Library / Tipiṭaka / திபிடக • Tipiṭaka / தீ³க⁴னிகாய • Dīghanikāya

2. ஸாமஞ்ஞப²லஸுத்தங்

2. Sāmaññaphalasuttaṃ

ராஜாமச்சகதா²

Rājāmaccakathā

150. ஏவங் மே ஸுதங் – ஏகங் ஸமயங் ப⁴க³வா ராஜக³ஹே விஹரதி ஜீவகஸ்ஸ கோமாரப⁴ச்சஸ்ஸ அம்ப³வனே மஹதா பி⁴க்கு²ஸங்கே⁴ன ஸத்³தி⁴ங் அட்³ட⁴தேளஸேஹி பி⁴க்கு²ஸதேஹி. தேன கோ² பன ஸமயேன ராஜா மாக³தோ⁴ அஜாதஸத்து வேதே³ஹிபுத்தோ தத³ஹுபோஸதே² பன்னரஸே கோமுதி³யா சாதுமாஸினியா புண்ணாய புண்ணமாய ரத்தியா ராஜாமச்சபரிவுதோ உபரிபாஸாத³வரக³தோ நிஸின்னோ ஹோதி. அத² கோ² ராஜா மாக³தோ⁴ அஜாதஸத்து வேதே³ஹிபுத்தோ தத³ஹுபோஸதே² உதா³னங் உதா³னேஸி – ‘‘ரமணீயா வத போ⁴ தோ³ஸினா ரத்தி, அபி⁴ரூபா வத போ⁴ தோ³ஸினா ரத்தி, த³ஸ்ஸனீயா வத போ⁴ தோ³ஸினா ரத்தி, பாஸாதி³கா வத போ⁴ தோ³ஸினா ரத்தி, லக்க²ஞ்ஞா வத போ⁴ தோ³ஸினா ரத்தி. கங் நு க்²வஜ்ஜ ஸமணங் வா ப்³ராஹ்மணங் வா பயிருபாஸெய்யாம, யங் நோ பயிருபாஸதோ சித்தங் பஸீதெ³ய்யா’’தி?

150. Evaṃ me sutaṃ – ekaṃ samayaṃ bhagavā rājagahe viharati jīvakassa komārabhaccassa ambavane mahatā bhikkhusaṅghena saddhiṃ aḍḍhateḷasehi bhikkhusatehi. Tena kho pana samayena rājā māgadho ajātasattu vedehiputto tadahuposathe pannarase komudiyā cātumāsiniyā puṇṇāya puṇṇamāya rattiyā rājāmaccaparivuto uparipāsādavaragato nisinno hoti. Atha kho rājā māgadho ajātasattu vedehiputto tadahuposathe udānaṃ udānesi – ‘‘ramaṇīyā vata bho dosinā ratti, abhirūpā vata bho dosinā ratti, dassanīyā vata bho dosinā ratti, pāsādikā vata bho dosinā ratti, lakkhaññā vata bho dosinā ratti. Kaṃ nu khvajja samaṇaṃ vā brāhmaṇaṃ vā payirupāseyyāma, yaṃ no payirupāsato cittaṃ pasīdeyyā’’ti?

151. ஏவங் வுத்தே, அஞ்ஞதரோ ராஜாமச்சோ ராஜானங் மாக³த⁴ங் அஜாதஸத்துங் வேதே³ஹிபுத்தங் ஏதத³வோச – ‘‘அயங், தே³வ, பூரணோ கஸ்ஸபோ ஸங்கீ⁴ சேவ க³ணீ ச க³ணாசரியோ ச ஞாதோ யஸஸ்ஸீ தித்த²கரோ ஸாது⁴ஸம்மதோ ப³ஹுஜனஸ்ஸ ரத்தஞ்ஞூ சிரபப்³ப³ஜிதோ அத்³த⁴க³தோ வயோஅனுப்பத்தோ. தங் தே³வோ பூரணங் கஸ்ஸபங் பயிருபாஸது. அப்பேவ நாம தே³வஸ்ஸ பூரணங் கஸ்ஸபங் பயிருபாஸதோ சித்தங் பஸீதெ³ய்யா’’தி. ஏவங் வுத்தே, ராஜா மாக³தோ⁴ அஜாதஸத்து வேதே³ஹிபுத்தோ துண்ஹீ அஹோஸி.

151. Evaṃ vutte, aññataro rājāmacco rājānaṃ māgadhaṃ ajātasattuṃ vedehiputtaṃ etadavoca – ‘‘ayaṃ, deva, pūraṇo kassapo saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa rattaññū cirapabbajito addhagato vayoanuppatto. Taṃ devo pūraṇaṃ kassapaṃ payirupāsatu. Appeva nāma devassa pūraṇaṃ kassapaṃ payirupāsato cittaṃ pasīdeyyā’’ti. Evaṃ vutte, rājā māgadho ajātasattu vedehiputto tuṇhī ahosi.

152. அஞ்ஞதரோபி கோ² ராஜாமச்சோ ராஜானங் மாக³த⁴ங் அஜாதஸத்துங் வேதே³ஹிபுத்தங் ஏதத³வோச – ‘‘அயங், தே³வ, மக்க²லி கோ³ஸாலோ ஸங்கீ⁴ சேவ க³ணீ ச க³ணாசரியோ ச ஞாதோ யஸஸ்ஸீ தித்த²கரோ ஸாது⁴ஸம்மதோ ப³ஹுஜனஸ்ஸ ரத்தஞ்ஞூ சிரபப்³ப³ஜிதோ அத்³த⁴க³தோ வயோஅனுப்பத்தோ. தங் தே³வோ மக்க²லிங் கோ³ஸாலங் பயிருபாஸது. அப்பேவ நாம தே³வஸ்ஸ மக்க²லிங் கோ³ஸாலங் பயிருபாஸதோ சித்தங் பஸீதெ³ய்யா’’தி. ஏவங் வுத்தே, ராஜா மாக³தோ⁴ அஜாதஸத்து வேதே³ஹிபுத்தோ துண்ஹீ அஹோஸி.

152. Aññataropi kho rājāmacco rājānaṃ māgadhaṃ ajātasattuṃ vedehiputtaṃ etadavoca – ‘‘ayaṃ, deva, makkhali gosālo saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa rattaññū cirapabbajito addhagato vayoanuppatto. Taṃ devo makkhaliṃ gosālaṃ payirupāsatu. Appeva nāma devassa makkhaliṃ gosālaṃ payirupāsato cittaṃ pasīdeyyā’’ti. Evaṃ vutte, rājā māgadho ajātasattu vedehiputto tuṇhī ahosi.

153. அஞ்ஞதரோபி கோ² ராஜாமச்சோ ராஜானங் மாக³த⁴ங் அஜாதஸத்துங் வேதே³ஹிபுத்தங் ஏதத³வோச – ‘‘அயங், தே³வ, அஜிதோ கேஸகம்ப³லோ ஸங்கீ⁴ சேவ க³ணீ ச க³ணாசரியோ ச ஞாதோ யஸஸ்ஸீ தித்த²கரோ ஸாது⁴ஸம்மதோ ப³ஹுஜனஸ்ஸ ரத்தஞ்ஞூ சிரபப்³ப³ஜிதோ அத்³த⁴க³தோ வயோஅனுப்பத்தோ. தங் தே³வோ அஜிதங் கேஸகம்ப³லங் பயிருபாஸது. அப்பேவ நாம தே³வஸ்ஸ அஜிதங் கேஸகம்ப³லங் பயிருபாஸதோ சித்தங் பஸீதெ³ய்யா’’தி. ஏவங் வுத்தே, ராஜா மாக³தோ⁴ அஜாதஸத்து வேதே³ஹிபுத்தோ துண்ஹீ அஹோஸி.

153. Aññataropi kho rājāmacco rājānaṃ māgadhaṃ ajātasattuṃ vedehiputtaṃ etadavoca – ‘‘ayaṃ, deva, ajito kesakambalo saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa rattaññū cirapabbajito addhagato vayoanuppatto. Taṃ devo ajitaṃ kesakambalaṃ payirupāsatu. Appeva nāma devassa ajitaṃ kesakambalaṃ payirupāsato cittaṃ pasīdeyyā’’ti. Evaṃ vutte, rājā māgadho ajātasattu vedehiputto tuṇhī ahosi.

154. அஞ்ஞதரோபி கோ² ராஜாமச்சோ ராஜானங் மாக³த⁴ங் அஜாதஸத்துங் வேதே³ஹிபுத்தங் ஏதத³வோச – ‘‘அயங், தே³வ, பகுதோ⁴ ¹ கச்சாயனோ ஸங்கீ⁴ சேவ க³ணீ ச க³ணாசரியோ ச ஞாதோ யஸஸ்ஸீ தித்த²கரோ ஸாது⁴ஸம்மதோ ப³ஹுஜனஸ்ஸ ரத்தஞ்ஞூ சிரபப்³ப³ஜிதோ அத்³த⁴க³தோ வயோஅனுப்பத்தோ. தங் தே³வோ பகுத⁴ங் கச்சாயனங் பயிருபாஸது. அப்பேவ நாம தே³வஸ்ஸ பகுத⁴ங் கச்சாயனங் பயிருபாஸதோ சித்தங் பஸீதெ³ய்யா’’தி. ஏவங் வுத்தே, ராஜா மாக³தோ⁴ அஜாதஸத்து வேதே³ஹிபுத்தோ துண்ஹீ அஹோஸி.

154. Aññataropi kho rājāmacco rājānaṃ māgadhaṃ ajātasattuṃ vedehiputtaṃ etadavoca – ‘‘ayaṃ, deva, pakudho ² kaccāyano saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa rattaññū cirapabbajito addhagato vayoanuppatto. Taṃ devo pakudhaṃ kaccāyanaṃ payirupāsatu. Appeva nāma devassa pakudhaṃ kaccāyanaṃ payirupāsato cittaṃ pasīdeyyā’’ti. Evaṃ vutte, rājā māgadho ajātasattu vedehiputto tuṇhī ahosi.

155. அஞ்ஞதரோபி கோ² ராஜாமச்சோ ராஜானங் மாக³த⁴ங் அஜாதஸத்துங் வேதே³ஹிபுத்தங் ஏதத³வோச – ‘‘அயங், தே³வ, ஸஞ்சயோ ³ பே³லட்ட²புத்தோ ⁴ ஸங்கீ⁴ சேவ க³ணீ ச க³ணாசரியோ ச ஞாதோ யஸஸ்ஸீ தித்த²கரோ ஸாது⁴ஸம்மதோ ப³ஹுஜனஸ்ஸ ரத்தஞ்ஞூ சிரபப்³ப³ஜிதோ அத்³த⁴க³தோ வயோஅனுப்பத்தோ. தங் தே³வோ ஸஞ்சயங் பே³லட்ட²புத்தங் பயிருபாஸது. அப்பேவ நாம தே³வஸ்ஸ ஸஞ்சயங் பே³லட்ட²புத்தங் பயிருபாஸதோ சித்தங் பஸீதெ³ய்யா’’தி. ஏவங் வுத்தே, ராஜா மாக³தோ⁴ அஜாதஸத்து வேதே³ஹிபுத்தோ துண்ஹீ அஹோஸி.

155. Aññataropi kho rājāmacco rājānaṃ māgadhaṃ ajātasattuṃ vedehiputtaṃ etadavoca – ‘‘ayaṃ, deva, sañcayo ⁵ belaṭṭhaputto ⁶ saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa rattaññū cirapabbajito addhagato vayoanuppatto. Taṃ devo sañcayaṃ belaṭṭhaputtaṃ payirupāsatu. Appeva nāma devassa sañcayaṃ belaṭṭhaputtaṃ payirupāsato cittaṃ pasīdeyyā’’ti. Evaṃ vutte, rājā māgadho ajātasattu vedehiputto tuṇhī ahosi.

156. அஞ்ஞதரோபி கோ² ராஜாமச்சோ ராஜானங் மாக³த⁴ங் அஜாதஸத்துங் வேதே³ஹிபுத்தங் ஏதத³வோச – ‘‘அயங், தே³வ, நிக³ண்டோ² நாடபுத்தோ ⁷ ஸங்கீ⁴ சேவ க³ணீ ச க³ணாசரியோ ச ஞாதோ யஸஸ்ஸீ தித்த²கரோ ஸாது⁴ஸம்மதோ ப³ஹுஜனஸ்ஸ ரத்தஞ்ஞூ சிரபப்³ப³ஜிதோ அத்³த⁴க³தோ வயோஅனுப்பத்தோ. தங் தே³வோ நிக³ண்ட²ங் நாடபுத்தங் பயிருபாஸது. அப்பேவ நாம தே³வஸ்ஸ நிக³ண்ட²ங் நாடபுத்தங் பயிருபாஸதோ சித்தங் பஸீதெ³ய்யா’’தி. ஏவங் வுத்தே, ராஜா மாக³தோ⁴ அஜாதஸத்து வேதே³ஹிபுத்தோ துண்ஹீ அஹோஸி.

156. Aññataropi kho rājāmacco rājānaṃ māgadhaṃ ajātasattuṃ vedehiputtaṃ etadavoca – ‘‘ayaṃ, deva, nigaṇṭho nāṭaputto ⁸ saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa rattaññū cirapabbajito addhagato vayoanuppatto. Taṃ devo nigaṇṭhaṃ nāṭaputtaṃ payirupāsatu. Appeva nāma devassa nigaṇṭhaṃ nāṭaputtaṃ payirupāsato cittaṃ pasīdeyyā’’ti. Evaṃ vutte, rājā māgadho ajātasattu vedehiputto tuṇhī ahosi.

கோமாரப⁴ச்சஜீவககதா²

Komārabhaccajīvakakathā

157. தேன கோ² பன ஸமயேன ஜீவகோ கோமாரப⁴ச்சோ ரஞ்ஞோ மாக³த⁴ஸ்ஸ அஜாதஸத்துஸ்ஸ வேதே³ஹிபுத்தஸ்ஸ அவிதூ³ரே துண்ஹீபூ⁴தோ நிஸின்னோ ஹோதி. அத² கோ² ராஜா மாக³தோ⁴ அஜாதஸத்து வேதே³ஹிபுத்தோ ஜீவகங் கோமாரப⁴ச்சங் ஏதத³வோச – ‘‘த்வங் பன, ஸம்ம ஜீவக, கிங் துண்ஹீ’’தி? ‘‘அயங், தே³வ, ப⁴க³வா அரஹங் ஸம்மாஸம்பு³த்³தோ⁴ அம்ஹாகங் அம்ப³வனே விஹரதி மஹதா பி⁴க்கு²ஸங்கே⁴ன ஸத்³தி⁴ங் அட்³ட⁴தேளஸேஹி பி⁴க்கு²ஸதேஹி. தங் கோ² பன ப⁴க³வந்தங் ⁹ ஏவங் கல்யாணோ கித்திஸத்³தோ³ அப்³பு⁴க்³க³தோ – ‘இதிபி ஸோ ப⁴க³வா அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா’தி. தங் தே³வோ ப⁴க³வந்தங் பயிருபாஸது. அப்பேவ நாம தே³வஸ்ஸ ப⁴க³வந்தங் பயிருபாஸதோ சித்தங் பஸீதெ³ய்யா’தி.

157. Tena kho pana samayena jīvako komārabhacco rañño māgadhassa ajātasattussa vedehiputtassa avidūre tuṇhībhūto nisinno hoti. Atha kho rājā māgadho ajātasattu vedehiputto jīvakaṃ komārabhaccaṃ etadavoca – ‘‘tvaṃ pana, samma jīvaka, kiṃ tuṇhī’’ti? ‘‘Ayaṃ, deva, bhagavā arahaṃ sammāsambuddho amhākaṃ ambavane viharati mahatā bhikkhusaṅghena saddhiṃ aḍḍhateḷasehi bhikkhusatehi. Taṃ kho pana bhagavantaṃ ¹⁰ evaṃ kalyāṇo kittisaddo abbhuggato – ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā’ti. Taṃ devo bhagavantaṃ payirupāsatu. Appeva nāma devassa bhagavantaṃ payirupāsato cittaṃ pasīdeyyā’ti.

158. ‘‘தேன ஹி, ஸம்ம ஜீவக, ஹத்தி²யானானி கப்பாபேஹீ’’தி. ‘‘ஏவங், தே³வா’’தி கோ² ஜீவகோ கோமாரப⁴ச்சோ ரஞ்ஞோ மாக³த⁴ஸ்ஸ அஜாதஸத்துஸ்ஸ வேதே³ஹிபுத்தஸ்ஸ படிஸ்ஸுணித்வா பஞ்சமத்தானி ஹத்தி²னிகாஸதானி கப்பாபெத்வா ரஞ்ஞோ ச ஆரோஹணீயங் நாக³ங், ரஞ்ஞோ மாக³த⁴ஸ்ஸ அஜாதஸத்துஸ்ஸ வேதே³ஹிபுத்தஸ்ஸ படிவேதே³ஸி – ‘‘கப்பிதானி கோ² தே, தே³வ, ஹத்தி²யானானி, யஸ்ஸதா³னி காலங் மஞ்ஞஸீ’’தி.

158. ‘‘Tena hi, samma jīvaka, hatthiyānāni kappāpehī’’ti. ‘‘Evaṃ, devā’’ti kho jīvako komārabhacco rañño māgadhassa ajātasattussa vedehiputtassa paṭissuṇitvā pañcamattāni hatthinikāsatāni kappāpetvā rañño ca ārohaṇīyaṃ nāgaṃ, rañño māgadhassa ajātasattussa vedehiputtassa paṭivedesi – ‘‘kappitāni kho te, deva, hatthiyānāni, yassadāni kālaṃ maññasī’’ti.

159. அத² கோ² ராஜா மாக³தோ⁴ அஜாதஸத்து வேதே³ஹிபுத்தோ பஞ்சஸு ஹத்தி²னிகாஸதேஸு பச்சேகா இத்தி²யோ ஆரோபெத்வா ஆரோஹணீயங் நாக³ங் அபி⁴ருஹித்வா உக்காஸு தா⁴ரியமானாஸு ராஜக³ஹம்ஹா நிய்யாஸி மஹச்சராஜானுபா⁴வேன, யேன ஜீவகஸ்ஸ கோமாரப⁴ச்சஸ்ஸ அம்ப³வனங் தேன பாயாஸி.

159. Atha kho rājā māgadho ajātasattu vedehiputto pañcasu hatthinikāsatesu paccekā itthiyo āropetvā ārohaṇīyaṃ nāgaṃ abhiruhitvā ukkāsu dhāriyamānāsu rājagahamhā niyyāsi mahaccarājānubhāvena, yena jīvakassa komārabhaccassa ambavanaṃ tena pāyāsi.

அத² கோ² ரஞ்ஞோ மாக³த⁴ஸ்ஸ அஜாதஸத்துஸ்ஸ வேதே³ஹிபுத்தஸ்ஸ அவிதூ³ரே அம்ப³வனஸ்ஸ அஹுதே³வ ப⁴யங், அஹு ச²ம்பி⁴தத்தங், அஹு லோமஹங்ஸோ. அத² கோ² ராஜா மாக³தோ⁴ அஜாதஸத்து வேதே³ஹிபுத்தோ பீ⁴தோ ஸங்விக்³கோ³ லோமஹட்ட²ஜாதோ ஜீவகங் கோமாரப⁴ச்சங் ஏதத³வோச – ‘‘கச்சி மங், ஸம்ம ஜீவக, ந வஞ்சேஸி? கச்சி மங், ஸம்ம ஜீவக, ந பலம்பே⁴ஸி? கச்சி மங், ஸம்ம ஜீவக, ந பச்சத்தி²கானங் தே³ஸி ? கத²ஞ்ஹி நாம தாவ மஹதோ பி⁴க்கு²ஸங்க⁴ஸ்ஸ அட்³ட⁴தேளஸானங் பி⁴க்கு²ஸதானங் நேவ கி²பிதஸத்³தோ³ ப⁴விஸ்ஸதி, ந உக்காஸிதஸத்³தோ³ ந நிக்³கோ⁴ஸோ’’தி.

Atha kho rañño māgadhassa ajātasattussa vedehiputtassa avidūre ambavanassa ahudeva bhayaṃ, ahu chambhitattaṃ, ahu lomahaṃso. Atha kho rājā māgadho ajātasattu vedehiputto bhīto saṃviggo lomahaṭṭhajāto jīvakaṃ komārabhaccaṃ etadavoca – ‘‘kacci maṃ, samma jīvaka, na vañcesi? Kacci maṃ, samma jīvaka, na palambhesi? Kacci maṃ, samma jīvaka, na paccatthikānaṃ desi ? Kathañhi nāma tāva mahato bhikkhusaṅghassa aḍḍhateḷasānaṃ bhikkhusatānaṃ neva khipitasaddo bhavissati, na ukkāsitasaddo na nigghoso’’ti.

‘‘மா பா⁴யி, மஹாராஜ, மா பா⁴யி, மஹாராஜ. ந தங் தே³வ, வஞ்சேமி; ந தங், தே³வ, பலம்பா⁴மி ; ந தங், தே³வ, பச்சத்தி²கானங் தே³மி. அபி⁴க்கம, மஹாராஜ, அபி⁴க்கம, மஹாராஜ, ஏதே மண்ட³லமாளே தீ³பா ¹¹ ஜா²யந்தீ’’தி.

‘‘Mā bhāyi, mahārāja, mā bhāyi, mahārāja. Na taṃ deva, vañcemi; na taṃ, deva, palambhāmi ; na taṃ, deva, paccatthikānaṃ demi. Abhikkama, mahārāja, abhikkama, mahārāja, ete maṇḍalamāḷe dīpā ¹² jhāyantī’’ti.

ஸாமஞ்ஞப²லபுச்சா²

Sāmaññaphalapucchā

160. அத² கோ² ராஜா மாக³தோ⁴ அஜாதஸத்து வேதே³ஹிபுத்தோ யாவதிகா நாக³ஸ்ஸ பூ⁴மி நாகே³ன க³ந்த்வா, நாகா³ பச்சோரோஹித்வா, பத்திகோவ ¹³ யேன மண்ட³லமாளஸ்ஸ த்³வாரங் தேனுபஸங்கமி; உபஸங்கமித்வா ஜீவகங் கோமாரப⁴ச்சங் ஏதத³வோச – ‘‘கஹங் பன, ஸம்ம ஜீவக, ப⁴க³வா’’தி? ‘‘ஏஸோ, மஹாராஜ, ப⁴க³வா; ஏஸோ, மஹாராஜ, ப⁴க³வா மஜ்ஜி²மங் த²ம்ப⁴ங் நிஸ்ஸாய புரத்தா²பி⁴முகோ² நிஸின்னோ புரக்க²தோ பி⁴க்கு²ஸங்க⁴ஸ்ஸா’’தி.

160. Atha kho rājā māgadho ajātasattu vedehiputto yāvatikā nāgassa bhūmi nāgena gantvā, nāgā paccorohitvā, pattikova ¹⁴ yena maṇḍalamāḷassa dvāraṃ tenupasaṅkami; upasaṅkamitvā jīvakaṃ komārabhaccaṃ etadavoca – ‘‘kahaṃ pana, samma jīvaka, bhagavā’’ti? ‘‘Eso, mahārāja, bhagavā; eso, mahārāja, bhagavā majjhimaṃ thambhaṃ nissāya puratthābhimukho nisinno purakkhato bhikkhusaṅghassā’’ti.

161. அத² கோ² ராஜா மாக³தோ⁴ அஜாதஸத்து வேதே³ஹிபுத்தோ யேன ப⁴க³வா தேனுபஸங்கமி; உபஸங்கமித்வா ஏகமந்தங் அட்டா²ஸி. ஏகமந்தங் டி²தோ கோ² ராஜா மாக³தோ⁴ அஜாதஸத்து வேதே³ஹிபுத்தோ துண்ஹீபூ⁴தங் துண்ஹீபூ⁴தங் பி⁴க்கு²ஸங்க⁴ங் அனுவிலோகெத்வா ரஹத³மிவ விப்பஸன்னங் உதா³னங் உதா³னேஸி – ‘‘இமினா மே உபஸமேன உத³யப⁴த்³தோ³ ¹⁵ குமாரோ ஸமன்னாக³தோ ஹோது, யேனேதரஹி உபஸமேன பி⁴க்கு²ஸங்கோ⁴ ஸமன்னாக³தோ’’தி. ‘‘அக³மா கோ² த்வங், மஹாராஜ, யதா²பேம’’ந்தி. ‘‘பியோ மே, ப⁴ந்தே, உத³யப⁴த்³தோ³ குமாரோ. இமினா மே, ப⁴ந்தே, உபஸமேன உத³யப⁴த்³தோ³ குமாரோ ஸமன்னாக³தோ ஹோது யேனேதரஹி உபஸமேன பி⁴க்கு²ஸங்கோ⁴ ஸமன்னாக³தோ’’தி.

161. Atha kho rājā māgadho ajātasattu vedehiputto yena bhagavā tenupasaṅkami; upasaṅkamitvā ekamantaṃ aṭṭhāsi. Ekamantaṃ ṭhito kho rājā māgadho ajātasattu vedehiputto tuṇhībhūtaṃ tuṇhībhūtaṃ bhikkhusaṅghaṃ anuviloketvā rahadamiva vippasannaṃ udānaṃ udānesi – ‘‘iminā me upasamena udayabhaddo ¹⁶ kumāro samannāgato hotu, yenetarahi upasamena bhikkhusaṅgho samannāgato’’ti. ‘‘Agamā kho tvaṃ, mahārāja, yathāpema’’nti. ‘‘Piyo me, bhante, udayabhaddo kumāro. Iminā me, bhante, upasamena udayabhaddo kumāro samannāgato hotu yenetarahi upasamena bhikkhusaṅgho samannāgato’’ti.

162. அத² கோ² ராஜா மாக³தோ⁴ அஜாதஸத்து வேதே³ஹிபுத்தோ ப⁴க³வந்தங் அபி⁴வாதெ³த்வா, பி⁴க்கு²ஸங்க⁴ஸ்ஸ அஞ்ஜலிங் பணாமெத்வா , ஏகமந்தங் நிஸீதி³. ஏகமந்தங் நிஸின்னோ கோ² ராஜா மாக³தோ⁴ அஜாதஸத்து வேதே³ஹிபுத்தோ ப⁴க³வந்தங் ஏதத³வோச – ‘‘புச்செ²ய்யாமஹங், ப⁴ந்தே, ப⁴க³வந்தங் கிஞ்சிதே³வ தே³ஸங் ¹⁷; ஸசே மே ப⁴க³வா ஓகாஸங் கரோதி பஞ்ஹஸ்ஸ வெய்யாகரணாயா’’தி. ‘‘புச்ச², மஹாராஜ, யதா³கங்க²ஸீ’’தி.

162. Atha kho rājā māgadho ajātasattu vedehiputto bhagavantaṃ abhivādetvā, bhikkhusaṅghassa añjaliṃ paṇāmetvā , ekamantaṃ nisīdi. Ekamantaṃ nisinno kho rājā māgadho ajātasattu vedehiputto bhagavantaṃ etadavoca – ‘‘puccheyyāmahaṃ, bhante, bhagavantaṃ kiñcideva desaṃ ¹⁸; sace me bhagavā okāsaṃ karoti pañhassa veyyākaraṇāyā’’ti. ‘‘Puccha, mahārāja, yadākaṅkhasī’’ti.

163. ‘‘யதா² நு கோ² இமானி, ப⁴ந்தே, புது²ஸிப்பாயதனானி, ஸெய்யதி²த³ங் – ஹத்தா²ரோஹா அஸ்ஸாரோஹா ரதி²கா த⁴னுக்³க³ஹா சேலகா சலகா பிண்ட³தா³யகா உக்³கா³ ராஜபுத்தா பக்க²ந்தி³னோ மஹானாகா³ ஸூரா சம்மயோதி⁴னோ தா³ஸிகபுத்தா ஆளாரிகா கப்பகா ந்ஹாபகா ¹⁹ ஸூதா³ மாலாகாரா ரஜகா பேஸகாரா நளகாரா கும்ப⁴காரா க³ணகா முத்³தி³கா, யானி வா பனஞ்ஞானிபி ஏவங்க³தானி புது²ஸிப்பாயதனானி, தே தி³ட்டே²வ த⁴ம்மே ஸந்தி³ட்டி²கங் ஸிப்பப²லங் உபஜீவந்தி; தே தேன அத்தானங் ஸுகெ²ந்தி பீணெந்தி ²⁰, மாதாபிதரோ ஸுகெ²ந்தி பீணெந்தி, புத்ததா³ரங் ஸுகெ²ந்தி பீணெந்தி, மித்தாமச்சே ஸுகெ²ந்தி பீணெந்தி, ஸமணப்³ராஹ்மணேஸு ²¹ உத்³த⁴க்³கி³கங் த³க்கி²ணங் பதிட்ட²பெந்தி ஸோவக்³கி³கங் ஸுக²விபாகங் ஸக்³க³ஸங்வத்தனிகங். ஸக்கா நு கோ², ப⁴ந்தே, ஏவமேவ தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங் பஞ்ஞபேது’’ந்தி?

163. ‘‘Yathā nu kho imāni, bhante, puthusippāyatanāni, seyyathidaṃ – hatthārohā assārohā rathikā dhanuggahā celakā calakā piṇḍadāyakā uggā rājaputtā pakkhandino mahānāgā sūrā cammayodhino dāsikaputtā āḷārikā kappakā nhāpakā ²² sūdā mālākārā rajakā pesakārā naḷakārā kumbhakārā gaṇakā muddikā, yāni vā panaññānipi evaṃgatāni puthusippāyatanāni, te diṭṭheva dhamme sandiṭṭhikaṃ sippaphalaṃ upajīvanti; te tena attānaṃ sukhenti pīṇenti ²³, mātāpitaro sukhenti pīṇenti, puttadāraṃ sukhenti pīṇenti, mittāmacce sukhenti pīṇenti, samaṇabrāhmaṇesu ²⁴ uddhaggikaṃ dakkhiṇaṃ patiṭṭhapenti sovaggikaṃ sukhavipākaṃ saggasaṃvattanikaṃ. Sakkā nu kho, bhante, evameva diṭṭheva dhamme sandiṭṭhikaṃ sāmaññaphalaṃ paññapetu’’nti?

164. ‘‘அபி⁴ஜானாஸி நோ த்வங், மஹாராஜ, இமங் பஞ்ஹங் அஞ்ஞே ஸமணப்³ராஹ்மணே புச்சி²தா’’தி ? ‘‘அபி⁴ஜானாமஹங், ப⁴ந்தே, இமங் பஞ்ஹங் அஞ்ஞே ஸமணப்³ராஹ்மணே புச்சி²தா’’தி. ‘‘யதா² கத²ங் பன தே, மஹாராஜ, ப்³யாகரிங்ஸு, ஸசே தே அக³ரு பா⁴ஸஸ்ஸூ’’தி. ‘‘ந கோ² மே, ப⁴ந்தே, க³ரு, யத்த²ஸ்ஸ ப⁴க³வா நிஸின்னோ, ப⁴க³வந்தரூபோ வா’’தி ²⁵. ‘‘தேன ஹி, மஹாராஜ, பா⁴ஸஸ்ஸூ’’தி.

