| Library / Tipiṭaka / д̇ибидага • Tipiṭaka / махаавибхан̇г̇а-адтагат̇аа • Mahāvibhaṅga-aṭṭhakathā |
7. сам̣вид̇хаанасигкаабад̣̇аван̣н̣анаа
7. Saṃvidhānasikkhāpadavaṇṇanā
181. сад̇д̇амасигкаабад̣̇з – бажчаа г̇ажчанд̇ийнам̣ жораа ажчинд̣̇им̣сууд̇и бажчаа г̇ажчанд̇ийнам̣ бад̇д̇ажийварам̣ жораа харим̣су. д̣̇уусзсунд̇и д̇аа бхигкунияо жораа д̣̇уусаяим̣су, сийлавинаасам̣ баабаяим̣сууд̇и ад̇т̇о .
181. Sattamasikkhāpade – pacchā gacchantīnaṃ corā acchindiṃsūti pacchā gacchantīnaṃ pattacīvaraṃ corā hariṃsu. Dūsesunti tā bhikkhuniyo corā dūsayiṃsu, sīlavināsaṃ pāpayiṃsūti attho .
182-3. сам̣вид̇хааяаад̇и сам̣вид̣̇ахид̇ваа, г̇аманагаалз сан̇гзд̇ам̣ гад̇ваад̇и ад̇т̇о. гуггудасамбаад̣̇зд̇и зд̇т̇а яасмаа г̇аамаа нигкамид̇ваа гуггудо бад̣̇асаава ан̃н̃ам̣ г̇аамам̣ г̇ажчад̇и, аяам̣ гуггудасамбаад̣̇од̇и вужжад̇и. д̇ад̇рааяам̣ важанад̇т̇о – самбад̣̇анд̇и зд̇т̇аад̇и самбаад̣̇о. гз самбад̣̇анд̇и? гуггудаа. гуггудаанам̣ самбаад̣̇о гуггудасамбаад̣̇о. ат̇а ваа самбаад̣̇од̇и г̇аманам̣, гуггудаанам̣ самбаад̣̇о зд̇т̇а ад̇т̇ийд̇иби гуггудасамбаад̣̇о. гуггудасамбаад̇з ид̇иби баато, д̇ад̇т̇а яасса г̇аамасса г̇зхажчад̣̇анабидтид̇о гуггудо уббад̇ид̇ваа ан̃н̃асса г̇зхажчад̣̇анабидтияам̣ бад̇ад̇и, аяам̣ гуггудасамбаад̇од̇и вужжад̇и. важанад̇т̇о банзд̇т̇а вуд̇д̇анаязнзва взд̣̇ид̇аб̣б̣о. д̣̇вид̇хаа вуд̇д̇аббагаароби жзса г̇аамо ажжаасанно ход̇и, убажааро на лаб̣бхад̇и. яасмим̣ бана г̇аамз бажжуусз вассанд̇асса гуггудасса сад̣̇д̣̇о ананд̇арз г̇аамз суяяад̇и, д̇аад̣̇исзхи г̇аамзхи самбун̣н̣арадтз г̇ааманд̇арз г̇ааманд̇арз баажид̇д̇ияанд̇и адтагат̇ааяам̣ вуд̇д̇ам̣. гин̃жааби вуд̇д̇ам̣, ‘‘г̇ааманд̇арз г̇ааманд̇арз аабад̇д̇и баажид̇д̇ияассаа’’д̇и важанад̇о бана сажзби рад̇анамад̇д̇анд̇аро г̇аамо ход̇и, яо д̇асса мануссзхи табид̇аубажааро, д̇ам̣ оггаманд̇асса аабад̇д̇иязва.
