| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
5. ஸம்மஸனஞாணனித்³தே³ஸோ
5. Sammasanañāṇaniddeso
48. கத²ங் அதீதானாக³தபச்சுப்பன்னானங் த⁴ம்மானங் ஸங்கி²பித்வா வவத்தா²னே பஞ்ஞா ஸம்மஸனே ஞாணங்?
48. Kathaṃ atītānāgatapaccuppannānaṃ dhammānaṃ saṅkhipitvā vavatthāne paññā sammasane ñāṇaṃ?
யங் கிஞ்சி ரூபங் அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா யங் தூ³ரே ஸந்திகே வா, ஸப்³ப³ங் ரூபங் அனிச்சதோ வவத்தே²தி ஏகங் ஸம்மஸனங், து³க்க²தோ வவத்தே²தி ஏகங் ஸம்மஸனங், அனத்ததோ வவத்தே²தி ஏகங் ஸம்மஸனங்.
Yaṃ kiñci rūpaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, sabbaṃ rūpaṃ aniccato vavattheti ekaṃ sammasanaṃ, dukkhato vavattheti ekaṃ sammasanaṃ, anattato vavattheti ekaṃ sammasanaṃ.
யா காசி வேத³னா…பே॰… யா காசி ஸஞ்ஞா… யே கேசி ஸங்கா²ரா… யங் கிஞ்சி விஞ்ஞாணங் அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா யங் தூ³ரே ஸந்திகே வா, ஸப்³ப³ங் விஞ்ஞாணங் அனிச்சதோ வவத்தே²தி ஏகங் ஸம்மஸனங், து³க்க²தோ வவத்தே²தி ஏகங் ஸம்மஸனங், அனத்ததோ வவத்தே²தி ஏகங் ஸம்மஸனங்.
Yā kāci vedanā…pe… yā kāci saññā… ye keci saṅkhārā… yaṃ kiñci viññāṇaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, sabbaṃ viññāṇaṃ aniccato vavattheti ekaṃ sammasanaṃ, dukkhato vavattheti ekaṃ sammasanaṃ, anattato vavattheti ekaṃ sammasanaṃ.
சக்கு²ங்…பே॰… ஜராமரணங் அதீதானாக³தபச்சுப்பன்னங் அனிச்சதோ வவத்தே²தி ஏகங் ஸம்மஸனங், து³க்க²தோ வவத்தே²தி ஏகங் ஸம்மஸனங், அனத்ததோ வவத்தே²தி ஏகங் ஸம்மஸனங்.
Cakkhuṃ…pe… jarāmaraṇaṃ atītānāgatapaccuppannaṃ aniccato vavattheti ekaṃ sammasanaṃ, dukkhato vavattheti ekaṃ sammasanaṃ, anattato vavattheti ekaṃ sammasanaṃ.
ரூபங் அதீதானாக³தபச்சுப்பன்னங் அனிச்சங் க²யட்டே²ன, து³க்க²ங் ப⁴யட்டே²ன அனத்தா அஸாரகட்டே²னாதி ஸங்கி²பித்வா வவத்தா²னே பஞ்ஞா ஸம்மஸனே ஞாணங். வேத³னா…பே॰… ஸஞ்ஞா…பே॰… ஸங்கா²ரா…பே॰… விஞ்ஞாணங்…பே॰… சக்கு²…பே॰… ஜராமரணங் அதீதானாக³தபச்சுப்பன்னங் அனிச்சங் க²யட்டே²ன, து³க்க²ங் ப⁴யட்டே²ன, அனத்தா அஸாரகட்டே²னாதி ஸங்கி²பித்வா வவத்தா²னே பஞ்ஞா ஸம்மஸனே ஞாணங்.
Rūpaṃ atītānāgatapaccuppannaṃ aniccaṃ khayaṭṭhena, dukkhaṃ bhayaṭṭhena anattā asārakaṭṭhenāti saṅkhipitvā vavatthāne paññā sammasane ñāṇaṃ. Vedanā…pe… saññā…pe… saṅkhārā…pe… viññāṇaṃ…pe… cakkhu…pe… jarāmaraṇaṃ atītānāgatapaccuppannaṃ aniccaṃ khayaṭṭhena, dukkhaṃ bhayaṭṭhena, anattā asārakaṭṭhenāti saṅkhipitvā vavatthāne paññā sammasane ñāṇaṃ.
ரூபங் அதீதானாக³தபச்சுப்பன்னங் அனிச்சங் ஸங்க²தங் படிச்சஸமுப்பன்னங் க²யத⁴ம்மங் வயத⁴ம்மங் விராக³த⁴ம்மங் நிரோத⁴த⁴ம்மந்தி ஸங்கி²பித்வா வவத்தா²னே பஞ்ஞா ஸம்மஸனே ஞாணங். வேத³னா…பே॰… ஸஞ்ஞா… ஸங்கா²ரா… விஞ்ஞாணங்… சக்கு²…பே॰… ஜராமரணங் அதீதானாக³தபச்சுப்பன்னங் அனிச்சங் ஸங்க²தங் படிச்சஸமுப்பன்னங் க²யத⁴ம்மங் வயத⁴ம்மங் விராக³த⁴ம்மங் நிரோத⁴த⁴ம்மந்தி ஸங்கி²பித்வா வவத்தா²னே பஞ்ஞா ஸம்மஸனே ஞாணங்.
Rūpaṃ atītānāgatapaccuppannaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammanti saṅkhipitvā vavatthāne paññā sammasane ñāṇaṃ. Vedanā…pe… saññā… saṅkhārā… viññāṇaṃ… cakkhu…pe… jarāmaraṇaṃ atītānāgatapaccuppannaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammanti saṅkhipitvā vavatthāne paññā sammasane ñāṇaṃ.
ஜாதிபச்சயா ஜராமரணங், அஸதி ஜாதியா நத்தி² ஜராமரணந்தி ஸங்கி²பித்வா வவத்தா²னே பஞ்ஞா ஸம்மஸனே ஞாணங். அதீதம்பி அத்³தா⁴னங்… அனாக³தம்பி அத்³தா⁴னங் ஜாதிபச்சயா ஜராமரணங், அஸதி ஜாதியா நத்தி² ஜராமரணந்தி ஸங்கி²பித்வா வவத்தா²னே பஞ்ஞா ஸம்மஸனே ஞாணங். ப⁴வபச்சயா ஜாதி, அஸதி…பே॰… உபாதா³னபச்சயா ப⁴வோ, அஸதி…பே॰… தண்ஹாபச்சயா உபாதா³னங், அஸதி…பே॰… வேத³னாபச்சயா தண்ஹா, அஸதி…பே॰… ப²ஸ்ஸபச்சயா வேத³னா, அஸதி…பே॰… ஸளாயதனபச்சயா ப²ஸ்ஸோ, அஸதி…பே॰… நாமரூபபச்சயா ஸளாயதனங், அஸதி…பே॰… விஞ்ஞாணபச்சயா நாமரூபங், அஸதி…பே॰… ஸங்கா²ரபச்சயா விஞ்ஞாணங், அஸதி…பே॰… அவிஜ்ஜாபச்சயா ஸங்கா²ரா, அஸதி அவிஜ்ஜாய நத்தி² ஸங்கா²ராதி ஸங்கி²பித்வா வவத்தா²னே பஞ்ஞா ஸம்மஸனே ஞாணங். அதீதம்பி அத்³தா⁴னங்… அனாக³தம்பி அத்³தா⁴னங் அவிஜ்ஜாபச்சயா ஸங்கா²ரா, அஸதி அவிஜ்ஜாய நத்தி² ஸங்கா²ராதி ஸங்கி²பித்வா வவத்தா²னே பஞ்ஞா ஸம்மஸனே ஞாணங். தங் ஞாதட்டே²ன ஞாணங், பஜானநட்டே²ன பஞ்ஞா. தேன வுச்சதி – ‘‘அதீதானாக³தபச்சுப்பன்னானங் த⁴ம்மானங் ஸங்கி²பித்வா வவத்தா²னே பஞ்ஞா ஸம்மஸனே ஞாணங்’’.
Jātipaccayā jarāmaraṇaṃ, asati jātiyā natthi jarāmaraṇanti saṅkhipitvā vavatthāne paññā sammasane ñāṇaṃ. Atītampi addhānaṃ… anāgatampi addhānaṃ jātipaccayā jarāmaraṇaṃ, asati jātiyā natthi jarāmaraṇanti saṅkhipitvā vavatthāne paññā sammasane ñāṇaṃ. Bhavapaccayā jāti, asati…pe… upādānapaccayā bhavo, asati…pe… taṇhāpaccayā upādānaṃ, asati…pe… vedanāpaccayā taṇhā, asati…pe… phassapaccayā vedanā, asati…pe… saḷāyatanapaccayā phasso, asati…pe… nāmarūpapaccayā saḷāyatanaṃ, asati…pe… viññāṇapaccayā nāmarūpaṃ, asati…pe… saṅkhārapaccayā viññāṇaṃ, asati…pe… avijjāpaccayā saṅkhārā, asati avijjāya natthi saṅkhārāti saṅkhipitvā vavatthāne paññā sammasane ñāṇaṃ. Atītampi addhānaṃ… anāgatampi addhānaṃ avijjāpaccayā saṅkhārā, asati avijjāya natthi saṅkhārāti saṅkhipitvā vavatthāne paññā sammasane ñāṇaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘atītānāgatapaccuppannānaṃ dhammānaṃ saṅkhipitvā vavatthāne paññā sammasane ñāṇaṃ’’.
ஸம்மஸனஞாணனித்³தே³ஸோ பஞ்சமோ.
Sammasanañāṇaniddeso pañcamo.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 5. ஸம்மஸனஞாணனித்³தே³ஸவண்ணனா • 5. Sammasanañāṇaniddesavaṇṇanā