164. ‘‘Abhijānāsi no tvaṃ, mahārāja, imaṃ pañhaṃ aññe samaṇabrāhmaṇe pucchitā’’ti ? ‘‘Abhijānāmahaṃ, bhante, imaṃ pañhaṃ aññe samaṇabrāhmaṇe pucchitā’’ti. ‘‘Yathā kathaṃ pana te, mahārāja, byākariṃsu, sace te agaru bhāsassū’’ti. ‘‘Na kho me, bhante, garu, yatthassa bhagavā nisinno, bhagavantarūpo vā’’ti ²⁶. ‘‘Tena hi, mahārāja, bhāsassū’’ti.

பூரணகஸ்ஸபவாதோ³

Pūraṇakassapavādo

165. ‘‘ஏகமிதா³ஹங், ப⁴ந்தே, ஸமயங் யேன பூரணோ கஸ்ஸபோ தேனுபஸங்கமி; உபஸங்கமித்வா பூரணேன கஸ்ஸபேன ஸத்³தி⁴ங் ஸம்மோதி³ங். ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³ங். ஏகமந்தங் நிஸின்னோ கோ² அஹங், ப⁴ந்தே, பூரணங் கஸ்ஸபங் ஏதத³வோசங் – ‘யதா² நு கோ² இமானி, போ⁴ கஸ்ஸப, புது²ஸிப்பாயதனானி, ஸெய்யதி²த³ங் – ஹத்தா²ரோஹா அஸ்ஸாரோஹா ரதி²கா த⁴னுக்³க³ஹா சேலகா சலகா பிண்ட³தா³யகா உக்³கா³ ராஜபுத்தா பக்க²ந்தி³னோ மஹானாகா³ ஸூரா சம்மயோதி⁴னோ தா³ஸிகபுத்தா ஆளாரிகா கப்பகா ந்ஹாபகா ஸூதா³ மாலாகாரா ரஜகா பேஸகாரா நளகாரா கும்ப⁴காரா க³ணகா முத்³தி³கா, யானி வா பனஞ்ஞானிபி ஏவங்க³தானி புது²ஸிப்பாயதனானி- தே தி³ட்டே²வ த⁴ம்மே ஸந்தி³ட்டி²கங் ஸிப்பப²லங் உபஜீவந்தி; தே தேன அத்தானங் ஸுகெ²ந்தி பீணெந்தி, மாதாபிதரோ ஸுகெ²ந்தி பீணெந்தி, புத்ததா³ரங் ஸுகெ²ந்தி பீணெந்தி, மித்தாமச்சே ஸுகெ²ந்தி பீணெந்தி, ஸமணப்³ராஹ்மணேஸு உத்³த⁴க்³கி³கங் த³க்கி²ணங் பதிட்ட²பெந்தி ஸோவக்³கி³கங் ஸுக²விபாகங் ஸக்³க³ஸங்வத்தனிகங். ஸக்கா நு கோ², போ⁴ கஸ்ஸப, ஏவமேவ தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங் பஞ்ஞபேது’ந்தி?

165. ‘‘Ekamidāhaṃ, bhante, samayaṃ yena pūraṇo kassapo tenupasaṅkami; upasaṅkamitvā pūraṇena kassapena saddhiṃ sammodiṃ. Sammodanīyaṃ kathaṃ sāraṇīyaṃ vītisāretvā ekamantaṃ nisīdiṃ. Ekamantaṃ nisinno kho ahaṃ, bhante, pūraṇaṃ kassapaṃ etadavocaṃ – ‘yathā nu kho imāni, bho kassapa, puthusippāyatanāni, seyyathidaṃ – hatthārohā assārohā rathikā dhanuggahā celakā calakā piṇḍadāyakā uggā rājaputtā pakkhandino mahānāgā sūrā cammayodhino dāsikaputtā āḷārikā kappakā nhāpakā sūdā mālākārā rajakā pesakārā naḷakārā kumbhakārā gaṇakā muddikā, yāni vā panaññānipi evaṃgatāni puthusippāyatanāni- te diṭṭheva dhamme sandiṭṭhikaṃ sippaphalaṃ upajīvanti; te tena attānaṃ sukhenti pīṇenti, mātāpitaro sukhenti pīṇenti, puttadāraṃ sukhenti pīṇenti, mittāmacce sukhenti pīṇenti, samaṇabrāhmaṇesu uddhaggikaṃ dakkhiṇaṃ patiṭṭhapenti sovaggikaṃ sukhavipākaṃ saggasaṃvattanikaṃ. Sakkā nu kho, bho kassapa, evameva diṭṭheva dhamme sandiṭṭhikaṃ sāmaññaphalaṃ paññapetu’nti?

166. ‘‘ஏவங் வுத்தே, ப⁴ந்தே, பூரணோ கஸ்ஸபோ மங் ஏதத³வோச – ‘கரோதோ கோ², மஹாராஜ, காரயதோ, சி²ந்த³தோ சே²தா³பயதோ, பசதோ பாசாபயதோ ஸோசயதோ, ஸோசாபயதோ, கிலமதோ கிலமாபயதோ, ப²ந்த³தோ ப²ந்தா³பயதோ, பாணமதிபாதாபயதோ, அதி³ன்னங் ஆதி³யதோ, ஸந்தி⁴ங் சி²ந்த³தோ, நில்லோபங் ஹரதோ, ஏகாகா³ரிகங் கரோதோ, பரிபந்தே² திட்ட²தோ, பரதா³ரங் க³ச்ச²தோ, முஸா ப⁴ணதோ, கரோதோ ந கரீயதி பாபங். கு²ரபரியந்தேன சேபி சக்கேன யோ இமிஸ்ஸா பத²வியா பாணே ஏகங் மங்ஸக²லங் ஏகங் மங்ஸபுஞ்ஜங் கரெய்ய, நத்தி² ததோனிதா³னங் பாபங், நத்தி² பாபஸ்ஸ ஆக³மோ. த³க்கி²ணங் சேபி க³ங்கா³ய தீரங் க³ச்செ²ய்ய ஹனந்தோ கா⁴தெந்தோ சி²ந்த³ந்தோ சே²தா³பெந்தோ பசந்தோ பாசாபெந்தோ, நத்தி² ததோனிதா³னங் பாபங், நத்தி² பாபஸ்ஸ ஆக³மோ. உத்தரஞ்சேபி க³ங்கா³ய தீரங் க³ச்செ²ய்ய த³த³ந்தோ தா³பெந்தோ யஜந்தோ யஜாபெந்தோ, நத்தி² ததோனிதா³னங் புஞ்ஞங், நத்தி² புஞ்ஞஸ்ஸ ஆக³மோ. தா³னேன த³மேன ஸங்யமேன ஸச்சவஜ்ஜேன நத்தி² புஞ்ஞங், நத்தி² புஞ்ஞஸ்ஸ ஆக³மோ’தி. இத்த²ங் கோ² மே, ப⁴ந்தே, பூரணோ கஸ்ஸபோ ஸந்தி³ட்டி²கங் ஸாமஞ்ஞப²லங் புட்டோ² ஸமானோ அகிரியங் ப்³யாகாஸி.

166. ‘‘Evaṃ vutte, bhante, pūraṇo kassapo maṃ etadavoca – ‘karoto kho, mahārāja, kārayato, chindato chedāpayato, pacato pācāpayato socayato, socāpayato, kilamato kilamāpayato, phandato phandāpayato, pāṇamatipātāpayato, adinnaṃ ādiyato, sandhiṃ chindato, nillopaṃ harato, ekāgārikaṃ karoto, paripanthe tiṭṭhato, paradāraṃ gacchato, musā bhaṇato, karoto na karīyati pāpaṃ. Khurapariyantena cepi cakkena yo imissā pathaviyā pāṇe ekaṃ maṃsakhalaṃ ekaṃ maṃsapuñjaṃ kareyya, natthi tatonidānaṃ pāpaṃ, natthi pāpassa āgamo. Dakkhiṇaṃ cepi gaṅgāya tīraṃ gaccheyya hananto ghātento chindanto chedāpento pacanto pācāpento, natthi tatonidānaṃ pāpaṃ, natthi pāpassa āgamo. Uttarañcepi gaṅgāya tīraṃ gaccheyya dadanto dāpento yajanto yajāpento, natthi tatonidānaṃ puññaṃ, natthi puññassa āgamo. Dānena damena saṃyamena saccavajjena natthi puññaṃ, natthi puññassa āgamo’ti. Itthaṃ kho me, bhante, pūraṇo kassapo sandiṭṭhikaṃ sāmaññaphalaṃ puṭṭho samāno akiriyaṃ byākāsi.

‘‘ஸெய்யதா²பி, ப⁴ந்தே, அம்ப³ங் வா புட்டோ² லபு³ஜங் ப்³யாகரெய்ய , லபு³ஜங் வா புட்டோ² அம்ப³ங் ப்³யாகரெய்ய; ஏவமேவ கோ² மே, ப⁴ந்தே, பூரணோ கஸ்ஸபோ ஸந்தி³ட்டி²கங் ஸாமஞ்ஞப²லங் புட்டோ² ஸமானோ அகிரியங் ப்³யாகாஸி. தஸ்ஸ மய்ஹங், ப⁴ந்தே, ஏதத³ஹோஸி – ‘கத²ஞ்ஹி நாம மாதி³ஸோ ஸமணங் வா ப்³ராஹ்மணங் வா விஜிதே வஸந்தங் அபஸாதே³தப்³ப³ங் மஞ்ஞெய்யா’தி. ஸோ கோ² அஹங், ப⁴ந்தே, பூரணஸ்ஸ கஸ்ஸபஸ்ஸ பா⁴ஸிதங் நேவ அபி⁴னந்தி³ங் நப்படிக்கோஸிங். அனபி⁴னந்தி³த்வா அப்படிகோஸித்வா அனத்தமனோ, அனத்தமனவாசங் அனிச்சா²ரெத்வா, தமேவ வாசங் அனுக்³க³ண்ஹந்தோ அனிக்குஜ்ஜந்தோ ²⁷ உட்டா²யாஸனா பக்கமிங் ²⁸.

‘‘Seyyathāpi, bhante, ambaṃ vā puṭṭho labujaṃ byākareyya , labujaṃ vā puṭṭho ambaṃ byākareyya; evameva kho me, bhante, pūraṇo kassapo sandiṭṭhikaṃ sāmaññaphalaṃ puṭṭho samāno akiriyaṃ byākāsi. Tassa mayhaṃ, bhante, etadahosi – ‘kathañhi nāma mādiso samaṇaṃ vā brāhmaṇaṃ vā vijite vasantaṃ apasādetabbaṃ maññeyyā’ti. So kho ahaṃ, bhante, pūraṇassa kassapassa bhāsitaṃ neva abhinandiṃ nappaṭikkosiṃ. Anabhinanditvā appaṭikositvā anattamano, anattamanavācaṃ anicchāretvā, tameva vācaṃ anuggaṇhanto anikkujjanto ²⁹ uṭṭhāyāsanā pakkamiṃ ³⁰.

மக்க²லிகோ³ஸாலவாதோ³

Makkhaligosālavādo

167. ‘‘ஏகமிதா³ஹங், ப⁴ந்தே, ஸமயங் யேன மக்க²லி கோ³ஸாலோ தேனுபஸங்கமிங்; உபஸங்கமித்வா மக்க²லினா கோ³ஸாலேன ஸத்³தி⁴ங் ஸம்மோதி³ங். ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³ங். ஏகமந்தங் நிஸின்னோ கோ² அஹங், ப⁴ந்தே, மக்க²லிங் கோ³ஸாலங் ஏதத³வோசங் – ‘யதா² நு கோ² இமானி, போ⁴ கோ³ஸால, புது²ஸிப்பாயதனானி…பே॰… ஸக்கா நு கோ², போ⁴ கோ³ஸால, ஏவமேவ தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங் பஞ்ஞபேது’ந்தி?

167. ‘‘Ekamidāhaṃ, bhante, samayaṃ yena makkhali gosālo tenupasaṅkamiṃ; upasaṅkamitvā makkhalinā gosālena saddhiṃ sammodiṃ. Sammodanīyaṃ kathaṃ sāraṇīyaṃ vītisāretvā ekamantaṃ nisīdiṃ. Ekamantaṃ nisinno kho ahaṃ, bhante, makkhaliṃ gosālaṃ etadavocaṃ – ‘yathā nu kho imāni, bho gosāla, puthusippāyatanāni…pe… sakkā nu kho, bho gosāla, evameva diṭṭheva dhamme sandiṭṭhikaṃ sāmaññaphalaṃ paññapetu’nti?

168. ‘‘ஏவங் வுத்தே, ப⁴ந்தே, மக்க²லி கோ³ஸாலோ மங் ஏதத³வோச – ‘நத்தி² மஹாராஜ ஹேது நத்தி² பச்சயோ ஸத்தானங் ஸங்கிலேஸாய, அஹேதூ ³¹ அபச்சயா ஸத்தா ஸங்கிலிஸ்ஸந்தி. நத்தி² ஹேது, நத்தி² பச்சயோ ஸத்தானங் விஸுத்³தி⁴யா, அஹேதூ அபச்சயா ஸத்தா விஸுஜ்ஜ²ந்தி. நத்தி² அத்தகாரே, நத்தி² பரகாரே, நத்தி² புரிஸகாரே, நத்தி² ப³லங், நத்தி² வீரியங், நத்தி² புரிஸதா²மோ, நத்தி² புரிஸபரக்கமோ . ஸப்³பே³ ஸத்தா ஸப்³பே³ பாணா ஸப்³பே³ பூ⁴தா ஸப்³பே³ ஜீவா அவஸா அப³லா அவீரியா நியதிஸங்க³திபா⁴வபரிணதா ச²ஸ்வேவாபி⁴ஜாதீஸு ஸுக²து³க்க²ங் ³² படிஸங்வேதெ³ந்தி. சுத்³த³ஸ கோ² பனிமானி யோனிபமுக²ஸதஸஹஸ்ஸானி ஸட்டி² ச ஸதானி ச² ச ஸதானி பஞ்ச ச கம்முனோ ஸதானி பஞ்ச ச கம்மானி தீணி ச கம்மானி கம்மே ச அட்³ட⁴கம்மே ச த்³வட்டி²படிபதா³ த்³வட்ட²ந்தரகப்பா ச²ளாபி⁴ஜாதியோ அட்ட² புரிஸபூ⁴மியோ ஏகூனபஞ்ஞாஸ ஆஜீவகஸதே ஏகூனபஞ்ஞாஸ பரிப்³பா³ஜகஸதே ஏகூனபஞ்ஞாஸ நாகா³வாஸஸதே வீஸே இந்த்³ரியஸதே திங்ஸே நிரயஸதே ச²த்திங்ஸ ரஜோதா⁴துயோ ஸத்த ஸஞ்ஞீக³ப்³பா⁴ ஸத்த அஸஞ்ஞீக³ப்³பா⁴ ஸத்த நிக³ண்டி²க³ப்³பா⁴ ஸத்த தே³வா ஸத்த மானுஸா ஸத்த பிஸாசா ஸத்த ஸரா ஸத்த பவுடா ³³ ஸத்த பவுடஸதானி ஸத்த பபாதா ஸத்த பபாதஸதானி ஸத்த ஸுபினா ஸத்த ஸுபினஸதானி சுல்லாஸீதி மஹாகப்பினோ ³⁴ ஸதஸஹஸ்ஸானி, யானி பா³லே ச பண்டி³தே ச ஸந்தா⁴வித்வா ஸங்ஸரித்வா து³க்க²ஸ்ஸந்தங் கரிஸ்ஸந்தி. தத்த² நத்தி² ‘‘இமினாஹங் ஸீலேன வா வதேன வா தபேன வா ப்³ரஹ்மசரியேன வா அபரிபக்கங் வா கம்மங் பரிபாசெஸ்ஸாமி, பரிபக்கங் வா கம்மங் பு²ஸ்ஸ பு²ஸ்ஸ ப்³யந்திங் கரிஸ்ஸாமீ’தி ஹேவங் நத்தி². தோ³ணமிதே ஸுக²து³க்கே² பரியந்தகதே ஸங்ஸாரே , நத்தி² ஹாயனவட்³ட⁴னே, நத்தி² உக்கங்ஸாவகங்ஸே. ஸெய்யதா²பி நாம ஸுத்தகு³ளே கி²த்தே நிப்³பே³டி²யமானமேவ பலேதி, ஏவமேவ பா³லே ச பண்டி³தே ச ஸந்தா⁴வித்வா ஸங்ஸரித்வா து³க்க²ஸ்ஸந்தங் கரிஸ்ஸந்தீ’தி.

168. ‘‘Evaṃ vutte, bhante, makkhali gosālo maṃ etadavoca – ‘natthi mahārāja hetu natthi paccayo sattānaṃ saṃkilesāya, ahetū ³⁵ apaccayā sattā saṃkilissanti. Natthi hetu, natthi paccayo sattānaṃ visuddhiyā, ahetū apaccayā sattā visujjhanti. Natthi attakāre, natthi parakāre, natthi purisakāre, natthi balaṃ, natthi vīriyaṃ, natthi purisathāmo, natthi purisaparakkamo . Sabbe sattā sabbe pāṇā sabbe bhūtā sabbe jīvā avasā abalā avīriyā niyatisaṅgatibhāvapariṇatā chasvevābhijātīsu sukhadukkhaṃ ³⁶ paṭisaṃvedenti. Cuddasa kho panimāni yonipamukhasatasahassāni saṭṭhi ca satāni cha ca satāni pañca ca kammuno satāni pañca ca kammāni tīṇi ca kammāni kamme ca aḍḍhakamme ca dvaṭṭhipaṭipadā dvaṭṭhantarakappā chaḷābhijātiyo aṭṭha purisabhūmiyo ekūnapaññāsa ājīvakasate ekūnapaññāsa paribbājakasate ekūnapaññāsa nāgāvāsasate vīse indriyasate tiṃse nirayasate chattiṃsa rajodhātuyo satta saññīgabbhā satta asaññīgabbhā satta nigaṇṭhigabbhā satta devā satta mānusā satta pisācā satta sarā satta pavuṭā ³⁷ satta pavuṭasatāni satta papātā satta papātasatāni satta supinā satta supinasatāni cullāsīti mahākappino ³⁸ satasahassāni, yāni bāle ca paṇḍite ca sandhāvitvā saṃsaritvā dukkhassantaṃ karissanti. Tattha natthi ‘‘imināhaṃ sīlena vā vatena vā tapena vā brahmacariyena vā aparipakkaṃ vā kammaṃ paripācessāmi, paripakkaṃ vā kammaṃ phussa phussa byantiṃ karissāmī’ti hevaṃ natthi. Doṇamite sukhadukkhe pariyantakate saṃsāre , natthi hāyanavaḍḍhane, natthi ukkaṃsāvakaṃse. Seyyathāpi nāma suttaguḷe khitte nibbeṭhiyamānameva paleti, evameva bāle ca paṇḍite ca sandhāvitvā saṃsaritvā dukkhassantaṃ karissantī’ti.

169. ‘‘இத்த²ங் கோ² மே, ப⁴ந்தே, மக்க²லி கோ³ஸாலோ ஸந்தி³ட்டி²கங் ஸாமஞ்ஞப²லங் புட்டோ² ஸமானோ ஸங்ஸாரஸுத்³தி⁴ங் ப்³யாகாஸி. ஸெய்யதா²பி, ப⁴ந்தே, அம்ப³ங் வா புட்டோ² லபு³ஜங் ப்³யாகரெய்ய, லபு³ஜங் வா புட்டோ² அம்ப³ங் ப்³யாகரெய்ய; ஏவமேவ கோ² மே, ப⁴ந்தே, மக்க²லி கோ³ஸாலோ ஸந்தி³ட்டி²கங் ஸாமஞ்ஞப²லங் புட்டோ² ஸமானோ ஸங்ஸாரஸுத்³தி⁴ங் ப்³யாகாஸி. தஸ்ஸ மய்ஹங், ப⁴ந்தே, ஏதத³ஹோஸி – ‘கத²ஞ்ஹி நாம மாதி³ஸோ ஸமணங் வா ப்³ராஹ்மணங் வா விஜிதே வஸந்தங் அபஸாதே³தப்³ப³ங் மஞ்ஞெய்யா’தி. ஸோ கோ² அஹங், ப⁴ந்தே, மக்க²லிஸ்ஸ கோ³ஸாலஸ்ஸ பா⁴ஸிதங் நேவ அபி⁴னந்தி³ங் நப்படிக்கோஸிங். அனபி⁴னந்தி³த்வா அப்படிக்கோஸித்வா அனத்தமனோ, அனத்தமனவாசங் அனிச்சா²ரெத்வா, தமேவ வாசங் அனுக்³க³ண்ஹந்தோ அனிக்குஜ்ஜந்தோ உட்டா²யாஸனா பக்கமிங்.

169. ‘‘Itthaṃ kho me, bhante, makkhali gosālo sandiṭṭhikaṃ sāmaññaphalaṃ puṭṭho samāno saṃsārasuddhiṃ byākāsi. Seyyathāpi, bhante, ambaṃ vā puṭṭho labujaṃ byākareyya, labujaṃ vā puṭṭho ambaṃ byākareyya; evameva kho me, bhante, makkhali gosālo sandiṭṭhikaṃ sāmaññaphalaṃ puṭṭho samāno saṃsārasuddhiṃ byākāsi. Tassa mayhaṃ, bhante, etadahosi – ‘kathañhi nāma mādiso samaṇaṃ vā brāhmaṇaṃ vā vijite vasantaṃ apasādetabbaṃ maññeyyā’ti. So kho ahaṃ, bhante, makkhalissa gosālassa bhāsitaṃ neva abhinandiṃ nappaṭikkosiṃ. Anabhinanditvā appaṭikkositvā anattamano, anattamanavācaṃ anicchāretvā, tameva vācaṃ anuggaṇhanto anikkujjanto uṭṭhāyāsanā pakkamiṃ.

அஜிதகேஸகம்ப³லவாதோ³

Ajitakesakambalavādo

170. ‘‘ஏகமிதா³ஹங், ப⁴ந்தே, ஸமயங் யேன அஜிதோ கேஸகம்ப³லோ தேனுபஸங்கமிங்; உபஸங்கமித்வா அஜிதேன கேஸகம்ப³லேன ஸத்³தி⁴ங் ஸம்மோதி³ங். ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³ங். ஏகமந்தங் நிஸின்னோ கோ² அஹங், ப⁴ந்தே, அஜிதங் கேஸகம்ப³லங் ஏதத³வோசங் – ‘யதா² நு கோ² இமானி, போ⁴ அஜித, புது²ஸிப்பாயதனானி…பே॰… ஸக்கா நு கோ², போ⁴ அஜித, ஏவமேவ தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங் பஞ்ஞபேது’ந்தி?

170. ‘‘Ekamidāhaṃ, bhante, samayaṃ yena ajito kesakambalo tenupasaṅkamiṃ; upasaṅkamitvā ajitena kesakambalena saddhiṃ sammodiṃ. Sammodanīyaṃ kathaṃ sāraṇīyaṃ vītisāretvā ekamantaṃ nisīdiṃ. Ekamantaṃ nisinno kho ahaṃ, bhante, ajitaṃ kesakambalaṃ etadavocaṃ – ‘yathā nu kho imāni, bho ajita, puthusippāyatanāni…pe… sakkā nu kho, bho ajita, evameva diṭṭheva dhamme sandiṭṭhikaṃ sāmaññaphalaṃ paññapetu’nti?

171. ‘‘ஏவங் வுத்தே, ப⁴ந்தே, அஜிதோ கேஸகம்ப³லோ மங் ஏதத³வோச – ‘நத்தி², மஹாராஜ, தி³ன்னங் , நத்தி² யிட்ட²ங், நத்தி² ஹுதங், நத்தி² ஸுகதது³க்கடானங் கம்மானங் ப²லங் விபாகோ, நத்தி² அயங் லோகோ ³⁹, நத்தி² பரோ லோகோ, நத்தி² மாதா, நத்தி² பிதா, நத்தி² ஸத்தா ஓபபாதிகா, நத்தி² லோகே ஸமணப்³ராஹ்மணா ஸம்மக்³க³தா ⁴⁰ ஸம்மாபடிபன்னா, யே இமஞ்ச லோகங் பரஞ்ச லோகங் ஸயங் அபி⁴ஞ்ஞா ஸச்சி²கத்வா பவேதெ³ந்தி. சாதுமஹாபூ⁴திகோ அயங் புரிஸோ, யதா³ காலங்கரோதி, பத²வீ பத²விகாயங் அனுபேதி அனுபக³ச்ச²தி, ஆபோ ஆபோகாயங் அனுபேதி அனுபக³ச்ச²தி, தேஜோ தேஜோகாயங் அனுபேதி அனுபக³ச்ச²தி, வாயோ வாயோகாயங் அனுபேதி அனுபக³ச்ச²தி, ஆகாஸங் இந்த்³ரியானி ஸங்கமந்தி. ஆஸந்தி³பஞ்சமா புரிஸா மதங் ஆதா³ய க³ச்ச²ந்தி. யாவாளாஹனா பதா³னி பஞ்ஞாயந்தி. காபோதகானி அட்டீ²னி ப⁴வந்தி, ப⁴ஸ்ஸந்தா ஆஹுதியோ. த³த்துபஞ்ஞத்தங் யதி³த³ங் தா³னங். தேஸங் துச்ச²ங் முஸா விலாபோ யே கேசி அத்தி²கவாத³ங் வத³ந்தி. பா³லே ச பண்டி³தே ச காயஸ்ஸ பே⁴தா³ உச்சி²ஜ்ஜந்தி வினஸ்ஸந்தி, ந ஹொந்தி பரங் மரணா’தி.

171. ‘‘Evaṃ vutte, bhante, ajito kesakambalo maṃ etadavoca – ‘natthi, mahārāja, dinnaṃ , natthi yiṭṭhaṃ, natthi hutaṃ, natthi sukatadukkaṭānaṃ kammānaṃ phalaṃ vipāko, natthi ayaṃ loko ⁴¹, natthi paro loko, natthi mātā, natthi pitā, natthi sattā opapātikā, natthi loke samaṇabrāhmaṇā sammaggatā ⁴² sammāpaṭipannā, ye imañca lokaṃ parañca lokaṃ sayaṃ abhiññā sacchikatvā pavedenti. Cātumahābhūtiko ayaṃ puriso, yadā kālaṅkaroti, pathavī pathavikāyaṃ anupeti anupagacchati, āpo āpokāyaṃ anupeti anupagacchati, tejo tejokāyaṃ anupeti anupagacchati, vāyo vāyokāyaṃ anupeti anupagacchati, ākāsaṃ indriyāni saṅkamanti. Āsandipañcamā purisā mataṃ ādāya gacchanti. Yāvāḷāhanā padāni paññāyanti. Kāpotakāni aṭṭhīni bhavanti, bhassantā āhutiyo. Dattupaññattaṃ yadidaṃ dānaṃ. Tesaṃ tucchaṃ musā vilāpo ye keci atthikavādaṃ vadanti. Bāle ca paṇḍite ca kāyassa bhedā ucchijjanti vinassanti, na honti paraṃ maraṇā’ti.

172. ‘‘இத்த²ங் கோ² மே, ப⁴ந்தே, அஜிதோ கேஸகம்ப³லோ ஸந்தி³ட்டி²கங் ஸாமஞ்ஞப²லங் புட்டோ² ஸமானோ உச்சே²த³ங் ப்³யாகாஸி. ஸெய்யதா²பி, ப⁴ந்தே, அம்ப³ங் வா புட்டோ² லபு³ஜங் ப்³யாகரெய்ய , லபு³ஜங் வா புட்டோ² அம்ப³ங் ப்³யாகரெய்ய; ஏவமேவ கோ² மே, ப⁴ந்தே, அஜிதோ கேஸகம்ப³லோ ஸந்தி³ட்டி²கங் ஸாமஞ்ஞப²லங் புட்டோ² ஸமானோ உச்சே²த³ங் ப்³யாகாஸி. தஸ்ஸ மய்ஹங், ப⁴ந்தே, ஏதத³ஹோஸி – ‘கத²ஞ்ஹி நாம மாதி³ஸோ ஸமணங் வா ப்³ராஹ்மணங் வா விஜிதே வஸந்தங் அபஸாதே³தப்³ப³ங் மஞ்ஞெய்யா’தி. ஸோ கோ² அஹங், ப⁴ந்தே, அஜிதஸ்ஸ கேஸகம்ப³லஸ்ஸ பா⁴ஸிதங் நேவ அபி⁴னந்தி³ங் நப்படிக்கோஸிங். அனபி⁴னந்தி³த்வா அப்படிக்கோஸித்வா அனத்தமனோ அனத்தமனவாசங் அனிச்சா²ரெத்வா தமேவ வாசங் அனுக்³க³ண்ஹந்தோ அனிக்குஜ்ஜந்தோ உட்டா²யாஸனா பக்கமிங்.

172. ‘‘Itthaṃ kho me, bhante, ajito kesakambalo sandiṭṭhikaṃ sāmaññaphalaṃ puṭṭho samāno ucchedaṃ byākāsi. Seyyathāpi, bhante, ambaṃ vā puṭṭho labujaṃ byākareyya , labujaṃ vā puṭṭho ambaṃ byākareyya; evameva kho me, bhante, ajito kesakambalo sandiṭṭhikaṃ sāmaññaphalaṃ puṭṭho samāno ucchedaṃ byākāsi. Tassa mayhaṃ, bhante, etadahosi – ‘kathañhi nāma mādiso samaṇaṃ vā brāhmaṇaṃ vā vijite vasantaṃ apasādetabbaṃ maññeyyā’ti. So kho ahaṃ, bhante, ajitassa kesakambalassa bhāsitaṃ neva abhinandiṃ nappaṭikkosiṃ. Anabhinanditvā appaṭikkositvā anattamano anattamanavācaṃ anicchāretvā tameva vācaṃ anuggaṇhanto anikkujjanto uṭṭhāyāsanā pakkamiṃ.

பகுத⁴கச்சாயனவாதோ³

Pakudhakaccāyanavādo

173. ‘‘ஏகமிதா³ஹங், ப⁴ந்தே, ஸமயங் யேன பகுதோ⁴ கச்சாயனோ தேனுபஸங்கமிங்; உபஸங்கமித்வா பகுதே⁴ன கச்சாயனேன ஸத்³தி⁴ங் ஸம்மோதி³ங். ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³ங். ஏகமந்தங் நிஸின்னோ கோ² அஹங், ப⁴ந்தே, பகுத⁴ங் கச்சாயனங் ஏதத³வோசங் – ‘யதா² நு கோ² இமானி, போ⁴ கச்சாயன, புது²ஸிப்பாயதனானி…பே॰… ஸக்கா நு கோ², போ⁴ கச்சாயன, ஏவமேவ தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங் பஞ்ஞபேது’ந்தி?

173. ‘‘Ekamidāhaṃ, bhante, samayaṃ yena pakudho kaccāyano tenupasaṅkamiṃ; upasaṅkamitvā pakudhena kaccāyanena saddhiṃ sammodiṃ. Sammodanīyaṃ kathaṃ sāraṇīyaṃ vītisāretvā ekamantaṃ nisīdiṃ. Ekamantaṃ nisinno kho ahaṃ, bhante, pakudhaṃ kaccāyanaṃ etadavocaṃ – ‘yathā nu kho imāni, bho kaccāyana, puthusippāyatanāni…pe… sakkā nu kho, bho kaccāyana, evameva diṭṭheva dhamme sandiṭṭhikaṃ sāmaññaphalaṃ paññapetu’nti?

