾ སམིཏབཱཧིཏཔཱཔཏཾ ཨཔེཀྑིཏྭཱ སམཎསམྨཏཱཡེཝ བྲཱཧྨཎསམྨཏཱཡེཝཱཏི ཏེ ནིཝཏྟེཏུཾ ‘‘སཙྩཱནི པཊིཝིཛ྄ཛྷིཏུཾ ཨསམཏྠཱ’’ཏི ཝུཏྟཾ། དུཀྑསཙྩཝསེནཱཏི དུཀྑཨརིཡསཙྩཝསེན། ཨཉྙཐཱ ཀཐཾ བཱཧིརཀཱཔི ཛརཱམརཎཾ དུཀྑནྟི ན ཛཱནནྟི། སཙྩདེསནཱབྷཱཝཏོ ‘‘སཧ ཏཎྷཱཡཱ’’ཏི ཝུཏྟནྟི ཀེཙི། ཏཾ ན སུཊྛུ། ཡསྨཱ ཏཏྠ ཏཏྠ བྷཝེ པཋམཱབྷིནིབྦཏྟི, ཨིདྷ ཛཱཏཱིཏི ཨདྷིཔྤེཏཱ, སཱ ཙ ཏཎྷཱ ཨེཝ སནྟཱནེན, ཏཎྷེཝ སཱ ཛཱཏི། ཛརཱམརཎཉྩེཏྠ པཱཀཊམེཝ ཨདྷིཔྤེཏཾ, ན ཁཎིཀཾ, ཏསྨཱ སཏཎྷཱ ཨེཝ ཛཱཏིཛརཱམརཎསྶ སམུདཡོཏི བྷཱུཏཀཐནམེཏཾ དཊྛབྦཾ། སམུདཡསཙྩཝསེན ན ཛཱནནྟཱིཏི ཡོཛནཱ། ཨེས ནཡོ སེསཔདེསུཔི། སབྦཔདེསཱུཏི ཡཏྠ ཏཎྷཱ ཝིསེསནབྷཱཝེན ཝཏྟབྦཱ, ཏེསུ སབྦཔདེསུ། ཡེན སམནྣཱགཏཏྟཱ པུགྒལོ པརམཏྠཏོ སམཎོ བྲཱཧྨཎོཏི ཝུཙྩཏི, ཏཾ སཱམཉྙཾ བྲཧྨཉྙཉྩཱཏི ཨཱཧ ‘‘ཨརིཡ…པེ॰… བྲཧྨཉྙཉྩཱ’’ཏི། ཡེན ཧི པཝཏྟིནིམིཏྟེན སམཎ-སདྡོ བྲཱཧྨཎ-སདྡོ ཙ སཀེ ཨཏྠེ ནིརུལ༹ྷོ, ཏསྶ ཝསེན ཨབྷིནྣོཔི ཝེནེཡྻཛ྄ཛྷཱསཡཏོ དྭིདྷཱ ཀཏྭཱ ཝཏྟུཾ ཨརཧཏཱིཏི ཝུཏྟཾ ‘‘ཨུབྷཡཏྠཱཔཱི’’ཏི། ཨེཀཱདསསུ ཋཱནེསུ ཙཏྟཱརི སཙྩཱནི ཀཐེསི ཨཝིཛྫཱསམུདཡསྶ ཨནུདྡྷཊཏྟཱ།
13. Ye paccayasamavāye tenattabhāvena saccāni paṭivijjhituṃ samatthā, te bāhirakaliṅge ṭhitāpi teneva tattha samatthatāyogena bhāvinaṃ samitabāhitapāpataṃ apekkhitvā samaṇasammatāyeva brāhmaṇasammatāyevāti te nivattetuṃ ‘‘saccāni paṭivijjhituṃ asamatthā’’ti vuttaṃ. Dukkhasaccavasenāti dukkhaariyasaccavasena. Aññathā kathaṃ bāhirakāpi jarāmaraṇaṃ dukkhanti na jānanti. Saccadesanābhāvato ‘‘saha taṇhāyā’’ti vuttanti keci. Taṃ na suṭṭhu. Yasmā tattha tattha bhave paṭhamābhinibbatti, idha jātīti adhippetā, sā ca taṇhā eva santānena, taṇheva sā jāti. Jarāmaraṇañcettha pākaṭameva adhippetaṃ, na khaṇikaṃ, tasmā sataṇhā eva jātijarāmaraṇassa samudayoti bhūtakathanametaṃ daṭṭhabbaṃ. Samudayasaccavasena na jānantīti yojanā. Esa nayo sesapadesupi. Sabbapadesūti yattha taṇhā visesanabhāvena vattabbā, tesu sabbapadesu. Yena samannāgatattā puggalo paramatthato samaṇo brāhmaṇoti vuccati, taṃ sāmaññaṃ brahmaññañcāti āha ‘‘ariya…pe… brahmaññañcā’’ti. Yena hi pavattinimittena samaṇa-saddo brāhmaṇa-saddo ca sake atthe niruḷho, tassa vasena abhinnopi veneyyajjhāsayato dvidhā katvā vattuṃ arahatīti vuttaṃ ‘‘ubhayatthāpī’’ti. Ekādasasu ṭhānesu cattāri saccāni kathesi avijjāsamudayassa anuddhaṭattā.
སམཎབྲཱཧྨཎསུཏྟཝཎྞནཱ ནིཊྛིཏཱ།
Samaṇabrāhmaṇasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༣. སམཎབྲཱཧྨཎསུཏྟཾ • 3. Samaṇabrāhmaṇasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༣. སམཎབྲཱཧྨཎསུཏྟཝཎྞནཱ • 3. Samaṇabrāhmaṇasuttavaṇṇanā
