| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༡༠. སམུདྡཀསུཏྟཝཎྞནཱ
10. Samuddakasuttavaṇṇanā
༢༥༦. ཙཀྐཝཱལ༹མཧཱསམུདྡཔིཊྛིཡནྟི ཙཀྐཝཱལ༹པབྦཏཔཱདསམནྟཱ མཧཱསམུདྡཏཱིརཔིཊྛིཡཾ། ཡཐེཝ སིནེརུསམཱིཔེ མཧཱསམུདྡོ ཨནུཔུབྦནིནྣོ ཨནུཔུབྦཔོཎོ ཨནུཔུབྦཔབྦྷཱརོ, ཨེཝཾ ཡེབྷུཡྻེན ཙཀྐཝཱལ༹པཱདསམཱིཔེཔི། ཏེནཱཧ ‘‘རཛཏཔཊྚཝཎྞེ ཝཱལུཀཔུལིནེ’’ཏི། ཝུཏྟཔྤཀཱརཱསཱུཏི ཨནནྟརསུཏྟེ ཝུཏྟཔྤཀཱརཱསུ། ཨསྶམཔདེནཱཏི ཨསྶམཔདཝེམཛ྄ཛྷེན། ཨེཝཾ ཙིནྟཡིཾསཱུཏི ‘‘ཡཾ ནཱུན མཡ’’ནྟིཨཱདིནཱ ཡཐཱ པཱལི༹ཡཾ ཨཱགཏཾ, ཨེཝཾ མནྟཡིཾསུ།
256.Cakkavāḷamahāsamuddapiṭṭhiyanti cakkavāḷapabbatapādasamantā mahāsamuddatīrapiṭṭhiyaṃ. Yatheva sinerusamīpe mahāsamuddo anupubbaninno anupubbapoṇo anupubbapabbhāro, evaṃ yebhuyyena cakkavāḷapādasamīpepi. Tenāha ‘‘rajatapaṭṭavaṇṇe vālukapuline’’ti. Vuttappakārāsūti anantarasutte vuttappakārāsu. Assamapadenāti assamapadavemajjhena. Evaṃ cintayiṃsūti ‘‘yaṃ nūna maya’’ntiādinā yathā pāḷiyaṃ āgataṃ, evaṃ mantayiṃsu.
ཨིཙྪིཏཀརོཏི ཡདིཙྪིཏཀརཎཾ། དུཊྛཱནནྟི དུརཱསཡཱནཾ། ཏེ པན དུཊྛཛ྄ཛྷཱསཡཱ ཝིརུདྡྷཱ ཧོནྟཱིཏི ཨཱཧ ‘‘དུཊྛཱནཾ ཝིརུདྡྷཱན’’ནྟི། པཝུཏྟནྟི བཱིཛཾ སནྡྷཱཡ ཝཔིཏཾ། ཏེནཱཧ ‘‘ཁེཏྟེ པཏིཊྛཱཔིཏ’’ནྟི།
Icchitakaroti yadicchitakaraṇaṃ. Duṭṭhānanti durāsayānaṃ. Te pana duṭṭhajjhāsayā viruddhā hontīti āha ‘‘duṭṭhānaṃ viruddhāna’’nti. Pavuttanti bījaṃ sandhāya vapitaṃ. Tenāha ‘‘khette patiṭṭhāpita’’nti.
སཱཡམཱསབྷཏྟནྟི སཱཡཾ ཨསིཏབྦབྷོཛནཾ། ཡཐཱཝཱརཾ བྷཀྑིཏམེཏཾ དེཝཱནཾ ཝིཡ སུཁུམཾ གུརུཝཱསཉྩ ན ཧོཏཱིཏི ‘‘བྷཏྟ’’ནྟི ཝུཏྟཾ། གེལཉྙཛཱཏནྟི སཉྫཱཏགེལཉྙཾ། ཝེཔཏཱིཏི ཀམྤཏི པཝེདྷཏི།
Sāyamāsabhattanti sāyaṃ asitabbabhojanaṃ. Yathāvāraṃ bhakkhitametaṃ devānaṃ viya sukhumaṃ guruvāsañca na hotīti ‘‘bhatta’’nti vuttaṃ. Gelaññajātanti sañjātagelaññaṃ. Vepatīti kampati pavedhati.
སམུདྡཀསུཏྟཝཎྞནཱ ནིཊྛིཏཱ།
Samuddakasuttavaṇṇanā niṭṭhitā.
པཋམཝགྒཝཎྞནཱ ནིཊྛིཏཱ།
Paṭhamavaggavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༡༠. སམུདྡཀསུཏྟཾ • 10. Samuddakasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡༠. སམུདྡཀསུཏྟཝཎྞནཱ • 10. Samuddakasuttavaṇṇanā