174. ‘‘ஏவங் வுத்தே, ப⁴ந்தே, பகுதோ⁴ கச்சாயனோ மங் ஏதத³வோச – ‘ஸத்திமே, மஹாராஜ, காயா அகடா அகடவிதா⁴ அனிம்மிதா அனிம்மாதா வஞ்ஜா² கூடட்டா² ஏஸிகட்டா²யிட்டி²தா. தே ந இஞ்ஜந்தி , ந விபரிணமந்தி, ந அஞ்ஞமஞ்ஞங் ப்³யாபா³தெ⁴ந்தி, நாலங் அஞ்ஞமஞ்ஞஸ்ஸ ஸுகா²ய வா து³க்கா²ய வா ஸுக²து³க்கா²ய வா. கதமே ஸத்த? பத²விகாயோ, ஆபோகாயோ, தேஜோகாயோ, வாயோகாயோ, ஸுகே², து³க்கே², ஜீவே ஸத்தமே – இமே ஸத்த காயா அகடா அகடவிதா⁴ அனிம்மிதா அனிம்மாதா வஞ்ஜா² கூடட்டா² ஏஸிகட்டா²யிட்டி²தா. தே ந இஞ்ஜந்தி, ந விபரிணமந்தி, ந அஞ்ஞமஞ்ஞங் ப்³யாபா³தெ⁴ந்தி, நாலங் அஞ்ஞமஞ்ஞஸ்ஸ ஸுகா²ய வா து³க்கா²ய வா ஸுக²து³க்கா²ய வா. தத்த² நத்தி² ஹந்தா வா கா⁴தேதா வா, ஸோதா வா ஸாவேதா வா, விஞ்ஞாதா வா விஞ்ஞாபேதா வா. யோபி திண்ஹேன ஸத்தே²ன ஸீஸங் சி²ந்த³தி, ந கோசி கிஞ்சி ⁴³ ஜீவிதா வோரோபேதி; ஸத்தன்னங் த்வேவ ⁴⁴ காயானமந்தரேன ஸத்த²ங் விவரமனுபததீ’தி.

174. ‘‘Evaṃ vutte, bhante, pakudho kaccāyano maṃ etadavoca – ‘sattime, mahārāja, kāyā akaṭā akaṭavidhā animmitā animmātā vañjhā kūṭaṭṭhā esikaṭṭhāyiṭṭhitā. Te na iñjanti , na vipariṇamanti, na aññamaññaṃ byābādhenti, nālaṃ aññamaññassa sukhāya vā dukkhāya vā sukhadukkhāya vā. Katame satta? Pathavikāyo, āpokāyo, tejokāyo, vāyokāyo, sukhe, dukkhe, jīve sattame – ime satta kāyā akaṭā akaṭavidhā animmitā animmātā vañjhā kūṭaṭṭhā esikaṭṭhāyiṭṭhitā. Te na iñjanti, na vipariṇamanti, na aññamaññaṃ byābādhenti, nālaṃ aññamaññassa sukhāya vā dukkhāya vā sukhadukkhāya vā. Tattha natthi hantā vā ghātetā vā, sotā vā sāvetā vā, viññātā vā viññāpetā vā. Yopi tiṇhena satthena sīsaṃ chindati, na koci kiñci ⁴⁵ jīvitā voropeti; sattannaṃ tveva ⁴⁶ kāyānamantarena satthaṃ vivaramanupatatī’ti.

175. ‘‘இத்த²ங் கோ² மே, ப⁴ந்தே, பகுதோ⁴ கச்சாயனோ ஸந்தி³ட்டி²கங் ஸாமஞ்ஞப²லங் புட்டோ² ஸமானோ அஞ்ஞேன அஞ்ஞங் ப்³யாகாஸி. ஸெய்யதா²பி, ப⁴ந்தே, அம்ப³ங் வா புட்டோ² லபு³ஜங் ப்³யாகரெய்ய, லபு³ஜங் வா புட்டோ² அம்ப³ங் ப்³யாகரெய்ய; ஏவமேவ கோ² மே, ப⁴ந்தே, பகுதோ⁴ கச்சாயனோ ஸந்தி³ட்டி²கங் ஸாமஞ்ஞப²லங் புட்டோ² ஸமானோ அஞ்ஞேன அஞ்ஞங் ப்³யாகாஸி. தஸ்ஸ மய்ஹங், ப⁴ந்தே, ஏதத³ஹோஸி – ‘கத²ஞ்ஹி நாம மாதி³ஸோ ஸமணங் வா ப்³ராஹ்மணங் வா விஜிதே வஸந்தங் அபஸாதே³தப்³ப³ங் மஞ்ஞெய்யா’தி. ஸோ கோ² அஹங், ப⁴ந்தே, பகுத⁴ஸ்ஸ கச்சாயனஸ்ஸ பா⁴ஸிதங் நேவ அபி⁴னந்தி³ங் நப்படிக்கோஸிங், அனபி⁴னந்தி³த்வா அப்படிக்கோஸித்வா அனத்தமனோ, அனத்தமனவாசங் அனிச்சா²ரெத்வா தமேவ வாசங் அனுக்³க³ண்ஹந்தோ அனிக்குஜ்ஜந்தோ உட்டா²யாஸனா பக்கமிங்.

175. ‘‘Itthaṃ kho me, bhante, pakudho kaccāyano sandiṭṭhikaṃ sāmaññaphalaṃ puṭṭho samāno aññena aññaṃ byākāsi. Seyyathāpi, bhante, ambaṃ vā puṭṭho labujaṃ byākareyya, labujaṃ vā puṭṭho ambaṃ byākareyya; evameva kho me, bhante, pakudho kaccāyano sandiṭṭhikaṃ sāmaññaphalaṃ puṭṭho samāno aññena aññaṃ byākāsi. Tassa mayhaṃ, bhante, etadahosi – ‘kathañhi nāma mādiso samaṇaṃ vā brāhmaṇaṃ vā vijite vasantaṃ apasādetabbaṃ maññeyyā’ti. So kho ahaṃ, bhante, pakudhassa kaccāyanassa bhāsitaṃ neva abhinandiṃ nappaṭikkosiṃ, anabhinanditvā appaṭikkositvā anattamano, anattamanavācaṃ anicchāretvā tameva vācaṃ anuggaṇhanto anikkujjanto uṭṭhāyāsanā pakkamiṃ.

நிக³ண்ட²னாடபுத்தவாதோ³

Nigaṇṭhanāṭaputtavādo

176. ‘‘ஏகமிதா³ஹங், ப⁴ந்தே, ஸமயங் யேன நிக³ண்டோ² நாடபுத்தோ தேனுபஸங்கமிங் ; உபஸங்கமித்வா நிக³ண்டே²ன நாடபுத்தேன ஸத்³தி⁴ங் ஸம்மோதி³ங். ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³ங். ஏகமந்தங் நிஸின்னோ கோ² அஹங், ப⁴ந்தே, நிக³ண்ட²ங் நாடபுத்தங் ஏதத³வோசங் – ‘யதா² நு கோ² இமானி, போ⁴ அக்³கி³வெஸ்ஸன, புது²ஸிப்பாயதனானி…பே॰… ஸக்கா நு கோ², போ⁴ அக்³கி³வெஸ்ஸன, ஏவமேவ தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங் பஞ்ஞபேது’ந்தி?

176. ‘‘Ekamidāhaṃ, bhante, samayaṃ yena nigaṇṭho nāṭaputto tenupasaṅkamiṃ ; upasaṅkamitvā nigaṇṭhena nāṭaputtena saddhiṃ sammodiṃ. Sammodanīyaṃ kathaṃ sāraṇīyaṃ vītisāretvā ekamantaṃ nisīdiṃ. Ekamantaṃ nisinno kho ahaṃ, bhante, nigaṇṭhaṃ nāṭaputtaṃ etadavocaṃ – ‘yathā nu kho imāni, bho aggivessana, puthusippāyatanāni…pe… sakkā nu kho, bho aggivessana, evameva diṭṭheva dhamme sandiṭṭhikaṃ sāmaññaphalaṃ paññapetu’nti?

177. ‘‘ஏவங் வுத்தே, ப⁴ந்தே, நிக³ண்டோ² நாடபுத்தோ மங் ஏதத³வோச – ‘இத⁴, மஹாராஜ, நிக³ண்டோ² சாதுயாமஸங்வரஸங்வுதோ ஹோதி. கத²ஞ்ச, மஹாராஜ, நிக³ண்டோ² சாதுயாமஸங்வரஸங்வுதோ ஹோதி? இத⁴, மஹாராஜ, நிக³ண்டோ² ஸப்³ப³வாரிவாரிதோ ச ஹோதி, ஸப்³ப³வாரியுத்தோ ச, ஸப்³ப³வாரிது⁴தோ ச, ஸப்³ப³வாரிபு²டோ ச. ஏவங் கோ², மஹாராஜ, நிக³ண்டோ² சாதுயாமஸங்வரஸங்வுதோ ஹோதி . யதோ கோ², மஹாராஜ, நிக³ண்டோ² ஏவங் சாதுயாமஸங்வரஸங்வுதோ ஹோதி; அயங் வுச்சதி, மஹாராஜ, நிக³ண்டோ² ⁴⁷ க³தத்தோ ச யதத்தோ ச டி²தத்தோ சா’தி.

177. ‘‘Evaṃ vutte, bhante, nigaṇṭho nāṭaputto maṃ etadavoca – ‘idha, mahārāja, nigaṇṭho cātuyāmasaṃvarasaṃvuto hoti. Kathañca, mahārāja, nigaṇṭho cātuyāmasaṃvarasaṃvuto hoti? Idha, mahārāja, nigaṇṭho sabbavārivārito ca hoti, sabbavāriyutto ca, sabbavāridhuto ca, sabbavāriphuṭo ca. Evaṃ kho, mahārāja, nigaṇṭho cātuyāmasaṃvarasaṃvuto hoti . Yato kho, mahārāja, nigaṇṭho evaṃ cātuyāmasaṃvarasaṃvuto hoti; ayaṃ vuccati, mahārāja, nigaṇṭho ⁴⁸ gatatto ca yatatto ca ṭhitatto cā’ti.

178. ‘‘இத்த²ங் கோ² மே, ப⁴ந்தே, நிக³ண்டோ² நாடபுத்தோ ஸந்தி³ட்டி²கங் ஸாமஞ்ஞப²லங் புட்டோ² ஸமானோ சாதுயாமஸங்வரங் ப்³யாகாஸி. ஸெய்யதா²பி, ப⁴ந்தே, அம்ப³ங் வா புட்டோ² லபு³ஜங் ப்³யாகரெய்ய, லபு³ஜங் வா புட்டோ² அம்ப³ங் ப்³யாகரெய்ய; ஏவமேவ கோ² மே, ப⁴ந்தே, நிக³ண்டோ² நாடபுத்தோ ஸந்தி³ட்டி²கங் ஸாமஞ்ஞப²லங் புட்டோ² ஸமானோ சாதுயாமஸங்வரங் ப்³யாகாஸி. தஸ்ஸ மய்ஹங், ப⁴ந்தே, ஏதத³ஹோஸி – ‘கத²ஞ்ஹி நாம மாதி³ஸோ ஸமணங் வா ப்³ராஹ்மணங் வா விஜிதே வஸந்தங் அபஸாதே³தப்³ப³ங் மஞ்ஞெய்யா’தி . ஸோ கோ² அஹங், ப⁴ந்தே, நிக³ண்ட²ஸ்ஸ நாடபுத்தஸ்ஸ பா⁴ஸிதங் நேவ அபி⁴னந்தி³ங் நப்படிக்கோஸிங். அனபி⁴னந்தி³த்வா அப்படிக்கோஸித்வா அனத்தமனோ அனத்தமனவாசங் அனிச்சா²ரெத்வா தமேவ வாசங் அனுக்³க³ண்ஹந்தோ அனிக்குஜ்ஜந்தோ உட்டா²யாஸனா பக்கமிங்.

178. ‘‘Itthaṃ kho me, bhante, nigaṇṭho nāṭaputto sandiṭṭhikaṃ sāmaññaphalaṃ puṭṭho samāno cātuyāmasaṃvaraṃ byākāsi. Seyyathāpi, bhante, ambaṃ vā puṭṭho labujaṃ byākareyya, labujaṃ vā puṭṭho ambaṃ byākareyya; evameva kho me, bhante, nigaṇṭho nāṭaputto sandiṭṭhikaṃ sāmaññaphalaṃ puṭṭho samāno cātuyāmasaṃvaraṃ byākāsi. Tassa mayhaṃ, bhante, etadahosi – ‘kathañhi nāma mādiso samaṇaṃ vā brāhmaṇaṃ vā vijite vasantaṃ apasādetabbaṃ maññeyyā’ti . So kho ahaṃ, bhante, nigaṇṭhassa nāṭaputtassa bhāsitaṃ neva abhinandiṃ nappaṭikkosiṃ. Anabhinanditvā appaṭikkositvā anattamano anattamanavācaṃ anicchāretvā tameva vācaṃ anuggaṇhanto anikkujjanto uṭṭhāyāsanā pakkamiṃ.

ஸஞ்சயபே³லட்ட²புத்தவாதோ³

Sañcayabelaṭṭhaputtavādo

179. ‘‘ஏகமிதா³ஹங், ப⁴ந்தே, ஸமயங் யேன ஸஞ்சயோ பே³லட்ட²புத்தோ தேனுபஸங்கமிங்; உபஸங்கமித்வா ஸஞ்சயேன பே³லட்ட²புத்தேன ஸத்³தி⁴ங் ஸம்மோதி³ங். ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³ங். ஏகமந்தங் நிஸின்னோ கோ² அஹங் ப⁴ந்தே, ஸஞ்சயங் பே³லட்ட²புத்தங் ஏதத³வோசங் – ‘யதா² நு கோ² இமானி, போ⁴ ஸஞ்சய, புது²ஸிப்பாயதனானி…பே॰… ஸக்கா நு கோ², போ⁴ ஸஞ்சய, ஏவமேவ தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங் பஞ்ஞபேது’ந்தி?

179. ‘‘Ekamidāhaṃ, bhante, samayaṃ yena sañcayo belaṭṭhaputto tenupasaṅkamiṃ; upasaṅkamitvā sañcayena belaṭṭhaputtena saddhiṃ sammodiṃ. Sammodanīyaṃ kathaṃ sāraṇīyaṃ vītisāretvā ekamantaṃ nisīdiṃ. Ekamantaṃ nisinno kho ahaṃ bhante, sañcayaṃ belaṭṭhaputtaṃ etadavocaṃ – ‘yathā nu kho imāni, bho sañcaya, puthusippāyatanāni…pe… sakkā nu kho, bho sañcaya, evameva diṭṭheva dhamme sandiṭṭhikaṃ sāmaññaphalaṃ paññapetu’nti?

180. ‘‘ஏவங் வுத்தே, ப⁴ந்தே, ஸஞ்சயோ பே³லட்ட²புத்தோ மங் ஏதத³வோச – ‘அத்தி² பரோ லோகோதி இதி சே மங் புச்ச²ஸி, அத்தி² பரோ லோகோதி இதி சே மே அஸ்ஸ, அத்தி² பரோ லோகோதி இதி தே நங் ப்³யாகரெய்யங். ஏவந்திபி மே நோ, ததா²திபி மே நோ, அஞ்ஞதா²திபி மே நோ, நோதிபி மே நோ, நோ நோதிபி மே நோ. நத்தி² பரோ லோகோ…பே॰… அத்தி² ச நத்தி² ச பரோ லோகோ…பே॰… நேவத்தி² ந நத்தி² பரோ லோகோ…பே॰… அத்தி² ஸத்தா ஓபபாதிகா…பே॰… நத்தி² ஸத்தா ஓபபாதிகா…பே॰… அத்தி² ச நத்தி² ச ஸத்தா ஓபபாதிகா…பே॰… நேவத்தி² ந நத்தி² ஸத்தா ஓபபாதிகா…பே॰… அத்தி² ஸுகதது³க்கடானங் கம்மானங் ப²லங் விபாகோ…பே॰… நத்தி² ஸுகதது³க்கடானங் கம்மானங் ப²லங் விபாகோ…பே॰…அத்தி² ச நத்தி² ச ஸுகதது³க்கடானங் கம்மானங் ப²லங் விபாகோ…பே॰… நேவத்தி² ந நத்தி² ஸுகதது³க்கடானங் கம்மானங் ப²லங் விபாகோ…பே॰… ஹோதி ததா²க³தோ பரங் மரணா…பே॰… ந ஹோதி ததா²க³தோ பரங் மரணா…பே॰… ஹோதி ச ந ச ஹோதி ததா²க³தோ பரங் மரணா…பே॰… நேவ ஹோதி ந ந ஹோதி ததா²க³தோ பரங் மரணாதி இதி சே மங் புச்ச²ஸி, நேவ ஹோதி ந ந ஹோதி ததா²க³தோ பரங் மரணாதி இதி சே மே அஸ்ஸ, நேவ ஹோதி ந ந ஹோதி ததா²க³தோ பரங் மரணாதி இதி தே நங் ப்³யாகரெய்யங். ஏவந்திபி மே நோ, ததா²திபி மே நோ, அஞ்ஞதா²திபி மே நோ, நோதிபி மே நோ, நோ நோதிபி மே நோ’தி.

180. ‘‘Evaṃ vutte, bhante, sañcayo belaṭṭhaputto maṃ etadavoca – ‘atthi paro lokoti iti ce maṃ pucchasi, atthi paro lokoti iti ce me assa, atthi paro lokoti iti te naṃ byākareyyaṃ. Evantipi me no, tathātipi me no, aññathātipi me no, notipi me no, no notipi me no. Natthi paro loko…pe… atthi ca natthi ca paro loko…pe… nevatthi na natthi paro loko…pe… atthi sattā opapātikā…pe… natthi sattā opapātikā…pe… atthi ca natthi ca sattā opapātikā…pe… nevatthi na natthi sattā opapātikā…pe… atthi sukatadukkaṭānaṃ kammānaṃ phalaṃ vipāko…pe… natthi sukatadukkaṭānaṃ kammānaṃ phalaṃ vipāko…pe…atthi ca natthi ca sukatadukkaṭānaṃ kammānaṃ phalaṃ vipāko…pe… nevatthi na natthi sukatadukkaṭānaṃ kammānaṃ phalaṃ vipāko…pe… hoti tathāgato paraṃ maraṇā…pe… na hoti tathāgato paraṃ maraṇā…pe… hoti ca na ca hoti tathāgato paraṃ maraṇā…pe… neva hoti na na hoti tathāgato paraṃ maraṇāti iti ce maṃ pucchasi, neva hoti na na hoti tathāgato paraṃ maraṇāti iti ce me assa, neva hoti na na hoti tathāgato paraṃ maraṇāti iti te naṃ byākareyyaṃ. Evantipi me no, tathātipi me no, aññathātipi me no, notipi me no, no notipi me no’ti.

181. ‘‘இத்த²ங் கோ² மே, ப⁴ந்தே, ஸஞ்சயோ பே³லட்ட²புத்தோ ஸந்தி³ட்டி²கங் ஸாமஞ்ஞப²லங் புட்டோ² ஸமானோ விக்கே²பங் ப்³யாகாஸி. ஸெய்யதா²பி, ப⁴ந்தே, அம்ப³ங் வா புட்டோ² லபு³ஜங் ப்³யாகரெய்ய, லபு³ஜங் வா புட்டோ² அம்ப³ங் ப்³யாகரெய்ய; ஏவமேவ கோ² மே, ப⁴ந்தே, ஸஞ்சயோ பே³லட்ட²புத்தோ ஸந்தி³ட்டி²கங் ஸாமஞ்ஞப²லங் புட்டோ² ஸமானோ விக்கே²பங் ப்³யாகாஸி. தஸ்ஸ மய்ஹங், ப⁴ந்தே, ஏதத³ஹோஸி – ‘அயஞ்ச இமேஸங் ஸமணப்³ராஹ்மணானங் ஸப்³ப³பா³லோ ஸப்³ப³மூள்ஹோ. கத²ஞ்ஹி நாம ஸந்தி³ட்டி²கங் ஸாமஞ்ஞப²லங் புட்டோ² ஸமானோ விக்கே²பங் ப்³யாகரிஸ்ஸதீ’தி. தஸ்ஸ மய்ஹங், ப⁴ந்தே, ஏதத³ஹோஸி – ‘கத²ஞ்ஹி நாம மாதி³ஸோ ஸமணங் வா ப்³ராஹ்மணங் வா விஜிதே வஸந்தங் அபஸாதே³தப்³ப³ங் மஞ்ஞெய்யா’தி. ஸோ கோ² அஹங், ப⁴ந்தே, ஸஞ்சயஸ்ஸ பே³லட்ட²புத்தஸ்ஸ பா⁴ஸிதங் நேவ அபி⁴னந்தி³ங் நப்படிக்கோஸிங். அனபி⁴னந்தி³த்வா அப்படிக்கோஸித்வா அனத்தமனோ அனத்தமனவாசங் அனிச்சா²ரெத்வா தமேவ வாசங் அனுக்³க³ண்ஹந்தோ அனிக்குஜ்ஜந்தோ உட்டா²யாஸனா பக்கமிங்.

181. ‘‘Itthaṃ kho me, bhante, sañcayo belaṭṭhaputto sandiṭṭhikaṃ sāmaññaphalaṃ puṭṭho samāno vikkhepaṃ byākāsi. Seyyathāpi, bhante, ambaṃ vā puṭṭho labujaṃ byākareyya, labujaṃ vā puṭṭho ambaṃ byākareyya; evameva kho me, bhante, sañcayo belaṭṭhaputto sandiṭṭhikaṃ sāmaññaphalaṃ puṭṭho samāno vikkhepaṃ byākāsi. Tassa mayhaṃ, bhante, etadahosi – ‘ayañca imesaṃ samaṇabrāhmaṇānaṃ sabbabālo sabbamūḷho. Kathañhi nāma sandiṭṭhikaṃ sāmaññaphalaṃ puṭṭho samāno vikkhepaṃ byākarissatī’ti. Tassa mayhaṃ, bhante, etadahosi – ‘kathañhi nāma mādiso samaṇaṃ vā brāhmaṇaṃ vā vijite vasantaṃ apasādetabbaṃ maññeyyā’ti. So kho ahaṃ, bhante, sañcayassa belaṭṭhaputtassa bhāsitaṃ neva abhinandiṃ nappaṭikkosiṃ. Anabhinanditvā appaṭikkositvā anattamano anattamanavācaṃ anicchāretvā tameva vācaṃ anuggaṇhanto anikkujjanto uṭṭhāyāsanā pakkamiṃ.

பட²மஸந்தி³ட்டி²கஸாமஞ்ஞப²லங்

Paṭhamasandiṭṭhikasāmaññaphalaṃ

182. ‘‘ஸோஹங், ப⁴ந்தே, ப⁴க³வந்தம்பி புச்சா²மி – ‘யதா² நு கோ² இமானி, ப⁴ந்தே, புது²ஸிப்பாயதனானி ஸெய்யதி²த³ங் – ஹத்தா²ரோஹா அஸ்ஸாரோஹா ரதி²கா த⁴னுக்³க³ஹா சேலகா சலகா பிண்ட³தா³யகா உக்³கா³ ராஜபுத்தா பக்க²ந்தி³னோ மஹானாகா³ ஸூரா சம்மயோதி⁴னோ தா³ஸிகபுத்தா ஆளாரிகா கப்பகா ந்ஹாபகா ஸூதா³ மாலாகாரா ரஜகா பேஸகாரா நளகாரா கும்ப⁴காரா க³ணகா முத்³தி³கா, யானி வா பனஞ்ஞானிபி ஏவங்க³தானி புது²ஸிப்பாயதனானி, தே தி³ட்டே²வ த⁴ம்மே ஸந்தி³ட்டி²கங் ஸிப்பப²லங் உபஜீவந்தி, தே தேன அத்தானங் ஸுகெ²ந்தி பீணெந்தி, மாதாபிதரோ ஸுகெ²ந்தி பீணெந்தி, புத்ததா³ரங் ஸுகெ²ந்தி பீணெந்தி, மித்தாமச்சே ஸுகெ²ந்தி பீணெந்தி, ஸமணப்³ராஹ்மணேஸு உத்³த⁴க்³கி³கங் த³க்கி²ணங் பதிட்ட²பெந்தி ஸோவக்³கி³கங் ஸுக²விபாகங் ஸக்³க³ஸங்வத்தனிகங். ஸக்கா நு கோ² மே , ப⁴ந்தே, ஏவமேவ தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங் பஞ்ஞபேது’ந்தி?

182. ‘‘Sohaṃ, bhante, bhagavantampi pucchāmi – ‘yathā nu kho imāni, bhante, puthusippāyatanāni seyyathidaṃ – hatthārohā assārohā rathikā dhanuggahā celakā calakā piṇḍadāyakā uggā rājaputtā pakkhandino mahānāgā sūrā cammayodhino dāsikaputtā āḷārikā kappakā nhāpakā sūdā mālākārā rajakā pesakārā naḷakārā kumbhakārā gaṇakā muddikā, yāni vā panaññānipi evaṃgatāni puthusippāyatanāni, te diṭṭheva dhamme sandiṭṭhikaṃ sippaphalaṃ upajīvanti, te tena attānaṃ sukhenti pīṇenti, mātāpitaro sukhenti pīṇenti, puttadāraṃ sukhenti pīṇenti, mittāmacce sukhenti pīṇenti, samaṇabrāhmaṇesu uddhaggikaṃ dakkhiṇaṃ patiṭṭhapenti sovaggikaṃ sukhavipākaṃ saggasaṃvattanikaṃ. Sakkā nu kho me , bhante, evameva diṭṭheva dhamme sandiṭṭhikaṃ sāmaññaphalaṃ paññapetu’nti?

183. ‘‘ஸக்கா, மஹாராஜ. தேன ஹி, மஹாராஜ, தஞ்ஞேவெத்த² படிபுச்சி²ஸ்ஸாமி. யதா² தே க²மெய்ய, ததா² நங் ப்³யாகரெய்யாஸி. தங் கிங் மஞ்ஞஸி, மஹாராஜ, இத⁴ தே அஸ்ஸ புரிஸோ தா³ஸோ கம்மகாரோ ⁴⁹ புப்³பு³ட்டா²யீ பச்சா²னிபாதீ கிங்காரபடிஸ்ஸாவீ மனாபசாரீ பியவாதீ³ முகு²ல்லோககோ ⁵⁰. தஸ்ஸ ஏவமஸ்ஸ – ‘அச்ச²ரியங், வத போ⁴, அப்³பு⁴தங், வத போ⁴, புஞ்ஞானங் க³தி, புஞ்ஞானங் விபாகோ. அயஞ்ஹி ராஜா மாக³தோ⁴ அஜாதஸத்து வேதே³ஹிபுத்தோ மனுஸ்ஸோ ; அஹம்பி மனுஸ்ஸோ. அயஞ்ஹி ராஜா மாக³தோ⁴ அஜாதஸத்து வேதே³ஹிபுத்தோ பஞ்சஹி காமகு³ணேஹி ஸமப்பிதோ ஸமங்கீ³பூ⁴தோ பரிசாரேதி, தே³வோ மஞ்ஞே. அஹங் பனம்ஹிஸ்ஸ தா³ஸோ கம்மகாரோ புப்³பு³ட்டா²யீ பச்சா²னிபாதீ கிங்காரபடிஸ்ஸாவீ மனாபசாரீ பியவாதீ³ முகு²ல்லோககோ. ஸோ வதஸ்ஸாஹங் புஞ்ஞானி கரெய்யங். யங்னூனாஹங் கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜெய்ய’ந்தி. ஸோ அபரேன ஸமயேன கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜெய்ய. ஸோ ஏவங் பப்³ப³ஜிதோ ஸமானோ காயேன ஸங்வுதோ விஹரெய்ய, வாசாய ஸங்வுதோ விஹரெய்ய, மனஸா ஸங்வுதோ விஹரெய்ய, கா⁴ஸச்சா²த³னபரமதாய ஸந்துட்டோ², அபி⁴ரதோ பவிவேகே. தங் சே தே புரிஸா ஏவமாரோசெய்யுங் – ‘யக்³கே⁴ தே³வ ஜானெய்யாஸி, யோ தே ஸோ புரிஸோ ⁵¹ தா³ஸோ கம்மகாரோ புப்³பு³ட்டா²யீ பச்சா²னிபாதீ கிங்காரபடிஸ்ஸாவீ மனாபசாரீ பியவாதீ³ முகு²ல்லோககோ; ஸோ, தே³வ, கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிதோ. ஸோ ஏவங் பப்³ப³ஜிதோ ஸமானோ காயேன ஸங்வுதோ விஹரதி, வாசாய ஸங்வுதோ விஹரதி, மனஸா ஸங்வுதோ விஹரதி, கா⁴ஸச்சா²த³னபரமதாய ஸந்துட்டோ², அபி⁴ரதோ பவிவேகே’தி. அபி நு த்வங் ஏவங் வதெ³ய்யாஸி – ‘ஏது மே, போ⁴, ஸோ புரிஸோ, புனதே³வ ஹோது தா³ஸோ கம்மகாரோ புப்³பு³ட்டா²யீ பச்சா²னிபாதீ கிங்காரபடிஸ்ஸாவீ மனாபசாரீ பியவாதீ³ முகு²ல்லோககோ’தி?

183. ‘‘Sakkā, mahārāja. Tena hi, mahārāja, taññevettha paṭipucchissāmi. Yathā te khameyya, tathā naṃ byākareyyāsi. Taṃ kiṃ maññasi, mahārāja, idha te assa puriso dāso kammakāro ⁵² pubbuṭṭhāyī pacchānipātī kiṅkārapaṭissāvī manāpacārī piyavādī mukhullokako ⁵³. Tassa evamassa – ‘acchariyaṃ, vata bho, abbhutaṃ, vata bho, puññānaṃ gati, puññānaṃ vipāko. Ayañhi rājā māgadho ajātasattu vedehiputto manusso ; ahampi manusso. Ayañhi rājā māgadho ajātasattu vedehiputto pañcahi kāmaguṇehi samappito samaṅgībhūto paricāreti, devo maññe. Ahaṃ panamhissa dāso kammakāro pubbuṭṭhāyī pacchānipātī kiṅkārapaṭissāvī manāpacārī piyavādī mukhullokako. So vatassāhaṃ puññāni kareyyaṃ. Yaṃnūnāhaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajeyya’nti. So aparena samayena kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajeyya. So evaṃ pabbajito samāno kāyena saṃvuto vihareyya, vācāya saṃvuto vihareyya, manasā saṃvuto vihareyya, ghāsacchādanaparamatāya santuṭṭho, abhirato paviveke. Taṃ ce te purisā evamāroceyyuṃ – ‘yagghe deva jāneyyāsi, yo te so puriso ⁵⁴ dāso kammakāro pubbuṭṭhāyī pacchānipātī kiṅkārapaṭissāvī manāpacārī piyavādī mukhullokako; so, deva, kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajito. So evaṃ pabbajito samāno kāyena saṃvuto viharati, vācāya saṃvuto viharati, manasā saṃvuto viharati, ghāsacchādanaparamatāya santuṭṭho, abhirato paviveke’ti. Api nu tvaṃ evaṃ vadeyyāsi – ‘etu me, bho, so puriso, punadeva hotu dāso kammakāro pubbuṭṭhāyī pacchānipātī kiṅkārapaṭissāvī manāpacārī piyavādī mukhullokako’ti?

