| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೪. ಸಾಮುಗಿಯಸುತ್ತಂ
4. Sāmugiyasuttaṃ
೧೯೪. ಏಕಂ ಸಮಯಂ ಆಯಸ್ಮಾ ಆನನ್ದೋ ಕೋಲಿಯೇಸು ವಿಹರತಿ ಸಾಮುಗಂ ನಾಮ 1 ಕೋಲಿಯಾನಂ ನಿಗಮೋ। ಅಥ ಖೋ ಸಮ್ಬಹುಲಾ ಸಾಮುಗಿಯಾ ಕೋಲಿಯಪುತ್ತಾ ಯೇನಾಯಸ್ಮಾ ಆನನ್ದೋ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ಆಯಸ್ಮನ್ತಂ ಆನನ್ದಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿಂಸು। ಏಕಮನ್ತಂ ನಿಸಿನ್ನೇ ಖೋ ತೇ ಸಾಮುಗಿಯೇ ಕೋಲಿಯಪುತ್ತೇ ಆಯಸ್ಮಾ ಆನನ್ದೋ ಏತದವೋಚ –
194. Ekaṃ samayaṃ āyasmā ānando koliyesu viharati sāmugaṃ nāma 2 koliyānaṃ nigamo. Atha kho sambahulā sāmugiyā koliyaputtā yenāyasmā ānando tenupasaṅkamiṃsu; upasaṅkamitvā āyasmantaṃ ānandaṃ abhivādetvā ekamantaṃ nisīdiṃsu. Ekamantaṃ nisinne kho te sāmugiye koliyaputte āyasmā ānando etadavoca –
‘‘ಚತ್ತಾರಿಮಾನಿ, ಬ್ಯಗ್ಘಪಜ್ಜಾ, ಪಾರಿಸುದ್ಧಿಪಧಾನಿಯಙ್ಗಾನಿ ತೇನ ಭಗವತಾ ಜಾನತಾ ಪಸ್ಸತಾ ಅರಹತಾ ಸಮ್ಮಾಸಮ್ಬುದ್ಧೇನ ಸಮ್ಮದಕ್ಖಾತಾನಿ ಸತ್ತಾನಂ ವಿಸುದ್ಧಿಯಾ ಸೋಕಪರಿದೇವಾನಂ 3 ಸಮತಿಕ್ಕಮಾಯ ದುಕ್ಖದೋಮನಸ್ಸಾನಂ ಅತ್ಥಙ್ಗಮಾಯ ಞಾಯಸ್ಸ ಅಧಿಗಮಾಯ ನಿಬ್ಬಾನಸ್ಸ ಸಚ್ಛಿಕಿರಿಯಾಯ। ಕತಮಾನಿ ಚತ್ತಾರಿ? ಸೀಲಪಾರಿಸುದ್ಧಿಪಧಾನಿಯಙ್ಗಂ, ಚಿತ್ತಪಾರಿಸುದ್ಧಿಪಧಾನಿಯಙ್ಗಂ , ದಿಟ್ಠಿಪಾರಿಸುದ್ಧಿಪಧಾನಿಯಙ್ಗಂ, ವಿಮುತ್ತಿಪಾರಿಸುದ್ಧಿಪಧಾನಿಯಙ್ಗಂ।
‘‘Cattārimāni, byagghapajjā, pārisuddhipadhāniyaṅgāni tena bhagavatā jānatā passatā arahatā sammāsambuddhena sammadakkhātāni sattānaṃ visuddhiyā sokaparidevānaṃ 4 samatikkamāya dukkhadomanassānaṃ atthaṅgamāya ñāyassa adhigamāya nibbānassa sacchikiriyāya. Katamāni cattāri? Sīlapārisuddhipadhāniyaṅgaṃ, cittapārisuddhipadhāniyaṅgaṃ , diṭṭhipārisuddhipadhāniyaṅgaṃ, vimuttipārisuddhipadhāniyaṅgaṃ.
