| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൫. പഞ്ചമവഗ്ഗോ
5. Pañcamavaggo
(൪൮) ൬. സമ്മുതിഞാണകഥാ
(48) 6. Sammutiñāṇakathā
൪൩൪. ന വത്തബ്ബം – ‘‘സമ്മുതിഞാണം സച്ചാരമ്മണഞ്ഞേവ ന അഞ്ഞാരമ്മണ’’ന്തി? ആമന്താ. നനു പഥവീകസിണം സമാപത്തിം സമാപന്നസ്സ അത്ഥി ഞാണം, പഥവീകസിണഞ്ച സമ്മുതിസച്ചമ്ഹീതി? ആമന്താ. ഹഞ്ചി പഥവീകസിണം സമാപത്തിം സമാപന്നസ്സ അത്ഥി ഞാണം, പഥവീകസിണഞ്ച സമ്മുതിസച്ചമ്ഹി, തേന വത രേ വത്തബ്ബേ – ‘‘സമ്മുതിഞാണം സച്ചാരമ്മണഞ്ഞേവ ന അഞ്ഞാരമ്മണ’’ന്തി.
434. Na vattabbaṃ – ‘‘sammutiñāṇaṃ saccārammaṇaññeva na aññārammaṇa’’nti? Āmantā. Nanu pathavīkasiṇaṃ samāpattiṃ samāpannassa atthi ñāṇaṃ, pathavīkasiṇañca sammutisaccamhīti? Āmantā. Hañci pathavīkasiṇaṃ samāpattiṃ samāpannassa atthi ñāṇaṃ, pathavīkasiṇañca sammutisaccamhi, tena vata re vattabbe – ‘‘sammutiñāṇaṃ saccārammaṇaññeva na aññārammaṇa’’nti.
ന വത്തബ്ബം – ‘‘സമ്മുതിഞാണം സച്ചാരമ്മണഞ്ഞേവ ന അഞ്ഞാരമ്മണ’’ന്തി? ആമന്താ…പേ॰… നനു ആപോകസിണം…പേ॰… തേജോകസിണം…പേ॰… ഗിലാനപച്ചയഭേസജ്ജപരിക്ഖാരം ദദന്തസ്സ അത്ഥി ഞാണം, ഗിലാനപച്ചയഭേസജ്ജപരിക്ഖാരോ ച സമ്മുതിസച്ചമ്ഹീതി? ആമന്താ. ഹഞ്ചി ഗിലാനപച്ചയഭേസജ്ജപരിക്ഖാരം ദദന്തസ്സ അത്ഥി ഞാണം, ഗിലാനപച്ചയഭേസജ്ജപരിക്ഖാരോ ച സമ്മുതിസച്ചമ്ഹി, തേന വത രേ വത്തബ്ബേ – ‘‘സമ്മുതിഞാണം സച്ചാരമ്മണഞ്ഞേവ ന അഞ്ഞാരമ്മണ’’ന്തി.
Na vattabbaṃ – ‘‘sammutiñāṇaṃ saccārammaṇaññeva na aññārammaṇa’’nti? Āmantā…pe… nanu āpokasiṇaṃ…pe… tejokasiṇaṃ…pe… gilānapaccayabhesajjaparikkhāraṃ dadantassa atthi ñāṇaṃ, gilānapaccayabhesajjaparikkhāro ca sammutisaccamhīti? Āmantā. Hañci gilānapaccayabhesajjaparikkhāraṃ dadantassa atthi ñāṇaṃ, gilānapaccayabhesajjaparikkhāro ca sammutisaccamhi, tena vata re vattabbe – ‘‘sammutiñāṇaṃ saccārammaṇaññeva na aññārammaṇa’’nti.
൪൩൫. സമ്മുതിഞാണം സച്ചാരമ്മണഞ്ഞേവ ന അഞ്ഞാരമ്മണന്തി? ആമന്താ . തേന ഞാണേന ദുക്ഖം പരിജാനാതി, സമുദയം പജഹതി, നിരോധം സച്ഛികരോതി, മഗ്ഗം ഭാവേതീതി? ന ഹേവം വത്തബ്ബേ…പേ॰….
435. Sammutiñāṇaṃ saccārammaṇaññeva na aññārammaṇanti? Āmantā . Tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
സമ്മുതിഞാണകഥാ നിട്ഠിതാ.
Sammutiñāṇakathā niṭṭhitā.
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൬. സമ്മുതിഞാണകഥാവണ്ണനാ • 6. Sammutiñāṇakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-മൂലടീകാ • Pañcapakaraṇa-mūlaṭīkā / ൬. സമ്മുതിഞാണകഥാവണ്ണനാ • 6. Sammutiñāṇakathāvaṇṇanā
