| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
8. ஸமாபன்னோ ஸத்³த³ங் ஸுணாதீதிகதா²வண்ணனா
8. Samāpanno saddaṃ suṇātītikathāvaṇṇanā
823-825. இதா³னி ஸமாபன்னோ ஸத்³த³ங் ஸுணாதீதிகதா² நாம ஹோதி. தத்த² ‘‘யஸ்மா பட²மஸ்ஸ ஜா²னஸ்ஸ ஸத்³தோ³ கண்ட³கோ வுத்தோ ப⁴க³வதா, யதி³ ச ஸமாபன்னோ தங் ந ஸுணெய்ய, கத²ங் கண்ட³கோ ஸியா. தஸ்மா ஸமாபன்னோ ஸத்³த³ங், ஸுணாதீ’’தி யேஸங் லத்³தி⁴, ஸெய்யதா²பி புப்³ப³ஸேலியானங்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. சக்கு²னா ரூபங் பஸ்ஸதீதிஆதி³ ‘‘ஸமாபன்னஸ்ஸ தாவ பஞ்சத்³வாரப்பவத்தங் நத்தி², தஸ்மிங் அஸதி யதி³ ஸோ ஸத்³த³ங் ஸுணெய்ய, ரூபம்பி பஸ்ஸெய்யா’’தி சோத³னத்த²ங் வுத்தங். ஸத்³தோ³ கண்ட³கோதி விக்கே²பகரத்தா வுத்தங். ஓளாரிகேன ஹி ஸத்³தே³ன ஸோதே க⁴ட்டிதே பட²மஜ்ஜா²னதோ வுட்டா²னங் ஹோதி, தேனேதங் வுத்தங், தஸ்மா அஸாத⁴கங். து³தியஸ்ஸ ஜா²னஸ்ஸாதிஆதி³ ‘‘யதா² அஞ்ஞோபி கண்ட³கோ அந்தோஸமாபத்தியங் நத்தி², ஏவங் ஸத்³த³ஸ்ஸவனம்பீ’’தி போ³த⁴னத்த²ங் வுத்தங், தங் ஸப்³ப³ங் உத்தானத்த²மேவாதி.
823-825. Idāni samāpanno saddaṃ suṇātītikathā nāma hoti. Tattha ‘‘yasmā paṭhamassa jhānassa saddo kaṇḍako vutto bhagavatā, yadi ca samāpanno taṃ na suṇeyya, kathaṃ kaṇḍako siyā. Tasmā samāpanno saddaṃ, suṇātī’’ti yesaṃ laddhi, seyyathāpi pubbaseliyānaṃ; te sandhāya pucchā sakavādissa, paṭiññā itarassa. Cakkhunā rūpaṃ passatītiādi ‘‘samāpannassa tāva pañcadvārappavattaṃ natthi, tasmiṃ asati yadi so saddaṃ suṇeyya, rūpampi passeyyā’’ti codanatthaṃ vuttaṃ. Saddo kaṇḍakoti vikkhepakarattā vuttaṃ. Oḷārikena hi saddena sote ghaṭṭite paṭhamajjhānato vuṭṭhānaṃ hoti, tenetaṃ vuttaṃ, tasmā asādhakaṃ. Dutiyassa jhānassātiādi ‘‘yathā aññopi kaṇḍako antosamāpattiyaṃ natthi, evaṃ saddassavanampī’’ti bodhanatthaṃ vuttaṃ, taṃ sabbaṃ uttānatthamevāti.
ஸமாபன்னோ ஸத்³த³ங் ஸுணாதீதிகதா²வண்ணனா.
Samāpanno saddaṃ suṇātītikathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (184) 8. ஸத்³த³ங் ஸுணாதீதிகதா² • (184) 8. Saddaṃ suṇātītikathā