184. ‘‘நோ ஹேதங், ப⁴ந்தே. அத² கோ² நங் மயமேவ அபி⁴வாதெ³ய்யாமபி , பச்சுட்டெ²ய்யாமபி, ஆஸனேனபி நிமந்தெய்யாம, அபி⁴னிமந்தெய்யாமபி நங் சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேஹி, த⁴ம்மிகம்பிஸ்ஸ ரக்கா²வரணகு³த்திங் ஸங்வித³ஹெய்யாமா’’தி.

184. ‘‘No hetaṃ, bhante. Atha kho naṃ mayameva abhivādeyyāmapi , paccuṭṭheyyāmapi, āsanenapi nimanteyyāma, abhinimanteyyāmapi naṃ cīvarapiṇḍapātasenāsanagilānappaccayabhesajjaparikkhārehi, dhammikampissa rakkhāvaraṇaguttiṃ saṃvidaheyyāmā’’ti.

185. ‘‘தங் கிங் மஞ்ஞஸி, மஹாராஜ, யதி³ ஏவங் ஸந்தே ஹோதி வா ஸந்தி³ட்டி²கங் ஸாமஞ்ஞப²லங் நோ வா’’தி? ‘‘அத்³தா⁴ கோ², ப⁴ந்தே, ஏவங் ஸந்தே ஹோதி ஸந்தி³ட்டி²கங் ஸாமஞ்ஞப²ல’’ந்தி. ‘‘இத³ங் கோ² தே, மஹாராஜ, மயா பட²மங் தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங் பஞ்ஞத்த’’ந்தி.

185. ‘‘Taṃ kiṃ maññasi, mahārāja, yadi evaṃ sante hoti vā sandiṭṭhikaṃ sāmaññaphalaṃ no vā’’ti? ‘‘Addhā kho, bhante, evaṃ sante hoti sandiṭṭhikaṃ sāmaññaphala’’nti. ‘‘Idaṃ kho te, mahārāja, mayā paṭhamaṃ diṭṭheva dhamme sandiṭṭhikaṃ sāmaññaphalaṃ paññatta’’nti.

து³தியஸந்தி³ட்டி²கஸாமஞ்ஞப²லங்

Dutiyasandiṭṭhikasāmaññaphalaṃ

186. ‘‘ஸக்கா பன, ப⁴ந்தே, அஞ்ஞம்பி ஏவமேவ தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங் பஞ்ஞபேது’’ந்தி? ‘‘ஸக்கா, மஹாராஜ. தேன ஹி, மஹாராஜ, தஞ்ஞேவெத்த² படிபுச்சி²ஸ்ஸாமி. யதா² தே க²மெய்ய, ததா² நங் ப்³யாகரெய்யாஸி. தங் கிங் மஞ்ஞஸி, மஹாராஜ, இத⁴ தே அஸ்ஸ புரிஸோ கஸ்ஸகோ க³ஹபதிகோ கரகாரகோ ராஸிவட்³ட⁴கோ. தஸ்ஸ ஏவமஸ்ஸ – ‘அச்ச²ரியங் வத போ⁴, அப்³பு⁴தங் வத போ⁴, புஞ்ஞானங் க³தி, புஞ்ஞானங் விபாகோ. அயஞ்ஹி ராஜா மாக³தோ⁴ அஜாதஸத்து வேதே³ஹிபுத்தோ மனுஸ்ஸோ, அஹம்பி மனுஸ்ஸோ. அயஞ்ஹி ராஜா மாக³தோ⁴ அஜாதஸத்து வேதே³ஹிபுத்தோ பஞ்சஹி காமகு³ணேஹி ஸமப்பிதோ ஸமங்கீ³பூ⁴தோ பரிசாரேதி, தே³வோ மஞ்ஞே. அஹங் பனம்ஹிஸ்ஸ கஸ்ஸகோ க³ஹபதிகோ கரகாரகோ ராஸிவட்³ட⁴கோ. ஸோ வதஸ்ஸாஹங் புஞ்ஞானி கரெய்யங். யங்னூனாஹங் கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜெய்ய’ந்தி.

186. ‘‘Sakkā pana, bhante, aññampi evameva diṭṭheva dhamme sandiṭṭhikaṃ sāmaññaphalaṃ paññapetu’’nti? ‘‘Sakkā, mahārāja. Tena hi, mahārāja, taññevettha paṭipucchissāmi. Yathā te khameyya, tathā naṃ byākareyyāsi. Taṃ kiṃ maññasi, mahārāja, idha te assa puriso kassako gahapatiko karakārako rāsivaḍḍhako. Tassa evamassa – ‘acchariyaṃ vata bho, abbhutaṃ vata bho, puññānaṃ gati, puññānaṃ vipāko. Ayañhi rājā māgadho ajātasattu vedehiputto manusso, ahampi manusso. Ayañhi rājā māgadho ajātasattu vedehiputto pañcahi kāmaguṇehi samappito samaṅgībhūto paricāreti, devo maññe. Ahaṃ panamhissa kassako gahapatiko karakārako rāsivaḍḍhako. So vatassāhaṃ puññāni kareyyaṃ. Yaṃnūnāhaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajeyya’nti.

‘‘ஸோ அபரேன ஸமயேன அப்பங் வா போ⁴க³க்க²ந்த⁴ங் பஹாய மஹந்தங் வா போ⁴க³க்க²ந்த⁴ங் பஹாய, அப்பங் வா ஞாதிபரிவட்டங் பஹாய மஹந்தங் வா ஞாதிபரிவட்டங் பஹாய கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜெய்ய. ஸோ ஏவங் பப்³ப³ஜிதோ ஸமானோ காயேன ஸங்வுதோ விஹரெய்ய, வாசாய ஸங்வுதோ விஹரெய்ய, மனஸா ஸங்வுதோ விஹரெய்ய, கா⁴ஸச்சா²த³னபரமதாய ஸந்துட்டோ², அபி⁴ரதோ பவிவேகே. தங் சே தே புரிஸா ஏவமாரோசெய்யுங் – ‘யக்³கே⁴, தே³வ ஜானெய்யாஸி, யோ தே ஸோ புரிஸோ ⁵⁵ கஸ்ஸகோ க³ஹபதிகோ கரகாரகோ ராஸிவட்³ட⁴கோ; ஸோ தே³வ கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிதோ. ஸோ ஏவங் பப்³ப³ஜிதோ ஸமானோ காயேன ஸங்வுதோ விஹரதி, வாசாய ஸங்வுதோ விஹரதி, மனஸா ஸங்வுதோ விஹரதி, கா⁴ஸச்சா²த³னபரமதாய ஸந்துட்டோ², அபி⁴ரதோ பவிவேகே’’தி. அபி நு த்வங் ஏவங் வதெ³ய்யாஸி – ‘ஏது மே, போ⁴, ஸோ புரிஸோ, புனதே³வ ஹோது கஸ்ஸகோ க³ஹபதிகோ கரகாரகோ ராஸிவட்³ட⁴கோ’தி?

‘‘So aparena samayena appaṃ vā bhogakkhandhaṃ pahāya mahantaṃ vā bhogakkhandhaṃ pahāya, appaṃ vā ñātiparivaṭṭaṃ pahāya mahantaṃ vā ñātiparivaṭṭaṃ pahāya kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajeyya. So evaṃ pabbajito samāno kāyena saṃvuto vihareyya, vācāya saṃvuto vihareyya, manasā saṃvuto vihareyya, ghāsacchādanaparamatāya santuṭṭho, abhirato paviveke. Taṃ ce te purisā evamāroceyyuṃ – ‘yagghe, deva jāneyyāsi, yo te so puriso ⁵⁶ kassako gahapatiko karakārako rāsivaḍḍhako; so deva kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajito. So evaṃ pabbajito samāno kāyena saṃvuto viharati, vācāya saṃvuto viharati, manasā saṃvuto viharati, ghāsacchādanaparamatāya santuṭṭho, abhirato paviveke’’ti. Api nu tvaṃ evaṃ vadeyyāsi – ‘etu me, bho, so puriso, punadeva hotu kassako gahapatiko karakārako rāsivaḍḍhako’ti?

187. ‘‘நோ ஹேதங், ப⁴ந்தே. அத² கோ² நங் மயமேவ அபி⁴வாதெ³ய்யாமபி, பச்சுட்டெ²ய்யாமபி, ஆஸனேனபி நிமந்தெய்யாம, அபி⁴னிமந்தெய்யாமபி நங் சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேஹி, த⁴ம்மிகம்பிஸ்ஸ ரக்கா²வரணகு³த்திங் ஸங்வித³ஹெய்யாமா’’தி.

187. ‘‘No hetaṃ, bhante. Atha kho naṃ mayameva abhivādeyyāmapi, paccuṭṭheyyāmapi, āsanenapi nimanteyyāma, abhinimanteyyāmapi naṃ cīvarapiṇḍapātasenāsanagilānappaccayabhesajjaparikkhārehi, dhammikampissa rakkhāvaraṇaguttiṃ saṃvidaheyyāmā’’ti.

188. ‘‘தங் கிங் மஞ்ஞஸி, மஹாராஜ? யதி³ ஏவங் ஸந்தே ஹோதி வா ஸந்தி³ட்டி²கங் ஸாமஞ்ஞப²லங் நோ வா’’தி? ‘‘அத்³தா⁴ கோ², ப⁴ந்தே, ஏவங் ஸந்தே ஹோதி ஸந்தி³ட்டி²கங் ஸாமஞ்ஞப²ல’’ந்தி . ‘‘இத³ங் கோ² தே, மஹாராஜ, மயா து³தியங் தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங் பஞ்ஞத்த’’ந்தி.

188. ‘‘Taṃ kiṃ maññasi, mahārāja? Yadi evaṃ sante hoti vā sandiṭṭhikaṃ sāmaññaphalaṃ no vā’’ti? ‘‘Addhā kho, bhante, evaṃ sante hoti sandiṭṭhikaṃ sāmaññaphala’’nti . ‘‘Idaṃ kho te, mahārāja, mayā dutiyaṃ diṭṭheva dhamme sandiṭṭhikaṃ sāmaññaphalaṃ paññatta’’nti.

பணீததரஸாமஞ்ஞப²லங்

Paṇītatarasāmaññaphalaṃ

189. ‘‘ஸக்கா பன, ப⁴ந்தே, அஞ்ஞம்பி தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங் பஞ்ஞபேதுங் இமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்சா’’தி? ‘‘ஸக்கா, மஹாராஜ. தேன ஹி, மஹாராஜ, ஸுணோஹி, ஸாது⁴கங் மனஸி கரோஹி, பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² ராஜா மாக³தோ⁴ அஜாதஸத்து வேதே³ஹிபுத்தோ ப⁴க³வதோ பச்சஸ்ஸோஸி.

189. ‘‘Sakkā pana, bhante, aññampi diṭṭheva dhamme sandiṭṭhikaṃ sāmaññaphalaṃ paññapetuṃ imehi sandiṭṭhikehi sāmaññaphalehi abhikkantatarañca paṇītatarañcā’’ti? ‘‘Sakkā, mahārāja. Tena hi, mahārāja, suṇohi, sādhukaṃ manasi karohi, bhāsissāmī’’ti. ‘‘Evaṃ, bhante’’ti kho rājā māgadho ajātasattu vedehiputto bhagavato paccassosi.

190. ப⁴க³வா ஏதத³வோச – ‘‘இத⁴, மஹாராஜ, ததா²க³தோ லோகே உப்பஜ்ஜதி அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா. ஸோ இமங் லோகங் ஸதே³வகங் ஸமாரகங் ஸப்³ரஹ்மகங் ஸஸ்ஸமணப்³ராஹ்மணிங் பஜங் ஸதே³வமனுஸ்ஸங் ஸயங் அபி⁴ஞ்ஞா ஸச்சி²கத்வா பவேதே³தி. ஸோ த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங், கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி.

190. Bhagavā etadavoca – ‘‘idha, mahārāja, tathāgato loke uppajjati arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā. So imaṃ lokaṃ sadevakaṃ samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā sacchikatvā pavedeti. So dhammaṃ deseti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ, kevalaparipuṇṇaṃ parisuddhaṃ brahmacariyaṃ pakāseti.

191. ‘‘தங் த⁴ம்மங் ஸுணாதி க³ஹபதி வா க³ஹபதிபுத்தோ வா அஞ்ஞதரஸ்மிங் வா குலே பச்சாஜாதோ. ஸோ தங் த⁴ம்மங் ஸுத்வா ததா²க³தே ஸத்³த⁴ங் படிலப⁴தி. ஸோ தேன ஸத்³தா⁴படிலாபே⁴ன ஸமன்னாக³தோ இதி படிஸஞ்சிக்க²தி – ‘ஸம்பா³தோ⁴ க⁴ராவாஸோ ரஜோபதோ², அப்³போ⁴காஸோ பப்³ப³ஜ்ஜா. நயித³ங் ஸுகரங் அகா³ரங் அஜ்ஜா²வஸதா ஏகந்தபரிபுண்ணங் ஏகந்தபரிஸுத்³த⁴ங் ஸங்க²லிகி²தங் ப்³ரஹ்மசரியங் சரிதுங். யங்னூனாஹங் கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜெய்ய’ந்தி.

191. ‘‘Taṃ dhammaṃ suṇāti gahapati vā gahapatiputto vā aññatarasmiṃ vā kule paccājāto. So taṃ dhammaṃ sutvā tathāgate saddhaṃ paṭilabhati. So tena saddhāpaṭilābhena samannāgato iti paṭisañcikkhati – ‘sambādho gharāvāso rajopatho, abbhokāso pabbajjā. Nayidaṃ sukaraṃ agāraṃ ajjhāvasatā ekantaparipuṇṇaṃ ekantaparisuddhaṃ saṅkhalikhitaṃ brahmacariyaṃ carituṃ. Yaṃnūnāhaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajeyya’nti.

192. ‘‘ஸோ அபரேன ஸமயேன அப்பங் வா போ⁴க³க்க²ந்த⁴ங் பஹாய மஹந்தங் வா போ⁴க³க்க²ந்த⁴ங் பஹாய அப்பங் வா ஞாதிபரிவட்டங் பஹாய மஹந்தங் வா ஞாதிபரிவட்டங் பஹாய கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜதி.

192. ‘‘So aparena samayena appaṃ vā bhogakkhandhaṃ pahāya mahantaṃ vā bhogakkhandhaṃ pahāya appaṃ vā ñātiparivaṭṭaṃ pahāya mahantaṃ vā ñātiparivaṭṭaṃ pahāya kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajati.

193. ‘‘ஸோ ஏவங் பப்³ப³ஜிதோ ஸமானோ பாதிமொக்க²ஸங்வரஸங்வுதோ விஹரதி ஆசாரகோ³சரஸம்பன்னோ, அணுமத்தேஸு வஜ்ஜேஸு ப⁴யத³ஸ்ஸாவீ, ஸமாதா³ய ஸிக்க²தி ஸிக்கா²பதே³ஸு, காயகம்மவசீகம்மேன ஸமன்னாக³தோ குஸலேன, பரிஸுத்³தா⁴ஜீவோ ஸீலஸம்பன்னோ, இந்த்³ரியேஸு கு³த்தத்³வாரோ ⁵⁷, ஸதிஸம்பஜஞ்ஞேன ஸமன்னாக³தோ, ஸந்துட்டோ².

193. ‘‘So evaṃ pabbajito samāno pātimokkhasaṃvarasaṃvuto viharati ācāragocarasampanno, aṇumattesu vajjesu bhayadassāvī, samādāya sikkhati sikkhāpadesu, kāyakammavacīkammena samannāgato kusalena, parisuddhājīvo sīlasampanno, indriyesu guttadvāro ⁵⁸, satisampajaññena samannāgato, santuṭṭho.

சூளஸீலங்

Cūḷasīlaṃ

194. ‘‘கத²ஞ்ச, மஹாராஜ, பி⁴க்கு² ஸீலஸம்பன்னோ ஹோதி? இத⁴, மஹாராஜ, பி⁴க்கு² பாணாதிபாதங் பஹாய பாணாதிபாதா படிவிரதோ ஹோதி. நிஹிதத³ண்டோ³ நிஹிதஸத்தோ² லஜ்ஜீ த³யாபன்னோ ஸப்³ப³பாணபூ⁴தஹிதானுகம்பீ விஹரதி. இத³ம்பிஸ்ஸ ஹோதி ஸீலஸ்மிங்.

194. ‘‘Kathañca, mahārāja, bhikkhu sīlasampanno hoti? Idha, mahārāja, bhikkhu pāṇātipātaṃ pahāya pāṇātipātā paṭivirato hoti. Nihitadaṇḍo nihitasattho lajjī dayāpanno sabbapāṇabhūtahitānukampī viharati. Idampissa hoti sīlasmiṃ.

‘‘அதி³ன்னாதா³னங் பஹாய அதி³ன்னாதா³னா படிவிரதோ ஹோதி தி³ன்னாதா³யீ தி³ன்னபாடிகங்கீ², அதே²னேன ஸுசிபூ⁴தேன அத்தனா விஹரதி. இத³ம்பிஸ்ஸ ஹோதி ஸீலஸ்மிங்.

‘‘Adinnādānaṃ pahāya adinnādānā paṭivirato hoti dinnādāyī dinnapāṭikaṅkhī, athenena sucibhūtena attanā viharati. Idampissa hoti sīlasmiṃ.

‘‘அப்³ரஹ்மசரியங் பஹாய ப்³ரஹ்மசாரீ ஹோதி ஆராசாரீ விரதோ மேது²னா கா³மத⁴ம்மா. இத³ம்பிஸ்ஸ ஹோதி ஸீலஸ்மிங்.

‘‘Abrahmacariyaṃ pahāya brahmacārī hoti ārācārī virato methunā gāmadhammā. Idampissa hoti sīlasmiṃ.

‘‘முஸாவாத³ங் பஹாய முஸாவாதா³ படிவிரதோ ஹோதி ஸச்சவாதீ³ ஸச்சஸந்தோ⁴ தே²தோ பச்சயிகோ அவிஸங்வாத³கோ லோகஸ்ஸ. இத³ம்பிஸ்ஸ ஹோதி ஸீலஸ்மிங்.

‘‘Musāvādaṃ pahāya musāvādā paṭivirato hoti saccavādī saccasandho theto paccayiko avisaṃvādako lokassa. Idampissa hoti sīlasmiṃ.

‘‘பிஸுணங் வாசங் பஹாய பிஸுணாய வாசாய படிவிரதோ ஹோதி; இதோ ஸுத்வா ந அமுத்ர அக்கா²தா இமேஸங் பே⁴தா³ய; அமுத்ர வா ஸுத்வா ந இமேஸங் அக்கா²தா, அமூஸங் பே⁴தா³ய. இதி பி⁴ன்னானங் வா ஸந்தா⁴தா, ஸஹிதானங் வா அனுப்பதா³தா, ஸமக்³கா³ராமோ ஸமக்³க³ரதோ ஸமக்³க³னந்தீ³ ஸமக்³க³கரணிங் வாசங் பா⁴ஸிதா ஹோதி. இத³ம்பிஸ்ஸ ஹோதி ஸீலஸ்மிங்.

‘‘Pisuṇaṃ vācaṃ pahāya pisuṇāya vācāya paṭivirato hoti; ito sutvā na amutra akkhātā imesaṃ bhedāya; amutra vā sutvā na imesaṃ akkhātā, amūsaṃ bhedāya. Iti bhinnānaṃ vā sandhātā, sahitānaṃ vā anuppadātā, samaggārāmo samaggarato samagganandī samaggakaraṇiṃ vācaṃ bhāsitā hoti. Idampissa hoti sīlasmiṃ.

‘‘ப²ருஸங் வாசங் பஹாய ப²ருஸாய வாசாய படிவிரதோ ஹோதி; யா ஸா வாசா நேலா கண்ணஸுகா² பேமனீயா ஹத³யங்க³மா போரீ ப³ஹுஜனகந்தா ப³ஹுஜனமனாபா ததா²ரூபிங் வாசங் பா⁴ஸிதா ஹோதி. இத³ம்பிஸ்ஸ ஹோதி ஸீலஸ்மிங்.

‘‘Pharusaṃ vācaṃ pahāya pharusāya vācāya paṭivirato hoti; yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā tathārūpiṃ vācaṃ bhāsitā hoti. Idampissa hoti sīlasmiṃ.

‘‘ஸம்ப²ப்பலாபங் பஹாய ஸம்ப²ப்பலாபா படிவிரதோ ஹோதி காலவாதீ³ பூ⁴தவாதீ³ அத்த²வாதீ³ த⁴ம்மவாதீ³ வினயவாதீ³, நிதா⁴னவதிங் வாசங் பா⁴ஸிதா ஹோதி காலேன ஸாபதே³ஸங் பரியந்தவதிங் அத்த²ஸங்ஹிதங். இத³ம்பிஸ்ஸ ஹோதி ஸீலஸ்மிங்.

‘‘Samphappalāpaṃ pahāya samphappalāpā paṭivirato hoti kālavādī bhūtavādī atthavādī dhammavādī vinayavādī, nidhānavatiṃ vācaṃ bhāsitā hoti kālena sāpadesaṃ pariyantavatiṃ atthasaṃhitaṃ. Idampissa hoti sīlasmiṃ.

‘‘பீ³ஜகா³மபூ⁴தகா³மஸமாரம்பா⁴ படிவிரதோ ஹோதி…பே॰… ஏகப⁴த்திகோ ஹோதி ரத்தூபரதோ விரதோ விகாலபோ⁴ஜனா. நச்சகீ³தவாதி³தவிஸூகத³ஸ்ஸனா படிவிரதோ ஹோதி. மாலாக³ந்த⁴விலேபனதா⁴ரணமண்ட³னவிபூ⁴ஸனட்டா²னா படிவிரதோ ஹோதி. உச்சாஸயனமஹாஸயனா படிவிரதோ ஹோதி. ஜாதரூபரஜதபடிக்³க³ஹணா படிவிரதோ ஹோதி. ஆமகத⁴ஞ்ஞபடிக்³க³ஹணா படிவிரதோ ஹோதி. ஆமகமங்ஸபடிக்³க³ஹணா படிவிரதோ ஹோதி. இத்தி²குமாரிகபடிக்³க³ஹணா படிவிரதோ ஹோதி. தா³ஸிதா³ஸபடிக்³க³ஹணா படிவிரதோ ஹோதி. அஜேளகபடிக்³க³ஹணா படிவிரதோ ஹோதி. குக்குடஸூகரபடிக்³க³ஹணா படிவிரதோ ஹோதி. ஹத்தி²க³வஸ்ஸவளவபடிக்³க³ஹணா படிவிரதோ ஹோதி. கெ²த்தவத்து²படிக்³க³ஹணா படிவிரதோ ஹோதி . தூ³தெய்யபஹிணக³மனானுயோகா³ படிவிரதோ ஹோதி. கயவிக்கயா படிவிரதோ ஹோதி. துலாகூடகங்ஸகூடமானகூடா படிவிரதோ ஹோதி. உக்கோடனவஞ்சனநிகதிஸாசியோகா³ படிவிரதோ ஹோதி. சே²த³னவத⁴ப³ந்த⁴னவிபராமோஸஆலோபஸஹஸாகாரா படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

‘‘Bījagāmabhūtagāmasamārambhā paṭivirato hoti…pe… ekabhattiko hoti rattūparato virato vikālabhojanā. Naccagītavāditavisūkadassanā paṭivirato hoti. Mālāgandhavilepanadhāraṇamaṇḍanavibhūsanaṭṭhānā paṭivirato hoti. Uccāsayanamahāsayanā paṭivirato hoti. Jātarūparajatapaṭiggahaṇā paṭivirato hoti. Āmakadhaññapaṭiggahaṇā paṭivirato hoti. Āmakamaṃsapaṭiggahaṇā paṭivirato hoti. Itthikumārikapaṭiggahaṇā paṭivirato hoti. Dāsidāsapaṭiggahaṇā paṭivirato hoti. Ajeḷakapaṭiggahaṇā paṭivirato hoti. Kukkuṭasūkarapaṭiggahaṇā paṭivirato hoti. Hatthigavassavaḷavapaṭiggahaṇā paṭivirato hoti. Khettavatthupaṭiggahaṇā paṭivirato hoti . Dūteyyapahiṇagamanānuyogā paṭivirato hoti. Kayavikkayā paṭivirato hoti. Tulākūṭakaṃsakūṭamānakūṭā paṭivirato hoti. Ukkoṭanavañcananikatisāciyogā paṭivirato hoti. Chedanavadhabandhanaviparāmosaālopasahasākārā paṭivirato hoti. Idampissa hoti sīlasmiṃ.

சூளஸீலங் நிட்டி²தங்.

Cūḷasīlaṃ niṭṭhitaṃ.

மஜ்ஜி²மஸீலங்

Majjhimasīlaṃ

195. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபங் பீ³ஜகா³மபூ⁴தகா³மஸமாரம்ப⁴ங் அனுயுத்தா விஹரந்தி. ஸெய்யதி²த³ங் – மூலபீ³ஜங் க²ந்த⁴பீ³ஜங் ப²ளுபீ³ஜங் அக்³க³பீ³ஜங் பீ³ஜபீ³ஜமேவ பஞ்சமங், இதி ஏவரூபா பீ³ஜகா³மபூ⁴தகா³மஸமாரம்பா⁴ படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

195. ‘‘Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpaṃ bījagāmabhūtagāmasamārambhaṃ anuyuttā viharanti. Seyyathidaṃ – mūlabījaṃ khandhabījaṃ phaḷubījaṃ aggabījaṃ bījabījameva pañcamaṃ, iti evarūpā bījagāmabhūtagāmasamārambhā paṭivirato hoti. Idampissa hoti sīlasmiṃ.

196. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபங் ஸன்னிதி⁴காரபரிபோ⁴க³ங் அனுயுத்தா விஹரந்தி. ஸெய்யதி²த³ங் – அன்னஸன்னிதி⁴ங் பானஸன்னிதி⁴ங் வத்த²ஸன்னிதி⁴ங் யானஸன்னிதி⁴ங் ஸயனஸன்னிதி⁴ங் க³ந்த⁴ஸன்னிதி⁴ங் ஆமிஸஸன்னிதி⁴ங், இதி வா இதி ஏவரூபா ஸன்னிதி⁴காரபரிபோ⁴கா³ படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

196. ‘‘Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpaṃ sannidhikāraparibhogaṃ anuyuttā viharanti. Seyyathidaṃ – annasannidhiṃ pānasannidhiṃ vatthasannidhiṃ yānasannidhiṃ sayanasannidhiṃ gandhasannidhiṃ āmisasannidhiṃ, iti vā iti evarūpā sannidhikāraparibhogā paṭivirato hoti. Idampissa hoti sīlasmiṃ.

197. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபங் விஸூகத³ஸ்ஸனங் அனுயுத்தா விஹரந்தி. ஸெய்யதி²த³ங் – நச்சங் கீ³தங் வாதி³தங் பெக்க²ங் அக்கா²னங் பாணிஸ்ஸரங் வேதாளங் கும்ப⁴தூ²ணங் ஸோப⁴னகங் சண்டா³லங் வங்ஸங் தோ⁴வனங் ஹத்தி²யுத்³த⁴ங் அஸ்ஸயுத்³த⁴ங் மஹிங்ஸயுத்³த⁴ங் உஸப⁴யுத்³த⁴ங் அஜயுத்³த⁴ங் மெண்ட³யுத்³த⁴ங் குக்குடயுத்³த⁴ங் வட்டகயுத்³த⁴ங் த³ண்ட³யுத்³த⁴ங் முட்டி²யுத்³த⁴ங் நிப்³பு³த்³த⁴ங் உய்யோதி⁴கங் ப³லக்³க³ங் ஸேனாப்³யூஹங் அனீகத³ஸ்ஸனங் இதி வா இதி ஏவரூபா விஸூகத³ஸ்ஸனா படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

197. ‘‘Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpaṃ visūkadassanaṃ anuyuttā viharanti. Seyyathidaṃ – naccaṃ gītaṃ vāditaṃ pekkhaṃ akkhānaṃ pāṇissaraṃ vetāḷaṃ kumbhathūṇaṃ sobhanakaṃ caṇḍālaṃ vaṃsaṃ dhovanaṃ hatthiyuddhaṃ assayuddhaṃ mahiṃsayuddhaṃ usabhayuddhaṃ ajayuddhaṃ meṇḍayuddhaṃ kukkuṭayuddhaṃ vaṭṭakayuddhaṃ daṇḍayuddhaṃ muṭṭhiyuddhaṃ nibbuddhaṃ uyyodhikaṃ balaggaṃ senābyūhaṃ anīkadassanaṃ iti vā iti evarūpā visūkadassanā paṭivirato hoti. Idampissa hoti sīlasmiṃ.

198. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபங் ஜூதப்பமாத³ட்டா²னானுயோக³ங் அனுயுத்தா விஹரந்தி. ஸெய்யதி²த³ங் – அட்ட²பத³ங் த³ஸபத³ங் ஆகாஸங் பரிஹாரபத²ங் ஸந்திகங் க²லிகங் க⁴டிகங் ஸலாகஹத்த²ங் அக்க²ங் பங்க³சீரங் வங்ககங் மொக்க²சிகங் சிங்கு³லிகங் பத்தாள்ஹகங் ரத²கங் த⁴னுகங் அக்க²ரிகங் மனேஸிகங் யதா²வஜ்ஜங் இதி வா இதி ஏவரூபா ஜூதப்பமாத³ட்டா²னானுயோகா³ படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

198. ‘‘Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpaṃ jūtappamādaṭṭhānānuyogaṃ anuyuttā viharanti. Seyyathidaṃ – aṭṭhapadaṃ dasapadaṃ ākāsaṃ parihārapathaṃ santikaṃ khalikaṃ ghaṭikaṃ salākahatthaṃ akkhaṃ paṅgacīraṃ vaṅkakaṃ mokkhacikaṃ ciṅgulikaṃ pattāḷhakaṃ rathakaṃ dhanukaṃ akkharikaṃ manesikaṃ yathāvajjaṃ iti vā iti evarūpā jūtappamādaṭṭhānānuyogā paṭivirato hoti. Idampissa hoti sīlasmiṃ.

199. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபங் உச்சாஸயனமஹாஸயனங் அனுயுத்தா விஹரந்தி. ஸெய்யதி²த³ங் – ஆஸந்தி³ங் பல்லங்கங் கோ³னகங் சித்தகங் படிகங் படலிகங் தூலிகங் விகதிகங் உத்³த³லோமிங் ஏகந்தலோமிங் கட்டிஸ்ஸங் கோஸெய்யங் குத்தகங் ஹத்த²த்த²ரங் அஸ்ஸத்த²ரங் ரத²த்த²ரங் அஜினப்பவேணிங் கத³லிமிக³பவரபச்சத்த²ரணங் ஸஉத்தரச்ச²த³ங் உப⁴தோலோஹிதகூபதா⁴னங் இதி வா இதி ஏவரூபா உச்சாஸயனமஹாஸயனா படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

199. ‘‘Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpaṃ uccāsayanamahāsayanaṃ anuyuttā viharanti. Seyyathidaṃ – āsandiṃ pallaṅkaṃ gonakaṃ cittakaṃ paṭikaṃ paṭalikaṃ tūlikaṃ vikatikaṃ uddalomiṃ ekantalomiṃ kaṭṭissaṃ koseyyaṃ kuttakaṃ hatthattharaṃ assattharaṃ rathattharaṃ ajinappaveṇiṃ kadalimigapavarapaccattharaṇaṃ sauttaracchadaṃ ubhatolohitakūpadhānaṃ iti vā iti evarūpā uccāsayanamahāsayanā paṭivirato hoti. Idampissa hoti sīlasmiṃ.

200. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபங் மண்ட³னவிபூ⁴ஸனட்டா²னானுயோக³ங் அனுயுத்தா விஹரந்தி. ஸெய்யதி²த³ங் – உச்சா²த³னங் பரிமத்³த³னங் ந்ஹாபனங் ஸம்பா³ஹனங் ஆதா³ஸங் அஞ்ஜனங் மாலாக³ந்த⁴விலேபனங் முக²சுண்ணங் முக²லேபனங் ஹத்த²ப³ந்த⁴ங் ஸிகா²ப³ந்த⁴ங் த³ண்ட³ங் நாளிகங் அஸிங் ⁵⁹ ச²த்தங் சித்ருபாஹனங் உண்ஹீஸங் மணிங் வாலபீ³ஜனிங் ஓதா³தானி வத்தா²னி தீ³க⁴த³ஸானி இதி வா இதி ஏவரூபா மண்ட³னவிபூ⁴ஸனட்டா²னானுயோகா³ படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

200. ‘‘Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpaṃ maṇḍanavibhūsanaṭṭhānānuyogaṃ anuyuttā viharanti. Seyyathidaṃ – ucchādanaṃ parimaddanaṃ nhāpanaṃ sambāhanaṃ ādāsaṃ añjanaṃ mālāgandhavilepanaṃ mukhacuṇṇaṃ mukhalepanaṃ hatthabandhaṃ sikhābandhaṃ daṇḍaṃ nāḷikaṃ asiṃ ⁶⁰ chattaṃ citrupāhanaṃ uṇhīsaṃ maṇiṃ vālabījaniṃ odātāni vatthāni dīghadasāni iti vā iti evarūpā maṇḍanavibhūsanaṭṭhānānuyogā paṭivirato hoti. Idampissa hoti sīlasmiṃ.

201. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபங் திரச்சா²னகத²ங் அனுயுத்தா விஹரந்தி. ஸெய்யதி²த³ங் – ராஜகத²ங் சோரகத²ங் மஹாமத்தகத²ங் ஸேனாகத²ங் ப⁴யகத²ங் யுத்³த⁴கத²ங் அன்னகத²ங் பானகத²ங் வத்த²கத²ங் ஸயனகத²ங் மாலாகத²ங் க³ந்த⁴கத²ங் ஞாதிகத²ங் யானகத²ங் கா³மகத²ங் நிக³மகத²ங் நக³ரகத²ங் ஜனபத³கத²ங் இத்தி²கத²ங் ⁶¹ ஸூரகத²ங் விஸிகா²கத²ங் கும்ப⁴ட்டா²னகத²ங் புப்³ப³பேதகத²ங் நானத்தகத²ங் லோகக்கா²யிகங் ஸமுத்³த³க்கா²யிகங் இதிப⁴வாப⁴வகத²ங் இதி வா இதி ஏவரூபாய திரச்சா²னகதா²ய படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

201. ‘‘Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpaṃ tiracchānakathaṃ anuyuttā viharanti. Seyyathidaṃ – rājakathaṃ corakathaṃ mahāmattakathaṃ senākathaṃ bhayakathaṃ yuddhakathaṃ annakathaṃ pānakathaṃ vatthakathaṃ sayanakathaṃ mālākathaṃ gandhakathaṃ ñātikathaṃ yānakathaṃ gāmakathaṃ nigamakathaṃ nagarakathaṃ janapadakathaṃ itthikathaṃ ⁶² sūrakathaṃ visikhākathaṃ kumbhaṭṭhānakathaṃ pubbapetakathaṃ nānattakathaṃ lokakkhāyikaṃ samuddakkhāyikaṃ itibhavābhavakathaṃ iti vā iti evarūpāya tiracchānakathāya paṭivirato hoti. Idampissa hoti sīlasmiṃ.

202. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபங் விக்³கா³ஹிககத²ங் அனுயுத்தா விஹரந்தி. ஸெய்யதி²த³ங் – ந த்வங் இமங் த⁴ம்மவினயங் ஆஜானாஸி, அஹங் இமங் த⁴ம்மவினயங் ஆஜானாமி, கிங் த்வங் இமங் த⁴ம்மவினயங் ஆஜானிஸ்ஸஸி, மிச்சா² படிபன்னோ த்வமஸி, அஹமஸ்மி ஸம்மா படிபன்னோ, ஸஹிதங் மே, அஸஹிதங் தே, புரே வசனீயங் பச்சா² அவச, பச்சா² வசனீயங் புரே அவச, அதி⁴சிண்ணங் தே விபராவத்தங், ஆரோபிதோ தே வாதோ³, நிக்³க³ஹிதோ த்வமஸி, சர வாத³ப்பமொக்கா²ய, நிப்³பே³டே²ஹி வா ஸசே பஹோஸீதி இதி வா இதி ஏவரூபாய விக்³கா³ஹிககதா²ய படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

202. ‘‘Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpaṃ viggāhikakathaṃ anuyuttā viharanti. Seyyathidaṃ – na tvaṃ imaṃ dhammavinayaṃ ājānāsi, ahaṃ imaṃ dhammavinayaṃ ājānāmi, kiṃ tvaṃ imaṃ dhammavinayaṃ ājānissasi, micchā paṭipanno tvamasi, ahamasmi sammā paṭipanno, sahitaṃ me, asahitaṃ te, pure vacanīyaṃ pacchā avaca, pacchā vacanīyaṃ pure avaca, adhiciṇṇaṃ te viparāvattaṃ, āropito te vādo, niggahito tvamasi, cara vādappamokkhāya, nibbeṭhehi vā sace pahosīti iti vā iti evarūpāya viggāhikakathāya paṭivirato hoti. Idampissa hoti sīlasmiṃ.

203. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபங் தூ³தெய்யபஹிணக³மனானுயோக³ங் அனுயுத்தா விஹரந்தி. ஸெய்யதி²த³ங் – ரஞ்ஞங், ராஜமஹாமத்தானங், க²த்தியானங், ப்³ராஹ்மணானங், க³ஹபதிகானங், குமாரானங் – ‘இத⁴ க³ச்ச², அமுத்ராக³ச்ச², இத³ங் ஹர, அமுத்ர இத³ங் ஆஹரா’தி இதி வா இதி ஏவரூபா தூ³தெய்யபஹிணக³மனானுயோகா³ படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

203. ‘‘Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpaṃ dūteyyapahiṇagamanānuyogaṃ anuyuttā viharanti. Seyyathidaṃ – raññaṃ, rājamahāmattānaṃ, khattiyānaṃ, brāhmaṇānaṃ, gahapatikānaṃ, kumārānaṃ – ‘idha gaccha, amutrāgaccha, idaṃ hara, amutra idaṃ āharā’ti iti vā iti evarūpā dūteyyapahiṇagamanānuyogā paṭivirato hoti. Idampissa hoti sīlasmiṃ.

204. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே குஹகா ச ஹொந்தி லபகா ச நேமித்திகா ச நிப்பேஸிகா ச லாபே⁴ன லாப⁴ங் நிஜிகீ³ங்ஸிதாரோ ச. இதி ஏவரூபா குஹனலபனா படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்’’.

204. ‘‘Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te kuhakā ca honti lapakā ca nemittikā ca nippesikā ca lābhena lābhaṃ nijigīṃsitāro ca. Iti evarūpā kuhanalapanā paṭivirato hoti. Idampissa hoti sīlasmiṃ’’.

மஜ்ஜி²மஸீலங் நிட்டி²தங்.

Majjhimasīlaṃ niṭṭhitaṃ.

மஹாஸீலங்

Mahāsīlaṃ

205. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபாய திரச்சா²னவிஜ்ஜாய மிச்சா²ஜீவேன ஜீவிதங் கப்பெந்தி. ஸெய்யதி²த³ங் – அங்க³ங் நிமித்தங் உப்பாதங் ஸுபினங் லக்க²ணங் மூஸிகச்சி²ன்னங் அக்³கி³ஹோமங் த³ப்³பி³ஹோமங் து²ஸஹோமங் கணஹோமங் தண்டு³லஹோமங் ஸப்பிஹோமங் தேலஹோமங் முக²ஹோமங் லோஹிதஹோமங் அங்க³விஜ்ஜா வத்து²விஜ்ஜா க²த்தவிஜ்ஜா ஸிவவிஜ்ஜா பூ⁴தவிஜ்ஜா பூ⁴ரிவிஜ்ஜா அஹிவிஜ்ஜா விஸவிஜ்ஜா விச்சி²கவிஜ்ஜா மூஸிகவிஜ்ஜா ஸகுணவிஜ்ஜா வாயஸவிஜ்ஜா பக்கஜ்ஜா²னங் ஸரபரித்தாணங் மிக³சக்கங் இதி வா இதி ஏவரூபாய திரச்சா²னவிஜ்ஜாய மிச்சா²ஜீவா படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

205. ‘‘Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpāya tiracchānavijjāya micchājīvena jīvitaṃ kappenti. Seyyathidaṃ – aṅgaṃ nimittaṃ uppātaṃ supinaṃ lakkhaṇaṃ mūsikacchinnaṃ aggihomaṃ dabbihomaṃ thusahomaṃ kaṇahomaṃ taṇḍulahomaṃ sappihomaṃ telahomaṃ mukhahomaṃ lohitahomaṃ aṅgavijjā vatthuvijjā khattavijjā sivavijjā bhūtavijjā bhūrivijjā ahivijjā visavijjā vicchikavijjā mūsikavijjā sakuṇavijjā vāyasavijjā pakkajjhānaṃ saraparittāṇaṃ migacakkaṃ iti vā iti evarūpāya tiracchānavijjāya micchājīvā paṭivirato hoti. Idampissa hoti sīlasmiṃ.

206. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபாய திரச்சா²னவிஜ்ஜாய மிச்சா²ஜீவேன ஜீவிதங் கப்பெந்தி. ஸெய்யதி²த³ங் – மணிலக்க²ணங் வத்த²லக்க²ணங் த³ண்ட³லக்க²ணங் ஸத்த²லக்க²ணங் அஸிலக்க²ணங் உஸுலக்க²ணங் த⁴னுலக்க²ணங் ஆவுத⁴லக்க²ணங் இத்தி²லக்க²ணங் புரிஸலக்க²ணங் குமாரலக்க²ணங் குமாரிலக்க²ணங் தா³ஸலக்க²ணங் தா³ஸிலக்க²ணங் ஹத்தி²லக்க²ணங் அஸ்ஸலக்க²ணங் மஹிங்ஸலக்க²ணங் உஸப⁴லக்க²ணங் கோ³லக்க²ணங் அஜலக்க²ணங் மெண்ட³லக்க²ணங் குக்குடலக்க²ணங் வட்டகலக்க²ணங் கோ³தா⁴லக்க²ணங் கண்ணிகலக்க²ணங் கச்ச²பலக்க²ணங் மிக³லக்க²ணங் இதி வா இதி ஏவரூபாய திரச்சா²னவிஜ்ஜாய மிச்சா²ஜீவா படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

206. ‘‘Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpāya tiracchānavijjāya micchājīvena jīvitaṃ kappenti. Seyyathidaṃ – maṇilakkhaṇaṃ vatthalakkhaṇaṃ daṇḍalakkhaṇaṃ satthalakkhaṇaṃ asilakkhaṇaṃ usulakkhaṇaṃ dhanulakkhaṇaṃ āvudhalakkhaṇaṃ itthilakkhaṇaṃ purisalakkhaṇaṃ kumāralakkhaṇaṃ kumārilakkhaṇaṃ dāsalakkhaṇaṃ dāsilakkhaṇaṃ hatthilakkhaṇaṃ assalakkhaṇaṃ mahiṃsalakkhaṇaṃ usabhalakkhaṇaṃ golakkhaṇaṃ ajalakkhaṇaṃ meṇḍalakkhaṇaṃ kukkuṭalakkhaṇaṃ vaṭṭakalakkhaṇaṃ godhālakkhaṇaṃ kaṇṇikalakkhaṇaṃ kacchapalakkhaṇaṃ migalakkhaṇaṃ iti vā iti evarūpāya tiracchānavijjāya micchājīvā paṭivirato hoti. Idampissa hoti sīlasmiṃ.

207. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபாய திரச்சா²னவிஜ்ஜாய மிச்சா²ஜீவேன ஜீவிதங் கப்பெந்தி. ஸெய்யதி²த³ங் – ரஞ்ஞங் நிய்யானங் ப⁴விஸ்ஸதி, ரஞ்ஞங் அனிய்யானங் ப⁴விஸ்ஸதி, அப்³ப⁴ந்தரானங் ரஞ்ஞங் உபயானங் ப⁴விஸ்ஸதி, பா³ஹிரானங் ரஞ்ஞங் அபயானங் ப⁴விஸ்ஸதி, பா³ஹிரானங் ரஞ்ஞங் உபயானங் ப⁴விஸ்ஸதி, அப்³ப⁴ந்தரானங் ரஞ்ஞங் அபயானங் ப⁴விஸ்ஸதி, அப்³ப⁴ந்தரானங் ரஞ்ஞங் ஜயோ ப⁴விஸ்ஸதி, பா³ஹிரானங் ரஞ்ஞங் பராஜயோ ப⁴விஸ்ஸதி, பா³ஹிரானங் ரஞ்ஞங் ஜயோ ப⁴விஸ்ஸதி, அப்³ப⁴ந்தரானங் ரஞ்ஞங் பராஜயோ ப⁴விஸ்ஸதி, இதி இமஸ்ஸ ஜயோ ப⁴விஸ்ஸதி, இமஸ்ஸ பராஜயோ ப⁴விஸ்ஸதி இதி வா இதி ஏவரூபாய திரச்சா²னவிஜ்ஜாய மிச்சா²ஜீவா படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

207. ‘‘Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpāya tiracchānavijjāya micchājīvena jīvitaṃ kappenti. Seyyathidaṃ – raññaṃ niyyānaṃ bhavissati, raññaṃ aniyyānaṃ bhavissati, abbhantarānaṃ raññaṃ upayānaṃ bhavissati, bāhirānaṃ raññaṃ apayānaṃ bhavissati, bāhirānaṃ raññaṃ upayānaṃ bhavissati, abbhantarānaṃ raññaṃ apayānaṃ bhavissati, abbhantarānaṃ raññaṃ jayo bhavissati, bāhirānaṃ raññaṃ parājayo bhavissati, bāhirānaṃ raññaṃ jayo bhavissati, abbhantarānaṃ raññaṃ parājayo bhavissati, iti imassa jayo bhavissati, imassa parājayo bhavissati iti vā iti evarūpāya tiracchānavijjāya micchājīvā paṭivirato hoti. Idampissa hoti sīlasmiṃ.

208. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபாய திரச்சா²னவிஜ்ஜாய மிச்சா²ஜீவேன ஜீவிதங் கப்பெந்தி. ஸெய்யதி²த³ங் – சந்த³க்³கா³ஹோ ப⁴விஸ்ஸதி, ஸூரியக்³கா³ஹோ ப⁴விஸ்ஸதி, நக்க²த்தக்³கா³ஹோ ப⁴விஸ்ஸதி, சந்தி³மஸூரியானங் பத²க³மனங் ப⁴விஸ்ஸதி, சந்தி³மஸூரியானங் உப்பத²க³மனங் ப⁴விஸ்ஸதி, நக்க²த்தானங் பத²க³மனங் ப⁴விஸ்ஸதி, நக்க²த்தானங் உப்பத²க³மனங் ப⁴விஸ்ஸதி , உக்காபாதோ ப⁴விஸ்ஸதி, தி³ஸாடா³ஹோ ப⁴விஸ்ஸதி, பூ⁴மிசாலோ ப⁴விஸ்ஸதி, தே³வது³த்³ரபி⁴ ப⁴விஸ்ஸதி, சந்தி³மஸூரியனக்க²த்தானங் உக்³க³மனங் ஓக³மனங் ஸங்கிலேஸங் வோதா³னங் ப⁴விஸ்ஸதி, ஏவங்விபாகோ சந்த³க்³கா³ஹோ ப⁴விஸ்ஸதி, ஏவங்விபாகோ ஸூரியக்³கா³ஹோ ப⁴விஸ்ஸதி, ஏவங்விபாகோ நக்க²த்தக்³கா³ஹோ ப⁴விஸ்ஸதி, ஏவங்விபாகங் சந்தி³மஸூரியானங் பத²க³மனங் ப⁴விஸ்ஸதி, ஏவங்விபாகங் சந்தி³மஸூரியானங் உப்பத²க³மனங் ப⁴விஸ்ஸதி, ஏவங்விபாகங் நக்க²த்தானங் பத²க³மனங் ப⁴விஸ்ஸதி, ஏவங்விபாகங் நக்க²த்தானங் உப்பத²க³மனங் ப⁴விஸ்ஸதி, ஏவங்விபாகோ உக்காபாதோ ப⁴விஸ்ஸதி, ஏவங்விபாகோ தி³ஸாடா³ஹோ ப⁴விஸ்ஸதி, ஏவங்விபாகோ பூ⁴மிசாலோ ப⁴விஸ்ஸதி, ஏவங்விபாகோ தே³வது³த்³ரபி⁴ ப⁴விஸ்ஸதி, ஏவங்விபாகங் சந்தி³மஸூரியனக்க²த்தானங் உக்³க³மனங் ஓக³மனங் ஸங்கிலேஸங் வோதா³னங் ப⁴விஸ்ஸதி இதி வா இதி ஏவரூபாய திரச்சா²னவிஜ்ஜாய மிச்சா²ஜீவா படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

208. ‘‘Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpāya tiracchānavijjāya micchājīvena jīvitaṃ kappenti. Seyyathidaṃ – candaggāho bhavissati, sūriyaggāho bhavissati, nakkhattaggāho bhavissati, candimasūriyānaṃ pathagamanaṃ bhavissati, candimasūriyānaṃ uppathagamanaṃ bhavissati, nakkhattānaṃ pathagamanaṃ bhavissati, nakkhattānaṃ uppathagamanaṃ bhavissati , ukkāpāto bhavissati, disāḍāho bhavissati, bhūmicālo bhavissati, devadudrabhi bhavissati, candimasūriyanakkhattānaṃ uggamanaṃ ogamanaṃ saṃkilesaṃ vodānaṃ bhavissati, evaṃvipāko candaggāho bhavissati, evaṃvipāko sūriyaggāho bhavissati, evaṃvipāko nakkhattaggāho bhavissati, evaṃvipākaṃ candimasūriyānaṃ pathagamanaṃ bhavissati, evaṃvipākaṃ candimasūriyānaṃ uppathagamanaṃ bhavissati, evaṃvipākaṃ nakkhattānaṃ pathagamanaṃ bhavissati, evaṃvipākaṃ nakkhattānaṃ uppathagamanaṃ bhavissati, evaṃvipāko ukkāpāto bhavissati, evaṃvipāko disāḍāho bhavissati, evaṃvipāko bhūmicālo bhavissati, evaṃvipāko devadudrabhi bhavissati, evaṃvipākaṃ candimasūriyanakkhattānaṃ uggamanaṃ ogamanaṃ saṃkilesaṃ vodānaṃ bhavissati iti vā iti evarūpāya tiracchānavijjāya micchājīvā paṭivirato hoti. Idampissa hoti sīlasmiṃ.

209. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபாய திரச்சா²னவிஜ்ஜாய மிச்சா²ஜீவேன ஜீவிதங் கப்பெந்தி. ஸெய்யதி²த³ங் – ஸுவுட்டி²கா ப⁴விஸ்ஸதி, து³ப்³பு³ட்டி²கா ப⁴விஸ்ஸதி, ஸுபி⁴க்க²ங் ப⁴விஸ்ஸதி, து³ப்³பி⁴க்க²ங் ப⁴விஸ்ஸதி, கே²மங் ப⁴விஸ்ஸதி, ப⁴யங் ப⁴விஸ்ஸதி, ரோகோ³ ப⁴விஸ்ஸதி, ஆரொக்³யங் ப⁴விஸ்ஸதி, முத்³தா³, க³ணனா, ஸங்கா²னங், காவெய்யங், லோகாயதங் இதி வா இதி ஏவரூபாய திரச்சா²னவிஜ்ஜாய மிச்சா²ஜீவா படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

209. ‘‘Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpāya tiracchānavijjāya micchājīvena jīvitaṃ kappenti. Seyyathidaṃ – suvuṭṭhikā bhavissati, dubbuṭṭhikā bhavissati, subhikkhaṃ bhavissati, dubbhikkhaṃ bhavissati, khemaṃ bhavissati, bhayaṃ bhavissati, rogo bhavissati, ārogyaṃ bhavissati, muddā, gaṇanā, saṅkhānaṃ, kāveyyaṃ, lokāyataṃ iti vā iti evarūpāya tiracchānavijjāya micchājīvā paṭivirato hoti. Idampissa hoti sīlasmiṃ.

210. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபாய திரச்சா²னவிஜ்ஜாய மிச்சா²ஜீவேன ஜீவிதங் கப்பெந்தி. ஸெய்யதி²த³ங் – ஆவாஹனங் விவாஹனங் ஸங்வரணங் விவரணங் ஸங்கிரணங் விகிரணங் ஸுப⁴க³கரணங் து³ப்³ப⁴க³கரணங் விருத்³த⁴க³ப்³ப⁴கரணங் ஜிவ்ஹானிப³ந்த⁴னங் ஹனுஸங்ஹனநங் ஹத்தா²பி⁴ஜப்பனங் ஹனுஜப்பனங் கண்ணஜப்பனங் ஆதா³ஸபஞ்ஹங் குமாரிகபஞ்ஹங் தே³வபஞ்ஹங் ஆதி³ச்சுபட்டா²னங் மஹதுபட்டா²னங் அப்³பு⁴ஜ்ஜலனங் ஸிரிவ்ஹாயனங் இதி வா இதி ஏவரூபாய திரச்சா²னவிஜ்ஜாய மிச்சா²ஜீவா படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

210. ‘‘Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpāya tiracchānavijjāya micchājīvena jīvitaṃ kappenti. Seyyathidaṃ – āvāhanaṃ vivāhanaṃ saṃvaraṇaṃ vivaraṇaṃ saṅkiraṇaṃ vikiraṇaṃ subhagakaraṇaṃ dubbhagakaraṇaṃ viruddhagabbhakaraṇaṃ jivhānibandhanaṃ hanusaṃhananaṃ hatthābhijappanaṃ hanujappanaṃ kaṇṇajappanaṃ ādāsapañhaṃ kumārikapañhaṃ devapañhaṃ ādiccupaṭṭhānaṃ mahatupaṭṭhānaṃ abbhujjalanaṃ sirivhāyanaṃ iti vā iti evarūpāya tiracchānavijjāya micchājīvā paṭivirato hoti. Idampissa hoti sīlasmiṃ.

211. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபாய திரச்சா²னவிஜ்ஜாய மிச்சா²ஜீவேன ஜீவிதங் கப்பெந்தி . ஸெய்யதி²த³ங் – ஸந்திகம்மங் பணிதி⁴கம்மங் பூ⁴தகம்மங் பூ⁴ரிகம்மங் வஸ்ஸகம்மங் வொஸ்ஸகம்மங் வத்து²கம்மங் வத்து²பரிகம்மங் ஆசமனங் ந்ஹாபனங் ஜுஹனங் வமனங் விரேசனங் உத்³த⁴ங்விரேசனங் அதோ⁴விரேசனங் ஸீஸவிரேசனங் கண்ணதேலங் நெத்ததப்பனங் நத்து²கம்மங் அஞ்ஜனங் பச்சஞ்ஜனங் ஸாலாகியங் ஸல்லகத்தியங் தா³ரகதிகிச்சா², மூலபே⁴ஸஜ்ஜானங் அனுப்பதா³னங், ஓஸதீ⁴னங் படிமொக்கோ² இதி வா இதி ஏவரூபாய திரச்சா²னவிஜ்ஜாய மிச்சா²ஜீவா படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

211. ‘‘Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpāya tiracchānavijjāya micchājīvena jīvitaṃ kappenti . Seyyathidaṃ – santikammaṃ paṇidhikammaṃ bhūtakammaṃ bhūrikammaṃ vassakammaṃ vossakammaṃ vatthukammaṃ vatthuparikammaṃ ācamanaṃ nhāpanaṃ juhanaṃ vamanaṃ virecanaṃ uddhaṃvirecanaṃ adhovirecanaṃ sīsavirecanaṃ kaṇṇatelaṃ nettatappanaṃ natthukammaṃ añjanaṃ paccañjanaṃ sālākiyaṃ sallakattiyaṃ dārakatikicchā, mūlabhesajjānaṃ anuppadānaṃ, osadhīnaṃ paṭimokkho iti vā iti evarūpāya tiracchānavijjāya micchājīvā paṭivirato hoti. Idampissa hoti sīlasmiṃ.

212. ‘‘ஸ கோ² ஸோ, மஹாராஜ, பி⁴க்கு² ஏவங் ஸீலஸம்பன்னோ ந குதோசி ப⁴யங் ஸமனுபஸ்ஸதி, யதி³த³ங் ஸீலஸங்வரதோ. ஸெய்யதா²பி – மஹாராஜ, ராஜா க²த்தியோ முத்³தா⁴பி⁴ஸித்தோ நிஹதபச்சாமித்தோ ந குதோசி ப⁴யங் ஸமனுபஸ்ஸதி, யதி³த³ங் பச்சத்தி²கதோ; ஏவமேவ கோ², மஹாராஜ, பி⁴க்கு² ஏவங் ஸீலஸம்பன்னோ ந குதோசி ப⁴யங் ஸமனுபஸ்ஸதி, யதி³த³ங் ஸீலஸங்வரதோ. ஸோ இமினா அரியேன ஸீலக்க²ந்தே⁴ன ஸமன்னாக³தோ அஜ்ஜ²த்தங் அனவஜ்ஜஸுக²ங் படிஸங்வேதே³தி. ஏவங் கோ², மஹாராஜ, பி⁴க்கு² ஸீலஸம்பன்னோ ஹோதி.

212. ‘‘Sa kho so, mahārāja, bhikkhu evaṃ sīlasampanno na kutoci bhayaṃ samanupassati, yadidaṃ sīlasaṃvarato. Seyyathāpi – mahārāja, rājā khattiyo muddhābhisitto nihatapaccāmitto na kutoci bhayaṃ samanupassati, yadidaṃ paccatthikato; evameva kho, mahārāja, bhikkhu evaṃ sīlasampanno na kutoci bhayaṃ samanupassati, yadidaṃ sīlasaṃvarato. So iminā ariyena sīlakkhandhena samannāgato ajjhattaṃ anavajjasukhaṃ paṭisaṃvedeti. Evaṃ kho, mahārāja, bhikkhu sīlasampanno hoti.

மஹாஸீலங் நிட்டி²தங்.

Mahāsīlaṃ niṭṭhitaṃ.

இந்த்³ரியஸங்வரோ

Indriyasaṃvaro

213. ‘‘கத²ஞ்ச, மஹாராஜ, பி⁴க்கு² இந்த்³ரியேஸு கு³த்தத்³வாரோ ஹோதி? இத⁴, மஹாராஜ, பி⁴க்கு² சக்கு²னா ரூபங் தி³ஸ்வா ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனங் சக்கு²ந்த்³ரியங் அஸங்வுதங் விஹரந்தங் அபி⁴ஜ்ஜா² தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங், தஸ்ஸ ஸங்வராய படிபஜ்ஜதி, ரக்க²தி சக்கு²ந்த்³ரியங், சக்கு²ந்த்³ரியே ஸங்வரங் ஆபஜ்ஜதி. ஸோதேன ஸத்³த³ங் ஸுத்வா…பே॰… கா⁴னேன க³ந்த⁴ங் கா⁴யித்வா…பே॰… ஜிவ்ஹாய ரஸங் ஸாயித்வா…பே॰… காயேன பொ²ட்ட²ப்³ப³ங் பு²ஸித்வா…பே॰… மனஸா த⁴ம்மங் விஞ்ஞாய ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனங் மனிந்த்³ரியங் அஸங்வுதங் விஹரந்தங் அபி⁴ஜ்ஜா² தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங், தஸ்ஸ ஸங்வராய படிபஜ்ஜதி, ரக்க²தி மனிந்த்³ரியங், மனிந்த்³ரியே ஸங்வரங் ஆபஜ்ஜதி. ஸோ இமினா அரியேன இந்த்³ரியஸங்வரேன ஸமன்னாக³தோ அஜ்ஜ²த்தங் அப்³யாஸேகஸுக²ங் படிஸங்வேதே³தி. ஏவங் கோ², மஹாராஜ, பி⁴க்கு² இந்த்³ரியேஸு கு³த்தத்³வாரோ ஹோதி.

213. ‘‘Kathañca, mahārāja, bhikkhu indriyesu guttadvāro hoti? Idha, mahārāja, bhikkhu cakkhunā rūpaṃ disvā na nimittaggāhī hoti nānubyañjanaggāhī. Yatvādhikaraṇamenaṃ cakkhundriyaṃ asaṃvutaṃ viharantaṃ abhijjhā domanassā pāpakā akusalā dhammā anvāssaveyyuṃ, tassa saṃvarāya paṭipajjati, rakkhati cakkhundriyaṃ, cakkhundriye saṃvaraṃ āpajjati. Sotena saddaṃ sutvā…pe… ghānena gandhaṃ ghāyitvā…pe… jivhāya rasaṃ sāyitvā…pe… kāyena phoṭṭhabbaṃ phusitvā…pe… manasā dhammaṃ viññāya na nimittaggāhī hoti nānubyañjanaggāhī. Yatvādhikaraṇamenaṃ manindriyaṃ asaṃvutaṃ viharantaṃ abhijjhā domanassā pāpakā akusalā dhammā anvāssaveyyuṃ, tassa saṃvarāya paṭipajjati, rakkhati manindriyaṃ, manindriye saṃvaraṃ āpajjati. So iminā ariyena indriyasaṃvarena samannāgato ajjhattaṃ abyāsekasukhaṃ paṭisaṃvedeti. Evaṃ kho, mahārāja, bhikkhu indriyesu guttadvāro hoti.

ஸதிஸம்பஜஞ்ஞங்

Satisampajaññaṃ

214. ‘‘கத²ஞ்ச , மஹாராஜ, பி⁴க்கு² ஸதிஸம்பஜஞ்ஞேன ஸமன்னாக³தோ ஹோதி? இத⁴, மஹாராஜ, பி⁴க்கு² அபி⁴க்கந்தே படிக்கந்தே ஸம்பஜானகாரீ ஹோதி, ஆலோகிதே விலோகிதே ஸம்பஜானகாரீ ஹோதி, ஸமிஞ்ஜிதே பஸாரிதே ஸம்பஜானகாரீ ஹோதி, ஸங்கா⁴டிபத்தசீவரதா⁴ரணே ஸம்பஜானகாரீ ஹோதி, அஸிதே பீதே கா²யிதே ஸாயிதே ஸம்பஜானகாரீ ஹோதி, உச்சாரபஸ்ஸாவகம்மே ஸம்பஜானகாரீ ஹோதி, க³தே டி²தே நிஸின்னே ஸுத்தே ஜாக³ரிதே பா⁴ஸிதே துண்ஹீபா⁴வே ஸம்பஜானகாரீ ஹோதி. ஏவங் கோ², மஹாராஜ , பி⁴க்கு² ஸதிஸம்பஜஞ்ஞேன ஸமன்னாக³தோ ஹோதி.

