| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
5. ஸங்ஸட்ட²வாரவண்ணனா
5. Saṃsaṭṭhavāravaṇṇanā
338-346. ஸங்ஸட்ட²வாரே குஸலங் த⁴ம்மங் ஸங்ஸட்டோ²தி குஸலங் த⁴ம்மங் ஏகுப்பாதா³தி³லக்க²ணேன ஸம்பயோக³ட்டே²ன பச்சயங் கத்வாதி அத்தோ². குஸலங் ஏகங் க²ந்த⁴ங் ஸங்ஸட்டோ²தி குஸலங் ஏகங் க²ந்த⁴ங் ஸம்பயுத்தபச்சயங் கத்வா தயோ க²ந்தா⁴ உப்பஜ்ஜந்தி ஹேதுபச்சயாதி வுத்தங் ஹோதி. இமினா உபாயேன ஸப்³ப³பதே³ஸு அத்தோ² வேதி³தப்³போ³. இமஸ்மிங் பன ஹேதுபச்சயே அரூபத⁴ம்மஸ்ஸேவ ஸம்பயோக³ட்டே²ன பச்சயங் கத்வா தயோ பஞ்ஹா விஸ்ஸஜ்ஜிதா. யதா² ச ஹேதுபச்சயே, ததா² ஆரம்மணபச்சயாதீ³ஸுபி, கேவலங் விபாகபச்சயே ஏகமேவ விஸ்ஸஜ்ஜனங்.
338-346. Saṃsaṭṭhavāre kusalaṃ dhammaṃ saṃsaṭṭhoti kusalaṃ dhammaṃ ekuppādādilakkhaṇena sampayogaṭṭhena paccayaṃ katvāti attho. Kusalaṃ ekaṃ khandhaṃ saṃsaṭṭhoti kusalaṃ ekaṃ khandhaṃ sampayuttapaccayaṃ katvā tayo khandhā uppajjanti hetupaccayāti vuttaṃ hoti. Iminā upāyena sabbapadesu attho veditabbo. Imasmiṃ pana hetupaccaye arūpadhammasseva sampayogaṭṭhena paccayaṃ katvā tayo pañhā vissajjitā. Yathā ca hetupaccaye, tathā ārammaṇapaccayādīsupi, kevalaṃ vipākapaccaye ekameva vissajjanaṃ.
347-350. இதா³னி யதா²லத்³தா⁴னி விஸ்ஸஜ்ஜனானி க³ணனவஸேன த³ஸ்ஸேதுங் ஹேதுயா தீணீதிஆதி³ வுத்தங். தத்த² ஸப்³ப³திகேஸு குஸலேன குஸலங், அகுஸலேன அகுஸலங், அப்³யாகதேன அப்³யாகதந்தி அயமேவ நியமோ. ஏககே பன அப்³யாகதேன அப்³யாகதமேவ லப்³ப⁴தீதி ஏவமெத்த² பா³வீஸதியா பச்சயேஸு தீணி, விபாகே ஏகந்தி த்³வே பரிச்சே²தா³. பச்சா²ஜாதே அனுலோமங் நத்தி². தஸ்மா தீணி ஏகந்தி இமேஸஞ்ஞேவ வஸேன து³கதிகாதீ³ஸு பச்சயஸங்ஸந்த³னே யத்த² விபாகபச்சயோ பவிஸதி; தத்த² ஏகங், ஸேஸேஸு தீணீதி ஏவங் க³ணனா வேதி³தப்³பா³. ஸேஸமெத்த² அனுலோமே உத்தானத்த²மேவ.
347-350. Idāni yathāladdhāni vissajjanāni gaṇanavasena dassetuṃ hetuyā tīṇītiādi vuttaṃ. Tattha sabbatikesu kusalena kusalaṃ, akusalena akusalaṃ, abyākatena abyākatanti ayameva niyamo. Ekake pana abyākatena abyākatameva labbhatīti evamettha bāvīsatiyā paccayesu tīṇi, vipāke ekanti dve paricchedā. Pacchājāte anulomaṃ natthi. Tasmā tīṇi ekanti imesaññeva vasena dukatikādīsu paccayasaṃsandane yattha vipākapaccayo pavisati; tattha ekaṃ, sesesu tīṇīti evaṃ gaṇanā veditabbā. Sesamettha anulome uttānatthameva.
351-354. பச்சனீயே பன குஸலங் ந லப்³ப⁴தீதி அகுஸலமேவ ஆதி³ங் கத்வா விஸ்ஸஜ்ஜனங் கதங், தங் உத்தானத்த²மேவ.
351-354. Paccanīye pana kusalaṃ na labbhatīti akusalameva ādiṃ katvā vissajjanaṃ kataṃ, taṃ uttānatthameva.
359. யங் பனெத்த² பச்சனீயே விஸ்ஸஜ்ஜனபரிச்சே²த³ங் க³ணனதோ த³ஸ்ஸேதுங் நஹேதுயா த்³வேதிஆதி³ வுத்தங், தத்த² த்³வே தீணி ஏகந்தி தயோ பரிச்சே²தா³. தேஸங் வஸேன து³கதிகாதீ³ஸு பச்சயஸங்ஸந்த³னே க³ணனா வேதி³தப்³பா³. இதா⁴பி அதி⁴கதரக³ணனானங் ஊனதரக³ணனேன ஸத்³தி⁴ங் ஸங்ஸந்த³னே ஊனதரக³ணனமேவ லப்³ப⁴தி, ஸமக³ணனேன ஸத்³தி⁴ங் ஸமக³ணனங். யஸ்மா செத்த² அரூபத⁴ம்மாயேவ பச்சயுப்பன்னா, தஸ்மா நஹேதுனாதி⁴பதினபுரேஜாதனபச்சா²ஜாதனாஸேவனநகம்மனவிபாகனஜா²னநமக்³க³னவிப்பயுத்தவஸேன த³ஸேவ பச்சயா பச்சனீகதோ த³ஸ்ஸிதா, ஸேஸா சுத்³த³ஸ ந லப்³ப⁴ந்தி. யேபி லப்³ப⁴ந்தி, தேஸுபி விபாகே பச்சயுப்பன்னே நகம்மனவிபாகா ந லப்³ப⁴ந்தி.
359. Yaṃ panettha paccanīye vissajjanaparicchedaṃ gaṇanato dassetuṃ nahetuyā dvetiādi vuttaṃ, tattha dve tīṇi ekanti tayo paricchedā. Tesaṃ vasena dukatikādīsu paccayasaṃsandane gaṇanā veditabbā. Idhāpi adhikataragaṇanānaṃ ūnataragaṇanena saddhiṃ saṃsandane ūnataragaṇanameva labbhati, samagaṇanena saddhiṃ samagaṇanaṃ. Yasmā cettha arūpadhammāyeva paccayuppannā, tasmā nahetunādhipatinapurejātanapacchājātanāsevananakammanavipākanajhānanamagganavippayuttavasena daseva paccayā paccanīkato dassitā, sesā cuddasa na labbhanti. Yepi labbhanti, tesupi vipāke paccayuppanne nakammanavipākā na labbhanti.
360-368. நஹேதுபச்சயா நாதி⁴பதியா த்³வேதி நஹேதுயா லத்³த⁴ங் த்³வயமேவ. ஸேஸத்³வயேஸுபி ஏஸேவ நயோ. நகம்மே ஏகந்தி அஹேதுககிரியசேதனங் பச்சயுப்பன்னங் கத்வா அப்³யாகதேன அப்³யாகதங். நவிபாகே த்³வேதி அஹேதுகமோஹகிரியவஸேன த்³வே. நஜா²னே ஏகந்தி அஹேதுகபஞ்சவிஞ்ஞாணவஸேன அப்³யாகதவிஸ்ஸஜ்ஜனங் வேதி³தப்³ப³ங். நமக்³கே³ ஏகந்தி அஹேதுகவிபாககிரியவஸேன அப்³யாகதவிஸ்ஸஜ்ஜனங். இமினாவுபாயேன ஸப்³ப³ஸங்ஸந்த³னேஸு அத்தோ² வேதி³தப்³போ³தி.
360-368. Nahetupaccayā nādhipatiyā dveti nahetuyā laddhaṃ dvayameva. Sesadvayesupi eseva nayo. Nakamme ekanti ahetukakiriyacetanaṃ paccayuppannaṃ katvā abyākatena abyākataṃ. Navipāke dveti ahetukamohakiriyavasena dve. Najhāne ekanti ahetukapañcaviññāṇavasena abyākatavissajjanaṃ veditabbaṃ. Namagge ekanti ahetukavipākakiriyavasena abyākatavissajjanaṃ. Imināvupāyena sabbasaṃsandanesu attho veditabboti.
369-383. அனுலோமபச்சனீயே ஹெட்டா² வுத்தா நஹேதுஆத³யோ த³ஸேவ பச்சனீயதோ லப்³ப⁴ந்தி, ந ஸேஸா. யேபி லப்³ப⁴ந்தி, தேஸு ஹேதும்ஹி அனுலோமதோ டி²தே ஜா²னமக்³கா³ பச்சனீயதோ ந லப்³ப⁴ந்தீதி ஸப்³ப³ங் ஹெட்டா² வுத்தனயேனேவ வேதி³தப்³ப³ந்தி.
369-383. Anulomapaccanīye heṭṭhā vuttā nahetuādayo daseva paccanīyato labbhanti, na sesā. Yepi labbhanti, tesu hetumhi anulomato ṭhite jhānamaggā paccanīyato na labbhantīti sabbaṃ heṭṭhā vuttanayeneva veditabbanti.
384-391. பச்சனீயானுலோமே நஹேதுபச்சயுப்பன்னேஸு அஹேதுகமோஹோவ ஜா²னமக்³க³பச்சயங் லப⁴தி, ஸேஸா ந லப⁴ந்தி. நஜா²னபச்சயே அட்டா²ஹேதுகசித்தானிபி. நகம்மபச்சயா நஹேதுபச்சயா நாதி⁴பதிபச்சயா நபுரேஜாதபச்சயா ஆரம்மணே ஏகந்தி ஆருப்பே அஹேதுககிரியசேதனாவஸேன அப்³யாகதேன அப்³யாகதங். இமினா உபாயேன யங் லப்³ப⁴தி, யஞ்ச ந லப்³ப⁴தி, தஸ்ஸ வஸேன ஸப்³ப³த்த² க³ணனா வேதி³தப்³பா³தி.
384-391. Paccanīyānulome nahetupaccayuppannesu ahetukamohova jhānamaggapaccayaṃ labhati, sesā na labhanti. Najhānapaccaye aṭṭhāhetukacittānipi. Nakammapaccayā nahetupaccayā nādhipatipaccayā napurejātapaccayā ārammaṇe ekanti āruppe ahetukakiriyacetanāvasena abyākatena abyākataṃ. Iminā upāyena yaṃ labbhati, yañca na labbhati, tassa vasena sabbattha gaṇanā veditabbāti.
ஸங்ஸட்ட²வாரவண்ணனா.
Saṃsaṭṭhavāravaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / 1. குஸலத்திகங் • 1. Kusalattikaṃ
