| Library / Tipiṭaka / ཏིཔིཊཀ • Tipiṭaka / ཁུདྡསིཀྑཱ-མཱུལསིཀྑཱ • Khuddasikkhā-mūlasikkhā |
༢༦. སམཱནཱསནིཀནིདྡེསཝཎྞནཱ
26. Samānāsanikaniddesavaṇṇanā
༡༩༥. ཏིཝསྶནྟརམེཀམཱསནཾ བྷིཀྑཱུནཾ ཨནུཉྙཱཏནྟི སམྦནྡྷོ། ཏཏྠ ཨེཀསྨིཾ ཨཱསནེ མཉྩཱདིཀེ དྭིནྣཾ ཨཱསནཾ ནིསཱིདནཾ ཨེཀམཱསནཾ། མ-ཀཱརོ སནྡྷིཛོ། ཀཱིདིསནྟི ཨཱཧ ‘‘ཏིཝསྶནྟར’’ནྟི། ཏིཎྞཾ ཝསྶཱནམནྟརམེཏསྶཱཏི ཏིཝསྶནྟརོ, དྭཱིཧི ཝསྶེཧི མཧནྟཏརོ ཝཱ དཧརཏརོ ཝཱ བྷིཀྑུ, སོ ཨསྶ ཨཏྠཱིཏི ཏིཝསྶནྟརཾ, ཏིཝསྶནྟརཝནྟནྟི ཨཏྠོ། ཡོ པན ཨེཀེན ཝསྶེན མཧནྟཏརོ ཝཱ དཧརཏརོ ཝཱ ཨེཀཝསྶོཡེཝ ཝཱ, ཏབྦནྟཏཱཡ ཝཏྟབྦམེཝ ནཏྠི། ཨཐ ཝཱ ཏིཝསྶནྟརནྟི ཀརཎཏྠེ ཨུཔཡོགཝཙནཾ, ཏིཝསྶནྟརེན སདྡྷིནྟི ཨཏྠོ། ཏམེཝ སམཏྠེཏི ‘‘སཏྟཝསྶེ’’ཙྩཱདིནཱ།
195. Tivassantaramekamāsanaṃ bhikkhūnaṃ anuññātanti sambandho. Tattha ekasmiṃ āsane mañcādike dvinnaṃ āsanaṃ nisīdanaṃ ekamāsanaṃ. Ma-kāro sandhijo. Kīdisanti āha ‘‘tivassantara’’nti. Tiṇṇaṃ vassānamantarametassāti tivassantaro, dvīhi vassehi mahantataro vā daharataro vā bhikkhu, so assa atthīti tivassantaraṃ, tivassantaravantanti attho. Yo pana ekena vassena mahantataro vā daharataro vā ekavassoyeva vā, tabbantatāya vattabbameva natthi. Atha vā tivassantaranti karaṇatthe upayogavacanaṃ, tivassantarena saddhinti attho. Tameva samattheti ‘‘sattavasse’’ccādinā.
༡༩༦. མུནི ཨནུཉྙཱསཱིཏི སམྦནྡྷོ། སབྦེཧེཝཱཏི སམཱནཱསནིཀཨསམཱནཱསནིཀེཧི སབྦེཧེཝ སདྡྷིཾ།
196. Muni anuññāsīti sambandho. Sabbehevāti samānāsanikaasamānāsanikehi sabbeheva saddhiṃ.
༡༩༧. དཱིགྷཱསནཾ དསྶེཏི ‘‘ཨནྟ’’ནྟིཨཱདིནཱ། ཡཾ ཏིཎྞཾ ནིསཱིདིཏུཾ པཧོཏི, ཏཾ ཨནྟཾ དཱིགྷཱསནནྟི སམྦནྡྷོ། ཨནྟནྟི པཙྪིམཾ། ཨདཱིགྷཱསནེ པན སམཱནཱསནིཀཱ ནིསཱིདིཏུཾ ལབྦྷནྟཱིཏི དསྶེནྟོ ‘‘མཉྩཀེ’’ཏིཨཱདིམཱཧ། སབྦཏྠ ཨཡཐཱཀརཎཏོ དུཀྐཊནྟི།
197. Dīghāsanaṃ dasseti ‘‘anta’’ntiādinā. Yaṃ tiṇṇaṃ nisīdituṃ pahoti, taṃ antaṃ dīghāsananti sambandho. Antanti pacchimaṃ. Adīghāsane pana samānāsanikā nisīdituṃ labbhantīti dassento ‘‘mañcake’’tiādimāha. Sabbattha ayathākaraṇato dukkaṭanti.
སམཱནཱསནིཀནིདྡེསཝཎྞནཱ ནིཊྛིཏཱ།
Samānāsanikaniddesavaṇṇanā niṭṭhitā.