182-3.Saṃvidhāyāti saṃvidahitvā, gamanakāle saṅketaṃ katvāti attho. Kukkuṭasampādeti ettha yasmā gāmā nikkhamitvā kukkuṭo padasāva aññaṃ gāmaṃ gacchati, ayaṃ kukkuṭasampādoti vuccati. Tatrāyaṃ vacanattho – sampadanti etthāti sampādo. Ke sampadanti? Kukkuṭā. Kukkuṭānaṃ sampādo kukkuṭasampādo. Atha vā sampādoti gamanaṃ, kukkuṭānaṃ sampādo ettha atthītipi kukkuṭasampādo. Kukkuṭasampāte itipi pāṭho, tattha yassa gāmassa gehacchadanapiṭṭhito kukkuṭo uppatitvā aññassa gehacchadanapiṭṭhiyaṃ patati, ayaṃ kukkuṭasampātoti vuccati. Vacanattho panettha vuttanayeneva veditabbo. Dvidhā vuttappakāropi cesa gāmo accāsanno hoti, upacāro na labbhati. Yasmiṃ pana gāme paccūse vassantassa kukkuṭassa saddo anantare gāme suyyati, tādisehi gāmehi sampuṇṇaraṭṭhe gāmantare gāmantare pācittiyanti aṭṭhakathāyaṃ vuttaṃ. Kiñcāpi vuttaṃ, ‘‘gāmantare gāmantare āpatti pācittiyassā’’ti vacanato pana sacepi ratanamattantaro gāmo hoti, yo tassa manussehi ṭhapitaupacāro, taṃ okkamantassa āpattiyeva.
д̇ад̇рааяам̣ аабад̇д̇ивинижчаяо – сам̣вид̇хаанагаалз хи сажз убхоби бхигкунубассаяз ваа анд̇араараамз ваа аасанасаалааяа ваа д̇ид̇т̇ияасзяяааяа ваа тад̇ваа сам̣вид̣̇аханд̇и, анаабад̇д̇и габбияабхууми гирааяам̣. д̇асмаа зд̇т̇а сам̣вид̣̇аханабажжаяаа д̣̇уггадаабад̇д̇им̣ на вад̣̇анд̇и, г̇ажчанд̇асса яат̇аавад̇т̇угамзва. сажз бана анд̇ог̇аамз бхигкунубассаяад̣̇ваарз рат̇игааяа ан̃н̃зсу ваа жад̇уггасин̇гхаадагахад̇т̇исаалаад̣̇ийсу сам̣вид̣̇аханд̇и, бхигкуно аабад̇д̇и д̣̇уггадасса. звам̣ сам̣вид̣̇ахид̇ваа г̇аамад̇о нигкаманд̇и, нигкаманз анаабад̇д̇и, ананд̇араг̇аамасса убажаароггаманз бана бхигкуно баажид̇д̇ияам̣. д̇ад̇рааби ‘‘батамабаад̣̇з д̣̇уггадам̣, д̣̇уд̇ияабаад̣̇з баажид̇д̇ияа’’нд̇и махаабажжарияам̣ вуд̇д̇ам̣. г̇аамад̇о нигкамид̇ваа бана яаава ананд̇араг̇аамасса убажаарам̣ на оггаманд̇и , зд̇т̇анд̇арз сам̣вид̣̇ахид̇зби бхигкуно д̣̇уггадам̣, ананд̇араг̇аамасса убажаароггаманз буриманаязнзва аабад̇д̇и. сажз д̣̇уурам̣ г̇анд̇угаамаа хонд̇и, г̇аамуубажаараг̇ан̣анааяа оггаманз оггаманз аабад̇д̇и, д̇асса д̇асса бана г̇аамасса ад̇иггаманз анаабад̇д̇и. сажз бана бхигкуний ‘‘асугам̣ наама г̇аамам̣ г̇амиссаамий’’д̇и убассаяад̇о нигкамад̇и, бхигкуби д̇амзва г̇аамам̣ санд̇хааяа ‘‘асугам̣ наама г̇аамам̣ г̇амиссаамий’’д̇и вихаарад̇о нигкамад̇и. ат̇а д̣̇взби г̇аамад̣̇ваарз самааг̇анд̇ваа ‘‘д̇умхз гухим̣ г̇ажчат̇а, асугам̣ наама г̇аамам̣ д̇умхз гухинд̇и, маяамби д̇ад̇т̇зваа’’д̇и вад̇ваа ‘‘зхи д̣̇аани, г̇ажчаамаа’’д̇и сам̣вид̇хааяа г̇ажчанд̇и, анаабад̇д̇и. гасмаа? буб̣б̣амзва г̇амиссаамаад̇и нигканд̇ад̇д̇аад̇и махаабажжарияам̣ вуд̇д̇ам̣. д̇ам̣ нзва баал̣ияаа на сзсаадтагат̇ааяа самзд̇и.
