| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၅. ပဉ္စမဝဂ္ဂော
5. Pañcamavaggo
(၄၈) ၆. သမ္မုတိဉာဏကထာ
(48) 6. Sammutiñāṇakathā
၄၃၄. န ဝတ္တဗ္ဗံ – ‘‘သမ္မုတိဉာဏံ သစ္စာရမ္မဏညေဝ န အညာရမ္မဏ’’န္တိ? အာမန္တာ။ နနု ပထဝီကသိဏံ သမာပတ္တိံ သမာပန္နသ္သ အတ္ထိ ဉာဏံ, ပထဝီကသိဏဉ္စ သမ္မုတိသစ္စမ္ဟီတိ? အာမန္တာ။ ဟဉ္စိ ပထဝီကသိဏံ သမာပတ္တိံ သမာပန္နသ္သ အတ္ထိ ဉာဏံ, ပထဝီကသိဏဉ္စ သမ္မုတိသစ္စမ္ဟိ, တေန ဝတ ရေ ဝတ္တဗ္ဗေ – ‘‘သမ္မုတိဉာဏံ သစ္စာရမ္မဏညေဝ န အညာရမ္မဏ’’န္တိ။
434. Na vattabbaṃ – ‘‘sammutiñāṇaṃ saccārammaṇaññeva na aññārammaṇa’’nti? Āmantā. Nanu pathavīkasiṇaṃ samāpattiṃ samāpannassa atthi ñāṇaṃ, pathavīkasiṇañca sammutisaccamhīti? Āmantā. Hañci pathavīkasiṇaṃ samāpattiṃ samāpannassa atthi ñāṇaṃ, pathavīkasiṇañca sammutisaccamhi, tena vata re vattabbe – ‘‘sammutiñāṇaṃ saccārammaṇaññeva na aññārammaṇa’’nti.
န ဝတ္တဗ္ဗံ – ‘‘သမ္မုတိဉာဏံ သစ္စာရမ္မဏညေဝ န အညာရမ္မဏ’’န္တိ? အာမန္တာ။ပေ.။ နနု အာပောကသိဏံ။ပေ.။ တေဇောကသိဏံ။ပေ.။ ဂိလာနပစ္စယဘေသဇ္ဇပရိက္ခာရံ ဒဒန္တသ္သ အတ္ထိ ဉာဏံ, ဂိလာနပစ္စယဘေသဇ္ဇပရိက္ခာရော စ သမ္မုတိသစ္စမ္ဟီတိ? အာမန္တာ။ ဟဉ္စိ ဂိလာနပစ္စယဘေသဇ္ဇပရိက္ခာရံ ဒဒန္တသ္သ အတ္ထိ ဉာဏံ, ဂိလာနပစ္စယဘေသဇ္ဇပရိက္ခာရော စ သမ္မုတိသစ္စမ္ဟိ, တေန ဝတ ရေ ဝတ္တဗ္ဗေ – ‘‘သမ္မုတိဉာဏံ သစ္စာရမ္မဏညေဝ န အညာရမ္မဏ’’န္တိ။
Na vattabbaṃ – ‘‘sammutiñāṇaṃ saccārammaṇaññeva na aññārammaṇa’’nti? Āmantā…pe… nanu āpokasiṇaṃ…pe… tejokasiṇaṃ…pe… gilānapaccayabhesajjaparikkhāraṃ dadantassa atthi ñāṇaṃ, gilānapaccayabhesajjaparikkhāro ca sammutisaccamhīti? Āmantā. Hañci gilānapaccayabhesajjaparikkhāraṃ dadantassa atthi ñāṇaṃ, gilānapaccayabhesajjaparikkhāro ca sammutisaccamhi, tena vata re vattabbe – ‘‘sammutiñāṇaṃ saccārammaṇaññeva na aññārammaṇa’’nti.
၄၃၅. သမ္မုတိဉာဏံ သစ္စာရမ္မဏညေဝ န အညာရမ္မဏန္တိ? အာမန္တာ ။ တေန ဉာဏေန ဒုက္ခံ ပရိဇာနာတိ, သမုဒယံ ပဇဟတိ, နိရောဓံ သစ္ဆိကရောတိ, မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
435. Sammutiñāṇaṃ saccārammaṇaññeva na aññārammaṇanti? Āmantā . Tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
သမ္မုတိဉာဏကထာ နိဋ္ဌိတာ။
Sammutiñāṇakathā niṭṭhitā.
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၆. သမ္မုတိဉာဏကထာဝဏ္ဏနာ • 6. Sammutiñāṇakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၆. သမ္မုတိဉာဏကထာဝဏ္ဏနာ • 6. Sammutiñāṇakathāvaṇṇanā