214. ‘‘Kathañca , mahārāja, bhikkhu satisampajaññena samannāgato hoti? Idha, mahārāja, bhikkhu abhikkante paṭikkante sampajānakārī hoti, ālokite vilokite sampajānakārī hoti, samiñjite pasārite sampajānakārī hoti, saṅghāṭipattacīvaradhāraṇe sampajānakārī hoti, asite pīte khāyite sāyite sampajānakārī hoti, uccārapassāvakamme sampajānakārī hoti, gate ṭhite nisinne sutte jāgarite bhāsite tuṇhībhāve sampajānakārī hoti. Evaṃ kho, mahārāja , bhikkhu satisampajaññena samannāgato hoti.

ஸந்தோஸோ

Santoso

215. ‘‘கத²ஞ்ச, மஹாராஜ, பி⁴க்கு² ஸந்துட்டோ² ஹோதி? இத⁴, மஹாராஜ, பி⁴க்கு² ஸந்துட்டோ² ஹோதி காயபரிஹாரிகேன சீவரேன, குச்சி²பரிஹாரிகேன பிண்ட³பாதேன . ஸோ யேன யேனேவ பக்கமதி, ஸமாதா³யேவ பக்கமதி. ஸெய்யதா²பி, மஹாராஜ, பக்கீ² ஸகுணோ யேன யேனேவ டே³தி, ஸபத்தபா⁴ரோவ டே³தி. ஏவமேவ கோ², மஹாராஜ, பி⁴க்கு² ஸந்துட்டோ² ஹோதி காயபரிஹாரிகேன சீவரேன குச்சி²பரிஹாரிகேன பிண்ட³பாதேன. ஸோ யேன யேனேவ பக்கமதி, ஸமாதா³யேவ பக்கமதி. ஏவங் கோ², மஹாராஜ, பி⁴க்கு² ஸந்துட்டோ² ஹோதி.

215. ‘‘Kathañca, mahārāja, bhikkhu santuṭṭho hoti? Idha, mahārāja, bhikkhu santuṭṭho hoti kāyaparihārikena cīvarena, kucchiparihārikena piṇḍapātena . So yena yeneva pakkamati, samādāyeva pakkamati. Seyyathāpi, mahārāja, pakkhī sakuṇo yena yeneva ḍeti, sapattabhārova ḍeti. Evameva kho, mahārāja, bhikkhu santuṭṭho hoti kāyaparihārikena cīvarena kucchiparihārikena piṇḍapātena. So yena yeneva pakkamati, samādāyeva pakkamati. Evaṃ kho, mahārāja, bhikkhu santuṭṭho hoti.

நீவரணப்பஹானங்

Nīvaraṇappahānaṃ

216. ‘‘ஸோ இமினா ச அரியேன ஸீலக்க²ந்தே⁴ன ஸமன்னாக³தோ, இமினா ச அரியேன இந்த்³ரியஸங்வரேன ஸமன்னாக³தோ, இமினா ச அரியேன ஸதிஸம்பஜஞ்ஞேன ஸமன்னாக³தோ, இமாய ச அரியாய ஸந்துட்டி²யா ஸமன்னாக³தோ, விவித்தங் ஸேனாஸனங் ப⁴ஜதி அரஞ்ஞங் ருக்க²மூலங் பப்³ப³தங் கந்த³ரங் கி³ரிகு³ஹங் ஸுஸானங் வனபத்த²ங் அப்³போ⁴காஸங் பலாலபுஞ்ஜங். ஸோ பச்சா²ப⁴த்தங் பிண்ட³பாதப்படிக்கந்தோ நிஸீத³தி பல்லங்கங் ஆபு⁴ஜித்வா உஜுங் காயங் பணிதா⁴ய பரிமுக²ங் ஸதிங் உபட்ட²பெத்வா.

216. ‘‘So iminā ca ariyena sīlakkhandhena samannāgato, iminā ca ariyena indriyasaṃvarena samannāgato, iminā ca ariyena satisampajaññena samannāgato, imāya ca ariyāya santuṭṭhiyā samannāgato, vivittaṃ senāsanaṃ bhajati araññaṃ rukkhamūlaṃ pabbataṃ kandaraṃ giriguhaṃ susānaṃ vanapatthaṃ abbhokāsaṃ palālapuñjaṃ. So pacchābhattaṃ piṇḍapātappaṭikkanto nisīdati pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā.

217. ‘‘ஸோ அபி⁴ஜ்ஜ²ங் லோகே பஹாய விக³தாபி⁴ஜ்ஜே²ன சேதஸா விஹரதி, அபி⁴ஜ்ஜா²ய சித்தங் பரிஸோதே⁴தி. ப்³யாபாத³பதோ³ஸங் பஹாய அப்³யாபன்னசித்தோ விஹரதி ஸப்³ப³பாணபூ⁴தஹிதானுகம்பீ, ப்³யாபாத³பதோ³ஸா சித்தங் பரிஸோதே⁴தி. தி²னமித்³த⁴ங் பஹாய விக³ததி²னமித்³தோ⁴ விஹரதி ஆலோகஸஞ்ஞீ, ஸதோ ஸம்பஜானோ, தி²னமித்³தா⁴ சித்தங் பரிஸோதே⁴தி. உத்³த⁴ச்சகுக்குச்சங் பஹாய அனுத்³த⁴தோ விஹரதி, அஜ்ஜ²த்தங் வூபஸந்தசித்தோ, உத்³த⁴ச்சகுக்குச்சா சித்தங் பரிஸோதே⁴தி. விசிகிச்ச²ங் பஹாய திண்ணவிசிகிச்சோ² விஹரதி, அகத²ங்கதீ² குஸலேஸு த⁴ம்மேஸு, விசிகிச்சா²ய சித்தங் பரிஸோதே⁴தி.

217. ‘‘So abhijjhaṃ loke pahāya vigatābhijjhena cetasā viharati, abhijjhāya cittaṃ parisodheti. Byāpādapadosaṃ pahāya abyāpannacitto viharati sabbapāṇabhūtahitānukampī, byāpādapadosā cittaṃ parisodheti. Thinamiddhaṃ pahāya vigatathinamiddho viharati ālokasaññī, sato sampajāno, thinamiddhā cittaṃ parisodheti. Uddhaccakukkuccaṃ pahāya anuddhato viharati, ajjhattaṃ vūpasantacitto, uddhaccakukkuccā cittaṃ parisodheti. Vicikicchaṃ pahāya tiṇṇavicikiccho viharati, akathaṃkathī kusalesu dhammesu, vicikicchāya cittaṃ parisodheti.

218. ‘‘ஸெய்யதா²பி , மஹாராஜ, புரிஸோ இணங் ஆதா³ய கம்மந்தே பயோஜெய்ய. தஸ்ஸ தே கம்மந்தா ஸமிஜ்ஜெ²ய்யுங். ஸோ யானி ச போராணானி இணமூலானி, தானி ச ப்³யந்திங் கரெய்ய ⁶³, ஸியா சஸ்ஸ உத்தரிங் அவஸிட்ட²ங் தா³ரப⁴ரணாய. தஸ்ஸ ஏவமஸ்ஸ – ‘அஹங் கோ² புப்³பே³ இணங் ஆதா³ய கம்மந்தே பயோஜேஸிங். தஸ்ஸ மே தே கம்மந்தா ஸமிஜ்ஜி²ங்ஸு. ஸோஹங் யானி ச போராணானி இணமூலானி, தானி ச ப்³யந்திங் அகாஸிங், அத்தி² ச மே உத்தரிங் அவஸிட்ட²ங் தா³ரப⁴ரணாயா’தி. ஸோ ததோனிதா³னங் லபே⁴த² பாமோஜ்ஜங், அதி⁴க³ச்செ²ய்ய ஸோமனஸ்ஸங்.

218. ‘‘Seyyathāpi , mahārāja, puriso iṇaṃ ādāya kammante payojeyya. Tassa te kammantā samijjheyyuṃ. So yāni ca porāṇāni iṇamūlāni, tāni ca byantiṃ kareyya ⁶⁴, siyā cassa uttariṃ avasiṭṭhaṃ dārabharaṇāya. Tassa evamassa – ‘ahaṃ kho pubbe iṇaṃ ādāya kammante payojesiṃ. Tassa me te kammantā samijjhiṃsu. Sohaṃ yāni ca porāṇāni iṇamūlāni, tāni ca byantiṃ akāsiṃ, atthi ca me uttariṃ avasiṭṭhaṃ dārabharaṇāyā’ti. So tatonidānaṃ labhetha pāmojjaṃ, adhigaccheyya somanassaṃ.

219. ‘‘ஸெய்யதா²பி, மஹாராஜ, புரிஸோ ஆபா³தி⁴கோ அஸ்ஸ து³க்கி²தோ பா³ள்ஹகி³லானோ; ப⁴த்தஞ்சஸ்ஸ நச்சா²தெ³ய்ய, ந சஸ்ஸ காயே ப³லமத்தா. ஸோ அபரேன ஸமயேன தம்ஹா ஆபா³தா⁴ முச்செய்ய; ப⁴த்தங் சஸ்ஸ சா²தெ³ய்ய, ஸியா சஸ்ஸ காயே ப³லமத்தா. தஸ்ஸ ஏவமஸ்ஸ – ‘அஹங் கோ² புப்³பே³ ஆபா³தி⁴கோ அஹோஸிங் து³க்கி²தோ பா³ள்ஹகி³லானோ; ப⁴த்தஞ்ச மே நச்சா²தே³ஸி, ந ச மே ஆஸி ⁶⁵ காயே ப³லமத்தா. ஸொம்ஹி ஏதரஹி தம்ஹா ஆபா³தா⁴ முத்தோ; ப⁴த்தஞ்ச மே சா²தே³தி, அத்தி² ச மே காயே ப³லமத்தா’தி. ஸோ ததோனிதா³னங் லபே⁴த² பாமோஜ்ஜங், அதி⁴க³ச்செ²ய்ய ஸோமனஸ்ஸங்.

219. ‘‘Seyyathāpi, mahārāja, puriso ābādhiko assa dukkhito bāḷhagilāno; bhattañcassa nacchādeyya, na cassa kāye balamattā. So aparena samayena tamhā ābādhā mucceyya; bhattaṃ cassa chādeyya, siyā cassa kāye balamattā. Tassa evamassa – ‘ahaṃ kho pubbe ābādhiko ahosiṃ dukkhito bāḷhagilāno; bhattañca me nacchādesi, na ca me āsi ⁶⁶ kāye balamattā. Somhi etarahi tamhā ābādhā mutto; bhattañca me chādeti, atthi ca me kāye balamattā’ti. So tatonidānaṃ labhetha pāmojjaṃ, adhigaccheyya somanassaṃ.

220. ‘‘ஸெய்யதா²பி, மஹாராஜ, புரிஸோ ப³ந்த⁴னாகா³ரே ப³த்³தோ⁴ அஸ்ஸ. ஸோ அபரேன ஸமயேன தம்ஹா ப³ந்த⁴னாகா³ரா முச்செய்ய ஸொத்தி²னா அப்³ப⁴யேன ⁶⁷, ந சஸ்ஸ கிஞ்சி போ⁴கா³னங் வயோ. தஸ்ஸ ஏவமஸ்ஸ – ‘அஹங் கோ² புப்³பே³ ப³ந்த⁴னாகா³ரே ப³த்³தோ⁴ அஹோஸிங், ஸொம்ஹி ஏதரஹி தம்ஹா ப³ந்த⁴னாகா³ரா முத்தோ ஸொத்தி²னா அப்³ப⁴யேன. நத்தி² ச மே கிஞ்சி போ⁴கா³னங் வயோ’தி. ஸோ ததோனிதா³னங் லபே⁴த² பாமோஜ்ஜங், அதி⁴க³ச்செ²ய்ய ஸோமனஸ்ஸங்.

220. ‘‘Seyyathāpi, mahārāja, puriso bandhanāgāre baddho assa. So aparena samayena tamhā bandhanāgārā mucceyya sotthinā abbhayena ⁶⁸, na cassa kiñci bhogānaṃ vayo. Tassa evamassa – ‘ahaṃ kho pubbe bandhanāgāre baddho ahosiṃ, somhi etarahi tamhā bandhanāgārā mutto sotthinā abbhayena. Natthi ca me kiñci bhogānaṃ vayo’ti. So tatonidānaṃ labhetha pāmojjaṃ, adhigaccheyya somanassaṃ.

221. ‘‘ஸெய்யதா²பி, மஹாராஜ, புரிஸோ தா³ஸோ அஸ்ஸ அனத்தாதீ⁴னோ பராதீ⁴னோ ந யேனகாமங்க³மோ. ஸோ அபரேன ஸமயேன தம்ஹா தா³ஸப்³யா முச்செய்ய அத்தாதீ⁴னோ அபராதீ⁴னோ பு⁴ஜிஸ்ஸோ யேனகாமங்க³மோ. தஸ்ஸ ஏவமஸ்ஸ – ‘அஹங் கோ² புப்³பே³ தா³ஸோ அஹோஸிங் அனத்தாதீ⁴னோ பராதீ⁴னோ ந யேனகாமங்க³மோ. ஸொம்ஹி ஏதரஹி தம்ஹா தா³ஸப்³யா முத்தோ அத்தாதீ⁴னோ அபராதீ⁴னோ பு⁴ஜிஸ்ஸோ யேனகாமங்க³மோ’தி. ஸோ ததோனிதா³னங் லபே⁴த² பாமோஜ்ஜங், அதி⁴க³ச்செ²ய்ய ஸோமனஸ்ஸங்.

221. ‘‘Seyyathāpi, mahārāja, puriso dāso assa anattādhīno parādhīno na yenakāmaṃgamo. So aparena samayena tamhā dāsabyā mucceyya attādhīno aparādhīno bhujisso yenakāmaṃgamo. Tassa evamassa – ‘ahaṃ kho pubbe dāso ahosiṃ anattādhīno parādhīno na yenakāmaṃgamo. Somhi etarahi tamhā dāsabyā mutto attādhīno aparādhīno bhujisso yenakāmaṃgamo’ti. So tatonidānaṃ labhetha pāmojjaṃ, adhigaccheyya somanassaṃ.

222. ‘‘ஸெய்யதா²பி, மஹாராஜ, புரிஸோ ஸத⁴னோ ஸபோ⁴கோ³ கந்தாரத்³தா⁴னமக்³க³ங் படிபஜ்ஜெய்ய து³ப்³பி⁴க்க²ங் ஸப்படிப⁴யங். ஸோ அபரேன ஸமயேன தங் கந்தாரங் நித்த²ரெய்ய ஸொத்தி²னா, கா³மந்தங் அனுபாபுணெய்ய கே²மங் அப்படிப⁴யங். தஸ்ஸ ஏவமஸ்ஸ – ‘அஹங் கோ² புப்³பே³ ஸத⁴னோ ஸபோ⁴கோ³ கந்தாரத்³தா⁴னமக்³க³ங் படிபஜ்ஜிங் து³ப்³பி⁴க்க²ங் ஸப்படிப⁴யங். ஸொம்ஹி ஏதரஹி தங் கந்தாரங் நித்தி²ண்ணோ ஸொத்தி²னா, கா³மந்தங் அனுப்பத்தோ கே²மங் அப்படிப⁴ய’ந்தி. ஸோ ததோனிதா³னங் லபே⁴த² பாமோஜ்ஜங், அதி⁴க³ச்செ²ய்ய ஸோமனஸ்ஸங்.

222. ‘‘Seyyathāpi, mahārāja, puriso sadhano sabhogo kantāraddhānamaggaṃ paṭipajjeyya dubbhikkhaṃ sappaṭibhayaṃ. So aparena samayena taṃ kantāraṃ nitthareyya sotthinā, gāmantaṃ anupāpuṇeyya khemaṃ appaṭibhayaṃ. Tassa evamassa – ‘ahaṃ kho pubbe sadhano sabhogo kantāraddhānamaggaṃ paṭipajjiṃ dubbhikkhaṃ sappaṭibhayaṃ. Somhi etarahi taṃ kantāraṃ nitthiṇṇo sotthinā, gāmantaṃ anuppatto khemaṃ appaṭibhaya’nti. So tatonidānaṃ labhetha pāmojjaṃ, adhigaccheyya somanassaṃ.

223. ‘‘ஏவமேவ கோ², மஹாராஜ, பி⁴க்கு² யதா² இணங் யதா² ரோக³ங் யதா² ப³ந்த⁴னாகா³ரங் யதா² தா³ஸப்³யங் யதா² கந்தாரத்³தா⁴னமக்³க³ங், ஏவங் இமே பஞ்ச நீவரணே அப்பஹீனே அத்தனி ஸமனுபஸ்ஸதி.

223. ‘‘Evameva kho, mahārāja, bhikkhu yathā iṇaṃ yathā rogaṃ yathā bandhanāgāraṃ yathā dāsabyaṃ yathā kantāraddhānamaggaṃ, evaṃ ime pañca nīvaraṇe appahīne attani samanupassati.

224. ‘‘ஸெய்யதா²பி, மஹாராஜ, யதா² ஆணண்யங் யதா² ஆரொக்³யங் யதா² ப³ந்த⁴னாமொக்க²ங் யதா² பு⁴ஜிஸ்ஸங் யதா² கே²மந்தபூ⁴மிங்; ஏவமேவ கோ², மஹாராஜ, பி⁴க்கு² இமே பஞ்ச நீவரணே பஹீனே அத்தனி ஸமனுபஸ்ஸதி.

224. ‘‘Seyyathāpi, mahārāja, yathā āṇaṇyaṃ yathā ārogyaṃ yathā bandhanāmokkhaṃ yathā bhujissaṃ yathā khemantabhūmiṃ; evameva kho, mahārāja, bhikkhu ime pañca nīvaraṇe pahīne attani samanupassati.

225. ‘‘தஸ்ஸிமே பஞ்ச நீவரணே பஹீனே அத்தனி ஸமனுபஸ்ஸதோ பாமோஜ்ஜங் ஜாயதி, பமுதி³தஸ்ஸ பீதி ஜாயதி, பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ங் வேதே³தி, ஸுகி²னோ சித்தங் ஸமாதி⁴யதி.

225. ‘‘Tassime pañca nīvaraṇe pahīne attani samanupassato pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati.

பட²மஜ்ஜா²னங்

Paṭhamajjhānaṃ

226. ‘‘ஸோ விவிச்சேவ காமேஹி, விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹரதி. ஸோ இமமேவ காயங் விவேகஜேன பீதிஸுகே²ன அபி⁴ஸந்தே³தி பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி ஸப்³பா³வதோ காயஸ்ஸ விவேகஜேன பீதிஸுகே²ன அப்பு²டங் ஹோதி.

226. ‘‘So vivicceva kāmehi, vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati. So imameva kāyaṃ vivekajena pītisukhena abhisandeti parisandeti paripūreti parippharati, nāssa kiñci sabbāvato kāyassa vivekajena pītisukhena apphuṭaṃ hoti.

227. ‘‘ஸெய்யதா²பி , மஹாராஜ, த³க்கோ² ந்ஹாபகோ வா ந்ஹாபகந்தேவாஸீ வா கங்ஸதா²லே ந்ஹானீயசுண்ணானி ஆகிரித்வா உத³கேன பரிப்போ²ஸகங் பரிப்போ²ஸகங் ஸன்னெய்ய, ஸாயங் ந்ஹானீயபிண்டி³ ஸ்னேஹானுக³தா ஸ்னேஹபரேதா ஸந்தரபா³ஹிரா பு²டா ஸ்னேஹேன, ந ச பக்³க⁴ரணீ; ஏவமேவ கோ², மஹாராஜ, பி⁴க்கு² இமமேவ காயங் விவேகஜேன பீதிஸுகே²ன அபி⁴ஸந்தே³தி பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி ஸப்³பா³வதோ காயஸ்ஸ விவேகஜேன பீதிஸுகே²ன அப்பு²டங் ஹோதி. இத³ம்பி கோ², மஹாராஜ, ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

227. ‘‘Seyyathāpi , mahārāja, dakkho nhāpako vā nhāpakantevāsī vā kaṃsathāle nhānīyacuṇṇāni ākiritvā udakena paripphosakaṃ paripphosakaṃ sanneyya, sāyaṃ nhānīyapiṇḍi snehānugatā snehaparetā santarabāhirā phuṭā snehena, na ca paggharaṇī; evameva kho, mahārāja, bhikkhu imameva kāyaṃ vivekajena pītisukhena abhisandeti parisandeti paripūreti parippharati, nāssa kiñci sabbāvato kāyassa vivekajena pītisukhena apphuṭaṃ hoti. Idampi kho, mahārāja, sandiṭṭhikaṃ sāmaññaphalaṃ purimehi sandiṭṭhikehi sāmaññaphalehi abhikkantatarañca paṇītatarañca.

து³தியஜ்ஜா²னங்

Dutiyajjhānaṃ

228. ‘‘புன சபரங், மஹாராஜ, பி⁴க்கு² விதக்கவிசாரானங் வூபஸமா அஜ்ஜ²த்தங் ஸம்பஸாத³னங் சேதஸோ ஏகோதி³பா⁴வங் அவிதக்கங் அவிசாரங் ஸமாதி⁴ஜங் பீதிஸுக²ங் து³தியங் ஜா²னங் உபஸம்பஜ்ஜ விஹரதி. ஸோ இமமேவ காயங் ஸமாதி⁴ஜேன பீதிஸுகே²ன அபி⁴ஸந்தே³தி பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி ஸப்³பா³வதோ காயஸ்ஸ ஸமாதி⁴ஜேன பீதிஸுகே²ன அப்பு²டங் ஹோதி.

228. ‘‘Puna caparaṃ, mahārāja, bhikkhu vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja viharati. So imameva kāyaṃ samādhijena pītisukhena abhisandeti parisandeti paripūreti parippharati, nāssa kiñci sabbāvato kāyassa samādhijena pītisukhena apphuṭaṃ hoti.

229. ‘‘ஸெய்யதா²பி, மஹாராஜ, உத³கரஹதோ³ க³ம்பீ⁴ரோ உப்³பி⁴தோ³த³கோ ⁶⁹ தஸ்ஸ நேவஸ்ஸ புரத்தி²மாய தி³ஸாய உத³கஸ்ஸ ஆயமுக²ங், ந த³க்கி²ணாய தி³ஸாய உத³கஸ்ஸ ஆயமுக²ங், ந பச்சி²மாய தி³ஸாய உத³கஸ்ஸ ஆயமுக²ங், ந உத்தராய தி³ஸாய உத³கஸ்ஸ ஆயமுக²ங், தே³வோ ச ந காலேனகாலங் ஸம்மாதா⁴ரங் அனுப்பவெச்செ²ய்ய. அத² கோ² தம்ஹாவ உத³கரஹதா³ ஸீதா வாரிதா⁴ரா உப்³பி⁴ஜ்ஜித்வா தமேவ உத³கரஹத³ங் ஸீதேன வாரினா அபி⁴ஸந்தெ³ய்ய பரிஸந்தெ³ய்ய பரிபூரெய்ய பரிப்ப²ரெய்ய, நாஸ்ஸ கிஞ்சி ஸப்³பா³வதோ உத³கரஹத³ஸ்ஸ ஸீதேன வாரினா அப்பு²டங் அஸ்ஸ. ஏவமேவ கோ², மஹாராஜ, பி⁴க்கு² இமமேவ காயங் ஸமாதி⁴ஜேன பீதிஸுகே²ன அபி⁴ஸந்தே³தி பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி ஸப்³பா³வதோ காயஸ்ஸ ஸமாதி⁴ஜேன பீதிஸுகே²ன அப்பு²டங் ஹோதி. இத³ம்பி கோ², மஹாராஜ, ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

229. ‘‘Seyyathāpi, mahārāja, udakarahado gambhīro ubbhidodako ⁷⁰ tassa nevassa puratthimāya disāya udakassa āyamukhaṃ, na dakkhiṇāya disāya udakassa āyamukhaṃ, na pacchimāya disāya udakassa āyamukhaṃ, na uttarāya disāya udakassa āyamukhaṃ, devo ca na kālenakālaṃ sammādhāraṃ anuppaveccheyya. Atha kho tamhāva udakarahadā sītā vāridhārā ubbhijjitvā tameva udakarahadaṃ sītena vārinā abhisandeyya parisandeyya paripūreyya paripphareyya, nāssa kiñci sabbāvato udakarahadassa sītena vārinā apphuṭaṃ assa. Evameva kho, mahārāja, bhikkhu imameva kāyaṃ samādhijena pītisukhena abhisandeti parisandeti paripūreti parippharati, nāssa kiñci sabbāvato kāyassa samādhijena pītisukhena apphuṭaṃ hoti. Idampi kho, mahārāja, sandiṭṭhikaṃ sāmaññaphalaṃ purimehi sandiṭṭhikehi sāmaññaphalehi abhikkantatarañca paṇītatarañca.

ததியஜ்ஜா²னங்

Tatiyajjhānaṃ

230. ‘‘புன சபரங், மஹாராஜ, பி⁴க்கு² பீதியா ச விராகா³ உபெக்க²கோ ச விஹரதி ஸதோ ஸம்பஜானோ, ஸுக²ஞ்ச காயேன படிஸங்வேதே³தி, யங் தங் அரியா ஆசிக்க²ந்தி – ‘உபெக்க²கோ ஸதிமா ஸுக²விஹாரீ’தி, ததியங் ஜா²னங் உபஸம்பஜ்ஜ விஹரதி. ஸோ இமமேவ காயங் நிப்பீதிகேன ஸுகே²ன அபி⁴ஸந்தே³தி பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி ஸப்³பா³வதோ காயஸ்ஸ நிப்பீதிகேன ஸுகே²ன அப்பு²டங் ஹோதி.

230. ‘‘Puna caparaṃ, mahārāja, bhikkhu pītiyā ca virāgā upekkhako ca viharati sato sampajāno, sukhañca kāyena paṭisaṃvedeti, yaṃ taṃ ariyā ācikkhanti – ‘upekkhako satimā sukhavihārī’ti, tatiyaṃ jhānaṃ upasampajja viharati. So imameva kāyaṃ nippītikena sukhena abhisandeti parisandeti paripūreti parippharati, nāssa kiñci sabbāvato kāyassa nippītikena sukhena apphuṭaṃ hoti.

231. ‘‘ஸெய்யதா²பி, மஹாராஜ, உப்பலினியங் வா பது³மினியங் வா புண்ட³ரீகினியங் வா அப்பேகச்சானி உப்பலானி வா பது³மானி வா புண்ட³ரீகானி வா உத³கே ஜாதானி உத³கே ஸங்வட்³டா⁴னி உத³கானுக்³க³தானி அந்தோனிமுக்³க³போஸீனி, தானி யாவ சக்³கா³ யாவ ச மூலா ஸீதேன வாரினா அபி⁴ஸன்னானி பரிஸன்னானி ⁷¹ பரிபூரானி பரிப்பு²டானி ⁷², நாஸ்ஸ கிஞ்சி ஸப்³பா³வதங் உப்பலானங் வா பது³மானங் வா புண்ட³ரீகானங் வா ஸீதேன வாரினா அப்பு²டங் அஸ்ஸ; ஏவமேவ கோ², மஹாராஜ, பி⁴க்கு² இமமேவ காயங் நிப்பீதிகேன ஸுகே²ன அபி⁴ஸந்தே³தி பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி ஸப்³பா³வதோ காயஸ்ஸ நிப்பீதிகேன ஸுகே²ன அப்பு²டங் ஹோதி. இத³ம்பி கோ², மஹாராஜ, ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

231. ‘‘Seyyathāpi, mahārāja, uppaliniyaṃ vā paduminiyaṃ vā puṇḍarīkiniyaṃ vā appekaccāni uppalāni vā padumāni vā puṇḍarīkāni vā udake jātāni udake saṃvaḍḍhāni udakānuggatāni antonimuggaposīni, tāni yāva caggā yāva ca mūlā sītena vārinā abhisannāni parisannāni ⁷³ paripūrāni paripphuṭāni ⁷⁴, nāssa kiñci sabbāvataṃ uppalānaṃ vā padumānaṃ vā puṇḍarīkānaṃ vā sītena vārinā apphuṭaṃ assa; evameva kho, mahārāja, bhikkhu imameva kāyaṃ nippītikena sukhena abhisandeti parisandeti paripūreti parippharati, nāssa kiñci sabbāvato kāyassa nippītikena sukhena apphuṭaṃ hoti. Idampi kho, mahārāja, sandiṭṭhikaṃ sāmaññaphalaṃ purimehi sandiṭṭhikehi sāmaññaphalehi abhikkantatarañca paṇītatarañca.

சதுத்த²ஜ்ஜா²னங்

Catutthajjhānaṃ

232. ‘‘புன சபரங், மஹாராஜ, பி⁴க்கு² ஸுக²ஸ்ஸ ச பஹானா து³க்க²ஸ்ஸ ச பஹானா, புப்³பே³வ ஸோமனஸ்ஸதோ³மனஸ்ஸானங் அத்த²ங்க³மா அது³க்க²மஸுக²ங் உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ விஹரதி, ஸோ இமமேவ காயங் பரிஸுத்³தே⁴ன சேதஸா பரியோதா³தேன ப²ரித்வா நிஸின்னோ ஹோதி, நாஸ்ஸ கிஞ்சி ஸப்³பா³வதோ காயஸ்ஸ பரிஸுத்³தே⁴ன சேதஸா பரியோதா³தேன அப்பு²டங் ஹோதி.

232. ‘‘Puna caparaṃ, mahārāja, bhikkhu sukhassa ca pahānā dukkhassa ca pahānā, pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthaṃ jhānaṃ upasampajja viharati, so imameva kāyaṃ parisuddhena cetasā pariyodātena pharitvā nisinno hoti, nāssa kiñci sabbāvato kāyassa parisuddhena cetasā pariyodātena apphuṭaṃ hoti.

233. ‘‘ஸெய்யதா²பி , மஹாராஜ, புரிஸோ ஓதா³தேன வத்தே²ன ஸஸீஸங் பாருபித்வா நிஸின்னோ அஸ்ஸ, நாஸ்ஸ கிஞ்சி ஸப்³பா³வதோ காயஸ்ஸ ஓதா³தேன வத்தே²ன அப்பு²டங் அஸ்ஸ; ஏவமேவ கோ², மஹாராஜ, பி⁴க்கு² இமமேவ காயங் பரிஸுத்³தே⁴ன சேதஸா பரியோதா³தேன ப²ரித்வா நிஸின்னோ ஹோதி, நாஸ்ஸ கிஞ்சி ஸப்³பா³வதோ காயஸ்ஸ பரிஸுத்³தே⁴ன சேதஸா பரியோதா³தேன அப்பு²டங் ஹோதி. இத³ம்பி கோ², மஹாராஜ, ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

233. ‘‘Seyyathāpi , mahārāja, puriso odātena vatthena sasīsaṃ pārupitvā nisinno assa, nāssa kiñci sabbāvato kāyassa odātena vatthena apphuṭaṃ assa; evameva kho, mahārāja, bhikkhu imameva kāyaṃ parisuddhena cetasā pariyodātena pharitvā nisinno hoti, nāssa kiñci sabbāvato kāyassa parisuddhena cetasā pariyodātena apphuṭaṃ hoti. Idampi kho, mahārāja, sandiṭṭhikaṃ sāmaññaphalaṃ purimehi sandiṭṭhikehi sāmaññaphalehi abhikkantatarañca paṇītatarañca.

