| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
6. ஸம்பயுத்தவாரவண்ணனா
6. Sampayuttavāravaṇṇanā
392-400. ஸம்பயுத்தவாரே குஸலங் த⁴ம்மங் ஸம்பயுத்தோதி குஸலங் த⁴ம்மங் ஸம்பயுத்தபச்சயங் கத்வாதி அத்தோ². ஸேஸமெத்த² ஸங்ஸட்ட²வாரே வுத்தனயேனேவ வேதி³தப்³ப³ங். அவஸானே பனஸ்ஸ ‘‘ஸங்ஸட்ட²த்தங் நாம ஸம்பயுத்தத்தங், ஸம்பயுத்தத்தங் நாம ஸங்ஸட்ட²த்த’’ந்தி இத³ங் உபி⁴ன்னம்பி ஏதேஸங் வாரானங் அத்த²தோ நின்னானாகரணபா⁴வத³ஸ்ஸனத்த²ங் வுத்தங். அத்த²தோ ஹி ஏதேபி படிச்சஸஹஜாதா விய பச்சயனிஸ்ஸயா விய ச நின்னானாகரணா. ஏவங் ஸந்தேபி அஞ்ஞமஞ்ஞஸ்ஸ அத்த²னியமனத்த²ங் வுத்தா. ‘‘ஸங்ஸட்டா² யோஜிதா ஹயா’’திஆதீ³ஸு (ஜா॰ 2.22.70) ஹி அஸம்பயுத்தம்பி ஸங்ஸட்ட²ந்தி வுச்சதி. ‘‘யா ஸா வீமங்ஸா கோஸஜ்ஜஸஹக³தா கோஸஜ்ஜஸம்பயுத்தா’’திஆதீ³ஸு (ஸங்॰ நி॰ 5.832) அஸங்ஸட்ட²ங் வோகிண்ணம்பி ஸம்பயுத்தந்தி. இதி ஸங்ஸட்ட²வாரேன ஏகுப்பாத³லக்க²ணஸ்ஸ ஸம்பயுத்தஸ்ஸ ஸங்ஸட்ட²பா⁴வங் ஸம்பயுத்தவாரேன ச ஸங்ஸட்ட²ஸ்ஸ ஏகுப்பாதா³தி³லக்க²ணஸ்ஸ ஸம்பயுத்தபா⁴வங் நியமேதுங் உபோ⁴பேதே வுத்தா. அபிச ததா² பு³ஜ்ஜ²னகானங் அஜ்ஜா²ஸயவஸேன தே³ஸனாவிலாஸேன நிருத்திபடிஸம்பி⁴தா³பபே⁴த³ஜானநவஸேன சாபி ஏதே உபோ⁴பி வுத்தாதி.
392-400. Sampayuttavāre kusalaṃ dhammaṃ sampayuttoti kusalaṃ dhammaṃ sampayuttapaccayaṃ katvāti attho. Sesamettha saṃsaṭṭhavāre vuttanayeneva veditabbaṃ. Avasāne panassa ‘‘saṃsaṭṭhattaṃ nāma sampayuttattaṃ, sampayuttattaṃ nāma saṃsaṭṭhatta’’nti idaṃ ubhinnampi etesaṃ vārānaṃ atthato ninnānākaraṇabhāvadassanatthaṃ vuttaṃ. Atthato hi etepi paṭiccasahajātā viya paccayanissayā viya ca ninnānākaraṇā. Evaṃ santepi aññamaññassa atthaniyamanatthaṃ vuttā. ‘‘Saṃsaṭṭhā yojitā hayā’’tiādīsu (jā. 2.22.70) hi asampayuttampi saṃsaṭṭhanti vuccati. ‘‘Yā sā vīmaṃsā kosajjasahagatā kosajjasampayuttā’’tiādīsu (saṃ. ni. 5.832) asaṃsaṭṭhaṃ vokiṇṇampi sampayuttanti. Iti saṃsaṭṭhavārena ekuppādalakkhaṇassa sampayuttassa saṃsaṭṭhabhāvaṃ sampayuttavārena ca saṃsaṭṭhassa ekuppādādilakkhaṇassa sampayuttabhāvaṃ niyametuṃ ubhopete vuttā. Apica tathā bujjhanakānaṃ ajjhāsayavasena desanāvilāsena niruttipaṭisambhidāpabhedajānanavasena cāpi ete ubhopi vuttāti.
ஸம்பயுத்தவாரவண்ணனா.
Sampayuttavāravaṇṇanā.
ஏதேஸு பன ச²ஸு வாரேஸு அத்தி² கோசி பச்சயோ ஏகந்தங் அனுலோமதோ ந திட்ட²தி, பச்சனீகதோவ திட்ட²தி; அத்தி² ஏகந்தங் பச்சனீகதோ ந திட்ட²தி, அனுலோமதோவ திட்ட²தி; அத்தி² அனேகந்தங் அனுலோமதோ சேவ திட்ட²தி, பச்சனீகதோ சாதி இத³ங் பகிண்ணகங் வேதி³தப்³ப³ங். தத்த² பட²மோ பஞ்ஹோ பச்சா²ஜாதஸ்ஸ, து³தியோ மஹாசதுக்கஸ்ஸ, ததியோ யுஜ்ஜமானகானங் ஸேஸானங் வஸேன வேதி³தப்³போ³தி.
Etesu pana chasu vāresu atthi koci paccayo ekantaṃ anulomato na tiṭṭhati, paccanīkatova tiṭṭhati; atthi ekantaṃ paccanīkato na tiṭṭhati, anulomatova tiṭṭhati; atthi anekantaṃ anulomato ceva tiṭṭhati, paccanīkato cāti idaṃ pakiṇṇakaṃ veditabbaṃ. Tattha paṭhamo pañho pacchājātassa, dutiyo mahācatukkassa, tatiyo yujjamānakānaṃ sesānaṃ vasena veditabboti.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / 1. குஸலத்திகங் • 1. Kusalattikaṃ