Tatrāyaṃ āpattivinicchayo – saṃvidhānakāle hi sace ubhopi bhikkhunupassaye vā antarārāme vā āsanasālāya vā titthiyaseyyāya vā ṭhatvā saṃvidahanti, anāpatti kappiyabhūmi kirāyaṃ. Tasmā ettha saṃvidahanapaccayā dukkaṭāpattiṃ na vadanti, gacchantassa yathāvatthukameva. Sace pana antogāme bhikkhunupassayadvāre rathikāya aññesu vā catukkasiṅghāṭakahatthisālādīsu saṃvidahanti, bhikkhuno āpatti dukkaṭassa. Evaṃ saṃvidahitvā gāmato nikkhamanti, nikkhamane anāpatti, anantaragāmassa upacārokkamane pana bhikkhuno pācittiyaṃ. Tatrāpi ‘‘paṭhamapāde dukkaṭaṃ, dutiyapāde pācittiya’’nti mahāpaccariyaṃ vuttaṃ. Gāmato nikkhamitvā pana yāva anantaragāmassa upacāraṃ na okkamanti , etthantare saṃvidahitepi bhikkhuno dukkaṭaṃ, anantaragāmassa upacārokkamane purimanayeneva āpatti. Sace dūraṃ gantukāmā honti, gāmūpacāragaṇanāya okkamane okkamane āpatti, tassa tassa pana gāmassa atikkamane anāpatti. Sace pana bhikkhunī ‘‘asukaṃ nāma gāmaṃ gamissāmī’’ti upassayato nikkhamati, bhikkhupi tameva gāmaṃ sandhāya ‘‘asukaṃ nāma gāmaṃ gamissāmī’’ti vihārato nikkhamati. Atha dvepi gāmadvāre samāgantvā ‘‘tumhe kuhiṃ gacchatha, asukaṃ nāma gāmaṃ tumhe kuhinti, mayampi tatthevā’’ti vatvā ‘‘ehi dāni, gacchāmā’’ti saṃvidhāya gacchanti, anāpatti. Kasmā? Pubbameva gamissāmāti nikkhantattāti mahāpaccariyaṃ vuttaṃ. Taṃ neva pāḷiyā na sesaaṭṭhakathāya sameti.
ад̣̇д̇хаяож̇анз ад̣̇д̇хаяож̇анзд̇и згамзгам̣ ад̣̇д̇хаяож̇анам̣ ад̇иггаманд̇асса ид̣̇аани ад̇иггамиссад̇ийд̇и батамабаад̣̇з д̣̇уггадам̣, д̣̇уд̇ияабаад̣̇з баажид̇д̇ияам̣. имасмин̃хи наяз ад̇иггаманз аабад̇д̇и, оггаманз анаабад̇д̇и.
Addhayojane addhayojaneti ekamekaṃ addhayojanaṃ atikkamantassa idāni atikkamissatīti paṭhamapāde dukkaṭaṃ, dutiyapāde pācittiyaṃ. Imasmiñhi naye atikkamane āpatti, okkamane anāpatti.
184. бхигку сам̣вид̣̇ахад̇ийд̇и наг̇арад̣̇ваарз ваа рат̇игааяа ваа бхигкуним̣ д̣̇исваа ‘‘асугам̣ г̇аамам̣ наама г̇ад̇абуб̣б̣ад̇т̇аа’’д̇и вад̣̇ад̇и, ‘‘наамхи аяяа г̇ад̇абуб̣б̣аа’’д̇и ‘‘зхи г̇ажчаамаа’’д̇и ваа ‘‘свз ахам̣ г̇амиссаами, д̇вамби ааг̇ажчзяяаасий’’д̇и ваа вад̣̇ад̇и. бхигкуний сам̣вид̣̇ахад̇ийд̇и г̇ааманд̇арз жзд̇ияаванд̣̇анад̇т̇ам̣ г̇аамад̇о нигкаманд̇ам̣ бхигкум̣ д̣̇исваа ‘‘аяяа гухим̣ г̇ажчат̇аа’’д̇и вад̣̇ад̇и. ‘‘асугам̣ наама г̇аамам̣ жзд̇ияаванд̣̇анад̇т̇а’’нд̇и. ‘‘ахамби аяяа ааг̇ажчаамий’’д̇и звам̣ бхигкунийязва сам̣вид̣̇ахад̇и, на бхигку.