விபஸ்ஸனாஞாணங்

Vipassanāñāṇaṃ

234. ‘‘ஸோ ⁷⁵ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஞாணத³ஸ்ஸனாய சித்தங் அபி⁴னீஹரதி அபி⁴னின்னாமேதி. ஸோ ஏவங் பஜானாதி – ‘அயங் கோ² மே காயோ ரூபீ சாதுமஹாபூ⁴திகோ மாதாபெத்திகஸம்ப⁴வோ ஓத³னகும்மாஸூபசயோ அனிச்சுச்சா²த³ன-பரிமத்³த³ன-பே⁴த³ன-வித்³த⁴ங்ஸன-த⁴ம்மோ; இத³ஞ்ச பன மே விஞ்ஞாணங் எத்த² ஸிதங் எத்த² படிப³த்³த⁴’ந்தி.

234. ‘‘So ⁷⁶ evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte ñāṇadassanāya cittaṃ abhinīharati abhininnāmeti. So evaṃ pajānāti – ‘ayaṃ kho me kāyo rūpī cātumahābhūtiko mātāpettikasambhavo odanakummāsūpacayo aniccucchādana-parimaddana-bhedana-viddhaṃsana-dhammo; idañca pana me viññāṇaṃ ettha sitaṃ ettha paṭibaddha’nti.

235. ‘‘ஸெய்யதா²பி, மஹாராஜ, மணி வேளுரியோ ஸுபோ⁴ ஜாதிமா அட்ட²ங்ஸோ ஸுபரிகம்மகதோ அச்சோ² விப்பஸன்னோ அனாவிலோ ஸப்³பா³காரஸம்பன்னோ. தத்ராஸ்ஸ ஸுத்தங் ஆவுதங் நீலங் வா பீதங் வா லோஹிதங் வா ⁷⁷ ஓதா³தங் வா பண்டு³ஸுத்தங் வா. தமேனங் சக்கு²மா புரிஸோ ஹத்தே² கரித்வா பச்சவெக்கெ²ய்ய – ‘அயங் கோ² மணி வேளுரியோ ஸுபோ⁴ ஜாதிமா அட்ட²ங்ஸோ ஸுபரிகம்மகதோ அச்சோ² விப்பஸன்னோ அனாவிலோ ஸப்³பா³காரஸம்பன்னோ; தத்ரித³ங் ஸுத்தங் ஆவுதங் நீலங் வா பீதங் வா லோஹிதங் வா ஓதா³தங் வா பண்டு³ஸுத்தங் வா’தி. ஏவமேவ கோ², மஹாராஜ, பி⁴க்கு² ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஞாணத³ஸ்ஸனாய சித்தங் அபி⁴னீஹரதி அபி⁴னின்னாமேதி. ஸோ ஏவங் பஜானாதி – ‘அயங் கோ² மே காயோ ரூபீ சாதுமஹாபூ⁴திகோ மாதாபெத்திகஸம்ப⁴வோ ஓத³னகும்மாஸூபசயோ அனிச்சுச்சா²த³னபரிமத்³த³னபே⁴த³னவித்³த⁴ங்ஸனத⁴ம்மோ; இத³ஞ்ச பன மே விஞ்ஞாணங் எத்த² ஸிதங் எத்த² படிப³த்³த⁴’ந்தி. இத³ம்பி கோ², மஹாராஜ , ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

235. ‘‘Seyyathāpi, mahārāja, maṇi veḷuriyo subho jātimā aṭṭhaṃso suparikammakato accho vippasanno anāvilo sabbākārasampanno. Tatrāssa suttaṃ āvutaṃ nīlaṃ vā pītaṃ vā lohitaṃ vā ⁷⁸ odātaṃ vā paṇḍusuttaṃ vā. Tamenaṃ cakkhumā puriso hatthe karitvā paccavekkheyya – ‘ayaṃ kho maṇi veḷuriyo subho jātimā aṭṭhaṃso suparikammakato accho vippasanno anāvilo sabbākārasampanno; tatridaṃ suttaṃ āvutaṃ nīlaṃ vā pītaṃ vā lohitaṃ vā odātaṃ vā paṇḍusuttaṃ vā’ti. Evameva kho, mahārāja, bhikkhu evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte ñāṇadassanāya cittaṃ abhinīharati abhininnāmeti. So evaṃ pajānāti – ‘ayaṃ kho me kāyo rūpī cātumahābhūtiko mātāpettikasambhavo odanakummāsūpacayo aniccucchādanaparimaddanabhedanaviddhaṃsanadhammo; idañca pana me viññāṇaṃ ettha sitaṃ ettha paṭibaddha’nti. Idampi kho, mahārāja , sandiṭṭhikaṃ sāmaññaphalaṃ purimehi sandiṭṭhikehi sāmaññaphalehi abhikkantatarañca paṇītatarañca.

மனோமயித்³தி⁴ஞாணங்

Manomayiddhiñāṇaṃ

236. ‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே மனோமயங் காயங் அபி⁴னிம்மானாய சித்தங் அபி⁴னீஹரதி அபி⁴னின்னாமேதி. ஸோ இமம்ஹா காயா அஞ்ஞங் காயங் அபி⁴னிம்மினாதி ரூபிங் மனோமயங் ஸப்³ப³ங்க³பச்சங்கி³ங் அஹீனிந்த்³ரியங்.

236. ‘‘So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte manomayaṃ kāyaṃ abhinimmānāya cittaṃ abhinīharati abhininnāmeti. So imamhā kāyā aññaṃ kāyaṃ abhinimmināti rūpiṃ manomayaṃ sabbaṅgapaccaṅgiṃ ahīnindriyaṃ.

237. ‘‘ஸெய்யதா²பி, மஹாராஜ, புரிஸோ முஞ்ஜம்ஹா ஈஸிகங் பவாஹெய்ய ⁷⁹. தஸ்ஸ ஏவமஸ்ஸ – ‘அயங் முஞ்ஜோ, அயங் ஈஸிகா, அஞ்ஞோ முஞ்ஜோ, அஞ்ஞா ஈஸிகா, முஞ்ஜம்ஹா த்வேவ ஈஸிகா பவாள்ஹா’தி ⁸⁰. ஸெய்யதா² வா பன, மஹாராஜ, புரிஸோ அஸிங் கோஸியா பவாஹெய்ய. தஸ்ஸ ஏவமஸ்ஸ – ‘அயங் அஸி, அயங் கோஸி, அஞ்ஞோ அஸி, அஞ்ஞா கோஸி, கோஸியா த்வேவ அஸி பவாள்ஹோ’’தி. ஸெய்யதா² வா பன, மஹாராஜ, புரிஸோ அஹிங் கரண்டா³ உத்³த⁴ரெய்ய. தஸ்ஸ ஏவமஸ்ஸ – ‘அயங் அஹி, அயங் கரண்டோ³. அஞ்ஞோ அஹி, அஞ்ஞோ கரண்டோ³, கரண்டா³ த்வேவ அஹி உப்³ப⁴தோ’தி ⁸¹. ஏவமேவ கோ², மஹாராஜ, பி⁴க்கு² ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே மனோமயங் காயங் அபி⁴னிம்மானாய சித்தங் அபி⁴னீஹரதி அபி⁴னின்னாமேதி. ஸோ இமம்ஹா காயா அஞ்ஞங் காயங் அபி⁴னிம்மினாதி ரூபிங் மனோமயங் ஸப்³ப³ங்க³பச்சங்கி³ங் அஹீனிந்த்³ரியங். இத³ம்பி கோ², மஹாராஜ, ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

237. ‘‘Seyyathāpi, mahārāja, puriso muñjamhā īsikaṃ pavāheyya ⁸². Tassa evamassa – ‘ayaṃ muñjo, ayaṃ īsikā, añño muñjo, aññā īsikā, muñjamhā tveva īsikā pavāḷhā’ti ⁸³. Seyyathā vā pana, mahārāja, puriso asiṃ kosiyā pavāheyya. Tassa evamassa – ‘ayaṃ asi, ayaṃ kosi, añño asi, aññā kosi, kosiyā tveva asi pavāḷho’’ti. Seyyathā vā pana, mahārāja, puriso ahiṃ karaṇḍā uddhareyya. Tassa evamassa – ‘ayaṃ ahi, ayaṃ karaṇḍo. Añño ahi, añño karaṇḍo, karaṇḍā tveva ahi ubbhato’ti ⁸⁴. Evameva kho, mahārāja, bhikkhu evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte manomayaṃ kāyaṃ abhinimmānāya cittaṃ abhinīharati abhininnāmeti. So imamhā kāyā aññaṃ kāyaṃ abhinimmināti rūpiṃ manomayaṃ sabbaṅgapaccaṅgiṃ ahīnindriyaṃ. Idampi kho, mahārāja, sandiṭṭhikaṃ sāmaññaphalaṃ purimehi sandiṭṭhikehi sāmaññaphalehi abhikkantatarañca paṇītatarañca.

இத்³தி⁴வித⁴ஞாணங்

Iddhividhañāṇaṃ

238. ‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே இத்³தி⁴விதா⁴ய சித்தங் அபி⁴னீஹரதி அபி⁴னின்னாமேதி . ஸோ அனேகவிஹிதங் இத்³தி⁴வித⁴ங் பச்சனுபோ⁴தி – ஏகோபி ஹுத்வா ப³ஹுதா⁴ ஹோதி, ப³ஹுதா⁴பி ஹுத்வா ஏகோ ஹோதி; ஆவிபா⁴வங் திரோபா⁴வங் திரோகுட்டங் திரோபாகாரங் திரோபப்³ப³தங் அஸஜ்ஜமானோ க³ச்ச²தி ஸெய்யதா²பி ஆகாஸே. பத²வியாபி உம்முஜ்ஜனிமுஜ்ஜங் கரோதி ஸெய்யதா²பி உத³கே. உத³கேபி அபி⁴ஜ்ஜமானே க³ச்ச²தி ⁸⁵ ஸெய்யதா²பி பத²வியா . ஆகாஸேபி பல்லங்கேன கமதி ஸெய்யதா²பி பக்கீ² ஸகுணோ. இமேபி சந்தி³மஸூரியே ஏவங்மஹித்³தி⁴கே ஏவங்மஹானுபா⁴வே பாணினா பராமஸதி பரிமஜ்ஜதி. யாவ ப்³ரஹ்மலோகாபி காயேன வஸங் வத்தேதி.

238. ‘‘So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte iddhividhāya cittaṃ abhinīharati abhininnāmeti . So anekavihitaṃ iddhividhaṃ paccanubhoti – ekopi hutvā bahudhā hoti, bahudhāpi hutvā eko hoti; āvibhāvaṃ tirobhāvaṃ tirokuṭṭaṃ tiropākāraṃ tiropabbataṃ asajjamāno gacchati seyyathāpi ākāse. Pathaviyāpi ummujjanimujjaṃ karoti seyyathāpi udake. Udakepi abhijjamāne gacchati ⁸⁶ seyyathāpi pathaviyā . Ākāsepi pallaṅkena kamati seyyathāpi pakkhī sakuṇo. Imepi candimasūriye evaṃmahiddhike evaṃmahānubhāve pāṇinā parāmasati parimajjati. Yāva brahmalokāpi kāyena vasaṃ vatteti.

239. ‘‘ஸெய்யதா²பி, மஹாராஜ, த³க்கோ² கும்ப⁴காரோ வா கும்ப⁴காரந்தேவாஸீ வா ஸுபரிகம்மகதாய மத்திகாய யங் யதே³வ பா⁴ஜனவிகதிங் ஆகங்கெ²ய்ய, தங் ததே³வ கரெய்ய அபி⁴னிப்பா²தெ³ய்ய. ஸெய்யதா² வா பன, மஹாராஜ, த³க்கோ² த³ந்தகாரோ வா த³ந்தகாரந்தேவாஸீ வா ஸுபரிகம்மகதஸ்மிங் த³ந்தஸ்மிங் யங் யதே³வ த³ந்தவிகதிங் ஆகங்கெ²ய்ய, தங் ததே³வ கரெய்ய அபி⁴னிப்பா²தெ³ய்ய. ஸெய்யதா² வா பன, மஹாராஜ, த³க்கோ² ஸுவண்ணகாரோ வா ஸுவண்ணகாரந்தேவாஸீ வா ஸுபரிகம்மகதஸ்மிங் ஸுவண்ணஸ்மிங் யங் யதே³வ ஸுவண்ணவிகதிங் ஆகங்கெ²ய்ய, தங் ததே³வ கரெய்ய அபி⁴னிப்பா²தெ³ய்ய. ஏவமேவ கோ², மஹாராஜ, பி⁴க்கு² ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே இத்³தி⁴விதா⁴ய சித்தங் அபி⁴னீஹரதி அபி⁴னின்னாமேதி. ஸோ அனேகவிஹிதங் இத்³தி⁴வித⁴ங் பச்சனுபோ⁴தி – ஏகோபி ஹுத்வா ப³ஹுதா⁴ ஹோதி, ப³ஹுதா⁴பி ஹுத்வா ஏகோ ஹோதி; ஆவிபா⁴வங் திரோபா⁴வங் திரோகுட்டங் திரோபாகாரங் திரோபப்³ப³தங் அஸஜ்ஜமானோ க³ச்ச²தி ஸெய்யதா²பி ஆகாஸே. பத²வியாபி உம்முஜ்ஜனிமுஜ்ஜங் கரோதி ஸெய்யதா²பி உத³கே. உத³கேபி அபி⁴ஜ்ஜமானே க³ச்ச²தி ஸெய்யதா²பி பத²வியா. ஆகாஸேபி பல்லங்கேன கமதி ஸெய்யதா²பி பக்கீ² ஸகுணோ. இமேபி சந்தி³மஸூரியே ஏவங்மஹித்³தி⁴கே ஏவங்மஹானுபா⁴வே பாணினா பராமஸதி பரிமஜ்ஜதி. யாவ ப்³ரஹ்மலோகாபி காயேன வஸங் வத்தேதி. இத³ம்பி கோ², மஹாராஜ, ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

239. ‘‘Seyyathāpi, mahārāja, dakkho kumbhakāro vā kumbhakārantevāsī vā suparikammakatāya mattikāya yaṃ yadeva bhājanavikatiṃ ākaṅkheyya, taṃ tadeva kareyya abhinipphādeyya. Seyyathā vā pana, mahārāja, dakkho dantakāro vā dantakārantevāsī vā suparikammakatasmiṃ dantasmiṃ yaṃ yadeva dantavikatiṃ ākaṅkheyya, taṃ tadeva kareyya abhinipphādeyya. Seyyathā vā pana, mahārāja, dakkho suvaṇṇakāro vā suvaṇṇakārantevāsī vā suparikammakatasmiṃ suvaṇṇasmiṃ yaṃ yadeva suvaṇṇavikatiṃ ākaṅkheyya, taṃ tadeva kareyya abhinipphādeyya. Evameva kho, mahārāja, bhikkhu evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte iddhividhāya cittaṃ abhinīharati abhininnāmeti. So anekavihitaṃ iddhividhaṃ paccanubhoti – ekopi hutvā bahudhā hoti, bahudhāpi hutvā eko hoti; āvibhāvaṃ tirobhāvaṃ tirokuṭṭaṃ tiropākāraṃ tiropabbataṃ asajjamāno gacchati seyyathāpi ākāse. Pathaviyāpi ummujjanimujjaṃ karoti seyyathāpi udake. Udakepi abhijjamāne gacchati seyyathāpi pathaviyā. Ākāsepi pallaṅkena kamati seyyathāpi pakkhī sakuṇo. Imepi candimasūriye evaṃmahiddhike evaṃmahānubhāve pāṇinā parāmasati parimajjati. Yāva brahmalokāpi kāyena vasaṃ vatteti. Idampi kho, mahārāja, sandiṭṭhikaṃ sāmaññaphalaṃ purimehi sandiṭṭhikehi sāmaññaphalehi abhikkantatarañca paṇītatarañca.

தி³ப்³ப³ஸோதஞாணங்

Dibbasotañāṇaṃ

240. ‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே தி³ப்³பா³ய ஸோததா⁴துயா சித்தங் அபி⁴னீஹரதி அபி⁴னின்னாமேதி. ஸோ தி³ப்³பா³ய ஸோததா⁴துயா விஸுத்³தா⁴ய அதிக்கந்தமானுஸிகாய உபோ⁴ ஸத்³தே³ ஸுணாதி தி³ப்³பே³ ச மானுஸே ச யே தூ³ரே ஸந்திகே ச.

240. ‘‘So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte dibbāya sotadhātuyā cittaṃ abhinīharati abhininnāmeti. So dibbāya sotadhātuyā visuddhāya atikkantamānusikāya ubho sadde suṇāti dibbe ca mānuse ca ye dūre santike ca.

241. ‘‘ஸெய்யதா²பி , மஹாராஜ, புரிஸோ அத்³தா⁴னமக்³க³ப்படிபன்னோ. ஸோ ஸுணெய்ய பே⁴ரிஸத்³த³ம்பி முதி³ங்க³ஸத்³த³ம்பி ⁸⁷ ஸங்க²பணவதி³ந்தி³மஸத்³த³ம்பி ⁸⁸. தஸ்ஸ ஏவமஸ்ஸ – ‘பே⁴ரிஸத்³தோ³’ இதிபி, ‘முதி³ங்க³ஸத்³தோ³’ இதிபி, ‘ஸங்க²பணவதி³ந்தி³மஸத்³தோ³’ இதிபி ⁸⁹. ஏவமேவ கோ², மஹாராஜ, பி⁴க்கு² ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே தி³ப்³பா³ய ஸோததா⁴துயா சித்தங் அபி⁴னீஹரதி அபி⁴னின்னாமேதி. ஸோ தி³ப்³பா³ய ஸோததா⁴துயா விஸுத்³தா⁴ய அதிக்கந்தமானுஸிகாய உபோ⁴ ஸத்³தே³ ஸுணாதி தி³ப்³பே³ ச மானுஸே ச யே தூ³ரே ஸந்திகே ச. இத³ம்பி கோ², மஹாராஜ, ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

241. ‘‘Seyyathāpi , mahārāja, puriso addhānamaggappaṭipanno. So suṇeyya bherisaddampi mudiṅgasaddampi ⁹⁰ saṅkhapaṇavadindimasaddampi ⁹¹. Tassa evamassa – ‘bherisaddo’ itipi, ‘mudiṅgasaddo’ itipi, ‘saṅkhapaṇavadindimasaddo’ itipi ⁹². Evameva kho, mahārāja, bhikkhu evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte dibbāya sotadhātuyā cittaṃ abhinīharati abhininnāmeti. So dibbāya sotadhātuyā visuddhāya atikkantamānusikāya ubho sadde suṇāti dibbe ca mānuse ca ye dūre santike ca. Idampi kho, mahārāja, sandiṭṭhikaṃ sāmaññaphalaṃ purimehi sandiṭṭhikehi sāmaññaphalehi abhikkantatarañca paṇītatarañca.

சேதோபரியஞாணங்

Cetopariyañāṇaṃ

242. ‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே சேதோபரியஞாணாய சித்தங் அபி⁴னீஹரதி அபி⁴னின்னாமேதி. ஸோ பரஸத்தானங் பரபுக்³க³லானங் சேதஸா சேதோ பரிச்ச பஜானாதி – ஸராக³ங் வா சித்தங் ‘ஸராக³ங் சித்த’ந்தி பஜானாதி, வீதராக³ங் வா சித்தங் ‘வீதராக³ங் சித்த’ந்தி பஜானாதி, ஸதோ³ஸங் வா சித்தங் ‘ஸதோ³ஸங் சித்த’ந்தி பஜானாதி, வீததோ³ஸங் வா சித்தங் ‘வீததோ³ஸங் சித்த’ந்தி பஜானாதி, ஸமோஹங் வா சித்தங் ‘ஸமோஹங் சித்த’ந்தி பஜானாதி, வீதமோஹங் வா சித்தங் ‘வீதமோஹங் சித்த’ந்தி பஜானாதி, ஸங்கி²த்தங் வா சித்தங் ‘ஸங்கி²த்தங் சித்த’ந்தி பஜானாதி, விக்கி²த்தங் வா சித்தங் ‘விக்கி²த்தங் சித்த’ந்தி பஜானாதி, மஹக்³க³தங் வா சித்தங் ‘மஹக்³க³தங் சித்த’ந்தி பஜானாதி, அமஹக்³க³தங் வா சித்தங் ‘அமஹக்³க³தங் சித்த’ந்தி பஜானாதி, ஸஉத்தரங் வா சித்தங் ‘ஸஉத்தரங் சித்த’ந்தி பஜானாதி, அனுத்தரங் வா சித்தங் ‘அனுத்தரங் சித்த’ந்தி பஜானாதி, ஸமாஹிதங் வா சித்தங் ‘ஸமாஹிதங் சித்த’ந்தி பஜானாதி, அஸமாஹிதங் வா சித்தங் ‘அஸமாஹிதங் சித்த’ந்தி பஜானாதி , விமுத்தங் வா சித்தங் ‘விமுத்தங் சித்த’ந்தி பஜானாதி, அவிமுத்தங் வா சித்தங் ‘அவிமுத்தங் சித்த’ந்தி பஜானாதி.

242. ‘‘So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte cetopariyañāṇāya cittaṃ abhinīharati abhininnāmeti. So parasattānaṃ parapuggalānaṃ cetasā ceto paricca pajānāti – sarāgaṃ vā cittaṃ ‘sarāgaṃ citta’nti pajānāti, vītarāgaṃ vā cittaṃ ‘vītarāgaṃ citta’nti pajānāti, sadosaṃ vā cittaṃ ‘sadosaṃ citta’nti pajānāti, vītadosaṃ vā cittaṃ ‘vītadosaṃ citta’nti pajānāti, samohaṃ vā cittaṃ ‘samohaṃ citta’nti pajānāti, vītamohaṃ vā cittaṃ ‘vītamohaṃ citta’nti pajānāti, saṅkhittaṃ vā cittaṃ ‘saṅkhittaṃ citta’nti pajānāti, vikkhittaṃ vā cittaṃ ‘vikkhittaṃ citta’nti pajānāti, mahaggataṃ vā cittaṃ ‘mahaggataṃ citta’nti pajānāti, amahaggataṃ vā cittaṃ ‘amahaggataṃ citta’nti pajānāti, sauttaraṃ vā cittaṃ ‘sauttaraṃ citta’nti pajānāti, anuttaraṃ vā cittaṃ ‘anuttaraṃ citta’nti pajānāti, samāhitaṃ vā cittaṃ ‘samāhitaṃ citta’nti pajānāti, asamāhitaṃ vā cittaṃ ‘asamāhitaṃ citta’nti pajānāti , vimuttaṃ vā cittaṃ ‘vimuttaṃ citta’nti pajānāti, avimuttaṃ vā cittaṃ ‘avimuttaṃ citta’nti pajānāti.

243. ‘‘ஸெய்யதா²பி , மஹாராஜ, இத்தீ² வா புரிஸோ வா த³ஹரோ யுவா மண்ட³னஜாதிகோ ஆதா³ஸே வா பரிஸுத்³தே⁴ பரியோதா³தே அச்சே² வா உத³கபத்தே ஸகங் முக²னிமித்தங் பச்சவெக்க²மானோ ஸகணிகங் வா ‘ஸகணிக’ந்தி ஜானெய்ய, அகணிகங் வா ‘அகணிக’ந்தி ஜானெய்ய; ஏவமேவ கோ², மஹாராஜ, பி⁴க்கு² ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே சேதோபரியஞாணாய சித்தங் அபி⁴னீஹரதி அபி⁴னின்னாமேதி. ஸோ பரஸத்தானங் பரபுக்³க³லானங் சேதஸா சேதோ பரிச்ச பஜானாதி – ஸராக³ங் வா சித்தங் ‘ஸராக³ங் சித்த’ந்தி பஜானாதி, வீதராக³ங் வா சித்தங் ‘வீதராக³ங் சித்த’ந்தி பஜானாதி, ஸதோ³ஸங் வா சித்தங் ‘ஸதோ³ஸங் சித்த’ந்தி பஜானாதி, வீததோ³ஸங் வா சித்தங் ‘வீததோ³ஸங் சித்த’ந்தி பஜானாதி, ஸமோஹங் வா சித்தங் ‘ஸமோஹங் சித்த’ந்தி பஜானாதி, வீதமோஹங் வா சித்தங் ‘வீதமோஹங் சித்த’ந்தி பஜானாதி, ஸங்கி²த்தங் வா சித்தங் ‘ஸங்கி²த்தங் சித்த’ந்தி பஜானாதி, விக்கி²த்தங் வா சித்தங் ‘விக்கி²த்தங் சித்த’ந்தி பஜானாதி, மஹக்³க³தங் வா சித்தங் ‘மஹக்³க³தங் சித்த’ந்தி பஜானாதி, அமஹக்³க³தங் வா சித்தங் ‘அமஹக்³க³தங் சித்த’ந்தி பஜானாதி, ஸஉத்தரங் வா சித்தங் ‘ஸஉத்தரங் சித்த’ந்தி பஜானாதி, அனுத்தரங் வா சித்தங் ‘அனுத்தரங் சித்த’ந்தி பஜானாதி, ஸமாஹிதங் வா சித்தங் ‘ஸமாஹிதங் சித்த’ந்தி பஜானாதி, அஸமாஹிதங் வா சித்தங் ‘அஸமாஹிதங் சித்த’ந்தி பஜானாதி, விமுத்தங் வா சித்தங் ‘விமுத்தங் சித்த’’ந்தி பஜானாதி, அவிமுத்தங் வா சித்தங் ‘அவிமுத்தங் சித்த’ந்தி பஜானாதி. இத³ம்பி கோ², மஹாராஜ, ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

243. ‘‘Seyyathāpi , mahārāja, itthī vā puriso vā daharo yuvā maṇḍanajātiko ādāse vā parisuddhe pariyodāte acche vā udakapatte sakaṃ mukhanimittaṃ paccavekkhamāno sakaṇikaṃ vā ‘sakaṇika’nti jāneyya, akaṇikaṃ vā ‘akaṇika’nti jāneyya; evameva kho, mahārāja, bhikkhu evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte cetopariyañāṇāya cittaṃ abhinīharati abhininnāmeti. So parasattānaṃ parapuggalānaṃ cetasā ceto paricca pajānāti – sarāgaṃ vā cittaṃ ‘sarāgaṃ citta’nti pajānāti, vītarāgaṃ vā cittaṃ ‘vītarāgaṃ citta’nti pajānāti, sadosaṃ vā cittaṃ ‘sadosaṃ citta’nti pajānāti, vītadosaṃ vā cittaṃ ‘vītadosaṃ citta’nti pajānāti, samohaṃ vā cittaṃ ‘samohaṃ citta’nti pajānāti, vītamohaṃ vā cittaṃ ‘vītamohaṃ citta’nti pajānāti, saṅkhittaṃ vā cittaṃ ‘saṅkhittaṃ citta’nti pajānāti, vikkhittaṃ vā cittaṃ ‘vikkhittaṃ citta’nti pajānāti, mahaggataṃ vā cittaṃ ‘mahaggataṃ citta’nti pajānāti, amahaggataṃ vā cittaṃ ‘amahaggataṃ citta’nti pajānāti, sauttaraṃ vā cittaṃ ‘sauttaraṃ citta’nti pajānāti, anuttaraṃ vā cittaṃ ‘anuttaraṃ citta’nti pajānāti, samāhitaṃ vā cittaṃ ‘samāhitaṃ citta’nti pajānāti, asamāhitaṃ vā cittaṃ ‘asamāhitaṃ citta’nti pajānāti, vimuttaṃ vā cittaṃ ‘vimuttaṃ citta’’nti pajānāti, avimuttaṃ vā cittaṃ ‘avimuttaṃ citta’nti pajānāti. Idampi kho, mahārāja, sandiṭṭhikaṃ sāmaññaphalaṃ purimehi sandiṭṭhikehi sāmaññaphalehi abhikkantatarañca paṇītatarañca.

புப்³பே³னிவாஸானுஸ்ஸதிஞாணங்

Pubbenivāsānussatiñāṇaṃ

244. ‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே புப்³பே³னிவாஸானுஸ்ஸதிஞாணாய சித்தங் அபி⁴னீஹரதி அபி⁴னின்னாமேதி. ஸோ அனேகவிஹிதங் புப்³பே³னிவாஸங் அனுஸ்ஸரதி, ஸெய்யதி²த³ங் – ஏகம்பி ஜாதிங் த்³வேபி ஜாதியோ திஸ்ஸோபி ஜாதியோ சதஸ்ஸோபி ஜாதியோ பஞ்சபி ஜாதியோ த³ஸபி ஜாதியோ வீஸம்பி ஜாதியோ திங்ஸம்பி ஜாதியோ சத்தாலீஸம்பி ஜாதியோ பஞ்ஞாஸம்பி ஜாதியோ ஜாதிஸதம்பி ஜாதிஸஹஸ்ஸம்பி ஜாதிஸதஸஹஸ்ஸம்பி அனேகேபி ஸங்வட்டகப்பே அனேகேபி விவட்டகப்பே அனேகேபி ஸங்வட்டவிவட்டகப்பே, ‘அமுத்ராஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ அமுத்ர உத³பாதி³ங்; தத்ராபாஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ இதூ⁴பபன்னோ’தி. இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸரதி.

244. ‘‘So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte pubbenivāsānussatiñāṇāya cittaṃ abhinīharati abhininnāmeti. So anekavihitaṃ pubbenivāsaṃ anussarati, seyyathidaṃ – ekampi jātiṃ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṃsampi jātiyo cattālīsampi jātiyo paññāsampi jātiyo jātisatampi jātisahassampi jātisatasahassampi anekepi saṃvaṭṭakappe anekepi vivaṭṭakappe anekepi saṃvaṭṭavivaṭṭakappe, ‘amutrāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto amutra udapādiṃ; tatrāpāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto idhūpapanno’ti. Iti sākāraṃ sauddesaṃ anekavihitaṃ pubbenivāsaṃ anussarati.

