| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၆. သံယောဇနသုတ္တဝဏ္ဏနာ
6. Saṃyojanasuttavaṇṇanā
၆. ဆဋ္ဌေ သံယောဇနိယေသု ဓမ္မေသူတိ ဒသန္နံ သံယောဇနာနံ ပစ္စယဘူတေသု တေဘူမကဓမ္မေသု။ အသ္သာဒာနုပသ္သိတာတိ အသ္သာဒတော ပသ္သိတာ ပသ္သနဘာဝောတိ အတ္ထော။ နိဗ္ဗိဒာနုပသ္သိတာတိ နိဗ္ဗိဒာဝသေန ဥက္ကဏ္ဌနဝသေန ပသ္သနဘာဝော။ ဇာတိယာတိ ခန္ဓနိဗ္ဗတ္တိတော။ ဇရာယာတိ ခန္ဓပရိပာကတော။ မရဏေနာတိ ခန္ဓဘေဒတော။ သောကေဟီတိ အန္တောနိဇ္ဈာယနလက္ခဏေဟိ သောကေဟိ။ ပရိဒေဝေဟီတိ တန္နိသ္သိတလာလပ္ပိတလက္ခဏေဟိ ပရိဒေဝေဟိ။ ဒုက္ခေဟီတိ ကာယပဋိပီဠနဒုက္ခေဟိ။ ဒောမနသ္သေဟီတိ မနောဝိဃာတဒောမနသ္သေဟိ။ ဥပာယာသေဟီတိ အဓိမတ္တာယာသလက္ခဏဥပာယာသေဟိ။ ဒုက္ခသ္မာတိ သကလဝဋ္ဋဒုက္ခတော။ ပဇဟတီတိ မဂ္ဂေန ပဇဟတိ။ ပဟာယာတိ ဧတ္ထ ပန ဖလက္ခဏော ကထိတော။ ဣမသ္မိံ သုတ္တေ ဝဋ္ဋဝိဝဋ္ဋံ ကထိတံ။ ဆဋ္ဌံ။
6. Chaṭṭhe saṃyojaniyesu dhammesūti dasannaṃ saṃyojanānaṃ paccayabhūtesu tebhūmakadhammesu. Assādānupassitāti assādato passitā passanabhāvoti attho. Nibbidānupassitāti nibbidāvasena ukkaṇṭhanavasena passanabhāvo. Jātiyāti khandhanibbattito. Jarāyāti khandhaparipākato. Maraṇenāti khandhabhedato. Sokehīti antonijjhāyanalakkhaṇehi sokehi. Paridevehīti tannissitalālappitalakkhaṇehi paridevehi. Dukkhehīti kāyapaṭipīḷanadukkhehi. Domanassehīti manovighātadomanassehi. Upāyāsehīti adhimattāyāsalakkhaṇaupāyāsehi. Dukkhasmāti sakalavaṭṭadukkhato. Pajahatīti maggena pajahati. Pahāyāti ettha pana phalakkhaṇo kathito. Imasmiṃ sutte vaṭṭavivaṭṭaṃ kathitaṃ. Chaṭṭhaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၆. သံယောဇနသုတ္တံ • 6. Saṃyojanasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၆. သံယောဇနသုတ္တဝဏ္ဏနာ • 6. Saṃyojanasuttavaṇṇanā
