| Library / Tipiṭaka / તિપિટક • Tipiṭaka / પરિવારપાળિ • Parivārapāḷi |
૮. સમુચ્ચયવારો
8. Samuccayavāro
૨૪૬. અવસ્સુતા ભિક્ખુની અવસ્સુતસ્સ પુરિસપુગ્ગલસ્સ કાયસંસગ્ગં સાદિયન્તી કતિ આપત્તિયો આપજ્જતિ? અવસ્સુતા ભિક્ખુની અવસ્સુતસ્સ પુરિસપુગ્ગલસ્સ કાયસંસગ્ગં સાદિયન્તી તિસ્સો આપત્તિયો આપજ્જતિ. અધક્ખકં ઉબ્ભજાણુમણ્ડલં ગહણં સાદિયતિ, આપત્તિ પારાજિકસ્સ; ઉબ્ભક્ખકં અધોજાણુમણ્ડલં ગહણં સાદિયતિ, આપત્તિ થુલ્લચ્ચયસ્સ; કાયપટિબદ્ધં ગહણં સાદિયતિ, આપત્તિ દુક્કટસ્સ – અવસ્સુતા ભિક્ખુની અવસ્સુતસ્સ પુરિસપુગ્ગલસ્સ કાયસંસગ્ગં સાદિયન્તી ઇમા તિસ્સો આપત્તિયો આપજ્જતિ.
246. Avassutā bhikkhunī avassutassa purisapuggalassa kāyasaṃsaggaṃ sādiyantī kati āpattiyo āpajjati? Avassutā bhikkhunī avassutassa purisapuggalassa kāyasaṃsaggaṃ sādiyantī tisso āpattiyo āpajjati. Adhakkhakaṃ ubbhajāṇumaṇḍalaṃ gahaṇaṃ sādiyati, āpatti pārājikassa; ubbhakkhakaṃ adhojāṇumaṇḍalaṃ gahaṇaṃ sādiyati, āpatti thullaccayassa; kāyapaṭibaddhaṃ gahaṇaṃ sādiyati, āpatti dukkaṭassa – avassutā bhikkhunī avassutassa purisapuggalassa kāyasaṃsaggaṃ sādiyantī imā tisso āpattiyo āpajjati.
તા આપત્તિયો ચતુન્નં વિપત્તીનં કતિ વિપત્તિયો ભજન્તિ? સત્તન્નં આપત્તિક્ખન્ધાનં કતિહિ આપત્તિક્ખન્ધેહિ સઙ્ગહિતા? છન્નં આપત્તિસમુટ્ઠાનાનં કતિહિ સમુટ્ઠાનેહિ સમુટ્ઠન્તિ? ચતુન્નં અધિકરણાનં કતમં અધિકરણં? સત્તન્નં સમથાનં કતિહિ સમથેહિ સમ્મન્તિ? તા આપત્તિયો ચતુન્નં વિપત્તીનં દ્વે વિપત્તિયો ભજન્તિ – સિયા સીલવિપત્તિં, સિયા આચારવિપત્તિં. સત્તન્નં આપત્તિક્ખન્ધાનં તીહિ આપત્તિક્ખન્ધેહિ સઙ્ગહિતા – સિયા પારાજિકાપત્તિક્ખન્ધેન, સિયા થુલ્લચ્ચયાપત્તિક્ખન્ધેન, સિયા દુક્કટાપત્તિક્ખન્ધેન. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠન્તિ – કાયતો ચ ચિત્તતો ચ સમુટ્ઠન્તિ, ન વાચતો. ચતુન્નં અધિકરણાનં આપત્તાધિકરણં. સત્તન્નં સમથાનં તીહિ સમથેહિ સમ્મન્તિ – સિયા સમ્મુખાવિનયેન ચ પટિઞ્ઞાતકરણેન ચ, સિયા સમ્મુખાવિનયેન ચ તિણવત્થારકેન ચ…પે॰….
Tā āpattiyo catunnaṃ vipattīnaṃ kati vipattiyo bhajanti? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti? Catunnaṃ adhikaraṇānaṃ katamaṃ adhikaraṇaṃ? Sattannaṃ samathānaṃ katihi samathehi sammanti? Tā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ, siyā ācāravipattiṃ. Sattannaṃ āpattikkhandhānaṃ tīhi āpattikkhandhehi saṅgahitā – siyā pārājikāpattikkhandhena, siyā thullaccayāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhanti – kāyato ca cittato ca samuṭṭhanti, na vācato. Catunnaṃ adhikaraṇānaṃ āpattādhikaraṇaṃ. Sattannaṃ samathānaṃ tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca…pe….