245. ‘‘ஸெய்யதா²பி, மஹாராஜ, புரிஸோ ஸகம்ஹா கா³மா அஞ்ஞங் கா³மங் க³ச்செ²ய்ய, தம்ஹாபி கா³மா அஞ்ஞங் கா³மங் க³ச்செ²ய்ய. ஸோ தம்ஹா கா³மா ஸகங்யேவ கா³மங் பச்சாக³ச்செ²ய்ய. தஸ்ஸ ஏவமஸ்ஸ – ‘அஹங் கோ² ஸகம்ஹா கா³மா அமுங் கா³மங் அக³ச்சி²ங் ⁹³, தத்ராபி ஏவங் அட்டா²ஸிங், ஏவங் நிஸீதி³ங், ஏவங் அபா⁴ஸிங், ஏவங் துண்ஹீ அஹோஸிங், தம்ஹாபி கா³மா அமுங் கா³மங் அக³ச்சி²ங், தத்ராபி ஏவங் அட்டா²ஸிங், ஏவங் நிஸீதி³ங், ஏவங் அபா⁴ஸிங், ஏவங் துண்ஹீ அஹோஸிங், ஸொம்ஹி தம்ஹா கா³மா ஸகங்யேவ கா³மங் பச்சாக³தோ’தி. ஏவமேவ கோ², மஹாராஜ, பி⁴க்கு² ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே புப்³பே³னிவாஸானுஸ்ஸதிஞாணாய சித்தங் அபி⁴னீஹரதி அபி⁴னின்னாமேதி. ஸோ அனேகவிஹிதங் புப்³பே³னிவாஸங் அனுஸ்ஸரதி, ஸெய்யதி²த³ங் – ஏகம்பி ஜாதிங் த்³வேபி ஜாதியோ திஸ்ஸோபி ஜாதியோ சதஸ்ஸோபி ஜாதியோ பஞ்சபி ஜாதியோ த³ஸபி ஜாதியோ வீஸம்பி ஜாதியோ திங்ஸம்பி ஜாதியோ சத்தாலீஸம்பி ஜாதியோ பஞ்ஞாஸம்பி ஜாதியோ ஜாதிஸதம்பி ஜாதிஸஹஸ்ஸம்பி ஜாதிஸதஸஹஸ்ஸம்பி அனேகேபி ஸங்வட்டகப்பே அனேகேபி விவட்டகப்பே அனேகேபி ஸங்வட்டவிவட்டகப்பே, ‘அமுத்ராஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ அமுத்ர உத³பாதி³ங்; தத்ராபாஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ இதூ⁴பபன்னோ’தி, இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸரதி. இத³ம்பி கோ², மஹாராஜ, ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

245. ‘‘Seyyathāpi, mahārāja, puriso sakamhā gāmā aññaṃ gāmaṃ gaccheyya, tamhāpi gāmā aññaṃ gāmaṃ gaccheyya. So tamhā gāmā sakaṃyeva gāmaṃ paccāgaccheyya. Tassa evamassa – ‘ahaṃ kho sakamhā gāmā amuṃ gāmaṃ agacchiṃ ⁹⁴, tatrāpi evaṃ aṭṭhāsiṃ, evaṃ nisīdiṃ, evaṃ abhāsiṃ, evaṃ tuṇhī ahosiṃ, tamhāpi gāmā amuṃ gāmaṃ agacchiṃ, tatrāpi evaṃ aṭṭhāsiṃ, evaṃ nisīdiṃ, evaṃ abhāsiṃ, evaṃ tuṇhī ahosiṃ, somhi tamhā gāmā sakaṃyeva gāmaṃ paccāgato’ti. Evameva kho, mahārāja, bhikkhu evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte pubbenivāsānussatiñāṇāya cittaṃ abhinīharati abhininnāmeti. So anekavihitaṃ pubbenivāsaṃ anussarati, seyyathidaṃ – ekampi jātiṃ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṃsampi jātiyo cattālīsampi jātiyo paññāsampi jātiyo jātisatampi jātisahassampi jātisatasahassampi anekepi saṃvaṭṭakappe anekepi vivaṭṭakappe anekepi saṃvaṭṭavivaṭṭakappe, ‘amutrāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto amutra udapādiṃ; tatrāpāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto idhūpapanno’ti, iti sākāraṃ sauddesaṃ anekavihitaṃ pubbenivāsaṃ anussarati. Idampi kho, mahārāja, sandiṭṭhikaṃ sāmaññaphalaṃ purimehi sandiṭṭhikehi sāmaññaphalehi abhikkantatarañca paṇītatarañca.

தி³ப்³ப³சக்கு²ஞாணங்

Dibbacakkhuñāṇaṃ

246. ‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஸத்தானங் சுதூபபாதஞாணாய சித்தங் அபி⁴னீஹரதி அபி⁴னின்னாமேதி. ஸோ தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே, யதா²கம்மூபகே³ ஸத்தே பஜானாதி – ‘இமே வத பொ⁴ந்தோ ஸத்தா காயது³ச்சரிதேன ஸமன்னாக³தா வசீது³ச்சரிதேன ஸமன்னாக³தா மனோது³ச்சரிதேன ஸமன்னாக³தா அரியானங் உபவாத³கா மிச்சா²தி³ட்டி²கா மிச்சா²தி³ட்டி²கம்மஸமாதா³னா. தே காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபன்னா. இமே வா பன பொ⁴ந்தோ ஸத்தா காயஸுசரிதேன ஸமன்னாக³தா வசீஸுசரிதேன ஸமன்னாக³தா மனோஸுசரிதேன ஸமன்னாக³தா அரியானங் அனுபவாத³கா ஸம்மாதி³ட்டி²கா ஸம்மாதி³ட்டி²கம்மஸமாதா³னா, தே காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபன்னா’தி. இதி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே, யதா²கம்மூபகே³ ஸத்தே பஜானாதி.

246. ‘‘So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte sattānaṃ cutūpapātañāṇāya cittaṃ abhinīharati abhininnāmeti. So dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate, yathākammūpage satte pajānāti – ‘ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṃ upavādakā micchādiṭṭhikā micchādiṭṭhikammasamādānā. Te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā. Ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṃ anupavādakā sammādiṭṭhikā sammādiṭṭhikammasamādānā, te kāyassa bhedā paraṃ maraṇā sugatiṃ saggaṃ lokaṃ upapannā’ti. Iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate, yathākammūpage satte pajānāti.

247. ‘‘ஸெய்யதா²பி, மஹாராஜ, மஜ்ஜே² ஸிங்கா⁴டகே பாஸாதோ³. தத்த² சக்கு²மா புரிஸோ டி²தோ பஸ்ஸெய்ய மனுஸ்ஸே கே³ஹங் பவிஸந்தேபி நிக்க²மந்தேபி ரதி²காயபி வீதி²ங் ஸஞ்சரந்தே ⁹⁵ மஜ்ஜே² ஸிங்கா⁴டகே நிஸின்னேபி. தஸ்ஸ ஏவமஸ்ஸ – ‘ஏதே மனுஸ்ஸா கே³ஹங் பவிஸந்தி, ஏதே நிக்க²மந்தி, ஏதே ரதி²காய வீதி²ங் ஸஞ்சரந்தி, ஏதே மஜ்ஜே² ஸிங்கா⁴டகே நிஸின்னா’தி. ஏவமேவ கோ², மஹாராஜ, பி⁴க்கு² ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஸத்தானங் சுதூபபாதஞாணாய சித்தங் அபி⁴னீஹரதி அபி⁴னின்னாமேதி. ஸோ தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே, யதா²கம்மூபகே³ ஸத்தே பஜானாதி – ‘இமே வத பொ⁴ந்தோ ஸத்தா காயது³ச்சரிதேன ஸமன்னாக³தா வசீது³ச்சரிதேன ஸமன்னாக³தா மனோது³ச்சரிதேன ஸமன்னாக³தா அரியானங் உபவாத³கா மிச்சா²தி³ட்டி²கா மிச்சா²தி³ட்டி²கம்மஸமாதா³னா, தே காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபன்னா. இமே வா பன பொ⁴ந்தோ ஸத்தா காயஸுசரிதேன ஸமன்னாக³தா வசீஸுசரிதேன ஸமன்னாக³தா மனோஸுசரிதேன ஸமன்னாக³தா அரியானங் அனுபவாத³கா ஸம்மாதி³ட்டி²கா ஸம்மாதி³ட்டி²கம்மஸமாதா³னா. தே காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபன்னா’தி. இதி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே; யதா²கம்மூபகே³ ஸத்தே பஜானாதி. ‘இத³ம்பி கோ², மஹாராஜ, ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

247. ‘‘Seyyathāpi, mahārāja, majjhe siṅghāṭake pāsādo. Tattha cakkhumā puriso ṭhito passeyya manusse gehaṃ pavisantepi nikkhamantepi rathikāyapi vīthiṃ sañcarante ⁹⁶ majjhe siṅghāṭake nisinnepi. Tassa evamassa – ‘ete manussā gehaṃ pavisanti, ete nikkhamanti, ete rathikāya vīthiṃ sañcaranti, ete majjhe siṅghāṭake nisinnā’ti. Evameva kho, mahārāja, bhikkhu evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte sattānaṃ cutūpapātañāṇāya cittaṃ abhinīharati abhininnāmeti. So dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate, yathākammūpage satte pajānāti – ‘ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṃ upavādakā micchādiṭṭhikā micchādiṭṭhikammasamādānā, te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā. Ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṃ anupavādakā sammādiṭṭhikā sammādiṭṭhikammasamādānā. Te kāyassa bhedā paraṃ maraṇā sugatiṃ saggaṃ lokaṃ upapannā’ti. Iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate; yathākammūpage satte pajānāti. ‘Idampi kho, mahārāja, sandiṭṭhikaṃ sāmaññaphalaṃ purimehi sandiṭṭhikehi sāmaññaphalehi abhikkantatarañca paṇītatarañca.

ஆஸவக்க²யஞாணங்

Āsavakkhayañāṇaṃ

248. ‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஆஸவானங் க²யஞாணாய சித்தங் அபி⁴னீஹரதி அபி⁴னின்னாமேதி. ஸோ இத³ங் து³க்க²ந்தி யதா²பூ⁴தங் பஜானாதி , அயங் து³க்க²ஸமுத³யோதி யதா²பூ⁴தங் பஜானாதி, அயங் து³க்க²னிரோதோ⁴தி யதா²பூ⁴தங் பஜானாதி, அயங் து³க்க²னிரோத⁴கா³மினீ படிபதா³தி யதா²பூ⁴தங் பஜானாதி. இமே ஆஸவாதி யதா²பூ⁴தங் பஜானாதி, அயங் ஆஸவஸமுத³யோதி யதா²பூ⁴தங் பஜானாதி, அயங் ஆஸவனிரோதோ⁴தி யதா²பூ⁴தங் பஜானாதி, அயங் ஆஸவனிரோத⁴கா³மினீ படிபதா³தி யதா²பூ⁴தங் பஜானாதி. தஸ்ஸ ஏவங் ஜானதோ ஏவங் பஸ்ஸதோ காமாஸவாபி சித்தங் விமுச்சதி, ப⁴வாஸவாபி சித்தங் விமுச்சதி, அவிஜ்ஜாஸவாபி சித்தங் விமுச்சதி, ‘விமுத்தஸ்மிங் விமுத்தமி’தி ஞாணங் ஹோதி, ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதி.

248. ‘‘So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṃ khayañāṇāya cittaṃ abhinīharati abhininnāmeti. So idaṃ dukkhanti yathābhūtaṃ pajānāti , ayaṃ dukkhasamudayoti yathābhūtaṃ pajānāti, ayaṃ dukkhanirodhoti yathābhūtaṃ pajānāti, ayaṃ dukkhanirodhagāminī paṭipadāti yathābhūtaṃ pajānāti. Ime āsavāti yathābhūtaṃ pajānāti, ayaṃ āsavasamudayoti yathābhūtaṃ pajānāti, ayaṃ āsavanirodhoti yathābhūtaṃ pajānāti, ayaṃ āsavanirodhagāminī paṭipadāti yathābhūtaṃ pajānāti. Tassa evaṃ jānato evaṃ passato kāmāsavāpi cittaṃ vimuccati, bhavāsavāpi cittaṃ vimuccati, avijjāsavāpi cittaṃ vimuccati, ‘vimuttasmiṃ vimuttami’ti ñāṇaṃ hoti, ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāti.

249. ‘‘ஸெய்யதா²பி, மஹாராஜ, பப்³ப³தஸங்கே²பே உத³கரஹதோ³ அச்சோ² விப்பஸன்னோ அனாவிலோ. தத்த² சக்கு²மா புரிஸோ தீரே டி²தோ பஸ்ஸெய்ய ஸிப்பிஸம்பு³கம்பி ஸக்க²ரகத²லம்பி மச்ச²கு³ம்ப³ம்பி சரந்தம்பி திட்ட²ந்தம்பி. தஸ்ஸ ஏவமஸ்ஸ – ‘அயங் கோ² உத³கரஹதோ³ அச்சோ² விப்பஸன்னோ அனாவிலோ. தத்ரிமே ஸிப்பிஸம்பு³காபி ஸக்க²ரகத²லாபி மச்ச²கு³ம்பா³பி சரந்திபி திட்ட²ந்திபீ’தி. ஏவமேவ கோ², மஹாராஜ, பி⁴க்கு² ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஆஸவானங் க²யஞாணாய சித்தங் அபி⁴னீஹரதி அபி⁴னின்னாமேதி. ‘ஸோ இத³ங் து³க்க²’ந்தி யதா²பூ⁴தங் பஜானாதி, ‘அயங் து³க்க²ஸமுத³யோ’தி யதா²பூ⁴தங் பஜானாதி , ‘அயங் து³க்க²னிரோதோ⁴’தி யதா²பூ⁴தங் பஜானாதி, ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானாதி. ‘இமே ஆஸவாதி யதா²பூ⁴தங் பஜானாதி, ‘அயங் ஆஸவஸமுத³யோ’தி யதா²பூ⁴தங் பஜானாதி, ‘அயங் ஆஸவனிரோதோ⁴’தி யதா²பூ⁴தங் பஜானாதி, ‘அயங் ஆஸவனிரோத⁴கா³மினீ படிபதா³தி யதா²பூ⁴தங் பஜானாதி. தஸ்ஸ ஏவங் ஜானதோ ஏவங் பஸ்ஸதோ காமாஸவாபி சித்தங் விமுச்சதி, ப⁴வாஸவாபி சித்தங் விமுச்சதி, அவிஜ்ஜாஸவாபி சித்தங் விமுச்சதி, ‘விமுத்தஸ்மிங் விமுத்தமிதி ஞாணங் ஹோதி, ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதி. இத³ங் கோ², மஹாராஜ, ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச. இமஸ்மா ச பன, மஹாராஜ, ஸந்தி³ட்டி²கா ஸாமஞ்ஞப²லா அஞ்ஞங் ஸந்தி³ட்டி²கங் ஸாமஞ்ஞப²லங் உத்தரிதரங் வா பணீததரங் வா நத்தீ²’’தி.

249. ‘‘Seyyathāpi, mahārāja, pabbatasaṅkhepe udakarahado accho vippasanno anāvilo. Tattha cakkhumā puriso tīre ṭhito passeyya sippisambukampi sakkharakathalampi macchagumbampi carantampi tiṭṭhantampi. Tassa evamassa – ‘ayaṃ kho udakarahado accho vippasanno anāvilo. Tatrime sippisambukāpi sakkharakathalāpi macchagumbāpi carantipi tiṭṭhantipī’ti. Evameva kho, mahārāja, bhikkhu evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṃ khayañāṇāya cittaṃ abhinīharati abhininnāmeti. ‘So idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti , ‘ayaṃ dukkhanirodho’ti yathābhūtaṃ pajānāti, ‘ayaṃ dukkhanirodhagāminī paṭipadā’ti yathābhūtaṃ pajānāti. ‘Ime āsavāti yathābhūtaṃ pajānāti, ‘ayaṃ āsavasamudayo’ti yathābhūtaṃ pajānāti, ‘ayaṃ āsavanirodho’ti yathābhūtaṃ pajānāti, ‘ayaṃ āsavanirodhagāminī paṭipadāti yathābhūtaṃ pajānāti. Tassa evaṃ jānato evaṃ passato kāmāsavāpi cittaṃ vimuccati, bhavāsavāpi cittaṃ vimuccati, avijjāsavāpi cittaṃ vimuccati, ‘vimuttasmiṃ vimuttamiti ñāṇaṃ hoti, ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāti. Idaṃ kho, mahārāja, sandiṭṭhikaṃ sāmaññaphalaṃ purimehi sandiṭṭhikehi sāmaññaphalehi abhikkantatarañca paṇītatarañca. Imasmā ca pana, mahārāja, sandiṭṭhikā sāmaññaphalā aññaṃ sandiṭṭhikaṃ sāmaññaphalaṃ uttaritaraṃ vā paṇītataraṃ vā natthī’’ti.

அஜாதஸத்துஉபாஸகத்தபடிவேத³னா

Ajātasattuupāsakattapaṭivedanā

250. ஏவங் வுத்தே, ராஜா மாக³தோ⁴ அஜாதஸத்து வேதே³ஹிபுத்தோ ப⁴க³வந்தங் ஏதத³வோச – ‘‘அபி⁴க்கந்தங், ப⁴ந்தே, அபி⁴க்கந்தங், ப⁴ந்தே. ஸெய்யதா²பி, ப⁴ந்தே, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா விவரெய்ய, மூள்ஹஸ்ஸ வா மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங் தா⁴ரெய்ய ‘சக்கு²மந்தோ ரூபானி த³க்க²ந்தீ’தி; ஏவமேவங், ப⁴ந்தே, ப⁴க³வதா அனேகபரியாயேன த⁴ம்மோ பகாஸிதோ . ஏஸாஹங், ப⁴ந்தே, ப⁴க³வந்தங் ஸரணங் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. உபாஸகங் மங் ப⁴க³வா தா⁴ரேது அஜ்ஜதக்³கே³ பாணுபேதங் ஸரணங் க³தங். அச்சயோ மங், ப⁴ந்தே, அச்சக³மா யதா²பா³லங் யதா²மூள்ஹங் யதா²அகுஸலங், யோஹங் பிதரங் த⁴ம்மிகங் த⁴ம்மராஜானங் இஸ்ஸரியகாரணா ஜீவிதா வோரோபேஸிங். தஸ்ஸ மே, ப⁴ந்தே ப⁴க³வா அச்சயங் அச்சயதோ படிக்³க³ண்ஹாது ஆயதிங் ஸங்வராயா’’தி.

250. Evaṃ vutte, rājā māgadho ajātasattu vedehiputto bhagavantaṃ etadavoca – ‘‘abhikkantaṃ, bhante, abhikkantaṃ, bhante. Seyyathāpi, bhante, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya ‘cakkhumanto rūpāni dakkhantī’ti; evamevaṃ, bhante, bhagavatā anekapariyāyena dhammo pakāsito . Esāhaṃ, bhante, bhagavantaṃ saraṇaṃ gacchāmi dhammañca bhikkhusaṅghañca. Upāsakaṃ maṃ bhagavā dhāretu ajjatagge pāṇupetaṃ saraṇaṃ gataṃ. Accayo maṃ, bhante, accagamā yathābālaṃ yathāmūḷhaṃ yathāakusalaṃ, yohaṃ pitaraṃ dhammikaṃ dhammarājānaṃ issariyakāraṇā jīvitā voropesiṃ. Tassa me, bhante bhagavā accayaṃ accayato paṭiggaṇhātu āyatiṃ saṃvarāyā’’ti.

251. ‘‘தக்³க⁴ த்வங், மஹாராஜ, அச்சயோ அச்சக³மா யதா²பா³லங் யதா²மூள்ஹங் யதா²அகுஸலங், யங் த்வங் பிதரங் த⁴ம்மிகங் த⁴ம்மராஜானங் ஜீவிதா வோரோபேஸி. யதோ ச கோ² த்வங், மஹாராஜ, அச்சயங் அச்சயதோ தி³ஸ்வா யதா²த⁴ம்மங் படிகரோஸி, தங் தே மயங் படிக்³க³ண்ஹாம. வுத்³தி⁴ஹேஸா, மஹாராஜ, அரியஸ்ஸ வினயே, யோ அச்சயங் அச்சயதோ தி³ஸ்வா யதா²த⁴ம்மங் படிகரோதி, ஆயதிங் ஸங்வரங் ஆபஜ்ஜதீ’’தி.

251. ‘‘Taggha tvaṃ, mahārāja, accayo accagamā yathābālaṃ yathāmūḷhaṃ yathāakusalaṃ, yaṃ tvaṃ pitaraṃ dhammikaṃ dhammarājānaṃ jīvitā voropesi. Yato ca kho tvaṃ, mahārāja, accayaṃ accayato disvā yathādhammaṃ paṭikarosi, taṃ te mayaṃ paṭiggaṇhāma. Vuddhihesā, mahārāja, ariyassa vinaye, yo accayaṃ accayato disvā yathādhammaṃ paṭikaroti, āyatiṃ saṃvaraṃ āpajjatī’’ti.

252. ஏவங் வுத்தே, ராஜா மாக³தோ⁴ அஜாதஸத்து வேதே³ஹிபுத்தோ ப⁴க³வந்தங் ஏதத³வோச – ‘‘ஹந்த³ ச தா³னி மயங், ப⁴ந்தே, க³ச்சா²ம ப³ஹுகிச்சா மயங் ப³ஹுகரணீயா’’தி. ‘‘யஸ்ஸதா³னி த்வங், மஹாராஜ, காலங் மஞ்ஞஸீ’’தி. அத² கோ² ராஜா மாக³தோ⁴ அஜாதஸத்து வேதே³ஹிபுத்தோ ப⁴க³வதோ பா⁴ஸிதங் அபி⁴னந்தி³த்வா அனுமோதி³த்வா உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி.

252. Evaṃ vutte, rājā māgadho ajātasattu vedehiputto bhagavantaṃ etadavoca – ‘‘handa ca dāni mayaṃ, bhante, gacchāma bahukiccā mayaṃ bahukaraṇīyā’’ti. ‘‘Yassadāni tvaṃ, mahārāja, kālaṃ maññasī’’ti. Atha kho rājā māgadho ajātasattu vedehiputto bhagavato bhāsitaṃ abhinanditvā anumoditvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi.

253. அத² கோ² ப⁴க³வா அசிரபக்கந்தஸ்ஸ ரஞ்ஞோ மாக³த⁴ஸ்ஸ அஜாதஸத்துஸ்ஸ வேதே³ஹிபுத்தஸ்ஸ பி⁴க்கூ² ஆமந்தேஸி – ‘‘க²தாயங், பி⁴க்க²வே, ராஜா. உபஹதாயங், பி⁴க்க²வே, ராஜா. ஸசாயங், பி⁴க்க²வே, ராஜா பிதரங் த⁴ம்மிகங் த⁴ம்மராஜானங் ஜீவிதா ந வோரோபெஸ்ஸத², இமஸ்மிஞ்ஞேவ ஆஸனே விரஜங் வீதமலங் த⁴ம்மசக்கு²ங் உப்பஜ்ஜிஸ்ஸதா²’’தி. இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.

253. Atha kho bhagavā acirapakkantassa rañño māgadhassa ajātasattussa vedehiputtassa bhikkhū āmantesi – ‘‘khatāyaṃ, bhikkhave, rājā. Upahatāyaṃ, bhikkhave, rājā. Sacāyaṃ, bhikkhave, rājā pitaraṃ dhammikaṃ dhammarājānaṃ jīvitā na voropessatha, imasmiññeva āsane virajaṃ vītamalaṃ dhammacakkhuṃ uppajjissathā’’ti. Idamavoca bhagavā. Attamanā te bhikkhū bhagavato bhāsitaṃ abhinandunti.

ஸாமஞ்ஞப²லஸுத்தங் நிட்டி²தங் து³தியங்.

Sāmaññaphalasuttaṃ niṭṭhitaṃ dutiyaṃ.

Next: 3. அம்ப³ட்ட²ஸுத்தங் • 3. Ambaṭṭhasuttaṃ

Footnotes:

1. பகுத்³தோ⁴ (ஸீ॰)

2. pakuddho (sī.)

3. ஸஞ்ஜயோ (ஸீ॰ ஸ்யா॰)

4. பே³ல்லட்டி²புத்தோ (ஸீ॰), வேலட்ட²புத்தோ (ஸ்யா॰)

5. sañjayo (sī. syā.)

6. bellaṭṭhiputto (sī.), velaṭṭhaputto (syā.)

7. நாத²புத்தோ (ஸீ॰), நாதபுத்தோ (பீ॰)

8. nāthaputto (sī.), nātaputto (pī.)

9. ப⁴க³வந்தங் கோ³தமங் (ஸீ॰ க॰ பீ॰)

10. bhagavantaṃ gotamaṃ (sī. ka. pī.)

11. பதீ³பா (ஸீ॰ ஸ்யா॰)

12. padīpā (sī. syā.)

13. பதி³கோவ (ஸ்யா॰)

14. padikova (syā.)

15. உதா³யிப⁴த்³தோ³ (ஸீ॰ பீ॰)

16. udāyibhaddo (sī. pī.)

17. கிஞ்சிதே³வ தே³ஸங் லேஸமத்தங் (ஸ்யா॰ கங்॰ க॰)

18. kiñcideva desaṃ lesamattaṃ (syā. kaṃ. ka.)

19. நஹாபிகா (ஸீ॰), ந்ஹாபிகா (ஸ்யா॰)

20. பீனெந்தி (கத்த²சி)

21. ஸமணேஸு ப்³ராஹ்மணேஸு (க॰)

22. nahāpikā (sī.), nhāpikā (syā.)

23. pīnenti (katthaci)

24. samaṇesu brāhmaṇesu (ka.)

25. சாதி (ஸீ॰ க॰)

26. cāti (sī. ka.)

27. அனிக்குஜ்ஜெந்தோ (ஸ்யா॰ கங்॰ க॰)

28. பக்காமிங் (ஸீ॰ ஸ்யா॰ கங்॰ பீ॰)

29. anikkujjento (syā. kaṃ. ka.)

30. pakkāmiṃ (sī. syā. kaṃ. pī.)

31. அஹேது (கத்த²சி)

32. ஸுக²ஞ்ச து³க்க²ஞ்ச (ஸ்யா॰)

33. ஸபுடா (க॰), பபு³டா (ஸீ॰)

34. மஹாகப்புனோ (க॰ ஸீ॰ பீ॰)

35. ahetu (katthaci)

36. sukhañca dukkhañca (syā.)

37. sapuṭā (ka.), pabuṭā (sī.)

38. mahākappuno (ka. sī. pī.)

39. பரலோகோ (ஸ்யா॰)

40. ஸமக்³க³தா (க॰), ஸமக்³க³தா (ஸ்யா॰)

41. paraloko (syā.)

42. samaggatā (ka.), samaggatā (syā.)

43. கஞ்சி (கங்॰)

44. ஸத்தன்னங் யேவ (ஸீ॰ ஸ்யா॰ கங்॰ பீ॰)

45. kañci (kaṃ.)

46. sattannaṃ yeva (sī. syā. kaṃ. pī.)

47. நிக³ண்டோ² நாடபுத்தோ (ஸ்யா॰ க॰)

48. nigaṇṭho nāṭaputto (syā. ka.)

49. கம்மகரோ (ஸீ॰ ஸ்யா॰ கங்॰ பீ॰)

50. முகு²ல்லோகிகோ (ஸ்யா॰ கங்॰ க॰)

51. யோ தே புரிஸோ (ஸீ॰ க॰)

52. kammakaro (sī. syā. kaṃ. pī.)

53. mukhullokiko (syā. kaṃ. ka.)

54. yo te puriso (sī. ka.)

55. யோ தே புரிஸோ (ஸீ॰)

56. yo te puriso (sī.)

57. கு³த்தத்³வாரோ, போ⁴ஜனே மத்தஞ்ஞூ (க॰)

58. guttadvāro, bhojane mattaññū (ka.)

59. க²க்³க³ங் (ஸீ॰ பீ॰), அஸிங் க²க்³க³ங் (ஸ்யா॰ கங்॰), க²க்³க³ங் அஸிங் (க॰)

60. khaggaṃ (sī. pī.), asiṃ khaggaṃ (syā. kaṃ.), khaggaṃ asiṃ (ka.)

61. இத்தி²கத²ங் புரிஸகத²ங் குமாரகத²ங் குமாரிகத²ங் (க॰)

62. itthikathaṃ purisakathaṃ kumārakathaṃ kumārikathaṃ (ka.)

63. ப்³யந்தீகரெய்ய (ஸீ॰ ஸ்யா॰ கங்॰)

64. byantīkareyya (sī. syā. kaṃ.)

65. ந சஸ்ஸ மே (க॰)

66. na cassa me (ka.)

67. உப்³ப³யேன (ஸீ॰ க॰)

68. ubbayena (sī. ka.)

69. உப்³பி⁴தோத³கோ (ஸ்யா॰ கங்॰ க॰)

70. ubbhitodako (syā. kaṃ. ka.)

71. அபி⁴ஸந்தா³னி பரிஸந்தா³னி (க॰)

72. பரிப்பு²ட்டா²னி (பீ॰)

73. abhisandāni parisandāni (ka.)

74. paripphuṭṭhāni (pī.)

75. புன சபரங் மஹாராஜ பி⁴க்கு² ஸோ (க॰)

76. puna caparaṃ mahārāja bhikkhu so (ka.)

77. பீதகங் வா லோஹிதகங் வா (க॰)

78. pītakaṃ vā lohitakaṃ vā (ka.)

79. பப்³பா³ஹெய்ய (ஸ்யா॰ க॰)

80. பப்³பா³ள்ஹாதி (ஸ்யா॰ க॰)

81. உத்³த⁴ரிதோ (ஸ்யா॰ கங்॰)

82. pabbāheyya (syā. ka.)

83. pabbāḷhāti (syā. ka.)

84. uddharito (syā. kaṃ.)

85. அபி⁴ஜ்ஜமானோ (ஸீ॰ க॰)

86. abhijjamāno (sī. ka.)

87. முதிங்க³ஸத்³த³ம்பி (ஸீ॰ பீ॰)

88. ஸங்க²பணவதெ³ண்டி³மஸத்³த³ம்பி (ஸீ॰ பீ॰), ஸங்க²ஸத்³த³ங்பி பணவஸத்³த³ங்பி தெ³ந்தி³மஸத்³த³ங்பி (ஸ்யா॰ கங்॰)

89. ஸங்க²ஸத்³தோ³ இதிபி பணவஸத்³தோ³ இதிபி தெ³ந்தி³மஸத்³தோ³ இதிபி (ஸ்யா॰ கங்॰)

90. mutiṅgasaddampi (sī. pī.)

91. saṅkhapaṇavadeṇḍimasaddampi (sī. pī.), saṅkhasaddaṃpi paṇavasaddaṃpi dendimasaddaṃpi (syā. kaṃ.)

92. saṅkhasaddo itipi paṇavasaddo itipi dendimasaddo itipi (syā. kaṃ.)

93. அக³ஞ்சி²ங் (ஸ்யா॰ கங்॰)

94. agañchiṃ (syā. kaṃ.)

95. ரதி²யாபீ ரதி²ங் ஸஞ்சரந்தே (ஸீ॰), ரதி²யாய விதி²ங் ஸஞ்சரந்தேபி (ஸ்யா॰)

96. rathiyāpī rathiṃ sañcarante (sī.), rathiyāya vithiṃ sañcarantepi (syā.)

Related texts:

அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / தீ³க⁴ நிகாய (அட்ட²கதா²) • Dīgha nikāya (aṭṭhakathā) / 2. ஸாமஞ்ஞப²லஸுத்தவண்ணனா • 2. Sāmaññaphalasuttavaṇṇanā

டீகா • Tīkā / ஸுத்தபிடக (டீகா) • Suttapiṭaka (ṭīkā) / தீ³க⁴னிகாய (டீகா) • Dīghanikāya (ṭīkā) / 2. ஸாமஞ்ஞப²லஸுத்தவண்ணனா • 2. Sāmaññaphalasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact