| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၂. သမိဒ္ဓိသုတ္တဝဏ္ဏနာ
2. Samiddhisuttavaṇṇanā
၁၅၈. ဒုတိယေ လာဘာ ဝတ မေ, သုလဒ္ဓံ ဝတ မေတိ ဧဝရူပသ္သ သတ္ထု စေဝ ဓမ္မသ္သ စ သဗ္ရဟ္မစာရီနဉ္စ လဒ္ဓတ္တာ မယ္ဟံ လာဘာ မယ္ဟံ သုလဒ္ဓန္တိ။ သော ကိရာယသ္မာ ပစ္ဆာ မူလကမ္မဋ္ဌာနံ သမ္မသိတ္ဝာ ‘‘အရဟတ္တံ ဂဟေသ္သာမီ’’တိ ပာသာဒိကံ တာဝ ကမ္မဋ္ဌာနံ ဂဟေတ္ဝာ ဗုဒ္ဓဓမ္မသင္ဃဂုဏေ အာဝဇ္ဇေတ္ဝာ စိတ္တကလ္လတံ ဥပ္ပာဒေတ္ဝာ စိတ္တံ ဟာသေတ္ဝာ တောသေတ္ဝာ နိသိန္နော။ တေနသ္သ ဧဝမဟောသိ။ ဥပသင္ကမီတိ ‘‘အယံ သမိဒ္ဓိ ဘိက္ခု ပာသာဒိကံ ကမ္မဋ္ဌာနံ ဂဟေတ္ဝာ နိသိန္နသဒိသော, ယာဝ မူလကမ္မဋ္ဌာနံ ဂဟေတ္ဝာ အရဟတ္တံ န ဂဏ္ဟာတိ, တာဝသ္သ အန္တရာယံ ကရိသ္သာမီ’’တိ ဥပသင္ကမိ။ ဂစ္ဆ တ္ဝန္တိ သတ္ထာ သကလဇမ္ဗုဒီပံ ဩလောကေန္တော ‘‘တသ္မိံယေဝ ဌာနေ တသ္သ ကမ္မဋ္ဌာနံ သပ္ပာယံ ဘဝိသ္သတီ’’တိ အဒ္ဒသ, တသ္မာ ဧဝမာဟ။ သတိပညာ စ မေ ဗုဒ္ဓာတိ မယာ သတိ စ ပညာ စ ဉာတာ။ ကရသ္သု ရူပာနီတိ ဗဟူနိပိ ဝိဘိံသကာရဟာနိ ရူပာနိ ကရသ္သု။ နေဝ မံ ဗ္ယာဓယိသ္သသီတိ မံ နေဝ ဝေဓယိသ္သသိ န ကမ္ပသ္သေသိ။ ဒုတိယံ။
158. Dutiye lābhā vata me, suladdhaṃ vata meti evarūpassa satthu ceva dhammassa ca sabrahmacārīnañca laddhattā mayhaṃ lābhā mayhaṃ suladdhanti. So kirāyasmā pacchā mūlakammaṭṭhānaṃ sammasitvā ‘‘arahattaṃ gahessāmī’’ti pāsādikaṃ tāva kammaṭṭhānaṃ gahetvā buddhadhammasaṅghaguṇe āvajjetvā cittakallataṃ uppādetvā cittaṃ hāsetvā tosetvā nisinno. Tenassa evamahosi. Upasaṅkamīti ‘‘ayaṃ samiddhi bhikkhu pāsādikaṃ kammaṭṭhānaṃ gahetvā nisinnasadiso, yāva mūlakammaṭṭhānaṃ gahetvā arahattaṃ na gaṇhāti, tāvassa antarāyaṃ karissāmī’’ti upasaṅkami. Gaccha tvanti satthā sakalajambudīpaṃ olokento ‘‘tasmiṃyeva ṭhāne tassa kammaṭṭhānaṃ sappāyaṃ bhavissatī’’ti addasa, tasmā evamāha. Satipaññā ca me buddhāti mayā sati ca paññā ca ñātā. Karassu rūpānīti bahūnipi vibhiṃsakārahāni rūpāni karassu. Neva maṃ byādhayissasīti maṃ neva vedhayissasi na kampassesi. Dutiyaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၂. သမိဒ္ဓိသုတ္တံ • 2. Samiddhisuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂. သမိဒ္ဓိသုတ္တဝဏ္ဏနာ • 2. Samiddhisuttavaṇṇanā