દધિં વિઞ્ઞાપેત્વા ભુઞ્જન્તી કતિ આપત્તિયો આપજ્જતિ? દધિં વિઞ્ઞાપેત્વા ભુઞ્જન્તી દ્વે આપત્તિયો આપજ્જતિ. ભુઞ્જિસ્સામીતિ પટિગ્ગણ્હાતિ, આપત્તિ દુક્કટસ્સ; અજ્ઝોહારે અજ્ઝોહારે આપત્તિ પાટિદેસનીયસ્સ – દધિં વિઞ્ઞાપેત્વા ભુઞ્જન્તી ઇમા દ્વે આપત્તિયો આપજ્જતિ.
Dadhiṃ viññāpetvā bhuñjantī kati āpattiyo āpajjati? Dadhiṃ viññāpetvā bhuñjantī dve āpattiyo āpajjati. Bhuñjissāmīti paṭiggaṇhāti, āpatti dukkaṭassa; ajjhohāre ajjhohāre āpatti pāṭidesanīyassa – dadhiṃ viññāpetvā bhuñjantī imā dve āpattiyo āpajjati.
તા આપત્તિયો ચતુન્નં વિપત્તીનં કતિ વિપત્તિયો ભજન્તિ? સત્તન્નં આપત્તિક્ખન્ધાનં કતિહિ આપત્તિક્ખન્ધેહિ સઙ્ગહિતા? છન્નં આપત્તિસમુટ્ઠાનાનં કતિહિ સમુટ્ઠાનેહિ સમુટ્ઠન્તિ? ચતુન્નં અધિકરણાનં કતમં અધિકરણં? સત્તન્નં સમથાનં કતિહિ સમથેહિ સમ્મન્તિ? તા આપત્તિયો ચતુન્નં વિપત્તીનં એકં વિપત્તિં ભજન્તિ – આચારવિપત્તિં. સત્તન્નં આપત્તિક્ખન્ધાનં દ્વીહિ આપત્તિક્ખન્ધેહિ સઙ્ગહિતા – સિયા પાટિદેસનીયાપત્તિક્ખન્ધેન, સિયા દુક્કટાપત્તિક્ખન્ધેન. છન્નં આપત્તિસમુટ્ઠાનાનં ચતૂહિ સમુટ્ઠાનેહિ સમુટ્ઠન્તિ – સિયા કાયતો સમુટ્ઠન્તિ ન વાચતો ન ચિત્તતો, સિયા કાયતો ચ વાચતો ચ સમુટ્ઠન્તિ ન ચિત્તતો, સિયા કાયતો ચ ચિત્તતો ચ સમુટ્ઠન્તિ ન વાચતો, સિયા કાયતો ચ વાચતો ચ ચિત્તતો ચ સમુટ્ઠન્તિ. ચતુન્નં અધિકરણાનં – આપત્તાધિકરણં. સત્તન્નં સમથાનં તીહિ સમથેહિ સમ્મન્તિ – સિયા સમ્મુખાવિનયેન ચ પટિઞ્ઞાતકરણેન ચ, સિયા સમ્મુખાવિનયેન ચ તિણવત્થારકેન ચ.
Tā āpattiyo catunnaṃ vipattīnaṃ kati vipattiyo bhajanti? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti? Catunnaṃ adhikaraṇānaṃ katamaṃ adhikaraṇaṃ? Sattannaṃ samathānaṃ katihi samathehi sammanti? Tā āpattiyo catunnaṃ vipattīnaṃ ekaṃ vipattiṃ bhajanti – ācāravipattiṃ. Sattannaṃ āpattikkhandhānaṃ dvīhi āpattikkhandhehi saṅgahitā – siyā pāṭidesanīyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ catūhi samuṭṭhānehi samuṭṭhanti – siyā kāyato samuṭṭhanti na vācato na cittato, siyā kāyato ca vācato ca samuṭṭhanti na cittato, siyā kāyato ca cittato ca samuṭṭhanti na vācato, siyā kāyato ca vācato ca cittato ca samuṭṭhanti. Catunnaṃ adhikaraṇānaṃ – āpattādhikaraṇaṃ. Sattannaṃ samathānaṃ tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.
સમુચ્ચયવારો નિટ્ઠિતો અટ્ઠમો.
Samuccayavāro niṭṭhito aṭṭhamo.