184.Bhikkhu saṃvidahatīti nagaradvāre vā rathikāya vā bhikkhuniṃ disvā ‘‘asukaṃ gāmaṃ nāma gatapubbatthā’’ti vadati, ‘‘nāmhi ayya gatapubbā’’ti ‘‘ehi gacchāmā’’ti vā ‘‘sve ahaṃ gamissāmi, tvampi āgaccheyyāsī’’ti vā vadati. Bhikkhunī saṃvidahatīti gāmantare cetiyavandanatthaṃ gāmato nikkhamantaṃ bhikkhuṃ disvā ‘‘ayya kuhiṃ gacchathā’’ti vadati. ‘‘Asukaṃ nāma gāmaṃ cetiyavandanattha’’nti. ‘‘Ahampi ayya āgacchāmī’’ti evaṃ bhikkhunīyeva saṃvidahati, na bhikkhu.
185. висан̇гзд̇знаад̇и зд̇т̇а ‘‘бурзбхад̇д̇ам̣ г̇ажчиссаамаа’’д̇и вад̇ваа бажчаабхад̇д̇ам̣ г̇ажчанд̇и, ‘‘аж̇ж̇а ваа г̇амиссаамаа’’д̇и вад̇ваа свз г̇ажчанд̇и. звам̣ гаалависан̇гзд̇зязва анаабад̇д̇и, д̣̇ваарависан̇гзд̇з бана маг̇г̇ависан̇гзд̇з ваа сад̇иби аабад̇д̇иязва. аабад̣̇аасууд̇и радтабхзд̣̇з жаггасамаарул̣хаа ж̇анабад̣̇аа барияааяанд̇и зваруубаасу аабад̣̇аасу анаабад̇д̇и. сзсам̣ уд̇д̇аанамзваад̇и.
185.Visaṅketenāti ettha ‘‘purebhattaṃ gacchissāmā’’ti vatvā pacchābhattaṃ gacchanti, ‘‘ajja vā gamissāmā’’ti vatvā sve gacchanti. Evaṃ kālavisaṅketeyeva anāpatti, dvāravisaṅkete pana maggavisaṅkete vā satipi āpattiyeva. Āpadāsūti raṭṭhabhede cakkasamāruḷhā janapadā pariyāyanti evarūpāsu āpadāsu anāpatti. Sesaṃ uttānamevāti.
жад̇усамудтаанам̣ – гааяад̇о гааяаваажад̇о гааяажид̇д̇ад̇о гааяаваажаажид̇д̇ад̇о жа самудтаад̇и, гирияам̣, носан̃н̃аавимогкам̣, ажид̇д̇агам̣, бан̣н̣ад̇д̇иваж̇ж̇ам̣, гааяагаммам̣, важийгаммам̣, д̇ижид̇д̇ам̣, д̇ивзд̣̇ананд̇и.
Catusamuṭṭhānaṃ – kāyato kāyavācato kāyacittato kāyavācācittato ca samuṭṭhāti, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
сам̣вид̇хаанасигкаабад̣̇ам̣ сад̇д̇амам̣.
Saṃvidhānasikkhāpadaṃ sattamaṃ.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 3. оваад̣̇аваг̇г̇о • 3. Ovādavaggo
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 7. сам̣вид̣̇аханасигкаабад̣̇аван̣н̣анаа • 7. Saṃvidahanasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 7. сам̣вид̇хаанасигкаабад̣̇аван̣н̣анаа • 7. Saṃvidhānasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 7. сам̣вид̇хаанасигкаабад̣̇аван̣н̣анаа • 7. Saṃvidhānasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 7. сам̣вид̇хаанасигкаабад̣̇ам̣ • 7. Saṃvidhānasikkhāpadaṃ