‘‘ಕತಮಞ್ಚ , ಬ್ಯಗ್ಘಪಜ್ಜಾ, ಸೀಲಪಾರಿಸುದ್ಧಿಪಧಾನಿಯಙ್ಗಂ? ಇಧ, ಬ್ಯಗ್ಘಪಜ್ಜಾ, ಭಿಕ್ಖು ಸೀಲವಾ ಹೋತಿ…ಪೇ॰… ಸಮಾದಾಯ ಸಿಕ್ಖತಿ ಸಿಕ್ಖಾಪದೇಸು। ಅಯಂ ವುಚ್ಚತಿ, ಬ್ಯಗ್ಘಪಜ್ಜಾ, ಸೀಲಪಾರಿಸುದ್ಧಿ। ಇತಿ ಏವರೂಪಿಂ ಸೀಲಪಾರಿಸುದ್ಧಿಂ ಅಪರಿಪೂರಂ ವಾ ಪರಿಪೂರೇಸ್ಸಾಮಿ ಪರಿಪೂರಂ ವಾ ತತ್ಥ ತತ್ಥ ಪಞ್ಞಾಯ ಅನುಗ್ಗಹೇಸ್ಸಾಮೀತಿ, ಯೋ ತತ್ಥ ಛನ್ದೋ ಚ ವಾಯಾಮೋ ಚ ಉಸ್ಸಾಹೋ ಚ ಉಸ್ಸೋಳ್ಹೀ ಚ ಅಪ್ಪಟಿವಾನೀ ಚ ಸತಿ ಚ ಸಮ್ಪಜಞ್ಞಞ್ಚ, ಇದಂ ವುಚ್ಚತಿ, ಬ್ಯಗ್ಘಪಜ್ಜಾ, ಸೀಲಪಾರಿಸುದ್ಧಿಪಧಾನಿಯಙ್ಗಂ।
‘‘Katamañca , byagghapajjā, sīlapārisuddhipadhāniyaṅgaṃ? Idha, byagghapajjā, bhikkhu sīlavā hoti…pe… samādāya sikkhati sikkhāpadesu. Ayaṃ vuccati, byagghapajjā, sīlapārisuddhi. Iti evarūpiṃ sīlapārisuddhiṃ aparipūraṃ vā paripūressāmi paripūraṃ vā tattha tattha paññāya anuggahessāmīti, yo tattha chando ca vāyāmo ca ussāho ca ussoḷhī ca appaṭivānī ca sati ca sampajaññañca, idaṃ vuccati, byagghapajjā, sīlapārisuddhipadhāniyaṅgaṃ.
‘‘ಕತಮಞ್ಚ, ಬ್ಯಗ್ಘಪಜ್ಜಾ, ಚಿತ್ತಪಾರಿಸುದ್ಧಿಪಧಾನಿಯಙ್ಗಂ? ಇಧ, ಬ್ಯಗ್ಘಪಜ್ಜಾ, ಭಿಕ್ಖು ವಿವಿಚ್ಚೇವ ಕಾಮೇಹಿ…ಪೇ॰… ಚತುತ್ಥಂ ಝಾನಂ ಉಪಸಮ್ಪಜ್ಜ ವಿಹರತಿ। ಅಯಂ ವುಚ್ಚತಿ, ಬ್ಯಗ್ಘಪಜ್ಜಾ, ಚಿತ್ತಪಾರಿಸುದ್ಧಿ। ಇತಿ ಏವರೂಪಿಂ ಚಿತ್ತಪಾರಿಸುದ್ಧಿಂ ಅಪರಿಪೂರಂ ವಾ ಪರಿಪೂರೇಸ್ಸಾಮಿ ಪರಿಪೂರಂ ವಾ ತತ್ಥ ತತ್ಥ ಪಞ್ಞಾಯ ಅನುಗ್ಗಹೇಸ್ಸಾಮೀತಿ, ಯೋ ತತ್ಥ ಛನ್ದೋ ಚ ವಾಯಾಮೋ ಚ ಉಸ್ಸಾಹೋ ಚ ಉಸ್ಸೋಳ್ಹೀ ಚ ಅಪ್ಪಟಿವಾನೀ ಚ ಸತಿ ಚ ಸಮ್ಪಜಞ್ಞಞ್ಚ, ಇದಂ ವುಚ್ಚತಿ, ಬ್ಯಗ್ಘಪಜ್ಜಾ, ಚಿತ್ತಪಾರಿಸುದ್ಧಿಪಧಾನಿಯಙ್ಗಂ।
‘‘Katamañca, byagghapajjā, cittapārisuddhipadhāniyaṅgaṃ? Idha, byagghapajjā, bhikkhu vivicceva kāmehi…pe… catutthaṃ jhānaṃ upasampajja viharati. Ayaṃ vuccati, byagghapajjā, cittapārisuddhi. Iti evarūpiṃ cittapārisuddhiṃ aparipūraṃ vā paripūressāmi paripūraṃ vā tattha tattha paññāya anuggahessāmīti, yo tattha chando ca vāyāmo ca ussāho ca ussoḷhī ca appaṭivānī ca sati ca sampajaññañca, idaṃ vuccati, byagghapajjā, cittapārisuddhipadhāniyaṅgaṃ.
‘‘ಕತಮಞ್ಚ, ಬ್ಯಗ್ಘಪಜ್ಜಾ, ದಿಟ್ಠಿಪಾರಿಸುದ್ಧಿಪಧಾನಿಯಙ್ಗಂ? ಇಧ, ಬ್ಯಗ್ಘಪಜ್ಜಾ, ಭಿಕ್ಖು ‘ಇದಂ ದುಕ್ಖ’ನ್ತಿ ಯಥಾಭೂತಂ ಪಜಾನಾತಿ…ಪೇ॰… ‘ಅಯಂ ದುಕ್ಖನಿರೋಧಗಾಮಿನೀ ಪಟಿಪದಾ’ತಿ ಯಥಾಭೂತಂ ಪಜಾನಾತಿ। ಅಯಂ ವುಚ್ಚತಿ, ಬ್ಯಗ್ಘಪಜ್ಜಾ, ದಿಟ್ಠಿಪಾರಿಸುದ್ಧಿ। ಇತಿ ಏವರೂಪಿಂ ದಿಟ್ಠಿಪಾರಿಸುದ್ಧಿಂ ಅಪರಿಪೂರಂ ವಾ…ಪೇ॰… ತತ್ಥ ತತ್ಥ ಪಞ್ಞಾಯ ಅನುಗ್ಗಹೇಸ್ಸಾಮೀತಿ, ಯೋ ತತ್ಥ ಛನ್ದೋ ಚ ವಾಯಾಮೋ ಚ ಉಸ್ಸಾಹೋ ಚ ಉಸ್ಸೋಳ್ಹೀ ಚ ಅಪ್ಪಟಿವಾನೀ ಚ ಸತಿ ಚ ಸಮ್ಪಜಞ್ಞಞ್ಚ, ಇದಂ ವುಚ್ಚತಿ, ಬ್ಯಗ್ಘಪಜ್ಜಾ, ದಿಟ್ಠಿಪಾರಿಸುದ್ಧಿಪಧಾನಿಯಙ್ಗಂ ।
‘‘Katamañca, byagghapajjā, diṭṭhipārisuddhipadhāniyaṅgaṃ? Idha, byagghapajjā, bhikkhu ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti. Ayaṃ vuccati, byagghapajjā, diṭṭhipārisuddhi. Iti evarūpiṃ diṭṭhipārisuddhiṃ aparipūraṃ vā…pe… tattha tattha paññāya anuggahessāmīti, yo tattha chando ca vāyāmo ca ussāho ca ussoḷhī ca appaṭivānī ca sati ca sampajaññañca, idaṃ vuccati, byagghapajjā, diṭṭhipārisuddhipadhāniyaṅgaṃ .
‘‘ಕತಮಞ್ಚ, ಬ್ಯಗ್ಘಪಜ್ಜಾ, ವಿಮುತ್ತಿಪಾರಿಸುದ್ಧಿಪಧಾನಿಯಙ್ಗಂ? ಸ ಖೋ ಸೋ, ಬ್ಯಗ್ಘಪಜ್ಜಾ, ಅರಿಯಸಾವಕೋ ಇಮಿನಾ ಚ ಸೀಲಪಾರಿಸುದ್ಧಿಪಧಾನಿಯಙ್ಗೇನ ಸಮನ್ನಾಗತೋ ಇಮಿನಾ ಚ ಚಿತ್ತಪಾರಿಸುದ್ಧಿಪಧಾನಿಯಙ್ಗೇನ ಸಮನ್ನಾಗತೋ ಇಮಿನಾ ಚ ದಿಟ್ಠಿಪಾರಿಸುದ್ಧಿಪಧಾನಿಯಙ್ಗೇನ ಸಮನ್ನಾಗತೋ ರಜನೀಯೇಸು ಧಮ್ಮೇಸು ಚಿತ್ತಂ ವಿರಾಜೇತಿ, ವಿಮೋಚನೀಯೇಸು ಧಮ್ಮೇಸು ಚಿತ್ತಂ ವಿಮೋಚೇತಿ। ಸೋ ರಜನೀಯೇಸು ಧಮ್ಮೇಸು ಚಿತ್ತಂ ವಿರಾಜೇತ್ವಾ, ವಿಮೋಚನೀಯೇಸು ಧಮ್ಮೇಸು ಚಿತ್ತಂ ವಿಮೋಚೇತ್ವಾ ಸಮ್ಮಾವಿಮುತ್ತಿಂ ಫುಸತಿ। ಅಯಂ ವುಚ್ಚತಿ, ಬ್ಯಗ್ಘಪಜ್ಜಾ, ವಿಮುತ್ತಿಪಾರಿಸುದ್ಧಿ। ಇತಿ ಏವರೂಪಿಂ ವಿಮುತ್ತಿಪಾರಿಸುದ್ಧಿಂ ಅಪರಿಪೂರಂ ವಾ ಪರಿಪೂರೇಸ್ಸಾಮಿ ಪರಿಪೂರಂ ವಾ ತತ್ಥ ತತ್ಥ ಪಞ್ಞಾಯ ಅನುಗ್ಗಹೇಸ್ಸಾಮೀತಿ, ಯೋ ತತ್ಥ ಛನ್ದೋ ಚ ವಾಯಾಮೋ ಚ ಉಸ್ಸಾಹೋ ಚ ಉಸ್ಸೋಳ್ಹೀ ಚ ಅಪ್ಪಟಿವಾನೀ ಚ ಸತಿ ಚ ಸಮ್ಪಜಞ್ಞಞ್ಚ, ಇದಂ ವುಚ್ಚತಿ, ಬ್ಯಗ್ಘಪಜ್ಜಾ, ವಿಮುತ್ತಿಪಾರಿಸುದ್ಧಿಪಧಾನಿಯಙ್ಗಂ।
‘‘Katamañca, byagghapajjā, vimuttipārisuddhipadhāniyaṅgaṃ? Sa kho so, byagghapajjā, ariyasāvako iminā ca sīlapārisuddhipadhāniyaṅgena samannāgato iminā ca cittapārisuddhipadhāniyaṅgena samannāgato iminā ca diṭṭhipārisuddhipadhāniyaṅgena samannāgato rajanīyesu dhammesu cittaṃ virājeti, vimocanīyesu dhammesu cittaṃ vimoceti. So rajanīyesu dhammesu cittaṃ virājetvā, vimocanīyesu dhammesu cittaṃ vimocetvā sammāvimuttiṃ phusati. Ayaṃ vuccati, byagghapajjā, vimuttipārisuddhi. Iti evarūpiṃ vimuttipārisuddhiṃ aparipūraṃ vā paripūressāmi paripūraṃ vā tattha tattha paññāya anuggahessāmīti, yo tattha chando ca vāyāmo ca ussāho ca ussoḷhī ca appaṭivānī ca sati ca sampajaññañca, idaṃ vuccati, byagghapajjā, vimuttipārisuddhipadhāniyaṅgaṃ.
‘‘ಇಮಾನಿ ಖೋ, ಬ್ಯಗ್ಘಪಜ್ಜಾ, ಚತ್ತಾರಿ ಪಾರಿಸುದ್ಧಿಪಧಾನಿಯಙ್ಗಾನಿ ತೇನ ಭಗವತಾ ಜಾನತಾ ಪಸ್ಸತಾ ಅರಹತಾ ಸಮ್ಮಾಸಮ್ಬುದ್ಧೇನ ಸಮ್ಮದಕ್ಖಾತಾನಿ ಸತ್ತಾನಂ ವಿಸುದ್ಧಿಯಾ ಸೋಕಪರಿದೇವಾನಂ ಸಮತಿಕ್ಕಮಾಯ ದುಕ್ಖದೋಮನಸ್ಸಾನಂ ಅತ್ಥಙ್ಗಮಾಯ ಞಾಯಸ್ಸ ಅಧಿಗಮಾಯ ನಿಬ್ಬಾನಸ್ಸ ಸಚ್ಛಿಕಿರಿಯಾಯಾ’’ತಿ। ಚತುತ್ಥಂ।
‘‘Imāni kho, byagghapajjā, cattāri pārisuddhipadhāniyaṅgāni tena bhagavatā jānatā passatā arahatā sammāsambuddhena sammadakkhātāni sattānaṃ visuddhiyā sokaparidevānaṃ samatikkamāya dukkhadomanassānaṃ atthaṅgamāya ñāyassa adhigamāya nibbānassa sacchikiriyāyā’’ti. Catutthaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೪. ಸಾಮುಗಿಯಾಸುತ್ತವಣ್ಣನಾ • 4. Sāmugiyāsuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೪. ಸಾಮುಗಿಯಸುತ್ತವಣ್ಣನಾ • 4. Sāmugiyasuttavaṇṇanā
